შემოვლითი გზის მშენებლობის გამო დაზარალებულ ოჯახებს, რომლებსაც სახლები დაებზარათ, მერია ავარიული სახლების პროგრამაში ჩართავს. ამის შესახებ ლევან დავითაძემ დღეს, 31 დეკემბერს, უთხრა „ბათუმელებს“.
მოსახლეობა კი აცხადებს, რომ დაპირება ბევრჯერ მიიღეს, თუმცა უშედეგოდ.
ვიცე-მერის ინფორმაციით, მერიამ სამშენებლო ტერიტორიის მიმდებარედ არსებული სახლების მდგრადობა შეისწავლა და ოჯახები გაიყვანა იმ სახლებიდან, რომელთა მდგომარეობაც საფრთხის შემცველი იყო:
„სხვა ოჯახებს ამ მომენტისთვის საფრთხე არ ემუქრებათ. სამომავლოდ მათზე პასუხისმგებლობა აიღო მერიამ შესაბამისი პროგრამის ფარგლებში. რაც შეეხება მათი ბინებით უზრუნველყოფას, ამაზე საბჭო იმსჯელებს და მიიღებს გადაწყვეტილებებს, მათ შორის, ამ რვა ოჯახზეც,“- ამბობს ლევან დავითაძე.
მერიის ავარიული სახლების პროგრამის ბიუჯეტი 80 მილიონი ლარია, მათ შორის, 20 მილიონი ლარი მომავალ წელს უნდა დაიხარჯოს. ამ 20 მილიონიდან 2 მილიონ ლარს მერია ითვალისწინებს საჭიროების შემთხვევაში ბინების დაქირავებისთვის, 18 მილიონი კი ახალი ბინების ასაშენებლად უნდა დაიხარჯოს.
„ყველა ლოკაციას სხვადასხვა პრობლემა აქვს, ეს საბჭოსთვის დიდი გამოწვევაა. გარდა ამისა, მშენებლობის ნაწილშიც არის ბევრი მიმართულება, ამიტომ დეტალებზე მოგვიანებით გახდება თქვენთვის ცნობილი,“ – გვითხრა ლევან დავითაძემ.
მისივე თქმით საბჭო ამ ეტაპზე კრიტერიუმების შემუშავება-დაზუსტებაზე მუშაობს, კრიტერიუმები კი საექსპერტო დასკვნების შესაბამისად განისაზღვრება.
ამავე თემაზე:
„ჩვენი სახლები დაზიანდა“ – აქცია ავტობანის მშენებლობის წინააღმდეგ მახვილაურში
