ბათუმში უნებართვო შენობების დემონტაჟისთვის 100 ათასი ლარია გამოყოფილი

ბათუმის ბიუჯეტიდან „უნებართვო და უსახური შენობა-ნაგებობების დემონტაჟისთვის“ 2023 წელს 100 ათასი ლარია გამოყოფილი.

მომსახურების შესყიდვაზე ელექტრონული ტენდერი მერიის მუნიციპალურმა ინსპექციამ გამოაცხადა.

პირობის მიხედვით, ქალაქის ტერიტორიაზე უნებართვო და უსახური შენობა-ნაგებობების დემონტაჟი ეტაპობრივად განხორციელდება – ტენდერში გამარჯვებულთან ხელშეკრულების გაფორმებიდან, 2023 წლის 31 დეკემბრის ჩათვლით პერიოდში.

ტენდერში წინადადებების მიღება 2023 წლის 10 თებერვალს დაიწყება და 13 თებერვალს დასრულდება.

პირობის მიხედვით, პრეტენდენტს უნდა გააჩნდეს შემდეგი მინიმალური მატერიალურ-ტექნიკური ბაზა:

მოთხოვნა პრეტენდენტის მიმართ / წყარო: ტენდერი

სამუშაოების ჩამონათვალი: დროებითი შემოღობვის მოწყობა; ბეტონის კონსტრუქციებისა და ნაკეთობების დემონტაჟი; ხის კონსტრუქციებისა და ნაკეთობების დემონტაჟი; ლითონის კონსტრუქციებისა და ნაკეთობების დემონტაჟი; სარეკლამო და საინფორმაციო ბანერების დემონტაჟი; სამშენებლო ნარჩენების ტრანსპორტირება [30 კმ-მდე მანძილზე].

მიმწოდებელს წერილობით გადაეცემა სამშენებლო ობიექტის კონკრეტული მისამართი.

ტენდერის პირობების მიხედვით:

• „ყველა სამუშაო უნდა შესრულდეს იმ ადგილობრივი და სახელმწიფო კანონების, კოდექსების, მოთხოვნებისა და დადგენილებების შესაბამისად, რომლებიც ეხება ადამიანთა უსაფრთხოებას, ჯანმრთელობის დაცვასა და კეთილდღეობას.
• შემსრულებელმა უნდა უზრუნველყოს სამუშაოთა უსაფრთხოებისათვის საჭირო ყველა წესისა და ინსტრუქციის შესრულება, რათა შეძლებისდაგვარად აიცილოს უბედური შემთხვევები და მინიმუმამდე დაიყვანოს თავისი მუშაკების და სხვა ადამიანთა ზარალი…
• მიმწოდებელი ვალდებულია სამუშაოები დაიწყოს წერილობითი დავალებით განსაზღვრული სამუშაოების დაწყების ვადაში.
• მიმწოდებელმა სადემონტაჟო სამუშაოები უნდა განახორციელოს ისეთი ტექნოლოგიით, რომ საჭიროებისამებრ, შემსყიდველის მოთხოვნის საფუძველზე, შესაძლებელი იყოს დემონტირებული მასალების სამომავლოდ მეორადად გამოყენება.
• მიმწოდებელი ვალდებულია შემსყიდველის მიერ წერილობითი დავალების შემთხვევაში სამუშაოებს აწარმოებდეს ერთდროულად არანაკლებ 2 მისამართზე.
• საჭიროების შემთხვევაში მიმწოდებელი ვალდებულია სამუშაოები აწარმოოს 24 საათიან რეჟიმში.“

—

ბათუმის მუნიციპალური ინსპექციის ინფორმაციით, 2022 წელს:

• „სახელმწიფო მიწის ნაკვეთზე უკანონოდ შემოკავებული ღობის დემონტაჟი განხორციელდა 77 ობიექტზე;
• უნებართვოდ განთავსებული სარეკლამო ბანერისა და კონსტრუქციის დემონტაჟი – 238;
• ნარჩენების დატოვების ფაქტზე გააფრთხილეს 23 ობიექტი;
• ტროტუარზე მაგიდა-სკამებისა და კონსტრუქციების განთავსების ფაქტზე გააფრთხილეს 60-მდე კვების ობიექტი. ნაწილმა დარღევა გამოასწორა, 12 ობიექტი კი სამართალდარღვევის აღმოუფხვრელობის ფაქტზე დაჯარიმდა;
• განხორციელდა „პიერ ბათუმის“ უნებართვო კონსტრუქციების დემონტაჟი ბათუმის ბულვარში.“

ინსპექციის ინფორმაციითვე, გასულ წელს „გონიოს სანაპიროზე უნებართვო 11 კაფე-ბარის დემონტაჟი განხორციელდა, 14 ჯიხური კი, ტერიტორიიდან გაიტანეს. ჯამში 40-მდე ობიექტის დემონტაჟი იგეგმება“.

გონიო-კვარიათის პლაჟების უკანონო შენობებისგან გათავისუფლების პროცესის დაწყების შესახებ ბათუმის მუნიციპალურმა ინსპექციამ ინფორმაცია 2022 წლის 30 ნოემბერს გამოაქვეყნა. ამავე დღეს ინსპექციამ პროცესი ადგილზე საკუთარი ძალებით დაიწყო; შენობებს მესაკუთრეები თავადაც ანგრევდნენ, თუმცა არა ყველა.

ამ თემაზე ვრცლად:

გონიოს პლაჟზე კაფე-ბარებს ანგრევენ – რას ამბობენ მესაკუთრეები

მთავარი ფოტო: ჯიხურის გატანა გონიოს პლაჟიდან / ბათუმის მუნიციპალური ინსპექციის ფოტო