დიდი ბრიტანეთის დაზვერვის ცნობებით, რუსეთმა სევეროდონეცკის დიდი ნაწილი დაიკავა და არტილერიის ძლიერი კონცენტრაციის წყალობით, განაგრძობს ლოკალური წარმატებების მიღწევას.
ტვიტერზე, 2 ივნისს გამოქვეყნებულ განახლებაში უწყება აღნიშნავს, რომ ეს წარმატებები მოსკოვს ძალიან ძვირი უჯდება, რუსეთის სამხედრო ძალებმა დიდი დანაკარგი განიცადეს.
დაზვერვის ცნობით, რუსეთის სამხედრო ძალებისთვის ახლა მთავარი მდინარე სევერსკი დონეცის გადალახვაა, ბუნებრივი ბარიერის, რომლის დაძლევაც რუსეთისთვის სასიცოცხლოდ მნიშვნელოვანია.
„ისინი ცდილობენ გაიმაგრონ ლუგანსკში დაკავებული პოზიციები და დონეცკზე გადავიდნენ“,
დაზვერვა მდინარის გადალახვის ორ შესაძლო ადგილს ასახელებს:
„სევეროდნეცკსა და ლისიჩანსკს შორის და ახლახან დაკავებულ ლიმანთან ახლოს. ორივე მონაკვეთზე მდინარის ზოლს სავარაუდოდ, კვლავაც აკონტროლებენ უკრაინელი სამხედროები, რომლებმაც ხიდები გაანადგურეს“.
უწყება ვარაუდობს, რომ „დიდი ალბათობით, რუსეთს მცირე ტაქტიკური პაუზა დასჭირდება, რათა მდინარის გადალახვისთვის ძალები გადააჯგუფოს და მოემზადოს შეტევისთვის დონეცკის სიღრმეში, სადაც უკრაინის ძალებს თავდაცვითი პოზიციები აქვთ გამაგრებული. ეს პაუზა შესაძლოა, რუსეთისთვის შეტევის იმ ტემპის დაკარგვას ნიშნავდეს, რომელსაც ბოლო კვირის განმავლობაში მიაღწია“.
სევეროდონეცკს ეხებოდა გაერთიანებული სამეფოს დაზვერვის გუშინდელი განახლებაც. უწყება აღნიშნავდა, რომ ქალაქის ქუჩებში ბრძოლები მიმდინარეობს და რომ რუსეთის ძირითადი სახმელეთო ოპერაციები და მთელი ძალა კვლავაც მიმართულია ლუგანსკის მცირე სექტორზე.
მთავარი ფოტო: რუსეთის ძალების წარუმატებელი მცდელობა გადაელახათ მდინარე სევერსკი დონეცი 12 მაისს/უკრაინის პრეზიდენტის ოფისი
