Batumelebi

ახალი წელი ყოველთვის დეკემბრის ბოლოს დგება – ეს არ იცვლება. ბოლო წლებში დამკვიდრებული ტრადიციის მიხედვით კი, ბათუმში ნაძვის ხეს 25 დეკემბერს ანთებენ. ქალაქის მერია ვერც ერთ წელს ვერ ახერხებს დღესასწაულთან დაკავშირებული შესყიდვა ისე დაგეგმოს, რომ ფორსმაჟორი არ შექმნას.

11 დღით ადრე, დღეს, 14 დეკემბერს, ბათუმის მთავარი ნაძვის ხის მონტაჟი არ დაუწყიათ. ამის პარალელურად მოსახლეობამ იცის, რომ ხალხის ფულიდან [ბიუჯეტიდან] ახალი ნაძვის ხის შეძენა-მონტაჟზე მილიონამდე ლარი გადაუდებელი აუცილებლობის მიზეზით ტენდერის გარეშე იხარჯება და მიმწოდებელმა კომპანიამ სოციალურ ქსელში ჩატარებული გამოკითხვის შედეგად გამოვლენილი დიზაინის ნაძვის ხე უნდა ჩამოიტანოს.

ალბათ ამიტომაც არის განსაკუთრებული ინტერესი ამ პროცესის მიმართ: „ხომ არ იცით, ნაძვის ხეს როდის დგამენ?“ – ამ კითხვით „ბათუმელების“ ფეისბუქის ჩატში ბოლო ერთი კვირის განმავლობაში ბევრჯერ მოგვმართეს.

მერიასთან დადებული ხელშეკრულების მიხედვით, ნაძვის ხე შპს „აჭარგანათებამ“ უნდა ჩამოიტანოს, იმავე კომპანიას დაუკვეთეს მისი მონტაჟის და შემდეგ დემონტაჟის სამუშაოებიც. შესყიდვის ღირებულება 968 387 ლარია.

ნაძვის ხის მიწოდების საბოლოო ვადად შემსყიდველმა ორგანიზაციამ, ბათუმის მერიის ა(ა)იპ საქალაქო ინფრასტრუქტურისა და კეთილმოწყობის სამმართველომ 23 დეკემბერი განსაზღვრა. ამის შემდეგ კი ნაძვის ხის მონტაჟისთვის, თუ მის ანთებას ისევ 25 დეკემბერს გეგმავენ, მხოლოდ ორი დღე რჩება.

კომპანიის ინფორმაციით, „ბათუმისთვის ნაძვის ხე უკვე დამზადებულია, დაიტვირთა და ხორციელდება მისი ტრანსპორტირება.“ ბათუმში სავარაუდოდ 2022 წლის 20-21 დეკემბერს ჩამოიტანენ.

ქალაქის გაფორმების სამუშაოები ბათუმის მერიის საქალაქო ინფრასტრუქტურისა და კეთილმოწყობის სამმართველომ 2022 წლის 12 ნოემბერს გამოაცხადა. გამარჯვებული კომპანია, შპს „აჭარგანათება“ 5 დეკემბერს გამოავლინეს. კანონის შესაბამისად, ხელშეკრულება გამარჯვებულის გამოვლენიდან არაუმეტეს 10 სამუშაო დღეში უნდა გაფორმდეს, ხელშეკრულება ამ დრომდე არ არის გაფორმებული.

„ბათუმელების“ ინფორმაციით, კომპანიამ ნაძვის ხე იტალიაში, მწარმოებლისგან 290 000 ევროდ შეისყიდა, ღირებულებას დაემატა განბაჟების ხარჯიც, რაც, ჯამში, 900 000-ზე მეტი ლარია. ფაქტობრივად, ნაძვის ხეში კომპანია სრულად იხდის ხელშეკრულების ღირებულების ფასს, თუმცა ამავე კომპანიას დაუკვეთეს საახალწლოდ ქალაქის გაფორმების სამუშაოებიც, რისთვისაც ბიუჯეტიდან 2 მილიონამდე ლარია გათვალისწინებული.

საახალწლოდ ბათუმის გასაფორმებლად 2 მილიონამდე ლარია გამოყოფილი

შპს „აჭარგანათება“ ქალაქის გარეგანათებასა თუ გაფორმებასთან დაკავშირებით გამოცხადებულ მერიის ტენდერებს ბოლო რამდენიმე წელია იგებს. „აჭარგანათებასთან“ , როგორც ტენდერში გამარჯვებულთან, მერიის სამმართველომ რამდენიმე თვის წინ ხელშეკრულება 28 963 287 ლარზეც გააფორმა. ხელშეკრულების მიხედვით, „აჭარგანათებამ“ 2026 წლამდე ქალაქის განათების სისტემა Led სანათებით უნდა შეცვალოს. კომპანიამ აიღო ასევე ქალაქის განათების წერტების მოვლა-განახლების ვალდებულება.

ბათუმის მერია საახალწლო ნაძვის ხის შეძენას გეგმავს და გამოკითხვას ატარებს

See more

 

2022 წლის 31 დეკემბრიდან ძალაში უნდა შესულიყო თამბაქოს პროდუქტების სადა შეფუთვის რეგულაცია, თუმცა პარლამენტის გადაწყვეტილებით, ის 2024 წლის 31 ივლისიდან ამოქმედდება.

„თამბაქოს კონტროლის შესახებ“ საქართველოს კანონში შესაბამისი ცვლილების შეტანაზე კანონი დღეს, 13 დეკემბერს ამოქმედდა.

• სადა შეფუთვა გულისხმობს თამბაქოს ნაწარმისთვის სასაქონლო ნიშნის, ფერების, ბრენდის გამოსახულების ან სარეკლამო ინფორმაციის გამოყენების აკრძალვას, გარდა ბრენდის სახელებისა და პროდუქტის სახელებისა, რომლებიც ნაჩვენები იქნება სტანდარტულ ფერსა და შრიფტში.

ეს რეგულაცია ძალაში 2018 წელს უნდა შესულიყო, თუმცა ის 2022 წლის ბოლომდე გადაიდო. გაეროს სააგენტოთა ჯგუფმა სპეციალური განცხადებით მოუწოდა საქართველოს პარლამენტს, მხარი არ დაეჭირა რეგულაციის ამოქმედების კიდევ ერთხელ გადავადებისთვის.

ამ თემაზე ვრცლად:

გაერო პარლამენტს მოუწოდებს, სიგარეტის სადა შეფუთვაზე კანონის ამოქმედება აღარ გადადოს

See more

„თანასწორობის მოძრაობის“ ინფორმაციით, დღეს, 13 დეკემბერს, 9 წლის წინანდელ გაუპატიურების შემთხვევაზე განაჩენი დადგა და მოძალადე დაისაჯა.

21 წლის ქალმა ააიპ „თანასწორობის მოძრაობას“ 2022 წლის 15 მარტს მიმართა. ის აცხადებდა, რომ არასრულწლოვან ასაკში ბიძა მასზე სექსუალურად ძალადობდა. ორგანიზაციის მიმართვის საფუძველზე გამოძიება საქართველოს სისხლის სამართლის კოდექსის 137-ე მუხლით დაიწყო, რაც გაუპატიურებას გულისხმობს.

„საქმეზე ეფექტურად ჩატარდა საგამოძიებო და საპროცესო მოქმედებები, რის შედეგადაც დადასტურდა, რომ 2008 წლიდან 2012 წლამდე პერიოდში ბრალდებული სისტემატურად, ძალადობითა და დაზარალებულის უმწეო მდგომარეობის გამოყენებით, ახორციელებდა სექსუალური ხასიათის ქმედებებს და სექსუალური ხასიათის შეღწევას. ბრალდებული დაკავებული იქნა გონივრულ ვადაში და მას ბრალდება წარედგინა საქართველოს სისხლის სამართლის კოდექსის 137-ე მუხლის მე-4 ნაწილის „გ“ ქვეპუნქტით (2018 წლის 30 მაისამდე მოქმედი რედაქციით)“, – წერს ორგანიზაცია.

„თანასწორობის მოძრაობის“ ცნობით, 2022 წლის 13 დეკემბრის განაჩენით მსჯავრდებული ცნობილ იქნა დამნაშავედ, შეეფარდა 16 წლით თავისუფლების აღკვეთა, რაც 2012 წლის 28 დეკემბრის კანონის მე-16 მუხლით შეუმცირდა ¼-ით და განესაზღვრა 12 წლით თავისუფლების აღკვეთა.

