ბათუმის საკრებულო 29 მაისის სხდომაზე ბულვარში ელექტროსკუტერების საკითხს განიხილავს.
წელს ბულვარის ტერიტორიაზე ელექტროსკუტერების გამქირავებლებს უთხრეს, რომ სკუტერების გადაადგილება ბულვარში საერთოდ აიკრძალა, რასაც ამ ადამიანების პროტესტი მოჰყვა.
სკუტერების მფლობელებმა აკრძალვის შემდეგ ათზე მეტი საპროტესტო აქცია გამართეს და მუშაობის უფლება მოითხოვეს.
ვრცლად: რატომ მივიდნენ კვადროციკლების მფლობელები აჭარის მთავრობის წინ პროევროპულ აქციაზე
აღსანიშნავია, რომ ბათუმის საკრებულოს 2019 წელს აქვს მიღებული დადგენილება, რომლითაც ქალაქის ბულვარში, პარკში და სკვერში აიკრძალა მოტოციკლით, კვადროციკლით და ელექტრომობილით [ელექტროტრანსპორტით] გადაადგილება.
ამ დადგენილების მიღებიდან დღემდე საკრებულოს მასში ცვლილება ყოველწლიურად შეაქვს და ბულვარის ველობილიკზე გარკვეული ელექტროტრანსპორტის გადაადგილებას უშვებს.
ასე ხდება ამჯერადაც.
ბათუმის მერია საკრებულოს წერს, რომ „მიზანშეწონილად მიაჩნია 2027 წლის პირველ იანვრამდე ქალაქ ბათუმის ბულვარში არსებულ ველობილიკზე დაშვებულ იქნას ორბორბლიანი ელექტრო თვითმგორავით გადაადგილება, ხოლო ახალი ბულვარიდან დელფინარიუმის გასწვრივ არსებულ მონაკვეთამდე, კერძოდ, ველობილიკზე – ელექტრო ტრანსპორტის [მხოლოდ სამ ბორბლიანი ელექტრო სკუტერის] გადაადგილება“.
ამ ცვლილების მიღებით ელექტროსკუტერები ბულვარში ისევ ისე იმოძრავებენ როგორც, მაგალითად, გასულ წელს [ახალი ბულვარიდან დელფინარიუმამდე მონაკვეთში].
ბათუმის მერია საკრებულოს ასევე წერს, რომ „შემოსულია „ბათუმის ბულვარის“ 2026 წლის 25 მაისის წერილი, რომელშიც აღნიშნულია, რომ ბოლო წლებში თვალსაჩინო გახდა, რომ ელექტროტრანსპორტით ე.წ. ორბორბლიანი ელექტროთვითმგორავი და სამბორბლიანი ელექტროსკუტერით გადაადგილება განსაკუთრებული პოპულარობითა და მოთხოვნით სარგებლობს“.
ელექტრო მოპედების ბათუმელმა მეპატრონეებმა ბოლოს აქცია შეკვეთილში, ბიძინა ივანიშვილის რეზიდენციის შესასვლელთან გამართეს.
მნიშვნელოვანია, რომ განმარტებით ბარათში არაფერია ნათქვამი ამ საშუალებების პარკირების შესახებ. ელექტროსკუტერების მფლობელები ბულვარში იმავე მონაკვეთში ითხოვენ პარკირებას, სადაც ელექტრომოწყობილობების პარკირებაა დაშვებული.
ამ თემაზე ვრცლად:
რას ითხოვდნენ აქციაზე, ივანიშვილის სასტუმროსთან, მოპედების ბათუმელი მეპატრონეები
