მაღალმთიან აჭარაში ინტენსიური თოვა 2 იანვარს, დაახლოებით 18:00 საათზე დაიწყო და მთელი ღამის განმავლობაში გადაუღებლად თოვდა. დღეს, 3 იანვარს, თოვა შეწყდა, თუმცა დიდთოვლობის გამო სოფლების უმრავლესობაში შეფერხებულია გადაადგილება და ელექტრო ენერგიის მიწოდება. სინოპტიკოსების პროგნოზით, აჭარის მთაში თოვა ხვალ, დღის მეორე ნახევრიდან განახლდება. წინასწარი პროგნოზით, აჭარაში 5 იანვარს, დღის მეორე ნახევარში გამოიდარებს.
მუნიციპალიტეტის სოფლები მოწყვეტილია დაბას. ხულოს მერიის პრესსამსახურში ამბობენ, რომ მუნიციპალიტეტში გზებს ინტენსიურად წმენდენ.
“ხულოში 14 სპეციალური ტექნიკა მუშაობს. გუშინ ღამით დაიწყო გზის გაწმენდითი სამუშაოები. იწმინდება, როგორც ადმინისტრაციულ ცენტრებთან დამაკავშირებელი, ასევე სოფლებთან დამაკავშირებელი გზები”, – ამბობენ ხულოს მერიის პრესსამსახურში.
სოფლის შიდა გზები არ არის გაწმენდილი შუახევის მუნიციპალიტეტშიც. “შუახევში ყველა მიმართულებით იწმინდება გზები, როგორც ადმინისტრაციული, ასევე სოფლებთან დამაკავშირებელი. მუშაობს 13 ერთეული ტექნიკა, ტექნიკის რაოდენობა გაიზრდება საჭიროებისამებრ. ამ ეტაპზე ძირითადად ადმინისტრაციულ ერთეულებთან დამაკავშირებელი გზები იწმინდება“, – გვითხრეს შუახევის მერიის პრესსამსახური.
ქედის მუნიციპალიტეტის პრესსამსახურის თქმით, ქედაში მუშაობს შვიდი ერთეული სპეციალური ტექნიკა. ამავე წყაროს ინფორმაციით, ამ მუნიციპალიტეტში გადაადგილება შესაძლებელია როგორც ადმინისტრაციულ ცენტრში, ისე სოფლებიდან დაბასთან დამაკავშირებელი გზები.
ქედაში, შუახევსა და ხულოში – გაწმენდილ მონაკვეთებში გადაადგილებაა შესაძლებელი მაღალი გამავლობის ავტომობილებით.
ხულოში ელექტრო ენერგია არ მიეწოდება მაღალი ზონის ადმინისტრაციულ ერთეულებს. “ენერგო პრო-ჯორჯიას” პრესსამსახურის თქმით, დაზიანებულია
მაღალი ძაბვის სადენები და მიმდინარეობს მუშაობა ავარიების აღმოსაფხვრელად. პრესსამსახურის თქმით, ეტაპობრივად ურთავენ აბონენტებს ელექტროენერგიას.
“შუახევში ელექტროენერგია არ მიეწოდებათ ჭვანისა და დღვანის ადმინისტრაციულ
ერთეულებს, ასევე სოფლებს, კოლოტაურსა და ნამონასტრევს, აღდგენითი სამუშაოები აქტიურად გრძელდება ყველა მიმართულებით”, – ამბობენ “ენერგო პრო-ჯორჯიას” პრესსამსახურში”.
იგივე წყაროს ინფორმაციით, ქედის მუნიციპალიტეტში ელექტროენერგიის აღდგენითი სამუშაოები მიმდინარეობს დანდალოს ადმინისტრაციულ ერთეულსა და სოფელ კოლოტაურში“.
