„ყველაზე რთული ვითარება ახლა უკრაინის აღმოსავლეთით და დონეცკისა და ლუგანსკის ოლქების სამხრეთითაა. სიტუაცია ძალიან რთულია. ყოველდღიურად, ბრძოლაში 60-100 უკრაინელი ჯარისკაცს ვკარგავთ, დაახლოებით 500 კი იჭრება“, – განაცხადა უკრაინის პრეზიდენტმა ვოლოდიმირ ზელენსკიმ Newsmax-თან ინტერვიუში.
უკრაინის პრეზიდენტის განცხადებით, მსოფლიოს პუტინის აგრესიისა და გლობალური ამბიციებისგან სწორედ უკრაინა და უკრაინელები იცავენ.
„ჩვენ „დაცვის პერიმეტრი“ ვართ. ეს არ არის ჩვეულებრივი ან ბუნებრივი რამ. ეს არის ჩვენი ხალხისგან შექმნილი ფიზიკური ბარიერი“.
ზელენსკის განცხადებით, რუსეთი უკრაინაზე არ გაჩერდება: „სხვა ქვეყნები, ყოფილი საბჭოთა რესპუბლიკები და ევროკავშირის წევრი სახელმწიფოები, ზოგიერთი NATO-ს წევრი ქვეყანაც – ისინი უკვე საფრთხის ქვეშ არიან“.
ზელენსკიმ ინტერვიუში ასევე ისაუბრა უფრო სანქციების სრულად ამოქმედების აუცილებლობაზე და იმაზეც, რომ მსოფლიომ უნდა შეწყვიტოს პუტინის დაცვა.
„ახლა ის თითქმის იზოლირებულია. მსოფლიო ყოველთვის აძლევს მას შანსს, რადგან სანქციები ბოლომდე ამოქმედებული არაა. ზოგიერთი ლიდერის განცხადების მიხედვით, ისინი კიდევ ტოვებენ შესაძლებლობას, რომ პუტინისთვის გამოსავალი მოიძებნოს,“ – განაცხადა ზელენსკიმ.
უკრაინის ხელისუფლებას ინფორმაცია ომის დანაკარგების შესახებ მარტის შემდეგ არ გამოუქვეყნებია. 12 მარტს პრეზიდენტმა ზელენსკიმ განაცხადა, რომ ომის დაწყებიდან 16 დღის განმავლობაში 1 300 უკრაინელი სამხედრო დაიღუპა.
___
„30-31 მაისს დაძაბული ბრძოლები მიმდინარეობდა სევეროდენცკის ქუჩებში, რუსეთის ჯარები ქალაქის ცენტრს უახლოვდებოდნენ. ახლა ქალაქის ნახევარზე მეტს, სავარაუდოდ, რუსეთის არმია აკონტროლებს, მათ შორის ჩეჩენი მებრძოლები“, – წერს ბრიტანეთის დაზვერვა ტვიტერზე, პირველ ივნისის განახლებაში.
მთავარი ფოტო: უკრაინის პრეზიდენტის ოფისი
