Batumelebi

საქართველოს მოქალაქეს, მილიონერ ბიზნესმენ გალიფ ოზთურქს, რომელიც გუშინწინ, 31 მაისს, ბათუმში სპეცოპერაციით  დააკავეს, ბრალი მხოლოდ ნარკოდანაშაულის მუხლით წარუდგინეს. გალიფ ოზთურქი საქართველოში არაერთ კომპანიას ფლობს „მეტრო ჰოლდინგის“ ქოლგის ქვეშ.

ოზთურქის ადვოკატის, დავით ჩავლეიშვილის თქმით, ბრალდებულს ბრალი სისხლის სამართლის კოდექსის 260-ე მუხლის შესაბამისად წარუდგინეს, რაც გულისხმობს „ნარკოტიკული საშუალების, მისი ანალოგის ან პრეკურსორის უკანონო დამზადებას, წარმოებას, შეძენას, შენახვას, გადაზიდვას ან გადაგზავნას“.

პროკურატურის მიერ დღეს, 2 ივნისს, გავრცელებული ინფორმაციის მიხედვით, „გ.ო.-ს საცხოვრებელ ბინაში  ჩატარებული ჩხრეკის შედეგად, ამოღებული იქნა განსაკუთრებით დიდი ოდენობით – 7,2159  გრ.  ნარკოტიკული საშუალება კოკაინი. „სამართალდამცველებმა გ.ო. იმავე დღეს  დააკავეს. მას ბრალდება საქართველოს სისხლის სამართლის კოდექსის 260-ე მუხლის მეექვსე ნაწილის ,,ა“ ქვეპუნქტით [განსაკუთრებით დიდი ოდენობით ნარკოტიკული საშუალების შეძენა-შენახვა] წარედგინა, რაც სასჯელის სახედ და ზომად 8-დან 20 წლამდე ან უვადო თავისუფლების აღკვეთას ითვალისწინებს,“ – აღნიშნულია პროკურატურის მიერ გავრცელებულ ინფორმაციაში.

„გუშინ, ღამის თორმეტზე, დაახლოებით პირველზე წარუდგინეს ბრალი. ბრალის დეტალებზე ჯერ ვერ დაგელაპარაკებით, რადგან მასთან შეთანხმებული არ ვარ პოზიციებზე, მაგრამ სხვა მუხლებით ბრალი წარდგენილი ნამდვილად არ არის,“ – გვითხრა ადვოკატმა დავით ჩავლეიშვილმა.

ფინანსთა სამინისტროს საგამოძიებო სამსახურმა 31 მაისს გაავრცელა ინფორმაცია, რომ „…მოქალაქე გ.ო.-ს მიერ გამოძიება განსაკუთრებით დიდი ოდენობით გადასახადისთვის განზრახ თავის არიდების, ყალბი საანგარიშსწორებო დოკუმენტების დამზადება-გამოყენებისა და უკანონო შემოსავლის ლეგალიზაციის შესაძლო ფაქტზე მიმდინარე გამოძიების პროცესში, საქმის ვითარების გასარკვევად საჭირო მტკიცებულებების მოპოვების მიზნით, 2022 წლის 31 მაისს, სასამართლოს განჩინებების საფუძველზე, მოქალაქე გ.ო.-სთან, ასევე მასთან დაკავშირებულ პირებთან და კომპანიებში განხორციელდა საგამოძიებო და საპროცესო მოქმედებები.“

საგამოძიებო სამსახური ნარკოდანაშაულთან დაკავშირებითაც აღნიშნავდა შემდეგს:

„გ.ო.-ს საცხოვრებელ მისამართზე, სასამართლოს განჩინების საფუძველზე ჩატარებული ჩხრეკის შედეგად, სხვა ნივთიერ მტკიცებულებებთან ერთად, ამოღებულ იქნა დიდი ოდენობით ფულადი თანხა, ასევე, აღმოჩენილ იქნა სავარაუდოდ ნარკოტიკული და ფსიქოტროპული ნივთიერებები, რასთან დაკავშირებითაც გ.ო. დაკავებულ იქნა საქართველოს სისხლის სამართლის კოდექსის 260-ე და 261-ე მუხლების პირველი ნაწილებით, რაც ითვალისწინებს თავისუფლების აღკვეთას 6 წლამდე ვადით“, – ნათქვამია ფინანსთა სამინისტროს საგამოძიებო სამსახურის მიერ გავრცელებულ ინფორმაციაში.

რას ნიშნავს, როცა საგამოძიებო ორგანო დაკავების დროს ინფორმაციას ავრცელებს „დიდი ოდენობით გადასახადისთვის განზრახ თავის არიდების, ყალბი საანგარიშსწორებო დოკუმენტების დამზადება-გამოყენებისა და უკანონო შემოსავლის ლეგალიზაციის შესაძლო ფაქტზე მიმდინარე გამოძიებაზე“, ხოლო ბრალი ბიზნესმენს მხოლოდ ნარკოდანაშაულისთვის წარუდგინეს? – ადვოკატი დავით ჩავლეიშვილი არ გამორიცხავს, რომ გალიფ ოზთურქს ბრალი სხვა მუხლებითაც წარუდგინონ, რადგან გამოძიება ჯერ არ დასრულებულა.

