Batumelebi

პროკურატურამ ცხოველისადმი სასტიკი მოპყრობის ფაქტზე, რამაც მისი დაღუპვა გამოიწვია, ერთ პირს ბრალდება წარუდგინა.

შინაგან საქმეთა სამინისტროს ინფორმაციით, გამოძიებით დადგინდა, რომ 22 იანვარს, ბათუმში, ბრალდებულმა პნევმატური იარაღით დაზიანებები მიაყენა მიუსაფარ ძაღლს, რის შედეგადაც ცხოველი დაიღუპა.

ბრალდებულს ბრალდება საქართველოს სისხლის სამართლის კოდექსის 259-ე მუხლის პირველი ნაწილით წარედგინა – ცხოველის წამება ან მისდამი სასტიკი მოპყრობა, რამაც მისი დაღუპვა ან დასახიჩრება გამოიწვია, რაც სასჯელის სახედ და ზომად ერთ წლამდე თავისუფლების აღკვეთას ითვალისწინებს.

პროკურატურის შუამდგომლობის საფუძველზე სასამართლომ ბრალდებულს აღკვეთის ღონისძიების სახით გირაო შეუფარდა.

_____________________

ფოტოზე: ძაღლი, რომელიც მოკლეს

აუტისტური სპექტრის აშლილობის მქონე პირთა მშობლები და მშობელთა ორგანიზაციები, აუტიზმის მქონე სრულწლოვანი პირებისთვის სახელმწიფო სერვისების  გაგრძელებას მოითხოვენ.

მშობლების თქმით, ადამიანის უფლებათა და ძირითად თავისუფლებათა დაცვის 23-ე კონვენციის რატიფიცირებით, საქართველომ აიღო ვალდებულება იზრუნოს ნებისმიერი შეზღუდული შესაძლებლობის მქონე პირის ჯანმრთელობის, სოციალური დაცვისა და განათლების უფლებებისთვის.

მშობელის თქმით, აუტისტური სპექტრის აშლილობის მქონე ადამიანებისთვის თერაპიული პროგრამების გაგრძელება სასიცოცლოდ მნიშვნელოვანია და მუნიციპალიტეტები ვალდებული არიან, აღნიშნული სერვისები დროულად და უწყვეტად მიაწოდოთ აუტისტური სპექტრის მქონე სრულწლოვან პირებსაც.

„ჩვენ, მშობლები, ამ სერვისების გაგრძელებას არ ვითხოვთ მხოლოდ ჩვენი შვილებისთვის, არამედ ჩვენი ოჯახისთვის, ჩვენი ნათესავებისთვის და საზოგადოებისთვის, იმიტომ რომ ეს ადამიანები ნორმალურად იყვნენ ადაპტირებული საზოგადოებაში და არც საზოგადოებას ჰქონდეს დისკომფორტი ამ ადამიანების არსებობით და არც ჩვენს შვილებს ჰქონდეთ დისკომფორტი ამ საზოგადოებაში ყოფნით“ – ამბობს „ბათუმელებთან საუბარში მედეა შალამბერიძე.

მისი თქმით, ეს არის სოციალური საკითხი, რომელიც აუცილებლად უნდა მოაგვაროს სახელმწიფომ, რადგან ეს მის ინტერესებშიც შედის.

„ის რესურსი რაც ჩადო სახელმწიფომ ამ ბავშვებში, წყალში იყრება, რადგან თერაპიული მხარდაჭერის შეწყვეტა, იწვევს რეგრესს. ჩვენ გვითხრეს სპეციალისტებმა საზღვარგარეთ, რომ თუ არ გაგრძელდება თერაპია ზრდასრულ ასაკშიც, შეიძლება ფსიქიკურ პრობლემებამდეც მივიდეთ.

მეორესაც გეტყვით, ფსიქიკურ პრობლემებამდე ოჯახის წევრებიც მიდიან, რომლებსაც უხდებათ ამ მდგომარეობაში მყოფი შვილის, დის ან ძმის ყურება. ეს ზოგადი, სოციუმის საკითხია და აუცილებელია ამის მოგვარება“ – ამბობს მედეა.

მედეა შალამბერიძის შვილი 19 წლისაა, როგორც დედა ამბობს, მთელი ის პრობლემები, რასაც  ამ ასაკში სახელმწიფო სერვისების შეწყვეტა იწვევს, ოჯახის ზურგზე გადადის.

„აუტიზმი, როგორც სპეციალისტები გვეუბნებიან, არის მდგომარეობა, რომელიც მუდმივია და ადამიანსაც მუდმივად სჭირდება მხარდამჭერი სერვისები. ჩვენ ვართ ის მშობლები, რომლებსაც უცხოეთიდან ჩამოგვყავდა სპევიალისტები, რადგან არავინ მუშაობდა ამ მიმართულებით, ჩვენ თვითონ შევიმუშავეთ აუტისტური სპექტრის პროგრამები და ჩვენ ვართ ის მშობლები, რომელთა შვილებმა აქ, საქართველოში, ისედაც გვიან დაიწყეს ამ სერვისების მიღება.

პანდემიის დროს გერმანელ სპეციალისტებთან გვქონდა შეხვედრა. მათ გვითხრეს, რომ ისინი აუტისტური სპექტრის მქონე ადამიანებს არა მარტო ასაქმებენ, მხარდამჭერი თერაპია მაინც არ უწყდებათ, რადგან ეს მუდმივად სჭირდებათ.

