უკრაინის პრეზიდენტის ოფისის ხელმძღვანელის მრჩეველი, მიხაილო პოდოლიაკი ვარაუდობს, რომ ომი, სულ მცირე, ზამთრამდე მაინც გაგრძელდება, რადგან უკან დახევა არცერთ მხარეს არ შეუძლია.
„ამ წლის შემოდგომამდე, ზამთრამდე ყველაფერი ძალიან პარადოქსულად განვითარდება. რატომ? იმიტომ, რომ გაჩერებას ვერავინ შეძლებს. ვერც ერთ და ვერც მეორე მხარეს ახლანდელ მდგომარეობაში გამარჯვების შეგრძნება ვერ ექნება.
უკრაინას გაჩერება ნამდვილად არ შეუძლია. ეს ობიექტური გარემოებებია. სამხედრო-პოლიტიკურ ხელმძღვანელობას ეჭვი არ ეპარება, რომ ომი უკრაინის სცენარით უნდა მიდიოდეს. როგორც კი ჩვენ სხვაგვარ გადაწყვეტილებას მივიღებთ, ბანკოვზე მოგვადგება ათასობით ადამიანი, რომლებმაც ახლობლები, ოჯახის წევრები, შვილები, ცოლები, ქმრები დაკარგეს და გვკითხავენ: რისთვის დაიხოცა ეს ხალხი? რუსეთს რომ მართლა წესებით ეომა, ნებისმიერ მომენტში შეიძლებოდა თქმა, რომ კარგი, გავიგეთ – ეს ინფრასტრუქტურული ომია, ანადგურებენ სამხედრო ობიექტებს.
მაგრამ აქ საკითხი ასე არ დადგება. ჩვენ ყოველთვის გვკითხავენ: ეს ხალხი, ეს ბავშვები, ხუთ წლამდე ბავშვები სამი თვე სარდაფებში ისხდნენ და რაც ხელში მოხვდებოდათ და იპოვიდნენ იმას ჭამდნენ, რისთვის? რატომ დაასახიჩრეს და დახოცეს ოკუპანტებმა ეს ადამიანები? და ჩვენ ამ კითხვებს ვერ ვუპასუხებთ თუ დღეს ომს ორი წლით გადავდებთ. ამიტომ გადაწყვეტილების მიღებისას არანაირი დუალიზმი არ არსებობს – უნდა გავაგრძელოთ თუ არა ბრძოლა. ამიტომაც ომი ვერ შეწყდება დემარკაციის ხაზზე. არც ხერსონის, არც ზაპოროჟიეს, არც დონეცკისა და არც ლუგანსკის ოლქებს კატეგორიულად არ სურთ ამ „რუსულს სამყაროში“ ცხოვრება“, – განაცხადა პოდოლიაკმა „ინტერფაქს-უკრაინასთან“ ინტერვიუში.
პოდოლიაკის თქმით, ქვეყნის სამხედრო ხელმძღვანელობა სრულად იზიარებს პოლიტიკური ლიდერების გეგმებს იმასთან დაკავშირებით, რომ კონფლიქტის გაყინვა დაუშვებელია და რომ უკრაინის არმიამ უნდა დაიბრუნოს დაპყრობილი ტერიტორიები.
მიხაილო პოდოლიაკმა ასევე აღნიშნა, რომ უკრაინის ხელისუფლება გაცვლის ნებისმიერ პროცედურას დათანხმდება, რათა უკრაინელი სამხედროები რუსეთის ტყვეობიდან გამოიხსნას.
„ჩვენ თანახმა ვიქნებით ნებისმიერი რაოდენობით რუსი სამხედროები გავცვალოთ ჩვენებში. რუსები ჩვენ არ გვჭირდება, თუმცა ვფიქრობ, რომ არც რუსეთს სჭირდება ისინი. რუსეთს ჰყავს ჯარისკაცთა გარკვეული კატეგორია, რომელთა უკან დაბრუნებასაც ისინი ყოველთვის მოინდომებენ. პირველ რიგში ახალწვეულები. ახლა ჩვენ ძალიან დაინტერესებული ვართ, რომ მივიღოთ ინფორმაცია რუსეთში მყოფ ჩვენს ტყვეებზე: როგორ არიან ისინი, იღებენ თუ არა სამედიცინო დახმარებას, კვებას“.
პოდოლიაკი განმარტავს, რომ ამჟამად მოლაპარაკებები შეჩერებულია ყველა დონეზე, ჰუმანიტარულის გარდა, რომელზეც სამხედრო ტყვეთა გაცვლის საკითხები განიხილება. უკრაინული მხარე მუდმივად გზავნის მოთხოვნას ოკუპირებული ტერიტორიებიდან უკრაინის მოქალაქეთა გამოსაყვანად და რუსეთში მყოფი უკრაინელი სამხედროების შესახებ ინფორმაციის მისაღებად.
მიხაილო პოდოლიაკის თქმით, ომი, ნებისმიერ შემთხვევაში დასრულდება გარკვეული მოლაპარაკებით – ბრძოლის ველზე მიღწეული შედეგები იურიდიულად გაფორმდება. თუმცა უკრაინის მიზანია, დაიბრუნოს თავისი ტერიტორიები და ისე დაჯდეს მოლაპარაკების მაგიდასთან.
