მთავარი,სიახლეები

რატომ გააპარა აჭარის საპატრულო პოლიციის უფროსი მოსამართლემ – 24 ოპოზიციონერის დაკავების საქმე

01.06.2022 • 15811
რატომ გააპარა აჭარის საპატრულო პოლიციის უფროსი მოსამართლემ – 24 ოპოზიციონერის დაკავების საქმე

დაანონსებული ქუჩის აქციების და სხვა პოლიტიკური აქტივობის ნაცვლად, უკვე მერამდენე დღეა ოპოზიცია სასამართლო სხდომებს ესწრება. დღეს, პირველ ივნისს, მოსამართლე ალექსანდრე გოგუაძემ აჭარის უმაღლესი საბჭოს დეპუტატების: გია აბულაძის, გიორგი კირთაძის და ლევან ანთაძის, ასევე ბათუმის საკრებულოს წევრის ილია ჯინჭარაძის და ხელვაჩაურის საკრებულოს წევრის – მერაბ ვარშალომიძის საქმე განიხილა.

დღესვე სასამართლოს ჩვენება მისცა მოწმის სახით დაბარებულმა დავით მაღრაძემ, აჭარის საპატრულო პოლიციის უფროსმა.

საუბარია 6 მაისის აქციაზე, რომელიც პოლიციამ ძალის გამოყენებით დაშალა, აქციის მონაწილეებს კარვები წაართვა და 24 ოპოზიციონერი ერთდროულად დააკავა. შსს-მ ოპოზიციონერები ადმინისტრაციული წესით დააკავა და ედავება წვრილმან ხულიგნობას, ასევე პოლიციის კანონიერი მოთხოვნების დაუმორჩილებლობას.

„აჭარის პოლიციის უფროსის მოადგილემ, დავით ათაბეგაშვილმა დაკავების დროს ფეხი ჩამარტყა ფეხზე და შემაგინა. წავიქეცი. ისიც წაიქცა, რადგან მე მაკავებდა… ვეუბნებოდი, მოგყვებით-მეთქი, მაგრამ არ დამანება თავი,” – 6 მაისის აქციაზე კარვების დაშლა და 24 ოპოზიციონერის დაკავება გაიხსენა დაკავებულთაგან ერთ-ერთმა, ლევან ანთაძემ. ის აჭარის უმაღლესი საბჭოს დეპუტატია ენმ-დან.

დავით ათაბეგაშვილი კი, აჭარის პოლიციის დეპარტამენტის უფროსის მოადგილეა. მისი მოწმის სახით გამოკითხვაზე მოსამართლე ალექსანდრე გოგუაძემ უარი თქვა.

„ჯერ ერთი, უნდა მოეცა გონივრული დრო თვითმმართველობის წარმომადგენელს და არა პოლიციას, მაგრამ სად იყო? თქვენ პირდაპირ გადმოდით შეტევაზე. ეს იყო დარბევა და არა ქუჩის გახსნა“, – იმ პოლიციელებს შეხედა ლევან ანთაძემ, შსს-ს რომ წარმოადგენდნენ სასამართლო სხდომაზე და მოსამართლეს 2020 წლის „თავისუფლების კვარტალი“ გაახსენა, როცა კარვებით გადაკეტილი ქუჩა ისევ აჭარის მთავრობის ადმინისტრაციულო შენობის წინ 4 თვე არავის დაუშლია.

„მაშინ იქ ღამით 20 ადამიანი რჩებოდა, ახლა 24 დაგვაკავეთ“, – პოლიციელებს მიმართა ლევან ანთაძემ.

„ჯერ რესურსცენტრის ხელმძღვანელი ვიყავი, შემდეგ განათლების მინისტრი, ადვოკატი, დეპუტატი, როდის უნდა შემესწავლა გინება?… ვერასდროს წარმოვიდგენდი, თუ ვინმე იტყოდა, დადგა ასე გია აბულაძე ქუჩაში  და იგინებოდაო… ოქმში მინიმუმ ფაქტობრივი გარემოებების აღწერა არ გევალებოდათ?“ – ჰკითხა გია აბულაძემ პოლიციელებს. ისიც უმაღლესი საბჭოს დეპუტატია ენმ-დან და მოსამართლეს საკუთარი დაკავების ოქმი აჩვენა:

„იქნებ, თქვენ მაინც გამარკვიოთ, ვინ დამაკავა? მაჩვენეთ ერთი მოწმე, რომელიც ადასტურებს, რომ შევიგინე?“ – იკითხა გია აბულაძემ და პოლიციელებს ჩააცივდა – „მაჩვენეთ ერთი ვიდეო კადრი, სადაც მე ვიგინებოდიო“.

