Batumelebi

გიდები ვალდებული არიან დარეგისტრირდნენ ტურიზმის ეროვნული ადმინისტრაციის ბაზაში. კანონში „ტურიზმის შესახებ“ ცვლილებები შევიდა, რაც პარლამენტმა 28 მაისს მიიღო და პრეზიდენტისგან უკვე ხელმოწერილია.

„ტურისტული საქმიანობის სუბიექტები − ტურისტული გიდი, ტუროპერატორი, ტურისტული სააგენტო [ტურაგენტი] − ვალდებული არიან ტურისტული საქმიანობის შესახებ მონაცემების აღრიცხვის უზრუნველსაყოფად დარეგისტრირდნენ საჯარო სამართლის იურიდიული პირის − საქართველოს ტურიზმის ეროვნული ადმინისტრაციის ტურისტული საქმიანობის სუბიექტების ბაზაში…

ტურისტული საქმიანობის სუბიექტი ვალდებულია შესაბამისი საქმიანობის დაწყების ან შეწყვეტის ან/და ამ საქმიანობასთან დაკავშირებული ნებისმიერი მონაცემის ცვლილების შემთხვევაში წერილობით მიაწოდოს საჯარო სამართლის იურიდიულ პირს − საქართველოს ტურიზმის ეროვნულ ადმინისტრაციას სათანადო ინფორმაცია.“ – აღნიშნულია კანონში.

• კანონში „ტურიზმის შესახებ“ ცვლილებები შევიდა ასევე რისკის შემცველ ტურისტულ მომსახურეობებზეც:

„საქართველოს მთავრობა დადგენილებით ადგენს საქართველოს ტერიტორიაზე რისკის შემცველი ტურისტული მომსახურებების ნუსხას და მათი განხორციელების წესს, აგრეთვე განსაზღვრავს რისკის შემცველ ტურისტულ მომსახურებებს, რომელთა მიმწოდებლებს ევალებათ, ჰქონდეთ პროფესიული პასუხისმგებლობის ან/და სამოქალაქო პასუხისმგებლობის სადაზღვევო მოწმობა [პოლისი], ასევე ადგენს დაზღვევის პირობებს და მისი განხორციელების წესს.

საქართველოს მთავრობის დადგენილებით განისაზღვრება რისკის შემცველი ტურისტული მომსახურებები, რომელთა განმახორციელებელ პირთა [პერსონალის] სერტიფიცირებას უზრუნველყოფს საჯარო სამართლის იურიდიული პირი − საქართველოს ტურიზმის ეროვნული ადმინისტრაცია. საქართველოს მთავრობის დადგენილებით ასევე განისაზღვრება რისკის შემცველი ტურისტული მომსახურებები, რომელთა მიმწოდებლებს მათი განხორციელების უფლებას მიანიჭებს საჯარო სამართლის იურიდიული პირი − საქართველოს ტურიზმის ეროვნული ადმინისტრაცია ან საქართველოს მთავრობის დადგენილებით გათვალისწინებული შესაბამისი სუბიექტი.

საჯარო სამართლის იურიდიული პირი − საქართველოს ტურიზმის ეროვნული ადმინისტრაცია აწარმოებს რისკის შემცველი ტურისტული მომსახურების მიმწოდებელთა რეესტრს,“- აღნიშნულია კანონში.

ამავე კანონის მიხედვით, რისკის შემცველის ტურისტული მომსახურების გაწევა შესაბამისი სერთიფიკატის გარეშე დაჯარიმდება 3 ათასი ლარით.

 

ბათუმის სახელმწიფო უნივერსიტეტის პროფესორს – ი.მ.-ს სტუდენტების ელექტრონულ სისტემაში უკანონოდ შეღწევასა და სხვა ლექტორების დისკრედიტაციაში ადანაშაულებენ.

ამბავი ბსუ-ში 2024 წელს მოხდა: რამდენიმე პროფესორის შეფასების პლატფორმაზე სტუდენტების სახელით დაწერილი ნეგატიური და შეურაცხმყოფელი კომენტარები ერთდროულად გაჩნდა. მოგვიანებით გაირკვა, რომ კომენტარები სტუდენტებს კი არ დაუწერიათ, არამედ პროფესორმა ი.მ.-მ დაუწერა კოლეგებს და სტუდენტების სახელი გამოიყენა.

ბსუ-ში სტუდენტების ელექტრონულ სისტემაში უკანონო შეღწევის ფაქტზე შსს-მ გამოძიება დაიწყო სისხლის სამართლის კოდექსის 284-ე მუხლის საფუძველზე. ეს ინფორმაცია დაგვიდასტურეს უნივერსიტეტის ადმინისტრაციაში, თუმცა ამ ეტაპზე პასუხი არავის უგია.

უნივერსიტეტში მომხდარი სავარაუდო დანაშაულის შესახებ ბსუ-ს რექტორის მოვალეობის შემსრულებელს, მერაბ ხალვაშს [ის დღეს აღარ წარმოადგენს ადმინისტრაციას, პროფესორია] ინფორმაცია 2024 წლის თებერვალში ჰქონდა, თუმცა მან პროკურატურას 10-თვიანი პაუზის შემდეგ – 2024 წლის დეკემბერში მიმართა. 2024 წლის ნოემბერში კი, პროფესორ ი. მ.-ს მერაბ ხალვაშისთვის მიუწერია წერილი, რომ მას დევნიან პოლიტიკური შეხედულებების გამო და ის „მოქმედი ხელისუფლების აქტიური მხარდამჭერია“.

ახლა უკვე ბსუ-ს რექტორი ტიტე აროშიძეა – უმაღლესი საბჭოს ყოფილი დეპუტატი „ქართული ოცნებიდან“. უნივერსიტეტის ადმინისტრაციაში „ბათუმელებს“ 2026 წლის 6 მაისს უთხრეს, რომ გამოძიების შედეგს ელოდებიან, რომელიც უკვე 2 წელია გრძელდება. უნივერსიტეტის პრესცენტრში ასევე განმარტეს, რომ წესდების მიხედვით, პროფესორს სამსახურიდან ვერ გაუშვებენ საგამოძიებო ორგანოს შესაბამისი დასკვნის გარეშე.

• რა მოხდა? 

ეს ამბავი 2024 წლის 19 იანვარს იწყება – ნათლისღების უქმე დღეს, ბსუ-ს პორტალზე პროფესორ ლაშა ბაჟუნაიშვილს, ასოცირებულ პროფესორს – ლაშა ხოზრევანიძეს და, ასევე, მოწვეულ სპეციალისტებს: გელა ირემაძის და ზეინაბ ასანიძეს სტუდენტებმა შეფასებები დაუწერეს. მაგალითად, ლაშა ბაჟუნაიშვილს დაუკომენტარეს: „ეს ლექციები არის თუ პოლიტიკური პროპაგანდა?“

„უკაცრავად და ლექტორმა თუ იცის ეს საგანი საერთოდ?“ [სტილი დაცულია] – ეს ზეინაბ ასანიძეს დაუწერეს. ლაშა ხოზრევანიძეს დაუკომენტარეს: „ასწავლეთ ამ კაცს ჯერ პოლიტიკა და მერე ჩვენ გვასწავლოს. ელემენტარულ ტერმინებში ვერ ერკვევა“, გელა ირემაძეს კი ასეთი შეფასება დაუწერეს: „ვერ გავიგე ვერაფერი“, „ირემაძემ იცის რამე, დემოგრაფიის აზრზე არაა“.

