„ბათუმელების“ ინფორმაციით, ბოლო კვირის განმავლობაში მდინარე ბარცხანამ მინიმუმ ორჯერ მიიღო ლილისფერი. მდინარე სავარაუდოდ ქიმიური ნარჩენებისგან არის დაბინძურებული. მდინარის მიმდებარე ტერიტორიაზე რამდენიმე ქარხანა და მშენებარე ობიექტია.
როგორც მდინარესთან მცხოვრებმა ერთ-ერთმა მოქალაქემ, გიორგი სიხარულიძემ „ბათუმელებს“ უთხრა, მდინარის ფერისცვლილება მან უკვე მეორედ დააფიქსირა.
„გოგოლის ქუჩიდან ბაქრაძის ქუჩის მონაკვეთამდე შევნიშნე ეს ცვლილება. მდინარე არის მთლიანად ლილისფერი. არა მგონია, რომ მოსახლეობას ჩაესხა რაიმე. ვფიქრობ, სამეწარმეო დაბინძურებაა. აქვე ახლოს ორი ქარხანაა, ფარმაცევტული და ზეთის, შესაძლოა ამ საწარმოებიდან ჩაედინება რაიმე ქიმიური ნარჩენები, არ ვიცი.
დღეს განმეორდა ეს შემთხვევა – წინა დღესაც ზუსტად ასეთი შეფერილობით მოედინობოდა მდინარე და ახლაც იგივე მდგომარეობაა. ვერ გეტყვით, რა არის. გველებიც კი ვერ გაჩერდნენ მდინარეში და ზემოთ ამოვიდნენ. გვწამლავენ“, – ამბობს გიორგი სიხარულიძე.
მოქალაქე ითხოვს, რომ გარემოს დაცვის ზედამხედველობის დეპარტამენტმა აუცილებლად აიღოს სინჯები და დაიწყოს ფაქტზე მოკვლევა.
„ბათუმელები“ გარემოს დაცვის ზედამხედველობის დეპარტამენტს დაუკავშირდა და ჰკითხა, ხომ არ აქვთ ინფორმაცია მდინარე ბარცხანის სავარაუდო დაბინძურების ფაქტზე. როგორც დეპარტამენტში გვითხრეს, შეტყობინება აქამდე არ ჰქონიათ და მოკვლევას ჩვენი ზარის შემდეგ დაიწყებენ.
