Batumelebi

2022 წლის იანვრიდან, მსუბუქ ავტომანქანაში, თუ მასში არასრულწლოვანი იმყოფება, სიგარეტის მოწევა აკრძალულია.

შესაბამისი ცვლილება „თამბაქოს კონტროლის შესახებ“ კანონში შევიდა, რომლის მიხედვითაც, თამბაქოს მოწევა უკვე აკრძალულია „ავტოსატრანსპორტო საშუალებაში [ავტომობილში] მასში არასრულწლოვანის ყოფნისას“.

თამბაქოს მოწევა 2022 წლის იანვრიდან აკრძალულია ტქსშიც:

[red_box]პარლამენტმა ტაქსებში მოწევა აკრძალა[/red_box]

შესაბამისად, „თამბაქოს კონტროლის შესახებ“ კანონში, ტერმინი – საზოგადოებრივი ტრანსპორტი – შემდეგნაირად განისაზღვრა: „ნებისმიერი სატრანსპორტო საშუალება, მათ შორის, ავტობუსი, ტრამვაი, ტროლეიბუსი, სამარშრუტო სატრანსპორტო საშუალება, ტაქსი, მატარებელი, საჰაერო ხომალდი, მეტროპოლიტენი, საბაგირო ტრანსპორტი, გემი ან სხვა სანაოსნო საშუალება, რომელიც გამოიყენება ადამიანების შესაბამისი საფასურის სანაცვლოდ ან/და კომერციული მოგების მიღების მიზნით გადასაყვანად“.

ამავე თემაზე „ბათუმელების“ არქივიდან:

3 იანვრის დილის მონაცემებით, ბოლო 24 საათში საქართველოში კორონავირუსის 943 ახალი შემთხვევა დადასტურდა. ამავე პერიოდში ვირუსისგან 37 ადამიანი გარდაიცვალა.

• კორონავირუსის დადასტურებული შემთხვევა სულ – 938 583, ბოლო 24 საათში – 943
• მათ შორის გამოჯანმრთელებული – 902 948, ბოლო 24 საათში – 2 789
• მათ შორის გარდაცვლილი სულ – 13 942, ბოლო 24 საათში – 37

ბოლო 24 საათში ქვეყანაში ჩატარდა 15 032 კვლევა ტესტით, მათ შორის ანტიგენის სწრაფი ტესტით – 7 413, PCR ტესტით – 7 619

დადებითობის მაჩვენებელი: დღიური – 6,27%, ბოლო 14 დღის – 5,5%, ბოლო 7 დღის – 5,77%.

დღეს ქვეყანაში გამოვლენილი ინფიცირების 943 ახალი შემთხვევიდან: თბილისში გამოვლენილია 519 შემთხვევა, აჭარა – 91, იმერეთი – 68, ქვემო ქართლი – 125, შიდა ქართლი – 15, გურია – 29, სამეგრელო – ზემო სვანეთი – 40, კახეთი -37, მცხეთა-მთიანეთი -13, სამცხე-ჯავახეთი – 6.

• დღეის მდგომარეობით სტაციონარში მეთვალყურეობის ქვეშაა – 4 446 პაციენტი; მათ შორის, თბილისის საავადმყოფოებში – 2 039, აჭარაში – 487, იმერეთში – 822.
• ამ ეტაპზე მძიმე პაციენტია 1 137 პირი, მათ შორის, თბილისში – 543, აჭარაში – 118, იმერეთში – 300.
• ხელოვნური სუნთქვის აპარატზე იმყოფება 269 პირი,  მათგან თბილისში – 154, აჭარაში – 34, იმერეთში – 29

კოვიდსასტუმროში კი, ქვეყნის მასშტაბით, 833 პაციენტი მკურნალობს.

დაავადებათა კონტროლისა და საზოგადოებრივი ჯანმრთელობის ეროვნული ცენტრის ცნობით, 31 დეკემბრის მდგომარეობით, საქართველოში ლაბორატორიულად დადასტურებულია ომიკრონის 144 შემთხვევა.

საქართველოში კოვიდის ახალი შტამის, ომიკრონის პირველი ორი შემთხვევა 20 დეკემბერს დადასტურდა. ათ დღეში, ომიკრონის შემთხვევები ორიდან 144-მდე გაიზარდა.

2 იანვრის მონაცემებით, საქართველოში დადასტურდა კოვიდის 796 ახალი შემთხვევა. ჩატარდა 13 441 ტესტი კორონავირუსზე.

გასულ 24 საათში 45 პაციენტი გარდაიცვალა კოვიდით.

1 იანვრის მონაცემებით, დადებითობის დღიური მაჩვენებელია 5,92%, ბოლო 14 დღის – 5,49%, ბოლო 7 დღის – 5,67%.

გასულ 24 საათში აჭარაში კოვიდის 66 ახალი შემთხვევაა.

ძვირფასო მხარდამჭერებო, აჭარის 29 მაღალმთიან სოფელში თქვენი საჩუქრები უკვე მიიღეს: “მოგზაურმა ბიბლიოთეკამ” 2021 წელს, თქვენი დახმარებით, მაღალმთიანი აჭარის 17 სასოფლო და 12 სასკოლო ბიბლიოთეკა განაახლა. საერთო ჯამში, 70 000-ზე მეტი ლარის წიგნი დავასაწყობეთ, აქედან 50 000-მდე ლარის ღირებულების წიგნმა უკვე მიაღწია მკითხველამდე.

ერთ-ერთი სოფლის სკოლაში, წიგნადი ფონდის განახლებასთან ერთად, დირექციის ინიციატივით საბიბლიოთეკო სივრცეც შეიცვალა – გარემონტდა და გაფართოვდა.

„მოგზაური ბიბლიოთეკა“ არის „ბათუმელებისა“ და „ნეტგაზეთის“ საგანმანათლებლო პროექტი.

მადლობას გიხდით, რომ ეს ყველაფერი შესაძლებელი გახადეთ.

“მოგზაური ბიბლიოთეკა” 2021 წელს აჯამებს. ნახეთ ანგარიში და თვალი გადაავლეთ ბიბლიოთეკის მოგზაურობას – ფოტოებს, ვიდეოებს, ამბებს, რომლებიც აქამდე დაგვიგროვდა და გეგმებს, რომლებითაც 2022 წელს ვეგებებით.

მაღალმთიანი სოფლებისთვის წიგნების შესაძენად ფინანსების მობილიზება შესაძლებელი გახდა ორგანიზაციებისა და კერძო პირების მონაწილეობით. “ორბელიანი მეტის” პლატფორმაზე ჩვენს ფანდრაიზერზე 8,967 ლარი შეგროვდა. დამატებით, თავად „ორბელიანი მეტისგან“ გრანტის სახით 4 000 ლარი მივიღეთ.

“მოგზაური ბიბლიოთეკის” მულტიფუნქციური მანქანა, რომელიც უკვე იყო ორ ექსპედიციაში, იაპონელი ხალხის საჩუქარია. იაპონიის საელჩომ საქართველოში მისი შეძენის, გამართვისა და ყველა საჭირო ტექნიკით აღჭურვისთვის 72 000 აშშ დოლარი გამოყო. სხვა ხარჯი თანადაფინანსებით დაიფარა და სულ 25 563.88 ლარი შეადგინა.

„სამოქალაქო საზოგადოების ინიციატივის” პროექტის ფარგლებში „აჭარის რეგიონულმა ჰაბმა“ 11 საჯარო სკოლის ბიბლიოთეკის გასაახლებლად 10 275.4 ლარი გამოყო. ეს თანამშრომლობა “თავისუფალ ჟურნალისტთა სახლის“ ჩართულობით გახდა შესაძლებელი.

ილიას სახელმწიფო უნივერსიტეტმა 65 სოფლისა და ბუქმობილში მოქმედი ბიბლიოთეკისთვის 47 357.64 ლარის ღირებულების წიგნები გადმოგვცა.

“წიგნის მაღაზია შაქრო ბაბუამ” მაღალმთიანი სოფლების ბიბლიოთეკებისთვის 1 802.05 ლარის ღირებულების წიგნები გამოყო.

“წიგნები ბათუმში”, “დიოგენე”, “პალიტრა L” , “გამომცემლობა ბაკურ სულაკაური”, “ქარჩხაძის გამომცემლობა”, “ზოლიანი კატა”, “მელანი” – ის გამომცემლობებია, რომლებმაც წიგნები ფასდაკლებით მოგვაწოდეს, ხოლო გარკვეული რაოდენობა საჩუქრად გადმოგვცეს ბუქმობილის ბიბლიოთეკისთვის.

წიგნები მივიღეთ კერძო პირებისა და სხვა ორგანიზაციებისგანაც.

მაღალმთიანი სოფლებისთვის წიგნების შესაძენად საჭირო თანხის შეგროვება მხარდამჭერთა წერილების სერიის ფონზე მიმდინარეობდა.

კამპანიის ფარგლებში წიგნებსა და მათ მნიშვნელობაზე 60 მოსაზრება დაიწერა.