ლექტორებმა იეჭვეს, რომ ეს ორგანიზებული იყო, უნივერსიტეტის ადმინისტრაცია მიმართეს და დასვეს შეკითხვა: რამდენად არის ეს შეფასებები სტუდენტების მიერ გაკეთებული და ადგილი ხომ არ ჰქონდა ამ შეფასებების გაკეთების მიზნით სტუდენტების პორტალის ავტორიზაციის მონაცემების არამართლზომიერ გამოყენებას?

პროფესორი ლაშა ბაჟუნაიშვილი ამბობს, რომ უშუალოდ მაშინდელი რექტორისგან, მერაბ ხალვაშისგან გაიგეს, რომ შეურაცხმყოფელი კომენტარების ავტორი ამავე უნივერსიტეტის პროფესორი და მათი კოლეგა, ი. მ. იყო. მერაბ ხალვაშმა პროფესორები ი. მ.-ს შეახვედრა, სადაც ი. მ.-ს ბოდიში მოუხდია.

ეს შეხვედრა ბათუმის სახელმწიფო უნივერსიტეტში 2024 წლის 21 თებერვალს შედგა და „ბათუმელებს“ ამ შეხვედრის ამსახველი ტრანსკრიპტი მიაწოდეს, რომლის თანახმადაც შეხვედრაზე პროფესორებს კონკრეტული მოთხოვნები ჰქონდათ – ი. მ. უნდა გათავისუფლდეს ან სხვა დეპარტამენტში განაგრძოს საქმიანობა.

ტრანსკრიპტის თანახმად, საჯარო მმართველობის დეპარტამენტის პროფესორი ი. მ. შეხვედრის დასაწყისში ამბობს:

„…მე ვითხოვ პატიებას მომხდარი ფაქტის გამო, ძალიან ვწუხვართ. პირველ რიგში თქვენთან, როგორც რექტორთან და თქვენი სახით უნივერსიტეტის წინაშე ვიხდი ბოდიშს და ასევე მინდა განსაკუთრებული ბოდიში მოვუხადო ჩემს კოლეგებს ამ ფაქტის გამო, ძალიან ვწუხვართ, არ უნდა მომხდარიყო ვაღიარებ, ვაცნობიერებ და ჩემი მხრიდან გამოვხატავ მზაობას, რა ვიცი, სამომავლო თანამშრომლობისთვის, კოლეგიალური თანამშრომლობისთვის“.

ამ შეხვედრის ამსახველ ტრანსკრიპტში, სადაც ი. მ.-ს ეს სიტყვებია დაფიქსირებული, არ ჩანს, როგორ დადასტურდა მისი კავშირი ელ. სისტემაში შეღწევასთან; ვინ გამოარკვია, რომ სტუდენტების პლატფორმაზე ლექტორების მისამართით კონკრეტული კომენტარები ი. მ.-მ დაწერა? ასევე, არ ირკვევა, რა იყო მისი მოტივაცია.

ეს შეხვედრა რომ რეალურად შედგა, ამას ადასტურებს პროფესორი ლაშა ბაჟუნაიშვილიც.

ჩვენ ამ შეხვედრის დეტალებზე გვინდოდა პროფესორ ი. მ.-სთვისაც გვეკითხა, თუმცა მან „ბათუმელების“ შეკითხვებს არ უპასუხა.

საქმეში ი.მ. რომ არის მთავარი ფიგურანტი, ამას უნივერსიტეტში დაწყებული დისციპლინური საქმისწარმოების მასალებიც ცხადყოფს – საინტერესოა ისიც, რომ საქმისწარმოება უნივერსიტეტში 2024 წლის ნოემბერში დაიწყო, მაშინ, როცა ი. მ.-მ მომხდარის გამო ბოდიში მოიხადა 2024 წლის თებერვალში.

• რა ჩანს დოკუმენტებით? 

ამ საქმეშია იურიდიული ფაკულტეტის ხარისხის უზრუნველყოფის სამსახურის უფროსის ბსუ-ს რექტორისთვის მიწერილი წერილი. 2024 წლის თებერვლის შეხვედრის შემდეგ – როცა მაშინდელი რექტორი მერაბ ხალვაში ი. მ.-ს და 4 ლექტორს შეხვდა, ბსუ-ს ხარისხის სამსახურს უცდია იმის გარკვევა, ვინ დაუწერა შეურაცხმყოფელი კომენტარები კონკრეტულ ლექტორებს.

„ასოცირებულ პროფესორ ლაშა ბაჟუნაიშვილის მიერ განხორციელებული სასწავლო კურსის ცივი ომი – ბიპოლარული მსოფლიო შეფასებაში მონაწილეობა მიიღო 44-დან 12 სტუდენტმა… საგულისხმოა, რომ სტუდენტებმა ცალსახად აღნიშნეს პედაგოგის მაღალი აკადემიურობა და მასწავლებლით, ასევე, საგნის შინაარსით კმაყოფილება. რაც შეეხება ასოცირებულ პროფესორს, ლაშა ბაჟუნაიშვილს, მას ზეპირი ფორმით ეცნობა დამატებითი ინტერვიუს შედეგი, რამაც გამოკითხვის სანდოობა [პორტალზე დაწერილი უარყოფითი შეფასებები – რედაქციის განმარტება] მისთვის კიდევ უფრო საეჭვო გახადა,“ – წერდა 2024 წლის მარტში ხარისხის უზრუნველყოფის სამსახურის უფროსი ირაკლი გორგილაძე რექტორს.

საკითხმა სასწავლო პროცესის დეპარტამენტში გადაინაცვლა – აქ გამოკითხვაში მონაწილე სტუდენტების IP მისამართებით დაინტერესდნენ, სადაც შეუსაბამობები იპოვეს. აღმოჩნდა, რომ ერთი და იმავე IP მისამართი ფიქსირდება ოთხივე [გამოკითხვის თარიღისთვის 4 სტუდენტი, ჯამში კი 13 სტუდენტი] სტუდენტის ავტორიზაციის ლოგში, უფრო მეტიც, გამოკითხვაში კომენტარის დაფიქსირების თარიღი და ზემოხსენებული სტუდენტების ავტორიზაციის თარიღი ემთხვევა ერთმანეთს [ცდომილება 1-6 წუთი]…“ – წერს წერილში უნივერსიტეტის სასწავლო პროცესის დეპარტამენტის უფროსი, ამირან შარაძე.

ამავე წერილში ხაზგასმულია, რომ უნდა დადგინდეს, ვის მიერ მოხდა „სხვისი პერსონალური მონაცემების გამოყენებით სტუდენტურ პორტალში არამართლზომიერი შეღწევა“.