მთელი ცხოვრება? – მკითხა ერთ-ერთმა საკრებულოს წევრმა ერთხელ. კი, მთელი ცხოვრება. ასეა მთელ მსოფლიოში და ამის საჭიროება ყველამ აღიარა “-გვეუბნება მედეა.

მისი თქმით, თერაპია აუტისტური სპექტრის მქონე ადამიანისთვის დასაქმებაცაა, რადგან ამ დროს დაკავებულია ადამიანი.

„მთელი დღე ჰქონდა გაწერილი ჩემს შვილს. ჰქონდა სკოლა, თერაპიები, ახლა არაფერი აღარ აქვს, უსაქმოდ არის სახლში. ჩვენ, ჯანმრთელმა ადამიანებმა პანდემიის დროს გამოვცადეთ რამდენად რთულია სახლში უსაქმოდ ყოფნა, ფსიქიკური პრობლემები დაეწყოთ ადამიანებს და ამ ადამიანების სახლში უსაგნოდ ყოფნა, კატასტროფაა“ – ამბობს მედეა შალამბერიძე.

მისი თქმით, აუტისტური სპექტრის ადამიანებს ასისტენტის გარეშე სწავლა, მუშაობა და ქუჩაში გადაადგილებაც კი არ შეუძლიათ.

ეკა  მაისურაძის შვილიც 19 წლისაა. როგორც დედა ამბობს, აქამდე ჩართული იყვნენ სახელმწიფო პროგრამებში, თუმცა რაც სრულწლოვანი გახდა, მომსახურება შეუწყდათ.

„ხელი აღარ მიგვიწვდება ამ სერვისებზე და ყველაფერში თანხა უნდა გადავიხადოთ, რაც ძალიან რთულია“ – გვეუბნება ის.

„18 წლის შემდეგ, ჩვენი შვილები მიტოვებული არიან, შუა გზაში დარჩნენ. აუტისტური სპექტრის მქონე ადამიანების ბიოლოგიური ასაკი არ შეესაბამება მათ ინტელექტუალურ განვითარებას. შესაბამისად, ამ სპექტრის მქონე პირებს, დახმარება სრულწლოვან ასაკშიც ესაჭიროებათ.

ახლა როცა ქცევითი უნარები მოწესრიგებული აქვთ, საჭიროა გაგრძელდეს ამ უნარებზე მუშაობდა, რომ წყალში არ ჩაიყაროს მთელი შრომა, რომელსაც ვეწეოდით ჩვენი შვილების დამოუკიდებელი ცხოვრების უნარების განვითარებისთვის.

ჩვენს შვილებს სჭირდებათ როგორც ჯგუფური, ასევე ინდივიდუალური მიდგომები რომ არ შეჩერდეს იმ უნარების განვითარება, რასაც მანამდე ასწავლიდნენ. ვინც შეწყვიტა ამ უნარებზე მუშაობა, სახეზეა რეგრესი“ – გვეუბნება ეკა მაისურაძე.

მშობლების თქმით, მაღალფუნქციური აუტისტური სპექტრის მქონეებსაც კი უჭირთ დამოუკიდებლად ჩართვა საქმიანობაში.

„ჩვენ ძირითადად გვყავს დიდი აუტისტები, რომლებიც არ მეტყველებენ და ძალიან რთულია სხვამ გაიგოს მას რა უნდა, რომ გაცვალონ ეს საჭიროებები.

ყოველთვის ამას ვეუბნებით ადამიანებს, იქნება ეს საკრებულოში თუ სხვაგან, რომ აუტისტური სპექტრის მქონე პირებს სჭირდებათ მუდმივად, მთელი ცხოვრების მანძილზე მხარდაჭერა. ეს მართლა ასეა და ამას სპეციალისტები ამბობენ. თუ ამ მხარდაჭერას ეს ადამიანები ვერ მიიღებენ, მივიღებთ ძალიან მძიმე მდგომარეობას“ – გვეუბნებიან მშობლები.

მათი თქმით, თუ ამ ადამიანების მშობლებს სახელმწიფო არ დაეხმარება, კიდევ უფრო დიდი დილემის წინაშე აღმოვჩნდებით. „ოჯახმა უარი რომ თქვას ამ ბავშვებზე, სად მიჰყავს მაშინ სახელმწიფოს ეს ადამიანები? წასაყვანიც კი არ აქვს სახელმწიფოს.

ამიტომ, ჩვენ, მშობლები ვეუბნებით სახელმწიფოს, რომ მოგვეცით საშუალება, შეგვაძლებინეთ, რომ ჩვენ გავუკეთოთ შესაბამისი მხარდაჭერა, რომ იმის უნარი მაინც ჰქონდეთ ამ ბავშვებს რომ ქუჩაში არ დაიკარგონ, ან რაიმე დანაშაული არ ჩაიდინონ, ელემენტარულად იმეტყველონ მაინც“ – ამბობენ მედეა.

აჭარის 5 მუნიციპალიტეტს: ხულოს, შუახევს, ქედას, ხელვაჩაურსა და ქობულეთს სოფლებში მერის 64 წარმომადგენელი ჰყავს. მათგან მხოლოდ სამია ქალი.

განსხვავებული მდგომარეობა არც ბათუმის მუნიციპალიტეტშია.

ხულოს სხვადასხვა ადმინისტრაციულ ერთეულებში მერს, ჯამში, 13 წარმომადგენელი ჰყავს, არცერთი მათგანია ქალი არ არის.