ადვოკატმა ამ ეტაპზე თავი შეიკავა საგამოძიებო სამსახურის მიერ ჩატარებული საგამოძიებო მოქმედებების, ჩხრეკის და დაკავების პროცედურების სამართლებრივი შეფასებისგან.

გალიფ ოზთურქის აღკვეთი ღონისძიების შეფარდების პროცესი ბათუმის საქალაქო სასამართლოში დღეს, 2 ივნისს გაიმართება.

რას საქმიანობს და ვინ არიან „მეტრო ჰოლდინგთან“ დაკავშირებული კომპანიები? – ვრცლად ნახეთ აქ.

დღეს, პირველ ივნისს, ბავშვთა საერთაშორისო დღეს ბათუმში, თოჯინების თეატრში, ბულვარსა და ბათუმის ცენტრალურ პარკში დიდი ჟრიამული იყო. ატრაქციონები სავსე იყო ბავშვებით. იხატავდნენ ლოყებს, სეირნობდნენ ველოსიპედებით, ასეირნებდნენ ძაღლებს, იღებდნენ ფოტოებს და ერთმანეთის ნახატებს ათვალიერებდნენ.

2022 წელს, უხვთოვლიანი ზამთრის შემდეგ, თურქეთში 2000-ზე მეტი მეწყერი განვითარდა. თურქი სპეციალისტები მიიჩნევენ, რომ ეს მიუთითებს გლობალური დათბობით გამოწვეული კატასტროფული მოვლენის მზარდ რისკზე. ამის შესახებ თურქული მედია წერს.

სტამბოლის ტექნიკური უნივერსიტეტის (ITÜ) ევრაზიის დედამიწის შემსწავლელ მეცნიერებათა ინსტიტუტის ასოცირებული პროფესორი ტოლგა გორუმი ამბობს, რომ მარტსა და აპრილში ჩამოწოლილი მეწყრები განსაკუთრებით დამანგრეველი იყო შავი ზღვის პროვინციებისთვის – ორდუსთვის, სამსუნისა და ტრაპიზონისთვის.

მისი თქმით, გასულ წლებთან შედარებით, შავი ზღვის აღმოსავლეთ რეგიონში მეწყრის ჩამოწოლის შემთხვევები 20-ჯერ მეტია. მეწყრის გამომწვევ მიზეზად კლიმატის ცვლილებები და ნალექის მომატებული რაოდენობა სახელდება. 

გორუმის თქმით, კლიმატის ცვლილების შედეგები უფრო მეტად იგრძნობა სწორედ შავი ზღვის რეგიონში, სადაც ზღვის წყლის ტემპერატურა გაიზარდა თითქმის 2 გრადუსი ცელსიუსით.

სტამბოლის ევრაზიის დედამიწის შემსწავლელ მეცნიერებათა ინსტიტუტის მიერ ჩატარებულმა კვლევამ აჩვენა, რომ წელს მეწყრულმა პროცესებმა თურქეთში 322 რაიონი დააზიანა, მათ შორის – საცხოვრებელი ადგილები.

______________

ფოტოზე: მეწყერი რიზეში, 2021 წელი. ფოტო: dailysabah.com

დღეს, პირველ ივნისს, ბავშვთა დაცვის საერთაშორისო დღე აღინიშნება. საქართველოს სახალხო დამცველის ინფორმაციით, საქართველოში ბავშვთა სიღარიბე ერთ-ერთ ძირითად პრობლემად რჩება, რადგან ბავშვთა სიღარიბის მაჩვენებელი მზარდია.

„წინა წელთან შედარებით, ბავშვთა სიღარიბე 28%-ით გაიზარდა „სოციალურად დაუცველი ოჯახების მონაცემთა ერთიან ბაზაში“ ჩარიცხული ბავშვიანი ოჯახების რაოდენობა და პროგრამაში ჩართული არასრულწლოვნების რაოდენობამ 235 252-ს მიაღწია.

თუმცა ქვეყანაში არსებული პროგრამები კვლავ ვერ უზრუნველყოფს სიღარიბეში მცხოვრები ოჯახების გრძელვადიან მხარდაჭერასა და მათი სოციალური ფუნქციის ამაღლებას. სახელმწიფოში კი ამ დრომდე არ არსებობს ბავშვთა სიღარიბის, ბავშვთა შრომის შემცირების ეფექტიანი სტრატეგია და მექანიზმი“, – ამბობს ომბუდსმენი.

ომბუდსმენის განცხადებით, საქართველოში უკვე წლებია მწვავედ დგას ბავშვთა სიღარიბის, ბავშვთა მიმართ ძალადობის, სარეაბილიტაციო, მხარდამჭერი სერვისების სიმცირისა და ბავშვზე მორგებული გარემოს არარსებობის პრობლემები, რომლებიც სახელმწიფოს მხრიდან ძირეულ ცვლილებებსა და კოორდინირებულ მოქმედებას მოითხოვს.