მერაბ ხალვაში, ბსუ-ს მაშინდელი რექტორი, პროფესორებს 2024 წლის 25 ივნისის წერილში უდასტურებს, რომ 2024 წლის 10 იანვრიდან 22 იანვრამდე პერიოდში ადგილი ჰქონდა „ბსუ-ს სტუდენტთა – სულ 4 სტუდენტი – პერსონალური მონაცემების უნებართვო და არამართლზომიერ გამოყენებას“.

„უნივერსიტეტმა მიიჩნია, რომ ზემოაღნიშნული ინციდენტის შედეგად დაირღვა კონფიდენციალურობა [ინციდენტის სახე], რაც ,,პერსონალურ მონაცემთა დაცვის შესახებ“ საქართველოს კანონის თანახმად, გულისხმობს: ა) ელექტრონული ფორმით არსებულ მონაცემებზე უნებართვო წვდომას; ბ) ონლაინ პორტალზე არსებულ მომხმარებლის ანგარიშზე უნებართვო წვდომა/მასში არსებული მონაცემების უკანონო გამჟღავნებას,“ – აღნიშნულია უნივერსიტეტის რექტორის წერილში.

2024 წლის 30 სექტემბერს ბსუ-ს მაშინდელ რექტორს, მერაბ ხალვაშს პერსონალურ მონაცემთა დაცვის სამსახურის პასუხი მიუღია, IP მისამართის მფლობელის ვინაობის დადგენა სცილდება სამსახურის კომპეტენციასო.

უნივერსიტეტმა დისციპლინური საქმის წარმოება 2024 წლის 28 ნოემბერს დაიწყო, 29 ნოემბერს კი ი.მ.-მ მერაბ ხალვაშს წერილი მისწერა, სადაც აღნიშნულია: „ვარ მოქმედი ხელისუფლების აქტიური მხარდამჭერი“.

• რა გაარკვია დისციპლინურმა კომისიამ?

„ცხადია, რომ მნიშვნელოვანია დისციპლინური კომისიისათვის პროფესორ ი. მ.-ს განმარტების, მოსაზრების, დასაბუთების წარმოდგენა, ბსუ-ს პორტალზე 19.01.2024 წ. ინციდენტთან დაკავშირებით, ვინაიდან თქვენი [ბსუ-ს ოთხი დასაქმებულის] განმარტებით – არაეთიკური შეფასებების, სტუდენტთა პერსონალური მონაცემების გამოყენებით, სტუდენტთა სახელით განმახორციელებელ პირად დასახელდა.

ერთობლივი შეხვედრის ყველა მონაწილემ დაადასტურა პროფესორ ი.მ.-ს მიერ თქვენს წინაშე ბოდიშის მოხდის ფაქტი.

…პროფესორ ი. მ.-ს კომისიამ წერილით განუმარტა, რომ მნიშვნელოვანია მისგან განმარტების მიღება [ახსნის საჭიროება] იმ ფაქტთან დაკავშირებით, რომ იმავე IP მისამართით, რომლითაც სტუდენტების უარყოფითი შეფასებებია დაფიქსირებული 2024 წლის 19 იანვარს, ფიქსირდება მისი მომხმარებლის [როგორც ბსუ-ს თანამშრომლის] აქტივობა ბსუ-ს პორტალზე.

მივმართეთ რა ამ კითხვაზე განმარტების მიღების თხოვნით, კიდევ ერთხელ შევთავაზეთ გამოცხადდეს მიმდინარე წლის 26 დეკემბერს გასამართ დისციპლინური კომისიის სხდომაზე 15:00 საათზე, ასევე, ვაცნობებთ, რომ 26 დეკემბერს, დისციპლინური კომისია გეგმავს დაასრულოს მუშაობა და დასკვნა წარუდგინოს ბსუ-ს რექტორს,“ – აღნიშნულია დისციპლინური კომისიის წერილში.

2024 წლის 27 დეკემბერს ბსუ-ს რექტორის მოვალეობის შემსრულებელმა, მერაბ ხალვაშმა, პროფესორ ი. მ.-ს საყვედური გამოუცხადა. ამავე ბრძანებაში აღნიშნულია, რომ შესაძლოა უფრო მკაცრი დისციპლინური სახდელი დაუწესდეს პროფესორს, თუ მის ბრალეულობას პროკურატურა დაადასტურებს.

პროფესორ ი. მ.-ს საყვედური სასამართლოში გაუსაჩივრებია, თუმცა არც სასამართლო დავა დასრულებულა ამ ადმინისტრაციულ საქმეზე.

კანონის თანახმად, კომპიუტერულ სისტემაში უკანონო შეღწევა [სსკ-ის 284-ე მუხლი] ისჯება ჯარიმით ან გამასწორებელი სამუშაოთი ვადით ორ წლამდე ანდა თავისუფლების აღკვეთით იმავე ვადით.

ბათუმის მუნიციპალურმა ინსპექციამ საცხოვრებელი კორპუსის I სართულის სივრცეში სამსახურის ოფისის მოსაწყობად 949 ათას 865 ლარით ტენდერი გამოაცხადა.

პირობის მიხედვით, სამუშაოები უნდა განხორციელდეს იმ საპროექტო დოკუმენტაციის შესაბამისად, რომელიც თან ახლავს ტენდერს და რომელშიც მუნიციპალურ ინსპექციას 16 ათას 250 ლარი აქვს ცალკე გადახდილი.

სამუშაოს შესრულების ვადაა ხელშეკრულების დადებიდან 2026 წლის 15 დეკემბრის ჩათვლით პერიოდი.

ტენდერში წინადადებების მიღება 2026 წლის 14 ივნისს დაიწყება და ხუთ დღეში, 19 ივნისს დასრულდება.

კორპუსი, სადაც მერიის მუნიციპალური ინსპექცია ოფისს იწყობს, ბათუმში სელიმ ხიმშიაშვილის ქუჩა N94/96-ში მდებარეობს.

სელიმ ხიმშიაშვილის N94 – 96-ში ავარიული სახლების დემონტაჟისა და ახალი 8-სართულიანი კორპუსის მშენებლობისთვის ბათუმის მერიას ქალაქის ბიუჯეტიდან 21 მილიონ 550 ათას 123 ლარი ჰქონდა გათვალისწინებული. კორპუსის მშენებლობა დღესაც გრძელდება, შესაბამისად ოჯახები, რომლებიც აქ ავარიულ სახლებში ცხოვრობდნენ, ჯერ არ შეუსახლებიათ.

ოფისის მოსაწყობად საპროექტო დოკუმენტაციის შედგენაზე მუნიციპალურ ინსპექციას ტენდერი 25 ათასი ლარით ჰქონდა გამოცხადებული. 16 250 ლარი კი ტენდერში გამარჯვებულ შპს „აკეთი 2017“-ს გადაუხადეს.