წერილებს/მოსაზრებებს წერდნენ ქართველი და უცხოელი მასწავლებლები, მოსწავლეები, სტუდენტები, მენეჯერები, პროფესორები, იურისტები, მწერლები, აქტივისტები…

“მოგზაური ბიბლიოთეკის” მხარდამჭერთა წრე საკმაოდ დიდი და მრავალფეროვანია.

ვიდეოჩანაწერები გამოგვიგზავნეს სოფლად მცხოვრებმა მოსწავლეებმა და მასწავლებლებმაც.

ჩვენი ბიბლიოთეკა როდესაც არ მოგზაურობს, სტუმრებს მასპინძლობს.

მხარდამჭერებს შეუძლიათ გვესტუმრონ, ბუქმობილი დაათვალიერონ, გეგმებზე გვესაუბრონ და ნახატები, წერილები და კეთილი სურვილები გაგვატანონ მაღალმთიანი აჭარის სოფლებში.

ჩვენ უკვე ვუმასპინძლეთ არაერთ სტუმარს, მათ შორის ყველაზე მხიარული პირველკლასელების ვიზიტი აღმოჩნდა. პატარებმა თანატოლებისთვის წიგნები მოიტანეს და საყვარელი სათამაშოები დახატეს.

ამ სტუმრობის შესახებ უფრო მეტი გაიგეთ ვიდეოდან.

ზოგიერთ სასოფლო ბიბლიოთეკაში წიგნების მიღებას თან ახლდა მცირე ლოჯისტიკური სირთულეები. მაგალითად, რამდენიმე ბიბლიოთეკაში არ იყო შესაბამისი ინფრასტრუქტურა ახალი წიგნების განსათავსებლად ან ბიბლიოთეკა ელოდებოდა სოფლის ადმინისტრაციულ შენობაში გადასვლას, რომელსაც ჯერ კიდევ არემონტებდნენ ან არ იყო გახსნილი.

ამ და სხვა მიზეზების გამო ექსპედიციები დაგეგმილზე გვიან დავიწყეთ.

პირველი ვიზიტი 23 ნოემბერს ხულოს მუნიციპალიტეტის სოფელ დიდაჭარაში შედგა, 24 ნოემბერს კი სოფელ ღორჯომს ვესტუმრეთ.

2022 წლიდან მოგზაურობა მაღალმთიან სოფლებში უფრო აქტიურ ფაზაში შევა.

იანვრის მეორე ნახევარში უკვე დაგეგმილია ათი სოფლის მონახულება. ინფორმაცია ჩვენი მოგზაურობის შესახებ კვლავაც გამოქვეყნდება “მოგზაური ბიბლიოთეკის”, “ბათუმელებისა” და “ნეტგაზეთის” ფეისბუქგვერდებზე.

მომავალი წლიდან “მოგზაური ბიბლიოთეკა” შემოგთავაზებთ კონკურსს ბიბლიოთეკების, ბიბლიოთეკარებისა და მკითხველებისთვის. პირობა მარტივია, მკითხველებს შეეძლებათ დაწერონ წერილი/მოსაზრება მათთვის საინტერესო და მნიშვნელოვან საკითხზე და გამოგვიგზავნონ “მოგზაური ბიბლიოთეკის” ელექტრონულ ფოსტაზე. შერჩეული წერილები გამოქვეყნდება “ბათუმელების” ვებგვერდზე, საუკეთესოთა ავტორები კი დასაჩუქრდებიან. ასევე, დასაჩუქრდებიან ბიბლიოთეკები და ბიბლიოთეკარები, რომელთა მკითხველებისგანაც ყველაზე მეტი საინტერესო წერილი გამოქვეყნდება.

ამ აქტივობით შევეცდებით, ერთი მხრივ, ხელი შევუწყოთ კითხვის პოპულარიზებას, მეორე მხრივ კი, ბიბლიოთეკარებისთვის, რომლებსაც ძალიან მცირე რესურსები და დაბალი ანაზღაურება აქვთ, შევქმნათ ახალი შესაძლებლობები.

კონკურსის ეს ფორმატი აჭარის მაღალმთიან სოფლებში მცხოვრებ ახალგაზრდებს შესაძლებლობას მისცემს მათთვის მნიშვნელოვანი ამბები, “ბათუმელების” ვებგვერდის მეშვეობით, უფრო ფართო საზოგადოებას გააცნონ.

პროექტის დაწყებიდან დღემდე “მოგზაურ ბიბლიოთეკას” აქვს მოლაპარაკებები რამდენიმე ორგანიზაციასა და ბიზნესთან, რომლებმაც თანამშრომლობის სურვილი გამოთქვეს.

მალე დონაციის მსურველებს “თეგეტა მოტორსის” ონლაინპლატფორმაზე – “იზრუნე” – შეეძლებათ საკუთარი წვლილის შეტანა განათლებაზე წვდომის გაზრდაში.

გვჯერა, 2022 წელი კიდევ უფრო ნაყოფიერი და წარმატებული იქნება. კიდევ უფრო მეტ მხარდამჭერსა და პარტნიორთან ერთად შევძლებთ ხელშესახები და რეალური ცვლილებების დაწყებას განათლებისთვის, უკეთესი მომავლისთვის.

ძმებს – ანრი და კახა ბერიძეებს „ბათუმელების“ მკითხველმა 31 დეკემბრის მდგომარეობით 55 262 ლარი გადმოურიცხა. თანხის გადმორიცხვა ისევ გრძელდება.

ამ თემაზე: ძმები, რომლებსაც დედა კოვიდით დაეღუპათ, მამა – ავტოავარიით

ძმების დასახმარებლად 2200-ზე მეტმა ადამიანმა გადმორიცხა თანხა „ბათუმელების“ პარტნიორი ორგანიზაციის – „თავისუფალ ჟურნალისტთა სახლის“ ანგარიშზე. თანხას ძირითადად რიცხავდნენ კერძო პირები, იყო რამდენიმე გადმორიცხვა ორგანიზაციიდანაც.

არის ასობით შემთხვევა, როცა ადამიანებმა გადმორიცხეს 3 ლარი, 1 ლარი. გვყავს სოლიდური შემომწირველებიც – ვინც 2000, 1000, 600, 500, 100 ლარი გაიღო მოზარდების მხარდასაჭერად.

„ბათუმელები“ კონსულტაციებს გადის კვალიფიციურ ორგანიზაციებთან, თუ როგორ შეიძლება სწორად და მიზანმიმართულად მოხმარდეს აღნიშნული თანხა ანრის და კახას, რომლებიც არასრულწლოვნები არიან და თანხას თავად ვერ განკარგავენ.

ბავშვები ამბობენ, რომ მათი სურვილი ბინის შეძენაა.

რა გადაწყვეტილება იქნება მიღებული თანხის განკარგვასთან დაკავშირებით, ამის შესახებ „ბათუმელები“ ინფორმაციას მოკლე ხანში გამოაქვეყნებს.

ანრი და კახა კოვიდსასტუმროში იყვნენ, როცა დედის გარდაცვალების შესახებ შეიტყვეს. ბოლო რჩევა, რაც დედისგან მოისმინეს, იყო: „კარგად ისწავლეთ“.

ბიჭებს სწავლისთვის შესაფერისი პირობები არ ჰქონდათ, ქოხში, რომელიც „ოცნების ქალაქში“ აქვთ და სადაც დედასთან ერთად ცხოვრობდნენ, წყალი ჩამოდიოდა და იყო სიცივე. არც წიგნები ჰქონდათ და არც კომპიუტერი. კახას თქმით,ის  ბიძასთან ერთად მუშაობდა და კომპიუტერისთვის ფულს აგროვებდა, მაგრამ მაინც ვერ შეაგროვა.

აჭარის მთავრობის გადაწყვეტილებით, კახას და ანრის ბინა გადაეცემათ „ოცნების ქალაქში“. სახელმწიფო პროგრამის ფარგლებში აქ მცხოვრებთათვის კორპუსები უკვე შენდება. მშენებლობა სავარაუდოდ მომავალი წლის გაზაფხულისთვის დასრულდება და სწორედ ამის შემდეგ გადასცემენ ძმებს ბინას.

მანამდე ბიჭები ბიძასთან ცხოვრობენ სოფელ ახალშენში. სასამართლომ მათზე მეურვეობა კი დეიდას მიანიჭა.

გარდა შემოსული თანხისა, ჩვენთვის ცნობილია, რომ სტატიის მკითხველები თავისი ინიციატივითაც დაეხმარნენ კახას და ანრის, თანხით, საკვები პროდუქტითა და ტკბილეულით. ერთ-ერთი კერძო პირის გადაწყვეტილებით, ის მზად არის დააფინანსოს ბიჭების რეპეტიტორთან მეცადინეობის ხარჯები სამ საგანში – ქართულში, მათემატიკასა და ინგლისურში. ბიჭების ბიცოლას თქმით, პედაგოგების მოძებნას ახალი წლის შემდეგ აპირებენ.

ბიჭების ბიცოლას თქმით, სტატიის გამოქვეყნების შემდეგ მათთან მივიდნენ კერძო პირებიც, რომლებმაც თქვეს, რომ ბავშვების ახალ ბინაში [ბინის გადაცემის შემდეგ] ავეჯს შეიტანენ. თუმცა ამ კერძო პირების ჩართულობის შესახებ „ბათუმელები“ გადამოწმებულ ინფორმაციას არ ფლობს.

გარემოს ეროვნული სააგენტოს ცნობით, ახალი წლის ღამის საათებში დასავლეთ საქართველოს ცალკეულ რაიონში გაწვიმდება, მთაში მოთოვს, აღმოსავლეთ საქართველოში კი 1-ლი იანვრის შუადღემდე უნალექო ამინდი შენარჩუნდება.

პირველ იანვარს დღის მეორე ნახევრიდან დასავლეთ საქართველოს უმეტეს და აღმოსავლეთ საქართველოს ზოგიერთ რაიონში მოსალოდნელია ნალექი, დაბლობსა და ბარში წვიმის, მთაში და მაღალმთაში თოვლის სახით.

2-4 იანვარსაც დროგამოშვებით ნალექიანი ამინდი იქნება, შედარებით აცივდება, ზოგან იქროლებს დასავლეთის მიმართულების ქარი.

ბათუმში პირველ იანვარს, გამთენიისას, წვიმაა მოსალოდნელი. წვიმიანი ამინდი ბათუმში იანვრის პირველ დღეებში შენარჩუნდება.

თბილისში 2022 წლის 4 იანვრამდე შენარჩუნებული იქნება უნალექო ამინდი. ჰაერის ტემპერატურა ახალი წლის ღამის საათებში 0-2, ხოლო დღის საათებში +8, +10 გრადუსის ფარგლებში იქნება.

საქართველოს მესამე პრეზიდენტი, მიხეილ სააკაშვილი ფეისბუქის ოფიციალურ გვერდზე თავისი და სოფო ნიჟარაძის შვილის, ელის მარია სააკაშვილის ფოტოებს აქვეყნებს და ახალ წელს ულოცავს ქვეყანას.

„მოგესალმებით რუსთავის ციხიდან, ფიზიკურად დასუსტებული, მაგრამ მორალურად მხნე! სამშობლოს თავისუფლებისა და ჩვენი ხალხის ღირსეული მომავლისთვის ბრძოლა გრძელდება! თუმცა, დღეს მინდა მომავალი წლის მთელი სიმძიმე გვერდით გადავდო.

…  პირველი ახალი წელია, რომელსაც ციხეში ვხვდები, მაგრამ შევეცადე ოპტიმიზმი მაინც არ დამეკარგა და ამაშიც მეპოვნა სიკეთის მარცვალი.

დიახ, სამაგიეროდ, წელს პირველი წელია, როდესაც ტელევიზორის ეკრანიდან თავის დედიკოსთან ერთად სცენიდან მოგვესალმება “მთავარი არხის” საახალწლო კონცერტის ყველაზე პატარა მონაწილე, ელის მარია სააკაშვილი. ჩემი ყველაზე საყვარელი გოგო და ყველაზე უმცროსი შვილი. ბედნიერი ვარ, რომ ასეთი შესაძლებლობა მაქვს და ჩემი ახალი წელი სხვებისგან გამორჩეულია არა ციხის კედლებით, არამედ ჩემი საყვარელი გოგოს სატელევიზიო დებიუტით.

და კვლავ, გილოცავთ ახალ წელს და გისურვებთ ყოველივე საუკეთესოს. 2022 წელს აუცილებლად უნდა შევცვალოთ ყველაფერი ისე, რომ ჩვენი შვილები უფრო ლაღები და ბედნიერები გახდნენ.“

პირველ ოქტომბერს, მიხეილ სააკაშვილის დაკავების შემდეგ, უკრაინის რადას დეპუტატმა, ლიზა იასკომ გამოაქვეყნა ვიდეო, სადაც სააკაშვილი საუბრობს, რომ ლიზა იასკოსთან ახალი ოჯახი აქვს.

„მე და ლიზამ გადავწყვიტეთ, შევატყობინოთ ყველას, რომ ჩვენ ვართ ერთად. ჩვენ ვიწყებთ ერთად ცხოვრებას, ახალ ოჯახს. მოხდა ისე, რომ მე მქონდა ძალიან მაგარი ცხოვრებაც, წარსულიც, მაგრამ ისე გამოვიდა, რომ ამ წლების განმავლობაში ჩვენ შევხვდით ერთმანეთს“ – განაცხადა სააკაშვილმა.

სააკაშვილის ცოლმა, ყოფილმა პირველმა ლედიმ, სანდრა რულოვსმა განაცხადა, რომ იასკოსა და სააკაშვილის განცხადება მისთვის მოულოდნელი იყო.

„ბევრი დაბნეული მეგობარი და თანამებრძოლი მეკითხება პირადი ცხოვრების თაობაზე. არ დაგიმალავთ, რომ ვიდეოს შინაარსი ჩემთვის მოულოდნელი იყო, ფორმა კი – სრულიად მიუღებელი“ – განაცხადა მაშინ სანდრა რულოვსმა.

31 დეკემბრის მონაცემებით, საქართველოში დადასტურდა კოვიდის 2251 ახალი შემთხვევა. ჩატარდა 38 802 ტესტი კორონავირუსზე.

გასულ 24 საათში 42 პაციენტი გარდაიცვალა კოვიდით.

30 დეკემბრის მონაცემებით, დადებითობის დღიური მაჩვენებელია 5,41%, ბოლო 14 დღის – 5,5%, ბოლო 7 დღის – 5,28%.

უწყებათაშორისი საკოორდინაციო საბჭოს გადაწყვეტილებით, 31 დეკემბერს და 1-ელ იანვარს ღამის კლუბებს საახალწლო ღონისძიებების გამართვის ნებართვა მისცეს.

ღონისძიებებზე დაიშვება სტუმართა შეზღუდული რაოდენობა, გამკაცრებული რეგულაციებით.

• ღამის კლუბში დაიშვებიან სრულად ვაქცინირებული პირები
• პირები, რომელთაც გადაიტანეს კორონავირუსი
• აღნიშნულ კრიტერიუმებთან შეუსაბამობის შემთხვევაში, სავალდებულოა 48-საათიანი ვალიდურობის PCR-ტესტის უარყოფითი პასუხის წარდგენა

9 დეკემბერს სოფელ ჭარნალში კაცმა ცოლ და 20 წლის შვილი მოკლა, შემდეგ კი თავი მოიკლა. ოჯახის წევრებისა და ნათესავების თქმით, კაცს ფსიქიკური ჯანმრთელობის პრობლემები ჰქონდა, თუმცა ჯანდაცვის შესაბამის სერვისებს ვერ იღებდა.

ოჯახის წევრები საუბრობენ დილემაზე, რომელსაც სახელმწიფო ვერ წყვეტს, პრობლემებს ვერც პაციენტის ოჯახის წევრები უმკლავდებიან.

• იმ საავადმყოფოს ბრალია, რა წამალი მისცეს არავინ იცის

ალექსანდრე საგინაძე იმ კაცის ბიძაა, ვისი ცხოვრების ტრაგედიაც დიდი ალბათობით ფსიქიკური ჯანმრთელობის გაუმართავმა სისტემამ განაპირობა.

ალექსანდრე მიიჩნევს, რომ ჭარნალში დატრიალებულ ტრაგედიაზე პასუხისმგებელი სახელმწიფო და ის კლინიკაა, სადაც პაციენტი აღრიცხვაზე იმყოფებოდა, თუმცა მას სათანადო ყურადღებას არ აქცევდა.

„რატომ არ დააწვინეს და არ უმკურნალეს სათანადოდ? სწორედ აქედან იწყება პრობლემა. სახელმწიფოს და საავადმყოფოს პასუხისმგებლობას ვხედავ. ბევრი არ აღიარებს პრობლემას, ესირცხვება მკურნალობა და ექიმთან მისვლა, არ იღებს დანიშნულ მედიკამენტებს. შემდეგ კი აი ასეთი შედეგი დგება, რაც ამ ადამიანმა ჩაიდინა“, – ამბობს ალექსანდრე საგინაძე.

მისი თქმით, დისშვილს ფსიქიკური პრობლემაზე მასთან არ უსაუბრია.

„ვატყობდი, რომ ძალიან შეიცვალა. გულჩათხრობილი იყო, მიწაზე იყო თუ ცაში ვერ გაიგებდი. ჩემთანაც შემოივლიდა ხოლმე, ას სიტყვაში ერთ სიტყვას გეტყოდა. ვამჩნევდი, რომ ყველაფერი კარგად ვერ ჰქონდა“, – ამბობს ალექსანდრე საგინაძე.

მისი თქმით, ფსიქიკური ჯანმრთელობის პრობლემები ძალიან მნიშვნელოვანი ამ ქვეყანაში, თუმცა სახელმწიფო სათანადო ყურადღებას არ აქცევს არც პაციენტებს და არც სერვისის გაუმჯობესებაზე ზრუნავს.

„ჩვენ ხელოვნურად ვკლავთ ხალხს, ვერ ვუყურებთ, არ ვუყურებთ. არ ვეხმარებით მათ. აგერ, გავიდა რამდენიმე დღე და კაცმა ორსული ცოლი მოკლა. ეს დაავადება ძალიან გავრცელებულია, ამას სახელმწიფომ ყურადღება არ უნდა მიაქციოს? ხვალ აქ მოხდა, ზეგ იქ და ვხოცოთ მაშინ ადამიანები.

აბა რისთვის არის ექიმი. ფსიქიკური ჯანმრთელობის მქონე ადამიანებზე სახელმწიფო არ ზრუნავს“, – გვეუბნება ის.

ჭარნალის ტრაგედიის ამბავზე „ბათუმელები“ სხვა ადამიანებსაც ესაუბრა. ოჯახის ახლობლები და მეზობლები ამბობენ, რომ დაღუპული კაცი „რაღაც წამლებს სვამდა“, თუმცა იყო თუ არა მისი ფსიქიკური მდგომარეობა მძიმე, არ იციან. „სხვის ოჯახში რა ხდება, ჩვენ არ ვიცით“, – გვეუბნებიან ისინი.

მამის მიერ მოკლული ახალგაზრდა კაცის ერთ-ერთი მეგობარი ამბობს, რომ ლევანი მშრომელი ადამიანი იყო, ოჯახშიც ხშირად სტუმრობდა, თუმცა მამის ფსიქიკური ჯანმრთელობის პრობლემაზე მას არასდროს უსაუბრია.

„შვილი იყო შრომისმოყვარე ბიჭი, მშენებლობაზე ერთად მუშაობდნენ, სახლსაც აწყობდნენ, შეყვარებული ჰყავდა და ცოლის მოყვანას აპირებდა. სხვას ვერაფერს გეტყვით, არ ვიცი შიგნით ოჯახში რა ხდებოდა“, – ამბობს ის.

გარდაცვლილი კაცის სიძეც ადასტურებს, რომ მას ნამდვილად ჰქონდა ფსიქიკური პრობლემები და სამი წელი კლინიკაშიც კი დადიოდა.

„ბოლო დროს თითქოს უკეთესად იყო, კაი სიტყვა ჰქონდა და კაი პასუხი. ვიცი, რომ დაჰყავდათ კლინიკაში, გამოუწერდნენ წამლებს და მოდიოდა“, – გვეუბნება ის.

ჩვენ ვესაუბრეთ გარდაცვლილი კაცის ქალიშვილსაც, რომელიც იმ ტრაგიკულ დღეს სახლში იმყოფებოდა და ბებიასთან ერთად სახლიდან გამოსვლა მოასწრო. საგინაძის შვილი ამბობს, რომ მამა წამლებს (დამამშვიდებლებს) იღებდა, თუმცა ბოლო პერიოდში აღარ მკურნალობდა.

• ძალიან მინდა ვინმე დამეხმაროს, რომ ჩემი შვილი ისევ ისეთი გახდეს, როგორც 18 წლამდე იყო

ვინ არის პასუხისმგებელი, თუ პაციენტი საკუთარ ჯანმრთელობას ზიანს მიაყენებს ან სხვა ადამიანებისთვის იქცევა საფრთხედ? – ეს კითხვები სახელმწიფოსთან აქვს 22 წლის გოგოს დედას, რომლის შვილსაც ასევე ფსიქიკური ჯანმრთელობის პრობლემები აქვს. ქალის თქმით, ის შვილთან დაკავშირებით გამოსავალს ვერ ხედავს და პრობლემის მოგვარებაში არც სახელმწიფო ეხმარება.

„საუკეთესო შვილი იყო, მაგრამ 18 წლის იყო, როცა ფსიქიკური პრობლემები დაეწყო. 4 წელია ასე გრძელდება. თუ გაბრაზდა, ცდილობს გიკბინოს ან რაიმე ზიანი მოგაყენოს. თუ ეს ვერ გააკეთა, ნერვებისგან გონებას კარგავს, თუ არ გაითიშა, მაშინ თავის თავს აყენებს ზიანს და შემდეგ სასწრაფო დახმარება გვჭირდება“, – ამბობს დედა.

სტატისტიკის ეროვნული სააგენტოს მონაცემებით, 2020 წლისთვის საქართველოს მოსახლეობის 14.9 პროცენტს, ფსიქიკური და ქცევითი აშლილობები დაუდგინდა პირველადი დიაგნოზით.

ყველაზე მაღალი მაჩვენებელი ფსიქიკური ჯანმრთელობის გაუარესების 2019 წელს დაფიქსირდა – 19.9 პროცენტი, უმნიშვნელოდ არის შემცირებული გასულ წელს, წინა წლებში კი ეს მაჩვენებელი 5.8-სა და 7.5 -ს შორის მერყეობდა.

ჯანმრთელობის მსოფლიო ორგანიზაციის მონაცემებით კი, მსოფლიოში 450 მილიონ ადამიანს ფსიქიკური ჯანმრთელობის ესა თუ ის პრობლემა აღენიშნება.

მისი თქმით, შვილი მკურნალობაზე უარს ამბობს, მათ კი არაფრის გაკეთება არ შეუძლიათ.

„ერთხელ იძულებით დავაპირეთ კლინიკაში მიყვანა და პოლიცია გამოიძახა, შემაკავებელი ორდერი გამოაწერინა, ძალადობენო. ერთ დღეს, როცა სახლში არ ვიყავი, რაღაც მედიკამენტები მიიღო თვითნებურად და ისევ სასწრაფო გამოვიძახე.

მაშინ გადაიყვანეს საავადმყოფოში, სადაც ორი კვირა გაჩერდა, შემდეგ კი ძალიან ტიროდა, წამიყვანეთ სახლში და ვიმკურნალებო და წამოვიყვანე.

ხელწერილი დამაწერინეს, მე ავიღებ პასუხისმგებლობას-მეთქი, მაგრამ ახლა ვატყობ, რომ დანიშნული მედიკამენტები უკვე აღარ მოქმედებს, ექიმს ველაპარაკე და მითხრა, რომ დოზები შესაცვლელია, მაგრამ ექიმთან მისვლაზე უარს ამბობს. ექიმი მეუბნება, თავისი ნებით თუ არ მოვიდა, ისე აზრი აქვს მკურნალობასო.

ვატყობ, რომ სჭირდება მკურნალობა, ვეღარ იძინებს, სულ შფოთავს, მთელი ღამეები ან ტელეფონშია, ან დადის. წინააღმდეგობას ვერ იტანს, მაშინვე აგრესიული ხდება. სახლში ყველა ვცდილობთ ანგარიში გავუწიოთ, მაგრამ ყოველთვის შეიძლება არ მოუთმინონ. ორ წყალს შუა ვარ, აქეთ ეს, იქეთ სხვა შვილები. ვთქვათ არ ვარ სახლში, იჩხუბეს და დალია ისევ წამლები, რამე რომ დაემართოს ვინ იქნება პასუხისმგებელი?“- გვეუბნება დედა.

ინგა ამბობს, რომ სახელმწიფომ ამ ნაწილში კანონმდებლობა უნდა დახვეწოს.

„მე დედა ვარ, მაგრამ არ მაქვს უფლება რაიმე შევცვალო.ძალადობის მომხრე არც მე ვარ რა თქმა უნდა, მაგრამ რა ვქნა, ჩემი შვილია და ძალიან განვიცდი, როგორ დავეხმარო? აღარ ვიცი, როგორ მოვიქცე, გამოსავალს ვერ ვხედავ, როცა შვილი მკურნალობაზე უარს მეუბნება. ერთადერთი, ისევ სახელმწიფომ უნდა იფიქროს ამ პრობლემაზე.

ძალიან მინდა ვინმე დამეხმაროს, რომ ჩემი შვილი ისევ ისეთი გახდეს, როგორც 18 წლამდე იყო. ყველაზე კარგი შვილი იყო, ძალიან განვიცდი მის მდგომარეობას“, – ამბობს დედა.

• „მე თავად ვიყავი პაციენტი“ – ოლგა კალინა სისტემის გაუმართაობაზე

ოლგა კალინას თავად აქვს ფსიქიატრიულ საავადმყოფოში მკურნალობის გამოცდილება და ახლა ის აქტიურად არის ჩართული ადამიანის უფლებების საკითხებზე მუშაობის პროცესში.

ოლგა კალინა გვესაუბრება სისტემის გაუმართაობაზე, იმაზე, თუ რა განაპირობებს პაციენტების უნდობლობას, როგორც სისტემის, ასევე ოჯახის წევრების მიმართ.

„მე თავად ვიყავი პაციენტი, მეორე ჯგუფის შშმ პირის სტატუსი მაქვს და თავად გავიარე სტაციონარიც, ამბულატორიული მკურნალობაც.

ჩვენს კანონში არანებაყოფლობითი მკურნალობის ზომები არის ჩადებული, თუმცა ხელს არ უწყობს არც პაციენტის და არც ოჯახის წევრების ინფორმირებულობას და გაძლიერებას.

ძალით წამლების დალევის თვალსაზრისით რეგულაციის პრობლემა არ არის კანონში. თუ პაციენტი საფრთხეს უქმნის თავის თავს, შეუძლია მშობელს დარეკოს სასწრაფოში, პოლიციაში, გადაიყვანენ პაციენტს და მიაღებინებენ წამალს.

პაციენტსაც აქვს უფლება გამოიძახოს პოლიცია თუ ფიქრობს, რომ მისი უფლება ირღვევა და მშობელსაც შეუძლია მიმართოს ექიმს“, – გვეუბნება ოლგა.

მისი თქმით, პაციენტის აგრესია ყოველთვის არ არის დაკავშირებული მის ფსიქიკურ მდგომარეობასთან. უფრო ხშირად ეს არის პირადი ურთიერთობის პრობლემა და ამ ფონზეა ძალადობის გამოვლინებები.

„სტატისტიკურად, 5 პროცენტია დაახლოებით აგრესიული, ვისაც ფსიქიკური ჯანმრთელობის პრობლემა აქვს.

მაგალითად, ალკოჰოლზე ან ნარკოტიკებზე დამოკიდებული ადამიანი თუ იძალადებს ოჯახში, იძულებითი მკურნალობის მექანიზმი არ არსებობს, მაგრამ ფსიქიკური პრობლემების მქონე ადამიანების შემთხვევაში, მკურნალობა არანებაყოფლობითია.

თუ ასეთი ადამიანი დაიწყებს მუქარას, ან დააზიანებს ქონებას, შეუძლია გამოიძახონ პატრული და მოათავსებენ ფსიქიატრიულში. ამ შემთხვევაში უფრო მეტად ძალადობენ ჩვენზე, ვიდრე სხვა ჯგუფებზე და ეს გაუმართლებელია, რადგან წესით, ალკოჰოლისა და ნარკოტიკის მომხმარებლები სტატისტიკურად უფრო აგრესიულები არიან. ჩვენ უფრო ხშირად ვხდებით ძალადობის მსხვერპლი. მათ შორის ნათესავების მხრიდან, რომლებიც იყენებენ ჩვენს ქონებას, პენსიას, გვაგზავნიან სტაციონარებში და შემდეგ უკან არ გვაბრუნებენ“, – ამბობს ოლგა.

მისი თქმით, როცა ადამიანი ფსიქიკურად მოწყვლადია, ხშირად ხდება ის როგორც ფიზიკური, ასევე სექსუალური ძალადობის მსხვერპლი, რადგან არავინ უჯერებს მათ.

ოლგას აზრით, დიდი მნიშვნელობა აქვს ინდივიდუალურ მიდგომას, რადგან კონტაქტი უჭირს ორივე მხარეს. ამ ურთიერთობის აღდგენის თვალსაზრისით კი სერვისები არ არსებობს.

„უშუალოდ ოჯახთან კონტაქტზე და ურთიერთობებზეა აქ საუბარი, რადგან ორივე მხარეს აქვს პრეტენზიები და ამ ფონზე იზრდება უნდობლობა.

ხშირად ოჯახს აქვს მოლოდინი, რომ პაციენტი დალევს წამალს და ყველა პრობლემა მოგვარდება. ეს ასე არ მოხდება. პრეტენზიები – რატომ მომათავსე ვთქვათ სტაციონარში, რატომ მომატყუე, რატომ იძალადე ჩემზე, რატომ მომეცი ეს წამალი ჩუმად – ფსიქიკური პრობლემებიდან არ გამომდინარეობს. ეს არის პიროვნების ობიექტური პრეტენზიები, რომელზე მუშაობაც საჭიროა. მათ შორის კრიზისულ გეგმებზე – რა ვქნათ ვთქვათ, თუ ცუდად გახდები, რა უნდა გავაკეთოთ, აი ამ თემების მოფიქრებაა მნიშვნელოვანი, რაც დღეს არ ხდება.

მაგალითად, როდესაც ადამიანი არის ცუდად, ნათესავებს აქვთ მოლოდინი, რომ თუ ჩააბარებენ ექიმს, ადამიანს ეს პრეტენზიები აღარ ექნება. შესაძლოა ადამიანი არასწორ აქცენტებს აკეთებს, არასწორი ინტერპრეტაციით აქვს რაღაც დამახსოვრებული და თუ ამაზე არ მუშაობ, მერე იწყება უარესი პრობლემები. როცა ორივე მხარეს აქვს შიში, ეს კონფლიქტს კიდევ უფრო აფართოებს“, – ამბობს ოლგა კალინა.

ნდობა და მდგომარეობიდან გამოსვლის გზების ერთად მოფიქრება – ეს არის გზა კრიზისის დასაძლევად. ოლგას თქმით, უნდა გაეცეს პასუხები კითხვებს, თუ საიდან დაიწყო ამ ადამიანის ფსიქიკური პრობლემები, რა აწუხებს ადამიანს, რა არის უშუალოდ პრობლემის შინაარსი.

„ოჯახის წევრებს ხშირად არ ჰყოფნით კომპეტენცია ამ ურთიერთობის დასალაგებლად. ამიტომ არის საჭირო მედიატორი, რადგან ხშირად იმდენად დიდია კონფლიქტი და უნდობლობა, რომ მედიატორის გარეშე შეუძლებელია ამ ურთიერთობის ხელახლა აგება. მედიატორი კი, რა თქმა უნდა, სახელმწიფომ უნდა შესთავაზოს ორივე მხარეს“, – ამბობს ოლგა.

მეორე ვარიანტია ოჯახის კონსულტანტი, რომელიც არა მხოლოდ ერთ კონკრეტულ ადამიანზე იმუშავებს, არამედ იმ სოციალურ წრეებთან, რომელიც იმსჯელებს რა შეიძლება გაკეთდეს პრობლემის აღმოსაფხვრელად.

„როცა პაციენტი კარგად არის ინფორმირებული, მას აღარ აქვს შიშები ჩარევების მიმართ და უფრო მეტად აკონტროლებს საკუთარ თავს. იცის, რომ რაღაც მომენტში შეიძლება ჰქონდეს პრობლემა, მაგრამ ჰყავს მხარდამჭერები, რომლებიც არ გამოიყენებენ ძალადობრივ მეთოდებს.

ამ შემთხვევაშიც (ჭარნალის ამბავი), როგორც სხვა დანარჩენ შემთხვევაში, სანამ ადამიანი არ ძალადობს სხვებზე, სანამ ჯერ კიდევ არ არის აგრესიული, საჭიროა დროული განათლება სერვისებში და დროული მხარდაჭერა პროფესიონალების იქნება ეს ფსიქოლოგი, ფსიქიატრი თუ სხვა“, – ამბობს ოლგა კალინა.

რაც შეეხება სისტემის მიმართ უნდობლობას, ოლგა ამბობს, რომ ამის უფლება პაციენტს აქვს, რადგან თავის დროზე თავადაც უარი თქვა მედიკამენტების მიღებაზე და წამოვიდა კლინიკიდან.

„თუ დავრჩებოდი ექიმების ნებაზე, დღემდე ვიქნებოდი დამოკიდებული მედიკამენტებზე და დანგრეული მექნებოდა ჯანმრთელობა. წამლების კურსის შეწყვეტა იყო ჩემი გადაწყვეტილება. ამ მედიკამენტების მიღება არ არის მსუბუქი, მას აქვს სერიოზული გვერდითი ეფექტები და წლების მანძილზე მათი მიღება, იწვევს სომატური პრობლემების გაუარესებას.

ღვიძლი, კუჭი, რეპროდუქციული ჯანმრთელობა, კონცენტრაცია, მეხსიერება, ეს ყველაფერი უარესდება. შეიძლება განვითარდეს დიაბეტი, წონის მატება, პოტენციის დაქვეითება, ემოციების გაქრობა. როდესაც არ გრძნობს ადამიანი არც სიყვარულს, არც სიხარულს, უბრალოდ დადის ქუჩებში. მაშინ, რაში სჭირდება ეს სტაბილური მდგომარეობა?

როდესაც ადამიანი  ამ გვერდით ეფექტებს გრძნობს, რა თქმა უნდა, ამცირებს მედიკამენტების მიღებას ან თავს ანებებს. ოჯახებშიც არ არის სათანადოდ გააზრებული, რა არის უშუალოდ სიმპტომი და რა წამლების ეფექტი.

თუ რიტორიკა მუდმივად იქნება ასეთი, რომ „შენ ავადმყოფი ხარ და უნდა დალიო წამალი“, მაგრამ რა ფასად გიჯდება ეს, არავინ ფიქრობს, ადამიანი საკუთარ პრობლემებთან მარტო რჩება. რა თქმა უნდა, ასეთ დროს ადამიანები გადადიან პროტესტის რეჟიმში“, – ამბობს ოლგა.

რა არის ამოცანა? – ადამიანმა თავად უნდა გაიაზროს, რომ აქვს გარკვეული პრობლემა და სწორედ ეს ამოცანა გულისხმობს ხარისხს. „როცა ადამიანზე კი არ ძალადობენ, არამედ ადამიანი გადაჰყავთ აქტიურ პოზიციაზე და თავად იაზრებს პრობლემას“, – ამბობს ოლგა. ეს ყველაფერი კი მოითხოვს ფულს, რომელიც ოლგას თქმით, ბიუჯეტში საკმარისად არ არის.

„წლების მანძილზე ფსიქიატრია იყო ძალიან დანგრეული, ადამიანები შეურაცხმყოფელ პირობებში იყვნენ საავადმყოფოებში, ახლა ვითომ პირობები იცვლება, მაგრამ შინაარსობრივად სისტემა მაინც იგივე რჩება – ფარმაკოლოგიური მკურნალობა, ძალადობა და ასე შემდეგ. ყურადღება არ არის საკმარისი. რა თქმა უნდა, პროფესიონალების სიმწირეა სფეროში.

განსაკუთრებით ფსიქოლოგების, სოცმუშაკების, ისეთი რგოლის, ვინც პასუხისმგებელია ფსიქო-სოციალურ კომპონენტებზე.

ფსიქიატრები და ფარმაკოლოგი – ეგ არის მინიმუმი, რაც სისტემაშია და ზოგჯერ ესეც არ არის. წამლები ავიღოთ თუნდაც, შეიძლება ესეც იყოს პრობლემა. სომატურ ჯანმრთელობას თუ შევადარებთ, ფსიქიკური ჯანმრთელობის დაფინანსება არის ძალიან დაბალი. სანამ კრიზისში არ ჩავარდები, სისტემა არ გხედავს. და ეს არის პრობლემა. პრევენცია ფაქტობრივად არ ხდება მსგავსი მდგომარეობის. საბოლოო ჯამში უფრო ძვირი ჯდება ამ ყველაფრის მოგვარება“, – ამბობს ოლგა.

მთავრობა მუშაობდა ფსიქიკური ჯანმრთელობის სამოქმედო გეგმაზე. როგორც ოლგა გვეუბნება, სტრატეგიის დოკუმენტზე მუშაობის დროს თავადაც იყო ჩართული. მისი თქმით, ბავშვთა ფსიქიატრიული მკურნალობის მიმართულებით სერვისები გარკვეულწილად უმჯობესდება, მაგალითად შემოდის ბავშვთა ფსიქიატრი, ექთანი, მეტნაკლებად დაფარულია დეინსტიტუციონალიზმის თემაც, თუმცა როგორც ოლგა გვეუბნება, სისტემის სუსტ მხარედ რჩება პაციენტისა და ოჯახის წევრების ინფორმირების, ნდობის და ურთიერთობების მოგვარების საკითხები.

„კომუნიკაციის პრობლემას ვერც ეს სამოქმედო გეგმა მოაგვარებს, რადგან ეს არის ის ეტაპი, რომელიც რესურსებს მოითხოვს და საკმაოდ დიდია ამ რესურსების ჩამონათვალი“, – ამბობს ოლგა.

მისი თქმით, თუ დაინერგება მონიტორინგის სისტემა და პაციენტებს და მათი ოჯახის წევრებს საშუალება ექნებათ საჩივრების დაწერის და შემდეგ ამაზე იქნება რეაგირება, შესაძლოა ამ ყველაფერმა უკეთ გამოაჩინოს პრობლემები და მათი მოგვარების გზაც.

საკონსტიტუციო სასამართლომ არაკონსტიტუციურად მიიჩნია სამოქალაქო კოდექსის ის ჩანაწერი, რომელიც მარტოხელა მშობლის სტატუსს განსაზღვრავს. 2022 წლის ივლისიდან უკვე მთავარი მშობლის ფაქტობრივი მდგომარეობა იქნება და არა ის, რეგისტრირებული ქორწინების შემდეგ გაჩნდა თუ არა ბავშვი.

სასამართლომ უნდა შეაფასოს, ოფიციალური ქორწინების და ბავშვისთვის ორივე მშობლის არსებობის მიუხედავად, არის თუ არა ერთ-ერთი მშობელი მარტოხელა.

ამ დრომდე მოქმედი კანონმდებლობით კი, „მარტოხელა მშობელი არის მარტოხელა დედა/მამა, რომელსაც ჰყავს რეგისტრირებული ქორწინების გარეშე დაბადებული 18 წლამდე ასაკის შვილი და ბავშვის დაბადების სააქტო ჩანაწერში არ არის შეტანილი ბავშვის მამის/დედის მონაცემები.“

სარჩელის ავტორი სამი ფაქტობრივად მარტოხელა მშობელი იყო, ხოლო მოპასუხე – პარლამენტი, რომელმაც საქმის განხილვის დროს დაადასტურა, რომ კანონის ეს ჩანაწერი მართლაც პრობლემურია.

მაგალითად, მოსარჩელე ირმა გ. ფაქტობრივად მარტოხელა დედაა, ვისი ყოფილი ქმარიც სასამართლოს მიერ დაკისრებულ ალიმენტსაც კი არ იხდის.

„კანონიერ ძალაში შესული გადაწყვეტილება დღემდე აღუსრულებელია და აღსრულების ეროვნული ბიურო ვერაფერს აკეთებს, რადგან ვერ ხერხდება ალიმენტდაკისრებული პირის ფინანსების, ქონების მოძიება,“ – აღნიშნულია საკონსტიტუციო სარჩელში. ირმას მარტოხელა დედის სტატუსი არ აქვს, რადგან იგი განქორწინებულია.

მეორე მოსარჩელე ელგა მ-ა. ისიც ფაქტობრივად მარტოხელა დედაა. ელგამ რეგისტრირებული ქორწინების გარეშე გააჩინა შვილი და ბავშვის სააქტო ჩანაწერში არ ფიქსირდება მეორე მშობლის მონაცემები.

„ელგა და მისი შვილი მუდმივად იყვნენ ფსიქოლოგიური ზეწოლის მსხვერპლი ყოფილი პარტნიორის მხრიდან, რომელიც მათი თანასოფლელია. იგი მუდმივად ავრცელებდა სოფელში ცრუ ინფორმაციას და ლახავდა ელგას პატივსა და ღირსებას, თითქოს ბავშვის მამა სხვა ადამიანი იყო. მსგავსი ინფორმაციები ბავშვზეც უარყოფითად აისახებოდა.

ელგამ გადაწყვიტა მიემართა სასამართლოსთვის და ბიოლოგიური ანალიზის მეშვეობით დაედგინა მამობა. მას შემდეგ, რაც მამა ოფიციალურად დადგინდა და ბავშვის სააქტო ჩანაწერში მეორე მშობლის მონაცემები ჩაიწერა, ელგამ შეძლო ყოფილი პარტნიორისთვის დაემტკიცებინა სიმართლე, თუმცა ახლა მოკლებულია შესაძლებლობას მიიღოს სტატუსი.

სასამართლოსთვის მიმართვამდე და ახლაც არაფერი შეცვლილა ელგას და მისი შვილის ცხოვრებაში, გარდა სააქტო ჩანაწერში მამის მონაცემების დაფიქსირებისა,“ – აღნიშნულია სარჩელში.

არც ელგას მიანიჭეს მარტოხელა დედის სტატუსი, რადგან ბავშვის დაბადების მოწმობაში ფიქსირდება მეორე მშობლის მონაცემები.

სარჩელის ავტორი იყო მარტოხელა მამაც  – ლერი თ. მას ორი შვილი ჰყავს და გორში ცხოვრობს. ამ შემთხვევაში ბავშვების დედას სასამართლოს მიერ აქვს შეზღუდული მშობლის უფლება.

„მიუხედავად იმისა, რომ ლერი თ. ნამდვილად საჭიროებს სახელმწიფოს მხრიდან სოციალური თუ სამართლებრივი გარანტიების შექმნას და მუნიციპალიტეტს აქვს სპეციალური პროგრამა მარტოხელა მშობლებისთვის, სამოქალაქო კოდექსი ბოჭავს მარტოხელა მამებს მიიღონ სტატუსი და ისარგებლონ მასთან დაკავშირებული სოციალური თუ სამართლებრივი გარანტიებით, რადგან კრიტერიუმები არ არის ობიექტური და სწორად მორგებული მარტოხელა მამებზეც,“ – აღნიშნულია სარჩელში.

„ფაქტობრივად მარტოხელა მშობლებს, რომელიც ვერ აკმაყოფილებენ სადავო ნორმებით დადგენილ ფორმალურ კრიტერიუმებს, მარტოხელა მშობლის სტატუსის მქონე პირების არსებითად მსგავსი საჭიროებები გააჩნიათ. შესაბამისად, ფაქტობრივად მარტოხელა მშობელთა შესაბამისი სტატუსის მიღების შესაძლებლობიდან სრულად გამორიცხვით, სადავო რეგულირება ადგენს უთანასწორო მოპყრობას არსებითად თანასწორ პირთა მიმართ. ამასთან, დიფერენცირებას არ გააჩნია ლეგიტიმური მიზანი,“ – მიიჩნევდნენ საკონსტიტუციო სარჩელის ავტორები.

საქართველოს პარლამენტის პოზიცია იყო ეს:

„სადავო ნორმის პრაქტიკაში გამოყენებამ ცხადი გახადა, რომ მას გარკვეული პრობლემური შინაარსი გააჩნია და ვერ უზრუნველყოფს აღნიშნული სტატუსის მიღების შესაძლებლობას ყველა იმ პირის მიერ, რომლებიც რეალურად ამ სამართლებრივი ურთიერთობის მიზნებისთვის მარტოხელა მშობლებად უნდა ითვლებოდნენ,“ – აღნიშნულია საკონსტიტუციო სასამართლოს მიერ გავრცელებულ ინფორმაციაში.

https://netgazeti.ge/news/226588/

ხულოს სოფლები განსაკუთრებით ლამაზია ზამთარში, თოვლიან ღამეს.

დათოვლილი ნაძვები, ხის სახლები, შეშის ღუმელი, ყვითელი შუქი ფანჯრებში, გატკეპნილი თოვლიანი ბილიკები და ზამთრის სასიამოვნო სუსხი.

ფოტოები სოფელ დიდაჭარაში გადაიღო ავთო შერვაშიძემ. 

საქართველოში სამთო-სათხილამურო კურორტები გაიხსნა. თოვლის მოყვარულებს საახალწლო არდადეგების ზამთრის კურორტებზე გატარება უკვე  შეუძლიათ. 

„25 დეკემბერს გაიხსნა გუდაურისა და გოდერძის სათხილამურო კურორტები. ყველა საბაგირო ჩართულია და მუშაობს ყოველდღიურ რეჟიმში.

მესტიის კურორტი, არასტაბილური დენის გამო, 28 დეკემბერს გაიხსნა, ჰაწვალისა და თეთნულდის არეალები ახლა სრული დატვირთვით ფუნქციონირებს,“ – გვითხრეს მთის კურორტების მართვის კომპანიის პრესსამსახურში. 

აქვე გვითხრეს, რომ ჯერ არ გახსნილა კურორტი ბაკურიანში, რადგან საკმარისი თოვლი არ არის.

„ბაკურიანში ხელოვნური გათოვლიანების სისტემა სრულყოფილად ფუნქციონირებს, მაგრამ ხელოვნურ თოვლს შესაბამისი ტემპერატურა და ყინვა სჭირდება. 

პრაქტიკულად ყოველ ღამეა ჩართული ბაკურიანში გათოვლიანების სისტემა, სამწუხაროდ, დღის განმავლობაში პლუს ტემპერატურა და მზე არ იძლევა თოვლის შენარჩუნების საშუალებას, ღამით დაგროვილი თოვლი დღის განმავლობაში დნება”,  – გვითხრეს მთის კურორტების განვითარების კომპანიაში. 

ამინდის პროგნოზის თანახმად, ბაკურიანში თოვლს პირველი იანვრის ღამეს ელიან. meteo.gov.ge-ს ცნობით, ინტენსიური თოვა აქ მოსალოდნელია 3 იანვარს. 

რაც შეეხება ფასებს, ბაკურიანში, რომელიც საქართველოს ყველაზე განვითარებული ზამთრის კურორტია, არჩევანი დიდია. 

მაგალითად, ბაკურიანში, booking.com-ზე 4 ვარსკვლავით შეფასებულ სასტუმროებში, ორადგილიან ნომერში, ერთი დღე-ღამის ყველაზე მაღალი ფასი ორ სტუმარზე 670 ლარია. 

300-400 ლარი ღირს სამვარსკვლავიან სასტუმროში ორადგილიანი ნომერი ერთი დღე-ღამით. თუმცა არის უფრო იაფი სასტუმროებიც, სადაც ორ ადამიანს ერთი დღე-ღამის გატარება 250-140 ლარი დაუჯდება. 

ბევრად უფრო იაფია საოჯახო სასტუმროები ბაკურიანში. აქ ოთახის ერთი ღამით ქირაობის ფასი, ერთი ადამიანისთვის, კვების გარეშე, 20 ლარიდან  იწყება, ხოლო ოთახის  ქირაობა კვებასთან ერთად დღეში დაახლოებით 50-55 ლარი ღირს. 

ერთ-ერთი კოტეჯის მეპატრონე ბაკურიანიდან „ბათუმელებთან “ამბობს, რომ ახალი წლის დღეებში კოტეჯებს შედარებით ძვირად აქირავებენ. ფასები იკლებს იანვრის ბოლოს და თებერვლის თვეში. კოტეჯების ფასი საშუალოდ 200-900 ლარია, კოტეჯის ზომისა და დამსვენებელთა რაოდენობის მიხედვით.  

თოვლს ელიან პირველი იანვრიდან მესტიაშიც. არჩევანი აქაც არის – სასტუმროები, საოჯახო სასტუმროები და კოტეჯები.  

ერთი დღე-ღამის ფასი ორი ადამიანებისთვის მესტიის სასტუმროებში საშუალოდ 120-200 ლარია. 

ერთი დღე-ღამით 15-20 ადამიანზე გათვლილი კოტეჯების ფასი კი მესტიაში 250 ლარიდან 1000 ლარამდე მერყეობს.

რაც შეეხება საოჯახო სასტუმროებს, ერთი სტუმრისთვის ღამისთევის ფასი მესტიაში 25 ლარიდან იწყება კვების გარეშე.

გუდაურში, საქართველოს ერთ-ერთ პოპულარულ სამთო კურორტზე, booking.com-ის მონაცემების თანახმად, სასტუმროების ნაწილი ახალი წლის შემდგომ დღეებში უკვე დაჯავშნილია. სასტუმროების საშუალო ფასი ორი ადამიანისთვის დღე-ღამეში 100-დან 800-მდე ლარია, სასტუმროს ვარსკვლავებისა და სერვისების შესაბამისად. 

აქ კოტეჯების ფასი 200-დან 1000-მდე ლარია. რაც შეეხება საოჯახო სასტუმროების ფასს, მსგავსად სხვა კურორტებისა, აქ ერთ ადამიანზე საოჯახო სასტუმროს ფასები 20-25 ლარიდან იწყება და 60-მდე ლარს აღწევს. 

უკვე უხვი თოვლია აჭარაში, კურორტ გოდერძიზე. აქ სტანდარტული ორადგილიანი ნომრის ფასი სასტუმროში დღე-ღამეში 230 ლარიდან იწყება და 280 ლარამდე მერყეობს. 

კურორტ გოდერძიზე დასვენების მსურველებს ბევრად უფრო იაფად შეუძლიათ ღამე კურორტიდან სამ კილომეტრში მდებარე სოფლის საოჯახო სასტუმროში გაატარონ, სოფელ დანისპარაულში. 

„დანისპარაულის საოჯახო სასტუმროებში დარჩენა საშუალოდ 25  ლარიდან იწყება და 60 ლარამდეა. 

საოჯახო სასტუმროებში ერთი ღამით დარჩენა 30 ლარი  ღირს კვების გარეშე, ხოლო ორჯერადი კვებით – 50 ლარი. 

ტურისტთა რაოდენობამ იკლო, წელს ძალიან ცუდი გზებია, გზის სარემონტო სამუშაოების გამო. ახლა არ მყავს დამსვენებლები. რეკავენ, მაგრამ არ ჯავშნიან“, – გვითხრა ვახტანგ გელაძემ, დანისპარაულში საოჯახო სასტუმრო „ნიკის“ მეპატრონემ. 

ბათუმიდან კურორტ გოდერძიმდე 109 კილომეტრი უნდა გაიარო. კურორტი ზღვის დონიდან 2000 მეტრზე მდებარეობს და მისი მაქსიმალური სიმაღლე 2366 მეტრია. 

30 დეკემბრის მონაცემებით ბოლო 24 საათის განმავლობაში დადასტურდა კორონავირუსის 2097 ახალი შემთხვევა. ამავე პერიოდში გარდაიცვალა 51 პაციენტი.

stopcov.ge-ის ინფორმაციით, დღეს ქვეყანაში გამოვლენილი ინფიცირების 2 097 ახალი შემთხვევიდან თბილისში გამოვლენილია 887 შემთხვევა, აჭარაში – 222, იმერეთში – 309, ქვემო ქართლში – 114, შიდა ქართლში – 97, გურიაში – 92, სამეგრელო – ზემო სვანეთში – 140, კახეთში –135, მცხეთა-მთიანეთში –49, სამცხე-ჯავახეთში – 30, რაჭა-ლეჩხუმსა და ქვემო სვანეთში -22.

ამ ეტაპზე საქართველოში კოვიდით ინფიცირების 25 793 მიმდინარე აქტიური შემთხვევაა, მათგან 4 712 ადამიანი მკურნალობს საავადმყოფოში.

29 დეკემბრის მდგომარეობით, დადებითობის დღიური მაჩვენებელი არის 5.37%, ბოლო 14 დღის მანძილზე – 5.57% ხოლო 7 დღის მანძილზე – 5.15%.

ქობულეთში, სოფელ ციხისძირის გზაზე, საპატრულო ავტომანქანას მიკროავტობუსი შეეჯახა.

თვითმხილველის თქმით, შემთხვევის ადგილიდან პატრულის ორი თანამშრომელი სასწრაფო სამედიცინო ჯგუფმა წაიყვანა.

სასწრაფო-სამედიცინო სამსახურის ინფორმაციით, პატრულის თანამშრომლებს ქვემო კიდურების მოტეხილობა დაუფიქსირდათ, ისინი „ევექსის“ ქობულეთის კლინიკაში გადაიყვანეს.

გამოძიება დაიწყო სისხლის სამართლის კოდექსის 276-ე მუხლის შესაბამისად.

ბათუმის მუნიციპალური ინსპექცია აცხადებს, რომ „მეტრო ტერმინალს“, რომელიც გოგოლის #11 ბ-ში უკანონოდ აშენებდა, მშენებლობის გაგრძელების უფლება შეეზღუდა. ეს გადაწყვეტილება მეორე ინსტანციის სასამართლომ მიიღო.

ინსპექცია განმარტავს, რომ ქუთაისის სააპელაციო სასამართლოს გადაწყვეტილების საფუძველზე გამოიცა სააღსრულებო ფურცელი მშენებლობის შეჩერების თაობაზე. ეს დადგენილება მუნიციპალურმა ინსპექციამ აღსრულების ბიუროს 17 დეკემბერს გადაუგზავნა.

ინსპექციის ინფორმაციით: „ასევე შესაბამისი მასალები გადაგზავნილია აჭარის პოლიციის დეპარტამენტში სისხლის სამართლებრივი ნიშნების არსებობის გამო.“ 

გოგოლის ქუჩაზე მიმდინარე უკანონო მშენებლობის შეჩერებაზე დადგენილება მუნიციპალურმა ინსპექციამ 2021 წლის პირველ ივნისს გამოსცა. კომპანიამ ეს სასამართლოში იმ მოტივით გაასაჩივრა, რომ მიწის ნაკვეთი გოგოლის 11 ბ-ში, სადაც მშენებლობა მიმდინარეობს, სხვა კომპანიას – „მეტრო მოლ ოფ აჭარას“ ეკუთვნის და „მეტრო ტერმინალს“ ამ საქმესთან  შეხება არ აქვს.

„მეტრო ტერმინალის“ ეს განცხადება დადასტურდა საჯარო რეესტრის ამონაწერითაც – მიწის ნაკვეთი გოგოლის #11 ბ-ში ნამდვილად „მეტრო მოლ ოფ აჭარას“ ეკუთვნის და არა „მეტრო ტერმინალს“.

მთელი ამ პერიოდის განმავლობაში ბათუმის მუნიციპალურმა ინსპექციამ „მეტრო ტერმინალი“ [პირველი ივნისიდან დღემდე] უნებართვო მშენებლობისთვის 6000 ლარით, მშენებლობის შეუჩერებლობის გამო კი 39-ჯერ 5000 ლარით დააჯარიმა. ეს, ჯამში, 201 000 ლარია.

კომპანია „მეტრო ტერმინალმა“ სასამართლოში მოითხოვა მერიის მიერ გამოცემული დადგენილებების გაბათილება იმავე მოტივით, რომ კომპანიას ამ მშენებლობასთან შეხება არ ჰქონდა.

საბოლოო გადაწყვეტილების მიღებამდე, კომპანიამ ასევე სთხოვა სასამართლოს მუნიციპალური ინსპექციის იმ დადგენილებების გაუქმება, რომლის მიხედვითაც მშენებლობა უნდა შეჩერდეს – ასევე მერიას რომ აღარ ჰქონდეს უფლება, მოითხოვოს დაკისრებული საჯარიმო თანხის გადახდა.

ბათუმის საქალაქო სასამართლომ, 16 აგვისტოს განჩინებით, კომპანია „მეტრო ტერმინალის“ მოთხოვნა დააკმაყოფილა მშენებლების შეჩერების ნაწილში.

მთელ ამ პროცეში კითხვებს იწვევდა ისიც, რომ მუნიციპალური ინსპექცია, მიუხედავად აღიარებისა, რომ მიწის ნაკვეთი „მეტრო მოლ ოფ აჭარას“ ეკუთვნის, მაინც „მეტრო ტერმინალს“ აჯარიმებდა.

ინსპექციამ აღარა, რომ დაჯარიმების აქტებში მისამართად გოგოლის 11-ს [შესაბამის საკადასტრო კოდს] უთითებდა, შემდეგ კი შეცვალა მხოლოდ მისამართი, მიუთითა 11ბ და შესაბამისი კოდი, თუმცა დაჯარიმების აქტებს ისევ „მეტრო ტერმინალს“ უგზავნიდა.

მუნიციპალური ინსპექცია დღეს, 29 დეკემბერს გამოქვეყნებულ განცხადებაში ისევ „მეტრო ტერმინალზე“ მიუთითებს:

ქუთაისი სასამართლოს გადაწყვეტილებით, „მეტრო ტერმინალს“ უნებართვოდ მშენებლობის გაგრძელების უფლება შეეზღუდა.

რატომ ისევ „მეტრო ტერმინალი“?

მუნიციპალური ინსპექციის სამსახურის უფროსი, ირაკლი მოქია განმარტავს, რომ „მეტრო ტერმინალი“ იდენტიფიცირებულია, როგორც მშენებელი კომპანია. ის ამბობს, რომ 2021 წლის პირველ ივლისს, როცა ინსპექციამ გოგოლის #11-ში უკანონო მშენებლობა დააფიქსირა, მერიის ქალაქმშენებლობისა და ურბანული პოლიტიკის სამსახურში ამ მისამართზე მშენებლობის ნებართვის მოსაპოვებლად განაცხადიც კი არ იყო შესული [ეს მერიიდან გამოთხოვილი ინფორმაციით დასტურდება]. ასეთ შემთხვევაში ინსპექცია ვალდებულია დაიწყოს ადმინისტრაციული წარმოება სამართალდამრღვევის იდენტიფიცირების მიზნით.

ირაკლი მოქიას თქმით, გოგოლის #11-ში უკანონო მშენებლობასთან დაკავშირებით ადმინისტრაციული წარმოების ზეპირ მოსმენაზე „მეტრო ტერმინალის“ თანამშრომლები გამოცხადდნენ. მათ დაადასტურეს, რომ მშენებლობის პროცესში ისინი არიან ჩართულები.

„მათ წარვუდგინეთ საქმის მასალები და არ გამოუთქვამთ პრეტენზია, რაც მოსმენის ოქმშია დაფიქსირებული. ხაზგასმით ვამბობ, რომ ვსაუბრობ „მეტრო ტერმინალის“ იურისტებზე… თუ ვერ ხდება მშენებელი კომპანიის იდენტიფიცირება, საქმის წარმოება იწყება მესაკუთრის მიმართ. ამ შემთხვევაში, რადგან „მეტრო ტერმინალის“ წარმომადგენლები, რომლებსაც ჰქონდათ კომპანიის მინდობილობა, გამოცხადდნენ მოსმენაზე და დამრღვევის იდენტიფიცირება მოხდა. შესაბამისად, დაჯარიმდა „მეტრო ტერმინალი“.

როდესაც მშენებლობის შეუჩერებლობის გამო დავაჯარიმეთ, ისევ „მეტრო ტერმინალის“ წარმომადგენლები მოვიდნენ ინსპექციაში. გვარწმუნებდნენ, მხოლოდ იმის გამო გავაგრძელეთ მშენებლობა, რომ დასაწყობება მიმდინარეობდაო. ეს მტკიცებულება აღმოჩნდა სასამართლოსთვის“, – განმარტავს ირაკლი მოქია.

კითხვაზე, რატომ არ ჩართო მუნიციპალურმა ინსპექციამ „მეტრო მოლ ოფ აჭარა“ საქმის წარმოებაში თავიდანვე, როგორც მესაკუთრე, ირაკლი მოქია პასუხობს, რომ მშენებლობაზე პასუხისმგებელი პირი გამოვლენილი იყო. იგივე არგუმენტი აქვს იმასთან დაკავშირებით, თუ რატომ აჯარიმებდა მუნიციპალური ინსპექცია „მეტრო ტერმინალს“ მას შემდეგ რაც გაირკვა, რომ მერიას მისამართი და კოდი დაჯარიმების აქტებში არასწორად ჰქონდა მითითებული.

რაც შეეხება ჯარიმებს, ინსპექციის ინფორმაციით, ჯარიმების საკითხზე დავა სასამართლოში გრძელდება.