აჭარის მთავრობა კურორტ გოდერძიზე 10 ნაკვეთს, ჯამში 4651 კვ. მეტრს ყიდის. აუქციონის პირობების მიხედვით, შემსყიდველმა ათივე ნაკვეთზე კოტეჯის ტიპის სასტუმროს მშენებლობის ვალდებულება უნდა აიღოს.
გასაყიდი ათი ნაკვეთიდან ექვსი მრავალწლიანი ნაძვებითაა გაშენებული.
მონიშნულია გასაყიდი მიწის ნაკვეთები
გასაყიდი მიწის ნაკვეთი. ფოტო: აჭარის ფინანსთა და ეკონომიკის სამინისტრო
გამყიდველმა კარგად იცის, რომ მშენებელი აქ სასტუმროს მშენებლობას მრავალწლიანი ხეების შენარჩუნებით ვერ შეძლებს და დანაკლისის შესავსებად ერთგვარი პირობა აქვს ჩადებული.
აჭარის მთავრობა ითხოვს ამ ნაკვეთებზე აშენებული შენობების ექსპლუატაციაში გაშვებიდან ერთი წლის შემდეგ, თითო საკოტეჯე ადგილას ან მის მიმდებარედ არანაკლებ 10 ხის დარგვას, შესაბამის უწყებებთან შეთანხმებით. პირობებშივეა მითითებული, რომ ეს უწყება შეიძლება იყოს აჭარის გარემოს დაცვის სამმართველო, სატყეო სააგენტო ან ხულოს მუნიციპალიტეტის მერია.
გასაყიდი მიწის ნაკვეთი. ფოტო: აჭარის ფინანსთა და ეკონომიკის სამინისტრო
ახალი არაფერია იმაში, რომ აჭარაში ინვესტორების უმრავლესობა ხშირად ისეთ ვალდებულებებსაც კი ვერ ასრულებს, რომელთა შესრულება მათი პირდაპირი ინტერესია. ბევრი მათგანი ვალდებულებების შესრულების ვადების გაგრძელების მოთხოვნით, სხვადასხვა მიზეზით, მთავრობას არაერთხელ მიმართავს ხოლმე. ამ ყველაფრისა და იმ მასშტაბის გათვალისწინებით, რა მასშტაბითაც აჭარის მთავრობამ ბოლო წლებში კურორტ გოდერძიზე ნაკვეთები სამშენებლოდ გაყიდა, უცნობია, რამდენად მოხერხდება მომავალ წლებში ახალი ნარგავების გაშენება ისე, რომ დანაკლისი შეივსოს.
ნარგავებთან დაკავშირებული პირობა ასი პროცენტით რომც შესრულდეს, ეს საკითხი მაინც პრობლემად რჩება. გარემოსდაცვითი რისკების შეფასებისას დიდი რაოდენობით მრავალწლიანი ნარგავის ახალი ნერგით ჩანაცვლებას სპეციალისტები დადებითად არ აფასებენ და აცხადებენ, რომ ხეების მასობრივი გაჩეხა ბუნებას ისეთ ზიანს აყენებს, რომლის გამოსწორებასაც ათწლეულები დასჭირდება.
გასაყიდი ნაკვეთებიდან რამდენიმე ერთმანეთის მიყოლებით მდებარეობს. დოკუმენტების მიხედვით მთავრობას მათი გაერთიანება და ერთ ლოტად გაყიდვაც სურდა და კურორტების მართვის სააგენტოსგან თანხმობაც მიიღო. მიუხედავად ამისა, ნაკვეთები მაინც ცალ-ცალკე გამოიტანეს გასაყიდად.
აუქციონის პირობით, ნაკვეთების შემძენმა საპრივატიზებო საფასური სამ ეტაპად, 2024 წლის ივნისამდე უნდა გადაიხადოს. ერთი კვ. მეტრის საწყისი ფასი 300 ლარი, ან ოდნავ მეტია. აუქციონზე კონკურენციის პირობებში ეს ფასი შეიძლება გაიზარდოს. ამას ემატება ინვესტიციის განხორციელების ვალდებულებაც.
2023 წლის აპრილამდე კონკრეტული ნაკვეთის ან ნაკვეთების შემძენმა აჭარის ფინანსთა და ეკონომიკის სამინისტროს კურორტის ლანდშაფტის შესაბამისი საპროექტო ობიექტის ვიზუალური ესკიზი უნდა წარუდგინოს.
2023 წლის სექტემბერში შესყიდული მიწის ნაკვეთზე მფლობელმა კოტეჯის ტიპის სასტუმროს მშენებლობის ნებართვის მიღება, 2024 წლის დეკემბერში – მშენებლობის დასრულება, 2025 წლის დეკემბერში კი სასტუმროს ამოქმედება უნდა შეძლოს.
მყიდველმა ასევე უნდა აიღოს ვალდებულება, რომ სასტუმროს პროფილს არანაკლებ 20 წლის ვადით შეუნარჩუნებს.
დაგეგმილ პროექტებში ინვესტორებმა არანაკლებ 300 000 ლარის ინვესტიცია უნდა განახორციელოს.
აუქციონი 10 თებერვალს სრულდება.
______________
ფოტოზე: კურორტი გოდერძი. ფოტო: „ბათუმელები“/თამარ ნერგაძე
