ნეტგაზეთი • RU

კაიროსთან ასობით ძველი ეგვიპტური სარკოფაგი და ბრინჯაოს ქანდაკება აღმოაჩინეს

ეგვიპტეში, კაიროსთან ახლოს, არქეოლოგებმა ასობით ძველი ეგვიპტური სარკოფაგი და ღვთაებათა ბრინჯაოს ქანდაკება აღმოაჩინეს. ამის შესახებ „როიტერსი“ წერს

ეგვიპტის ტურიზმის სამინისტროს განცხადებით, საქარის სამარხებზე აღმოჩენილია ანუბისის, ამონის, მინის, ოსირისის, ისისის [ისიდა], ნეფერტუმის და სხვა ეგვიპტური ღმერთების ქანდაკებები, აგრეთვე, საკარას პირამიდის არქიტექტორის, იმჰოტეპის ქანდაკება თავის გარეშე.

ფოტო: EPA-EFE/KHALED ELFIQI

ფოტო: EPA-EFE/KHALED ELFIQI

სამინისტროს განცხადებით, სულ ნაპოვნია: გვიანდელი პერიოდის 250 სარკოფაგი, 150 ბრინჯაოს ქანდაკება, ბრინჯაოს ჭურჭლის კოლექცია, სამკაულები, კოსმეტიკური საშუალებები და მუსიკალური ინსტრუმენტი, რომელიც გამოიყენებოდა ქალღმერთ ისისის თაყვანისცემის რიტუალებში. ნივთები დაახლოებით 2500 წლის სიძველისაა.

მოხატულ ხის სარკოფაგებში აღმოჩენილია მუმიები, ამულეტები და ხის ყუთები. ერთ-ერთ სარკოფაგში იპოვეს პაპირუსი იეროგლიფური დამწერლობით, რომელიც, სპეციალისტების ვარაუდით, შესაძლოა ლექსი იყოს „მიცვალებულთა წიგნიდან“.

აღმოჩენები გადაგზავნილია კაიროში, ეგვიპტის მუზეუმის ლაბორატორიაში, სარკოფაგებს კი ეგვიპტის დიდ მუზეუმში გადაიტანენ, რომელიც გიზის დიდ პირამიდებთან შენდება და ამ წლის ბოლოს გაიხსნება.

ეგვიპტის ამ ტერიტორიაზე გათხრები 2018 წლიდან დღემდე მიმდინარეობს და აღმოჩენილია მსოფლიო ისტორიისთვის არაერთი მნიშვნელოვანი სიძველე.

ფოტო: EPA-EFE/KHALED ELFIQI

ფოტო: EPA-EFE/KHALED ELFIQI

 

ნეტგაზეთის მასალების სხვა გამოცემებში გადაბეჭდვის წესი
მარიკა ბოლქვაძე