„პრეზიდენტ ვლადიმერ პუტინის სიკვდილის შემდეგ, დიდი ალბათობით, ომი უკრაინაში დამთავრდება. რუსეთს კი მოუწევს შიდა საქმეებით დაკავდეს და საგარეო პოლიტიკისთვის აღარ ეცლება“, – ეს მოსაზრება გაუზიარა უკრაინის პრეზიდენტმა, ვოლოდიმირ ზელენსკიმ, „ნეტფლიქსის“ შოუს წამყვან დევიდ ლეტერმანს.
„ავტორიტეტული რეჟიმი საშინელებაა, რადგან დიდ რისკებს უკავშირდება. შეუძლებელია ერთი ადამიანი განსაზღვრავდეს ყველაფერს, ამიტომ, როცა ასეთი ადამიანი კვდება, ყველა ინსტიტუცია წყვეტს ფუნქციონირებას“, – განაცხადა ზელენსკიმ.
უკრაინის პრეზიდენტმა სსრკ-ს მაგალითი გაიხსენა, როცა ტოტალიტარული რეჟიმის მსხვრევას და ლიდერის სიკვდილს ყველა პროცესის შეჩერება მოჰყვა.
„მგონია, რომ თუ ის (პუტინი) აღარ იქნება, მათ გაუჭირდებათ, შიდა პოლიტიკით დაკავდებიან და საგარეო პოლიტიკისთვის აღარ ეცლებათ“, – ამბობს უკრაინის პრეზიდენტი Netflix-ის შოუში.
ნეტფლიქსის შოუს წამყვანი, დევიდ ლეტერმანი, კიევში სპეციალურად გაემგზავრა უკრაინის პრეზიდენტთან, ვოლოდიმირ ზელენსკისთან სასაუბროდ.