განაჩენი 9 წლის შემდეგ დადგა.

„ბენეფიციარს გაეწია სრულყოფილი სამართლებრივი კონსულტაცია, საქმეში ჩაერთო მულტიგუნდი ფსიქოლოგისა და სოციალური მუშაკის მონაწილეობით“, – წერს ორგანიზაცია.

ხულოში სქესობრივი კავშირის ან სექსუალური ხასიათის სხვაგვარი მოქმედების იძულების, შემდეგ ამის ამსახველი კადრების მოპოვება-გავრცელებისა და გამოძალვის ბრალდებით ორი პირი დააკავეს.

სპეციალური საგამოძიებო სამსახურის საგამოძიებო დეპარტამენტის აჭარის ავტონომიური რესპუბლიკის სამმართველოში, 2022 წლის 24 ნოემბერს, მ.შ-ს პირადი ცხოვრების საიდუმლოს უკანონოდ მოპოვების, შენახვისა და გამოყენებისა ფაქტზე გამოძიება დაიწყო, საქართველოს სისხლის სამართლის კოდექსის 157-ე პრიმა მუხლის პირველი ნაწილით გათვალისწინებული დანაშაულის ნიშნებით.

ეს მუხლი პირადი ცხოვრების ამსახველი ინფორმაციის უკანონოდ მოპოვება, შენახვასა და გავრცელებას გულისხმობს.

უწყების ცნობით, სისხლის სამართლის საქმეზე 2022 წლის 29 ნოემბერს [საქართველოს სსკ-157 პრიმა მუხლის პირველი ნაწილით გათვალისწინებული დანაშაულის ჩადენის ბრალდებით], სასამართლოს განჩინების გარეშე დააკავეს ორი პირი – ბ. გ. და ა. ხ.

2022 წლის 30 ნოემბერს ა. ხ.-ს და ბ.გ-ს ბრალი წარედგინათ სისხლის სამართლის კოდექსის კიდევ ორი მუხლით – 139-ე მუხლის პირველი ნაწილით, რომელიც სქესობრივი კავშირის ან სექსუალური ხასიათის სხვაგვარი მოქმედების იძულებას გულისხმობს.

დაკავებულებს ასევე ბრალი წარედგინათ სახელგამტეხი ცნობის გახმაურების ან ქონებრივი დაზიანების მუქარით (ანდა მატერიალური, სამსახურებრივი ან სხვაგვარი დამოკიდებულების გამოყენებით) და 181-ე მუხლის პირველი ნაწილით, ანუ გამოძალვის მუხლით.

ბათუმის საქალაქო სასამართლოს 2022 წლის პირველი დეკემბრის განჩინებით ბრალდებულებს ბ. გ.-ს და ა. ხ.-ს აღკვეთის ღონისძიების სახით პატიმრობა შეეფარდათ.

სისხლის სამართლის კოდექსის 157-ე მუხლის პირველი ნაწილით გათვალისწინებული დანაშაული [პირადი ცხოვრების ამსახველი ინფორმაციის ან პერსონალური მონაცემების უკანონოდ მოპოვება/გავრცელება], ისჯება ჯარიმით ან გამასწორებელი სამუშაოთი ვადით ორ წლამდე ან თავისუფლების აღკვეთით ვადით სამ წლამდე;

139-ე მუხლით გათვალისწინებული სქესობრივი კავშირის ან სექსუალური ხასიათის სხვაგვარი მოქმედების იძულება ისჯება ჯარიმით ან თავისუფლების აღკვეთით ვადით სამ წლამდე;

181-ე მუხლის პირველი ნაწილით გათვალისწინებული ქმედება – გამოძალვა კი, ისჯება თავისუფლების აღკვეთით ვადით შვიდიდან თერთმეტ წლამდე ვადით.

ავტორი: მონიკა ქაშიბაძე, ქუთაისის საინიციატივო ჯგუფ „როდემდეს“ წევრი

__________________________________________________________

საინიციატივო ჯგუფი „როდემდე“ 2022 წლის სექტემბერში შეიქმნა და აერთიანებს ახალგაზრდებს, რომლებსაც აქვთ ერთი მიზანი – ხელი შეუწყონ სასიკეთო ცვლილებებს ქუთაისის მუნიციპალიტეტში. შექმნის დღიდან საინიციატივო ჯგუფი მუშაობს ორი ძირითადი მიმართულებით: ქუთაისში დასუფთავებისა და სანიაღვრე სისტემასთან დაკავშირებულ პრობლემებზე.

ამ სტატიაში ვისაუბრებთ ქუთაისში დასუფთავების მიმართულებით არსებულ პრობლემებსა და გამოწვევებზე, რომლებიც საკითხზე მუშაობის პერიოდში სხვადასხვა გზით დავადგინეთ – მცხოვრებლებთან საუბრით, ქუთაისის მერიისა და ა(ა)იპ სპეციალური სერვისების ოფიციალური ინფორმაციებით, ქუთაისის სხვადასხვა უბანში ვითარებაზე დაკვირვებით.

კვლევის პროცესში გამოიკვეთა რამდენიმე აქტუალური საკითხი: დანაგვიანებული ქუჩები, ნაგვის გატანის არასაკმარისი სიხშირე, გადავსებული ურნები და ანტისანიტარია გარშემო, დაზიანებული ნაგვის კონტეინერები და შესაბამისად, ხალხის მიერ გადახდილი თანხის შეუსაბამო სერვისი. ამ პრობლემების მოგვარებაზე პასუხისმგებლობა კი ქუთაისის მუნიციპალიტეტში ქუთაისის მერიის ა(ა)იპს – სპეციალურ სერვისებს ეკისრება.

ჭავჭავაძის ქუჩა, თაბუკაშვილის ქუჩა, ჩხობაძის ქუჩა, გამსახურდიას ქუჩა…. – ეს არის არასრული ჩამონათვალი იმ ქუჩებისა, რომლებიც ჩვენს Facebook გვერდზე ჩატარებულ გამოკითხვაში და მოსახლეობასთან უშუალო დიალოგისას გამოიკვეთა, როგორც განსაკუთრებით პრობლემური ქუჩები ქუთაისის მასშტაბით.

პრობლემების გამომწვევი მიზეზის გასაგებად ქუთაისის მერიისგან გამოვითხოვეთ ინფორმაცია, რა სიხშირით ხდება ნარჩენების გატანა ქალაქის სხვადასხვა ქუჩიდან და აღმოჩნდა, რომ ჩვენ მიერ ზემოთ ჩამოთვლილი ქუჩების ნაწილებიდან ა(ა)იპ სპეციალურ სერვისებს ნაგავი კვირაში მხოლოდ ერთხელ, ორჯერ ან სამჯერ გააქვს.

მაგალითისთვის:

1. თაბუკაშვილის 2,4,6,8,10 შესახვევი – გატანა კვირაში ერთხელ
2. გამსახურდიას ქუჩის მე-3 ჩიხი – გატანა კვირაში ერთხელ
3. ჩხობაძის ქუჩის მე-3 შესახვევი – გატანა კვირაში ერთხელ
4. ზურაბ ჭავჭავაძის 2 და 5-სართულიანები – გატანა კვირაში ორჯერ
5. თაბუკაშვილის ქუჩა – გატანა კვირაში ორჯერ
6. ზურაბ ჭავჭავაძის მრავალსართულიანები – გატანა კვირაში სამჯერ

ასევე, აღსანიშნავია, რომ ქუთაისის მერიის მიერ მოწოდებული გრაფიკის მიხედვით ის ლოკაციებიც კი, რომლებსაც კვირაში 6-ჯერ და 7-ჯერ ასუფთავებენ, მაინც პრობლემურად რჩება.

• პასილოკის დასახლება

22 ოქტომბერს საინიციატივო ჯგუფის წევრები პასილოკის დასახლებაში ვიმყოფებოდით, სადაც მოსახლეობასთან საუბრისას დასუფთავების მიმართულებით რამდენიმე ძირითადი პრობლემა გამოიკვეთა, როგორებიცაა: ნარჩენების გატანის სიხშირე, გადავსებული ურნები, არასაკმარისი ნაგვის კონტეინერები, დაბინძურებული ქუჩები.

