ბათუმის მერიის საქალაქო ინფრასტრუქტურისა და კეთილმოწყობის სამმართველოს 78 მილიონიან ტენდერში შპს „ანაგმა“ გაიმარჯვა, ხელშეკრულება ჯერ გაფორმებული არ არის, თუმცა სამმართველოს შესყიდვების კომისიის ოქმში დაფიქსირებულია, რომ გამარჯვებული უკვე გამოვლინდა.
შესყიდვის საწყისი ღირებულება 78 მილიონ 589 607 ლარი იყო, შპს „ანაგმა“ მერიას სამუშაოს შესრულება ზუსტად იგივე ფასად შესთავაზა. ეს გარემოება მიანიშნებს, რომ „ანაგი“ ამ შემთხვევაში უკონკურენტო იყო და სხვა პრეტენდენტი არ დაფიქსირებულა.
შესყიდვის ფარგლებში გათვალისწინებულია:
- კახაბრის ქუჩაზე #30-ში მდებარე ავარიული სახლის დემონტაჟი და ახალი სახლის მშენებლობა – პროექტის საწყისი ღირებულება 15 მილიონ 926 420 ლარია [ტენდერის შემდეგ შესაძლოა შემცირდეს].
- ხიმშიაშვილის #94/96-ში ავარიული სახლის დემონტაჟი და ახალი სახლის მშენებლობა – პროექტისთვის მერიას 21 მილიონ 550 123 ლარი აქვს გათვალისწინებული.
- საცხოვრებელი სახლის მშენებლობა 26 მაისის ქუჩაზე, #13-ში – აქ კორპუსის სადარბაზოს ნგრევას 9 ადამიანის სიცოცხლე შეეწირა, მათ შორის, 3 ბავშვის. სახლის მშენებლობისთვის 8 მილიონ 015 860 ლარი გაითვალისწინეს. ჯამში ავარიული სახლების პროგრამის ფარგლებში მერია 45 მილიონ 492 403 ლარის დახარჯვას გეგმავს.
- გარდა ამისა, ბათუმის მერია იმავე დაფინანსების ფარგლებში ე.წ. შანხაის დასახლებაში სოციალური სახლის მშენებლობის სამუშაოების შესყიდვას გეგმავს. პროექტის ღირებულება 33 მილიონ 097 204 ლარია.
რამდენიმე პროექტის გაერთიანებული ტენდერით შესყიდვის გადაწყვეტილებამ საზოგადოებაში თავიდანვე გააჩინა კითხვები:
რატომ ყიდულობს მერია ამ მასშტაბის მომსახურებას ერთიანად?
რატომ არ შეიძლებოდა ტენდერების ცალ-ცალკე გამოცხადება კონკურენტულ გარემოში?
პროექტის განხორციელების რისკები ხომ არ გაიზრდება მაშინ, როცა გასულ წლებში მერია გეგმა-გრაფიკის ჩამორჩენასა და კონტრაქტორების მხრიდან ვალდებულებების შეუსრულებლობაზე აქტიურად წერდა?
საქალაქო სამმართველოს უფროსმა, აკაკი ბერიძემ ოთხი პროექტის გაერთიანების იდეა, შემსრულებელი კომპანიისთვის საკვალიფიკაციო მოთხოვნების გაზრდის საჭიროებით ახსნა: „ სამმართველოსთვის მნიშვნელოვანია, რომ ორგანიზაცია, რომელიც აიღებს ამ პასუხიმგებლობას, იყოს ავტორიტეტული და მაღალი რეპუტაციით სარგებლობდეს.“
საკრებულოს ოპოზიცია კი აცხადებდა, რომ მერიამ ტენდერი კონკრეტულ კომპანიას მოარგო და ეს კორუფციაა. პროექტების შესრულების სამუშაოების ერთიანად შესყიდვის იდეას საკრებულოს უმრავლესობამ მხარი დაუჭირა.
შპს „ანაგის“ 100 პროცენტს ნანა აროშიძე, ბიზნესმენ ზაზა გოგოტიშვილის მეუღლე ფლობს.