პოლიციელებმა მოსამართლეს სხდომაზე რამდენიმე ვიდეოჩანაწერი აჩვენეს. ჩანაწერებში არც გია აბულაძის გინება ისმის და არც რომელი სხვა ოპოზიციონერის, ვინც 6 მაისის ღამით დააკავეს „პოლიციელების გინებისთვის“ და „საზოგადოებრივი წესრიგის დარღვევისთვის“.

„გინება რომც ყოფილიყო, ეს არის გამოხატვის თავისუფლება და კანონი ამბობს, რომ არ არსებობს იმაზე დიდი უფლება, ვიდრე გამოხატვის თავისუფლებაო“, – ხმამაღლა და დამარცვლით წაუკითხა კონსტიტუციის ჩანაწერი შსს-ს წარმომადგენლებს მირდატ ქამადაძემ. ის ენმ-ს ერთ-ერთი ლიდერია ბათუმში და სასამართლო პროცესზე ოპოზიციონერების ინტერესებს იცავს.

„დიახაც, პუტინის დედას შ…“ – ამ სხდომაზეც მოსამართლის თვალწინ შეაგინა პუტინს მირდატ ქამადაძემ. ამჯერად ის მოსამართლემ შეაჩერა.

„კარგით ახლა, ეს სასამართლოს შეურაცხყოფაა“, – თქვა მოსამართლე ალექსანდრე გოგუაძემ.

„არაა ეს შეურაცხყოფა, მინდოდა გამომეხატა, რომ ვინმეს შესაძლოა გინება არ მოეწონოს, მაგრამ ეს გამოხატვის თავისუფლებაა. უკანონობაა ის, რასაც ქალბატონი თეა ამბობს [შსს-ს წარმომადგენელი თეა ლაღაძე], რომ თურმე, რადგან 6 მაისი დასრულდა და 7 მაისი დაიწყო, აქციის დაშლის უფლება ჰქონდათ“, – გაცხარდა მირდატ ქამადაძე.

„მე ვიგულისხმე მხოლოდ ქუჩის სავალი ნაწილი“, – დისკუსიაში ჩაერთო თეა ლაღაძე, შსს-ს წარმომადგენელი.

„თუნდაც ასე იყოს, რა მნიშვნელობა აქვს…“ – უპასუხა სამართალდამცველს მირდატ ქამადაძემ და მერე ვიტალი ზოიძეს მიუბრუნდა, პოლიციელს, რომელმაც ვიდეო მტკიცებულებები წარმოუდგინა სასამართლოს.

„სადაა გინება? პირიქით, ამ ვიდეოებიდან ის ჩანს, რომ პოლიციელები ვერშემდგარი ძველი ბიჭები არიან,  ისეთი ლექსიკით საუბრობენ“, – აღნიშნა მირდატ ქამადაძემ.

„მითითება იყო ყველასთვის, გაეთავისუფლებიათ გზის სავალი ნაწილი… ეს იყო კანონიერი მოთხოვნა“, – დაიწყო პოლიციელმა ვიტალი ზოიძემ.

„რა ადასტურებს ამ ვიდეოებიდან მითითებულ სამართალდარღვევას?“ – კონკრეტიკის მოთხოვნით სიტყვა გააწყვეტინა პოლიციელს მირდატ ქამადაძემ და როცა პასუხი ვერ მიიღო, კიდევ ერთი კითხვა დაუსვა.

„მეობის და კაცობის სადღეგრძელოს ყანწით სვამ ხო?“ – ქამადაძის ეს კითხვა პოლიციელმა აღარ შეიმჩნია.

„რეზო ხარაზი რომ სცემს ილო ჯინჭარაძეს ეს კადრი რატომ ამოჭერით?“ – პოლიციელებს ამჯერად გიორგი კირთაძემ დაუსვა შეკითხვა.

„როგორ? სცემა?“ – გაიოცა თეა ლაღაძემ, შსს-ს წარმომადგენელმა.

„როგორ, კაცო, რეზო ხარაზის საქმე ხომ უკვე დავასრულეთ?“ – დაბნეულობა დაეტყო მოსამართლეს, რეალურად კი, გიორგი კირთაძე პოლიციელ რეზო ხარაზს გულისხმობდა და არა ბათუმის საკრებულოს წევრ რეზო ხარაზს, რომელიც ასევე 6 მაისს დააკავეს და მისი საქმე უკვე განიხილა მოსამართლემ.

„ორი რეზო ხარაზი გვყავს ამ ქალაქში, ბატონო მოსამართლევ“, – გაღიმება სცადა გიორგი კირთაძემ.

