რუსეთის მიერ ლიმანის დაკავება იმ საბრძოლო ამოცანის ნაწილია, რომელიც სევეროდონეცკისა და ლუგანსკში მყოფი უკრაინული ძალების ალყაში მოქცევას გულისხმობს – ასე აფასებს დიდი ბრიტანეთის დაზვერვა დონბასში მიმდინარე საომარ მოქმედებებს.
უწყების 31 მაისის სადაზვერვო ცნობარის მიხედვით, გრძელდება ინტენსიური სროლა, სევეროდონეცკის გარეუბნებში კი ბრძოლები ქუჩებში მიდის.
„რუსეთის არმიის სამხრეთ დანაყოფები შედარებით წარმატებულ მიმართულებას ხელმძღვანელობენ. მათ ჩრდილოეთიდან შეტევით ცენტრალური დაჯგუფებებიც ეხმარებიან,“ – წერს დიდი ბრიტანეთის დაზვერვა და დასძენს, რომ ზონა, რომლის ყულფში მოქცევასაც რუსეთის ჯარები ცდილობენ, სავარაუდოდ, კვლავ უკრაინელთა კონტროლქვეშაა.
„რუსეთმა ამ რეგიონში უფრო მეტ ლოკალურ წარმატებას მიაღწია, ვიდრე მანამდე, იმის ხარჯზე, რომ მთელი ძალები და ცეცხლი შედარებით მცირე ტერიტორიისკენ მიმართა“, – აღნიშნავს უწყება.
დაზვერვის ვარაუდით, ეს ფაქტორი რუსეთს აიძულებს, გარკვეულ რისკებზე წავიდეს სხვა უკვე ოკუპირებული ტერიტორიებზე.
უწყების ცნობით, რუსეთის შეიარაღებული ძალების ამოცანა ახლა დონეცკისა და ლუგანსკის ოლქების მთლიანად დაპყრობაა.
გაერთიანებული სამეფოს თავდაცვა უკრაინაში მიმდინარე მოვლენების განახლებას ყოველდღიურად აქვეყნებს. 30 მაისის პოსტში ტვიტერზე უწყება რუსეთის შეიარაღებულ ძალების მდგომარეობაზე წერდა, რომ რუსეთს დიდი დანაკარგი აქვს ოფიცრების შემადგენლობაში, არმიაში კი ადგილი აქვს ლოკალურ აჯანყებებს.
მთავარი ფოტო: უკრაინის საომარი მოქმედებების რუკა 30 მაისის მდგომარეობით/დიდი ბრიტანეთის დაზვერვა.
