„გასაგებია“ – მხოლოდ ეს სიტყვა უთხრა რძლის მკვლელობაში ბრალდებულმა კაცმა მოსამართლეს, როცა მან წაუკითხა საქმის მასალები, თუ რას ედავება პროკურატურა.
მოსამართლე ნინო სახელაშვილმა რძლის მკვლელობაში ბრალდებულ ლევან ბალაძეს წინასწარი პატიმრობა შეუფარდა. აღკვეთი ღონისძიების შეფარდების პროცესი დღეს, 13 დეკემბერს გაიმართა ბათუმის საქალაქო სასამართლოში.
მკვლელობა 11 დეკემბერს მოხდა – ხელვაჩაურის მუნიციპალიტეტის სოფელ სალიბაურში, ურთიერთშელაპარაკების ნიადაგზე წარმოშობილი კონფლიქტის დროს, ბრალდებულმა მასზე რეგისტრირებული სანადირო თოფიდან რძალს ესროლა, რომელიც მიყენებული დაზიანების შედეგად ადგილზე გარდაიცვალა.
პროკურატურის ინფორმაციით, გამოძიების მასალებით დგინდება, რომ ბრალდებული სისტემატურად იღებდა ალკოჰოლურ სასმელს, ჰქონდა ფსიქიკური პრობლემები, რასთან დაკავშირებითაც მიმდინარე წლის თებერვალში ფსიქიატრიულ საავადმყოფოში მკურნალობის კურსს გადიოდა. პოლიციამ ბრალდებული იმავე დღეს დააკავა. ბრალდებულს პროკურატურა ედავება სისხლის სამართლის კოდექსის 11 პრიმა 109 -ე მუხლის „კ“ ქვეპუნქტის [განზრახ მკვლელობა დამამძიმებელ გარემოებაში ოჯახის წევრის მიმართ] მიხედვით, რაც სასჯელის სახით 16-დან 20 წლამდე, ან უვადო თავისუფლების აღკვეთას ითვალისწინებს.
პროკურორმა თორნიკე გოგეშვილმა თავის სიტყვაში ყურადღება გაამახვილა იმაზე, რომ მკვლელობის შემდეგ ბრალდებული შემთხვევის ადგილიდან მიმალვას აპირებდა.
„…შევიდა თავის საძინებელში, ტანსაცმელი გამოიცვალა და აპირებდა ტერიტორიის დატოვებას“, – აღნიშნა პროკურორმა თორნიკე გოგეშვილმა.
„არ დავმალულვარ მე, ველოდებოდი მილიციას“, – გააპროტესტა უცებ ბრალდებულმა, რომელიც გისოსებიდან უსმენდა მხარეთა პოზიციებს.
„ძალიან ვნანობ ამას“, – პაუზის შემდეგ დაამატა ბრალდებულმა და მოსამართლეს გახედა.
„მას ეს განზრახვა არ ჰქონია, არც იცოდა, რა შედეგი დადგა“, – მიმართა მოსამართლეს ადვოკატმა ირაკლი პირველმა. მან ყურადღება გაამახვილა იმ ვერსიაზე, რაც პროკურატურამ უკვე გააჟღერა: ბრალდებულს ფსიქიკური ჯანმრთელობის პრობლემა ჰქონდა.
„მან რძალთან კონფლიქტის დასრულების, დაშინების, თუ შეშინების მიზნით გაისროლა“, – თქვა ადვოკატმა და შემდეგ დაამატა, წინასწარ პატიმრობას ბრალდებულიც რომ ეთანხმება.
გარდაცვლილი ქალი 40 წლის იყო და ორი შვილი ჰყავდა.