„ასევე, მიუხედავად იმისა, რომ დიდი ზომის რეზიდენტულ დაწესებულებებში ბავშვზე სახელმწიფო ზრუნვის განხორციელება არსებითად ეწინააღმდეგება ბავშვის უფლებათა ფუნდამენტურ პრინციპებს და დამანგრეველ გავლენას ახდენს მოზარდზე, ქვეყანაში ასეთი სამი დაწესებულება ფუნქციონირებს და ჯერ კიდევ არ არის დამტკიცებული მათი დეინსტიტუციონალიზაციის კონკრეტული გეგმა.

ბავშვთა დაცვის კუთხით არსებული ამ და სხვა არაერთი გამოწვევის აღმოსაფხვრელად განსაკუთრებული მნიშვნელობა აქვს, ერთი მხრივ, საზოგადოების ინფორმირებულობის დონის ამაღლებას და მეორე მხრივ, სახელმწიფო უწყებების დროულ და კოორდინირებულ მოქმედებას, რომელიც ბავშვის საუკეთესო ინტერესებზე მორგებული, ინდივიდუალური მიდგომით, უზრუნველყოფს სხვადასხვა საჭიროების მქონე, მათ შორის, სიღარიბეში მცხოვრები ბავშვებისა და მათი ოჯახების გაძლიერებას“.

ომბუდსმენის თქმით, ქვეყანაში ბავშვის უფლებების სათანადო დაცვის უზრუნველყოფის მიზნით, აუცილებელია:

ბავშვთა კეთილდღეობაზე ორიენტირებული მხარდამჭერი პროგრამებისა და სერვისების ეფექტიანობის გაზრდა, დამატებითი მიზნობრივი პროგრამების შემუშავება და მათი გეოგრაფიული ხელმისაწვდომობის უზრუნველყოფა;

დეინსტიტუციონალიზაციის პროცესის დროული და ეფექტიანი წარმართვა, რომლის ფარგლებშიც თითოეული ბავშვისთვის უზრუნველყოფილი იქნება ოჯახთან მაქსიმალურად მიახლოებული და უსაფრთხო გარემო.

ომბუდსმენი ყურადღებას ამახვილებს უკრაინაში მიმდინარე ომზე. მის თქმით, არც ერთ ბავშვს არ უნდა უწევდეს ომის სავალალო შედეგების საკუთარ თავზე გამოცდა.

„უკრაინაში მიმდინარე საომარ მოქმედებებს ასობით ბავშვის სიცოცხლე ემსხვერპლა, ძალიან ბევრი დაშავდა, დაკარგა მშობლები, მოუხდა საცხოვრებელი ადგილის მიტოვება და სამ თვეზე მეტია ომის ტრავმასთან უწევს გამკლავება.

შესაბამისად, წელს განსაკუთრებით მნიშვნელოვანია, ქმედითი ნაბიჯების გადადგმა საქართველოში მყოფი უკრაინის ომის შედეგად დაზარალებული და იძულებით ადგილნაცვალი ბავშვების მხარდაჭერის, კეთილსაიმედო გარემოთი უზრუნველყოფისა და მათი ოჯახების გაძლიერების მიზნით.

ფინანსთა სამინისტროს საგამოძიებო სამსახურის ინფორმაციით, დააკავეს ბიზნესმენი გალიფ ოზთურქი.

„საქართველოს ფინანსთა სამინისტროს საგამოძიებო სამსახურის წარმოებაში არსებულ სისხლის სამართლის საქმეზე, მოქალაქე გ.ო.-ს მიერ გამოძიება განსაკუთრებით დიდი ოდენობით გადასახადისთვის განზრახ თავის არიდების, ყალბი საანგარიშსწორებო დოკუმენტების დამზადება-გამოყენებისა და უკანონო შემოსავლის ლეგალიზაციის შესაძლო ფაქტზე მიმდინარე გამოძიების პროცესში, საქმის ვითარების გასარკვევად საჭირო მტკიცებულებების მოპოვების მიზნით, 2022 წლის 31 მაისს, სასამართლოს განჩინებების საფუძველზე, მოქალაქე გ.ო.-სთან, ასევე მასთან დაკავშირებულ პირებთან და კომპანიებში განხორციელდა საგამოძიებო და საპროცესო მოქმედებები.

გ.ო.-ს საცხოვრებელ მისამართზე, სასამართლოს განჩინების საფუძველზე ჩატარებული ჩხრეკის შედეგად, სხვა ნივთიერ მტკიცებულებებთან ერთად, ამოღებულ იქნა დიდი ოდენობით ფულადი თანხა, ასევე, აღმოჩენილ იქნა სავარაუდოდ ნარკოტიკული და ფსიქოტროპული ნივთიერებები, რასთან დაკავშირებითაც გ.ო. დაკავებულ იქნა საქართველოს სისხლის სამართლის კოდექსის 260-ე და 261-ე მუხლების პირველი ნაწილებით, რაც ითვალისწინებს თავისუფლების აღკვეთას 6 წლამდე ვადით,” – ნათქვამია ფინანსთა სამინისტროს საგამოძიებო სამსახურის მიერ გავრცელებულ ინფორმაციაში.

