Batumelebi | გიორგი კირთაძე შიმშილობის მე-8 დღეს: „სააკაშვილს წამებით კლავენ, ეს გვეხება ყველას“ გიორგი კირთაძე შიმშილობის მე-8 დღეს: „სააკაშვილს წამებით კლავენ, ეს გვეხება ყველას“ – Batumelebi
ნეტგაზეთი • RU

გიორგი კირთაძე შიმშილობის მე-8 დღეს: „სააკაშვილს წამებით კლავენ, ეს გვეხება ყველას“

„ეს არაა მხოლოდ ერთი ადამიანის სიკვდილ-სიცოცხლის საკითხი, ეს გვეხება ყველას,“ – ამბობს გიორგი კირთაძე, რომელიც მე-8 დღეა შიმშილობს მიხეილ სააკაშვილის გათავისუფლების მოთხოვნით. თბილისში, „ნაციონალური მოძრაობის“ ოფისთან შიმშილობა პარტიის ლიდერებმა და მხარდაჭერებმა 22 დეკემბერს დაიწყეს.

ბათუმიდან ამ ეტაპზე შიმშილობის აქციაში 8 ადამიანი მონაწილეობს, მათ შორის, ბათუმის საკრებულოს წევრები და გიორგი კირთაძე, რომელიც ბათუმის მერობის კანდიდატი იყო ოპოზიციური ერთობიდან. კიდევ სამმა ადამიანმა ბათუმიდან შიმშილობა წინა დღეებში შეწყვიტა ჯანმრთელობის მდგომარეობის მკვეთრად გაუარესების გამო.

„ახალი წლის დღეებშიც განვაგრძობთ შიმშილობას, არა მგონია, საზეიმოდ გვქონდეს საქმე და საცივში თავის ჩასაყოფად. რეალურად, ჩვენ ვითხოვთ პოლიტიკური მართლმსაჯულების დასრულებას, რადგან ერთი ექიმიც ვერ მოიძებნა, რომელიც იტყოდა, რომ მიხეილ სააკაშვილის მკურნალობა დასრულდა. ფაქტია, რომ მას წამებით კლავენ… ჩვენ გვექნება უარესი ვითარება, ვიდრე ახლა გვაქვს და ეს უნდა გაიგოს ყველამ,“ – ამბობს გიორგი კირთაძე „ბათუმელებთან“.

 

მოშიმშილეები ბათუმიდან

მიხეილ სააკაშვილი გუშინ ღამით გორის ჰოსპიტლიდან რუსთავის დაწესებულებაში გადაიყვანეს ისე, რომ ამის შესახებ არც მისმა ადვოკატებმა იცოდნენ.

გიორგი კირთაძე მიიჩნევს, რომ შიმშილობის აქცია არათუ უნდა შეწყდეს, არამედ პარალელურ რეჟიმში, სხვა სახის აქტივობაც დაიგეგმოს.

„უნდა მივაღწიოთ საერთაშორისო თანამეგობრობის კიდევ უფრო მეტ ჩართულობას… შიმშილობა აუცილებლად გამოიწვევს შედეგს, რადგან თავგანწირვა, როგორც წესი, შედეგს იღებს,“ – გვითხრა გიორგი კირთაძემ.

გიორგი კირთაძის თქმით, ის და მისი თანაგუნდელები ამ ეტაპზე თავს შეუძლოდ არ გრძნობენ.

30 დეკემბრის მდგომარეობით ბათუმიდან შიმშილობენ: ბათუმის საკრებულოს წევრები: ლაშა კილაბერია, ნატო ნაცარაშვილი და ეკა ზარია, ბათუმის მერობის კანდიდატი ოპოზიციური ერთობიდან გიორგი კირთაძე, ხელვაჩაურის საკრებულოს წევრი მამუკა ჯევაიში, ასევე ლევან გორგილაძე, ანზორ მარკოიძე და ავთანდილ სურმანიძე.

მთავარი ფოტო: ბათუმელი მოშიმშილეები კარავში, ისინი უკვე მეათე დღეა შიმშილობენ.

ფოტოზე მარცხნიდან მარჯვნივ: მანანა ილურიძე [არ შიმშილობს], ლევან გორგილაძე, მამუკა ჯევაიში [ხელვაჩაურის საკრებულოს წევრი], ნატო ნაცარაშვილი [ბათუმის საკრებულოს წევრი] გიორგი კირთაძე [ბათუმის მერობის კანდიდატი გაერთიანებული ოპოზიციიდან], გივი ნახუცრიშვილი [არ შიმშილობს] ეკა ზარია [ბათუმის საკრებულოს წევრი].

 

ნეტგაზეთის მასალების სხვა გამოცემებში გადაბეჭდვის წესი
ავტორი