სტუდენტები – მარიამ დვალიძე და ირმა მელაძე ბათუმში თითქმის ყოველდღე ქედიდან დადიან. ისინი ბსუ-ს ქართული ფილოლოგიის მეოთხე კურსის სტუდენტები არიან და როგორც ამბობენ, ადრე თუ გზაში 30-40 წუთი სჭირდებოდათ, ახლა ქედის მუნიციპალიტეტიდან ბათუმში ჩამოსვლას რამდენიმე საათს უნდებიან. ამის მთავარ მიზეზად ისინი ხელვაჩაურში „დაუსრულებელ“ საცობებს ასახელებენ.
„ხშირად მგზავრობისას ფიზიკურ ტკივილში გადამდის ხერხემლის ტკივილი. დაღლილობის შედეგად მტკივა თავიც. ლექციაზე რომ მივდივარ, რადგან დიდხანს ვიდექი საცობში, უკვე დაღლილი ვარ. თუ ფეხზე მდგომი ვმგზავრობ, მითუმეტეს, მაშინ უკვე იმდენად დაღლილი ვარ, რომ თითქმის ვერ ვახდენ კონცენტრაციას, ვერ ვუსმენ ლექციებს, გონება მეფანტება.
ყოფილა შემთხვევები, იმდენად გავთიშულვარ მგზავრობის დროს, დამძინებია,“ – ამბობს მარიამი.
მისი თქმით, ზამთარში, როცა მალე ღამდება, იძულებულია, პერიოდულად ხან ერთ ნათესავთან დარჩეს და ხანაც მეორესთან.
ქედა-ბათუმის მიმართულებით სამარშრუტო ტაქსები ყოველ ნახევარ საათში მოძრაობენ, მგზავრობის ღირებულება კი 3 ლარია.
მარიამისთვის მნიშვნელოვანია უნივერსიტეტში ლექცია-სემინარებზე არ დააგვიანდეს და ამიტომაც, ყოველთვის ადრე გამოდის სახლიდან.
„ხშირად ვხვდები ხელვაჩაურის მუნიციპალიტეტში საცობებს და ეს ძალიან დიდ დისკომფორტს მიქმნის, რადგან მიწევს დაახლოებით საათ-ნახევრით ადრე გავიდე სახლიდან, საათ-ნახევრით გვიან ვბრუნდები სახლში და ფაქტობრივად, როცა სახლში მოვდივარ, საღამოს 9 საათია. დაღლილი ვარ და მეცადინეობისთვის იმდენი დრო არ მრჩება, რამდენიც საჭიროა.
მაგალითად, ყოფილა შემთხვევა, ხუთ საათზე წამოვსულვარ ბათუმიდან და თითქმის 3-4 საათი ვიყავი გზაში“, – გვეუბნება მარიამი.
იმავე პრობლემაზე საუბრობს კიდევ ერთი სტუდენტი, ირმა მელაძე, რომელიც ასევე ქედიდან დადის ბათუმში უნივერსიტეტში.
ირმა სახლიდან ყოველთვის ადრე გამოდის, თუმცა მისი თქმით, ამის მიუხედავად, საცობების გამო მაინც აგვიანდება ხოლმე ლექცია-სემინარებზე.
„როდესაც ჩვეულებრივ 40 წუთი მჭირდებოდა ქალაქში ჩამოსასვლელად, ახლა 2 საათი და ხანდახან უფრო მეტიც მჭირდება, იმიტომ, რომ ძალიან გადატვირთული მოძრაობაა.
ხელვაჩაურის გზაზე უკვე საშინელებაა, ერთსაათიანი საცობია. აღარ დასრულდა“, – ამბობს ირმა. ის 2 შვილის დედაა და ცდილობს სახლში დაბრუნება დროულად მოასწროს, რომ შვილები მეორე დღეს სკოლისთვის მოამზადოს.
„როდესაც სახლში მოვდივარ, ყველანაირად განადგურებული ვარ. გამოდის, რომ 3-4 საათი მიწევს გზაში ყოფნა. სახლში რომ ავდივარ, უკვე საღამოს 9 საათია, საცობის გამო. საცობი დილითაც არის, საღამოს კი კიდევ უფრო დიდი.
ფიზიკურადაც ძალიან ვიღლები და ფინანსურადაც აისახება. დღეში მხოლოდ ბათუმში ჩასვლისა და უკან დაბრუნებისთვის მჭირდება 6 ლარი,“ – ამბობს ირმა.
ხელვაჩაურის გზაზე სარეაბილიტაციო სამუშაოების გამო საცობი დღეში რამდენჯერმე იქმნება. მოქალაქეები ჩივიან, რომ ხანდახან საცობში საათობით უწევთ ყოფნა. სიტუაცია განსაკუთრებით რთულია დილის საათებში, როცა ადამიანები სამსახურში მიდიან და საღამოს – როცა სახლში ბრუნდებიან.
საქართველოს საავტომობილო გზების დეპარტამენტის დაკვეთით, სარეაბილიტაციო სამუშაოებს ფრიდონ ხალვაშის გამზირზე ანგისიდან დაბა ხელვაჩაურამდე, 4- კილომეტრიან მონაკვეთზე, შპს „ერტედე“ ახორციელებს.
შესყიდვის ბიუჯეტი 19 მილიონი ლარია.
პარალელურად მიმდინარეობს სანიაღვრე არხების შეცვლისა და ორი ხიდის გაფართოების სამუშაოები. სახელშეკრულებო პირობების მიხედვით, სამუშაოები ავტომანქანების მოძრაობის პარალელურად უნდა განხორციელდეს.
სამუშაოების გარდა მოძრაობას გზაზე ორმოებიც აფერხებს.
______________________________
ამავე თემაზე:
უნივერსიტეტში დაბრუნება 8 წლის შემდეგ სტუდენტის აღდგენილი სტატუსით