სპეცოპერაცია „მეტრო ჰოლდინგში“ დღის პირველ საათზე დაიწყო და 9 საათს გრძელდებოდა. ამ ხნის განმავლობაში ვრცელდებოდა ურთიერთგამომრიცხავი ინფორმაცია ეროვნებით თურქი ბიზნესმენის, საქართველოს მოქალაქის, გალიფ ოზთურქის დაკავების შესახებ. დღის განმავლობაში ეს ინფორმაცია არ დაუდასტურებია არც ერთ სახელმწიფო უწყებას. ბიზნესმენის დაკავებას არ ადასტურებდა არც „მეტრო ჰოლდინგის“ მენეჯმენტი.

„მეტრო ჰოლდინგის“ დირექტორმა რაულ კახაძემ დღეს, 31 მაისის საღამოს, ჰოლდინგის სახელით განცხადება გაავრცელა.

„მთელი დღის განმავლობაში სხვადასხვა ტელევიზიით და საინფორმაციო საშუალებებით ვრცელდება გადაუმოწმებელი ინფორმაცია სხვადასხვა სისხლის სამართლებრივი ბრალდებით „მეტრო ჰოლდინგის“ დამფუძნებლის, ცნობილი ბიზნესმენის და მეცენატის გალიფ ოზთურქის დაკავების შესახებ.

„მეტრო ჰოლდინგის“ მენეჯმენტი და ადვოკატები მუშაობენ იმაზე, რომ ამ სრულიად აბსურდული მიზეზებით გამოწვეულ ქმედებას მიეცეს სწორი შეფასება და გატარდეს ყველა სათანადო კანონიერი ღონისძიება.

იმედს გამოვთქვამთ, რომ უახლოეს საათებში ეს გაუგებრობა აღმოიფხვრება და კომპანიები დაუბრუნდებიან ჩვეულ რეჟიმში საქმიანობას,“ – ნათქვამია განცხადებაში.

რას საქმიანობს და ვინ არიან „მეტრო ჰოლდინგთან“ დაკავშირებული კომპანიები? – ვრცლად ნახეთ აქ.

გალიფ ოზთურქი ათობით ბიზნესკომპანიას ფლობს საქართველოში, რომლებიც არიან „მეტრო ჰოლდინგის“ შემადგენლობაში ან მისი პარტნიორები.

_________

ამ თემაზე:

ფილოლოგ, პუბლიცისტ ლევან ბერძენიშვილის მიერ ერეკლე მეორის კრიტიკას საქართველოში, საზოგადოების ერთი ჯგუფის მწვავე რეაქცია მოჰყვა. შეიქმნა პეტიცია, რომლითაც პეტიციის ავტორებმა მოითხოვეს ბერძენიშვილს „აეკრძალოს სტუდენტებთან კომუნიკაცია“, რადგან, მათი აზრით, ლევან ბერძენიშვილი ერეკლეს მიერ რუსეთთან დადებული გეორგიევსკის ტრაქტატის კრიტიკით ეროვნულ გმირს შეურაცხყოფს. 28 მაისს თელავში აქციაც კი გაიმართა ლევან ბერძენიშვილისგან „ერეკლე მეორეს დასაცავად“.

რას ნიშნავს სინამდვილეში ლიტერატორის, პუბლიცისტის დევნა საკუთარი აზრის გამო და რა საფრთხეები შეიძლება დავინახოთ ამ პროცესებში? – ამ თემაზე „ბათუმელები“ ფილოსოფოსს, ილიას უნივერსიტეტის პროფესორს, გიორგი მაისურაძეს ესაუბრა.

• ბატონო გიორგი, როგორ აღიქმება თქვენი გადმოსახედიდან ის პროცესები, რაც ლევან ბერძენიშვილის მიერ ერეკლე მეორის კრიტიკას მოჰყვა და რა ტიპის პრობლემას აჩვენებს ეს?

მე ვიტყოდი, რომ საფრთხე ექმნება არა იმდენად გამოხატვის თავისუფლებას, არამედ ეს აჩვენებს დისკუსიის შეუძლებლობას საქართველოში. ამას ვამბობ როგორც მათზე, ვინც აპროტესტებს, ასევე – ლევან ბერძენიშვილის მხარდამჭერებზე.

რეაქციებს ვაკვირდებოდი სოციალურ ქსელებში და ვხედავდი, როგორ გაიყო საზოგადოება ორ ნაწილად. ერთ მხარეს არიან აღშფოთებულები, დამგმობები, რომლებიც რეპრესიებს მოითხოვენ, – „აეკრძალოს პედაგოგიური საქმიანობა“ და ასე შემდეგ, რისი უფლებაც მათ არანაირად არ აქვთ და რეალურად, არც არანაირი მექანიზმი არსებობს, რომ ადამიანს საკუთარი შეხედულებების გამო აუკრძალოს ვინმემ პედაგოგიური საქმიანობა.

არსებობს, ვთქვათ, უნივერსიტეტის ეთიკური კომისიები, თუმცა არანაირად არ ჯდება ეს იმაში, რომ ავტორის, კერძო პირის ამ თუ იმ პრობლემის თუ ისტორიული პიროვნების მიმართ შეხედულებებზე იმსჯელონ.

მეორე მხრიდან იყო აბსოლუტურად საწინააღმდეგო რამ. არა უბრალოდ სოლიდარობა, არამედ რაღაც თაყვანისცემის ჟესტები და გამოხატულებები და სწორედ ამის გამო ვფიქრობ, რომ ასეთ გარემოში დისკუსია არის შეუძლებელი.