„ჩვენთან ცუდი რელიეფია ცოტა, ზამთარი, კლიმატი და რა ვიცი… ქალმა არ მგონია, რომ შეძლოს [მერის წარმომადგენლობა]“, – გვითხრა ლერი თავართქილაძემ, მერის წარმომადგენელმა დაბა ხულოს ადმინისტრაციულ ერთეულში. მან ამჯობინა „უკომენტაროდ დატოვოს“ კითხვა, არის თუ არა გენდერული უთანასწორობის მაგალითი ეს ფაქტი.

მერს ქალი წარმომადგენელი არც შუახევში ჰყავს, სადაც მერის წარმომადგენლად 9 კაცია დასაქმებული.

„რა ვიცი აბა, რთულია ალბათ. ვგულისხმობ, რომ სოფელია, ფიზიკურად სამუშაოა, ზამთარია, გადასაადგილებელია… უჭირთ ალბათ გადაწყვეტილების მიღება ქალბატონებს“, – ასე გვიპასუხა გიორგი ფუტკარაძემ, მერის წარმომადგენელმა ოლადაურის ადმინისტრაციულ ერთეულში კითხვაზე, მისი აზრით, რატომ არ ჰყავს მუნიციპალიტეტის მერს წარმომადგენლებად ქალები.

იგივე კითხვაზე, ვახტანგ ნაკაშიძემ, მერის წარმომადგენელმა ჭვანის ადმინისტრაციულ ერთეულში ასე გვიპასუხა: „მე რა უნდა ვიფიქრო, ეგ შეზღუდული ხომ არ არის, ვისაც შესაძლებლობა და სურვილი აქვს, რომ იყოს [მერის წარმომადგენელი], შესაძლებელია რომ იყოს“.

მისი თქმით, გენდერული უთანასწორობის მაგალითი არ შეიძლება იყოს მერის წარმომადგენლების მონაცემები შუახევში, რადგან თანაბარი შანსები აქვთ ქალებსაც და კაცებსაც გახდნენ მერის წარმომადგენლები.

„არავითარი პრობლემა არ არის ქალი იქნება მერის წარმომადგენელი, თუ კაცი. ნებისმიერი პიროვნება, ვისაც შეუძლია, რომ გააკეთოს საქმე, იქნება [მერის წარმომადგენელი], ქალიც, კაციც“, – გვითხრა ვახტანგ ნაკაშიძემ.

მერის 10 წარმომადგენლიდან არცერთი ქალი არ არის ქედაშიც. „ბათუმელები“ აქ მერის 3 წარმომადგენელს დაუკავშირდა, თუმცა მათ სხვადასხვა მიზეზით მას შემდეგ გაგვითიშეს ტელეფონი, რაც ჩვენი კითხვების შინაარსი გაიგეს.

მერს ქალი წარმომადგენლები მხოლოდ ქობულეთსა და ხელვაჩაურში ჰყავს: 21 წარმომადგენლიდან 1 ქალია დასაქმებული ქობულეთში, ხელვაჩაურში კი ამ პოზიციაზე 11 თანამშრომლიდან 2 ქალია მერის წარმომადგენელი.

ხელვაჩაურში, ორთაბათუმის ადმინისტრაციული ერთეულის მერის წარმომადგენელმა, როსტომ ფაღავამ გვითხრა, რომ შესაძლოა, ქალებს არ ჰქონდა სურვილი მერის წარმომადგენლები ყოფილიყვნენ.

„უარს არავინ არ ეტყოდა [ქალებს]. შეზღუდვა არა აქვთ არც ხელმძღვანელებისგან, არც კოლეგებისგან. პირიქით, ძალიან კარგ პატივისცემაშია ყველა ქალბატონი და თუ კი თვითონ სურვილი არ გამოხატეს ამ პოზიციაზე, სურვილი მათ თუ არ გაუჩნდათ მოსვლის, მუშაობის, ძალად ხომ ვერ მოიყვან.

ქალებს და კაცებს აბსოლუტურად თანაბარი შანსი აქვთ გახდნენ მერის წარმომადგენლები“ – გვითხრა მან.

„ბათუმელები“ დაუკავშირდა ხელვაჩაურის მერის ქალ წარმომადგენლებსაც, თუმცა მათ არ ისურვეს იმაზე საუბარი, თუ რას ფიქრობენ ამ საკითხზე.

ერთადერთი მერის ქალი წარმომადგენელი ქობულეთში კი შორენა ზოიძეა, ის აჭყვისთავის ადმინისტრაციულ ერთეულში საქმიანობს. მისი თქმით, ძალიან რთულია ამ პოზიციაზე მუშაობა – „მანქანა თუ არ გყავს, მანქანის ტარება თუ არ იცი, მით უმეტეს“.

„უნდა გქონდეს შეხვედრები, ურთიერთობა ხალხთან. სოფელი კიდევ არ არის ახლო დასახლება, ძალიან შორ-შორსა დასახლებები და ვფიქრობ, რთული საქმეა. ყველა ქალს ეს არ შეუძლია, არ აქვს ნებისყოფა მოსახლეობასთან ურთიერთობის. ხალხთან ურთიერთობა ურთულესი რამეა, ჩემი აზრით“, – გვითხრა შორენა ზოიძემ.

