გუშინ, 8 მაისს „მზია ამაღლობელის საქმეზე“ ბათუმის პოლიციის უფროსი, ირაკლი დგებუაძე დაკითხეს. სასამართლოსთან თუ სასამართლოს ფოიეში პოლიციელების განსაკუთრებული სიმრავლე იყო. სასამართლოში იყვნენ პოლიციის მაღალჩინოსნებიც, მათ შორის, ირაკლი დგებუაძის მოადგილეები.
„სამსახურებრივ უფლებამოსილებას ვასრულებ“ – ასე გვიპასუხა ბათუმის პოლიციის უფროსის, ირაკლი დგებუაძის მოადგილემ, გოჩა ვანაძემ პოლიციელების მობილიზებაზე. მან არ დაგვიკონკრეტა, რატომ ჩათვალეს საჭიროდ პოლიციის მობილიზება.
პოლიცია სასამართლოსთან. 8 მაისი, 2025 წელი
პოლიცია სასამართლოსთან. 8 მაისი, 2025 წელი
„ბოლო პერიოდში სჩვევია პოლიციას, რომ საზოგადოებრივ უსაფრთხოებაზე ორიენტირების ნაცვლად, კერძო პირების დაცვაზეა გადასული… ეს საპოლიციო რესურსის არამიზნობრივი გამოყენებაა,“ – მიიჩნევს იურისტი, შსს-ს ადამიანის უფლებათა სამმართველოს ყოფილი უფროსი, გოგა ხატიაშვილი. მას ბათუმის საქალაქო სასამართლოსთან პოლიციელების მობილიზებაზე ვკითხეთ: სწორია, როცა პოლიციის უფროსი სასამართლოს ჩვენებას აძლევს, ამ დროს კი, პოლიციელები საპოლიციო რესურსს სასამართლოსთან დგომაში ხარჯავენ?
შსს-ს ყოფილი მაღალჩინოსნის, გოგა ხატიაშვილის დაკვირვებით, საპოლიციო ძალების მობილიზებით გვაჩვენეს, რომ როცა საქმე პოლიციელს ეხება, ამ დროს საზოგადოებრივი უსაფრთხოების დაცვა შეიძლება „კერძო დაცვაში“ გადაიზარდოს. იურისტი ხაზს უსვამს იმას, რომ პოლიციის უფროსი პირიქით, საზოგადოების მაღალი ნდობით უნდა სარგებლობდეს და თუ ვინმე გამოხატვის თავისუფლების ფარგლებში საყვედურით მიმართავს, მას აქვს თმენის ვალდებულება.
„საპოლიციო ძალების მთავარი მიზანია უსაფრთხოების უზრუნველყოფა, რაც არ უნდა გადაიზარდოს კერძო დაცვაში, კერძო უსაფრთხოების უზრუნველყოფაში. აქ საუბარი ხომ არ იყო იმაზე, რომ ვინმე ფიზიკურად გაუსწორდებოდა ირაკლი დგებუაძეს? თუ არსებობს გონივრული მოლოდინი, რომ კონკრეტული ადამიანის უსაფრთხოებას საფრთხე ექმნება, შეიძლება გამართლდეს ეს მობილიზება, მაგრამ გონივრული მოლოდინები არ არსებობდა.
აშკარა იყო ის, რომ მას [ირაკლი დგებუაძეს] დისკომფორტი შეექმნებოდა იმ სიტყვიერი მიმართვებით, რაც ჯდება გამოხატვის თავისუფლების და თმენის ვალდებულების ფარგლებში. შესაბამისად, ამ დისკომფორტის შესამცირებლად იყო ეს საპოლიციო მობილიზება.
გოგა ხატიაშვილი
ამიტომაც, შეიძლება ეს მობილიზება შეფასდეს საპოლიციო რესურსის არამიზნობრივ გამოყენებად, რადგან ობიექტური გარემოებებიდან გამომდინარე, ამ მასშტაბის მობილიზების საკითხი დღის წესრიგში არ იდგა. აშკარაა, რომ ირაკლი დგებუაძის მიმართ არსებობს საზოგადოებაში ნეგატიური განწყობა და დამოკიდებულებები. შესაბამისად, არსებობდა მოლოდინი, რომ როცა ის გამოჩნდებოდა საზოგადოებრივ სივრცეში, მას მიმართავდნენ გარკვეული კომენტარებით, რაც დისკომფორტის შემქმნელია. ამ დისკომფორტის შესამცირებლად იყო ეს საპოლიციო მობილიზება.