„ხდება ხოლმე, რომ ნაგავი რამდენიმე დღე არ გააქვთ, შესაბამისად ნარჩენები გარეთაა მიმოფანტული, სრული ანტისანიტარიაა, განსაკუთრებით ზაფხულში, ზოგჯერ ფანჯრებსაც კი ვერ ვაღებთ“…

„კვირაში ერთხელ მოდის ნაგვის მანქანა, ისიც ვერ გაიგებ, დილით თუ საღამოს, ზოგჯერ მიწევს მთელი კვირის დაგროვილი ნარჩენები სხვა ქუჩაზე გავიტანო გადასაყრელად“, – ამბობენ პასილოკის დასახლებაში მცხოვრებლები.

ძირითად პრობლემებს შორის გამოიკვეთა ისიც, რომ არ სუფთავდება შიდა ქუჩები.

„პირველ სართულზე ვცხოვრობ და ვსუნთქავ ნაგავს, გადასახადს ვიხდით, თუმცა სერვისი არ არის შესაბამისი“ – აცხადებს მოქალაქე.

მიუხედავად იმისა, რომ მცხოვრებლების თქმით, პასილოკის დასახლების ცენტრალურ ქუჩებზე არსებული კონტეინერები ყოველდღიურად იცლება, მაინც მუდამ გადავსებულია და ისინი ვერ ახერხებენ ნაგვის გადაყრას, ნაგავი ურნების ირგვლივ იფანტება და მიმდებარე ტერიტორიაზე სრული ანტისანიტარიაა, რაც ასევე იწვევს ურნების გარშემო ძაღლების თავმოყრას.

• ავტოქარხნის დასახლება

კიდევ ერთ პრობლემურ უბანს წარმოადგენს ავტოქარხნის დასახლება, სადაც მოსახლეობის ჩასაწერად 23 ოქტომბერს ვიყავით. მსგავსად პასილოკის დასახლებისა, ძირითადი პრობლემა კვლავ ნარჩენების გატანის ინტენსივობა, არასაკმარისი ნაგვის ურნები და დაზიანებული კონტეინერებია, რომელთა ნაწილი ზოგიერთ ადგილას დალუქულია.

პრობლემას წარმოადგენს ისიც, რომ ურნებისთვის თავის დახურვა ჭირს, რის გამოც ნაგავი მიუსაფარ ცხოველებს გარეთ გადმოაქვთ და ირგვლივ იფანტება.

„ურნებს თავი არ ეხურება, ხშირად ამოხტება ხოლმე ურნიდან ხან კატა, ხან ძაღლი და ამოაქვთ ნაგავი, ზოგისთვის ისე ჭირს კონტეინერებზე თავის ახდა, რომ ბევრი ვერც ერევა,“- ამბობს მოქალაქე.

მოსახლეობის თქმით, გამომდინარე იქიდან, რომ დასახლება დიდია, ნარჩენების გატანის სიხშირე არასაკმარისია და უწევთ შესაბამის სამსახურებთან დაკავშირება, რათა ტერიტორია დაასუფთაონ. ასევე აღნიშნავენ, რომ არც კონტეინერების რეცხვა-დეზინფექცია ხორციელდება.

აღნიშნული პრობლემების გამო ავტოქარხნის დასახლების ზოგიერთ ქუჩაზე მოსახლეობამ თავად მოითხოვა ნაგვის ურნების აღება, რადგან მიმდებარე ტერიტორიაზე მცხოვრებლებს გაუსაძლისი პირობები ექმნებოდათ – მუდამ გადავსებული და თავღია, დეზინფექციაჩაუტარებელი ურნების გამო მოსახლეობას ფანჯრების გაღებაც კი არ შეეძლო. გაუსაძლისი პირობები, მათი თქმით, განსაკუთრებით ზაფხულში იქმნება. აღსანიშნავია ისიც, რომ ა(ა)იპ სპეციალურ სერვისებს არ აქვს წინასწარ განსაზღვრული გრაფიკი ურნების რეცხვისა დეზინფექციისთვის, მათივე განმარტებით, დეზინფექცია ძირითადად ზაფხულში ტარდება.

არსებული ხარვეზების პარალელურად დაგვაინტერესა, რა რაოდენობის პრემია/დანამატი/ჯილდო გაიცემა ამ პრობლემების მოგვარებაზე პასუხისმგებელი ორგანიზაციის – ა(ა)იპ სპეციალური სერვისების თანამშრომლებზე. შესაბამისად, ქუთაისის მერიიდან ინფორმაცია გამოვითხოვეთ, რომლის მიხედვით, 2021 წელს ა(ა)იპ სპეციალურ სერვისებში 374 381 ლარის ოდენობით პრემია/დანამატი/ჯილდო გაიცა, რაც 2020 წლის მაჩვენებელთან შედარებით 236 369 ლარით მეტია.

2021 წელს ქვეყანაში კორონავირუსის პანდემიის გამო 6 თვის განმავლობაში კომენდანტის საათი იყო დაწესებული, ხოლო ოქტომბერში ადგილობრივი თვითმმართველობის არჩევნების ორი ტური ჩატარდა. უცნობია, რა დამატებითმა დამსახურებებმა გამოიწვია ა(ა)იპი სპეციალური თანამშრომლებისთვის გასულ წელთან შედარებით 236 000 ლარით მეტი პრემიების, ჯილდოებისა და დანამატების გადაცემა.

ამასთან, ქუთაისის მერიის ინფორმაციით, 2022 წლის პირველ 9 თვეში (პირველი იანვრიდან 11 სექტემბრის ჩათვლით) ა(ა)იპ სპეციალურ სერვისებში უკვე გაცემულია 118 105 ლარის ოდენობის პრემია/დანამატი/ჯილდო.

ა(ა)იპ სპეციალური სერვისების თანამშრომლები პრემიების მიღებას განაგრძობენ, ისევე, როგორც ქუთაისის მუნიციპალიტეტის მცხოვრებლები უკეთესი სერვისის მისაღებად დასუფთავების მოსაკრებლის გადახდას, რისმა ჯამურმა რაოდენობამაც 2020, 2021 და 2022 (სექტემბრამდე) პერიოდში უკვე 5,185,100 მილიონი ლარი შეადგინა, თუმცა ამის მიუხედავად, ისინი მაინც ვერ იღებენ შესაბამის სერვისს.

საინიციატივო ჯგუფმა „როდემდემ“ 31 ოქტომბერს ქუთაისის მუნიციპალიტეტის მერიის წინ გამართა პერფორმანსი, რომლის მთავარი მიზანი იმის ჩვენება იყო, რამდენად არაეფექტური და ხარვეზიანია მერიის მუშაობა ქალაქში დასუფთავების მიმართულებით. პერფორმანსის საშუალებით შევეცადეთ მერიამდე მიგვეტანა ქუთაისის სხვადასხვა უბნის მცხოვრებთა სათქმელი.

პერფორმანსის მიმდინარეობისას ქუთაისის მერიაში შევიტანეთ განცხადება ზურაბ ჭავჭავაძისა და თაბუკაშვილის ქუჩების შესახებ და მოვუწოდეთ ორგანოს, რომ მოახდინოს რეაგირება და გადადგას შესაბამისი ნაბიჯები ამ უბნებზე დასუფთავების პრობლემის მოსაგვარებლად. განცხადებას თან დავურთეთ ფოტომასალაც, რომელიც წარმოადგენდა ერთგვარ მტკიცებულებას უბნებზე არსებული მძიმე მდგომარეობისა.

პერფორმანსის ჩატარების შემდეგ ჟურნალისტებმა ქუთაისის მერს, იოსებ ხახალეიშვილს დაუსვეს კითხვა პერფორმანსის თემატიკის შესახებ, თუმცა, როგორც ჩანს, მერისთვის ეს პრობლემა სერიოზულად არ აღიქმება და მან კითხვა უპასუხოდ დატოვა.

დასუფთავების მიმართულებით არსებულ პრობლემაზე მუშაობა გაგრძელდა ჩვენ მიერ ჩატარებული დისკუსიით, რომელიც 14 ნოემბერს გაიმართა. დისკუსიას ესწრებოდნენ ა(ა)იპ სპეციალური სერვისების წარმომადგენელი, ჟურნალისტები, მოქალაქეები და აქტივისტები. საინიციატივო ჯგუფის წევრებმა წარადგინეს პრეზენტაცია, რომლის დასრულების შემდეგ გაიმართა დისკუსია, სადაც დაინტერესებული მხარეების პოზიციებსა და კითხვებს ა(ა)იპ სპეციალური სერვისების წარმომადგენელმა საკუთარი არგუმენტებით უპასუხა და თქვა, რომ პასუხისმგებლობა არა მხოლოდ უშუალოდ დასუფთავების სამსახურს, არამედ სხვა უწყებებსა და მოქალაქეებსაც ეკისრება.