მერის ქალი წარმომადგენლების ნაკლებობას ქობულეთში გენდერულ უთანასწორობად არც შორენა მიიჩნევს.

„ძალიან ბევრი ქალი ვიცი, ვინც უარს ამბობს [მერის წარმომადგენლობაზე]. მეც ხშირად მაქვს შემთხვევები, რომ აი, როგორ მუშაობ, როგორ გაქვს ნებისყოფა, როგორ ძლებ [მეუბნებიან]. რთულია. სტიქია მოხდა, უბედური შემთხვევაა, თუ რაღაც – ღამით უნდა გახვიდე, იქ უნდა იყო მთელი ღამე აუცილებლად. ოჯახიც თუ ხელს არ გიწყობს, უკან ბევრი რამე გაწუხებს, არ ვიცი.

არ ვფიქრობ, რომ გენდერული უთანასწორობაა. სირთულეებია და ბევრს ეს აშინებს, ალბათ“, – ამბობს შორენა ზოიძე და თვლის, რომ ქალებს და კაცებსაც თანაბარი შანსი აქვთ დასაქმდნენ მერის წარმომადგენლად.

_________________________

ფოტო „ბათუმელების“ არქივიდან.

„ნაციონალური მოძრაობის“ პოლიტსაბჭოს გადაწყვეტილებით, პარტიის წევრები ენმ-ის მომავალ თავმჯდომარეს შიდაპარტიული არჩევნების გზით აირჩევენ.

არჩევნები 2023 წლის 28 იანვარს, დილის ათ საათზე დაიწყება და 30 იანვარს, 10:00 საათზე დასრულდება.

ენმ-ის თავმჯდომარეობისათვის ოთხი კანდიდატი იბრძვის: ნიკა მელია, ლევან ხაბეიშვილი, გიორგი მუმლაძე და ნონა მამულაშვილი.

ბათუმში ენმ-ი ძირითადად ორ ბანაკად გაიყო, ნიკა მელიას და ლევან ხაბეიშვილის მომხრეებად. მხარდამჭერები ჰყავთ გიორგი მუმლაძესა და ნონა მამულაშვილსაც.

ენმ-ის ბათუმის ორგანიზაციის თავმჯდომარე, გიორგი კირთაძე ნიკა მელიას მხარდამჭერია. გიორგი კირთაძის თქმით, მელიას უჭერს მხარს ბათუმის საკრებულოს დეპუტატთა უმრავლესობაც.

უმაღლესი საბჭოს დეპუტატი ლევან ანთაძე ლევან ხაბეიშვილის მხარდამჭერთა რიგებშია. მისი თქმით, ხაბეიშვილს უჭერს მხარს უმაღლესი საბჭოს დეპუტატთა უმრავლესობა, ასევე აჭარის რაიონული ორგანიზაციების ხელმძღვანელები და პარტიული აქტივი.

რატომ უჭერთ მხარს კონკრეტულ კანდიდატს და რა არის მთავარი წყალგამყოფი სხვა კანდიდატებთან? – ჰკითხა „ბათუმელებმა“ თითოეული კანდიდატის მხარდამჭერს.

„ჩვენ ავტოკრატიის დამარცხება ამ ქვეყანაში დიდი პოლიტიკური ერთობით წარმოგვიდგენია. მიმაჩნია, რომ ამ დიდ პოლიტიკურ ერთობაში ნაციონალურმა მოძრაობამ უნდა თქვას გადამწყვეტი სიტყვა.

ასეთ დროს მნიშვნელოვანია ნაციონალურ მოძრაობას ჰყავდეს მძიმეწონიანი ლიდერი. ნიკა მელია, ჩემი აზრით, სხვა კანდიდატებთან შედარებით ბევრად უფრო მეტად ასხივებს ერთობასაც და კოალიციურ მმართველობასაც შეძლებს მომავალში.

თვითმყოფადი პოლიტიკოსია და მიმაჩნია, რომ ის ბევრად უფრო მძიმე წონის არის, ვიდრე წარმოდგენილი სხვა კანდიდატები.

აქვე კიდევ ერთხელ მინდა დავადასტურო პატივისცემა ყველა სხვა კანდიდატის მიმართ.

ამასთან ერთად, მეორე არგუმენტი, რატომაც ვუჭერ მხარს, არის ის, რომ ნიკა მელიას გუნდი და მხარდამჭერები ძალიან ღიად პოზიციონირებენ.

ჩვენ ნათლად ვხედავთ, რომ ლევან ხაბეიშვილთან ერთად, მის უკან ასევე არიან ადამიანები, რომლებიც ღიად საჯარო პოლიტიკაში არ ერევიან. ეს არ მიგვაჩნია სწორად,“ – ამბობს გიორგი კირთაძე.

„წლების განმავლობაში, ნიკა მელიას ხელმძღვანელობისას მე ვერ დავინახე ეფექტი, ვერ დავინახე მოძრაობა, ვერ დავინახე წინსვლა, პირიქით – პარტია ყოველდღიურად უკან-უკან მიდიოდა. ბევრი ადამიანი, მათ შორის გამორჩეული სახეები ტოვებდნენ ამ პარტიას. მომხრე ვარ იმის, რომ ცვლილებები მოხდეს.