ამ თემაზე ვრცლად: ბათუმის მუნიციპალური ინსპექცია ახალ ოფისს მოიწყობს 40-მდე ოთახით

მუნიციპალური ინსპექცია ახალი, მე-III კლასის მსუბუქი ჰიბრიდული ავტომობილების შეძენასაც გეგმავს. ეს ტენდერი კი ინსპექციას 223 ათას 200 ლარით აქვს გამოცხადებული.

ამ თემაზე 

„ოცნებამ“ 175 მილიონი ლარის ავტომანქანები იყიდა – წელს 36 მილიონზე მეტს დახარჯავს

See more

 

 

რუსეთის სამთავრობო წრეებში განიხილეს რუსეთის ფედერაციაში მცხოვრები 100 000-მდე სომხის ტრანსპორტირების შესაძლებლობა სომხეთის საპარლამენტო არჩევნებში მონაწილეობის მისაღებად. მათი მობილიზაციის მიზანია მოქმედი პრემიერ-მინისტრის, ნიკოლ ფაშინიანის წინააღმდეგ ხმის მიცემა.

ამის შესახებ სომხური მედია ინფორმაციას Reuters-ზე დაყრდნობით ავრცელებს. თვის მხრივ ეს ინფორმაცია ეფუძნება ხუთ დასავლელ დაზვერვის ოფიცერთან ინტერვიუებსა და დოკუმენტებს.

ხუთი წყაროს ცნობით, რუსი ოფიციალური პირები ბოლო თვეების განმავლობაში განიხილავდნენ რუსეთში მცხოვრები სომხების ფაშინიანის ოპონენტისთვის ხმის მისაცემად გაგზავნას სომხეთში.

სამი დასავლელი ჩინოვნიკის თქმით, მოსკოვის ფავორიტი კანდიდატია სამველ კარაპეტიანი – მილიარდერი, რომლის წინააღმდეგაც მიმდინარეობს  გამოძიება. კარაპეტიანს ბრალად ედება მთავრობის დამხობისკენ მოწოდება.

სომხეთში არჩევნების წინა პერიოდში რუსეთის მოცულია პრორუსი კანდიდატების სასარგებლოდ დეზინფორმაციულ კამპანიებით. პარალელურად დამუშავდა რუსეთში მცხოვრები ათიათასობით სომხის ტრანსპორტირების სქემას არჩევნებზე გავლენის მოხდენის მიზნით.

დაზვერვის ოფიცრების თანახმად, კრემლმა ჯერ კიდევ ოქტომბერში შექმნა დანაყოფი სახელწოდებით – „სტრატეგიული თანამშრომლობისა და პარტნიორობის დეპარტამენტი“. ოთხი წყაროს ცნობით, სწორედ ეს დეპარტამენტი უწევს ზედამხედველობას სომხეთში გავლენის ოპერაციას.

სომხეთში საპარლამენტო არჩევნები 7 ივნისს იმართება. რუსეთი ღიად ესხმის თავს სომხეთი პრემიერის, ნიკოლ ფაშინიანის გუნდის პროევროპულ მისწრაფებებს. ემუქრება, როგორც რუსეთის ბაზრის წვდომის შეზღუდვით, ისე შეფარული სამხედრო აგრესიით.

არასრულწლოვანი შშმ გოგონას დედა, ნინო კალანდია ამბობს, რომ შვილის საპენსიო ანგარიში დაუყადაღა.

ნინო კალანდიას, „ლიბერთი ბანკში“ დაყადაღებული აქვს მისი პირადი ანგარიშებიც, რადგან გასულ წელს ე.წ „გზის გადაკეტვის“ გამო 5000 ლარით არის დაჯარიმებული.

„დღეს დააყადაღეს ჩემი შშმ შვილის საპენსიო ანგარიში, რომელიც ჩემ სახელზეა, რადგან ჩემი შვილი არის არასრულწლოვანი. მათ არ აქვთ იმის უფლება, რომ შშმ ადამიანის საპენსიო ანგარიში დააყადაღონ, მაგრამ მაინც დააყადაღეს.

ბანკში მივედი ცნობა, რომ ამეღო დაყადაღებული ანგარიშის შესახებ, მითხრეს, რომ 20 ლარი ღირს ამ ცნობის გაცემა. ანუ, შშმ პირებს ცნობაში სთხოვს ბანკი 20 ლარს“- ამბობს ნინო კალანდია ვიდეოში, რომელიც დღეს, 29 მაისს გაავრცელა ფეისბუქზე.

ნინო კალანდია „ბათუმელებთან“ ამბობს, რომ აპირებს გაასაჩივროს ბავშვის საპენსიო ანგარიშის დაყადაღება.

„ბავშვებს, რომელთა სიცოცხლე საფრთხეშია წამალს არ აძლევენ და არც ის მიკვირს, რომ ჩემი შშმ შვილის ანგარიში დააყადაღეთ, მაგრამ როგორ ბედავთ და ამბობთ, რომ ამ ქვეყანაში ყველაფერი კარგად არის, რომ თქვენ ამ ქვეყნის მოქალაქეებზე ზრუნავთ და ეკონომიკური მაჩვენებლით ევროპაში პირველ ადგილზე ვართ? ამის თქმას როგორც ბედავთ საერთოდ“- მიმართავს ის „ოცნების“ ხელისუფლებას.

_____________

მთავარ ფოტოზე: ნინო კალანდია შვილთან ერთად/facebook

შსს-ს ინფორმაციით, დააკავეს პირი, რომელმაც სწრაფი ჩარიცხვის აპარატებით 7 000 ლარის ყალბი კუპიურა ჩარიცხა.

„გამოძიებით დადგინდა, რომ  ბრალდებულმა, სხვადასხვა დროს, რუსთავში, დიდი ოდენობით მატერიალური სარგებლის მიღების მიზნით, სწრაფი ჩარიცხვის აპარატებში, ფულადი თანხის ნაცვლად ყალბი კუპიურები  მოათავსა, რის შედეგადაც კომპანიას 7 000 ლარზე მეტი ქონებრივი ზარალი მიადგა.

სამართალდამცველებმა ჩატარებული საგამოძიებო მოქმედებების, მათ შორის ბრალდებულის პირადი ჩხრეკის შედეგად, ყალბი კუპიურები ნივთმტკიცებად ამოიღეს“.

ამავე წყაროს ცნობით, გამოძიება სისხლის სამართლის 180-ე მუხლით მიმდინარეობს, რაც 7 წლამდე თავისუფლების აღკვეთას ითვალისწინებს.

სურსათის ეროვნული სააგენტოს ცნობით, ცნობილია ქუთაისში მდებარე კვების საწარმოდან აღებული საკვების ნიმუშების ლაბორატორიული ანალიზის შედეგები, რომელიც ადასტურებს, რომ საკვები არ შეესაბამება დადგენილ მოთხოვნებს.

სააგენტოს ცნობით, უწყებამ 36 ადამიანის საკვებისმიერი ინტოქსიკაციის შესახებ შესახებ მიიღო ინფორმაცია და სწორედ ამის საფუძველზე განხორციელდა არაგეგმური კონტროლი შპს „ფუდ გალერი საქართველოში“, რომელიც ქუთაისში მდებარეობს.