„ჩვენი სათქმელი ეს არის, ყველა ჩვენი თანამოქალაქის მისამართით, რომ პასუხისმგებლობა ამ კონკრეტული ამოცანის შესასრულებლად თანაბრად უნდა გადანაწილდეს სამოქალაქო სექტორსა და სახელმწიფო უწყებებში,“ – თქვა ა(ა)იპ სპეციალური სერვისების საზოგადოებასთან ურთიერთობის სამსახურის უფროსმა, გიორგი მჟავანაძემ.

შეგახსენებთ, რომ მაშინ, როდესაც ა(ა)იპ სპეციალური სერვისების წარმომადგენელი თანაბარ პასუხისმგებლობაზე საუბრობს, მათი 2022 წლის ბიუჯეტი 6 879 100 მილიონ ლარს შეადგენს, რაც ადამიანების გადახდილი გადასახადებით არის შევსებული, ამიტომ ჩვენთვის უცნაურია პასუხისმგებლობის თანაბრად განაწილების მოთხოვნა.

ამასთან ერთად, დისკუსიაზე გიორგი მჟავანაძემ თქვა, რომ ა(ა)იპ სპეციალური სერვისების ბიუჯეტი საკმარისი არ არის, რათა მოსახლეობას უკეთესი სერვისი შესთავაზონ და საჭიროა დაფინანსების გაზრდა.

საინიციატივო ჯგუფი „როდემდე“ მოუწოდებს შესაბამის უწყებებს – ქუთაისის მერიასა და ა(ა)იპ სპეციალურ სერვისებს გადადგან ნაბიჯები ჩვენ მიერ დასახელებული პრობლემების მოსაგვარებლად. მოქალაქეების უფლება და საჭიროებაა, იცხოვრონ სუფთა, მოწესრიგებულ და ჯანმრთელობისთვის უსაფრთხო ქალაქში, ხოლო მუნიციპალიტეტი შესაბამისი სამსახურებით უნდა უზრუნველყოფდეს ამ უფლების რეალიზებას.

_______________

რედაქციაში შემოსულ წერილებში გამოთქმული მოსაზრებები შესაძლოა არ გამოხატავდეს „ბათუმელების“ პოზიციას.

ყაზახური მედიის მიერ გავრცელებული კადრების თანახმად, ქვეყანაში გათბობის პრობლემების გამო, ახალ შენობაში ყინულის სტალაქტიტები და სტალაგმიტები გაჩნდა – ფაქტობრივად, საცხოვრებელი ბინები ყინულით დაიფარა.

ბინებში სტალაქტიტები და სტალაგმიტები რამდენიმე მეტრი სიმაღლისაა.

ჟურნალისტებმა ფაქტი დააფიქსირეს კოსტანეის ოლქის ადმინისტრაციული ცენტრში, ქალაქ კოსტანაიაში.

მედიის ინფორმაციით, მესაკუთრეები კუნაის მიკრორაიონში, ახალ ბინებში გადასასვლელად ემზადებოდნენ, მაგრამ აღმოჩნდა, რომ ეს შეუძლებელი იქნება.

ჟურნალისტებს ქალაქის სამშენებლო სამმართველოში განუცხადეს, რომ კონტრაქტორთან ხელშეკრულება ვალდებულებების შეუსრულებლობის გამო შეწყდა, ხოლო შენობა, სამუშაოების საწარმოებლად, სხვა კომპანიას გადაეცა.

დათვალიერებისას აღმოჩნდა, რომ გათბობის სისტემა მხოლოდ ახალი კორპუსის სარდაფშია მოწყობილი. შესაბამისად, ყველა ბინა იყინება.

თუმცა აღმასრულებელი ხელისუფლება დაჰპირდა, რომ 13 დეკემბრისთვის, ანუ დღეისთვის „ყველა ხარვეზი აღმოიფხვრება“.

პროკურატურამ ხელვაჩაურის მუნიციპალიტეტში მომხდარი ოჯახის წევრის განზრახ მკვლელობის ფაქტზე ერთ პირს ბრალი წარუდგინა.

11 დეკემბერს ხელვაჩაურის მუნიციპალიტეტის სოფელ სალიბაურში, ურთიერთშელაპარაკების ნიადაგზე წარმოშობილი კონფლიქტის დროს, ბრალდებულმა მასზე რეგისტრირებული სანადირო თოფიდან რძალს ესროლა, რომელიც მიყენებული დაზიანების შედეგად ადგილზე გარდაიცვალა.

პროკურატურის ინფორმაციით, გამოძიების მასალებით დგინდება, რომ ბრალდებული სისტემატურად იღებდა ალკოჰოლურ სასმელს, ჰქონდა ფსიქიკური პრობლემები, რასთან დაკავშირებითაც მიმდინარე წლის თებერვალში ფსიქიატრიულ საავადმყოფოში მკურნალობის კურსს გადიოდა.

პოლიციამ ბრალდებული იმავე დღეს დააკავა.

მას ბრალდება საქართველოს სისხლის სამართლის კოდექსის 11 პრიმა 109 -ე მუხლის „კ“ ქვეპუნქტით (განზრახ მკვლელობა დამამძიმებელ გარემოებაში ოჯახის წევრის მიმართ) წარედგინა, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.

ასევე, ბრალდებულის ფსიქიკური ჯანმრთელობის შეფასების მიზნით დაინიშნება შესაბამისი ექსპერტიზა.

ყოფილი მოსამართლე დავით კეკენაძე საკონსტიტუციო სასამართლოში იმ სამართლებრივ ნორმას ასაჩივრებს, რომელიც მის პენსიად 560 ლარს განსაზღვრავს თვეში. ყოფილ მოსამართლეს მიაჩნია, რომ ეს საკუთრების უფლებაში ჩარევაა, რაც კონსტიტუციით გარანტირებულია.

დავით კეკენაძეს მოსამართლედ მუშაობის 25-წლიანი გამოცდილება აქვს. ბოლოს იგი ბათუმის საქალაქო სასამართლოში მუშაობდა.

დავის საგანია საქართველოს კანონი „სახელმწიფო კომპენსაციისა და სახელმწიფო აკადემიური სტიპენდიის შესახებ“. მოსარჩელე ითხოვს, არაკონსტიტუციურად იქნეს ცნობილი სადავოდ გამხდარი ნორმები და მისი შემდგომი რეგულაცია განახორციელოს საქართველოს პარლამენტმა, იმ მოცემულობით, რომელიც უზრუნველყოფს, ერთი მხრივ, საკუთრების უფლების და, მეორე მხრივ, თანასწორობის უფლების დაცვას.

ყოფილი მოსამართლე სარჩელში ასაბუთებს, რატომ მიაჩნია არსებული რეგულაცია თანასწორობის უფლების დარღვევად.

„…როდესაც მოსამართლე უვადოდ ინიშნება, მას წარმოეშვება როგორც მოსამართლეობის განხორციელების უფლებამოსილება, ისე ამ უფლებამოსილების განხორციელებასთან დაკავშირებული შეზღუდვები, რაც თან ვრცელდება მის მიმართ უფლებამოსილების შეწყვეტამდე [რაც, თავის მხრივ საკმაოდ დიდ ვადას შეიძლება მოიცავდეს მისი უვადო განწესების ფაქტორის გათვალისწინებით და მისი საქმიანობის დიდი ინტენსივობის შეზღუდვაა]“, – ვკითხულობთ სარჩელში.

დავით კეკენაძეს საკონსტიტუციოს მოსამართლეებს ახსენებს, რომ მოსამართლე, მაგალითად, ვერ დაკავდება ეკონომიკური, ან პოლიტიკური აქტივობით.