მთავარი გამყოფი, ვირტუალურად რომ წარმოვიდგინოთ, ეს არის უძრაობა ერთ მხარეს და მეორე მხარესაა მოძრაობა. ტიპაჟებიც ისეთია. ბოლო პერიოდში მელია ძალიან კაბინეტის, თეთრხელთათმანიანი პოლიტიკოსი გახდა. ლევან ხაბეიშვილი პირიქით, მოძრავია და სწორედ მოძრაობაშია ჭეშმარიტებაც.

ლევანში დავინახე ის, რომ მას შეუძლია მეტის გაკეთება, შეუძლია მოძრაობა, გაკეთებულიც აქვს. პარტიაში იყო ანტიკორუფციული მოძრაობის მდივანი, ამ მოვალეობას შესანიშნავად ასრულებდა. აქედან გამომდინარე, ჩემი პირადი არჩევანიც ამიტომ იყო ლევანის მხარეს დადგომა,“- ამბობს ლევან ანთაძე.

როგორ წარმოგიდგენიათ თანამშრომლობა გამარჯვების ან დამარცხების შემთხვევაში იმ ადამიანებთან, ვინც ახლა გამარჯვებისთვის იბრძვის? – ჰკითხა „ბათუმელებმა“ გიორგი კირთაძესა და ლევან ანთაძეს. 

„მხოლოდ იმედი შემიძლია მქონდეს, რომ დამარცხებულები მიულოცავენ  გამარჯვებულს და გამარჯვებულიც შეძლებს, რომ ისევ აქციოს ნაციონალური მოძრაობა ერთიან გუნდად.

მთავარ გამოწვევებს, რაც ჩვენი ქვეყნის წინაშე დგას, ყველამ ერთად ვუპასუხოთ.  აჭარაშიც ასე იქნება, ბუნებრივია. დამარცხებულები მიულოცავენ გამარჯვებულებს. გამარჯვებული აიღებს პასუხისმგებლობას პარტიის მართვაზე, გადაწყვეტილებების მიღებაზე, თუმცა ეს არ ნიშნავს იმას, რომ დამარცხებულებმა პარტია უნდა დატოვონ და ა.შ.

იმ შემთხვევაში, თუ იქნება ხაბეიშვილი გამარჯვებული, მე ვაპირებ, რომ მას გულწრფელად მივულოცო, ვუსურვო წარმატებები.

ვიცი, რომ ბათუმის ორგანიზაციაშიც შერჩეული ჰყავს თავისი მენეჯმენტიც, ვინც აქ, ბათუმის ორგანიზაციას უნდა უხელმძღვანელოს და იმათაც, ბუნებრივია, ვუსურვებ წარმატებებს.

არსად არ წავალ, დავრჩები ნაციონალურ მოძრაობაში და გავაგრძელებ ბრძოლას მიშას თავისუფლებისთვისაც და ქვეყნის ევროპული ინტეგრაციისთვისაც,“ – ამბობს გიორგი კირთაძე.

„ჩემს თავს ვხედავ იქ, სადაც ვიყავი და ამას გავაგრძელებ. მოგეხსენებათ არის პარტიის არჩევნები და მე მინდა, რომ ეს პარტია იყოს წინ. ვინც გაიმარჯვებს, როგორც გაიმარჯვებს, რა თქმა უნდა, მე ჩემს საქმეს ყოველთვის გავაკეთებ. ყოველ შემთხვევაში ვეცდები გავაკეთო ისე, როგორც ვაკეთებდი. სხვასაც იგივე მინდა ვუთხრა.

ზოგადად ფაქტი ერთია, რომ ეს არჩევნები არის პარტიული არჩევნები. ჩვენ ამის პრეცედენტი აქამდე არ გვქონია, თუ ნიკა მელიას და ლევან ვარშალომიძის არჩევნებს არ ჩავთვლით, რომელიც გამართული არ იყო ბოლომდე.

დღეს ჩატარებული არჩევნები ეს არის წინგადადგმული ნაბიჯი და ამ წესით უნდა ირჩევდნენ ალბათ სხვა პარტიებიც. ნებისმიერი შედეგის შემთხვევაში პარტიაში დავრჩები, რადგან პარტიაში არ მოვსულვარ არც ნიკა მელიას და არც ლევან ხაბეიშვილის, არც მამულაშვილის ან მუმლაძის გამო.

აქ ვარ ჩემი შეხედულების გამო და პრინციპში იმ განვლილი გზით რაც გამიკეთებია აქამდე,“ – უთხრა „ბათუმელებს“ ლევან ანთაძემ.

ენმ-ის თავმჯდომარეობის კანდიდატებიდან გიორგი მუმლაძეს უჭერს მხარს აქტივისტი ალექსანდრე მილორავა.

„გიორგი მუმლაძე არის გამორჩეული კანდიდატი, ის არის აბსოლუტურად სუფთა წარსულით, არ ჰქონია შეხება არცერთ სახელისუფლებო ორგანოსთან. ის იბრძვის აბსოლუტურად გულწრფელად და მისი ხედვები არის მიმართული მხოლოდ და მხოლოდ ორ საკითხზე: პირველი – მიხეილ სააკაშვილის გათავისუფლება და მეორე – რუსული ოცნების ხელისუფლებიდან გაშვება.

აქედან გამომდინარე, მისი ინტერესია არა თანამდებობა, პარტიული თუ სხვა, არამედ ჩვენი სახელმწიფოს ინტერესების დაცვა,“- ასე ახასიათებს ალექსანდრე მილორავა გიორგი მუმლაძეს.

მილორავას თქმით სხვა კანდიდატებსა და გიორგი მუმლაძეს შორის მთავარი გამყოფი ხაზი არის სიახლე.

„გიორგი მუმლაძეს აქვს პარტიის განვითარების ხუთპუნქტიანი გეგმა. თუ ერთიანი ნაციონალური მოძრაობის მხარდამჭერებს სურთ რეალური განახლება პარტიის და რეალური ცვლილებები, მაშინ მათ მხარი უნდა დაუჭირონ გიორგის.

არჩევნების შემდეგ პარტია უნდა გამოვიდეს გაჯანსაღებული, უფრო მეტად გაძლიერებული და მან უნდა დაიწყოს რეალური მოქმედებები.

დღესდღეობით გვაქვს ნაციონალური მოძრაობა, რომელიც უნდა დაუბრუნდეს ძველ რელსებს და იქცეს ისევ ნაციონალურ მოძრაობად. აქედან გამომდინარე, რა თქმა უნდა, პარტიამ უნდა გააკეთოს ყველაფერი, პირველ რიგში მიხეილ სააკაშვილის სამკურნალოდ გადაყვანისთვის, მისი სიცოცხლის და ჯანმრთელობის შესანარჩუნებლად და ამის შემდეგ დაიწყოს უკვე რეალური ბრძოლა „ქართული ოცნების“ წინააღმდეგ.

ეს პრორუსული ხელისუფლება და პრორუსული მმართველობა ერთხელ და სამუდამოდ საქართველოში უნდა დასრულდეს და შევქმნათ კოალიციური, პროდასავლური ხელისუფლება,“- ამბობს ალექსანდრე მილორავა.

ბათუმში, ფარნავაზ მეფის ქუჩაზე 63-ში მიუსაფარი ძაღლებისთვის და ჩიტებისთვის სახლები დადგეს.

ჩიტებს პერიოდულად საკენკსაც დაუყრიან და ძაღლების სახლის წინაც ჯამები დგას – ყველას შეეძლება აჭამოს მიუსაფარ ძაღლებს.

„ბათუმის ქუჩებში ბევრი მიუსაფარი ცხოველია – ძაღლებიც, კატებიც და დასარჩენი არსად აქვთ სიცივესა და ყინვაში. თებერვლიდან აცივდება და გადავწყვიტეთ ჩიტებს და ძაღლებს ზამთარი რომ გადავატანინოთ, გავუკეთოთ სახლები.

ეს არ არის ერთადერთი ადგილი, სადაც მიუსაფარი ცხოველებისთვის სახლების ადგმას ვგეგმავთ. ვაპირებთ სხვა ქუჩებზეც დავუდგათ მიუსაფარ ცხოველებს სახლები“ – ამბობს ირენი, საბროკერო კომპანია D&D German Visions-ის მენეჯერის თანაშემწე. სახლები მიუსაფარი ძაღლებისთვის ამ გერმანული კომპანიის თანამშრომლებმა დადგეს.

ირენმა გვითხრა, რომ ძაღლები ამ ადგილს, ძირითადად, ღამით აკითხავენ. თანამშრომლები გეგმავენ კამერაც დაამაგრონ და ლაივსტრიმი გაუშვან კომპანიის გვერდზე დონაციისთვის.

კომპანიაში იმედოვნებენ, რომ ჩიტების და ძაღლების ამ სახლებს საკვები არ მოაკლდებათ და სამომავლოდ ბევრი ასეთი სახლიც გაჩნდება ქალაქში მიუსაფარი ცხოველებისთვის.

ამავე თემაზე: 

ყალბი საგადასახადო დოკუმენტების დამზადება-გამოყენებისა და საბაჟო წესის დარღვევის ფაქტებზე 5 პირი პასუხისგებაში მისცეს.

ფინანსთა სამინისტროს საგამოძიებო სამსახურის ინფორმაციით, „ბრალდებულებმა მათი მართვის ქვეშ მყოფი კომპანიების სახელით, ურთიერთშორის გაწერეს ყალბი საგადასახადო ანგარიშ-ფაქტურები, თითქოსდა განახორციელეს მარცვლეულის ყიდვა-გაყიდვის ოპერაციები, რა გზითაც უსაფუძვლოდ შეიქმნეს 150 961 ლარის ოდენობის დღგ-ს ყალბი აქტივი, რომელიც შემდგომ გამოიყენეს მიმდინარე გადასახადების დასაფარად.

ამავდროულად, 2022 წლის აგვისტო-ოქტომბრის პერიოდში, ბრალდებულებმა, უკანონო მატერიალური სარგებლის მიღების მიზნით, ორი კომპანიის სახელით,  საბაჟო დეკლარაციაში ყალბი მონაცემების შეტანის გზით,  საქართველოს ტერიტორიაზე შემოიტანეს  განსაკუთრებით დიდი ოდენობით – 447 742 ლარის საბაჟო ღირებულების 476 347 კილოგრამი არადეკლარირებული ხორბალი,“- წერს საგამოძიებო.

უწყების ინფორმაციით, დანაშაულებრივი ქმედების შედეგად, სახელმწიფო ბიუჯეტზე მიყენებულმა ზიანმა ჯამში  შეადგინა დაახლოებით 231 000 ლარი.

ამ ეტაპზე მხარის მიერ სახელმწიფო ბიუჯეტში ზიანის ანაზღაურების სახით შეტანილია 170 000 ლარი.

გამოძიება გრძელდება საქართველოს სისხლის სამართლის კოდექსის 210-ე, 185-ე, 220 პრიმა და 214-ე მუხლებით, რაც სასჯელის სახით ითვალისწინებს თავისუფლების აღკვეთას 11-დან 15 წლამდე ვადით.

„მსმენელს სწორი ნოტებით და სწორი სიმღერით შეიძლება კი არ მოაწონო თავი, არამედ გულწრფელობით. ზუსტად იმ ერთი- ორი ნოტით, რომელიც შეიძლება მოხვდეს გულში და გააჟრჟოლოს. ამას უფრო დიდი მნიშვნელობა აქვს ჩემთვის, ვიდრე ზუსტად სიმღერას და კოპირებას. ემოციებს აქვს დიდი მნიშვნელობა“ – ამბობს მუსიკოსი გიორგი ფუტკარაძე უხილავ კავშირზე მუსიკოსსა და მსმენელს შორის.

როცა მღერის, ვერაფერზე ფიქრობს, ვერც მსმენელზე, ვერც მათ რეაქციაზე, „ფიქრის დრო არ აქვს“, „ვერ გრძნობს თავს მიწაზე“. სიმღერის დასრულების შემდეგ კი ეს ემოცია არ სრულდება – ამ დროს გიორგის უჭირს შეფასების მოსმენა, რეაქციის აღქმა, უჭირს საუბარი.

„როცა ვმღერი, ცხოვრების ძალიან ბევრ დღეს ვიკლებ ჩემი აზრით, ყველა სიმღერის დროს იმდენ ემოციას ვდებ, რომ შემდეგ ფიზიკურად ვერ ვაზროვნებ“ – ამბობს გიორგი. 

„როცა აზრზე მოდის“, ჩანაწერს უსმენს – კონკრეტული მომენტები საერთოდ არ მახსოვსო, ამბობს.

ხანდახან სწერენ – „მოგისმინე და მომეწონა“, მიუწერიათ – „ახლაც შენ გისმენ“. ამბობს, რომ ეს სტიმულს აძლევს.

„ბუნებრივია, თუ ჩემამდე მოდის ემოცია, რომელიც მსმენელმა მიიღო ჩემი სიმღერისგან, პასუხს ვუბრუნებ და ვცდილობ გულწრფელი ვიყო ყოველი პასუხის შემთხვევაში.

ძალიან დიდი მნიშვნელობა აქვს ჩემთვის ყველა ადამიანს, ვინც მისმენს. ჩემს ჟანრს შეიძლება ბევრი არ უსმენდეს, მაგრამ ვინც უსმენს, ჩემთვის ყველა ძალიან ახლო ადამიანია სულიერად. დიდ პატივს ვცემ ყველას, იმიტომ კი არა, რომ მე მაფასებს კარგად ან ეს ფაქტი მაბედნიერებს და „ვაუ, რა მაგარი ვარ“, არამედ იმიტომ, რომ ვგრძნობ, რა ემოციაც მე გავეცი, იმ ადამიანამდე მივიდა. მოვალეობასავითაა ჩემთვის. არ მიყვარს ხელოვანები რომ იძახიან, იმიტომ ვაკეთებ ამას, რომ მე ასე მისწორდებაო. ასე არაა. ხელოვანი როცა ხარ, მუსიკოსი ხარ, ამას იმიტომ აკეთებ, რომ სხვასთან მივიდეს“ – ამბობს გიორგი.

იგი მიიჩნევს, რომ ყველა ადამიანი ბედნიერებისკენ უნდა მოისწრაფოდეს:

„მუსიკის დაწერის დროს, თუნდაც სიმღერის დროს, მე ჩემი გამოცდილებიდან ვმღერი.

მიუხედავად იმისა, რომ ჩემი სიმღერები მთლად ბედნიერი არასდროსაა, მაინც რაღაცნაირად, ვიღაცას აბედნიერებს. ყველა ადამიანის მოვალეობაა, რომ რაღაც მომენტით სხვა ადამიანები გააბედნიეროს. ჩემი სათქმელიც ეს არის ზუსტად. მინდა, რომ ყველა ადამიანი ბედნიერი იყოს და მეტი არაფერი. შეიძლება საკუთარი თავი იპოვოს ამ ცხოვრებაში, რაც ყველაზე რთულია, ჩემი აზრით“.

პანდემიამდე გიორგი სხვადასხვა ქვეყანაში მოგზაურობდა, ფესტივალებში იღებდა მონაწილეობას, საიდანაც შემოსავალიც ჰქონდა. რაღაც პერიოდი შვეიცარიაშიც ცხოვრობდა. მისი საქართველოში დაბრუნება პანდემიას დაემთხვა, ჩაიკეტა და დეპრესიამაც სწორედ ამ დროს იჩინა თავი, მაგრამ დაძლია.

როგორია მუსიკოსის ცხოვრება საქართველოში? – „ჩემი აზრით რთულია, არ მიყვარს, რომ ამბობენ, ჩვენს ქვეყანაში არაფერი არ გამოდის და ასე შემდეგ, მაგრამ რეალურად, ჩვენს ქვეყანაში მართლაც რთულია ცხოვრება, არამარტო მუსიკოსისთვის, არამედ ყველასთვის. იმიტომ, რომ რთულად გვაქვს სისტემა მოწყობილი ამ მშვენიერ ქვეყანაში“ – ამბობს გიორგი.