ზოგადად, საქართველოში შეუძლებელია დისკუსია, რადგან ერთ მხარეს გვაქვს რაღაც რადიკალური გმობა, წყევლა და შეჩვენება, მეორე მხარეს – თაყვანისცემა და აღზევება. ერთიც და მეორეც არის აბსოლუტურად საწინააღმდეგო თავისუფალი გარემოსი, ისეთი გარემოსი, სადაც დისკუსია შესაძლებელია.

ლევან ბერძენიშვილს, რა თქმა უნდა, აქვს უფლება ჰქონდეს საკუთარი აზრი. ვიღაცები დაეთანხმებიან, ვიღაცები – არა. ეს გასაგებია, მაგრამ ასეთ მოცემულობაში, რასაც დღეს ვხედავთ, ვერც მასთან შეხვალ დისკუსიაში.

რა თქმა უნდა, ფორმულირება, რომ ერეკლე მეორე მოღალატეა, თავისთავად რადიკალურია. მე პირადად ძალიან სკეპტიკურად და ეჭვით ვუყურებ ისტორიული პიროვნებების მიმართ სასამართლო პროცესის ენით ლაპარაკს, ვიღაცის მოღალატედ შერაცხვას, თუმცა ფორმა შეგვიძლია შევარჩიოთ და ამაზეც შეგვიძლია ვიკამათოთ.

• წარსულის ცოდნა და შეფასება ხომ იმისთვის გვჭირდება, რომ სამომავლოდ სწორი გადაწყვეტილებები მივიღოთ. რეალურად, საქართველოში სწორედ ამის პრობლემა გვაქვს, რომ არ ხდება წარსულის შეფასება. ასე არ არის?

კი, ამის კრიზისი გვაქვს და ეს ზოგადად უკავშირდება იმას, რომ ისტორიული მეცნიერება, ფაქტობრივად, მოშლის თუ გადაშენების პირასაა, როგორც სხვა სამეცნიერო დისციპლინები საქართველოში და მეორეა ზოგადად დისკუსიის შეუძლებლობა ჩვენს ქვეყანაში.

ისევ და ისევ პოლარიზაცია, ბანაკებად დაყოფა, – „მტერი ხარ“, „მოყვარე ხარ“, „მომხრე ხარ“, „მოწინააღმდეგე ხარ“… ეს ძალიან პრიმიტიული ფორმაა აზროვნების და ურთიერთობის. ასეთ საზოგადოებაში შეუძლებელია საერთოდ სიტყვა „თავისუფლება“ ვიხმაროთ, რადგან „ვეთანხმები – არ ვეთანხმებიზეც“ აღარ არის საუბარი. ეს არის – „თაყვანს ვცემ“ ან „ვგმობ“, ან ღვთაებად მიმაჩნია, ან ურჩხულად.

აი, როცა ამ მოცემულობის წინაშე ვდგებით, აქ საზოგადოებაზე ლაპარაკი არ შეიძლება, ეს არის რაღაც ტომობრივი ლოგიკა.

• ბერძენიშვილის დევნა გარკვეული ჯგუფების მხრიდან ხომ არ არის იმის გაგრძელება, რაც ხდება კულტურის სფეროში, ეროვნულ მუზეუმში, სადაც თანამშრომლებს, ფაქტობრივად, უშვებენ სამსახურებიდან. ამ პროცესის ნაწილია ესეც?

ამ ორი ამბის კავშირს მე არ ვხედავ, რადგან მუზეუმში არის სრულიად ამაზრზენი და საშიში პროცესი, რომელსაც კულტურის სამინისტრო და უშუალოდ კულტურის მინისტრი აწარმოებს. დარევა ამ ადამიანებზე, პროფესიონალებზე, მათი გაყრა, ყოველგვარი ეთიკის ფარგლებს მიღმაა, რომ არაფერი ვთქვათ სამართლებრივ ასპექტებზე, დილეტანტების, არაპროფესიონალების ჩანაცვლებაზე. ეს არის ძალიან საშიში პროცესი და ამაზე საზოგადოებას სერიოზული და ადეკვატური რეაქცია ჯერჯერობით, სამწუხაროდ, არ გამოუხატავს.

მისასალმებელია, რომ პროფკავშირების იდეა გაჩნდა აკადემიურ სფეროში, რასაც მე მაქსიმალურად ვუჭერ მხარს. ეს ყველაფერი უნდა გადავიდეს სამართლებრივ სფეროში და არ უნდა მიეცეს ერთ მინისტრს ამ ადამიანებზე ძალადობის უფლება. „გოგია უიშვილში“ რომ არის, ეგზეკუცია ჩამოტარებით, აი, ამ ეგზეკუციის ტიპური განსახიერებაა ის, რასაც წულუკიანი აკეთებს და მოულოდნელიც არ უნდა ყოფილიყო ეს, რადგან სწორედ ამ ეგზეკუციური სფეროს წარმომადგენელს ჩააბარეს კულტურა.