ყოფილი მოსამართლე იხსენებს ლიეტუვას საკონსტიტუციო სასამართლოს მაგალითს, სადაც დაუდგენიათ, რომ

„კონსოლიდირებული ლიეტუვას სახელმწიფოს სოციალური ორიენტაციის გამო სახელმწიფო ზოგადად ვალდებულია პატივი სცეს სოციალური [მატერიალურ] გარანტიების არსებითობის იმპერატივს, შესაბამისად, იგი ვალდებულია, გადახედოს [გაზარდოს] სოციალური [მატერიალური] გარანტიები [და გამოყენების შემდეგ], თუ ეკონომიკური და სოციალური ვითარება შეიცვლება ისე, რომ დადგენილი [და გამოყენებული] გარანტიები მნიშვნელოვნად გაუფასურდება, რომ აღარაფერი ვთქვათ, თუ ისინი ზოგადად გახდება ნომინალური [ამით გამონაკლისი ხდება. გადახდების პროპორციულ და დროებით შემცირებასთან დაკავშირებით, როდესაც ეს აუცილებელია სხვა კონსტიტუციური ღირებულებების დასაცავად].

საერთაშორისო პრაქტიკის მიმოხილვის შემდეგ ყოფილი მოსამართლე ასკვნის:

„სწორედ ამიტომ, ლოგიკურია, რომ საქართველოს კონსტიტუცია, მსგავსად ლიეტუვას კონსტიტუციისა და ნებისმიერი დემოკრატიული სახელმწიფოსა, რომლის მიზანიც არის სამართლიანი სასამართლოს შექმნა, იცავს, ერთი მხრივ ადამიანის სამართლიანი სასამართლოს უფლებას, მისი საქმე განხილულ იყოს დამოუკიდებელი და მიუკერძოებელი სასამართლოს მიერ, და მეორე მხრივ, ამის უზრუნველსაყოფად, ბუნებრივია, ითვალისწინებს ვალდებულებას, უზრუნველყოს, არამარტო სასამართლოს [როგორც ინსტიტუციური ერთეულის დამოუკიდებლობა], არამედ, ინდივიდუალური მოსამართლის ადეკვატური სოციალური გარანტიები, რაც თავის მხრივ, ასევე არის თანმდევი იმ აკრძალვებისა [სხვა ეკონომიკური საქმიანობის წარმართვა], რასაც მოსამართლე ექვემდებარა მისი შრომისუნარიანი პერიოდის განმავლობაში,“ – წერს დავით კეკენაძე.

ყოფილი მოსამართლე მიიჩნევს, რომ სადავო სამართლებრივი ნორმა არღვევს კონსტიტუციის მე-19 მუხლს, რაც საკუთრების უფლების დაცვას გულისხმობს.

მოსამართლეს ისიც გამოუთვლია, რამდენი იქნებოდა მისი პენსია ახლა, კომპენსაციის ზედა ზღვარი კანონით განსაზღვრული რომ არ იყოს:

„სახელმწიფო პენსიას [260 ლარი, 2022 წლის მდგომარეობით, 70 წლამდე პირთათვის] დამატებული სახელმწიფო პენსიის 30%-ის [78 ლარი] საერთო სასამართლოს მოსამართლედ მუშაობის სტაჟზე [28 წელი] ნამრავლი, რაც უდრის: 2,444 ლარს. სადავოდ გამხდარი მუხლის მიხედვით კი, დადგენილია მოსარჩელეს კომპენსაციის ზედა ზღვარი…“ – დასძენს ყოფილი მოსამართლე. ეს ფორმულა კანონითვეა განსაზღვრული, თუმცა ამავე კანონი ითვალისწინებს ზედა ზღვარს.

მოსამართლედ მრავალწლიანი მუშაობის გამოცდილების შემდეგ, ყოფილი მოსამართლე შენიშნავს, რომ ქვეყანაში ფასები გაიზარდა, „კომპენსაციის ოდენობა არ დაქვემდებარებია ზრდას, 2005 წლიდან მოყოლებული“, – ჩაუწერია დავით კეკენაძეს და იქვე მაგალითსაც ასახელებს: 2005 წელს საარსებო მინიმუმი 90 – 95 ლარი იყო, დღეს – 240 ლარი.

„ბოლო წლებში ინფლაციის მაჩვენებელი ორნიშნა ნიშნულს ცდება,“ – ინფლაციის გაზრდილი მაჩვენებელიც არ გამორჩა ყოფილ მოსამართლეს.

„შესაბამისად, მოსარჩელეს საკუთრების უფლებაში ჩარევა განხორციელდა მაღალი ინტენსივობით შემდეგ გარემოებათა გამო:

ა) მოსამართლის მიმართ აქვს სახელმწიფოს ვალდებულება, უზრუნველყოს იგი ადეკვატური სოციალური გარანტიით;

ბ) მოსამართლეს, წლების განმავლობაში ეზღუდებოდა მთელი რიგი საქმიანობა;

გ) წლების განმავლობაში, ინფლაციის, საარსებო მინიმუმის და სხვა ფაქტორის გათვალისწინებით, ზრდას არ დაქვემდებარებია იმ კომპენსაციის ოდენობა, რისი მიღების უფლებაც წარმოეშვა მას;

დ) არსებული სტატუს-კვოთი, უგულებელყოფილ იქნა მოსამართლის სტაჟი მისი კომპენსაციის გამოანგარიშებისას;

ე) განსხვავებით მოსამართლის მიერ მისაღები კომპენსაციისა, სახელმწიფომ აიღო ვალდებულება, ინფლაციის გათვალისწინებით, ზარდოს სახელმწიფო პენსიის ოდენობა, თუმცა, იმავე არ შეხებია რაიონული [საქალაქო] სასამართლოს მოსამართლის მიერ მისაღებ კომპენსაციას,“ – ვკითხულობთ სარჩელში.

საქართველოს კონსტიტუციის მიხედვით, საერთო სასამართლოების მოსამართლე შეიძლება გახდეს საქართველოს მოქალაქე 30 წლის ასაკიდან, ის უვადოდ განმწესდება უვადოდ საპენსიო ასაკის მიღწევამდე.

სააპელაციო სასამართლოს მოსამართლის ჯამაგირი თვეში 5 ათასი ლარია, საქალაქო სასამართლოს მოსამართლის [მათ შორის, მაგისტრატის] ხელფასი კი – 4 ათასი ლარი. მოსამართლეები ასევე იღებენ დანამატებს.

„საქართველო XVI-XVIII საუკუნეების ნიდერლანდურ რუკებსა და გრავიურებზე“ – ასე ეწოდება გამოფენას, რომელიც 14 დეკემბერს, მხოლოდ ერთი დღით გაიმართება ბათუმის შოთა რუსთაველის სახელმწიფო უნივერსიტეტში, №55 აუდიტორიაში, 14:00-დან 19:00 საათამდე.

გამოფენა , რომელსაც „ღია სივრცე კავკასია“ (COS) მართავს, ნიდერლანდების სამეფოსა და საქართველოს შორის ორმხრივი დიპლომატიური ურთიერთობის დამყარების 30 წლისთავს ეძღვნება და მისი მხარდამჭერი საქართველოში ნიდერლანდების სამეფოს საელჩოა.

გამოფენაზე იურისტის, კოლექციონერ სულხან სალაძის კერძო კოლექციაში არსებული რუკები და გრავიურები იქნება წარმოდგენილი.

ყველა რუკა ან გრავიურა, რომლებსაც გამოფენაზე დამთვალიერებელი იხილავს, ან ნიდერლანდებშია დაბეჭდილი, ან კიდევ მათი ავტორები იყვნენ ნიდერლანდებიდან.

„მხოლოდ ის რუკები და გრავიურები შევარჩიეთ ამ გამოფენისთვის, რომლებიც პირდაპირ ეხება საქართველოს. ეს არის შავი ზღვის რუკები, ბიბლიური და ისტორიული თემატიკის რუკები, მაგრამ ამ რუკებზე, სხვა ბევრ საინტერესო ინფორმაციასთან ერთად, ვხვდებით ცნობებს საქართველოს შესახებ.

გამოფენაზე იქნება წარმოდგენილი 26 რუკა და გრავიურა, მათი აბსოლუტური უმრავლესობა ნიდერლანდური კარტოგრაფიის ოქროს პერიოდშია შექმნილი, რომელიც მე-16 საუკუნის 70-იანი წლებიდან იღებს სათავეს და პრაქტიკულად, უწყვეტად გრძელდება მთელი ასი წელი და მეტიც.

რუკებისა და გრავიურების უმრავლესობა დაბეჭდილია ამსტერდამში, ამსტერდამს მოსდევს ლეიდენი, როტერდამი და ასევე, წარმოდგენილი იქნება თანამედროვე ევროპის კიდევ ორ სახელმწიფოში – ბელგიასა და გერმანიის ქალაქებში დაბეჭდილი რუკები, თუმცა ამ რუკების ავტორები არიან ფლანდრიელები და ნიდერლანდელები“ – ამბობს სულხან სალაძე.