იგი ხაზს უსვამს, რომ მისთვის მიუღებელია ხელოვნების პოლიტიკასთან დაკავშირება:

„ჩემი პირადი დამოკიდებულებაა, რომ პოლიტიკას საერთოდ არ ვეხები. აპოლიტიკური ვარ, მიუხედავად იმისა, რომ ჩვენს ქვეყანაში აპოლიტიკური ადამიანები არ არსებობენ, ყოველთვის მაინც გვიწევს პოლიტიკასთან შეხება. მე არ მიყვარს, როცა ხელოვნება რაღაც მიზეზით მაინც მოიაზრება პოლიტიკასთან, იმიტომ, რომ პოლიტიკა სულ სხვა სფეროა და ხელოვნება სულ სხვაგანაა. ჩემი აზრით, ხელოვანი ადამიანი არავის უნდა მოუწოდებდეს ვიღაცის ან რაღაცის არჩევისკენ. მე სულ სხვა რაღაცისთვის ვმღერი“.

გიორგი ამბობს, რომ ბავშვობაში ფიზიკა და მათემატიკა აინტერესებდა, მუსიკა კი მის ცხოვრებაში მოულოდნელად შემოვიდა:

„უფრო გამოგონებისკენ მივისწრაფოდი. მიღწევებიც მქონდა მაგ საკითხში. ახლა დარწმუნებული ვარ, მხოლოდ და მხოლოდ მუსიკით წარიმართება ჩემი ცხოვრება“.

როგორც თავად გვიყვება, ყოველთვის არ მღერის, ყოველთვის არც გულწრფელობა შეუძლია, იშვიათად წერს მუსიკას. საკუთარი მუსიკისთვის ხშირად იყენებს თავისი ძმის დაწერილ ტექსტს. ბევრ საქმეში გამოცადა თავი, მაგრამ ყველაფერი, რაც სცადა, 2-3 თვეში მობეზრდა, დარჩა მხოლოდ მუსიკა.

გიორგი საქართველოში ბევრ კონკურსში მონაწილეობდა. ამბობს, რომ კონკურსები ერთი მხრივ შესაძლებლობაა მიხვიდე მსმენელის გულამდე, მეორე მხრივ კი – „ტანჯვა -წამება“.

„საერთოდ არ არის კომფორტული სივრცე. ტანჯვა- წამებაა სრული ამ სიტყვის მნიშვნელობით. ბუნებრივია, ძალიან ბევრი დადებითი აქვს და ასევე უარყოფითი. დადებითი ის აქვს, რომ რაღაცნაირად გზას გიხსნის, რომ უფრო მეტმა ადამიანმა მოგისმინოს.

დღევანდელ რეალობაში ძალიან რთულია ისეთი პროდუქტი შექმნა, რომ მერე ყოველთვის გისმინონ, კონკურსი ერთ-ერთი საშუალებაა, რომ მარტივად მიხვიდე ხალხის გულამდე, გაძლევს დამატებით გამოცდილებას, იმიტომ, რომ სხვადასხვა მუსიკოსებთან გიწევს კონტაქტი“.

______________

მთავარი ფოტო: გიორგი ფუტკარაძე მუსიკალური კონკურსის სცენაზე/facebook

25 იანვარს აზოვის პოლკმა სახელწოდება შეიცვალა და ოფიციალურად გახდა უკრაინის შეიარაღებული ძალების სახმელეთო ჯარების მესამე მოიერიშე ბრიგადა – ამის შესახებ უკრაინული მედია წერს ახალი ბრიგადის განცხადებაზე დაყრდნობით.

„ჩვენი დანაყოფი ჩამოყალიბდა აზოვის ტერორისტული თავდაცვის მოხალისეთა რაზმის ბაზაზე, რომელიც შეიქმნა კიევში 2022 წლის 24 თებერვალს, უკრაინაში რუსეთის სრულმასშტაბიანი შეჭრის პირველ საათებში“ – ნათქვამია განცხადებაში, რომელშიც აღნიშნულია, რომ დანაყოფის ხერხემალს წარმოადგენენ „აზოვის“ ვეტერანები და მოძრაობის წარმომადგენლები.

აქვე აღნიშნულია, რომ ამავე ნაწილის მებრძოლები მონაწილეობდნენ ხერსონის გათავისუფლებაში.

„ახლა ბრიგადა ფრონტის ყველაზე ცხელ წერტილშია და იბრძვის ბახმუტისთვის. გადამწყვეტი ბრძოლის დროა!“ – ნათქვამია განცხადებაში.

აზოვი, რომელსაც მოგვიანებით „აზოვის პოლკი“ უწოდეს, 2014 წელს დაარსდა. აზოვის ერთ-ერთი პირველი წევრები „მაიდნის“ მოხალისეთა ჯგუფის აქტივისტები იყვნენ. აზოვს ხშირად მოიხსენიებენ, როგორც ლეგენდარულ პოლკს, რომლის ჯარისკაცებიც განსაკუთრებული სიმამაცით გამოირჩევიან.

აზოვის პოლკი, უკრაინის გენშტაბის ბრძანებამდე დანებების შესახებ, იბრძოდა ქალაქ მარიუპოლში, მესაზღვრეებთან, პოლიციასთან, 36-ე საზღვაო ქვეითთა ბრიგადასთან და მარიუპოლის ტერიტორიულ თავდაცვასთან ერთად.

____________

ფოტოზე: ბახმუტი