მობილიზების მიზანი იყო არა უსაფრთხოების უზრუნველყოფა, არამედ ადამიანისთვის დისკომფორტის თავიდან არიდება,“ – გვითხრა გოგა ხატიაშვილმა.
პოლიცია სასამართლოსთან. 8 მაისი, 2025 წელი
პოლიცია სასამართლოს ფოიეში. 8 მაისი, 2025 წელი
შსს-ს ადამიანის უფლებათა სამმართველოს ყოფილი ხელმძღვანელის აზრით, მზია ამაღლობელი უკანონო პატიმარია და ბრალდება, რაც ჟურნალისტს წარუდგინეს, არის „არაპროპორციული და არაადეკვატურად მკაცრი“.
„ყველაზე მკაცრი ღონისძიების, პატიმრობის გამოყენება სრულიად გაუმართლებელია და არაგონივრული, რადგან ვერ იქნა დასაბუთებული რისკები და საფრთხეები. მოსამართლის არგუმენტი იყო უსაფუძვლო როცა თქვა, რომ ახალი დანაშაულის ჩადენის საფრთხე არსებობს, რადგან მას სამართალდარღვევა აქვს ჩადენილიო. ეს სრულიად უსაფუძვლო არგუმენტია ორი მიზეზის გამო – მზია ამაღლობელი სამართალდამრღვევად ცნობილი არ იყო და მეორე: სამართალდარღვევა და დანაშაული სხვადასხვა რამეა. თუნდაც ჰქონოდა მზია ამაღლობელს სამართალდარღვევა ჩადენილი, ეს არ ნიშნავს იმას, რომ ჩაიდენს სისხლის სამართლის დანაშაულსაც. ეს სხვადასხვა ცნებებია.
საერთაშორისო სტანდარტი ამბობს, რომ რაც დრო გადის, დროის გასვლასთან ერთად, უფრო ძლიერი არგუმენტებია საჭირო პირის პატიმრობაში დასატოვებლად.
მუხლი, რომლითაც აქვს წარდგენილი ბრალდება მზია ამაღლობელს, არის არაპროპორციული და არაადეკვატურად მკაცრი,“ – მიიჩნევს გოგა ხატიაშვილი.
- რა ხდება?
მზია ამაღლობელი, გამოცემა „ბათუმელების“ და „ნეტგაზეთის“ დამფუძნებელი და დირექტორია. იგი 2025 წლის 11-12 იანვარს ორჯერ დააკავეს აქციაზე, პირველად – სტიკერის გაკვრისთვის და მეორედ ბათუმის პოლიციის უფროსისთვის, ირაკლი დგებუაძისთვის სილის გაწვნისთვის.
მზია ამაღლობელი უკანონო პატიმრობაშია და პროტესტის ნიშნად 38 დღე შიმშილობდა. მზია ამაღლობელი რომ ჟურნალისტური საქმიანობის გამო ისჯება, ამას რამდენიმე გარემოება ნათლად აჩვენებს, მაგალითად, გაყალბებული ოქმი, რომლის საფუძველზეც მზია ამაღლობელს პატიმრობა შეუფარდეს.
უფლებადამცველების და კვალიფიციური იურისტების შეფასებით, მზია ამაღლობელი უკანონო პატიმარია, რადგან ბრალდება უკანონოა და სილის გაწვნა არათუ თავდასხმა არ არის, არამედ საერთოდ არ არის სისხლის სამართლის დანაშაული.
მზია ამაღლობელს პოლიციელზე თავდასხმას ედავებიან. ბრალის დადასტურების შემთხვევაში მას 4-დან 7 წლამდე თავისუფლების აღკვეთა ემუქრება.
მზია ამაღლობელის ინტერესებს იცავენ „ახალგაზრდა იურისტთა ასოციაცია“, იურიდიული ფირმა BLB და მისი უფროსი პარტნიორი, მაია მწარიაშვილი; ადვოკატები – რაჟდენ ხიმშიაშვილი და კახა წერეთელი.
ნახეთ ვიდეო:
