3-4 ივნისს ბათუმში „თანამედროვე ხელოვნების სივრცე“ უმასპინძლებს ფოტოგამოფენას – „ომის დღიურები“.
ომის დღიურები მულტიმედიური პროექტია, რომელიც casbatumi-სა და War diaries-ის ორგანიზებით ხორციელდება. ფესტივალი აერთიანებს მხატვრებსა და მუსიკოსებს, მსახიობებსა და მწერლებს, რომელთა მიზანია, აჩვენონ მხატვრების ხედვა უკრაინაში მიმდინარე პროცესებზე.
3 ივნისს გამოფენა გაიხსნება თანამედროვე ხელოვნების სივრცეში, რომელშიც მონაწილეობას მიიღებენ მხატვრები უკრაინიდან: ქინდერ ალბომი, ტარას ბიჩკო, ნიკიტა კადანი, ალევტინა კახიძე, ჟანა კადიროვა, ლესია ხომენკო, ვლადისლავ კრასნოშჩოკი, დანილო მოვჩანი, სტანისლავ ოსტროუსი, ვლადა რალკო, ალექსანდრე შატოხინი.
„პროგრამის თითქმის ყველა მონაწილე უკრაინაში რჩება ომის მიუხედავად, ამიტომ ღონისძიება მიზნად ისახავს დაფინანსების შეგროვებასაც მათ მხარდასაჭერად“, – ამბობენ ორგანიზატორები.
4 ივნისს აჭარის ხელოვნების სახელმწიფო მუზეუმი უმასპინძლებს გამოფენას „შორს მიმავალი შედეგები“, სადაც პოლონელი მხატვრები – ალიჩა კიელანი, ალა სავაშევიჩი, იოზეფ რობანოვსკი, კურატორი პაველ ბაკოვსკი მიიღებენ მონაწილეობას.
„ომის დღიურების“ გამოფენა დაგეგმილია თბილისსა და პოლონეთის 11 გალერეაში, შემდეგ კი – კორეასა და ევროპის სხვადასხვა ქვეყანაში.
ორგანიზატორთა განმარტებით, გამოფენის მიზანია აჩვენონ მსოფლიოს, როგორ შეიცვალა უკრაინელების ცხოვრება 2022 წლის 24 თებერვლის შემდეგ, როცა რუსეთმა უკრაინაში სრულმასშტაბიანი ომი დაიწყო.
„ყოველდღიური რუტინა შეცვალა ომის თემამ. საომარი მოქმედებების განახლებული მონაცემები, საყვარელი ადამიანების უსაფრთხოების შემოწმება, მოხალისეობა და ბრძოლა აქ ახალი რეალობაა.
თავშესაფრები, მეტროსადგურები და სარდაფები სოციალიზაციის ახალი ადგილები აღმოჩნდა. ყოველ დღეს მოაქვს მეტი საშინელება, მეტი ტკივილი და მეტი ბრაზი არაადამიანური სისასტიკით.
მხატვრები, ისევე როგორც ყველა სხვა, ამ ომის მძევლები არიან. თუმცა მათი ხმა სულ უფრო ძლიერდება, მათი ტკივილი მძვინვარებს“, – ვკითხულობთ ფესტივალის აღწერაში.
________________________
მთავარი ფოტო: გამოფენიდან „ომის დღიურები“.