ლევან ბერძენიშვილის ირგვლივ ატეხილი დისკუსია უფრო მომხრე – მოწინააღმდეგის თემას უკავშირდება. მე მგონი, პრინციპულად არ არის დასაყენებელი ეს საკითხები ერთად, რადგან ერთი ამბავი ეხება პროფესიონალ ადამიანებს, მკვლევრებს, მეცნიერებს, რომლებსაც უმიზეზოდ აგდებენ სამსახურიდან და მეორე ამბავი უკავშირდება აკადემიური სფეროს წარმომადგენლის თუ სახალხო ინტელექტუალის პირად მოსაზრებას, რომელიც საკმაოდ იდეოლოგიური მგონია.

თუმცა ყველას აქვს უფლება ჰქონდეს საკუთარი აზრი და გამოხატოს, აქ არ შეიძლება შეზღუდვა. დასავლური კულტურა, რუსული კულტურაც ეფუძნება საკუთარი ისტორიული სახეების, გმირების, მეფეების დაცინვას, შეურაცხყოფას და აბუჩად აგდებასაც. ჩვენ შეგვიძლია ამაზე ბევრი რამ წავიკითხოთ, ეს ჩვენ გვაქვს რატომღაც ასეთი გართულებული, ავადმყოფური დამოკიდებულება – „იმაზე ეს როგორ თქვა“, „ამაზე ეს როგორ თქვა“.

თუ ეს არის სადისკუსიო თემა, რა თქმა უნდა, ვიკამათოთ, ვიმსჯელოთ, მაგრამ კიდევ ვამბობ, რომ დისკუსია დღეს შეუძლებელია, როდესაც გვაქვს პოლარიზებული სამყარო, ყოველგვარი კრიტიკის გარეშე. იქ, სადაც ან მომხრე უნდა იყო, ან მოწინააღმდეგე, დისკუსია, რა თქმა უნდა, შეუძლებელია. შეუძლებელია საღი აზრი არსებობდეს.

• როგორ ფიქრობთ, რამ შექმნა ეს რადიკალური ფონი, თქვენ ხედავთ ამაში პოლიტიკის როლს? თუ სხვა მიზეზები უნდა ვეძებოთ?

საზოგადოების პოლარიზაცია დაიწყო 80-იანი წლების ბოლოდან, როცა თუ არ ეთანხმებოდი ლიდერს ან ბელადს, გეტყოდნენ – „აგენტი ხარ“, შემდეგ „მტერი ხარ“, „მავნებელი ხარ“ და ასე შემდეგ. ეს 1937 წლის ლოგიკაა, რომელიც ძალიან ფართოდ გადმოვიდა ჩვენს ანტისაბჭოთა განწყობაშიც. ყველაზე საშინელი, რაც ახასიათებდა საბჭოთა კავშირს, ის გადმოიღეს და გამოიყენეს შემდგომაც.

რა თქმა უნდა, დღევანდელი პოლიტიკური სიტუაციაც ამყაყებულია და ძირითადად ორ ბანაკად არის წარმოდგენილი:

ოპოზიცია, რომლის სახეც არის „ნაციონალური მოძრაობა“ და იმ ინტერვიუშიც ლევან ბერძენიშვილი სწორედ ამ პოზიციას ამყარებდა, რომ მთავარი ოპოზიციური ლიდერი მიხეილ სააკაშვილია და „ნაციონალური მოძრაობის“ ირგვლივ უნდა გაერთიანდეს დანარჩენი ოპოზიციაც, რასაც მე პირადად, კატეგორიულად არ ვეთანხმები.

მეორე მხარეა „ქართული ოცნება“, თავისი ასევე სრულიად რადიკალური, მმართველი პოლიტიკური ძალისთვის შეუფერებელი რიტორიკით, სრული დემონიზაციით და შეურაცხყოფით. მაგრამ კიდევ ვიმეორებ, რომ ეს არის პოლიტიკური ელიტების ნამუშევარი. ის, რასაც მნიშვნელოვან წილად ქმნიდნენ 1988 -1989 წლის პოლიტიკური ელიტები და დღესაც იგივეა.

ყოველგვარ გონიერებას აცდენილია ეს პოლარული აზროვნება და რადიკალიზაცია, რომელიც დისკუსიის შეუძლებლობის ნიმუშია.

• რადგან ლევან ბერძენიშვილი საუბრობდა „ნაციონალური მოძრაობის“ ირგვლივ გაერთიანებაზე, არ ფიქრობთ, რომ ეს იყო მიზეზი მის წინააღმდეგ დაეწყოთ კამპანია?

კი, შეიძლება იყო ეს ყველაფერი ხელოვნურად შექმნილი, რადგან ბერძენიშვილი ამ შემთხვევაში არ წარმოადგენს  თავისუფალ, დამოუკიდებელ ინტელექტუალს, ის პირდაპირ ასოცირდება კონკრეტულ პოლიტიკურ ძალასთან და შესაბამისად, როცა აკეთებ განცხადებას ისტორიულ ფიგურაზე, რომელსაც აკრიტიკებ, ამას მოჰყვება გარკვეული რეაქცია და არ არის გამორიცხული, რომ რაღაც მასების მობილიზება და ხალხის გამოყვანაც მოჰყვეს.

თუმცა რეალურ პრობლემებს არც ერთი პოლიტიკური მხარე არ ხედავს, რადგან ამ პრობლემებზე ოპოზიციასაც და ხელისუფლებასაც კონსენსუსი აქვთ.

