წყარო: The New York Times
ავტორი: ჯო ბაიდენი, ამერიკის შეერთებული შტატების პრეზიდენტი
აგრესია, რომელიც ვლადიმერს პუტინს ეგონა, რომ რამდენიმე დღეს გასტანდა, უკვე მეოთხე თვეა გრძელდება. უკრაინელმა ხალხმა გააოგნა რუსეთი და აღაფრთოვანა მსოფლიო თავისი თავგანწირვით, სიმამაცითა და საბრძოლო წარმატებებით. თავისუფალი სამყარო და ბევრი სხვა ერი, შეერთებული შტატებით სათავეში, უკრაინის მხარეს დადგა და მას უპრეცედენტო სამხედრო, ჰუმანიტარული და ფინანსური მხარდაჭერა გამოუცხადა.
რადგანაც ომი გრძელდება, მინდა, ძალიან ცხადად განვმარტო ამერიკის შეერთებული შტატების მიზნები.
ამერიკის მიზანი ნათელია: ჩვენ გვსურს ვიხილოთ დემოკრატიული, დამოუკიდებელი, სუვერენული და აყვავებული უკრაინა, რომელსაც შეეძლება შემდგომი აგრესიის შეკავება და მისგან თავის დაცვა.
როგორც პრეზიდენტმა ვოლოდიმირ ზელენსკიმ თქვა, საბოლოოდ, „ამ ომს მხოლოდ დიპლომატია დაასრულებს“. ყოველ მოლაპარაკებაზე გავლენას ახდენს ის, რაც ველზე ხდება. ჩვენ სწრაფად ვიმოქმედეთ და უკრაინას მნიშვნელოვანი მოცულობის შეიარაღება და აღჭურვილობა გავუგზავნეთ, რათა მათ შეძლონ პოზიციების გამყარება, როგორც ბრძოლის ველზე, ისე მოლაპარაკებების მაგიდასთან.
ამიტომაც გადავწყვიტე, უკრაინას მივაწოდოთ მეტი თანამედროვე სარაკეტო სისტემები და საბრძოლო აღჭურვილობა, რაც მათ საშუალებას მისცემს, უკრაინაში, ბრძოლის ველზე, კიდევ უფრო მეტი სიზუსტით დაარტყან მნიშვნელოვან სამიზნეებს.
ჩვენ კვლავაც ვითანამშრომლებთ ჩვენს მოკავშირეებთან და პარტნიორებთან რუსეთის წინააღმდეგ სანქციებთან დაკავშირებით. ეს არის უმკაცრეს სანქციები, რომლებიც კი როდისმე მსხვილი ეკონომიკისთვის დაუწესებიათ.
ჩვენ გავაგრძელებთ უკრაინისთვის თანამედროვე შეიარაღების, მათ შორის „ჯაველინის“ ტანკსაწინააღმდეგო სისტემების, „სტინგერის“ საზენიტო რაკეტების, მძლავრი საარტილერიო და სარაკეტო სისტემების, რადარების, უპილოტო საფრენი აპარატების, მი 17 ვერტმფრენებისა და აღჭურვილობის მიწოდებას. ჩვენ ასევე გავგზავნით მილიარდობით ფინანსურ დახმარებას, როგორც ეს კონგრესმა დაამტკიცა.
ჩვენ ვიმუშავებთ მოკავშირეებთან და პარტნიორებთან ერთად, რათა დავძლიოთ სურსათის გლობალური კრიზისი, რომელიც რუსეთის აგრესიამ კიდევ უფრო გაამწვავა. და ჩვენ დავეხმარებით ჩვენს ევროპელ მოკავშირეებს და სხვებსაც, შეამცირონ დამოკიდებულება რუსულ საწვავზე და დავაჩქაროთ ეკოლოგიურად სუფთა ენერგიებზე გადასვლის პროცესი.
ჩვენ ასევე გავაგრძელებთ NATO-ს აღმოსავლეთ ფლანგის გაძლიერებას, ამერიკის შეერთებული შტატებისა და სხვა მოკავშირეების ძალებითა და რესურსებით.
და სულ ახლახან, მე მივესალმე ფინეთისა და შვედეთის სურვილს, შეუერთდნენ NATO-ს – ნაბიჯს, რომელიც ორი დემოკრატიული და მაღალი სამხედრო შესაძლებლობის მქონე პარტნიორის შემომატებით, გააძლიერებს შეერთებულ შტატებისა და მთლიანად ტრანსატლანტიკურ უსაფრთხოებას.
ჩვენ არ გვინდა ომი NATO-სა და რუსეთს შორის. მიუხედავად იმისა, რომ მე არ ვეთანხმები ბატონ პუტინს და მის ქმედებებს აღმაშფოთებლად მივიჩნევ, შეერთებული შტატები არ შეეცდება მის ხელისუფლებიდან ჩამოშორებას. ვიდრე შეერთებულ შტატებს ან მისი მოკავშირეებს არ დაესხმიან თავს, ჩვენ პირდაპირ არ ჩავერთვებით ამ კონფლიქტში, არც ამერიკის ჯარს გავუშვებთ უკრაინაში საომრად და არც რუსეთის ძალებზე მივიტანთ იერიშს. ჩვენ არ ვახალისებთ და არც ნებას ვრთავთ უკრაინას, საკუთარი საზღვრების გარეთ განახორციელოს თავდასხმა. ჩვენ არ გვინდა ომის გახანგრძლივება მხოლოდ იმისთვის, რომ რუსეთს ტკივილი მივაყენოთ.
ამ კრიზისის განმავლობაში ჩემი პრინციპი ყოველთვის იყო – „არაფერი უკრაინაზე უკრაინის გარეშე“. მე არ მოვახდენ ზეწოლას უკრაინის ხელისუფლებაზე – არც პირადად და არც საჯაროდ – რომ ისინი რაიმე ტერიტორიულ დათმობებზე წავიდნენ. ეს არასწორი და საყოველთაოდ აღიარებული პრინციპების საწინააღმდეგო ქმედება იქნება.
უკრაინისა და რუსეთის მოლაპარაკებები ჩიხში შევიდა არა იმიტომ, რომ უკრაინამ ზურგი აქცია დიპლომატიას, არამედ იმიტომ, რომ რუსეთი განაგრძობს ომს, რათა უკრაინის რაც შეიძლება დიდი ნაწილი დაიკავოს. შეერთებული შტატები კვლავაც იმუშავებს იმისთვის, რომ გააძლიეროს უკრაინა და მხარი დაუჭიროს მის მცდელობას, მოლაპარაკების გზით მიაღწიოს კონფლიქტის დასრულებას.
არაპროვოცირებული აგრესია, სამშობიაროების, კულტურული ცენტრების დაბომბვა და მილიონობით ადამიანის იძულებითი გადაადგილება უკრაინაში მიმდინარე ომს ღრმა მორალურ პრობლემად აქცევს. მე შევხვდი უკრაინელ ლტოლვილებს პოლონეთში – ქალებსა და ბავშვებს, რომლებმაც არ იცოდნენ, როგორ გაგრძელდება მათი ცხოვრება, არ იცოდნენ, გადარჩებიან თუ არა მათი საყვარელი ადამიანები, რომლებიც უკრაინაში დარჩნენ. ვერცერთი სინდისიერი ადამიანი ვერ იქნება გულგრილი ამ საშინელებების მიმართ.
უკრაინის გვერდით დგომა ამ ძნელბედობის ჟამს არამხოლოდ სწორი საქციელი, არამედ ჩვენი სასიცოცხლოდ მნიშვნელოვანი ინტერესია – უზრუნველვყოთ მშვიდობიანი და სტაბილური ევროპა და ნათლად ვაჩვენოთ, რომ სიმართლე ყოველთვის ძალის მხარეს არ არის.
თუ რუსეთს ძვირად არ დაუჯდება საკუთარი ქმედებები, ეს იქნება გზავნილი სხვა შესაძლო აგრესორებისთვის, რომ მათაც შეუძლიათ ტერიტორიების დაკავება და სხვა ქვეყნების დამორჩილება. ეს საფრთხეს შეუქმნის სხვა მშვიდობიან დემოკრატიებს, წერტილს დაუსვამს კანონის უზენაესობაზე დამყარებულ საერთაშორისო წესრიგს და გაუხსნის გზას აგრესიას ყველგან, მთელი მსოფლიოსთვის დამანგრეველი შედეგებით.
ვიცი, რომ მსოფლიოს გარშემო, უამრავ ადამიანს აშფოთებს ბირთვული იარაღი. დღესდღეობით ჩვენ ვერ ვხედავთ ნიშნებს, რომ რუსეთი უკრაინაში ბირთვული იარაღის გამოყენებას აპირებს, თუმცა რუსეთის პერიოდული რიტორიკა და ბირთვული ხმლის ჟღარუნი, თავისთავად საშიში და უზომოდ უპასუხისმგებლოა. ნათლად განვმარტავ: ამ კონფლიქტში ბირთვული იარაღის ნებისმიერი მასშტაბით გამოყენება სრულიად მიუღებელია ჩვენთვის, დანარჩენი მსოფლიოსთვის და ის საშინელ შედეგებს მოიტანს.
ამერიკელები კვლავაც იდგებიან უკრაინელი ხალხის გვერდით, რადგან ჩვენ გვესმის, რომ თავისუფლებას აქვს ფასი. ჩვენ ყოველთვის ასე ვიქცეოდით, როდესაც კი თავისუფლების მტრები უდანაშაულო ადამიანების დაშინებასა და დაჩაგვრას ცდილობდნენ და ახლაც ასე ვიქცევით. ვლადიმერ პუტინი არ ელოდა ასეთ ერთობას და ასეთ მტკიცე პასუხს. ის შეცდა. თუ ის ელის, რომ ჩვენ უახლოეს თვეებში შევდრკებით ან გავტყდებით, ის კვლავაც ძალიან ცდება.
თარგმნა: თამარ რუხაძემ