„დაკავების ოქმში არ წერია, რომ ვიგინებოდი, შემდეგ ჩამიწერეთ სამართალდარღვევის ოქმში, რომ შევიგინე, მაგრამ რის საფუძველზე? ვინმე გამოჰკითხეთ?“ – პაექრობის ეტაპზე ისევ პოლიციელ ვიტალი ზოიძეს მიუბრუნდა გია აბულაძე, უმაღლესი საბჭოს დეპუტატი.

„კი, გამოვკითხეთ“, – ჩაილაპარაკა ვიტალი ზოიძემ.

„ვინ გამოჰკითხეთ და სადაა მერე ეს მტკიცებულება წარმოდგენილი?“ – თანაგრძნობის მოლოდინით მოსამართლეს გახედა დეპუტატმა.

„არა, აწი ვეღარ წარმოადგენს, ცხადია“, – გია აბულაძის დამშვიდება სცადა მოსამართლემ.

„ვინ დამაკავა, ის მაინც მითხარით, ან კიდევ: ფოტო რატომ გადამიღეთ?“ – კითხვების ჩამონათვალზე პასუხი ვერ მიიღო დეპუტატმა და დასძინა: „თუ არ ხართ საქმის კურსში, თქვით ბატონო“, – თქვა მან.

„ოროსნები ხართ, საქართველოს დღეს პოლიცია აღარ ჰყავს“, – ხმამაღლა გამოუვიდა მიმართვა მირდატ ქამადაძეს შსს-ს მიმართ.

მერე მოწმეთა გამოკითხვა დაიწყო.

„ბორინკას მონებს გვეძახდა. მეო, ბორინკას კანონებს არ დავემორჩილებიო… გვიშლიდა ხელს, რომ არ გაგვეთავისუფლებია ქუჩა,“ – ლევან ანთაძის დაკავება გაიხსენა მოწმის სახით სასამართლოში დაბარებულმა პოლიციელმა, ჭაბუკა აბულაძემ.

„მომისმინეთ ერთი წუთით, თქვენი ჩვენებიდან გამომდინარე აზრი გამიჩნდა, რომ თქვენ ხართ მონა“, – მშვიდად მიმართა მოწმეს მირდატ ქამადაძემ და როცა იგრძნო, რომ პოლიციელი გაშრა, დაუმატა:

„მონა გიწოდეთ მე ახლაც, დამაკავეთ“, – დამარცვლით გაუმეორა ოპოზიციონერმა პოლიციელს.

„პროვოცირებას ცდილობენ“, – მოსამართლეს მიმართა შსს-ს წარმომადგენელმა, თეა ლაღაძემ.

„ვინც წამოგაყენათ ზეზე, ის ვიყავი მე“, – დაძაბულობის განმუხტვა სცადა მოწმე პოლიციელმა და დეპუტატ ლევან ანთაძეს შეხედა.

„ვინ წამაქცია, იქნებ ეს გვითხრათ, რომ ვიძახდი, ნუ მარბენიებთ, ვიქცევი-მეთქი“, – თქვა ლევან ანთაძემ.

„წინაღობა იყო სავალ ნაწილზე“, – უკან აღარ დაიხია პოლიციელმა.

პოლიციელ გიორგი მოწყობილსაც ოროსანი უწოდა მირდატ ქამადაძემ მას შემდეგ, რაც დაჟინებით მოითხოვა განემარტა: რა სამართლებრივი საფუძვლით მოითხოვა პოლიციამ 6 მაისს კარვების აღება?ამ პოლიციელისთვის სიტყვით „ბიჭო“ მიმართვის გამო, მოსამართლემ 300 ლარით დააჯარიმა მირდატ ქამადაძე.

„შეურაცხყოფას ეს პოლიციელები გაყენებენ სასამართლოს, რადგან ხელწერილს დებენ ცრუ ჩვენებაზე, ვიდეოებიდან კი გამოჩნდა, რომ ცრუობენ… მე მაინტერესებს სასამართლო რა რეაგირებას მოახდენს ამაზე“, – მოსამართლეს მიმართა მირდატ ქამადაძემ.

„შევაფასებთ და მივიღებთ საბოლოო გადაწყვეტილებას“, – მოკლედ უპასუხა კითხვას მოსამართლე ალექსანდრე გოგუაძემ.

სამაგიეროდ გიორგი კირთაძე გაახარა მორიგმა პოლიციელმა, რამაზ ბერიძემ: „ის არ იგინებოდა, არც წინააღმდეგობა გაუწევია“, – მოკლე აღმოჩნდა მოწმის სათქმელი, ვინც გიორგი კირთაძე დააკავა.