რეალური პრობლემაა ის, რომ ლარი მყარდება და ფასები მაინც ასტრონომიულად იზრდება ყოველდღე, რომ საქართველო არის ღატაკი და ძვირი ქვეყანა, რომ ბინის ქირის გადახდა შეუძლებელი ხდება საერთოდ. განუკითხაობაა, ეკონომიკური კატასტროფები რომ გვაქვს ყოველდღიურად, ეს არის რეალური პრობლემა და არა ის, ვიღაც კერძო პირი რას იტყვის ერეკლე მეორეზე, დავით აღმაშენებელზე თუ მირიან მეფეზე. ამ ფონზე ეს ძალიან მეორეხარისხოვანი მგონია.

რეაქცია გვაქვს ხელოვნურ, კომიკურ პრობლემებზე, დაბრმავებული ვართ სიღატაკის, სოციალური და ეკონომიკური ჩაგვრის მიმართ, გაურკვეველი საგარეო და საშინაო პოლიტიკის მიმართ. ეს, რა თქმა უნდა, ამ საზოგადოების დიაგნოზია. მიშა, ბიძინა და პატრიარქი როგორაა, ეს აინტერესებთ მხოლოდ, ამაზეა მთელი დღეები საუბარი.

• თქვენ ამბობთ, რომ სადისკუსიო ველი გაქრა, რომ არ გვაქვს ადეკვატური რეაქცია იმაზე, რაც, წესით, ყველაზე მეტად უნდა გვაღელვებდეს – ჩვენი კეთილდღეობა, განათლება, უფლებები. რამ მიიყვანა საზოგადოება აქამდე?

„ნაციონალებიც “ და „ქართული ოცნებაც“ არის ზუსტად ამ საზოგადოების მენტალური წყობის გამოვლინება. გარკვეული სიმპტომი იმის, თუ როგორ ქრება აზროვნების კულტურა, მსჯელობის კულტურა, დისკუსიის კულტურა საქართველოდან, როგორ ქრება ინტელექტუალთა ფენა, კულტურული ფენა საქართველოდან. თითქოს ორთქლდება.

ეს პოლიტიკური ძალა არის ანტიკულტურული. „ნაციონალებიც“ და „ოცნებაც“ არიან ბარიგების და სპეკულანტების ინტერესების დამცველი ორგანიზაციები, რომლებიც მტრულად არიან განწყობილნი ყველანაირი კულტურის მიმართ.

მათ აქციეს კულტურა მანჭვად, ვითომ სახალხო ზეიმებად, პრიმიტიულ დისკუსიებად და ქადაგებებად მათ კარზე მიახლოებული ინტელექტუალების მხრიდან და ორივე მხარეს, პოლიტიკური ძალაუფლების მქონეთ, უზარმაზარი როლი მიუძღვით ამაში.

კულტურული ფენა, რომელიც კიდევ შემორჩა ამ ქვეყანას, მართლა უნდა გადავიდეს სერიოზულ მსჯელობებზე და არა სადღეგრძელოებზე, არა ვიღაცების დაგმობაზე თუ გაღმერთებაზე. სანამ ეს მენტალობა იქნება გაბატონებული ამ ქვეყანაში, ვერანაირი დისკუსია ვერ შედგება.

• სკოლიდან, ფაქტობრივად, განდევნილია კრიტიკული აზროვნება, ვერც უნივერსიტეტები გამოირჩევა ამ მხრივ საქართველოში. ბერძენიშვილის მაგალითმაც გვაჩვენა, რამდენად უჭირთ ადამიანებს განსხვავებული აზრის მიღება. როგორ შეიძლება ამისგან თავის დაღწევა?

რთულია ამაზე პასუხი, რადგან ეს არის კვლევის თემა, ამას სჭირდება სერიოზული მუშაობა, კულტურისა და განათლების სერიოზული პოლიტიკის შექმნა და შესაბამისი პიროვნებების დასაქმება ამ სფეროებში, თუკი ვინმე გვყავს შემორჩენილი.

და არა ვიღაც ჯალათების, ციხის უფროსების დანიშვნა მუზეუმის თუ კულტურის მინისტრად და არა ძალადობისა და სადამსჯელო რაზმების მოწყობა ამ სფეროებში.

პირველ ივნისს, ბავშვთა დაცვის საერთაშორისო დღეს, ბათუმის მერიის ინფორმაციით, ქალაქის ცენტრალურ პარკსა და დელფინარიუმის მიმდებარედ, ასევე ბათუმის სპორტული ცენტრის, ყინულის მოედანსა და ბულვარში 12:00-დან 19:00 საათამდე შემეცნებით-გასართობი ღონისძიებები გაიმართება. თავისუფალ დასწრებას სთავაზობს პატარებს ასევე ბათუმის მოზარდ მაყურებელთა და თოჯინების თეატრი, თუმცა ადგილები შეზღუდულია.

ბავშვებისთვის პირველ ივნისს მოეწყობა:

• ინსტალაციებით მორთული პარკი, საბავშვო თამაშები, კოსტიუმირებული ანიმატორები, ბავშვთა ნამუშევრების გამოფენა
• საბავშვო ლიტერატურის გამოფენა წიგნის კუთხეში
• საბავშვო ნახატების გამოფენა
• ზღაპრის გმირები, კოსტიუმირებული მსახიობები – დისნეი, ჯამბაზები, ოჩოფეხები, მეკობრე და სხვა
• ხეზე მოწყობილი სპეციალური ვერანდები და ჰამაკები
• სამახსოვრო ფოტოების გადაღება სპეციალურად მოწყობილ სტენდებთან
• საბავშვო დიზაინით შეფუთული გიფის აპარატი.

14:00-21:00 საათამდე ცენტრალურ პარკში გაიმართება საბავშვო კონცერტი მუსიკალური და ქორეოგრაფიული ცენტრებისა და სტუდიების მონაწილეობით.

• 11:00 საათზე – ბათუმის სპორტული ცენტრის ყინულის სასახლეში გაიმართება შოუ პროგრამა ფიგურულ ციგურაობასა და ყინულის ჰოკეიში.
• 13:00-17:00 – ბათუმის ბულვარის ტერიტორიაზე ბავშვებს უფასოდ მოემსახურება სასეირნო მატარებელი.

ბავშვთა დაცვის საერთაშორისო დღეს ბათუმის მოზარდ-მაყურებელთა და თოჯინების თეატრის პროგრამა ასეთი იქნება:

• 13:00 – „ალადინის ჯადოსნური ლამპარი“ – რეჟისორი ვახტანგ ქორიძე. დასწრება თავისუფალია, მაგრამ შეზღუდული.
• 16:00 – საბავშვო კონცერტი ზღაპრის გმირების მონაწილეობით საყვარელი სპექტაკლებიდან. დასწრება თავისუფალია.
• 19:00 – ანიმაციური ფილმის ჩვენება „დიდი გამყინვარება 6: ბაკ უაილდის თავგადასავალი“. დასწრება თავისუფალია.
• 21:00 – ფრანების გაშვება თეატრის ეზოდან.

მთელი დღის განმავლობაში ბათუმის ბოტანიკურ ბაღში შესვლა უფასო იქნება.

დღეს, 31 მაისს, საღამოს, გალიფ ოზთურქის მხარდასაჭერად „მეტროსითისთან“ აქცია იმართება.

აქციაზე სასტუმრო „ეუფორიას“ თანამშრომლები არიან გამოსულები და სკანდირებენ: „გალიფ ოზთურქ!“

„მეტროსითიში“ დღეს საგამოძიებო სამსახური შევიდა. მედიაში ვრცელდება ინფორმაცია თურქი ბიზნესმენის, გალიფ ოზთურქის დაკავების შესახებ, თუმცა ოფიციალური უწყებები ინფორმაციას ამ დრომდე არ ადასტურებენ.

„გალიფ ოზთურქი უწესიერესი კაცია. ყველას ეხმარება, კეთილი საქმეების კეთება უყვარს.

ამის გამკეთებელი… ჩვენ თურქეთში მსგავსი ოპერაციები ბევრჯერ გადავიტანეთ. ეს სახელმწიფოს მიერ დაგეგმილი ოპერაციაა. ამას ივანიშვილთან კავშირი არ აქვს. ვამბობ, რომ ეს სახელმწიფო ოპერაციაა, მაგრამ რას აკეთებენ, არაფერი ვიცით. რას ედავებიან ვერ გავიგეთ“ – უთხრა „ბათუმელებს“ აიჰან დაიოგლუმ, რომელიც გაგვეცნო, როგორც გალიფ ოზთურქის ყოფილი ბიზნესპარტნიორი.

„ბათუმელები“ აზუსტებს დეტალებს.

ამავე თემაზე: 

2022 წლის პირველი ივლისიდან შპს „სოკარ ჯორჯია გაზის“ და „საქორგგაზის“ საცალო არასაყოფაცხოვრებო (კომერციული) მომხმარებლებისთვის გაზი 23 თეთრით ძვირდება.

ამჟამად არასაყოფაცხოვრებო მომხმარებლებისთვის გაზის ტარიფი 1.15 ლარია, „სოკარის“ ცნობით კი, პირველი ივლისიდან, 1მ3 ბუნებრივი გაზის ფასი იქნება 1 ლარი და 38 თეთრი, დღგ-ს ჩათვლით.

„ბუნებრივი გაზის ბაზარზე არსებული რეალობის შესაბამისობაში მოყვანის მიზნით, რაც განპირობებულია მსოფლიო ბაზარზე ენერგომატარებლებზე ფასების მკვეთრი ცვლილებით, მიღებულ იქნა გადაწყვეტილება არასაყოფაცხოვრებო მომხმარებლებისათვის ბუნებრივი გაზის ფასის კორექტირებაზე.

უცვლელი რჩება საყოფაცხოვრებო ტარიფი, რომელიც საქართველოს ენერგეტიკისა და წყალმომარაგების მარეგულირებელი ეროვნული კომისიის მიერ არის დადგენილი 2023 წლამდე“ – აცხადებს „სოკარი“.

გაზის ტარიფი არასაყოფაცხოვრებო მომხმარებლებისთვის ბოლოს 2021 წლის პირველი დეკემბერს გაიზარდა 20 თეთრით და 1 ლარი და 15 თეთრი გახდა.