სააგენტოს ცნობით, მოქალაქეებმა მიწოდების სერვისით შეიძინეს ე. წ. დიეტური კვების მენიუ, კერძოდ, შპს „ფუდ გალერის“ მიერ მომზადებული: ბრინჯი ქათმით, ომლეტი, ბოსტნეულის კოქტეილი ქათმით და ტირამისუ.

„დადგინდა, რომ უზბეკური ფლოვი, ომლეტი სოკოთი, ბოსტნეულის კოქტეილი, ტირამისუ და ქათმის ფილე (ნედლი) არ შეესაბამება დადგენილ მოთხოვნებს, კერძოდ, აერობული მიკროორგანიზმების გადაჭარბებული ოდენობა აღმოჩნდა უზბეკური ფლოვის, ომლეტის (სოკოთი), ბოსტნეულის კოქტეილისა და ტირამისუს ნიმუშებში; გარდა ამისა, გამოვლინდა ოქროსფერი სტაფილოკოკი და კოლიფორმული ბაქტერიები“ – იუწყება სურსათის ეროვნული სააგენტო დღეს, 29 მაისს.

სააგენტოს ცნობით, საწარმოში გამოვლინდა კრიტიკული შეუსაბამობები, რის გამოც ბიზნესოპერატორს შეუჩერდა საწარმოო პროცესი და დაჯარიმდა კანონმდებლობის შესაბამისად. ამავე დროს, საწარმოს დაევალა სამუშაო ზედაპირების, მოწყობილობების, აღჭურვილობების რეცხვა-დეზინფექცია და ნიმუშების აღება; პერსონალის ჯანმრთელობის მდგომარეობის კონტროლი და ლაბორატორიული კვლევის ჩატარება.

„S.aureus (ოქროსფერი სტაფილოკოკი) პირობით-პათოგენური მიკროორგანიზმია, რომლის მატარებელია ჯანმრთელი ადამიანების 20-25%, ასევე გვხვდება ცხოველთა კანსა და ლორწოვანზე. ჩვეულებრივ პირობებში მიკრობი არ იწვევს დაავადებას, მაგრამ დაბინძურებული სურსათის ოთახის ტემპერატურაზე დაყოვნებისას მიკრობი მრავლდება, გამოიმუშავებს ტოქსინს (ენტეროტოქსინი) და იწვევს სურსათისმიერ დაავადებას (გასტროენტერიტი ან ნაწლავის ლორწოვანის ანთება).

მიკრობის გამრავლებასა და ტოქსინის გამომუშავებაზე ზეგავლენას ახდენს:

სურსათის არასათანადო თერმული დამუშავება; ჯვარედინი დაბინძურება (სურსათის დამუშავების პროცესებს შორის არასათანადო რეცხვა/დეზინფექციის ჩატარება, მაგ: ახალი ხორცის დამუშავების შემდგომ იგივე დასაჭრელი დაფის გამოყენება სხვა სახის სურსათის დასამუშავებლად); სურსათის არაერთგვაროვნების პრინციპის დარღვევა (მაგ: კვერცხის და სალათის ერთ სივრცეში განთავსება); პერსონალის არასათანადო ჰიგიენის პრაქტიკა“ – წერს სააგენტო.

ახალგაზრდა აქტივისტები – თაკო სურმანიძე და ნონა მირზოევა ამბობენ, რომ ბსუ-ს პროფესორმა, ნანი გვარიშვილმა მათზე იძალადა. აქტივისტები დღეს, 28 მაისს, ბათუმის სახელმწიფო უნივერსიტეტთან პეტიციაზე ხელმოწერას აგროვებდნენ – „მიეცი წამალი ბავშვებს“.

თაკო სურმანიძის თქმით, ბსუ-თან განსაკუთრებული აქტივობა დაფიქსირდა და დაახლოებით 40 წუთში 300-მდე ხელმოწერა შეგროვდა. ამ დროს გამოვიდა უნივერსიტეტიდან პროფესორი, ნანი გვარიშვილი მეუღლესთან და კიდევ ერთ პირთან ერთად.

„ამ ქალმა თითის ქნევით დამიწყო ჭკუის სწავლება და ყვირილი, რომ არაფერი არ ვიცი, რძე არ შემშრობია და სახელმწიფომ ძალიან კარგად იცის, ვინ უნდა დააფინანსოს.

ამ აგრესიის გადაღება დაიწყო მობილური ტელეფონით ჩემმა მეგობარმა, ნონა მირზოევამ. ქალბატონი კიდევ უფრო გაღიზიანდა, როცა შენიშნა, რომ უღებდნენ და პირდაპირ ხელში სწვდა ნონას, მას ხელიდან დააგდებინა ტელეფონი… ამიტომაც შეწყდა ვიდეოს ჩაწერა.

ამის შემდეგ ხელზე რამდენჯერმე დაარტყა ამ პროფესორმა ნონას და თან ორივეს გვლანძღავდა,“ – უთხრა „ბათუმელებს“ თამარ სურმანიძემ.

ვიდეო, რომელიც აქტივისტებმა მოგვაწოდეს, მკაფიოდ ჩანს, როგორ აგდებინებს პროფესორი ნანი გვარიშვილი ახალგაზრდა აქტივისტს ხელიდან მობილურ ტელეფონს. ამ ინციდენტის შემდეგ პროფესორი უნივერსიტეტის დაცვის სამსახურს მიმართავს: „ვინ მისცა უფლება ენის გრძელების?“ მას აქტივისტები ეუბნებიან: „ხელით შეგვეხეთ“.

ნანი გვარიშვილი ბათუმის სახელმწიფო უნივერსიტეტის ასოცირებული პროფესორია. იგი ბიოლოგიის დარგობრივ დეპარტამენტში მუშაობს. „ბათუმელები“ დაუკავშირდა ნანი გვარიშვილს:

„გამოდის, რომ ძალიან ცუდად უყურეთ ვიდეოს… ნახეთ, როგორ იქცევიან ახალგაზრდები? მე მათ ხუთჯერ ვთხოვე, რომ არ გაქვთ უფლება გადაღების, ისინი მომმართავდნენ შენობით და თავხედობით, არაკომპეტენტურობა ლამაზი ნათქვამია კიდევ.

მე რომ მიღებ, არ უნდა მკითხო, გადამიღო თუ არა? თუ თქვენც ასე ფიქრობთ?“ – გვითხრა ნანი გვარიშვილმა. მან აქ სატელეფონო საუბრის შეწყვეტა ამჯობინა.

აქტივისტებმა უკვე მიმართეს შსს-ს.

დაიწყო თუ არა გამოძიება? – „ბათუმელები“ ამ კითხვით დაუკავშირდა შსს-ს პრესცენტრს.

პასუხის მიღების შემთხვევაში ინფორმაცია განახლდება.

 

თუთა ჯგუშია გარდაბნის მუნიციპალიტეტში, სოფელ მარტყოფთან ახლოს ცხოვრობს. ამ დასახლებას „მზიურის აგარაკებს“ ეძახიან. 25 მაისს თუთა ჯგუშიას კარ-მიდამოს მესამედი მოვარდნილმა წყალმა წაიღო.

