„ქობულეთში ზღვის სანაპიროზე ვსეირნობთ. კარგი ამინდია, ხალხი ისვენებს. უცებ ჩემი 6 წლის ბიჭი ჩერდება და მეუბნება: დედა, იცი რა? რუსებთან ერთად აღარ ვითამაშებ აღარასდროს, ჩვენს ქვეყანას ბომბავენო.
გავოგნდი.
მე მასთან არასდროს ვახსენებ ეროვნების მიხედვით ადამიანებს. რაც ესმის, რასაც ტელევიზორში ხედავს, ალბათ ამ ინფორმაციაზე დაყრდნობით გადაწყვიტა ასე,“ – ამბობს ოლგა პეტრუჩაკი. ის სამ – 17, 13 და 6 წლის შვილთან ერთად ჩამოვიდა საქართველოში კიევიდან, უკრაინაში რუსეთის ფართომასშტაბიანი შეჭრის შემდეგ.
ოლგა შვილებთან ერთად ახლა ციხისძირში ცხოვრობს. სახლი მას ციხისძირში მცხოვრებმა ოჯახმა უსასყიდლოდ დაუთმო.
საქართველოს ხელისუფლებისგან სამშვილიანი დედა დახმარებას – 480 ლარს იღებს. „პროდუქტებისთვის ეს თანხა 20 დღე მყოფნის, მერე ჩემი ქმარი გვეხმარება, ის კიევში დარჩა – ჩვენი ხანდაზმული მშობლები მარტო არ დატოვა.
ბავშვებს ახლახან სტომატოლოგი დასჭირდათ. სამი კბილი აქვს სამკურნალო ერთ-ერთს, ორს ვუმკურნალებთ, ერთს დავტოვებთ. ასე ვზოგავთ ფულს. ვეღარ სწვდება ყველაფერს ჩვენი შესაძლებლობები.
ოლგა პეტრუჩაკის შვილები
სახლი უსასყიდლოდ დაგვითმეს, ეს დიდი შეღავათია ჩვენთვის. მაგრამ არ გვაქვს გამათბობელი. დიასახლისმა ზეთის რადიატორი გვათხოვა, ოთახებს ვერ ათბობს. თბილა ციხისძირში, მაგრამ თებერვლიდან საგრძნობლად აცივდება და მერე არ ვიცი, რას ვიზამთ. შეჩვეულები ვართ ცივ ზამთარს. -10, -15 გრადუსია ხოლმე ტემპერატურა ზამთრობით უკრაინაში,“ – ამბობს ოლგა პეტრუჩაკი.
მისი თქმით, აჭარაში მყოფი უკრაინელი დევნილები განსაკუთრებით რთულ მდგომარეობაში მაშინ აღმოჩნდებიან ხოლმე, როცა ვინმეს სამედიცინო დახმარება სჭირდება:
„ჩვენი ხარჯები მხოლოდ საკვებს და გადაადგილებას ხმარდება, დანარჩენი ფუფუნებაა. თითო ვიზიტი ექიმთან 50 ლარი ღირს, მათ შორის პედიატრთან. ხანდახან ვფიქრობ, ღმერთო, ნეტა, ექიმი არ დაგვჭირდეს აქ-მეთქი.
ბავშვები ძალიან სწრაფად იზრდებიან. თითქმის ერთი წლის წინ წამოვედით კიევიდან და შარშან რაც წამოვიღეთ თან, უკვე გამოუსადეგარია, აღარ ერგებათ,“ – ამბობს სამი შვილის დედა.
ოლგა იხსენებს, რომ ბავშვებს თავიდან ძლიერი სტრესი ჰქონდათ და ფეიერვერკების ხმა სასტიკად აშინებდათ. ომში მუდმივმა განგაშმა ბევრი სხვა ბავშვის მსგავსად ოლგას შვილებზეც იმოქმედა. ოჯახს ერთ-ერთმა არასამთავრობო ორგანიზაციამ ფსიქოსოციალური რეაბილიტაციის კურსზე ჩაწერა შესთავაზა, ჩაინიშნეს ბავშვების მონაცემებიც, მაგრამ მერე მათ აღარავინ დაჰკავშირებია:
„ალბათ ადგილი აღარ იყო კურსზე, ან რაღაც ვერ აეწყო, ომია… მარტო ჩვენ ხომ არ ვართ, ბევრს სჭირდება დახმარება…“ – ამბობს ოლგა.
ქალმა სამი შვილით მას შემდეგ დატოვა კიევი, რაც საჰაერო განგაში უკრაინის დედაქალაქში ყოველდღიურობად იქცა და ბავშვები რეალური საფრთხის წინაშე აღმოჩნდნენ. ოჯახი 2 კვირა იმალებოდა სარდაფში.
ბათუმში ოლგა აპრილის დასაწყისში ჩამოვიდა. თავიდან შვილებით აჭარის ტურიზმის დეპარტამენტის მიერ გამოყოფილ სასტუმროში დაბინავდა, რამდენიმე თვეში კი მათ საცხოვრებელი დაატოვებინეს, რის შემდეგაც სახლი ციხისძირში უკრაინელთა დახმარების ცენტრმა აპოვნინა ოლგას.
ოლგა პეტრუჩაკი
უშუქობის გამო ახლა უკრაინის სკოლებში იძულებულები არიან არდადეგები გამოაცხადონ.
„ისე კი, ჩემი შვილები ონლაინგაკვეთილებს ესწრებიან, მასწავლებლები კიევიდან ერთვებიან-ხოლმე.
როცა გაკვეთილები ტარდებოდა, ხშირად ირთვებოდა განგაში და ბავშვები მასწავლებელთან ერთად სარდაფში გარბოდნენ. ეს მძიმე სანახავი იყო. წყდებოდა კავშირი.
ახლობლები გვეუბნებიან, რომ ახლა უკრაინაში მხოლოდ ის საბავშვო ბაღები მუშაობს, რომლებსაც თავშესაფარი აქვთ.
ჩემი შვილი ვერ მიმყავს ბაღში. საჯარო ბაღებში ადგილი არ არის.
17 წლის ბიჭი კიევის მუსიკალურ აკადემიაში სწავლობს. მისი მთავარი ინსტრუმენტი ელექტროგიტარაა. აუცილებლად გვჭირდება ფორტეპიანოც, მაგრამ არ გვაქვს. კვირაში სულ მცირე ერთი საათით მაინც უნდა დაუკრას, რომ პროგრამას არ ჩამორჩეს. ბათუმის დაახლოებით ხუთ მუსიკალურ სკოლაში ვიყავით და უარი გვითხრეს, ვერ დაგითმობთ ინსტრუმენტს, ამის უფლება არ გვაქვსო,“ – გვიყვება ოლგა.
გაეროს მონაცემებით, მას შემდეგ, რაც რუსეთი თავს დაესხა უკრაინას და ფართომასშტაბიანი ომი დაიწყო, ქვეყანა მილიონობით ადამიანმა დატოვა.
