განათლების მინისტრის პირველი ივნისის დადგენილებით, 2021-2022 სასწავლო წელს საბაზო და საშუალო საფეხურის ის მოსწავლეები, რომლებმაც სასწავლო წლის განმავლობაში გააცდინეს კონკრეტული საგნისთვის დათმობილი საათების 30 პროცენტი, შეფასდებიან შემაჯამებელი – კომპლექსური დავალებებით.
აქამდე, ეროვნული სასწავლო გეგმის 38-ე მუხლის მიხედვით, მოსწავლეს ექსტერნის გამოცდის ჩაბარება უწევდა იმ შემთხვევაში, თუკი მას კონკრეტულ საგანში სასწავლო წლის მანძილზე დათმობილი საათების 30 პროცენტი ჰქონდა გაცდენილი.
ახალი დადგენილების მიხედვით კი, მოსწავლე შემაჯამებელი/კომპლექსური დავალებით შეფასდება და მას ექსტერნის გამოცდის ჩაბარება აღარ მოუწევს.
„შემაჯამებელ/კომპლექსურ დავალებაში მიღებული ქულა იქნება საგნის წლიური ქულა“, – ნათქვამია მინისტრის დადგენილებაში.
ამავე დადგენილებით, 2021-2022 სასწავლო წელს იმ მოსწავლეებს, რომელთაც დადასტურებული კოვიდის ინფექციის გამო დათქმულ ვადაში ვერ მოახერხეს პირველი სემესტრის სემესტრულ გამოცდაზე გასვლა, სკოლა ვალდებულია პირველი სემესტრის სემესტრული გამოცდა 2022 წლის 17 ივნისამდე დაუნიშნოს არაუგვიანეს 2 კვირით ადრე.
როგორც რესურსცენტრში განმარტეს, სემესტრული გამოცდა იმ შემთხვევაში დაინიშნება, თუკი მოსწავლეს პრეტენზია ექნება საბოლოო ნიშანზე.
ასეთ შემთხვევაში, მოსწავლეს შეუძლია მოითხოვოს გამოცდის დანიშვნა და ხელმეორედ შეფასება.