როგორც თუთა ჯგუშია „ბათუმელებთან“ ამბობს, მდინარის კალაპოტი მისი საცხოვრებელი სახლიდან ხუთ მეტრშია უკვე და კიდევ ერთი წყალმოვარდნის შემთხვევაში, მისი სახლი, შესაძლოა, მდინარემ მთლიანად წაიღოს.

„აქ არის ლოჭინის შენაკადი, ნორიოს ხევი ჰქვია ამ მდინარეს, რომელიც საერთოდ არ ჩანს ხოლმე, მაგრამ გაზაფხულობით იცის უეცარი მოვარდნები.

ეს არ ყოფილა წყალმოვარდნის პირველი შემთხვევა, მაგრამ თუ წინა წლებში 7-8 წელში შეიძლება მომხდარიყო წყალდიდობა, ახლა, ეს პროცესი გახშირებულია, რადგან მოსახლეობამ გაჩეხა ხეები მდინარის ნაპირებთან, ქვა-ღორღიც ამოიღეს სამშენებლო მიზნით.

ალაგ-ალაგ, ვისაც პატრონი ჰყავდა, გაბიონები გააკეთეს და შეავიწროვეს კალაპოტი. მხოლოდ ჩემი კარ-მიდამოს წინ არის გასაკეთებელი გაბიონები. ამიტომ, როცა მდინარე მაღალი წნევით მოდის, ჩემი სახლის წინ იშლება და მიაქვს ჩემი ეზო. ჩამოაქვს მოჭრილი ხის ფესვები და ქვა-ღორღიც.

ეს ბოლო სამი წელია, რაც ძალიან გახშირდა წყალმოვარდნები გაზაფხულობით. მაის-ივნისში ხდება ძირითადად. ორი წლის წინ იყო პირველი შემთხვევა ჩემთან, როცა ეზოს მესამედი წაიღო წყალმა. ამა მოვარდნაზეც წაიღო ეზოს მესამედი, კიდევ“ – ამბობს თუთა ჯგუშია.

თუთა ამბობს, რომ გარდაბნის მერიას ჯერ კიდევ ორი წლის წინ მიმართა და ითხოვდა გაბიონების აშენებას მდინარის კალაპოტთან, თუმცა არც მერიას და არც სხვა შესაბამის უწყებას ეს პრობლემა დღემდე არ მოუგვარებია.

„როცა პირველად წაიღო ეზოს ერთი მესამედი, მაშინ დავრეკე გარდაბნის გამგეობაში და გადამამისამართეს ინფრასტრუქტურის სამინისტროში, იმათ უნდა გაგიკეთონ ნაპირსამაგრი გაბიონებიო.

მაშინ შევიტანე განცხადება ინფრასტრუქტურის სამინისტროში და როგორც მეუბნებოდნენ, პროექტიც მომზადდა, მაგრამ მისი განხორციელება არ მიმდინარეობდა. კვირაში ერთხელ ვრეკავდი სამინისტროში. ბოლოს დავრეკე დეკემბერში და მითხრეს, რომ მთავრობის ადმინისტრაციას უნდა გავუგზავნოთ პროექტი და იქიდან რომ დაგვიბრუნდება, მერე გამოცხადდება ტენდერი, შეირჩევა კომპანია და დაიწყებენ ნაპირსამაგრ სამუშაოებსო.

შემდეგ იყო მიზეზები, – „ასე უცებ არ ხდება“, „ბიუჯეტი არ გვაქვს გათვალისწინებული“, „მომავალი წლისთვის გადავდეთ“ და ასე შემდეგ.

ახლა უბრალოდ იმიტომ ავტეხე განგაში, რომ სახლამდეა მოსული მდინარე, საძირკვლიდან ხუთ მეტრში. ერთი წვიმაა საკმარისი, რომ დარჩენილი ნიადაგიც გამოაცალოს და სახლიც წაიღოს“- ამბობს თუთა ჯგუშია.

მისი თქმით, როცა 24 მაისს იყო წყალმოვარდნები და მდინარემ ხეები მოგლიჯა, ადგილობრივებმა დარეკეს სამაშველოში, მოვიდნენ წარმომადგენლები და დააფიქსირეს მეწყრული პროცესი, „თუმცა შემდეგ, მონიტორინგი აღარ ყოფილა“- ამბობს თუთა.

„მე სამსახურში ვიყავი როცა მდინარე მოვარდა და მე და ჩემს შვილს, ასეთი მდგომარეობა დაგვხვდა ადგილზე. სახლის იქეთ ყველაფერი წაღებულია. დავრეკე 112-ში, გარდაბნის მაჟორიტარსაც დავურეკე, მოვიდა პოლიცია, სამაშველოც და შეადგინეს ოქმი. ჩემ თვალწინ დაურეკეს რწმუნებულს, მერს და მითხრეს, რომ დილას, ანუ 26 მაისს, ტექნიკას გამოუშვებდნენ და მიიღებდნენ შესაბამის ზომებს. თუმცა, ამის შემდეგ არავინ გამოჩენილა“ – ამბობს თუთა ჯგუშია.

როცა ხეები იჭრებოდა ან ინერტულ მასალას იღებდნენ მდინარიდან, თუ ჰქონდა ამაზე რეაგირება გარემოს ზედამხედველობის ინსპექციას ან მერს მაგალითად და თუ არა, რატომ? – ვკითხეთ მას.

ის ამბობს, რომ გარემოს ხელყოფის ფაქტზე მისმა მეზობელმა მიმართა შესაბამის უწყებებს, თუმცა საფუძვლიანი მოკვლევა არ ჩატარებულა.

„ერთი მეზობელია, რომელიც ბოლო რამდენიმე წელია მიმართავს სახელმწიფოს ამ ინერტული მასალების ამოღების გამო, მაგრამ არ ვიცით, ვინ მიდის ტრაქტორებით და ვინ იღებს ამ მასალებს.

ამის გამოა, რომ მდინარე გვივარდება. ერთ ღამეში, თხუთმეტ წუთში წამოვიდა იმხელა ნიაღვარი, რომ ბავშვთან ერთად მომიწია წამოსვლა, შემეშინდა.

წელსაც ვითხოვდი მიეღოთ პრევენციული ზომები, მაგრამ პასუხი ვერ მივიღე. „პროცედურებია გასავლელი“, „ყველაფერს თავისი დრო აქვს“- მიმეორებდნენ. ამასობაში მდინარემ ჩემი ეზო წაიღო.

ბოლოს რომ დავრეკე გარდაბნის გამგეობაში, მითხრეს, ჩვენთან არაფერი შემოსულაო. ანუ, არც სამაშველოს ოქმი არ იყო და როცა დავიწყე კიდევ გარკვევა, მერე თქვეს, რომ ზეპირსიტყვიერად იცის მერმაო. არ ვიცი სად გააქრეს იმ დღის ოქმი“ – ამბობს თუთა ჯგუშია.