რით არის ეს რუკები საინტერესო და განსაკუთრებული დამთვალიერებლებისთვის, რომლებიც არ იცნობენ კარგად კარტოგრაფიის ისტორიას? სულხან სალაძე ამბობს, რომ ამ რუკებზე ბევრ საინტერესო ცნობას და დეტალს ვხედავთ, რაც ამ გამოფენას განსაკუთრებულ მნიშვნელობას სძენს:

„პირველ რიგში, ზღვის თემატიკა არის ძალიან საინტერესო.

ზოგადად, ევროპული კარტოგრაფია ძალიან კარგი ადგილია, სადაც შეიძლება ვეძიოთ ინფორმაცია საქართველოსა და შავი ზღვის შესახებ, რა კავშირები გვქონდა ისტორიულად. ნიდერლანდური კარტოგრაფია ამ მხრივ არის ერთ-ერთი ყველაზე გამორჩეული.

მაგალითად, ამ გამოფენაზე წარმოდგენილი იქნება რუკები, სადაც შავი ზღვის აღსანიშნავად სახელწოდებებს შორის დამთვალიერებელი აღმოაჩენს სახელწოდებას „კოლხეთის ზღვა“, ან „ფაზისის ზღვა“ [ეს უკანასკნელი სახელწოდება არა ერთ რუკაზე მეორდება და არა მხოლოდ ნიდერლანდურ რუკებზე]. ასევე ნახავენ რუკებს, სადაც არგონავტების მოგზაურობის მარშრუტია დატანილი. შეინიშნება, რომ დასავლეთ საქართველო უფრო დეტალურად არის გამოსახული ამ რუკებზე, რაც მიანიშნებს იმაზე, რომ კომუნიკაციის თვალსაზრისით ზღვას განსაკუთრებული როლი ჰქონდა.

გამოფენაზე იქნება წარმოდგენილი პტოლემესა და სტრაბონის ცნობების მიხედვით შედგენილი რუკა. ამ რუკაზე ჩანს კუნძული შავ ზღვაში, ძველი კოლხეთის ნაპირებთან.

რუკაზე ამ კუნძულის არსებობას აქვს თავისი ახსნა. ერთ-ერთი ვერსიით, მედეას მამიდა სწორედ ამ კუნძულზე ცხოვრობდა [ბერძნ. მითოლოგიაში – კირკე, მზის ღმერთის, ჰელიოსის შვილი, კოლხეთის მეფის, აიეტის და, მედეას მამიდა].

არის სხვა ვერსიაც, რომ ეს კუნძული უნდა ყოფილიყო თანამედროვე ხმელთაშუა ზღვაში, რომიდან დასავლეთით. მაგრამ ბერძნული წყაროები ამბობენ, რომ ეს კუნძული უნდა ყოფილიყო კოლხეთის სანაპიროსთან ახლოს, შავ ზღვაში. სწორედ ეს წყარო გამოიყენა ცნობილმა კარტოგრაფმა, აბრაჰამ ორტელიუსმა თავის რუკაზე – „პონტოს ევქსინუსზე“, როცა აღნიშნა ეს კუნძული,“ – ამბობს სულხან სალაძე.

იგი კიდევ ერთ რუკაზე საუბრობს, რომელიც გამოფენაზე იქნება წარმოდგენილი. ესაა კასპიის ზღვის მეზობელი ქვეყნების რუკა, რომელიც პირველად პარიზში დაიბეჭდა 1723 წელს, თუმცა გამოფენაზე დამთვალიერებელი ნახავს ამ რუკის 1732 წლის ამსტერდამულ ვერსიას, რომელზეც სულხან-საბა ორბელიანის პერსონალური აღნიშვნაა დატანილი – „სულხან-საბა, ქართველი თავადი“.

სულხან სალაძე ამბობს, რომ ეს რუკა შეიქმნა სწორედ სულხან-საბას მოგზაურობის შემდგომ, მის მიერ საფრანგეთში ჩატანილი და გაზიარებული ცნობებით და ეს არის პირველი დეტალური რუკა კავკასიის შესახებ.

გამოფენაზე ასევე წარმოდგენილი იქნება იმპერიებისა და კონტინენტების ნიდერლანდური რუკები, რომლებზეც საქართველოა აღნიშნული. მათ შორის ერთი რუკა პირველად იქნება გამოფენილი საქართველოში.

„ეს არის რუკა სახელწოდებით „ისტორიის შუქი აღმოსავლეთში“. რუკის ავტორია ნიდერლანდური კარტოგრაფიის ოქროს საუკუნის მამამთავარი აბრაჰამ ორტელიუსი, ფლანდრიელი კარტოგრაფი. ამ რუკაზე, გარდა იმისა, რომ კოლხეთის, იბერიის, ფაზისის ზღვის, მდინარე არაგვის აღნიშვნას ნახავთ, ასევე, თანამედროვე ისრაელის ტერიტორიაზე შენიშნავთ წარწერას „ჯეორჯია“. შესაძლოა, ეს უკავშირდებოდეს რომელიმე ქართულ ეკლესიას ან მონასტერს იმ ტერიტორიაზე.

ზოგიერთ რუკას ახლავს ლექსიკონები, რომლებიც რუკის ირგვლივაა გამოსახული, მნიშვნელოვანი აღნიშვნებია გამოტანილი და სწორედ ამ რუკაზე ვკითხულობთ წარწერას – „იბერები ანუ ქართველები, ხალხი მცხოვრები შავსა და კასპიის ზღვებს შორის“.

ეს რუკა საქართველოში ნაკლებად არის ცნობილი, ალბათ ძირითადად იციან იმ ადამიანებმა, რომლებიც კარტოგრაფიის ისტორიით არიან დაინტერესებულნი. ამ რუკის ორი ბეჭდვა არსებობს, ჩვენ წარმოვადგენთ 1624 წლის რუკას, რომელიც ანტვერპენშია დაბეჭდილი და მიიჩნევა ამ რუკის საუკეთესო ვერსიად,“ – ამბობს სულხან სალაძე.

გამოფენაზე წარმოდგენილი იქნება სამეგრელოს რუკაც. სულხან სალაძე ამბობს, რომ ეს არის საქართველოს ერთადერთი რეგიონული რუკა, რომელიც ევროპაშია შექმნილი რუსეთის იმპერიამდე.

„ეს რუკა დაბეჭდილია ლეიდენში 1713 წელს, პიტერ ვან დერ აას მიერ, მისი შექმნილი არ არის. რუკა შეიქმნა მე-17 საუკუნეში საქართველოში არქანჯელო ლამბერტისა და დონ კრისტოფორო დე კასტელის [იტალიელი მისიონერები] მოგზაურობის დროს და როგორც ჩანს, ვან დერ აამ შემდგომში მოიპოვა ბეჭდვის უფლება. რუკა თავდაპირველად დაიბეჭდა შავ-თეთრი სახით, მაგრამ შემდგომში გაფერადდა. რამდენადაც ჩემთვის ცნობილია, თავდაპირველად ამ რუკის სულ 200 ეგზემპლარი დაიბეჭდა“.

გამოფენაზე ცალკე მიმართულება იქნება იმპერიის რუკები და საქართველო ამ რუკებზე.

„გამოფენაზე 6 ასეთი რუკა გვექნება წარმოდგენილი, ძირითადად საუბარია სპარსეთსა და ოსმალეთზე.

საყურადღებოა ის, რომ იმპერიის რუკებზე შეიძლება დამთვალიერებელმა ნახოს, რომ ცალკე აღნიშნულია გურია, იმერეთი, სამეგრელო, კახეთი, სამცხე, მაგრამ ამის მიუხედავად, მთელ ამ ტერიტორიას, რაც საქართველოს მოიცავს, ხშირად ფარავს წარწერა „ჯეორჯია“, „გეორგიენ“, „გურჯისტან“. ანუ ევროპელი კარტოგრაფების აზროვნებაში ეს ერთი სივრცის, ერთი კულტურის ტერიტორიად აღიქმება. ეს ძალიან მნიშვნელოვანია, იმიტომ, რომ „გეორგიენ“ და „ჯეორჯია“ მე-19 საუკუნის მეორე ნახევრიდან პრაქტიკულად სრულად ქრება რუკებიდან, რუსეთის იმპერიის დროს ანაცვლებს წარწერა „ტიფლისკაია გუბერნია“ და „კუტაისკაია გუბერნია,“ – ამბობს სულხან სალაძე.

გამოფენაზე ასევე წარმოდგენილი იქნება გრავიურები, რომლებიც ნიდერლანდებშია დაბეჭდილი. ასეთია თბილისელი ქალების ჩანახატები, ანტვერპენში დაბეჭდილი თბილისის ხედი და ა.შ.

გამოფენა ბათუმში მხოლოდ ერთ დღეს, 14 დეკემბერს გაიმართება. 15 დეკემბერს გამოფენა გაიმართება ზუგდიდში, ზუგდიდის მუნიციპალიტეტის ბიბლიოთეკების მართვის ცენტრში, 13:00-დან 19:00 საათამდე, 16 დეკემბერს კი გამოფენის ნახვა ქუთაისში შეგიძლიათ, აკაკი წერეთლის სახელმწიფო უნივერსიტეტში, ადმინისტრაციული კორპუსის სამკითხველო დარბაზში.

2023 წლის თებერვალში გამოფენა განახლებული სახით უკვე თბილისში გაიმართება.

საქართველოს პრემიერ-მინისტრის, ირაკლი ღარიბაშვილის თქმით, გონიოში ახალი ქალაქი აშენდება. პრემიერმა დღეს აღარ ახსენა კაზინოები, რომელთა შესახებაც ბოლოს, ზუსტად ერთი წლის წინ, 2021 წლის 18 დეკემბერს ისაუბრა.

იხილეთ: ღარიბაშვილი გონიოში კაზინოების მოწყობას აანონსებს

„ვგეგმავთ მსხვილი დეველოპერული პროექტების შეთავაზებას ინვესტორებისთვის. გონიოში გამოიკვეთა რამდენიმე ინვესტორი. რა თქმა უნდა, ეს გაგრძელდება. გონიოში გვინდა აშენდეს ახალი ქალაქი, შეიძლება ეს იყოს ფინანსური ცენტრიც, გოლფის მოედნები, ვილები და ძალიან მნიშვნელოვანი ახალი დასახლება შეიქმნას გონიოში,“ – თქვა ირაკლი ღარიბაშვილმა დღეს, 12 დეკემბერს მთავრობის სხდომაზე.

გონიოში, ყოფილი სამხედრო პოლიგონის ტერიტორიაზე, ახალი ფინანსური ცენტრის აშენებაზე ირაკლი ღარიბაშვილმა  2021 წლის 17 აგვისტოსაც ისაუბრა: წინასაარჩევნოდ აჭარაში ჩამოსული პრემიერი გონიოს ციხეში გამართულ პარტიული კანდიდატების წარდგენაზე გონიოელებს ისევ დაჰპირდა, რომ გონიოში ახალ ქალაქს ააშენებდა. 300 ჰექტრის განაშენიანება პრემიერის წინასაარჩევნო დაპირებათა ნუსხიდან ერთ-ერთი იყო.

ამ დაპირებიდან წელიწადი და 4 თვე გავიდა, თუმცა რეალურად არაფერი არ არის გაკეთებული და დღეს პრემიერი ისევ დაპირებით გამოვიდა.

„ბათუმელებმა“ 2022 წლის 21 სექტემბერს საქართველოს მთავრობისგან და აჭარის მთავრობისგან ერთდროულად გამოითხოვა ინფორმაცია გონიოში დაგეგმილი პროექტების შესახებ.

გვაინტერესებდა რა ეტაპზე იყო გონიოში დაგეგმილი სპეციალური ეკონომიკური ზონის შექმნა? ასევე გვაინტერესებდა როდის დაიწყებოდა პრემიერის მიერ დაანონსებულ გონიოს ეკონომიკურ ზონაში ფინანსური ცენტრის, სასტუმროებისა და კაზინოების მშენებლობა.

არც საქართველოს მთავრობამ და არც აჭარის მთავრობამ მოთხოვნილი საჯარო ინფორმაცია არ მოგვაწოდა.

17 ოქტომბერს „ბათუმელებმა“ ადმინისტრაციული საჩივრით მიმართა საქართველოს ეკონომიკისა და მდგრადი განვითარების სამინისტროს, სადაც აღნიშნული საჯარო ინფორმაციის მოწოდებას ვითხოვდით.

18 ოქტომბერს ადმინისტრაციული საჩივარი სამინისტრომ აჭარის მთავრობის აპარატს გამოუგზავნა.

მას შემდეგ თითქმის 2 თვე გავიდა, მაგრამ აჭარის მთავრობას ადმინისტრაციული საჩივარი არ განუხილავს.

„ბათუმელებს“ პრემიერის დღევანდელი განცხადების შემდეგაც ჰქონდა აჭარის მთავრობის პრესსამსახურიდან ინფორმაციის მიღების მცდელობა, თუმცა ჩვენს სატელეფონო ზარებს არ უპასუხეს.

საქართველოს მთავრობამ სტრასბურგის სასამართლოს 3 შეკითხვას უნდა უპასუხოს „მოსამართლე გიორგი მიქაუტაძის საქმეზე“. კითხვების ჩამონათვალი ევროპის ადამიანის უფლებათა დაცვის სასამართლოსგან უკვე მიიღო საქართველოს მთავრობამ.

გიორგი მიქაუტაძე უზენაესი სასამართლოს თავმჯდომარის მოადგილეა, მანამდე იგი იუსტიციის უმაღლესი საბჭოს მდივანი იყო. 2016 წელს თამარ ხაჭაპურიძე ამბობდა, რომ თავის არასრულწლოვან შვილს მოსამართლე გიორგი მიქაუტაძემ გონიოს პლაჟზე მის თვალწინ სცემა.

გამოძიება მოზარდის ცემაზე იმავე დღეს დაიწყო, თუმცა ბავშვის ცემის ფაქტზე დაწყებულ გამოძიებას საღამოს პროკურატურამ კვალიფიკაცია შეუცვალა და ძიება მოსამართლის სიცოცხლის მოსპობის მუქარით გააგრძელა – დააკავეს არასრულწლოვნის მშობლები: თამარ ხაჭაპურიძე და კახაბერ ხაჩიძე.

ამ დრომდე გამოძიებას არაფერი დაუდგენია და ძიება არ დასრულებულა მოზარდის ცემის საქმეზე, სადაც, მშობლების თქმით, დამნაშავე მოსამართლე გიორგი მიქაუტაძეა. მოზარდი უკვე სრულწლოვანი გახდა, მოზარდის მშობლებს კი, მხოლოდ ჯარიმის გადახდა დააკისრეს. ისინი ახლა დიდ ბრიტანეთში ცხოვრობენ, სადაც მათ პოლიტიკური დევნილის სტატუსიც მიიღეს.

თამარ ხაჭაპურიძემ მეუღლესთან ერთად სტრასბურგის სასამართლოს 2022 წლის მარტში მიმართა. ევროსასამართლოს პირველი კითხვა, რასაც საქართველოს მთავრობამ უნდა უპასუხოს, ასეთია:

„გამოიყენება/შესაფერისია თუ არა კონვენციის მესამე მუხლი 2016 წლის 26 აგვისტოს ინციდენტის სავარაუდო არაეფექტურ გამოძიებასთან დაკავშირებით?“ პირველ რიგში, ამ კითხვაზე პასუხის მიღებას ცდილობს ახლა სტრასბურგის სასამართლო. ევროპული კონვენციის მესამე მუხლი წამებისა და არაადამიანური მოპყრობის დაუშვებლობას გულისხმობს.

ადამიანის უფლებათა დაცვის ევროპულ სასამართლოს ასევე აინტერესებს, თავად საქართველოს მთავრობა რამდენად ეფექტურად მიიჩნევს გამოძიებას, როცა იგი 2016 წელს დაიწყო და ამ დრომდე არ დასრულებულა. მეორე შეკითხვის ფორმულირება ასეთია: „თუ ასეა, გაატარეს თუ არა ხელისუფლების შესაბამისმა ორგანოებმა ეფექტური გამოძიება აპლიკანტის საჩივართან დაკავშირებით?“

მესამე კითხვა კი, კონვენციის მე-8 მუხლს ეხება, რაც გულისხმობს პირადი და ოჯახური ცხოვრების უფლებაში საჯარო ხელისუფლების ჩარევის დაუშვებლობას.

„იჩენს თუ არა თავს პრობლემა კონვენციის მე-8 მუხლით გათვალისწინებული სახელმწიფოს პოზიტიური ვალდებულების ნაწილში?“ – ესეც სტრასბურგის სასამართლოს მესამე შეკითხვა საქართველოს მთავრობას.

საქართველოს მთავრობამ 2023 წლის მარტის ბოლომდე უნდა უპასუხოს სტრასბურგის სასამართლოს შეკითხვებს.

„5 წელი მასამართლებდნენ იმისთვის, რომ შვილის სისხლის დანახვით აღელვებულმა დედამ წარმოვთქვი სიტყვები, რომლებიც თურმე მუქარას შეიცავდა. რაკი მეუღლესთან ერთად ვიმყოფებოდი, მუქარას ჯგუფური უწოდეს, რათა ბრალი დაემძიმებინათ და ისიც გაასამართლეს…“, – მოგვწერა მოქალაქე თამარ ხაჭაპურიძემ 2022 წლის აპრილში, როცა ევროსასამართლომ მისი სარჩელი დასაშვებად მიიჩნია. – „გვემუქრებოდნენ 10 წლამდე პატიმრობით, რათა დაეფარათ მაშინდელი თბილისის საქალაქო სასამართლოს თავმჯდომარის, მოსამართლე გიორგი მიქაუტაძის მიერ ჩემი 13 წლის შვილის ცემისა და დაზიანების ფაქტი.

კიდევ ერთხელ გაოცდება სტრასბურგის სასამართლო, თუ რა ბინძური და უკანონო მეთოდებით დაგვიპირისპირდა მე და ჩემს ოჯახს სახელმწიფო მანქანა, პროკურატურა, სასამართლო, იკადრეს ყველაფერი, შეთითხნილი ბრალი, მტკიცებულებების გადამალვა, დაშინება, მოწმეთა დაკითხვაზე უარის თქმა და ა.შ. ჩემი შვილიც კი არ დაკითხეს სასამართლოზე, რათა მას არ ეთქვა, რომ მიქაუტაძემ დაარტყა“, – აღნიშნა თამარ ხაჭაპურიძემ.

———————–

გამოძიებას მოზარდის ცემის საქმეზე, რაც 6 წლის წინ დაიწყო, არაფერი გაურკვევია, სამაგიეროდ, თამარ ხაჭაპურიძე და მისი მეუღლე – კახა ხაჩიძე ხელვაჩაურის რაიონულ სასამართლოში 2018 წელს მოსამართლე ხვიჩა კიკილაშვილმა გაასამართლა , გამამტყუნებელი განაჩენი გამოიტანა და ბრალდებულები 5 ათასი ლარით დააჯარიმა. მოსამართლემ ამ საქმეზე ხულიგნობა დაადგინა, შესაბამისად, არ დაადასტურა პროკურატურის ვერსია, რომ მოზარდის მშობლები მოსამართლის სიცოცხლის ხელყოფის მუქარას ცდილობდნენ.

მოსამართლე ხვიჩა კიკილაშვილი, რომელმაც ეს საქმე 2018 წელს განიხილა ხელვაჩაურის რაიონულ სასამართლოში, 2019 წელს დაწინაურდა და საკონსტიტუციო სასამართლოს მოსამართლე გახდა. საიას შეფასებით, რომელიც ამ საქმეში არასრულწლოვანის მშობლების ინტერესებს იცავდა, მოსამართლე ხვიჩა კიკილაშვილმა კოლეგიალობა კანონზე მაღლა დააყენა.

სასამართლო განხილვის დროს იუსტიციის საბჭოს მდივანი იყო გიორგი მიქაუტაძე. 2019 წელს იგი უზენაესი სასამართლოს მოსამართლე გახდა. 2020 წლიდან კი, გიორგი მიქაუტაძე უკვე უზენაესი სასამართლოს თავმჯდომარის მოადგილეა და სამოქალაქო საქმეთა პალატის თავმჯდომარე. გიორგი მიქაუტაძე სასამართლო ხელისუფლების გავლენიანი ჯგუფის წევრია, ამ ჯგუფს ადგილობრივი და საერთაშორისო ორგანიზაციები მოიხსნებენ, როგორც კლანს.

სახელმწიფო აუდიტის ანგარიშის მიხედვით, „საქსტატში სხვადასხვა პოზიციაზე მომუშავე შტატიანი მოსამსახურეები შრომითი ხელშეკრულებით შეთავსებით მუშაობდნენ შტატგარეშედ, ანუ ფაქტობრივად სამუშაო დროის ერთსა და იმავე მონაკვეთში ორ პოზიციაზე იყვნენ დასაქმებული.“

„გაურკვეველია შტატით განსაზღვრული სამუშაოებისთვის განკუთვნილი დროის რა ნაწილი დაიხარჯა შრომითი ხელშეკრულებით გათვალისწინებული სამუშაოების შესრულებაზე“ – აცხადებს აუდიტი.

„საქსტატში 2020 წელს − 68, ხოლო 2021 წელს − 93 შტატიანი თანამშრომელი პარალელურად მუშაობდა შრომითი ხელშეკრულებით. შეთავსებით მუშაობისას შრომითი ხელშეკრულებით ანაზღაურებულმა თანხამ 2020 წელს შეადგინა 202 325 ლარი, 2021 წელს − 404 695 ლარი.“

„საშტატო სამუშაოს შესასრულებლად განკუთვნილი დროის რესურსის გამოყენება სხვა საქმიანობისთვის [მათ შორის, შრომითი ხელშეკრულებით განსაზღვრული სამუშაოს შესრულებისთვის] წარმოადგენს საჯარო მოსამსახურის რესურსების არაპროდუქტიულ გამოყენებას.“ – ასკვნის აუდიტი.

ანგარიშის მიხედვით, „საქსტატის აღმასრულებელი დირექტორის 2019 წლის  ბრძანება – [„სახელმწიფო ბიუჯეტიდან დაფინანსების ფარგლებს გარეთ „საქსტატის“ სისტემაში დასაქმებული პირების მიერ შეთავსებით სამუშაოს, მისი შესრულების ფორმის და მასთან დაკავშირებული შრომის ანაზღაურების განსაზღვრისა და გაცემის წესი“] – საშუალებას აძლევდა შტატიან თანამშრომლებს, ძირითადი სამუშაოსგან თავისუფალ ნებისმიერ დროს, მათ შორის, სამუშაო საათებშიც, შეთავსებით შეესრულებინათ შრომითი ხელშეკრულებით განსაზღვრული სამუშაო.

აუდიტი ასევე აცხადებს, რომ საქსტატის აღმასრულებელი დირექტორის ზემოთ აღნიშნული ბრძანება „ვერ უზრუნველყოფს „საჯარო სამსახურის შესახებ“ საქართველოს კანონის მოთხოვნის დაცვას, რაც ზრდის არაეკონომიური ხარჯების გაწევის შესაძლებლობას:

„საქსტატში დასაქმებულების სამუშაო დროის აღრიცხვის არსებული პრაქტიკა ვერ უზრუნველყოფდა სათანადო კონტროლს − შტატით გათვალისწინებული თანამშრომლები რა დროს უთმობდნენ ძირითად სამუშაოს და რამდენს – შეთავსებით სამუშაოს, რაც ხელს უშლის ხარჯების ეკონომიურ განკარგვას.“

აღნიშნული ფაქტი კი, აუდიტის დასკვნით, იმდენად შეუსაბამოა კანონმდებლობასთან, რომ რეკომენდაციაც ვერ გასცა.

„საკანონმდებლო/მარეგულირებელ ნორმატიულ დოკუმენტებთან შეუსაბამობის გამო რეკომენდაცია არ გაცემულა“ – აღნიშნულია აუდიტის ანგარიშში.

საქსტატის 2020-2021 წლების საკასო გასავლები კატეგორიების მიხედვით:

საქსტატი [საქართველოს სტატისტიკის ეროვნული სამსახური] არის დამოუკიდებელი საჯარო სამართლის იურიდიული პირი, რომელიც შექმნილია „ოფიციალური სტატისტიკის შესახებ“ საქართველოს კანონის საფუძველზე – ოფიციალური სტატისტიკის წარმოებისა და სტატისტიკური ინფორმაციის გავრცელების მიზნით.

ის თავის საქმიანობას ახორციელებს „საჯარო სამართლის იურიდიული პირის შესახებ“ საქართველოს კანონის, საქართველოს მთავრობის მიერ დამტკიცებული დებულებითა და სხვა სამართლებრივი აქტების შესაბამისად.