„აგაშენა ღმერთმა“, – მოწმეს გაუღიმა გიორგი კირთაძემ.

იმ პოლიციელმაც, ვინც გია აბულაძის დაკავებაში მონაწილეობდა, თქვა, რომ დეპუტატი არ იგინებოდა. მეტიც, პოლიციელი გია აკვაზბა ჩვენებით სრულიად დაუპირისპირდა იმ ვერსიას, რაც შსს-მ სასამართლოში წარმოადგინა და პრაქტიკულად ერთი-ერთში დაემთხვა ვერსიას, რასაც მოწმეების დაკითხვამდე გია აბულაძე 6 მაისის აქციის შესახებ მოსამართლეს მოუყვა. მაგალითად, დაკავების ოქმის მიხედვით, გია აბულაძე დააკავა და სამმართველოში გადაიყვანა ერთმა პოლიციელმა, გია აკვაზბამ კი, დაადასტურა, რომ ის მანქანაში საჭესთან იყო, გია აბულაძის გვერდით კი, კიდევ ერთი პოლიციელი იჯდა.

„აი, ასეთი პოლიციელი უნდა იყოთ“, – ამაყად მიუბრუნდა შსს-ს წარმომადგენლებს გია აბულაძე.

სასამართლოს ჩვენება მისცა დავით მაღრაძემ, აჭარის საპატრულო პოლიციის უფროსმა. მან ჩვენებაში ხაზი გაუსვა იმას, რომ დაკავების დროს უკვე 7 მაისი იყო და არა 6 მაისი. პოლიციის უფროსმა, რომელიც კანონის დაცვის გარანტი უნდა იყოს, ასევე თქვა, რომ „აქცია დასრულებული იყო“.

დავით მაღრაძის თქმით, მან ისარგებლა „პოლიციის შესახებ“ კანონის მე-17 მუხლით, რაც ითვალისწინებს „სატრანსპორტო მოძრაობის მოწესრიგებას“. პოლიციის უფროსის განმარტებით, რადგან აქციის მონაწილეების რაოდენობა შემცირდა, აღარ იყო საჭიროება ქუჩა ისევ გადაკეტილი ყოფილიყო.

„კი არ დაშალეთ თქვენ აქცია, არამედ დაარბიეთ, ახლა ტყუილში გამოგიჭირეთ: რატომ იყო თქვენი მოთხოვნა კანონიერი?“ – ჰკითხა პოლიციის უფროსს მირდატ ქამადაძემ და იქვე განმარტა, რომ პოლიციის შესახებ კანონი პოლიციელმა შეიძლება გამოიყენოს მხოლოდ იმ შემთხვევაში, როცა საქმე სამართალდარღვევის აღკვეთას ეხება, აქ კი საქმე გვქონდა პოლიტიკურ აქციასთან. იურისტის განმარტებით, ამ შემთხვევაში „შეკრებების და მანიფესტაციების შესახებ“ კანონის მიხედვით გადაწყვეტილება უნდა მიეღო მერიას, ან საქართველოს მთავრობას.

„ჩვენ ვიმოქმედეთ პოლიციის შესახებ კანონის მიხედვით,“ – გაიმეორა პოლიციელმა.

„თქვენ კანონი არ იცით, თქვენი დაბალი კომპეტენცია გამოჩნდა,“ – მიუბრუნდა პოლიციის უფროსს მირდატ ქამადაძე.

„თქვენ მე შეურაცხყოფას მაყენებთ, ადამიანობა და ოჯახია პირველი,“ – ოდნავ გაბრაზებაც დაეტყო აჭარის საპატრულო პოლიციის უფროსს. ამასობაში კი, დიალოგში გიორგი კირთაძე ჩაერთო:

„შეურაცხყოფა კი არა, სირცხვილია მართლა, პოლიციის უფროსი გამოდიხართ აქ და გამოხატვის თავისუფლებას მართმევ… ვის შევაგინე, მაჩვენეთ. მატყუარა და ცრუპენტელები ხართ. ჩემი შვილის მომავალს თქვენ ვერ განდობთ,“ – მიმართა დავით მაღრაძეს გიორგი კირთაძემ.

„თავისუფალი ხართ“ – გასავლელისკენ მიანიშნა მოსამართლემ პოლიციის მაღალჩინოსანს და ხმაურში გააპარა კიდეც მოწმე, რომ მას სხვა ადვოკატების და შსს-ს მიერ სამართალდამრღვევებად მიჩნეული ოპოზიციონერი დეპუტატების კითხვებიც კი არ მოესმინა.

დავით მაღრაძე – აჭარის საპატრულო პოლიციის უფროსი

გადაბეჭდვის წესი


ასევე: