ბათუმის ბულვარის თითქმის ბოლოს, თვითმფრინავების ასაფრენ ბილიკთან ახლოს, ორი წელია დგას ძველი, წითლად გადაღებილი ავტობუსი. შიგ პატარა კაფეა მოწყობილი და საღამოობით დიჯეი უკრავს. ხალხი აქ ძირითადად თვითმფრინავების ფრენას აკვირდება ახლოდან, თან მსუბუქ სასმელს და ხემსს უკვეთენ.
ავტობუსმა ახლა გადაინაცვლა და დროებით სასტუმრო Hotel Palm Batumi-ს წინ დგას, დაახლოებით 500 მეტრის დაშორებით ძველი ადგილიდან.
„Bus Stop Batumi“- ასე ჰქვია ამ ადგილს, სადაც ახალი ბულვარის ბოლოს ველობილიკით, პრომენადითაც მიხვალთ და სამანქანე გზითაც.
„Bus Stop Batumi-ს იდეა ნუგზარ ჭაღალიძეს მოუვიდა პანდემიაში, როცა ყველაფერი დაკეტილი იყო და არ იცოდა, რა ექნა.
„გუდაურშიც გვაქვს ერთი ასეთი ავტობუსი. ბათუმში მალე მეორეც გვექნება. შარშან, ივლისში, გადავწყვიტეთ ძველ ავტობუსში კაფე გაგვეხსნა. თვითმფრინავების აფრენა-დაფრენის ახლოდან სანახავად აქ ბევრი ხალხი დადიოდა და გადავწყვიტეთ, ბარემ კაფეც გაგვეხსნა.
ეს მინიმალიზმია, არაფრისგან გაკეთებული საქმე, ზოგისთვის ამ ავტობუსის დანახვა ბავშვობასთან ასოცირდება, ვიღაცისთვის – ახალგაზრდობასთან. ხალხს მოსწონს რასაც ვაკეთებთ, ყოველ საღამოს დიჯეი უკრავს. ჩვენ ძალიან მარტივი რამეები გამოვიყენეთ, ეს ადგილი რომ შეგვეყვარებინა მომხმარებლისთვის: ზღვის პეიზაჟი, რომელიც ყოველდღე სხვადასხვანაირია, ახლოს მოფრენილი თვითმფრინავები და ზღვის ტალღების ხმა.
ამ მოცემულობებს დავამატეთ მზის ჩასვლისას შესაბამისი მუსიკა, გემრიელი სენდვიჩები, მსუბუქი სასმელი და ადამიანური ფასები, სულ ესაა ჩვენი საიდუმლო“, – ამბობს Bus Stop Batumi-ს მეპატრონე.
წითელ ავტობუსში თვითმფრინავების ფრენის განრიგიც აქვთ. აქ მოდიან ტურისტები და ელოდებიან როდის ჩამოფრინდებიან მათი ახლობლები სხვადასხვა ქალაქიდან.
კაფეს მეპატრონე ამბობს, რომ მათი მომხმარებლისთვის შეზლონგები ზღვის პირას უფასოა.
წითელი ავტობუსის თანამშრომლებს ხშირად უკავშირდებიან და ეკითხებიან, როდის დაბრუნდებიან ისინი ძველ ადგილზე – ზღვის სანაპიროსთან ახლოს.
Bus Stop Batumi-ს ერთ წითელ ავტობუსს „სოხუმი“ აწერია, მეორეს – „გაგრა“. კაფეს მეპატრონე გვეუბნება, რომ რუსეთის მოქალაქეები ხშირად ეკითხებიან მას, თუ რატომ აწერია ავტობუსებს ასე.
„ეს ხომ დამოუკიდებელი ტერიტორიებია, რას ნიშნავს ეს წარწერებიო, ხშირად მეკითხებიან რუსეთის მოქალაქეები. უახლეს ისტორიაზე ხშირად წარმოდგენა არ აქვთ, რა მოხდა. ბევრმა არც იცის, რომ ეს ტერიტორიები ომით წაგვართვეს რუსებმა და ვუხსნით რა როგორ იყო, ვაწვდით ინფორმაციას.
ვუხსნით ყველას, რომ ჩვენი ურყევი მიზანია დავიბრუნოთ დაკარგული ტერიტორიები. მერე კი ჩემს ავტობუსებს იქაც ჩავიყვან და სოხუმელების, გაგრელებისთვისაც დავუკრავ ზღვისპირას-მეთქი, ვუხსნი ყველას.
რა, აფხაზეთი საქართველოაო? – უკვირთ. და ისევ ვიწყებთ ყველაფრის თავიდან ახსნას.
ნუგზარ ჭაღალიძისთვის ეს პირველი საქმეა, რაც მხოლოდ საკუთარი სახსრებით დაიწყო. აქამდე სხვადასხვა ბარში მუშაობდა ბარმენად და დიჯეიდ. ახლა საკუთარი კაფეს სიახლოვეს უკრავს ხოლმე ღია ცის ქვეშ.
„მირჩევნია ჩემი საქმე მქონდეს და ნაკლებს გამოვიმუშავებდე, ვიდრე სხვაგან ვიმუშაო და სამჯერ მეტ ხელფასს მიხდიდნენ. შენი საქმე როცა გაქვს, თავისუფალი ხარ. თუმცა თავს ცუდად არასდროს ვგრძნობდი, როცა სხვაგან ბარმენად ვმუშაობდი და დიჯეიდ. აქაურობამ თავისუფლება მომიტანა და ბევრი სხვადასხვანაირი მეგობარი გამიჩნდა“, – ამბობს Bus Stop Batumi-ს მეპატრონე.
ფოტოები „Bus Stop Batumi“-ის ინსტაგრამიდან.