„ბათუმელები“ დაუკავშირდა გარდაბნის მერიას კითხვით, რატომ არ მიიღო მერიამ ამ დრომდე შესაბამისი ზომები და არ ჩაატარა ნაპირსამაგრი სამუშაოები მდინარის ნაპირზე.

მერიის პრესსამსახურში გვითხრეს, რომ მერი, დავით კარგარეთელი დღეს, 28 მაისს ესაუბრა მოქალაქე თუთა ჯგუშიას, თუმცა ამ საუბრის შინაარსი მისთვის უცნობია.

„ჰკითხეთ მოქალაქეს რაზე ისაუბრეს“- გვეუბნებიან პრესსამსახურში.

ასევე დავუკავშირდით ირაკლი კაპანაძეს გზების დეპარტამენტში – როგორც თუთა ჯგუშია ამბობს, ბოლოს სწორედ მასთან ჰქონდა კომუნიკაცია ნაპირსამაგრი სამუშაოების პროექტთან დაკავშირებით.

ირაკლი კაპანაძემ დაგვიდასტურა, რომ პროექტი ნამდვილად არსებობს, თუმცა ტენდერი, სამუშაოების ჩატარებაზე, ჯერ გამოცხადებულიც კი არ არის.

„ერთი წლის წინ გავაკეთეთ განცხადება, საპროექტო დავალება მივეცით მას შემდეგ, რაც მოგვმართა მოქალაქემ და პროექტი მზად არის და დღე-დღეზე გამოცხადდება ტენდერი“ – გვითხრა მან.

მას ვკითხეთ, თუ რატომ გაიწელა პროცესი ამ დრომდე, რადგან მდინარემ უკვე წაიღო მოქალაქის ეზო და მიადგა სახლს.

ირაკლი კაპანაძე ამბობს, რომ ეს ყველაფერი სამუშაო პროცესთან არის დაკავშირებული და არც ისაა გამორიცხული, რომ ხელშეკრულებაც კი ვერ გაფორმდეს დროულად.

მაშ ვინ უნდა მიიღოს ზომები, რომ წყალმოვარდნის განმეორების შემთხვევაში მოქალაქემ მთლიანად არ დაკარგოს საცხოვრებელი? – ვკითხეთ  მას.

„სხვა შესაბამისმა უწყებებმა, მერიამ“- გვიპასუხა მან.

რაც შეეხება ნაპირგამაგრებით სამუშაოების პროექტს, ირაკლი კაპანაძის თქმით, ამისთვის ბიუჯეტიდან 2 მილიონი ლარია გამოყოფილი. „ეს პროექტი მოიცავს ოთხ ლოკაციას, ამის [ჯგუშიას სახლის] გარდა, კიდევ სამ ლოკაციაზეა პრობლემა და დაახლოებით ორ მილიონამდე ჯდება“ – გვითხრა მან.

_________

მთავარ ფოტოზე: თუთა ჯგუშიას სახლის ეზოს ნაწილი მდინარემ წაიღო. თათა ჯგუშია ფოტო/facebook

ამ სეზონზე ბათუმში ერთი შეზლონგის ფასი მაქსიმუმ 10 ლარი, ქოლგის – 5 ლარი იქნება.  ბათუმის პლაჟების სარგებლობის უფლებით გასხვისების პირობების მიხედვით, წელს ბათუმში ერთი შეზლონგის ღირებულება არ უნდა აღემატებოდეს 10 ლარს, ხოლო ერთი ქოლგის ღირებულება არ უნდა აღემატებოდეს 5 ლარს.

გარდა ამისა, გასხვისების პირობების მიხედვით, მოიჯარე ვალდებულია შეზლონგები განათავსოს სანაპირო ზოლზე თანაბარპროპორციულად.

თუმცა საინტერესოა ისიც, როგორ გააკონტროლებს წელს ბულვარის ადმინისტრაცია იჯარით გადაცემულ მიწის ნაკვეთებზე შეზლონგების და ქოლგების გადანაწილებას, ისე, რომ ადგილი დარჩეს მათთვისაც, ვისაც შეზლონგის დაქირავების შესაძლებლობა არ აქვს და სანაპიროზე, ქვებზე წამოწოლა სურს.

მსგავსი ჩანაწერი ადრეც არსებობდა, თუმცა შესაბამისი კონტროლი – არა.

ბათუმში საკურორტო სეზონზე შეზლონგებით გადაჭედილი სანაპირო უკმაყოფილების და კონფლიქტის საგანი ხშირად იყო და ამაზე „ბათუმელებს“ არაერთი მასალა აქვს მომზადებული.

საქმე ის არის, რომ მოიჯარეები ადრე დილიდან მთელ სივრცეზე ათავსებენ შეზლონგებს მიუხედავად იმისა, ჰყავთ თუ არა მომხმარებელი.

ბათუმის ბულვარის ადმინისტრაციამ პლაჟზე კომერციული საქმიანობისთვის გამოყოფილი ადგილები აუქციონზე 22 მაისს გაიტანა.

800 კვ.მეტრიდან – 1500 კვ.მეტრამდე კომერციული ფართობები პლაჟზე ბათუმის ცენტრალურ ნაწილში, საპლაჟო ინფრასტრუქტურის განსათავსებლად უნდა გასხვისდეს.

პირობა მხოლოდ შეზლონგების, ქოლგებისა და ნაგვის ურნების განთავსების შესაძლებლობას უშვებს და არ არის განკუთვნილი საკლუბო ან კაფეს ინფრასტრუქტურის მოსაწყობად. იგივე პირობის თანახმად, მოიჯარე ვალდებულია  განათავსოს ახალი და უხარვეზო საპლაჟე ინფრასტრუქტურა: შეზლონგი, ქოლგა, მცირე ზომის სანაგვე ყუთი.

გარდა ამისა, მოიჯარეს, მეიჯარის თანხმობის გარეშე, ეკრძალება იჯარით გადაცემული ქონების შემოღობვა ან/და ნებისმიერი სხვა სახით შემოსაზღვრა, რომელიც შეაფერხებს მესამე პირების იჯარის საგანთან წვდომას.

___

მიმდინარე აუქციონის საწყის ფასებსა და პირობებზე დეტალურად წაიკითხეთ აქ:

ვის შეხვდება ადგილები ბათუმის ბულვარში – ქონების იჯარით გასხვისება დაწყებულია

See more

 

ქონების ეროვნული სააგენტო სახელმწიფოს საკუთრებაში არსებული 50-ზე მეტი ობიექტის ცეცხლსასროლი იარაღით დაცვაში წელს, 7 თვის განმავლობაში, 4,5 მილიონზე მეტ ლარს გადაიხდის.

დასაცავ ობიექტებს შორისაა ბათუმში, გონიოს ყოფილი სამხედრო პოლიგონის ტერიტორია, წყალტუბოს სანატორიუმები და სხვა ქონება.

ობიექტების დასაცავად საჭირო თანხას – 4 571 570 ლარს კი შსს-ს დაცვის პოლიციის დეპარტამენტს გადაურიცხავენ.

სააგენტო წერს, რომ კანონით „ცეცხლსასროლი იარაღის გამოყენებით ობიექტის დაცვის უფლებამოსილება გააჩნია მხოლოდ აღნიშნულ დეპარტამენტს… ბაზარზე ანალოგიური მომსახურების გამწევი პირის გამოჩენა კი დამოკიდებულია შესაბამის საკანონმდებლო ცვლილებებზე.“

„სახელმწიფო ობიექტების ცეცხლსასროლი იარაღით დაცვის მომსახურების [2026 წლის 1-ლი ივნისიდან 2026 წლის 31 დეკემბრის ჩათვლით] შესყიდვის საჭიროება განპირობებულია გამომდინარე იქიდან, რომ თავიდან იქნას აცილებული სახელმწიფო საკუთრებაში არსებული ობიექტების [მათში განთავსებული მატერიალურ-ტექნიკური ნივთებით] დაზიანება, ქურდობა, ყაჩაღობა, განზრახ განადგურება და სხვა კანონსაწინააღმდეგო ქმედება“, – წერს ქონების სააგენტო შესყიდვების სააგენტოს.

აქ აღსანიშნავია, რომ მაგალითად გონიოს ყოფილი პოლიგონის ტერიტორიაზე, რომლის ფართობი 2,2 მილიონი კვადრატული მეტრია, რაიმე შენობა ფაქტობრივად არ დგას [შემორჩენილია მხოლოდ სამხედრო წვრთნისთვის საჭირო რამდენიმე შენობების ნანგრევი].

„ოცნების“ ხელისუფლება ბოლო რამდენიმე წელია საუბრობს გონიოში ყოფილი პოლიგონის ტერიტორიის განვითარებაზე, მოამზადეს კონცეფციებიც, თუმცა, საბოლოოდ აქ „არაბული ინვესტიცია“ დააანონსეს.

ეს ტერიტორია არაბულ კომპანია „Eagle Hills-სთან თანამშრომლობის ფარგლებში“ აჭარის მთავრობამ 2025 წელს სახელმწიფოს უსასყიდლოდ გადასცა. რეესტრის ბოლო ამონაწერით, ეს ტერიტორია ჯერ კიდევ სახელმწიფოს საკუთრებაშია.

ამ თემაზე ვრცლად: „იგლ ჰილსის“ პროექტი გონიოს ყოფილ პოლიგონზე, სადაც მშენებლობა შეზღუდულია აეროპორტის გამო

რაც შეეხება წყალტუბოს სანატორიუმებს, ამჟამად დასაცავი ობიექტების სიაშია: ბალნეოლოგიური სანატორიუმი „ფილიალი“, ასევე „იმერეთი“, „გეოლოგი“, „გელათი“, „რკინიგზელი“, „წყალტუბო“, „სავანე“, „მეგობრობა“, „აია“, „შახტიორი“ და „მედეა“.

ეს და სხვა სანატორიუმები სააგენტოს 2022 წელს გასაყიდადაჰქონდა გამოტანილი აუქციონზე.

2019 წელს კი, „ქართული ოცნების“ დამფუძნებელი და საპატიო თავმჯდომარე, მილიარდერი ექსპრემიერი, ბიძინა ივანიშვილი პირადად დაჰპირდა ამომრჩეველს, რომ წყალტუბოს, როგორც ბალნეოლოგიურ კურორტს, აღადგენდა და განავითარებდა. თუმცა, დაპირება დაპირებად დარჩა.

ამ თემაზე ვრცლად: ივანიშვილის შეუსრულებელი დაპირება – მიტოვებული სანატორიუმები ეკალბარდში

ფინანსთა სამინისტროს შემოსავლების სამსახურის ინფორმაციით სარფის საბაჟოდან 8,2 ტონა უვარგისი პომიდორი უკან, ექსპორტიორ ქვეყანაში გააბრუნეს.

„სარფის“ საბაჟო გამშვებ პუნქტზე, მებაჟე-ოფიცრებმა უცხო ქვეყნიდან შემოტანილი 8 200 კილოგრამი პომიდორით დატვირთული ავტოსატრანსპორტო საშუალება შეაჩერეს.

სასაზღვრო-საკარანტინო კონტროლის პროცედურების ფარგლებში, პასუხისმგებელი ფიტოსანიტარის მიერ, საქონლის დათვალიერებისას, პომიდორზე საკარანტინო მავნე ორგანიზმისთვის დამახასიათებელი კვალი გამოვლინდა.

აღნიშნული საქონელი ექსპორტიორ ქვეყანაში გაბრუნებას დაექვემდებარა,“ – წერს შემოსავლების სამსახური.

პროკურატურის განცხადებით, სამსახურებრივი უფლებამოსილების ძალადობით გადამეტების ფაქტზე ექვსი პოლიციელი დააკავეს.

„შიდა ქართლისა და მცხეთა-მთიანეთის საოლქო პროკურატურის საგამოძიებო სამმართველოს მიერ, შინაგან საქმეთა სამინისტროს გენერალურ ინსპექციასთან კოორდინაციით ჩატარებული გამოძიებით დადგინდა, რომ 2026 წლის 27 მაისს, ქალაქ გორში, ბრალდებულებმა დაზარალებულის დაკავებისას, ძალადობით გადაამეტეს სამსახურებრივ უფლებამოსილებას.

განხორციელებული ძალადობის შედეგად, არსებითად დაირღვა დაზარალებულის უფლებები, ამასთან დაზიანდა მისი ჯანმრთელობა.

უმოკლეს ვადაში ჩატარებული გამოძიების შედეგად მოპოვებულ მტკიცებულებათა საფუძველზე, ბრალდებულები 28 მაისს დააკავეს.

მათ ბრალდება კანონით განსაზღვრულ ვადაში, სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით (სამსახურებრივი უფლებამოსილების გადამეტება, ჩადენილი ძალადობით) წარედგინებათ, რაც სასჯელის სახედ და ზომად 5-დან 8 წლამდე თავისუფლების აღკვეთას ითვალისწინებს“- აცხადებს პროკურატურა.

გუშინ, 27 მაისს, გორში, კომბინატის დასახლებაში, პოლიციელებმა ჯგუფურად იძალადეს დაკავებულზე, პაპუნა ლოცულაშვილზე.

პოლიციელებისგან ძალადობის მსხვერპლი გახდა დაკავებულის მეგობარიც, ლაშა აბისონაშვილი, რომელიც, როგორც თავად ამბობს, სიტუაციის გასარკვევად და გასანეიტრალებლად მივიდა.

პოლიციელთა ძალადობის ამსახველი ვიდეო ადგილობრივმა მედიამ, „ქართლის ამბებმა“ გაავრცელა.

დღეს, 28 მაისს, ცნობილი გახდა, რომ გორში პოლიციელების მიერ ნაცემი ახალგაზრდა კლინიკიდან გაწერეს – მას ნეკნები აქვს გატეხილი და ორგანოები დაჟეჟილი.

ნახეთ ვიდეო: