Batumelebi

ილიაუნის სტუდენტური მოძრაობა დღეს, 12 თებერვალს, აქციას აანონსებს, ილიას უნივერსიტეტის „ა“ კორპუსთან, 19 საათზე.

„ქართულმა ოცნებამ” განაცხადა, თუ რას უპირებს სახელმწიფო უნივერსიტეტებს და ამ ჩამონათვალში შეიტანა ილიაუნიც. ზემოხსენებული დეკუმენტის მიხედვით ილიაუნს მხოლოდ პედაგოგიკის მიმართულებები რჩება, რაც ამ მრავალმხრივ წამყვანი უნივერსიტეტისთვის დანგრევის ტოლფასია.

ჩვენ უახლოეს წარსულშიც ვნახეთ, რომ ერთიან აკადემიურ წინააღმდეგობას ნამდვილად აქვს აზრი. სწორედ ამიტომ მოვუწოდებთ ჩვენს ლექტორებს, ადმინისტრაციულ პერსონალსა და სტუდენტებს, ერთად შევეწინააღმდეგოთ ამ დამანგრეველ ცვლილებებს.

არ გვაქვს უფლება დავთმოთ მრავალწლიან ისტორია, ღირებულებები და ხანგრძლივი შრომით მოპოვებული წარმატებები.

შემოგვიერთდით, ერთად დავიცვათ განათლება!“ – ვკითხულობთ განცხადებაში.

„ქართულმა ოცნებამ” დღეს, 12 თებერვალს, გამოაქვეყნა მონაცემები იმის შესახებ, რომელ სახელმწიფო უნივერსიტეტს რომელ მიმართულებებზე ექნება სტუდენტების მიღების შესაძლებლობა.

„ოცნების” გადაწყვეტილებით, ილიას სახელმწიფო უნივერსიტეტს სტუდენტების მიღება შეეძლება მხოლოდ პედაგოგიკის პროგრამებსა და ABET აკრედიტაციის მქონე STEM სპეციალობებზე.

„უმაღლესი განათლების დანგრევას, საერთაშორისო რეიტინგებით ყველაზე წარმატებული დარგების მოსპობას, ცოდნის ეკონომიკის ნაცვლად ბიზნესის მომარაგებას იაფფასიანი მომსახურე პერსონალით და გამოთავისუფლებული შენობების გაყიდვას არ დასჭირდა განათლების ექსპერტების ჩართვა პროცესში, ისე მოაგვარეს.

გადაწყვეტილების მიმღებებს აუცილებლად მოგიწევთ პასუხის გაცემა საუნივერსიტეტო საზოგადოებისთვის – არა მხოლოდ ახლა! p.s. საბჭოები ახლა იკრიბებიან”, – ასე გამოეხმაურა ილიას უნივერსიტეტის რექტორი, ნინო დობორჯგინიძე „ოცნების“ გადაწყვეტილებას.

„ოცნების“ მთავრობამ გამოსცა განკარგულება, რომლის თანახმადაც „ოცნების ქალაქში“ მშენებლობისთვის შპს „ანაგი“ ქვიშა-ხრეშს ულიცენზიოდ მოიპოვებს.

„ანაგის“ სასარგებლო წიაღისეულის მოპოვების ლიცენზიისაგან გათავისუფლების თაობაზე განკარგულებას ირაკლი კობახიძემ ხელი 2026 წლის 6 თებერვალს მოაწერა.

ამ განკარგულებით „ანაგი“ სამი თვის ვადით გათავისუფლდა სასარგებლო წიაღისეულის მოპოვების ლიცენზიისაგან და მიეცა უფლება, მოიპოვოს 13 567 კუბური მეტრი ქვიშა-ხრეში ქედის მუნიციპალიტეტში, დაბა ქედის ადმინისტრაციული ერთეულის ტერიტორიაზე.

ქვიშა-ხრეშის მოპოვების ადგილი [9 045 კვადრატული მეტრი ფართობის ტერიტორია] მდინარე აჭარისწყლის კალაპოტში, სოფელ არსენაულთან მდებარეობს.

ამავე განკარგულებით „ანაგი“ ვალდებულია მოპოვებული სასარგებლო წიაღისეული გამოიყენოს მხოლოდ „ოცნების ქალაქის“ მშენებლობისთვის. ამასთან, სასარგებლო წიაღისეულის მოპოვების ლიცენზიისაგან გათავისუფლებისათვის, ამ განკარგულების ძალაში შესვლიდან ერთი თვის ვადაში საქართველოს სახელმწიფო ბიუჯეტში უზრუნველყოს 17 696 ლარის გადახდა.

„ოცნების ქალაქში“ „მეორე ფაზის“ მშენებლობაზე აჭარის ფინანსთა და ეკონომიკის სამინისტროს ტენდერი 110 057 000 ლარით ჰქონდა გამოცხადებული. ტენდერში ორი კომპანია მონაწილეობდა. გამარჯვებულად გამოავლინეს „ანაგი“, რომელთანაც ხელშეკრულება 129 346 880 ლარზე გააფორმეს დღგ-ს გათვალისწინებით [ხოლო 109 616 000 ლარი დღგს გარეშე].

ტენდერის ფარგლებში „ანაგმა“ 9 კორპუსი უნდა ააშენოს არაუგვიანეს 2028 წლის 5 თებერვლის ჩათვლით პერიოდში.

შესყიდვების პორტალის მიხედვით ბიუჯეტიდან „ანაგზე“, 2026 წლის 12 თებერვლის მდგომარეობით, უკვე გადარიცხულია 45 940 752 ლარი.

„ოცნების ქალაქში“ მეორე ეტაპის სამუშაოების დაწყება 2025 წლის 8 თებერვალს „სიმბოლური კაფსულის ჩაგდების ღონისძიებით“  აღნიშნეს, რომელსაც „ოცნების“ პრემიერი ირაკლი კობახიძეც დაესწრო. ამ ღონისძიებისთვის მაშინ ბიუჯეტიდან 209 ათასი ლარი დაიხარჯა.

ამ ღონისძიების ჩატარებიდან რამდენიმე დღეში კი „ოცნების ქალაქში“ ტრაგედია დატრიალდა – 2025 წლის 15 თებერვალს, 4 და 6 წლის ბავშვები წყლით სავსე თხრილში ჩაცვივდნენ და დაიღუპნენ.

ამ თემაზე ვრცლად: უსაფრთხოების ღობე „ოცნების ქალაქში“ კობახიძის დასაცავად, მხოლოდ ერთი დღით იყო

„ოცნების“ პრემიერი, ირაკლი კობახიხე ირწმუნება, რომ „იგლ ჰილსმა“ წინასწარი გაყიდვები დაიწყო კრწანისის პროექტში და უკვე 267 ბინა გაყიდა.

„გაიყიდა 257 ბინა, საიდანაც 147 ბინა იყიდეს ქართველებმა და 110 ბინა იყიდეს უცხოელებმა“ –  განაცხადა ირაკლი კობახიძემ დღეს, 12 თებერვალს მთავრობის სხდომაზე.

კობახიძის თქმით, 1 კვ.მეტრის ფასი 1650 დოლარი იყო.

კობახიძემ  ხაზგასმით აღნიშნა ისიც, რომ არაბული ქვეყნების მოქალაქეებმა მხოლოდ რვა ბინა შეიძინეს:

„ყველაზე მასშტაბური ინვესტიციაა „იგლ ჰილსის“ ინვესტიცია, ბინების წინასწარი გაყიდვები დაიწყო  კრწანისში. თქვენ იცით, რომ ოპოზიციას დაანონსებული ჰქონდა 15 000 -დოლარიანი ფასი, მათ იცოდნენ ინვესტორზე უკეთ რა ფასით გაიყიდებოდა ბინები და სახლები კრწანისის ტერიტორიაზე, თუმცა ოპოზიციის ანონსის საწინააღმდეგოდ საწყისი ფასი გარემონტებულ ბინებზე იყო 1650 დოლარი, დაახლოებით ათჯერ ასცდნენ იმ რეალობას, რომელიც სინამდვილეში იყო დაგეგმილი, შესაბამისად ეს ბინები საშუალო ქართველი მყიდველისთვისაც იყო ხელმისაწვდომი – ჩვენ მოგვაწოდეს სტატისტიკური ინფორმაცია.

გახსოვთ რამხელა კამპანია იყო აგებული ამ თემასთან დაკავშირებით. ცნობილი არაბიზაციის ტერმინი შემოიტანეს და ასე შემდეგ. აცხადებდნენ, რომ პრაქტიკულად ქართველები ვერ იყიდდნენ ბინებს და მთლიანად გაიყიდებოდა არაბებზე, სტიგმატიზაციის მცდელობა ჰქონდათ.

არაბეთის მოქალაქეებმა მხოლოდ რვა ბინა შეიძინეს.

გაიყიდა 257 ბინა, საიდანაც 147 ბინა იყიდეს ქართველებმა და 110 ბინა იყიდეს უცხოელებმა. რომ არა ის ისტერიული კამპანია, რომელსაც ოპოზიციონერები აწარმოებენ, დარწმუნებული ვარ ქართველების წილი უფრო მაღალი იქნებოდა, დარწმუნებული ვარ მომავალში ეს წილი გაიზრდება. დავაკვირდებით მოვლენების განვითარებას“ – თქვა კობახიძემ.

ხელისუფლების ვერსიით, არაბულმა კომპანია Eagle Hills-მა საქართველოში [თბილისსა და ბათუმში] 6,6 მილიარდი აშშ დოლარის დეველოპერული პროექტები უნდა განახორციელოს. Eagle Hills-თან გაფორმებულ საინვესტიციო ხელშეკრულებას კი, კომერციული საიდუმლოს სტატუსი აქვს მინიჭებული.

რეესტრის  მონაცემების მიხედვით, კომპანია „იგლ ჰილს საქართველოს“ სამეთვალყურეო საბჭოს წევრებად ფიქსირდებიან საქართველოს ეკონომიკის მინისტრის მოადგილე, ირაკლი ნადარეიშვილი და თორნიკე ზირაქიშვილი – სსიპ „აწარმოე საქართველოს“ დირექტორის მოადგილე.

კომპანიის 33.33% პროცენტი საქართველოს ეკუთვნის, 66,67 პროცენტი კი – „იგლ ჰილს დეველოპმენტ ჰოლდინგ ლიმიტედს“.

„Eagle Hills-თან“ თანამშრომლობის ფარგლებში აჭარის მთავრობამ სახელმწიფოს უსასყიდლოდ გადასცა გონიოსთან, ზღვისპირას მდებარე ჯამში 2,57 მილიონი კვადრატული მეტრი მიწის ნაკვეთები, მათ შორის ყოფილი სამხედრო პოლიგონის ტერიტორიაც.

______________________

ფოტოზე: „იგლ ჰილსის“ გონიოს პროექტის ესკიზი.

ამავე თემაზე: 

 

ბობოყვათის რეზიდენცია საპატრიარქოს და დაცვის გარეშე დარჩენილი არქეოლოგიური ძეგლები

See more

 

 

სურსათის ეროვნული სააგენტოს ინფორმაციით, აჭარაში სხვადასხვა პროფილის 7 არარეგისტრირებული ობიექტი გამოვლინდა, რომლებიც სააგენტოსაგან მინიჭებული აღიარებისა და ეკონომიკურ საქმიანობათა რეესტრში რეგისტრაციის გარეშე საქმიანობდნენ.

„ფიზიკური პირი ფ. ტ. (ხელვაჩაური, სოფელი მახო ) – ფრინველთა სასაკლაოზე გამოვლინდა კრიტიკული შეუსაბამობები, ფრინველი იკვლებოდა ვეტერინარული ზედამხედველობის გარეშე, დაილუქა საეჭვო წარმომავლობის ფრინველის ხორცი;

ფიზიკური პირი დ. ა. (ხელვაჩაური, ფანასკერტელ-ციციშვილის N 29 ) – ფრინველთა სასაკლაოში გამოვლინდა კრიტიკული შეუსაბამობები;

ფიზიკური პირი დ. მ. (ბათუმი, დაუდ ასამბაძის 3 ა) – ცხოველთა სასაკლაოზე გამოვლინდა კრიტიკული შეუსაბამობები, აგრეთვე ხორცი ჯანმრთელობის

ნიშანდების გარეშე, რომელიც დაილუქა;

შპს „ბაკური“ (ბათუმი სევერიან აჭარელის ქ.N 4-აგრარული ბაზარი) – ქათმის სარეალიზაციო სივრცეში გამოვლინდა კრიტიკული შეუსაბამობები; ბიზნესოპერატორი, სანიტარიულ-ჰიგიენური ნორმების სრული დარღვევით, დაკვლის ადგილზევე უწევდა რეალიზაციას ფრინველის ხორცს;

ფიზიკური პირი ნ. ს. (ქობულეთი თავისუფლების ქ. N 17 ) – ობიექტზე გამოვლინდა კრიტიკული შეუსაბამობები, დაილუქა საეჭვო წარმომავლობის ხორცი ჯანმრთელობის ნიშანდების გარეშე.

ინდმეწარმე ი. კ. – (ქობულეთი რუსთაველის ქ. 168) – საქმიანობდა ეკონომიკური საქმიანობის რეგისტრაციისა და აღიარების გარეშე, ხორცპროდუქტების საწარმოში გამოვლინდა კრიტიკული შეუსაბამობები.

ფიზიკური პირი მ. გ.- (ბათუმში, ბარცხანის დასახლება, ცაბაძის ქუჩა N 5) ცხოველთა არალეგალური სასაკლაოზე გამოვლინდა სხვადასხვა შეუსაბამობები, დაილუქა ხორცი ვეტერინარული ზედამხედველობის გარეშე“.

სააგენტოს ინფორმაციით, სახელმწიფო კონტროლის შედეგად გამოვლენილ დარღვევებისთვის ბიზნესოპერატორები დაჯარიმდნენ და შეუსაბამობების აღმოფხვრამდე შეუჩერდათ საწარმოო პროცესი.

ფოთის საზღვაო ნავსადგურმა გასულ წელს 73 864 ავტომობილი მიიღო, 2024 წელს კი – 73 783 ავტომობილი.

კომპანიის ინფორმაციით, გასულ 2025 წელს „ეიპიემ ტერმინალს ფოთმა“ რეკორდული რაოდენობის საკონტეინერო ტვირთი დაამუშავა.

რაც შეეხება 2026 წლის იანვრის მონაცემებს, წინა წლის ანალოგიურ თვესთან შედარებით მაჩვენებელი 15 პროცენტით არის გაზრდილი.

„2026 წლის იანვარში „ეიპიემ ტერმინალს ფოთმა“ 54 527 TEU კონტეინერი დაამუშავა. 2025 წლის იანვარში 47 265 TEU, ხოლო 2024-ში – 42 588 კონტეინერი“ – ნათქვამია „ეიპიემ ტერმინალს ფოთის“ მიერ მოწოდებულ ინფორმაციაში. 

ტერმინალის ინფორმაციით, იანვრის თვეში 34 პროცენტით გაიზარდა საკონტეინერო გემების მიღებაც: მიმდინარე წლის იანვარში „ეიპიემ ტერმინალს ფოთმა“ 35 საკონტეინერო გემი მიიღო, 2024-2025 წლების იანვრის თვეში კი 26-26 საკონტეინერო გემი.

რაც შეეხება 2025 წლის 12 თვის მონაცემებს,„ეიპიემ ტერმინალს ფოთმა“ 2025 წელს 362 საკონტეინერო გემი მიიღო, ხოლო 2024 წელს – 313 საკონტეინერო გემი. 

ამასთან, 2025 წელს დამუშავდა 636 466 TEU კონტეინერი, 2024 წლის 12 თვეში 545 297 TEU კონტეინერი, ხოლო 2023-ში 592 589 TEU კონტეინერი.

„ამ რაოდენობის ტვირთი ფოთის საზღვაო ნავსადგურს სხვა წლებში არ დაუმუშავებია,“ – აცხადებს „ეიპიემ ტერმინალს ფოთი“.

კომპანიის მიერ დამუშავებული გენერალური ტვირთების მონაცემები კი ასეთია:

2025 წელს 243 048 ტონა ტვირთი დამუშავდა, რაც 1%-ით დაბალი მაჩვენებელია 2024 წლის ანალოგიურ პერიოდთან მიმართებაში.

2024 წელს დამუშავებული გენერალური ტვირთების რაოდენობა 245 748 ტონას შეადგენდა, 2023-ში კი – 302 763 ტონას.

გასულ წელს მომატებული იყო საბორნე გზით მიღებული ტვირთების ოდენობაც.

2025 წელს „ეიპიემ ტერმინალს ფოთმა“ საბორნე გზით 164 631 ტონა ტვირთი მიიღო, ხოლო 2024 წლის ანალოგიურ პერიოდში 157 894 ტონა, 2023 წელს კი 96 434 ტონა.

შენიშვნა: TEU (ოცი ფუტის, ანუ ≈6,1 მეტრის ეკვივალენტური ერთეული) წარმოადგენს გლობალური კონტეინერების გადაზიდვის სტანდარტულ საზომ ერთეულს.

დღეს, 12 თებერვალს, „კოალიცია ცვლილებისთვის“ ლიდერმა ნიკა გვარამიამ 8-თვიანი პატიმრობის შემდეგ, რუსთავის N12 პენიტენციურ დაწესებულება დატოვა.

ციხიდან გამოსულ პოლიტიკოსს მეგობრები, ახლობლები, თანაპარტიელები ციხის წინ დილის რვა საათიდან ელოდებოდნენ.

ციხიდან გამოსულმა პოლიტიკოსმა განცხადება გააკეთა ჟურნალისტებთან.

„შერეული ემოციები მაქვს, ყველას ნახვა მიხარია, პირველ რიგში, ჩემი ცოლ-შვილის, მაგრამ უხერხულად ვგრძნობ თავს, რომ ადამიანები იქ რჩებიან კიდევ. არა მხოლოდ ამ ციხეში, არამედ გვერდით, ქალთა ციხეში – უამრავი ადამიანი გლდანის ციხეში, რუსთავში კიდევ საბა [სხვიტარიძე].

უხერხულობა მალე გარდაიქმნება იმად, რომ ბოლომდე ვიბრძოლებ მათ აქედან გამოსაყვანად…

აქ არის ნიკა [მელია], ელენე [ხოშტარია], მიშა [სააკაშვილი], მურთაზი [ზოდელავა], ხაბე [ლევან ხაბეიშვილი], მზია [ამაღლობელი] ბრმავდება გვერდით, ქალთა ციხეში. საბა [სხვიტარიძე] აწამეს. უამრავი ადამიანი ზის ციხეში ბრძოლისთვის და სამშობლოს სიყვარულისთვის. ეს ქვეყანა ვერასდროს იქნება ისეთი, როგორიც აქამდე იყო, მათ დაჭერამდე. ყველამ უნდა ვიცოდეთ, რომ ამ ხალხის გარეშე გამარჯვებაც გაგვიჭირდება, თუ საერთოდ შესაძლებელია, ამიტომ ძალიან მალე ისინი უნდა გამოვიყვანოთ ციხიდან,“ – თქვა ციხიდან გამოსულმა ნიკა გვარამიამ.

მან ისაუბრა ოპოზიციის სამოქმედო გეგმაზე და თქვა:

„ჩემთვის ყველაზე მეტად მნიშვნელოვანია სიტყვების შინაარსი. მე ვიცი ერთი რამ – ერთად უნდა გვხედავდნენ, ერთად უნდა ვმუშაობდეთ და ერთად უნდა მოვიტანოთ ეს შედეგი, იმიტომ, რომ სხვანაირად შეუძლებელია. ამ ყბადაღებულ სიტყვა „ერთობას“ არ გამოვიყენებ, მე არ ვიცი, ამის უკან, ვინ, როგორ, რას მოიაზრებს, ყველა სხვადასხვა რამეს, ერთ პოლიტიკურ სუბიექტს, სალაპარაკო პლატფორმას თუ ასე შემდეგ. ჩემთვის მნიშვნელოვანია მოქმედების პლატფორმა როგორია,“ – თქვა ნიკა გვარამიამ.

გვარამიას თქმით, ის აპირებს ბრძოლას, საქართველოს თავისუფლებისთვის, ევროკავშირის წევრობისთვის და როცა ეს მოხდება, მერე სურს „ჩვეულებრივი ცხოვრებით იცხოვროს“.

„მეც მინდა, რომ ჩვეულებრივი ცხოვრებით ვიცხოვრო, თუნდაც სრულიად არაპოლიტიკით, მაგრამ, მას მერე, რაც ეს ქვეყანა იქნება თავისუფალი, ნამდვილად ქართული და ევროკავშირის წევრი იმიტომ, რომ ყველამ ბედნიერად ვიცხოვროთ, მათ შორის ქოცებმაც.

აქ ვინც ქოცები არიან ახლა [რუსთავის ციხეში], თუ უკვე აღარ არიან ქოცები, მაგრამ მათი ყოფილი თანამდებობის პირები, მაგრამ მე ამ ხალხს პირდაპირ გეტყვით, რაც არ უნდა მოჰყვეს ახლა ამ ჩემს ნათქვამს და ვიცი რომ მოჰყვება აუცილებლად, მე მათ განვიხილავ პოლიტიკურ პატიმრებად… იმიტომ, რომ პოლიტიკური პატიმრობა იზომება არა იმით, ადამიანმა ჩაიდინა თუ არა ეს ქმედება, ან ჩვენ გვგონია, რომ ჩაიდინა თუ არ ჩაიდინა, პოლიტიკური პატიმრობის მთავარი საზომი არის ის, რომ ადამიანს არ ღირსებია და არც ეღირსება ამ ხელისუფლების პირობებში თავისუფალი სასამართლო.

აქ მჯდომ ქოცებსაც არ ღირსებიათ თავისუფალი სასამართლო და არც ეღირსებათ, ვიდრე ქოცები არიან ხელისუფლებაში,“ – თქვა ნიკა გვარამიამ.

ნიკა გვარამიამ განცხადება გააკეთა „8 ოპოზიციონერის დევნის საქმეზეც“ და მისთვის წარდგენილ ხელახალ ბრალზეც.

„არ მაღელვებს, რატომ წამიყენეს ეს ბრალდება. პირიქით, გეუბნებით, რომ უხერხულად ვგრძნობ თავს მაშინ როცა ნიკა, მურთაზი, მიშა, ხაბე, ბაჩო გამოგონილი ბრალით, წარმოუდგენელი იყო რაც ანისთან [ბაჩო ახალაიას მეუღლესთან] დაკავშირებით აკეთეს, არც მე და არც ბაჩოს, რომელმაც ყველაზე დიდი ვადა მოიხადა ამ ციხეში, ეს არავის არ უკვირს, მაგრამ ჩვენი ოჯახების თავს რაც ხდება….

თუმცა არც ეს არ უნდა გვიკვირდეს, იმიტომ, რომ საკუთარი თანამდებობის პირების ოჯახებს რას უშვრებიან, გაშავებას, კატასტროფულს, რომ არ იკადრებ არასდროს, უბრალოდ ნაცნობსაც კი.

ბოლო წვეთი ჩემთვის იყო, როდესაც ბატონი ანზორი ვნახე, ნიკა მელიას ბრალის მერე „ფორმულას“ ეთერში, ეს მართლა ბოლო წვეთია, რაღაცა საზღვრები ალბათ ადამიანური არსებობს, მაგრამ ქოცებისთვის აღარავისთან დაკავშირებით აღარ არსებობს ეს საზღვრები.

ნიკას ვიღა დაეძებს ამ შემთხვევაში, საკუთარ ოჯახის წევრებად რომ ჰყავდათ, მათ ცოლებთან და დედებთან რომ დადიოდნენ სავახშმოდ, კვირაში ერთხელ, იმ ცოლებს და დედებს, ვინც სუფრებს უშლიდათ, იმათ აშავებენ და საშინელებებს წერენ მათზე. ისიც არ გამიკვირდება, რომ ეს ოჯახის წევრები დაიჭირონ.

მე დარწმუნებული ვარ ვინც აქ ბრალი აღიარა და ზის, იმიტომ აღიარა, რომ მათი დაჭერით ემუქრებოდნენ. ამაში ვარ 100 %-ით დარწმუნებული,“ – თქვა ნიკა გვარამიამ.

ნიკა გვარამია 2025 წლის ივლისში დააკავეს ე.წ. წულუკიანის საგამოძიებო კომისიაზე გამოუცხადებლობის გამო. მოსამართლე ჯვებე ნაჭყებიამ მას 8 თვიანი პატიმრობა მიუსაჯა.

„კოალიცია ცვლილებისთვის“ ლიდერი სისხლის სამართლის კოდექსის 349-ე მუხლით გაასამართლეს, რაც საქართველოს პარლამენტის დროებითი საგამოძიებო კომისიის მოთხოვნის შეუსრულებლობას გულისხმობს.

ნიკა გვარამია არ გამოცხადდა „ქართული ოცნების“ პარლამენტში შექმნილ „ნაციონალური მოძრაობისა“ და მისი ლიდერების საქმიანობის შემსწავლელ კომისიის სხდომაზე, რომელ კომისიასაც თეა წულუკიანი ხელმძღვანელობდა.

მსგავსი ბრალდებით ასევე დაკავებული იყვნენ ოპოზიციის სხვა ლიდერებიც, რომელთა ნაწილმაც ასევე დატოვა ციხე. ყველა მათგანს ახალი ბრალდება აქვს წაყენებული.

ამავე თემაზე:

სასამართლომ ოპოზიციის რვა ლიდერის დევნის საქმის განხილვა დაიწყო

See more

„საუბარი აუცილებლად იქნებოდა მდინარაძის ანტიამერიკულ რიტორიკაზე, არა მხოლოდ პარლამენტის ტრიბუნიდან, არამედ უკვე სუს-ის უფროსის თანამდებობიდან და არანაირი საუბარი ამ შემთხვევაში რაღაც სტრატეგიული პარტნიორობის განახლებაზე არ შედგებოდა.

უსაფრთხოების საკითხებზე იქნებოდა მსჯელობა, მით უფრო იმ ფონზე, რაც ირან-ამერიკას შორის მოლაპარაკებების კუთხით ხდება ომანში და იმ სამხედრო ტექნიკის მოძრაობის კუთხით შეერთებული შტატების მხრიდან, რაც ირანის კრიზისიდან გამომდინარეობს,“ – მიიჩნევს პოლიტიკოსი თეონა აქუბარდია. მას „ოცნების“ სუსის უფროსის, მამუკა მდინარაძის აშშ-ში ვიზიტზე ვესაუბრეთ – რა იცვლება საქართველო-აშშ-ს ურთიერთობებში, განსაკუთრებით მას შემდეგ, როცა აშშ-მ თავისი ინტერესები სამხრეთ კავკასიაში მკაფიოდ გამოხატა?

„ის, რომ ამერიკას ხელი აქვს საქართველოზე ჩაქნეული, ამას არ ვეთანხმები – ამერიკა კიდევ უფრო მძლავრად შემოვიდა რეგიონში და რუსეთის გავლენები ისევე, როგორც ირანის გავლენები, შეასუსტა.

ივანიშვილი აკვირდება, რას იზამს ამერიკა ერთის მხრივ რეგიონში, რა მოხდება უკრაინაში და აქედან გამომდინარე იმოქმედებს.

„ოცნებას“ მოლოდინი აქვს, რომ რახან საქართველო რუკაზე შუა დერეფნის კუთხით მნიშვნელოვან ფუნქციას ასრულებს, გეოგრაფიის გამო მიიღებენ ისეთად, როგორიც არიან. ეს ასე რომ არ ხდება, ამაში კიდევ უფრო მეტად დარწმუნდება ივანიშვილი ახლო მომავალში. მან უნდა გააკეთოს ის, რაც უთხრეს ამერიკიდან და შეცვალოს ის, რაც უთხრეს, ან გაგრძელდება სტრატეგიულად უმნიშვნელო მდგომარეობა და ჩიხი, რომელიც მხოლოდ და მხოლოდ რუსეთს აწყობს,“ – მიიჩნევს თეონა აქუბარდია.

„ბათუმელებმა“ თეონა აქუბარდიასთან ინტერვიუ ჩაწერა. იგი პარლამენტის ყოფილი წევრი და უშიშროების საბჭოს მდივნის ყოფილი მოადგილეა.

• ქალბატონო თეონა, სუს-ის ინფორმაციით, მამუკა მდინარაძე 7-10 თებერვალს სამუშაო ვიზიტით ამერიკის შეერთებულ შტატებში იყო, კოლეგებმა მიიწვიესო. დამაჯერებელია სუს-ის ეს განცხადება, რომ „შეხვედრა უსაფრთხოების საკითხებთან დაკავშირებით გაიმართა“? 

დამაჯერებელი არის ის, რომ უსაფრთხოების საკითხებს შეეხებოდა მისი ვიზიტი, თუმცა აქ არის მთავარი პრობლემა: ჩვენ გვახსოვს მამუკა მდინარაძის სუს-ის სავარძლიდან გაკეთებული ანტიამერიკული განცხადება, რასაც მოჰყვა ელჩის – ტალიაშვილის დაბარება სახელმწიფო დეპარტამენტში. ამას უარყოფდა თავიდან ირაკლი კობახიძე, მაგრამ შემდგომ შეერთებულმა შტატებმა დაადასტურა, რის გამოც დაიბარეს ტალიაშვილი, რომ დაგმეს მამუკა მდინარაძის განცხადება.

• ეს შეეხებოდა მამუკა მდინარაძის ცნობილ განცხადებას? სუს-ის უფროსმა მამუკა მდინარაძემ 2025 წლის პირველ ოქტომბერს განაცხადა, რომ „გაშიფრეს“ სხვადასხვა არხი, რომლითაც საქართველოში რევოლუციური მიზნები ფინანსდება, მაგალითად, ტაილანდიდან ერთ-ერთი დიდი საელჩოს „ანტიჩინური მიზნებისათვის დაფინანსებული ადამიანები ჰყავს საქართველოში და სინამდვილეში, დაახლოებით 95-98%-ის შემთხვევაში ეს თანხა ხმარდება ხელისუფლების წინააღმდეგ მიმართულ რადიკალებს, რევოლუციურ მიზნებს, სხვადასხვა პერფორმანსებს, დადგმებს“.

კი ბატონო. სახელმწიფო დეპარტამენტს შესაბამისი რეაგირება უნდა გაეკეთებინა სუს-ის უფროსის ამ განცხადებაზე.

ჩვენ გვახსოვს გრიგოლ ლილუაშვილის საიდუმლო ვიზიტი, მათ შორის, შეერთებულ შტატებში, ეს იყო წინასაარჩევნო პერიოდში, 2024 წელს. მაშინ გახარიამ განაცხადა, რომ ის იყო ივანიშვილის შიკრიკი და ურთიერთობების დალაგების მცდელობა ჰქონდათ, თუმცა ეს ყველაფერი წარმატებით არ დამთავრდა.

მეორეს მხრივ, არის სუს-ის ვებგვერდზე ინფორმაცია გომელაურის, რომელიც იმ დროს სუს-ის უფროსი იყო, შეერთებულ შტატებში ვიზიტზე, როცა ის ემზადებოდა ამ შეხვედრისთვის: ვის უნდა შეხვედროდა, რა შეხვედრა იმართებოდა, ამ შეხვედრის დეტალები. თუ მდინარაძე მიდიოდა შეერთებულ შტატებში, ეს წინასწარ შეეძლო ეთქვა, ისევე, როგორც გომელაურმა თქვა 2017 წელს. ეს არ მომხდარა.

ბუნებრივია, უსაფრთხოების საკითხებზე იქნებოდა მსჯელობა, მით უფრო იმ ფონზე, რაც ირან-ამერიკას შორის მოლაპარაკებების კუთხით ხდება ომანში და იმ სამხედრო ტექნიკის მოძრაობის კუთხით შეერთებული შტატების მხრიდან, რაც ირანის კრიზისიდან გამომდინარეობს.

თუ გავიხსენებთ ლაშა დარსალიას [„ოცნების“ მთავრობის საგარეო საქმეთა მინისტრის მოადგილე] ვიზიტს შეერთებულ შტატებში, რაც ასევე სახელმწიფო დეპარტამენტისგან გავიგეთ და არა მაკა ბოჭორიშვილის კანტორიდან, იქაც საუბარი ეხებოდა ჩვენს რეგიონში არსებულ ვითარებას. ამიტომაც, დარწმუნებული ვარ, აშშ-ში იქნებოდა საუბარი, მათ შორის, უსაფრთხოების საკითხებზე, მით უფრო, თუ გავიხსენებთ იმას, რომ სუს-ში გაერთიანდა დაზვერვის სამსახურის ფუნქციები. დაზვერვის სამსახურს აქტიური თანამშრომლობა ჰქონდა ჩვენს დასავლელ პარტნიორებთან წარსულში.

ვფიქრობ, რომ საუბარი აუცილებლად იქნებოდა მდინარაძის ანტიამერიკულ რიტორიკაზე, არა მხოლოდ პარლამენტის ტრიბუნიდან, არამედ უკვე სუს-ის უფროსის თანამდებობიდან და არანაირი საუბარი ამ შემთხვევაში სტრატეგიული პარტნიორობის განახლებაზე არ შედგებოდა.

• ანტიამერიკული განცხადებები ჰქონდათ „ოცნების“ სხვა ლიდერებსაც. რატომ შეიძლება გამხდარიყო მამუკა მდინარაძის განცხადება აშშ-თვის განსაკუთრებული ინტერესის ობიექტი? 

იმიტომ, რომ მდინარაძეს აქვს განსაკუთრებული თანამდებობა სუს-ის უფროსის სახელით. სუსი ყოველთვის იყო აქტიურ თანამშრომლობაში ამერიკის შეერთებულ შტატებთან, იქნებოდა ეს კონტრტერორიზმის საკითხები, ქიმიური, ბიოლოგიური, რადიაციული უსაფრთხოების კუთხით, ერთობლივი სწავლებები მიმდინარეობდა სუს-ში, მათ შორის, ამერიკული მხარის ჩართულობით ამ მიმართულებით.

უკვე ტრადიციად იყო ჩამოყალიბებული შეერთებული შტატების თანამშრომლობა სუს-თან, რაც ბოლო პერიოდში აღარ შეინიშნებოდა – მას შემდეგ, რაც მდინარაძე დაინიშნა.

ვფიქრობ, რომ მდინარაძეს მოუწევდა ბოდიშის მოხდა მისი განცხადების გამო, რაც ტყუილი ინფორმაცია იყო და არ შეესაბამებოდა სიმართლეს.

დარწმუნებული ვარ, იქნებოდა საუბარი შეცვლილ გეოპოლიტიკურ ვითარებაზე რეგიონში, მათ შორის, ირანის საკითხზე. შეერთებული შტატები აცხადებს მესამე ქვეყნებისთვის სანქციების დაწესებაზე. ის, რომ ჩვენ ირანთან ვაჭრობა გვაქვს, ასევე, საკმაოდ კეთილმეზობლური ურთიერთობები ირაკლი კობახიძეს ირანის რეჟიმთან, ესეც სიახლეს არ წარმოადგენს. ამიტომ, რა თქმა უნდა, ამერიკის ინტერესებიდან გამომდინარე, ამ საკითხებზე იქნებოდა საუბარი.

ამერიკა კიდევ უფრო აქტიურად შემოდის რეგიონში: სომხეთ-აზერბაიჯანთან გაფორმებული სტრატეგიული პარტნიორობით და დიდი ინვესტიციებით, რომელიც ჩვენ ვნახეთ ჯეი დი ვენსის ვიზიტიდან გამომდინარე ერევანსა და ბაქოში.

• რა იცვლება სამხრეთ კავკასიაში აშშ-ის ინტერესის გააქტიურებით, სად არის საქართველოს ადგილი?

ამერიკას მოაქვს გრძელვადიანი მშვიდობა რეგიონში, იმ რეგიონში, სადაც რუსეთის აქტიური ჩარევით კონფლიქტები იყო და რომლის მოგვარებაც რუსეთის ჩარევით არ ხდებოდა.

სახელწოდება TRIPP ამას მოწმობს, რომ რუსეთს არანაირი ადგილი და როლი არ აქვს ახალ დერეფანში. იკვეთება ამერიკის გაძლიერებული ინტერესები ჩვენს რეგიონში. ეს არის განაცხადი, რომ ამ რეგიონში რუსეთის გავლენების ფეხის ამოსაძირკვად არის ეს ყველაფერი.

თუ აქამდე საქართველო იყო რეგიონში ამერიკის დასაყრდენი ძალა და დემოკრატიის შუქურას ეძახდნენ საქართველოს, ეს ამ შემთხვევაში გადავიდა სომხეთ-აზერბაიჯანზე. დარწმუნებული ვარ, რომ მიუხედავად იმისა, რომ დღეს სტრატეგიული პარტნიორობა აღარ გვაქვს ამერიკის შეერთებულ შტატებთან ივანიშვილის „დამსახურებით“ და არანაირი მაღალი დონის კონტაქტები, საქართველოს მიმართ კვლავ იქნება შეერთებული შტატების გარკვეულწილად ინტერესი, აი, ამ ახალი ინიციატივებიდან გამომდინარე.

შუა დერეფნის პროექტში საქართველო რუკაზე არის. მთავარი პრობლემა არის ის, რომ ეს არის შესაძლებლობის ხელიდან გაშვება – გეოპოლიტიკური როლის და ფუნქციის, რასაც ივანიშვილის რეჟიმი აკეთებს.

ლუქსემბურგში ევროკავშირის ინიციატივით გაიმართა მოლაპარაკებები შუა დერეფნის განვითარებასთან დაკავშირებით, შემდეგ უკვე ტაშკენტში კონკრეტულად შუა დერეფნის განვითარებაში ინვესტიციებს განიხილავდნენ – აქაც იყო სომხეთი და აზერბაიჯანი, როგორც სატრანზიტო ქვეყნები, მაგრამ არ იყო საქართველო მიწვეული.

ეს ყველაფერი აჩვენებს იმას, რომ თავისთავად გეოგრაფია არაფერს არ იძლევა, თუ არ იქნება შესაძლებლობა გამოყენებული.

ამ შესაძლებლობას სჭირდება სანდოობა, სჭირდება შესაბამისი ინსტიტუტები. არა – რიტორიკა, რომელიც დასავლეთის წინააღმდეგ არის ივანიშვილის რეჟიმის მხრიდან გამოყენებული, არამედ პარტნიორობაზე დაფუძნებული ურთიერთობები, რის ადგილიც აღარ არის ივანიშვილის პირობებში საქართველოში.

• მდინარაძის ვიზიტი აშშ-ში, ფიქრობთ, რომ არ უკავშირდება ურთიერთობების გადახედვას? ყაველაშვილი ამბობდა, ვენსისგან ურთიერთობების გადატვირთვის დაპირება მივიღეო. 

ეს ჩვეულებრივი ტყუილია. ურთიერთობის გადატვირთვის შესაძლებლობა, რა თქმა უნდა, ივანიშვილის რეჟიმს აქვს და ჰქონდა. გაგახსენებთ ელჩი დეგნანის განაცხადს, რომ სამი წინაპირობა იყო რუბიოს მხრიდან წამოყენებული იმისთვის, რომ ურთიერთობები განახლებულიყო. ერთ-ერთი ამ სამ პირობას შორის და უპირველესი იყო ანტიამერიკული პროპაგანდის შეწყვეტა, რაც მდინარაძემ არ გააკეთა და ივანიშვილის უარი ელჩთან შეხვედრაზე რუბიოს გზავნილების მოსასმენად.

ამიტომაც, ამერიკას თავისი წინაპირობები აქვს უკვე დაყენებული ივანიშვილის რეჟიმთან: როგორ უნდა მოიქცეს იმისთვის, რომ ეს ურთიერთობები განახლდეს.

• ივანიშვილის „ოცნების“ წევრები გამოირჩევიან ანტიევროპული რიტორიკით, ანტიამერიკულით – ნაკლებად. ეს რატომ ხდება, თქვენი აზრით?

იცით რა არის? შეიძლება მამუკა მდინარაძე აღარ აბრალებს რევოლუციის მოწყობას შეერთებულ შტატებს, მაგრამ მეორეს მხრივ არსებობს ზაზა შათირიშვილი, რომელიც არის ივანიშვილის კარის ფილოსოფოსი. ის არათუ ამერიკას აბრალებს „დიფ სთეითობას”, არამედ უშუალოდ თავად პრეზიდენტ ტრამპსაც და ამბობს, რომ მშვიდობის კი არა, ომის კაცია.

მე ვერ ვხედავ, რომ ანტიამერიკულმა გზავნილებმა იკლო, შათირიშვილის, აი, ამ ცნობილი წერილების შემდგომ – მით უმეტეს.

• შათირიშვილის ბოლო წერილით ჩანს, რომ ივანიშვილს აღარ აქვს ტრამპთან ურთიერთობების რაიმე ფორმით დალაგების იმედი?

დიახ. ყულევის ტერმინალის სანქცირების საკითხი ევროკავშირის მხრიდან და ირანთან დაკავშირებით შეერთებული შტატების განცხადება მესამე ქვეყნების სანქციებზე, რა თქმა უნდა, კიდევ უფრო აძლიერებს წნეხს, რომელიც არის ივანიშვილის რეჟიმზე…

სულაც არ არის სასარგებლო ვითარება ივანიშვილისთვის, თუმცა, გამომდინარე იქიდან, რომ ირანთან მიმართებაში მიმდინარეობს მოლაპარაკება, საქართველო არის შეერთებული შტატებისთვის ინტერესის ქვეყანა. მე გაგახსენებთ ორი სამხედრო თვითმფრინავის დაჯდომის პრეცედენტს საქართველოში და იმას, რომ აზერბაიჯანი ამ შესაძლებლობაზე უარს ამბობს გამომდინარე მისი ინტერესებიდან. ბუნებრივია, სიტუაციურად, დაბალ დონეზე გარკვეული საუბრები მიმდინარეობს, რაც გასაგები და აბსოლუტურად ახსნადია.

• ამიტომაც, საინტერესოა, როგორ ხედავს აშშ საქართველოს, თქვენი აზრით? რა შეიმჩნევა აშშ-ს პოზიციონირებით ჩვენს რეგიონში? 

ის, რომ ამერიკას ხელი აქვს საქართველოზე ჩაქნეული, ამას არ ვეთანხმები – ამერიკა კიდევ უფრო მძლავრად შემოვიდა რეგიონში და რუსეთის გავლენები ისევე, როგორც ირანის გავლენები, შეასუსტა. არანაირი „სამი პლუს სამი” ფორმატი აღარ არსებობს, სადაც ირანი და რუსეთი იყო. ეს ყველაფერი დამთავრდა. არსებობს მხოლოდ და მხოლოდ ამერიკული და დასავლური ინვესტიციები რეგიონში, განსხვავებით საქართველოსგან.

თუ გადატვირთვაზე არის საუბარი, ბუნებრივია, ამერიკა დაინტერესებულია, რომ საქართველო დაუბრუნდეს ძველ ხაზს და ამისთვის წინაპირობები გადაცემულია მისთვის. ამიტომაც, ბურთი არის ივანიშვილის მოედანზე.

• თქვენი აზრით, ამერიკას მოლოდინი აქვს, რომ ივანიშვილი შეასრულებს რომელიმე მოთხოვნას? 

არა, ამერიკას არ აქვს ეს მოლოდინი. ეს მოლოდინი რომ ჰქონდეს, დღეს ელჩი მაინც გვეყოლებოდა შეერთებული შტატების საქართველოში, მაგრამ ბურთი არის ივანიშვილის მოედანზე ცალსახად და ჩვენ ამის შესახებ გავიგეთ ყოფილი ელჩი დეგნანისგან, რომელმაც თქვა, თუ რა არის გასაკეთებელი იმისთვის, რომ ურთიერთობები განახლდეს.

ივანიშვილმა უარი თქვა ამ გზავნილების მოსმენაზე.

• რა გამოდის, ასე შეიძლება გაგრძელდეს: აშშ სამხრეთ კავკასიაშია და არ იმჩნევდეს საქართველოს, სადაც ამდენი რესურსი დახარჯა? 

კი, შეიძლება ასე გაგრძელდეს და უმაღლეს დონეზე არ იყოს არანაირი კონტაქტი. დაბალ დონეზე, დარწმუნებული ვარ, კომუნიკაცია მიმდინარეობს, მათ შორის ირანთან დაკავშირებით და ლაშა დარსალიას ვოიაჟიც ამას მოწმობს.

• ჰელსინკის კომისიაში დღეს საქართველოს შესახებ მოსმენა გაიმართება განსხვავებული აზრის დევნის გამო. რა მოლოდინი გაქვთ? 2026 წლის იანვარში ჰელსინკის კომისიამ მკაცრად გააკრიტიკა „ოცნება“ – „ქართულმა ოცნებამ“ საქართველო დამოუკიდებლობის შემდეგ ყველაზე უარეს კრიზისში ჩაითრიაო“. 

მიუხედავად იმისა, რომ გარკვეულწილად ცრუ მოლოდინებს ქმნის ივანიშვილის რეჟიმი ამერიკასთან ურთიერთობების გადატვირთვის კუთხით, ხოლო ჰელსინკის კომისიის განხილვას ფარატინა ქაღალდს უწოდებს, რა თქმა უნდა, ეს არის მისთვის ძალიან მძიმე.

ერთის მხრივ, ეს არის ორპარტიული განხილვა ამერიკის მხრიდან, მით უფრო მაშინ, როდესაც კიდევ უფრო მეტი რეპრესიები გრძელდება ოპონენტების წინააღმდეგ, ფუნდამენტური უფლებები ფეხქვეშ ითელება და აბსოლუტურად დრაკონული კანონები საბჭოთა კავშირში აბრუნებს საქართველოს.

არ ვფიქრობ, რომ ჰელსინკის კომისიის განხილვა მათთვის არ არის საინტერესო, მით უფრო, როდესაც რეგიონში ვენსი იყო ჩამოსული, აშშ-ს ვიცე-პრეზიდენტი და საქართველოს გვერდი აუარა.

ამას ექნება მძიმე შედეგები რეჟიმისთვის, თუმცა საქართველოსთვისაც აქვს მძიმე შედეგები, ივანიშვილის რეჟიმის პირობებში – ქვეყანა ძალიან ბევრ შესაძლებლობას უშვებს ხელიდან, მათ შორის, შუა დერეფნის პოტენციალის გამოყენებას მაშინ, როდესაც საჭირო ინფრასტრუქტურა საქართველოს არც კი მოუმზადებია, იქნება ეს ანაკლიის პორტი, რომელიც არასდროს არ ააშენა ივანიშვილის რეჟიმმა, თუ სხვა ლოჯისტიკური ინფრასტრუქტურის მოდერნიზაცია, რისი ვალდებულებაც ჰქონდათ.

• ამ შესაძლებლობების გამოუყენებლობა და იზოლაცია რატომ აწყობს ივანიშვილს? თქვენი აზრით, ივანიშვილს სჯერა, რომ რუსეთი, რომელიც დღითიდღე სუსტდება, მხარს დაუჭერს ავტორიტარული რეჟიმის შენარჩუნებაში? 

თუ ვლაპარაკობთ ანაკლიის პორტზე, გვითხრეს ჩვენ, რომ ჩინეთის სახელმწიფო კომპანიასთან კონტრაქტი ფორმდებოდა, შემდეგ შევიტყვეთ, რომ ამ ჩინური კომპანიის შვილობილი კომპანია იყო დასანქცირებული ამერიკის მხრიდან. შემდგომ ვიგებთ მარიამ ქვრივიშვილისგან, რომ ჯერჯერობით არ არის დასრულებული შეთანხმება ჩინეთთან. ეს აჩენს გარკვეულ ვარაუდებს, რომ შეერთებული შტატების პოზიციიდან გამომდინარე ეს ყველაფერი გაჩერებულია.

ვფიქრობ, ივანიშვილი აკვირდება, რას იზამს ამერიკა ერთის მხრივ რეგიონში, რა მოხდება უკრაინაში და აქედან გამომდინარე იმოქმედებს. „ოცნებას“ მოლოდინი აქვს, რომ გეოგრაფიულად რახან საქართველო რუკაზე შუა დერეფნის კუთხით მნიშვნელოვან ფუნქციას ასრულებს, გეოგრაფიის გამო მიიღებენ ისეთებად, როგორებიც არიან. ეს ასე რომ არ ხდება, ამაში კიდევ უფრო მეტად დარწმუნდება ივანიშვილი ახლო მომავალში.

მან უნდა გააკეთოს ის, რაც უთხრეს ამერიკიდან და შეცვალოს ის, რაც უთხრეს, ან გაგრძელდება სტრატეგიულად უმნიშვნელო მდგომარეობა და ჩიხი, რომელიც მხოლოდ და მხოლოდ რუსეთს აწყობს.

• ცვლის რამეს ივანიშვილი საგარეო პოლიტიკაში? მიუნხენის კონფერენციაში საგარეო საქმეთა მინისტრი მიიღებს მონაწილეობასო. 

არა, აბსოლუტურად არაფერს არ ცვლის მაკა ბოჭორიშვილი მიუნხენის კონფერენციაზე. თუ მოწვევა იყო ირაკლი კობახიძეზე გამოგზავნილი, მაშინ ირაკლი კობახიძემ უნდა გასცეს პასუხი, რატომ არ მიდის მიუნხენის კონფერენციაზე, მით უფრო მაშინ, როდესაც 50 ქვეყნის მეთაური ესწრება ღონისძიებას და მას ექნებოდა პლატფორმა, იქიდან რაღაც წამოეღო.

კობახიძემ იცის, რომ ის არის კაცი, რომელსაც ხელს არავინ ართმევს და არავინ არ ელაპარაკება. ამიტომაც, არ მიდის იქ და აგზავნის მაკა ბოჭორიშვილს, სურათი რომ გადაიღოს და შემდგომ გაყიდოს, რომ რაღაც პატარა მიღწევა აქვს.

მით უფრო, ასეთი გეოპოლიტიკური ცვლილებებია. ის აბსოლუტური მონოპოლია, რომელიც საქართველოს ჰქონდა სომხეთ-აზერბაიჯანის კონფლიქტიდან გამომდინარე, დღეს რადიკალურად შეიცვალა, აშშ-მა მშვიდობა მოიტანა რეგიონში, რუსეთს მოუწია გასვლა სომხეთ-აზერბაიჯანიდან… ირაკლი კობახიძეს არაფრის რესურსი არ აქვს, ის არის კაცი, რომლის გუნდისთან ერთად საქართველოს აქვს მხოლოდ და მხოლოდ მარცხი საგარეო პოლიტიკის და უსაფრთხოების ასპარეზზე. მე ამით ვხსნი, რომ ის იქ ვერ მიდის და არ მიდის.

ირაკლი კობახიძე ორი წელია თავის თავს უწოდებს პრემიერს. ჯერ კიდევ 2024 წელს, როდესაც იგი პრემიერად დანიშნა ივანიშვილმა, არც მაშინ არ წასულა უსაფრთხოების კონფერენციაზე, იქ იყო სალომე ზურაბიშვილი. შარშან, ბუნებრივია, იმ სისხლიანი დარბევების შემდგომ, რომელიც მათ მოაწყვეს საქართველოში, თავი რომ დავანებოთ ქიმიური მოწამვლის ამბავს, ისინი იქ უბრალოდ ვერ გამოჩნდებოდნენ და წელს მაკა ბოჭორიშვილის ხელის ჩამორთმევის ფოტოთი აპირებს გაყიდოს რაღაც ილუზია.

• მამუკა მდინარაძემ რატომ არ გამოაქვეყნა, თქვენი აზრით, აშშ-ში ვიზიტის ამსახველი ფოტო? 

გამომდინარე უსაფრთხოების საკითხებიდან, შესაძლებელია ფოტო არ ყოფილიყო, მაგრამ იგივე სუსის სტანდარტით, მაგალითად, გომელაურის შემთხვევაში, მან წინასწარ დააანონსა ვიზიტი, მათ შორის, ის, თუ ვის ხვდებოდა, რა თანამდებობის პირებს და რა საკითხებზე ისაუბრებდნენ. ამიტომაც, ეს არის მათი სტანდარტის გაუარესება.

ბევრ კითხვას აჩენს ის მშრალი ინფორმაცია, რაც სუს-მა დღეს წარმოადგინა.

მნიშვნელოვანია, რომ როცა 4 თებერვალს გასაჯაროვდა, რომ მდინარაძე იყო ამერიკაში, სუს-მა უარყო ეს ინფორმაცია და ახლა თქვეს, კი, 7-დან 10-მდე იყო და არა 4-შიო. ირაკლი კობახიძეც უარყოფდა, რომ ტალიაშვილი ამერიკაში არ დაიბარეს და მერე ამერიკამ თქვა, კი, დაბარებული იყო და რაც თქვა, ისიც საჯაროდ დადო.

• ივანიშვილს ფსონი აქვს ისევ რუსეთის მოგებაზე? 

რა თქმა უნდა. ყულევის ნავთობგადამამუშავებელი ვითომ საწარმო, რომელიც არ აშენებულა, სწორედ ამას მოწმობს, რომ რუსული სანქცირებული ნავთობის შემოტანით გამდიდრება არის ერთი ამოცანა. მეორეა: რუსეთის ომის გაძლიერება და დახმარება უკრაინის წინააღმდეგ.

როცა ოკუპანტ სახელმწიფოს ეხმარები შენი სტრატეგიული პარტნიორის წინააღმდეგ, ეს, რა თქმა უნდა, რუსეთის მხარეს თამაშს ნიშნავს და შენი ტერიტორიული მთლიანობის წინააღმდეგ მოქმედებას. აქ სხვა მარტივ ჭეშმარიტების არანაირი შანსი არ არსებობს. ყველას გაგახსენებთ, რატომ არის ივანიშვილი სანქცირებული ამერიკის მხრიდან – რუსეთის სასარგებლო ქმედებების გამო.

სურსათის უვნებლობის სააგენტოს ცნობით, ოზურგეთში ორი ობიექტი გამოავლინეს, სადაც ხორცსა და ხორცპროდუქტებს კუსტარულად აწარმოებდნენ.

საუბარია არალეგალურ საწარმოებზე.

„ფიზიკური პირი ა. კ. (თაყაიშვილის N1) კუსტარულად მოწყობილ ობიექტზე, სააგენტოსაგან მინიჭებული სავალდებულო აღიარების გარეშე, სანიტარიულ-ჰიგიენური ნორმების დარღვევით აწარმოებდა ხორცს.

ხოლო ინდმეწარმე ზ. ა. (გურიის ქ. N35) ვეტერინარული ზედამხედველობისა და სააგენტოსაგან მინიჭებული სავალდებულო აღიარების გარეშე საქმიანობდა თვითნებურად მოწყობილ სასაკლაოში“ – წერს სურსათის უვნებლობის სააგენტო.

უწყების ცნობით,  ორივე ობიექტზე გამოვლინდა კრიტიკული შეუსაბამობები, დაილუქა საეჭვო წარმომავლობის 135 კგ-ზე მეტი გოჭისა და ფრინველის ხორცი და გულ-ღვიძლი.

ბიზნესოპერატორები დაჯარიმდნენ და შეუსაბამობების აღმოფხვრამდე შეუჩერდათ საწარმოო პროცესი.

სააგენტო მოუწოდებს მომხმარებელს, არ შეიძინონ სურსათი, განსაკუთრებით ხორცი და ხორცპროდუქტები, არაორგანიზებული ვაჭრობის პირობებში და ჯანმრთელობის ნიშანდების გარეშე.

ბათუმის თოჯინების თეატრს რეჟისორი სალომე ჯიჯავაძე უხელმძღვანელებს.

ახალი დირექტორი ბათუმის თოჯინებისა და მოზარდ მაყურებელთა პროფესიულ სახელმწიფო თეატრში დღეს, 11 თებერვალს წარადგინეს.

ოფიციალური ბიოგრაფიის მიხედვით, სალომე  ჯიჯავაძეს დამთავრებული აქვს თბილისი ილია ჭავჭავაძის სახელმწიფო უნივერსიტეტი, დრამის რეჟისურის სპეციალობით.

მისი რეჟისორობით დადგმულია სპექტაკლები ბათუმის დრამატულ და თოჯინების თეატრებში.

ბათუმის თოჯინების თეატრის დირექტორის პოსტი მას შემდეგ გახდა ვაკანტური, რაც თეატრის ხელმძღვანელი ირაკლი კიკვაძე აჭარის ტელევიზიისა და რადიოს დირექტორად დანიშნეს.

 

 

რეჟისორი გეგა გაგნიძე, რომლის სპექტაკლიც ბათუმის დრამატული თეატრის ადმინისტრაციამ გააუქმა, თეატრის გადაწყვეტილებას ფეისბუქზე ეხმიანება.

პოსტში, რომელიც 10 თებერვალს, გვიან საღამოს გამოქვეყნდა, გეგა გაგნიძე თეატრის დირექტორის გადაწყვეტილებას „უმეცრებას და უგუნურებას“ უწოდებს.

„დრო-ჟამი ამას გვიქადის… რა გითხრათ? რით გაგახაროთ?”

ბათუმის დრამატული თეატრის ადმინისტრაციის გადაწყვეტილება გამოწვეულია უმეცრებითა და უგუნურებით.

ასე ხდება მაშინ, როცა საჯარო თანამდებობაზე ხელდასხმული ადამიანი პასუხისმგებელია მის ხელდამსხმელთან და არა საზოგადოების წინაშე (იხილეთ საქართველოს უახლესი ისტორია).

ამ უგუნურ და უმეცარ გადაწყვეტილებაზე ადმინისტრაციასთან ერთად თანაბრად პასუხისმგებელია თეატრის სამხატვრო საბჭო. მათ შორის საბჭოს ის წევრები, რომლებიც მხოლოდ საზოგადოების რეაქციის შემდეგ აღშფოთდნენ და გაემიჯნნენ თეატრის ადმინისტრაციის განცხადებას. ამას ფლიდობა ეწოდება.

ამ უგუნურების ჩადენამდე, (უკაცრავად ტავტოლოგიისთვის) ერთი დღით ადრე თეატრის დირექტორმა შემომითვალა, რომ თურმე „მაღლა“ ზარი იყო შესული და თუ სპექტაკლში პოლიტიკური ნარატივი დარჩებოდა, პრემიერა ვერ შედგებოდა.

იმ ერთ ცხოვრებას რა ვუთხარი, ჩემს შემოქმედებაში ვინმეს მაამებლად რაიმეს ვიტყვი, ან რაიმეზე დავდუმდები.

ბათუმის დრამატული თეატრის ხელმძღვანელობას და საბჭოს წევრებს გირჩევთ, ლაფის ჩამოსაწმენდად, სატელევიზიო საინფორმაციო ბადეებსა და თეატრის დერეფნებში მტკნარი ტყუილებისა და მოგონილი ბრალდებების საკენკად დაყრას შეეშვათ.

მე მართალი ვარ შემოქმედებით ჯგუფთან, რომელთან ერთადაც 2 თვეზე მეტი ვიშრომე!

მართალი ვარ თეატრის წინაშე.

მართალი ვარ ბათუმელებთან;

გათენებულ ღამეებთან,

საკუთარ პროფესიასთან;

საკუთარ სინდისთან და სამოქალაქო პოზიციასთან.

გულითად მადლობას ვუხდი ყველა ადამიანს, ვინც უხილავი შრომისთვის გაისარჯა.

მადლობა სცენის მემანქანეებს, მკერავებს, სადადგმო ნაწილის ხელმძღვანელს, თანაშემწეს, დამლაგებლებს, დაცვის თანამშრომლებს, კოსტიუმების ჩამცმელებს, გამხმოვანებლებს, გამნათებელს, ადმინისტრატორს, კაპელდინერებს, რომელთა გაცნობაც არ დამცალდა; უნიჭიერეს მსახიობებს შესანიშნავი რეპეტიციებისთვის; ანუშკა ჩხეიძეს – არაჩვეულებრივი მუსიკისთვის; მარიამ ძმანაშვილს – საოცარი კოსტიუმებისთვის და სცენოგრაფიისთვის; ამიკოს და ზაზას – ვიდეო საოცრებებისთვის; მოზგის – აუდიორეაქციული განათებისთვის; რეზის – მხატვრული განათებისთვის; სამხატვრო საბჭოს ერთადერთ წევრს, კახა კობალაძეს, ღირსეული პოზიციისთვის!

მადლობას ვუხდი ყველას, ვინც გამომრჩა.

მადლობას ვუხდი, მეგობრებს, კოლეგებსა და უცნობ ადამიანებს მხარდაჭერისთვის“- წერს გეგა გაგნიძე ფეისბუქზე.

ის აქვე დასძენს, რომ არსად წასვლას არ გეგმავს და საქართველოში რჩება.

„არსად წასვლად არ ვაპირებ, არც პოლიტიკური თავშესაფარი მჭირდება, არც „რეპრესირებული ხელოვანის“ სტატუსი. ვრჩები ჩემს სამშობლოში და ვაგრძელებ ჩემი საყვარელი საქმის კეთებას. იქ, სადაც „მოსალოდნელ სუბიექტურ პოლიტიკურ აქტად“ არ მომინათლავენ სცენებს სპექტაკლიდან, უხილავი სპექტაკლიდან, სათვალთვალო კამერებში ნანახი სპექტაკლიდან“ – წერს გეგა გაგნიძე.

ბათუმის დრამატული თეატრის ადმინისტრაციამ სპექტაკლის DARK WEB-ის პრემიერის ჩვენების გაუქმების შესახებ 6 თებერვალს გააკეთა განცხადება.

ადმინისტრაციის განცხადებით, სპექტაკლის გაუქმების მიზეზი პოლიტიკურია.

„თეატრის ადმინისტრაციისთვის ცნობილი გახდა, რომ რეჟისორი გეგა გაგნიძე თეატრის დიდ სცენაზე, სპექტაკლში გეგმავდა სუბიექტური პოლიტიკური აქტის განხორციელებას“- ეწერა ოფიციალურ განცხადებაში.

აღნიშნული ფაქტი სახელოვნებო სფეროს წარმომადგენლებმა ცენზურად შეაფასეს და აღნიშნეს, რომ მსგავსი პრეცედენტი შემაშფოთებელია.

ფოტოზე: სპექტაკლ DARK WEB-ის რეპეტიცია

________________

ამ თემაზე:

„პოლიტიკის და ხელოვნების გამიჯვნა შეუძლებელია. „ოცნება“ ცენზურას უკვე აღარ მალავს “- ინტერვიუ

See more

„თუ კიდევ წინ წაიწია სომხეთის და აზერბაიჯანის ურთიერთობის მოლაპარაკება, რუსეთი რეალურად კარგავს სამხრეთ კავკასიას. გამოდის, რომ საქართველო რჩება მხოლოდ რუსეთის, ასე ვთქვათ, ჰოლდინგში. ეს რამდენიმე წლის წინ უტოპიურად ჩანდა, დღეს ძალიან საწყენია, მაგრამ ასეა.

ამ შეხვედრებს განსაკუთრებული პოლიტიკური წონა და მნიშვნელობა აქვს. ეს არის ძალიან სერიოზული განაცხადი იმაზე, რომ ამერიკის შეერთებული შტატები სამხრეთ კავკასიაშია,“ – ამბობს კავკასიოლოგი გიორგი მჭედლიშვილი. მას აშშ-ის ვიცე-პრეზიდენტის, ჯეი დი ვენსის სომხეთსა და აზერბაიჯანში ვიზიტზე ვესაუბრეთ.

ჯეი დი ვენსმა ხელი მოაწერა აზერბაიჯანსა და აშშ-ის შორის სტრატეგიული პარტნიორობის შესახებ ქარტიას, ფაშინიანს კი, ვენსმა მხარდაჭერა გამოუცხადა მოახლოებულ არჩევნებში.

რა იცვლება აშშ-ის ვიცე-პრეზიდენტის სამხრეთ კავკასიაში ვიზიტით? – „ბათუმელებმა“ გიორგი მჭედლიშვილთან ინტერვიუ ჩაწერა. იგი ევროპის უნივერსიტეტის ასოცირებული პროფესორია და საერთაშორისო ურთიერთობის სპეციალისტი, მუშაობს სამხრეთ კავკასიის და პოსტსაბჭოთა სივრცის საკითხებზე.

• ბატონო გიორგი, აშშ-ს ვიცე-პრეზიდენტი ჯეი დი ვენსი სომხეთს და აზერბაიჯანს სტუმრობს. ის არ ჩამოვა საქართველოში, რომელიც აქამდე სამხრეთ კავკასიაში ლიდერ ქვეყნად მოიაზრებოდა. რა არის ყველაზე მნიშვნელოვანი ამ ვიზიტში? 

ვიზიტი გუშინ დაიწყო. სომხეთში ჩავიდა ვენსი, დღეს აზერბაიჯანშია და იქაც ექნება რამდენიმე შეხვედრა. შეხვედრებს განსაკუთრებული პოლიტიკური წონა და მნიშვნელობა აქვს. ეს არის ძალიან სერიოზული განაცხადი იმაზე, რომ ამერიკის შეერთებული შტატები სამხრეთ კავკასიაშია.

როდესაც გაჟღერდა ტრამპის საგარეო პოლიტიკის დოქტრინა, ბევრი ეჭვი გაჩნდა იმაზე, რომ შედარებით იზოლაციონისტური პოზიცია ექნებოდა შეერთებულ შტატებს, ნაკლები ინტერესი სხვა რეგიონებში. იყო ვერსია, რომ აი, ძირითადად მხოლოდ ჩრდილოეთ და სამხრეთ ამერიკას მიხედავს, მხოლოდ დასავლეთ ნახევარსფეროთი იქნება შემოსაზღვრული ტრამპის ინტერესებიო, მაგრამ არ გამოდის ასე. ტრამპის დერეფნის, სამხრეთ კავკასიის ე.წ. შუა დერეფნის მნიშვნელოვანი ნაწილის, მნიშვნელოვანი რგოლის განვითარება არის შეერთებული შტატების ინტერესი და ეს არის კარგი გზავნილი დასავლური სივრცისთვის, ცივილიზებული სამყაროსთვის, ჩვენი რეგიონისთვის მთლიანად და, რა თქმა უნდა, ცუდი გზავნილი, პირველ რიგში, რუსეთისთვის, რომელიც კარგავს ბერკეტებს სამხრეთ კავკასიაში.

შეერთებული შტატები ეხმარება სომხეთს 9 მილიარდი დოლარის ოდენობის დახმარებით, რაც ძალიან მნიშვნელოვანია, მითუმეტეს ტრამპის ადმინისტრაციისგან, რომელიც ითვლება, რომ ნაკლებად უხვია ფულის გაცემის თვალსაზრისით – ყურადღებით ითვლის ყოველ დახარჯულ დოლარს. აშშ სომხეთს 9 მილიარდით ეხმარება იმისათვის, რომ ენერგეტიკული უსაფრთხოება განავითაროს, რომ გახდეს რუსეთისგან დამოუკიდებელი, რაც, რა თქმა უნდა, ძალიან ძლიერი პოლიტიკური ნაბიჯია. ათწლეულების მანძილზე სომხეთს ხშირად ეშინოდა პოლიტიკური ნაბიჯების გადადგმა, რადგან მეტწილად ეკონომიკურად და ენერგეტიკულად დამოკიდებული იყო რუსეთზე.

• ეს მკაფიო პოლიტიკური განაცხადის გარდა, სომხეთისთვის არის გრძელვადიანად თავდაცვისუნარიანობის გაძლიერების შესაძლებლობა? აშშ შევიდა ბირთვული თანამშრომლობის სფეროში – აქამდე სომხეთს ბირთვული ელექტროსადგურისთვის საჭირო ტექნოლოგიას მხოლოდ მოსკოვი აწვდიდა…  

დიახ. რამდენიმე დღის წინ იყო შეხვედრა სომხეთის და რუსეთის წარმომადგენლებს შორის. ეს ნაბიჯი ძალიან მკაცრი განაცხადია: სომხეთი მკვეთრად, 100%-ით არის ორიენტირებული შეერთებულ შტატებზე და არა რუსეთზე. ეს, რა თქმა უნდა, ძალიან კარგია.

ყველაფერი ეს სომხეთს ხდის სუვერენულ და დამოუკიდებელ, რეალურად დამოუკიდებელ სახელმწიფოდ. ეს არის დღევანდელი სომხეთის ლიდერშიპის ხელმძღვანელობის მიზანი. ისიც გასაგებია, რომ ეს მიზანი მარტივად მისაღწევი არაა. სამწუხაროდ, 20 წლის მანძილზე ისეთი მთავრობები, ისეთი ხელმძღვანელობა ჰყავდა სომხეთს, რომლებიც პირდაპირ არ ეწინააღმდეგებოდნენ რუსეთის იმპერიულ ზრახვებს და ბევრი რამ მიჰყიდეს რუსეთს. ახლა ეს ყველაფერი იცვლება არამხოლოდ რიტორიკულად, არამედ პრაქტიკულად.

ეს ძალიან სერიოზული ნაბიჯია და რეალურად სამხრეთ კავკასიას მეტი შანსი ეძლევა. რეალურად სომხეთი ხდება ნამდვილად დამოუკიდებელი სახელმწიფო, რაც, რა თქმა უნდა, ძალიან კარგია და საშუალებას მისცემს მას, დამოუკიდებელი პოლიტიკა ატაროს. რამდენჯერმე ვნახეთ წარსულში, როცა სომხეთის მმართველები ცდილობდნენ, მაგალითად, თურქეთთან, ან აზერბაიჯანთან ურთიერთობის დალაგებას. ამ დროს რუსეთი ყოველთვის იყო ე.წ. სპოილერი. სომხეთის მთავრობას ამ თვალსაზრისით მეტი შანსი აქვს, გახდეს დამოუკიდებელი.

• ამ მოცემულობაში რეალურად გავლენის რა ბერკეტები რჩება რუსეთს სამხრეთ კავკასიაში?  

რამდენჯერმე ინდივიდუალურად გაჟღერდა გადაცემებში – ლავროვის პრესპიკერი ზახაროვა ამბობდა, რომ სომხეთს და აზერბაიჯანელ მეგობრებს ვურჩევდი, უფრო ყურადღებით იყვნენ და გაარჩიონ, ვინ არის ნამდვილი მეგობარიო.

გასაგებია, რომ რუსეთს ძალიან არ მოსწონს, რაც ხდება ახლა სამხრეთ კავკასიაში. დღევანდელი შეხვედრების შემდეგ ეს ტონი იქნება უფრო ალბათ მკაცრი და მძაფრი.

• სიტუაციის სხვაგვარად დაძაბვის შანსი რუსეთს აღარ აქვს? მაგალითად, სომხეთში, გიუმრიში ისევაა რუსული სამხედრო ბაზა.

პრინციპში შეუძლია, მაგრამ იცით რა არის: მთელი რუსეთი იმდენად ჩაეფლო და მიბმულია უკრაინასთან თავის აგრესიაზე, რომ ამის ნაკლები ბერკეტები აქვს. რაც ხდება სომხეთს და აზერბაიჯანს შორის და სამხრეთ კავკასიაში, იმის შედეგია, რომ რუსეთს ახლა უკვე ხელი აღარ ეწიფება, როგორც წინათ, ითამაშოს თავისი ჩვეული როლი – „გაყავი და იბატონე“.

რეალურად იგივე ყარაბაღის კონფლიქტში რუსეთი მხარს არ უჭერდა სომხეთს, ან აზერბაიჯანს, ის უჭერდა მხარს კონფლიქტს, რომ ყოფილიყო დაძაბულობა, რადგან ეს იყო რუსეთისთვის ძალიან ძლიერი ბერკეტი. ახლა რუსეთს ეს ბერკეტი ხელიდან ეცლება.

• რამდენად განვითარდა სომხეთს და აზერბაიჯანს შორის სამშვიდობო შეთანხმება, რასაც 2025 წლის ზაფხულში ვაშინგტონში მოაწერეს ხელი? გამოსვლადია, მაგალითად, ის, რომ სომხეთმა თურქეთთან საზღვარი გახსნას? 

ძალიან ბევრია დამოკიდებული იმაზე, როგორო ჩაივლის არჩევნები სომხეთში – ივნისამდე 4 თვეა დარჩენილი. თუ არჩევნებში გაიმარჯვა სომხეთის მმართველმა პარტიამ, შეიძლება ჩაითვალოს, რომ პრობლემა გადალახულია. რუსეთი ალბათ ძალას იკრებს ივნისისთვის. უკვე დანიშნეს სპეცარმომადგენელი – კირიენკო, რომელმაც უნდა მოაქციოს სომხეთი ისევ რუსეთის ორბიტაში.

მართალია, სომხეთში დიდი მხარდაჭერა არ აქვს დღევანდელ მთავრობას, მაგრამ დანარჩენ პოლიტიკურ პარტიებს კიდევ უფრო ნაკლები მხარდაჭერა აქვთ. დღევანდელი გადასახედიდან ასე ჩანს: ხვალ რომ იყოს არჩევნები, მმართველი პარტია ალბათ გაიმარჯვებდა, თუმცა 4 თვე დიდი დროა. რუსეთი გაცილებით უფრო ფრთხილად არის და ისე ადვილად ვერ აფუჭებს საქმეს, როგორც წინათ, თუმცა, რა თქმა უნდა, ბერკეტები მაინც გააჩნია, ყოველ შემთხვევაში, კუნთების თამაში შეუძლია – იგივე გიუმრის ბაზის გამოყენების შანტაჟი და ასე შემდეგ.

რეალურად თუ კიდევ წინ წაიწია სომხეთის და აზერბაიჯანის ურთიერთობის მოლაპარაკება, რუსეთი რეალურად კარგავს სამხრეთ კავკასიას. გამოდის, რომ საქართველო რჩება მხოლოდ, რუსეთის, ასე ვთქვათ, ჰოლდინგში. ეს რამდენიმე წლის წინ უტოპიურად ჩანდა, დღეს ძალიან საწყენია, მაგრამ ასეა.

• ვენსის ვიზიტი არის დემონსტრაცია იმის, რომ აშშ-ს ინტერესი სამხრეთ კავკასიაში არსებობს, თუ ამავდროულად ახალ ეტაპზე გადადის ეს ურთიერთობები? 

ყველა ადმინისტრაციას, ყველა პრეზიდენტს რაღაც ახალი იდეები უჩნდება. ერთი არის ის, რომ სამხრეთ კავკასია არის მნიშვნელოვანი აშშ-თვის – მნიშვნელოვანი რგოლი ევრაზიის დასავლეთსა და აღმოსავლეთს შორის და მეორე შეიძლება იყოს უსაფრთხოების საკითხი.

მნიშვნელოვანია ის, რომ რუსეთის პოზიციები სუსტდება რეგიონში და ამერიკის ძლიერდება.

• რას ნიშნავს ამ დროს საქართველოსთვის ის, რომ ტრამპი სამხრეთ კავკასიაში საქართველოს ვეღარ ხედავს? 

დიახ, რადარზე არ არის საქართველო.

წინა ადმინისტრაციასთან შედარებით, შეიძლება ითქვას, რომ საქართველოს მთავრობის კრიტიკა ძალიან შერბილდა, მაგრამ იგნორის რეჟიმია, ჯერჯერობით არ ფიგურირებს აშშ-ს ინტერესებში საქართველო. არ ვიცი, ასე რატომ არის: ხელი ჩაიქნიეს უკვე საქართველოზე, თუ კიდევ შეეცდება აშშ-ი, რომ რამე გაარკვიოს.

• საქართველოს ვერ უშველის გეოპოლიტიკური უპირატესობა? შუა დერეფნის ახალი განშტოებები შეიძლება წარმოვიდგინოთ საქართველოს გარეშე? 

ამ დერეფანს დრო დასჭირდება. საქართველო ბოლომდე თავის როლს არ დაკარგავს. ევროკავშირსაც სჭირდება აღმოსავლეთზე გასვლა. მით უმეტეს, საქართველოში აშენებულია უკვე შესაბამისი ინფრასტრუქტურა. ამიტომაც, შეიძლება, მოცულობამ დაიკლოს და განაწილდეს, მაგრამ საქართველო არსად არ მიდის. ის იქნება ისევ რგოლი დასავლეთ-აღმოსავლეთ შორის.

თუმცა საქართველოსთვის მხოლოდ ეს საკმარისი არ არის.

• თუ ჩვენ არ გვექნება დემოკრატიული პოლიტიკური სისტემა, აღარ ვიქნებით საინტერესო დასავლეთისთვის? ისინი აღარ იქნებიან ჩვენი პარტნიორები? 

დიახ, ზუსტად ასეა. ჩვენ არ ვართ ცენტრალური აზიის ქვეყანა, ან ზოგიერთი სხვა ქვეყანა, რომელსაც არ აინტერესებს ევროპული გზა.

რა თქმა უნდა, საქართველოს, როგორც წინა ათწლეულებში და ახლაც გამოადგება მისი ადგილმდებარეობა, მაგრამ ამას სჭირდება ჭკვიანურად გამოყენება იმისათვის, რომ მოხდეს პოლიტიკური განვითარება, კონტაქტები და ურთიერთობები, რომელიც საქართველოს გააჩნია სხვა ქვეყნებთან წმინდა ეკონომიკური, ენერგეტიკული პროექტების სახით. საქართველომ ამას უნდა დაუმატოს პოლიტიკური რეფორმები და პოლიტიკური წინსვლა. საქართველო უნდა გადაიქცეს ევროპულ ქვეყნად.

მხოლოდ ეკონომიკა არაა საკმარისი. ჩვენ არ ვართ აზერბაიჯანი. არ ვაკნინებ აზერბაიჯანს – ჩვენი მეზობელი და მეგობარი ქვეყანაა, მაგრამ აზერბაიჯანს არ აქვს ზრახვები, წავიდეს ევროპისკენ, გახდეს ევროპული ქვეყანა. აზერბაიჯანი თანაბრად დაშორებულია დასავლეთისგან და აღმოსავლეთისგან და აწყობს ეს მდგომარეობა. ჩვენთვის კი, მხოლოდ ის, რომ ჩვენს ტერიტორიაზე გაიაროს რაღაც დერეფანმა და რკინიგზამ, ნავთობსადენმა, გაზსადენმა, კარგია, მაგრამ ეს საკმარისი არ არის. ჩვენ უნდა გავხდეთ ევროპული ქვეყანა. ჩვენი საზოგადოების ეს დაკვეთა ბოლოს და ბოლოს ამ ხელისუფლების მიერ არის შეტანილი კონსტიტუციაში.

ჩვენ არ გვაქვს, მაგალითად, ნავთობრესურსები. ამიტომაც, ჩვენი პოლიტიკური განვითარება არის ჩვენი ძალიან სერიოზული გარანტია. შეიძლება, ბევრი ვიკამათოთ იმაზე, თუ როგორ ეხმარება დასავლეთი უკრაინას, მაგრამ დღეს უკრაინა დგას, როგორც სახელმწიფო იმიტომ, რომ ის დასავლეთისგან იღებს სერიოზულ დახმარებას. რა თქმა უნდა, უკრაინა დგას უკრაინელი ხალხის და მისი ხელისუფლების სიმამაცის გამო, მაგრამ ასევე, დასავლეთის დახმარებით.

ამიტომაც, ჩვენი ყველაზე მნიშვნელოვანი გარანტია არის დემოკრატიული, ევროპული გზით წასვლა.

• „ოცნების“ პრეზიდენტი, მიხეილ ყაველაშვილი ამბობს, ვენსისგან ურთიერთობის გადატვირთვის პირობა მივიღეო. რამდენად შესაძლებელია, თქვენი აზრით, აშშ-ს და საქართველოს ურთიერთობების შეცვლა „ოცნების“ რეჟიმის პირობებში? 

ეს შეხვედრა მოხდა ოლიმპიადის გახსნაზე, სადაც ყველა ქვეყნის ლიდერი იყო. რაღაც შეხვედრა იყო, ხელი ჩამოართვეს ვენსის და რამოდენიმე წუთი დაელაპარაკებოდა უბრალოდ დიპლომატიური პროტოკოლის და თავაზიანობის გამო. ამის აღქმა, როგორც სერიოზული შეხვედრა, ცოტა გადაჭარბებულია. ეს გამოჩნდება უახლოეს თვეებში. მიუხედავად იმისა, რომ ძალიან ბევრი პრეტენზია მაქვს დღევანდელი ხელისუფლების მიმართ, მოხარული ვიქნები, თუ ურთიერთობა აშშ-თან გადაეწყობა. კარგი იქნება, თუ ამერიკა იქნება ჩვეულებრივად, კონსტრუქციულად კრიტიკული, მაგრამ ამავდროულად  კიდევ მისცემს რაღაც შანსს საქართველოსს, გახდეს სანდო პარტნიორი.

„ქართული ოცნების” დიდი იმედი იყო ის, რომ აშშ-ს დღევანდელი ადმინისტრაცია აბსოლუტურად თვალს დახუჭავდა დემოკრატიულ განვითარებაზე.

დემოკრატიის განვითარებაზე შედარებით ნაკლებად არის ორიენტირებული დღევანდელი ადმინისტრაცია, დავუშვათ, ბაიდენთან შედარებით, მაგრამ დღის წესრიგში ეს მაინც არის. ამიტომაც, საგრძნობლად უნდა გაუმჯობესდეს დღევანდელი მმართველობა იმისათვის, რომ ამერიკისთვის გახდეს საინტერესო პარტნიორი.

არავის არ მოსწონს საქართველოს დღევანდელი ვითარება, მაგრამ ისიც  არ მესმის როცა ზოგიერთს უხარია: ნახეთ, როგორ დაისაჯა ხელისუფლებაო. რეალურად ხელისუფლება კი არა მთელი საქართველო ისჯება ამით, რომ ქვეყანა სცილდება პროცესებს, იზოლაციაში ექცევა. ყველასთვის არის მნიშვნელოვანი, რომ ეს ვითარება შეიცვალოს.

• თუმცა რომ ჩამოსულიყო ვენსი საქართველოში, ვის უნდა შეხვედროდა? როცა „ოცნების“ ხელისუფლებას აქვს ლეგიტიმაციის პრობლემა, როგორც ქვეყნის შიგნით, ისე გარეთ, ეს შეკითხვაც არსებობს. უშვებთ, რომ აშშ-მ შესაძლოა დაიწყოს ურთიერთობა „ოცნების“ მთავრობასთან? 

ეს უახლოეს თვეებში გამოჩნდება: რამდენად აღიარებს შეერთებული შტატები დღევანდელ ხელისუფლებას. თუ უახლოეს თვეებში მოხდება მაღალჩინოსნების ვიზიტი – ვგულისხმობ მსგავს შეხვედრებს, როგორიც ვენსთან იყო – ეს იმის მანიშნებელი იქნება, რომ ამერიკას ნაკლებად ადარდებდეს ლეგიტიმურობა და უფრო ადარდებდეს საქართველოს პოტენციალი.

• ბოლოს ირანზე მინდა გკითხოთ: საითკენ მიდის პროცესი ირანში? ირანში მომხდარი ამბები მნიშვნელოვან გავლენას ახდენს სამხრეთ კავკასიაზე 

რა თქმა უნდა, ირანი ძალიან ართულებს მთელ ამ განტოლებას რეგიონში, მეორეს მხრივ, ეს ასევე ხაზს უსვამს სამხრეთ კავკასიის მნიშვნელობას.

ჩვენ გვახსოვს, როდესაც იყო 12-დღიანი ომი ირანში, რამდენი თვითმფრინავი დაფრინავდა – რეალურად მთელი სამხრეთ კავკასია იყო შევსებული, იმდენი ფრენა იყო. ეს იმის მანიშნებელია, რომ არასტაბილური, არაპროგნოზირებადი ირანის პირობებში – ასევე, ცხადია, დღევანდელი რუსეთის პირობებში –  სამხრეთ კავკასიის მნიშვნელობა იზრდება.

ირანი ძალიან დიდი ქვეყანაა, ძალიან რთული გეოპოლიტიკით. ამიტომაც არ ვიცი, რას მოიტანს პოტენციური გარე ჩარევა. ჯობია, სიტუაცია განიმუხტოს, დადებითად გადაწყდეს ფართომასშტაბიანი ომის გარეშე.

ირანში მოსახლეობა 90 მილიონია. თუ რაღაც სერიოზული სოციალური რღვევა მოხდა ამ საზოგადოებაში, გასაგებია, რომ იქნება მილიონობით ადამიანი, რომელიც დატოვებს ირანს. ძალიან უნდა ვუთანაგრძნოთ ამ ადამიანებს, მაგრამ ეს შეუქმნის პრობლემა სომხეთს და აზერბაიჯანს, ასევე საქართველოს, რომელიც საკმაოდ ახლოს არის ირანთან. წარმოიდგინეთ, 80-მილიონიან თურქეთს გაუჭირდა 4 მილიონამდე სირიელის ინტეგრაცია საზოგადოებაში.

ირანი იმ დონეზე ჩაკეტილი საზოგადოებაა, რომ ვერ იტყვი ზუსტად, რა ხდება დღეს ქვეყანაში. უცნობია, ჩახშობილია თუ შენარჩუნებულია საპროტესტო მუხტი.

ვნახოთ, უახლოესი პროცესები გვიჩვენებს, რა იქნება.

„ოცნების“ მთავრობის ახალი დადგენილებით სახელმწიფო საკუთრებაში არსებული უძრავი ნივთის გაცვლა უკვე შესაძლებელი იქნება იმ შემთხვევაშიც, თუ „სახელმწიფოებრივი მნიშვნელობის პროექტიდან გამომდინარე“ უძრავ ნივთთან მიმართებით ადმინისტრაციული ორგანო გარკვეულ შეზღუდვებს დააწესებს.

საუბარია იმაზე, რომ თუ სახელმწიფო ან საზოგადოებრივი მნიშვნელობის პროექტი ხორციელდება [მაგალითად: გზა, რკინიგზა, პორტი, ელექტროგადამცემი ხაზი და ა.შ.], შესაბამის ადმინისტრაციულ ორგანოს შეუძლია კონკრეტულ უძრავ ქონებაზე დააწესოს შეზღუდვა.

ეს შეზღუდვა შეიძლება იყოს, მაგალითად: მშენებლობის აკრძალვა ან შეზღუდვა [სრულიად ან გარკვეული პარამეტრებით]; სიმაღლის ლიმიტი [მაგალითად, აეროპორტის სიახლოვეს]; გამოყენების ტიპის შეზღუდვა [სასოფლო-სამეურნეოდან სხვა დანიშნულებაზე ვერ გადაყვანა]; დაცვითი ზონის დაწესება [გზის, სანაპიროს, ინფრასტრუქტურის გარშემო]; გადაყვანის/გასხვისების შეზღუდვა გარკვეული ვადით და სხვა.

ანუ, შეზღუდვა ნიშნავს, რომ მესაკუთრე ვეღარ სარგებლობს ქონებით სრულად საკუთარი სურვილისამებრ, რადგან პრიორიტეტი ენიჭება საჯარო ინტერესს. შესაბამისად, მთავრობას ეძლევა უფლება, ეს ქონება მესაკუთრეს სხვა სახელმწიფო ქონებაში გადაუცვალოს.

„სახელმწიფო საკუთრებაში არსებული უძრავი ნივთის გაცვლისა და პირდაპირი მიყიდვის ფორმით პრივატიზების წინაპირობების დამტკიცების შესახებ“ საქართველოს მთავრობის 2025 წლის 30 დეკემბრის დადგენილებაში ცვლილების შეტანის თაობაზე ახალ დადგენილებას ირაკლი კობახიძემ ხელი 2026 წლის 9 თებერვალს მოაწერა. დადგენილება 10 თებერვალს ამოქმედდა.

ცვლილებების გათვალისწინებით „სახელმწიფო საკუთრებაში არსებული უძრავი ნივთის გაცვლის წინაპირობები“ დადგენილებაში შემდეგნაირად განისაზღვრა:

„საქართველოს მთავრობის გადაწყვეტილების საფუძველზე, სახელმწიფო საკუთრებაში არსებული უძრავი ნივთის გაცვლა შესაძლებელია, განხორციელდეს:

• ა) თუკი ქონების გაცვლის საჭიროება გათვალისწინებულია შესაბამისი კომპეტენტური ორგანოს მიერ დამტკიცებული ქალაქთმშენებლობითი გეგმით;
• ბ) ადმინისტრაციული ორგანოს დასაბუთებული შუამდგომლობის საფუძველზე, სახელმწიფოებრივი/საზოგადოებრივი ინტერესის არსებობის შემთხვევაში, მათ შორის, სახელმწიფოებრივი/საზოგადოებრივი მნიშვნელობის პროექტის განხორციელების მიზნით.
• გ) სახელმწიფოებრივი/საზოგადოებრივი მნიშვნელობის განსახორციელებელი პროექტიდან გამომდინარე, კომპეტენტური ადმინისტრაციული ორგანოს მიერ უძრავ ნივთთან მიმართებით განსაზღვრული/მითითებული შეზღუდვის შემთხვევაში.“.

სახელმწიფო საკუთრებაში არსებული უძრავი ქონების პირდაპირი წესით გაყიდვა ან/და გაცვლა 2026 წლის 12 იანვრიდან იმ „წინაპირობების საფუძველზე“ გრძელდება, რომელიც „ოცნების“ მთავრობამ დაადგინა. ეს „წინაპირობები“ კი საკმაოდ მოცულობითია.

არადა, 2025 წლის ივნისში „ოცნების“ პრემიერმა ირაკლი კობახიძემ განაცხადა, რომ „პირდაპირი მიყიდვის პრაქტიკა დასრულდა“, თუმცა, ამ წესით ქონების გასხვისებას მაინც აგრძელებდა.

სადაო პარლამენტმა, 2025 წლის 11 ნოემბერს „სახელმწიფო ქონების შესახებ“ კანონში შეიტანა ცვლილებები, რომლითაც პირდაპირი მიყიდვის წესი კი არ გაუქმდა, არამედ დააკონკრეტეს, რომ სახელმწიფო ქონების პირდაპირი მიყიდვა ან/და გაცვლა შესაძლებელი იყო „მთავრობის დადგენილებით გათვალისწინებულ შემთხვევებში“.

ამ თემაზე:

ივანიშვილის კომპანია განმუხურში ვალდებულებებს აღარ შეასრულებს – კობახიძის განკარგულება 

See more

 

მთავარი ფოტო: „ბათუმელების“ არქივიდან

 

ხელვაჩაურსა და საჩხერეში ფრინველის არალეგალური სასაკლაო გამოავლინეს.

სურსათის ეროვნული სააგენტოს ინფორმაციით, ხელვაჩაურში ფრინველებს კლავდნენ ვეტერინარული ზედამხედველობის გარეშე, სანიტარულ-ჰიგიენური ნორმებისა და ტექნოლოგიური პროცესის უხეში დარღვევით.

„შპს „ატო“ [მის: ხელვაჩაურის მუნიციპალიტეტი, ფანასკერტელ-ციციშვილის 29] ფერმის ტერიტორიაზე ფრინველის დაკვლას ახორციელებდა ვეტერინარული ზედამხედველობის გარეშე, სანიტარიულ-ჰიგიენური ნორმებისა და ტექნოლოგიური პროცესის უხეში დარღვევით. ბიზნესოპერატორს არ ჰქონდა მინიჭებული სააგენტოს სავალდებულო აღიარება და საქმიანობდა ეკონომიკურ საქმიანობათა რეესტრში რეგისტრაციის გარეშე.

კრიტიკული შეუსაბამობები გამოვლინდა საჩხერეში, ინდმეწარმე ნ. ბ.-ს [მის: თამარ მეფის N15] ფრინველთა სასაკლაოზეც. ბიზნესოპერატორს არ ჰქონდა სააგენტოსაგან მინიჭებული სავალდებულო აღიარება. ობიექტზე დაილუქა ვეტერინარული ზედამხედველობის გარეშე, ტექნოლოგიური პროცესისა და სანიტარიულ-ჰიგიენური ნორმების დარღვევით დაკლული 80კგ. ფრინველის ხორცი.

ორივე ბიზნესოპერატორი დაჯარიმდა კანონმდებლობის შესაბამისად და შეუსაბამობების აღმოფხვრამდე შეუჩერდათ საწარმოო პროცესი,“ – აღნიშნულია სურსათის ეროვნული სააგენტოს მიერ დღეს, 10 თებერვალს გავრცელებულ ინფორმაციაში.

ბათუმში, ბარათაშვილისა და გორგილაძის ქუჩის კუთხეში მდებარე ისტორიული სახლის გვერდით კომპანია „ჯორჯიან გრანდ დეველოპმენტ გრუპი“ ათსართულიან სახლს აშენებს.

ბათუმის მუნიციპალური ინსპექციის თანახმად, „სამშენებლო საქმიანობა ნებართვის ფარგლებში ხორციელდება“.

თუმცა ბარათაშვილის #14, სადაც „ჯორჯიან გრანდ დეველოპმენტ გრუპი“ მრავალსართულიან კორპუსს აშენებს, ესაზღვრება გორგილაძის #2-ში მდებარე კულტურული მემკვიდრეობის სტატუსის მქონე ე.წ. საათიან სახლს.

დაშორება კულტურული მემკვიდრეობის სტატუსის მქონე სახლსა და ახალ მშენებარე კორპუსს შორის 20 მეტრიც კი არაა.

კანონი კულტურული მემკვიდრეობის შესახებ ადგენს ძეგლის დაცვის ზონას.

კანონის მიხედვით, კულტურული მემკვიდრეობის ძეგლის სტატუსის მქონე შენობასთან 50 მეტრის რადიუსში არ შეიძლება ისეთი სამშენებლო ნებართვის გაცემა ან სამშენებლო საქმიანობა, რომელიც გამოიწვევს ძეგლის დაჩრდილვას ან მის დაზიანებას.

ისტორიული სტატუსის მქონე „საათიანი სახლის“ ბინადრებს აქვთ სამხარაულის სახელობის ეროვნული ექსპერტიზის ბიუროს მიერ რამდენიმე წლის წინ გაცემული დასკვნა, რომლის მიხედვითაც, სახლის მდგომარეობა არადამაკმაყოფილებლად შეფასდა.

კერძოდ, ექსპერტის დასკვნით, სახლს სჭირდებოდა სარეაბილიტაციო სამუშაოების ჩატარება, ფუძე-საფუძვლის გამაგრება, დაზიანებული მზიდი კონსტრუქციების გაძლიერება და სხვა არსებული ხარვეზების აღმოფხვრა.

„სახლის ერთი კუთხე ისე იყო გახლეჩილი, ლამის ევროპის მოედანი ჩანდა იმ ბზარიდან,“ – ასე აღწერს გორგილაძის #2-ში მდებარე ისტორიული სახლის მდგომარეობას ერთ-ერთი მცხოვრები, სალომე ხალვაში.

სახლს რეკონსტრუქცია ჩაუტარდა, თუმცა განმეორებითი ექსპერტიზა – არა. ამიტომ სალომე ხალვაში შიშობს, რომ ჯერ დემონტაჟი და შემდეგ უკვე ახალი კორპუსის სამშენებლო სამუშაოებისგან გამოწვეული ბიძგები ისედაც დაზიანებულ სახლს კიდევ უფრო დააზიანებს.

„ძველი ბათუმის გამგებელი დამპირდა, რომ სანამ ამ ისტორიული სახლის ახალ ექსპერტიზას არ გააკეთებენ, არ ნახავენ რამდენად გაუძლებს სამშენებლო ბიძგებს, მანამდე ხიმინჯების ჩასმას და მსგავს მძიმე სამუშაოებს არ ჩაატარებენ.

ვიცი, რომ ამ კორპუსის მშენებლობას არავინ გააჩერებს ჩვენ გამო. ამაზე არც ვდავობთ. ჩვენ ვამბობთ, რომ ისე ააშენონ, ჩვენი სახლი არ დააზიანონ. რამდენიმე დღის წინ დემონტაჟი რომ დაიწყეს, ზანზარებდა ყველაფერი. მერიას მივმართე, მუნიციპალური ინსპექცია გამოვიძახე.

კომპანიის წარმომადგენელსაც შევხვდი და დამპირდა, პირადად მივაქცევ ყურადღებასო.

ხედი რომ აღარ გვექნება და ჰაერი, მაგას თითქოს უკვე შევეგუე. ახლა ჩემი მოთხოვნაა, ჩვენს სახლს არ დაუზიანდეს არაფერი,“ – უთხრა სალომე ხალვაშმა „ბათუმელებს“.

ბათუმის მუნიციპალურ ინსპექციაში ადასტურებენ, რომ მოქალაქის გამოძახების საფუძველზე იმყოფებოდნენ ბარათაშვილის #14-ში მიმდებარე მშენებლობაზე.

„კომპეტენციის ფარგლებში გადამოწმდა სამშენებლო საქმიანობა და ნებართვის ფარგლებში ხორციელდება.

რაც შეეხება მიმდებარედ მცხოვრებების საცხოვრებელი ფართობების დაზიანებას, არ მიეკუთვნება მუნიციპალური ინსპექციის კომპეტენციას,“ – უთხრეს „ბათუმელებს“ ბათუმის მუნიციპალურ ინსპექციაში.

„ბათუმელები“ დაუკავშირდა „ჯორჯიან გრანდ დეველოპმენტ გრუპის“ წარმომადგენელს.

დავინტერესდით, გამომდინარე იქიდან, რომ მშენებლობა კულტურული მემკვიდრეობის დაცვის ზონაში მიმდინარეობს, არსებობდა თუ არა კულტურული მემკვიდრეობის სააგენტოს სპეციალური თანხმობა ამ კონკრეტული მშენებლობისთვის?

„რა თქმა უნდა, გვაქვს მშენებლობის ნებართვა. ირგვლივ მდებარე შენობებზე შეფასების აქტიც გვაქვს, ექსპერტიზაც გვაქვს.

რაც შეეხება გორგილაძის #2-ს, როგორც მე ვიცი, მერიას გამაგრების პროექტი აქვს მაგ [შენობაზე] და გამაგრებულიც არის ეგ სახლი. ჩვენ მაგ სახლთან საერთოდ შეხება არ გვაქვს არანაირი. მაგ ზემოქმედების თავიდან ასაცილებლად ჩვენ გრუნტს ისე ვამაგრებთ, რომ ჩვენი მუშაობის [გამო] ზემოქმედება, საერთოდ ნულოვანია ირგვლივ მდებარე შენობებზე. არანაირი ზემოქმედება არ არის, ნულოვანია.

[კომპანიას] აქვს დემონტაჟის პროექტი, აქვს მშენებლობის პროექტი. მშენებლობის პროექტი, როგორც მოგეხსენებათ, მოიცავს კონსტრუქციულ ნაწილს. კონსტრუქციულ ნაწილში მითითებულია გრუნტი როგორ უნდა გავამაგროთ. ე.წ. ცემენტიზაცია კეთდება.

ცემენტიზაცია მოიცავს გრუნტის ბეტონით ჩანაცვლებას. მშენებლობა ცალკე სამუშაოა, რომელსაც ირგვლივ მდებარე შენობებზე ზემოქმედება ნულამდე დაჰყავს. ანუ აბსოლუტურად არავითარ ვიბრაციას, რხევას საერთოდ არ განიცდის გრუნტი ჩვენი ქვაბულის იქეთ. ამას [მშენებლობის მეთოდს] ფართოდ იყენებენ ევროპაშიც და ჩვენთანაც, საქართველოშიც შეგიძლიათ ნახოთ. გრუნტის ცემენტიზაცია ჰქვია. ეს გვიწერია ჩვენ პროექტში და უნდა გავაკეთოთ,“ – უთხრა „ბათუმელებს“ ედნარ ხიმშიაშვილმა, „ჯორჯიან გრანდ დეველოპმენტ გრუპის“ წარმომადგენელმა.

თავდაპირველად სწორედ ედნარ ხიმშიაშვილი ფლობდა კომპანია „ჯორჯიან გრანდ დეველოპმენტ გრუპის“ 100 %-იან წილს.

ამჟამად წილის 70% ჯულიანა იონახს ეკუთვნის, 30 % კი – იულია ლიტვინენკოს, რომელიც ედნარ ხიმშიაშვილის მეუღლეა.

• რა ვიცით კომპანია „ჯორჯიან გრანდ დეველოპმენტ გრუპის“ შესახებ

„ჯორჯიან გრანდ დეველოპმენტ გრუპს“ ორი მფლობელი ჰყავს.

კომპანიის 70%-იან წილს ჯულიანა იონახი ფლობს, ხოლო 30%-იან წილს – იულია ლიტვინენკო.

ჯულიანა იონახი რუსეთისა და საქართველოს ორმაგი მოქალაქეობის მქონეა, იულია ლიტვინენკო კი – უკრაინისა და საქართველოს ორმაგი მოქალაქეობის მქონე.

„ჯორჯიან გრანდ დეველოპმენტ გრუპი“ 2020 წელს დაფუძნებული კომპანიაა. მისი დამფუძნებელი და 100%-იანი  წილის მფლობელი ედნარ ხიმშიაშვილი იყო.

2022 წელს კომპანიის დირექტორად ჯულიანა იონახი დაინიშნა. 2023 წლის ნოემბერში კომპანიის 70%-იანი წილი ედნარ ხიმშიაშვილმა ჯულიანა იონახს გადაუფორმა, მას კი 30% დარჩა.

კომპანიის წილის მფლობელი ბოლოს 2024 წლის 4 ოქტომბერს შეიცვალა. ედნარ ხიმშიაშვილმა კომპანიის კუთვნილი 30%-იანი წილი იულია ლიტვინენკოს გადაუფორმა.

საჯარო წყაროებში ხელმისაწვდომი დოკუმენტების თანახმად, კომპანიის ყოფილმა მფლობელმა ედნარ ხიმშიაშვილმა 70%-იანი წილი ჯულიანა იონახს სიმბოლურ ფასად, 1 ლარად გადაუფორმა. რაც შეეხება დარჩენილ 30%-იან წილს, ის იულია ლიტვინენკოს უსასყიდლოდ გადაუფორმა.

ედნარ ხიმშიაშვილი რამდენიმე სხვა კომპანიაშიც ფლობს წილს.

კომპანია „ჯორჯიან გრანდ დეველოპმენტ გრუპი“ ბათუმის გულში, მერიის წინ, ერთი კვარტალის ნაწილობრივ ათვისებას გეგმვას.

10-სართულიანი საცხოვრებელი სახლის მისამართი ოფიციალურად ასეა –  ბარათაშვილის ქუჩა #14/დემეტრე თავდადებულის ქუჩა #27.

დოკუმენტების მიხედვით, 10- სართულიანი კორპუსი ბარათაშვილისა და თავდადებულის ქუჩებს შორის, 1750 კვ.მ მიწის ნაკვეთზე უნდა აშენდეს.

შენობის სიმაღლე 36.40 მეტრი იქნება. -1 სართულზე მოეწყობა საპარკინგე სივრცე, პირველი სართული კომერციული ფართობებისთვის იქნება, მეორედან მეოთხე სართულამდე ნაწილობრივ კომერციული, ნაწილობრივ საცხოვრებელი, ხოლო მეხუთე სართულიდან მეათე სართულამდე სრულად საცხოვრებელი ბინები იქნება.

ისტორიულ ზონაში დაგეგმილი ათსართულიანი შენობის პროექტის ავტორი და არქიტექტორი თენგიზ ესიავაა.

იმ ადგილას, სადაც ახლა ათსართულიანი სახლი უნდა ააშენონ, ორსართულიანი განაშენიანება იყო.

თავდადებულის ქუჩის მხრიდან მდებარე სახლში საოლქო საარჩევნო კომისიის შენობა იყო განთავსებული. საოლქოს შენობის უკან ასევე ორსართულიანი განაშენიანება იყო, რომელიც ვიწრო გასასვლელით უკავშირდებოდა ბარათაშვილის ქუჩას. ახალი კორპუსიც ამ გასასვლელით დაუკავშირდება ბარათაშვილის ქუჩას.

 

ქედის მუნიციპალიტეტის სოფელ ცხმორისში დამწვარ მეჩეთს აღადგენენ. მეჩეთს კულტურული მემკვიდრეობის ძეგლის სტატუსი ჰქონდა.

აჭარის კულტურული მემკვიდრეობის დაცვის სააგენტომ „ავარიულ მდგომარეობაში მყოფი კულტურული მემკვიდრეობის ძეგლის – ქედის მუნიციპალიტეტში სოფელ ცხმორისში მდებარე დამწვარი ხის ჯამეს აღდგენითი სამუშაოების საპროექტო დოკუმენტაციის შედგენაზე“ ტენდერი 40 ათასი ლარით გამოაცხადა.

პროექტს თან უნდა ახლდეს ხარჯთაღრიცხვა, თუ რა თანხა დასჭირდება ძეგლის აღდგენას.

ტენდერში წინადადებების მიღება 2026 წლის 17 თებერვალს დაიწყება და ორ დღეში, 19 თებერვალს დასრულდება.

„პროექტი უნდა შემუშავდეს კვლევითი სამუშაოების შედეგების საფუძველზე. საპროექტო დოკუმენტაცია უნდა შედგეს მოქმედი კანონმდებლობის შესაბამისად და შეიცავდეს ყველა საჭირო დოკუმენტს, რომელიც აუცილებელია აღნიშნული პროექტით გათვალისწინებული სამუშაოების ჩატარებისათვის საჭირო ნებართვის მისაღებად.

წარმოდგენილ საპროექტო დოკუმენტაციას თანდართული უნდა ჰქონდეს სარეაბილიტაციო სამუშაოების ხარჯთაღრიცხვაზე საექსპერტო დასკვნა, რომელიც დაადასტურებს სახარჯთაღრიცხვო დოკუმენტაციის შესაბამისობას მოქმედ კანონმდებლობასთან.

ექსპერტიზის განმახორციელებელი ორგანო უნდა იყოს სსიპ-ლევან სამხარაულის სახელობის სასამართლო ექსპერტიზის ეროვნული ბიურო ან სხვა აკრედიტებული პირი“ – აღნიშნულია ტენდერში.

პროექტი 180 დღეში უნდა მომზადდეს.

ისტორიული წყაროების მიხედვით, ცხმორისის მეჩეთი 1892-1893 წლებში უნდა იყოს აშენებული. საბჭოთა პერიოდში სალოცავი დაკეტილი და საწყობად გამოიყენებოდა.

ცხმორისის მეჩეთს კულტურული მემკვიდრეობის ძეგლის სტატუსი 2006 წელს მიენიჭა.

ისტორიული მეჩეთი  2025 წლის 22 დეკემბერს, გვიან ღამით დაიწვა.

მთავარი ფოტო „ბათუმელების“ არქივიდან.

ამავე თემაზე: 

ხულოში დაიწვა მეჩეთი, რომელიც კულტურული მემკვიდრეობის ძეგლი იყო

See more