Batumelebi

24 მაისს იუსტიციის უმაღლესმა საბჭომ უვადო მოსამართლედ როინ კახიძე გაამწესა. იგი ბათუმელია და „ნაციონალური მოძრაობის“ ხელისუფლებაში ყოფნის დროს ბათუმის საქალაქო სასამართლოში მუშაობდა. ამჯერად როინ კახიძე სამტრედიის რაიონულ სასამართლოში გაამწერეს ვანის მუნიციპალიტეტის მაგისტრ მოსამართლედ.

როინ კახიძე ბოლო წლებში ცაგერის სასამართლოში მუშაობდა მოსამართლედ. ბათუმელი ადვოკატები დღეს მის განხილულ კონკრეტულ საქმეებს ვერ იხსენებენ, თუმცა ახსოვთ, რომ ამ მოსამართლეს წლების წინ უვადოდ გამწესებაზე უარი უთხრეს.

„ის იყო ჩვეულებრივ სისტემის ნაწილი მოსამართლე. მიუხედავად იმისა, რომ ერთი გამამართლებელი განაჩენიც ჰქონდა, ვერ ვიტყვი, რომ იყო პრინციპული. როინ კახიძე იყო შემსრულებელი,“ – ამბობს ადვოკატი რამინ პაპიძე.

„ბათუმელების“ არქივში კონკრეტული სტატია იძებნება – საქმე, რომელზეც როინ კახიძემ 2008 წელს გადაწყვეტილება მიიღო: „კონსტიტუციური უსაფრთხოების დეპარტამენტის თანამშრომელი, გაუპატიურებაში ბრალდებული გიორგი ჩიქოვანი სასამართლო დარბაზიდან საპროცესო შეთანხმების საფუძველზე გაათავისუფლეს მიუხედავად იმისა, რომ ამ საქმეში დაზარალებულად ცნობილი, სასტიკად ნაცემი 24 წლის გოგონა მის პატიმრობაში ყოფნას სთხოვდა მოსამართლე როინ კახიძეს,“ – აღნიშნულია სტატიაში.

„ბათუმელების“ ინტერნეტარქივში იპოვით სტატიასაც, სადაც მოსამართლე როინ კახიძეს მოსამართლეების უვადოდ დანიშვნის იდეა არ მოსწონს:

„იდეა არ მომწონს, რადგან ვთვლი, რომ სასამართლოს დამოუკიდებლობისთვის განუსაზღვრელი ვადით არჩეული მოსამართლე არაფერს შეცვლის. ვფიქრობ, ადამიანი მოსამართლედ 15-20 წელი უნდა მუშაობდეს. ამ დროის განმავლობაში იგი საკუთარ შესაძლებლობებს ამოწურავს, რის შემდეგ პენსია უნდა დაენიშნოს. 65-წლამდე ისეთივე რეჟიმში მუშაობა, როგორშიც ახლა მიწევს, შეუძლებელია,“ – უთხრა 2008 წელს მოსამართლე როინ კახიძემ „ბათუმელებს“. ამავე სტატიაში როინ კახიძე ამბობს, რომ მას მხოლოდ კანონი ზღუდავს.

„არავინ მირეკავს და მავალებს, რა გადაწყვეტილება გამოვიტანო, კანონმდებლობით ვარ შეზღუდული. გადაწყვეტილების მიღებაში პროკურორია შეზღუდული, თორემ მოსამართლე თავისუფალია,“ – აღნიშნავს როინ კახიძე.

როინ კახიძის ბიოგრაფიული მონაცემი, სხვა მოსამართლეებისგან განსხვავებით, არ იძებნება იუსტიციის უმაღლესი საბჭოს ინტერნეტგვერდზე. საბჭოს პრესცენტრის თქმით, მოსამართლეს ბიოგრაფია საბჭოსთვის არ მიუწოდებია.

უვადოდ მოსამართლე ისე გაამწესეს, რომ მისი ბიოგრაფია საბჭოს წევრებს არ მოუკითხავთ? – კითხვის პასუხად იუსტიციის უმაღლესი საბჭოს პრესცენტრში დაგვიკონკრეტეს, რომ ბიოგრაფია არ მიუწოდებიათ იმ ჯგუფისთვის, რომელიც ბიოგრაფიებს საბჭოს ვებგვერდზე ტვირთავს. პრესცენტრს ჩვენ მოსამართლის ბიოგრაფიის მოწოდება ვთხოვეთ, თუმცა სამუშაო დღის ბოლომდე იგი არ მიგვიღია.

იუსტიციის უმაღლესმა საბჭომ 24 მაისს კონკურსის წესით 29 მოსამართლე გაამწესა უვადოდ, სამი – გამოსაცდელი ვადით. 43 ვაკანსიაზე 69 კანდიდატი მოსამართლე დარეგისტრირდა.

იუსტიციის საბჭომ ამჯერად ბათუმში უვადო მოსამართლედ გაამწესა ჯუმბერ ბეჟანიძე. საბჭომ უარი უთხრა მოსამართლეობაზე ბათუმის საქალაქო სასამართლოს ყოფილ მოსამართლეს – ირაკლი შავაძეს, რომელიც სასამართლოს თავმჯდომარეს, დავით მამისეიშვილს დაუპირისპირდა და შემდეგ სასამართლო კლანზე საჯაროდ ისაუბრა. ირაკლი შავაძეს მოსამართლედ გამწესების იმედი აღარ აქვს. ის ადვოკატობას დაუბრუნდა.

მთავარი ფოტო: ბათუმელების არქივიდან. 2008 წელი

31 მაისს ბათუმში დასაქმების ფორუმი გაიმართება. ფორუმის მონაწილეებს 50-მდე კომპანია 2000-ზე მეტ ვაკანსიას შესთავაზებს. სამუშაო ადგილები სამომხმარებლო, სამშენებლო, საბანკო-საფინანსო, ტურიზმის, წარმოების, დისტრიბუციისა და  ენერგეტიკის სფეროებიდანაა.

ფორუმის ორგანიზატორი სოციალური მომსახურების სააგენტოა, რომლის ინფორმაციით, worknet.gov.ge-ზე რეგისტრირებულ სამუშაოს მაძიებლებს ფორუმის შესახებ ინფორმაცია წინასწარ გაეგზავნებათ მოკლე ტექსტური შეტყობინების სახით.

ფორუმზე მონაწილეობის მისაღებად მსურველები www.ssa.gov.ge-ს უნდა ეწვიონ, გადავიდნენ დასაქმების ფორუმის სარეგისტრაციო ბანერზე და დარეგისტრირდნენ 15:00 საათიდან 18:00 საათამდე. სააგენტოს ინფორმაციით, ფორუმზე  რეგისტრაცია შეუძლია ყველა იმ პირს, რომელიც რეგისტრირებულია შრომის ბაზრის მართვის საინფორმაციო სისტემა worknet.gov.ge-ზე.

ფორუმის მიმდინარეობისას, სამუშაოს მაძიებლებს სახელმწიფო  პროგრამებსა  და სერვისებს დეტალურად გააცნობენ.

ბათუმის დასაქმების ფორუმი 31 მაისს 15:00 საათზე დაიწყება და 18:00 საათამდე გაგრძელდება. ფორუმი სასტუმრო „ვინდჰემ ბათუმში“ გაიმართება.

შეამოწმეთ როგორ დააღწევთ თავს ოპტიკურ ილუზიას და გამოიცანით რა ჩანს სურათებზე სინამდვილეში.

ლაგოდეხის ნაკრძალში მომხდარ ინციდენტს განათლების სამინისტროში ეხმაურებიან და ამბობენ, რომ საკითხის ირგვლივ მოკვლევა დაიწყო. მოკვლევის შემდეგ კი დადგინდება, ვისი პასუხისმგებლობაა 16 წლის გოგოს გარდაცვალება.

ეკატერინე ხუციშვილი, ზოგადი განათლების სამმართველოს უფროსი, ჟურნალისტებთან აცხადებს, რომ ექსკურსიებთან დაკავშირებით სამინისტრო ყოველი სასწავლო წლის დასაწყისში და ბოლოს სკოლებს სარეკომენდაციო ხასიათის დოკუმენტს უგზავნის, რომელიც ექსკურსიების გამართვის დროს უსაფრთხოების დაცვის ვალდებულებებს აწესებს.

რეკომენდაციის მიხედვით, სამინისტრო მოუწოდებს სკოლებს, რომ მათ ჰქონდეთ სრულფასოვანი ინფორმაცია ექსკურსიაში მონაწილე ბავშვებსა და ლოკაციაზე, ხოლო სატრანსპორტო საშუალება სრულიად გამართული უნდა იყოს. ამასთანავე, სამინისტრო ამბობს, რომ ბავშვებს ექსკურსიაზე ერთი ექთანი მაინც უნდა ახლდეს თან.

სამინისტროს რეკომენდაციათა ნუსხა ითვალისწინებს შემდეგს:

• ტრასპორტირება – განხორციელდეს იმ ოფიციალური გადამზიდავების (მეწარმე ფიზიკური ან იურიდიული პირის) მიერ, რომლებსაც გავლილი აქვთ ტექდათვალიერება; სასურველია, სატრანსპორტო საშუალება დაზღვეული იყოს (ჰქონდეს მგზავრების დაზღვევა); სატრანსპორტო საშუალებას უნდა ჰყავდეს კვალიფიციური (შესაბამისი კატეგორიის მართვის მოწმობის მქონე) მძღოლი;
• გადამზიდავი კომპანია იღებს პასუხისმგებლობას მგზავრობის უსაფრხოებაზე და ტრანსპორტის გამართულობაზე და ტექნიკური გამართვიანობის დამადასტურებელ დოკუმენტს წარუდგენს სკოლის ადმინისტრაციას; შეზღუდული შესაძლებლობის მქონე არასრულწლოვანთათვის უზრუნველყოფილ იქნეს ტრანსპორტირება მათი საჭიროების გათვალისწინებით;
• რამდენიმე ავტოსატრანსპორტო საშუალებით არასრულწლოვანთა გადაადგილების შემთხვევაში, მიზანშეწონილია ღონისძიების პერიოდის და ადგილმდებარეობის შეტყობინება მუნიციპალიტეტისათვის, პოლიციისათვის, სახანძრო-სამაშველო დანაყოფისა და სასწრაფო დახმარების სამსახურისათვის;
• არასრულწლოვნის კანონიერი წარმომადგენლების თანხმობა – იმ პირთა შორის, რომლებიც იღებენ არასრულწლოვნებზე მზრუნველობის პასუხისმგებლობას, უნდა იყოს სულ მცირე ერთი სრულწლოვანი, ქმედუნარიანი პირი, რომელსაც გავლილი აქვს „პირველადი (ექიმამდელი) სამედიცინო დახმარების კურსი“;
• ღონისძიების ორგანიზატორს უნდა ჰქონდეს მშობლის/მშობლების (მეურვეების, არასრულწლოვნის კანონიერი წარმომადგენლების) თანხმობა ან/და ხელშეკრულება (სასურველია ნოტარიულად დამოწმებული ფორმით), სადაც განისაზღვრება მხარეთა უფლებამოსილება;
• ღონისძიების ხელმძღვანელის/ორგანიზატორის მიერ დაქირავებულ პერსონალთან (ლიდერ/ინსტრუქტორებთან), გადამზიდავთან, არასრულწოლვანთა განთავსებისა და კვების ობიექტთან ურთიერთობები და მხარეთა პასუხისმგებლობა დარეგულირებული უნდა იყოს ხელშეკრულებით.
• ამ რეკომენდაციებს ექვემდებარება არა მხოლოდ სკოლის მიერ ორგანიზებული სასწავლო ექსკურსიები, არამედ მშობელთა მიერ ორგანიზებული მოსწავლეთა ნებისმიერი ჯგუფური ტრანსპორტირება;

ეკატერინე ხუციშვილი ამბობს, რომ დოკუმენტი სკოლებში რეკომენდაციის სახითაა დაგზავნილი, თუმცა მათი შესრულება აუცილებელია. მისივე თქმით, რეკომენდაციათა ნაწილს, კერძოდ კი, ტრანსპორტირების საკითხს, პირველი ივნისიდან სატრანსპორტო მოძრაობის კანონიც დაარეგულირებს.

დანარჩენი რეგულაციების გამკაცრებაზე კი, მისი თქმით, სამინისტრო მუშაობს და დროთა განმავლობაში სხვა საკანონმდებლო ცვლილებებსაც დანერგავს. ამასთანავე, ეკატერინე ხუციშვილი განმარტავს, რომ ექსკურსიების შესახებ წესები “ბავშვთა უფლებების კოდექსშიც” შევა, რომელიც 2020 წლისთვის უნდა მიიღონ.

“რეკომენდაციათა შესრულების მონიტორინგს სამინისტრო, სამწუხაროდ, ვერ განახორიცელებს, იმდენად ბევრია ზოგადსაგანმანათლებლო დაწესებულებებისა და თითოეული სკოლიდან წასული მოსწავლეების რაოდენობა, რომ ცენტრალიზებულად მონიტორინგის განხორციელება შეუძლებელია.

თუმცა, კიდევ ერთხელ გავუსვამ ხაზს, რომ რეკომენდაციების შესრულებაზე პასუხისმგებლობა უშუალოდ ეკისრება ზოგადსაგანმანათლებლო დაწესებულების ადმინისტრაციას”,- ამბობს ეკატერინე ხუციშვილი.

რაც შეეხება არასამთავრობო სექტორს, საია-ს იურისტის, ქეთი შუბაშვილის თქმით, სამინისტროს მიერ გაცემულ რეკომენდაციებს არავითარი იურიდიული ძალა  არ აქვს. იურისტი გვიყვება, რომ დღესდღეობით ქართულ საკანონმდებლო სივრცეს ამ კუთხით რეგულაციების გამკაცრება სჭირდება, ვინაიდან ბავშვების უსაფრთხოება და მათი ჯანმრთელობა ხშირად საფრთხის ქვეშ დგება.

“საჭიროება რომ არის რეგულაციების გამკაცრების, ამას სახელმწიფოც ნაწილობრივ აღიარებს, იმიტომ, რომ ბავშვთა უფლებების კოდექსში უსაფრთხოებასთან დაკავშირებული ნორმები გაიწერა. თუმცა ეს კოდექსი ჯერ მიღებული არ არის და მან მხოლოდ პირველი მოსმენა გაიარა”, – ამბობს ქეთი შუბაშვილი.

კანონპროექტში, რომლის შესახებაც იურისტი საუბრობს, ექსკურსიებთან დაკავშირებული წესები მართლაც გაწერილია. ამ ნორმებს დოკუმენტის 66-ე „საჯარო ღონისძიებებში ბავშვის უსაფრთხოების“ მუხლი არეგულირებს.

იმ საკითხებს შორის, რომლებსაც ეს კონკრეტული მუხლი ეხება, ღონისძიების დრო, ხანგრძლივობა, ადგილმდებარეობა და მონაწილე ბავშვთა ინფორმაციის აღრიცხვა შედის, რომელიც ღონისძიების ორგანიზატორმა პოლიციის, სახანძრო-სამაშველო და სასწრაფო დახმარების სამსახურებს უნდა მიაწოდოს.

გარდა ამისა, კანონპროექტში წერია, რომ უნდა იყოს დაცული ადგილისა და საკვების ჰიგიენურ-სანიტარული ნორმები, ხოლო ღონისძიების ორგანიზატორებმა უნდა უზრუნველყონ გამართული ტრანსპორტი და საევაკუაციო გეგმა.

ასევე, დოკუმენტში ვკითხულობთ:

„თუკი ბავშვების ჯგუფური ტრანსპორტირების დროს დროებითი განთავსების ადგილებში და ორგანიზებულ ჯგუფებში ღონისძიების ორგანიზატორის მიერ არ არის უზრუნველყოფილი ექიმის ან ექთნის 24-საათიანი მომსახურება, იმ პირთა შორის, რომლებიც იღებენ ბავშვების უსაფრთხოებაზე მეთვალყურეობის პასუხისმგებლობას, უნდა იყოს სულ მცირე ერთი სრულწლოვანი, ქმედუნარიანი პირი, რომელსაც გავლილი აქვს პირველადი სამედიცინო დახმარების კურსი”.

ქეთი შუბაშვილის თქმით, კანონპროექტში გაწერილი წესები წინგადადგმული ნაბიჯია, თუმცა მათი აღსრულება და მონიტორინგი, შესაძლოა, ცალკე გამოწვევად იქცეს.

სტატიის სრული ვერსია:

https://netgazeti.ge/news/367326/

„ეს იყო სტიქია, უსაფრთხოების ყველა ზომა დაცული იყო,“ – აცხადებს ირაკლი კვერღელიძე, კომპანია „ორბი ჯგუფის“ დირექტორი. მან დღეს, 27 მაისს უპასუხა ჩვენს სატელეფონო ზარს. შემთხვევა 25 მაისს მოხდა – ხიმშიაშვილის ქუჩაზე „ორბის“ მშენებარე კორპუსიდან სამშენებელო მასალები გადმოვარდა და ოთხი ავტომანქანა დაზიანდა. გამოძიება ამ ფაქტზე სისხლის სამართლის კოდექსის 187-ე მუხლით მიმდინარეობს. ეს მუხლი ნივთის დაზიანებას, ან განადგურებას გულისხმობს.

„შეამოწმეთ რა სიჩქარის ქარი იყო, ბოლო 50 წლის განმავლობაში თუ აღმოაჩენთ ამ სიჩქარეს, კი ბატონო, გავაგრძელოთ საუბარი. დაახლოებით 160 კმ/საათი იყო სიჩქარე ეს ქვედა ნაწილში, ზედა ნაწილში კიდევ უფრო ძლიერი იყო“, – გვითხრა ირაკლი კვერღელიძემ.

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, 25 მაისს  ქარის სიჩქარემ ბათუმში მიაღწია 25 მეტრ/წამს. შესაბამისად, 25 მაისს ბათუმში დაფიქსირებული ქარის სიჩქარე იყო არა 160 კმ/საათში, არამედ 90 კმ/საათში.

ჩვენ „ორბის“ დირექტორს ასევე ვკითხეთ, რატომ რჩებოდნენ 160 კმ/საათში სიჩქარის ქარის პირობებში მუშები მშენებარე შენობაში?

„გააჩნია, სად რჩებოდნენ. ქარის არსებობის დროს, შენობაში ყოფნა რატომაა საფრთხის შემცველი?… ქარი ამოვარდა მოულოდნელად, გაუთვალისწინებლად. ადამიანთა კატეგორიას გარეთ გამოსვლის შემთხვევაში საფრთხე ჰქონდათ. გარეთ რომ გამოსულიყვნენ, მერე იმას მეტყოდით, გარეთ რატომ იყვნენო,“ – გვიპასუხა ირაკლი კვერღელიძემ.

„ორბი ჯგუფის“ დირექტორის თქმით, გამოძიებას იგი არ დაუბარებია ჩვენების მისაცემად. ირაკლი კვერღელიძემ ასევე გვითხრა [შს სამინისტროში 25 მაისს განაცხადეს, რომ გამოძიება დაიწყო სისხლის სამართლის კოდექსის 187-ე მუხლით], რომ დაზიანებული ავტომანქანებთან შეთანხმება შედგა და მხარეებს ერთმანეთის მიმართ პრეტენზია არ აქვთ. მან არ დაგვიკონკრეტა, რამდენი მანქანის აღდგენა არის შეუძლებელი.

„ვერ გეტყვით, რამდენ შემთხვევაში შევიძენთ ახალს… ყველა მესაკუთრესთან ვართ შეჯერებულები და ეს რატომ არის საინტერესო?“ – იკითხა ირაკლი კვერღელიძემ.

ბათუმის მერიის ზედამხედველობის განყოფილების ინფორმაციით კი, უსაფრთხოების ნორმების „ორბის“ მშენებლობაზე დარღვეული იყო და ადმინისტრაციული წარმოება დაიწყო. „კომპანიას მიეცა ხუთდღიანი ვადა იმისთვის, რომ უსაფრთხოების ნორმები დააკმაყოფილოს, წინააღმდეგ შემთხვევაში შეჩერდება მშენებლობა,“ – ამბობს ირაკლი მოქია, ბათუმის მერიის ზედამხედველობის განყოფილების უფროსი.

ნახეთ ვიდეო კადრები, რომელიც 25 მაისის დილას, ბათუმში მშენებარე ერთ-ერთი ყველაზე მაღალ შენობასთან არსებულ მდგომარეობას ასახავს.

_____________

ამ თემაზე:

დასაქმებული ადამიანები საქართველოში შრომის ბაზარზე ყველაზე გავრცელებულ პრობლემად აუნაზღაურებელ დამატებით სამუშაოს და არასათანადო შრომით პირობებს ასახელებენ – ასეთია „ბათუმელების“ გამოკითხვის შედეგი, რომელშიც 1951-მა ადამიანმა მიიღო მონაწილეობა.

გამოკითხვა – „როგორ ირღვევა თქვენი შრომითი უფლებები“ – „ბათუმელების“ ვებგვერდზე ათი დღის განმავლობაში მიმდინარეობდა. 13 პასუხიდან თითოეულ გამოკითხულს შეეძლო მოენიშნა ერთი ან რამდენიმე პასუხი.

ხმების ყველაზე მეტი რაოდენობა დააგროვა შემდეგმა პასუხებმა:

1. არ მინაზღაურდება დამატებითი სამუშაო საათები – 19.84 % [387 ხმა] 
2. ვასრულებ იმ სამუშაოს, რაც ხელშეკრულებით არ მევალება და ამისათვის დამატებით ანაზღაურებას არ ვიღებ – 14.51%  [283 ხმა]
3. არ მაქვს სათანადო შრომითი პირობები – 10.92%  [213 ხმა]

რაც შეეხება პასუხის სხვა ვარიანტებს, ხმები ასე გადანაწილდა:

[checklist]

• არ მაძლევენ საშუალებას, ვისარგებლო კუთვნილი შვებულებით – 8.92%  [174 ხმა] 
• ვმუშაობ ხელშეკრულების გარეშე – 8.71%   [170 ხმა]  
• დაცული არ არის შრომის უსაფრთხოების ნორმები – 7.84%  [153 ხმა] 
• ვერ ვსარგებლობ ბიულეტენით, ავადმყოფობისას მექვითება ხელფასი ან მაკლებენ შვებულების დღეებს – 7.59%  [148 ხმა] 
• დაგვიანებით (ან არ) მერიცხება ხელფასი – 5.54%   [108 ხმა] 
• დამსაქმებელი უკანონოდ მითვალთვალებს – 4.25%  [83 ხმა] 
• უსამართლოდ მიქვითავენ თანხას ხელფასიდან – 3.95%  [77 ხმა) 
• დამსაქმებელი მაყენებს სიტყვიერ შეურაცხყოფას – 3.49%  [68 ხმა]
• დამსაქმებელი არ მინაზღაურებს დეკრეტულ შვებულებას – 3.23%  [63 ხმა] 
• დამსაქმებელი მავიწროებს, მათ შორის, სექსუალურად – 1.21%  [24 ხმა] 

[/checklist]

გამოკითხვა არ არის რეპრეზენტატული.

„აპრილში ავიღე ხელფასი 17 ლარი და 55 თეთრი. „რესპუბლიკურში“ ზუსტად 35 წელია ვმუშაობ,“ – ამბობს ბათუმის რესპუბლიკური საავადმყოფოს კარდიოლოგიის განყოფილების ექთანი ნარგიზ შარაძე. ის და ამ განყოფილების სხვა ექთნები დაბალ ხელფასებს აპროტესტებენ. მათი განმარტებით, პაციენტების რაოდენობამ მას შემდეგ იკლო, რაც ახალი კლინიკის მშენებლობა დაიწყო და ჯერჯერობით ვერ სრულდება. ექთნები მიიჩნევენ, რომ ამის მიუხედავად, კლინიკის შემოსავლები თანაბრად არ ნაწილდება და შესაძლებელია „ოდნავ ღირსეული ხელფასის გაცემა“. ექთნები ამბობენ, რომ 100 ლარიც კი მათთვის საოცნებო ხელფასია.

„31 წელია აქ ვმუშაობ, ყოველდღე აქ ვარ, დილის ცხრიდან საღამოს ხუთის ნახევრამდე,“ – გვიყვება კარდიოლოგიის განყოფილების ექთანი, მაგული წულუკიძე, – „აღარ გვაქვს ბევრი საქმე, არ ვწუწუნებ, ვერც სახლში ვჯდები, რა ვქნა… ამდენი წელია აქ ვარ, შევეჩვიე აქაურობას. თანაც, ამ ბოლოს ითქვა, ახალი აშენდება, ისევ რესპუბლიკურს ექნება ყველაზე მეტი დაფასებაო და გავჩერდი. წლების წინ მოჭრით გვქონდა ხელფასი 150 ლარი, შემდეგ გამომუშავების სისტემა დაწესდა და ახლა ხან 30 ლარს ვიღებ, ზოგჯერ თუ კარგი მუშაობაა – 75 ლარიც ამიღია. აპრილში, მაგალითად, 29 ლარი ავიღე… გვპირდებიან, ახალი რომ გაიხსნება, კიდევ უფრო მეტი ექთანი იქნება საჭიროო და არ მივდივართ ამიტომ“.

კარდიოლოგიურ განყოფილებაში სულ 11 ექთანია. სამი დღისით მუშაობს, დანარჩენი – ღამით მორიგეობენ. ექთნების თქმით, პაციენტების რაოდენობის შემცირება კონკურენტულმა გარემომაც განაპირობა და ამით განსაკუთრებით კარდიოლოგიური განყოფილება დაზარალდა. ექთნებს აღიზიანებთ შეკითხვა, რატომ არ გადავიდნენ ისინი აქამდე სამუშაოდ სხვა კლინიკაში.

ნარგიზ შარაძე, ექთანი: „სად უნდა გადავსულიყავი? რესპუბლიკური სამშობლოსავითაა… არც სხვაგან გადასული მინახავს ვინმე გახარებული. აპრილში ღამით სულ ხუთი მორიგეობა მომიწია. მე იმას ვითხოვ, რომ გამოინახოს რესურსი ჩვენი გამოცდილების გათვალისწინებით და ასაკის მიხედვით და შეგვითავსონ სხვა განყოფილების ექთნობაც. ჩვენ მაღალ ანაზღაურებას არ ვითხოვთ, 100-150 ლარიც საოცნებოა… ახალი თანამშრომლები აჰყავთ, ან კიდევ იმ თანამშრომლებს უთავსებენ შტატებს, რომლებსაც ხელფასი ისედაც მაღალი აქვთ – 150 და 200 ლარი“.

ექთნებმა რამდენიმე კონკრეტული შემთხვევა დაგვისახელეს, როცა ადმინისტრაციის თანამშრომელს სხვა პოზიცია შეუთავსეს. ამას ადასტურებს რესპუბლიკური საავადმყოფოს დირექტორი, მალხაზ ხალვაშიც. თუმცა მისი მტკიცებით, დამატებითი პოზიცია იმ თანამშრომელს შეუთავსა, ვისი კომპეტენციაც კონკრეტული პოზიციის შესაბამისი იყო. კლინიკის დირექტორს ვკითხეთ, რა გზით დადგინდა, რომ მაგალითად, კარდიოლოგიის განყოფილების მრავალწლიანი გამოცდილების მქონე ექთნებს არ ჰქონდათ ვაკანტური უფროსი ექთნის შესაბამისი კომპეტენცია. ექთნების თქმით, უფროსი ექთნის პოზიცია ადამინისტრაციის თანამშრომელმა შეითავსა.

„უფროსი ექთანი არის მენეჯერული პოზიცია და მენეჯერულ კომპეტენციებს აფასებს საწარმოს ხელმძღვანელი, ანუ მე. მე უკვე ვიცი მათი კომპეტენციები, რადგან წლებია მათთან ერთად ვმუშაობ… მარტო ჩემი გადაწყვეტილება არ იყო ეს, ეს იყო კლინიკური მენეჯერის გადაწყვეტილებაც“, – გვითხრა მალხაზ ხალვაშმა, „რესპუბლიკური საავადმყოფოს“ დირექტორმა.

მალხაზ ხალვაში ადასტურებს, რომ ექთნების ხელფასი დაბალია. „მაგრამ შემოსავალი რაც არის, იმას ვანაწილებთ,“ – ამბობს ის. ხალვაში „კრიზისული ეტაპის“ დასრულებას მას შემდეგ ელის, როცა კლინიკა ახალ შენობაში გადავა, თუმცა ამ ეტაპზე ისევ უცნობია, როდის გამოიძებნება თანხა ბიუჯეტში „რესპუბლიკური საავადმყოფოს“ ახალი შენობის აღჭურვისთვის.

რესპუბლიკური საავადმყოფოს დირექტორმა გვითხრა ისიც, რომ, მაგალითად, დიალეზის განყოფილებისთვის ექთნის პოზიცია ისევ ვაკანტურია და ექთნებმა იქ დასაქმებაზე უარი თქვეს. „იქ ხელფასი 400 ლარია, მაგრამ არავის სურს მუშაობა… რატომ არ სურთ მუშაობა, არ მიკითხავს,“ – აღნიშნა მალხაზ ხალვაშმა „ბათუმელებთან“.

„შეიძლებოდა გადასვლა, მაგრამ მაქ ძალ-ღონით სავსე ექთანია საჭირო, რომელიც დილიდან საღამოს ათამდე იმუშავებს, მაგას ვეღარ შევძლებთ…“ – გვითხრა ექთანმა ნარგიზ შარაძემ, რომელსაც ვკითხეთ, რატომ არ გადავიდა სამუშაოდ დიალეზის განყოფილებაში.

მთავარი ფოტო: ნარგიზ შარაძე

„დემოკრატიის ინსტიტუტი“ უკვე წელიწად-ნახევარზე მეტია ახორციელებს „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამას“, რომლის ფარგლებშიც ბენეფიციარები სარგებლობენ სამედიცინო და იურიდიული მომსახურებით, დასაქმებისა და მცირე ბიზნესის ხელშეწყობით. სწორედ დასაქმებაა ერთ-ერთი მთავარი პრობლემა კანონთან კონფლიქტში მყოფი პირებისთვის.

ყოფილი პატიმრები, რომლებსაც უკვე აქვთ პროფესია, მცირე ბიზნესის დაწყება სურთ ან აქვთ ასეთი საქმე და დახმარება სჭირდებათ – ხშირად ფინანსდებიან საჭიროებების მიხედვით ,,ყოფილი პატიმრების გაძლიერების პროექტით“.

42 წლის ზაზა შვანგირაძე ერთ-ერთი მათგანია. პროექტის შესახებ, ისევე როგორც ბენეფიციართა დიდმა ნაწილმა, მანაც ახლობლისგან შეიტყო და ქუთაისის ახალგაზრდულ რესურსცენტრს მიმართა. ზაზა თვითდასაქმებულია – ნაქირავებ სივრცეში სახელოსნო აქვს მოწყობილი და მეგობართან ერთად ავტომობილების სათადარიგო ნაწილების შემცვლელად მუშაობს. პროექტის საშუალებით მან სახელოსნოსთვის აუცილებელი იარაღები შეიძინა, რის გარეშეც შრომა ურთულდებოდა.

„რამეში უნდა იყო ჩართული და იპოვი საქმეს, ეს არის რეაბილიტაციის საწყისი ნაბიჯი. რთულია ციხის შემდეგ სამსახურის პოვნა, ყველა ერიდება ნასამართლევის დასაქმებას. განსაკუთრებით რთულია დასაქმება იმ ყოფილი პატიმრებისთის, რომლებსაც პროფესია არ აქვთ. მე ტექნიკით ბავშვობიდან დავინტერესდი, მეზობლებს ვეხმარებოდი, მანქანის შეკეთების პროცესში რომ მიმეღო მონაწილეობა. თუ მოინდომებ, რთული არაფერია. კარგია, რომ არასამთავრობო ორგანიზაციები ეხმარებიან ყოფილ პატიმრებს. ეს ძალიან მნიშვნელოვანია, თუ იცი რა გსურს, მერე უფრო მარტივია დახმარების მსურველი ორგანიზაციის პოვნა,“ – ამბობს „ყოფილი პატიმრების გაძლიერების პროექტის“ ბენეფიციარი.

ზაზა შვანგირაძეს წყალტუბოში მიწის ნაკვეთი არ აქვს, ცხოვრობს კორპუსში, შესაბამისად, ვერც პროდუქტები მოჰყავს. ოჯახში მხოლოდ თავადაა დასაქმებული. ყოფილი პატიმრის შემოსავლის ერთადერთი წყარო სახელოსნოა.

ზაზა იარაღის უკანონო შეძენა, შენახვა, ტარების მუხლით იხდიდა სასჯელს თითქმის ორი წელი. საპატიმროდან ის პრეზიდენტის შეწყალების საფუძველზე 2014 წელს გათავისუფლდა.

„ყოფილი პატიმრების გაძლიერების“ პროექტს „დემოკრატიის ინსტიტუტი“ ოთხ პარტნიორ ორგანიზაციასთან ერთად ახორციელებს აჭარაში, გურიაში, სამეგრელო – ზემო სვანეთსა და იმერეთში.

აჭარაში 313 შარშანდელ კურსდამთავრებულს ოქროსა და ვერცხლის მედლები წელს გადასცეს.  მედალოსნებიდან 208 გოგოა, 105 კი – ბიჭი.

313 მედალოსანიდან 152 ბათუმში სწავლობდა, დანარჩენი – მუნიციპალიტეტებში. ოქროსა და ვერცხლის მედლები ბათუმში 109 გოგოს და 43 ბიჭს გადაეცა. აქედან ერთ-ერთი კურსდამთავრებული შშმ პირია.

როგორც აჭარის განათლების სამინისტროში „ბათუმელებს“ უთხრეს, მედლები ერთი წლის დაგვიანებით იმიტომ გადასცეს, რომ ნიშნების დაჯამება გარკვეულ დროს მოითხოვს. „შემდეგ კი მედლების შესყიდვაზე ტენდერი უნდა გამოცხადდეს“.

2019 წლის ოქროსა და ვერცხლის მედალოსნების ვინაობა და რაოდენობა სავარაუდოდ, მომავალ წელს გახდება ცნობილი.

აჭარის საზოგადოებრივი მაუწყებლის დირექტორობის მსურველი კანდიდატების განცხადებების გადარჩევა დღეს, 27 მაისს, დასრულდა. მრჩეველთა საბჭომ ცხრა კონკურსანტიდან  მხოლოდ ერთ მონაწილეს – გიორგი წულაიას უთხრა უარი. დანარჩენი რვა კონკურსის მეორე ეტაპზე გადავიდა.

მეორე – გასაუბრების ეტაპი, როგორც „ბათუმელებს“ მრჩეველთა საბჭოში უთხრეს, 30-31 მაისს გაიმართება. 31 მაისს ასევე ჩანიშნულია მრჩეველთა საბჭოს რიგგარეშე სხდომა, სადაც ცნობილი გახდება, თუ ვინ დაიკავებს აჭარის საზოგადოებრივი მაუწყებლის დირექტორის თანამდებობას.

ტელევიზიის დირექტორის თანამდებობა 19 აპრილს გახდა ვაკანტური, როცა ამ მაუწყებლის მრჩეველთა საბჭომ ყოფილ დირექტორს, ნათია კაპანაძეს უნდობლობა გამოუცხადა.

აჭარის საზოგადოებრივი მაუწყებლის დირექტორის მოვალეობას ნათია ზოიძე ასრულებს, რომელიც ასევე მონაწილეობს დირექტორის შესარჩევ კონკურსში.

კონკურსანტების სია:

• მერაბ წულუკიძე, საზოგადოებრივი მაუწყებლის პირველი არხის ჟურნალისტი;
• დავით ჩხარტიშვილი, ბათუმის მუნიციპალური სერვისების სააგენტოს მთავარი სპეციალისტი;
• გიორგი წულაია, აჭარის ტელევიზიის ყოფილი თანამშრომელი [ვერ გადალახა];
• გოგა კოხრეიძე, საზოგადოებრივი მაუწყებლის სამეურვეო საბჭოს ყოფილი წევრი;
• ბაჩო გურაბანიძე, აჭარის ტელევიზიის გადაცემა „დილის ტალღის“ ხელმძღვანელი;
• ნათია ზოიძე, აჭარის ტელევიზიისა და რადიოს დირექტორის მოვალეობის შემსრულებელი;
• ირმა ზოიძე, საგამოძიებო სტუდია REC -ის დამფუძნებელი;
• ნუგზარ ბაჩუკი ჩხეიძე, საზოგადოება „ბათუმელის“ დამფუძნებელი;
• თორნიკე მჟავანაძე, უსკოს წევრი.

საქართველოში აუტიზმს “ახალგაზრდა დიაგნოზს” უწოდებენ. მაშინ, როცა განვითარებულმა ქვეყნებმა უკვე შექმნეს ბავშვებისა და მათი მშობლებისთვის მრავალფეროვანი პროგრამები, რომლებიც გულისხმობს ზრუნვას როგორც 18 წლამდე, ისე ზრდასრულ ასაკში. კვლევებმა აჩვენა, რომ დროული ჩარევით და რამდენიმეწლიანი მუშაობით შესაძლებელია, აუტიზმის მქონე ბავშვის მდგომარეობა მკვეთრად გაუმჯობესდეს. თუმცა საქართველოში სახელმწიფო დაფინანსების სიმცირისა და რეგიონებში სერვისების არარსებობის გამო აუტიზმის მქონე ბავშვების ნაწილი თერაპიულ მკურნალობას დაგვიანებით ან საერთოდ ვერ იღებს.

2015 წელს თბილისის მერიამ “აუტიზმის სპექტრის დარღვევის მქონე ბავშვთა რეაბილიტაციის ქვეპროგრამა” დაიწყო. პროგრამის ფარგლებში მერია აუტიზმის მქონე ბავშვების თერაპიულ მკურნალობას აფინანსებს. დედაქალაქის შემდეგ მსგავსი პროგრამები რეგიონებშიც შეიქმნა. დღეს თბილისსა და სხვა ქალაქებში დაფინანსებას 1200-ზე მეტი 15 წლამდე ბავშვი იღებს, მაგრამ პროგრამით ყველა მსურველი მაინც ვერ სარგებლობს. თბილისსა და რეგიონებში 61-ზე მეტი ბავშვი დაფინანსებას ელოდება. თუმცა მუნიციპალიტეტები იმ ბენეფიციარებს აღრიცხავენ, რომლებიც უკვე ოფიციალურად ელოდებიან პროგრამაში ჩართვას. შესაბამისად, იმ ბავშვების რაოდენობა, რომლებსაც თერაპიული მკურნალობა სჭირდებათ, უცნობია.

ამ თემაზე მომზადებული მასალა იხილეთ აქ.

ავტორები: ნინო აბდალაძე და მარიამ უგრეხელიძე

ფოტო: გურამ აბდალაძე; მაიკო ძაგანია

​რედაქტორი: ელენე ასათიანი

​

„ოცნების ქალაქში“ მცხოვრები ოჯახებისთვის საცხოვრებელი სახლების მშენებლობა 2019 წელს აჭარის ბიუჯეტიდან 3 750 000 ლარით დაფინანსდება. აჭარის ფინანსთა და ეკონომიკის მინისტრის მოადგილის, არჩილ ვანაძის თქმით, თანხის გამოყოფა ბიუჯეტში საშემოსავლო გადასახადის გაზრდამ განაპირობა. საწყის ეტაპზე „ოცნების ქალაქის“ მიმდებარე ტერიტორიაზე აჭარის მთავრობა სამი კორპუსის მშენებლობის დაწყებას გეგმავს, რაზედაც ცალკე ტენდერს გამოაცხადებს.

„საშემოსავლო გადასახადის საპროგნოზო მაჩვენებელი წელს გაიზარდა. 255 მილიონი იყო პროგნოზით და 261 მილიონამდე გაიზრდება. კორექტირებული ბიუჯეტის პროექტი უკვე გაგზავნილია დასამტკიცებლად უმაღლეს საბჭოში. მშენებლობის დაწყებას ვგეგმავთ მიმდინარე წლის შემოდგომიდან, შესაბამისად, მშენებლობის დრო დაემთხვევა ზამთრის პერიოდს, ამიტომ მეტი სამუშაოს დაფინანსება ვერ მოხერხდება. ახლა კორპუსების პროექტირების ეტაპზე ვართ.“ – გვითხრა არჩილ ვანაძემ.

თავდაპირველად აჭარის მთავრობის თავმჯდომარემ განაცხადა, რომ 2019 წელს კორპუსების მშენებლობისთვის 10 მილიონი ლარი დაიხარჯებოდა. არსებული ინფორმაციით, ეს თანხა საქართველოს ბიუჯეტიდან უნდა გამოყოფილიყო.

არჩილ ვანაძის თქმით, მშენებლობის დაფინანსება, სავარაუდოდ, მომავალი წლიდან საქართველოს ბიუჯეტიდან გაგრძელდება, „ვინაიდან თავიდანვე ასე იგეგმებოდა“.

—

„ოცნების ქალაქში“ მცხოვრებთა რეგისტრაცია ამჯერად აჭარის მთავრობის შენობაში [ბათუმში, კომახიძის ქ. №119-ში] მიმდინარეობს. რეგისტრაცია 2019 წლის პირველ ივლისამდე გაგრძელდება. „ოცნების ქალაქში“ აღრიცხული 1727 ოჯახიდან დღეის მდგომარეობით რეგისტრაცია არ გაუვლია 85-ს.

—

„ოცნების ქალაქში“ საცხოვრებელი კომპლექსის პროექტირებაზე კი ხელშეკრულება აჭარის ფინანსთა და ეკონომიკის სამინისტრომ ამხანაგობა „ინჟარქიტექტისთან“ 2019 წლის 25 მარტს გააფორმა. საერთო ღირებულება 320 ათას ერთი ლარია.

ბათუმში, მეჯინისწყლის დასახლებაში მდებარე მიწის ნაკვეთზე [ფართობი: 9 327 კვ.მ.] მრავალბინიანი საცხოვრებელი კომპლექსის მშენებლობისათვის სამშენებლო დოკუმენტის პროექტი და სახარჯთაღრიცხვო დოკუმენტაცია ტენდერში გამარჯვებულმა ამხანაგობამ სამინისტროს 2019 წლის 25 ივნისამდე უნდა წარუდგინოს. სწორედ ამ დოკუმენტებზე დაყრდნობით გამოცხადდება ტენდერი საცხოვრებელი კომპლექსის მშენებლობაზე.

ამხანაგობა „ინჟარქიტექტი“ ორმა კომპანიამ დააფუძნა: შპს „გეოანალიტიკამ“ და შპს „სენსონიმ“. შპს „სენსონიმ“ შეადგინა ბათუმში, ლეონიძის ქუჩაზე სპორტული კომპლექსისმშენებლობისათვის საჭირო საპროექტო-სახარჯთაღრიცხვო დოკუმენტაციაც.

ამ თემაზე:

ბათუმის თოჯინებისა და მოზარდ მაყურებელთა პროფესიული სახელმწიფო თეატრი პრემიერისთვის ემზადება.

თეატრი 28-29 მაისს, 19 საათზე, „მიაგულის“ წარმოგიდგენთ, რომელიც თეატრის სამხატვრო ხელმძღვანელმა გიორგი ჩხაიძემ ლილე შენგელიას პიესისა და სვანური ლეგენდის – „მიაგულის“ მიხედვით დადგა.

„სპექტაკლი მოგვითხრობს მთის ტრადიციებზე დაფუძნებულ ცხოვრების ყოფაზე. ეს არის ამბავი აკვნიდან დანიშვნაზე და ორი შეყვარებული ადამიანის ტრაგიკულ
სიყვარულზე. რეჟისორის მიზანი იყო, რეპერტუარში გაჩენილიყო სპექტაკლი საერთაშორისო ფესტივალებში მონაწილეობისათვის, ამბავი, რომელიც წარმოადგენდა საქართველოს, ქართულ კულტურასა და ყოფა-ცხოვრებას.

დასი და შემოქმედებითი ჯგუფი სპექტაკლზე 5 თვე მუშაობდა. ფანტასტიკური, რეალისტური სილიკონის მარიონეტები, დეკორაციები და ორიგინალური მუსიკა მაყურებელს მისცემს საშუალებას, სრულიად ჩაიძიროს ქართული ლეგენდებით გაჯერებულ სამყაროში. პროექტის გამოწვევა გახლდათ, ტექსტის გარეშე გადმოგვეცა ამბავი, რომელსაც მაყურებელი 60 წუთის განმავლობაში იხილავს,“ – აღნიშნულია თეატრის მიერ გავრცელებულ პრესრელიზში.

სპექტაკლში გამოყენებულია ქაღალდის ფილმის მოდელი, რომელიც ბრიტანულ თეატრს, Paper cinema-ს ეკუთვნის.

„მიაგული“ განკუთვნილია +12 წლის მაყურებლისთვის.

ხვალ, 28 მაისს, საპრემიერო ჩვენებაზე დასწრება მოსაწვევებით იქნება შესაძლებელი, 29 მაისს კი, ბილეთები გაიყიდება თეატრის სალაროში.

ბილეთის ფასი 4 ლარია.

აჭარის განათლების მინისტრი, ინგა შამილიშვილი თანამდებობიდან გადააყენეს. ინფორმაციას აჭარის მთავრობის აპარატის პრესცენტრში ადასტურებენ. აქ გვითხრეს, რომ ინგა შამილიშვილი დღევანდელ ფესტივალზე რუსული დროშის გამოჩენის გამო დატოვებს თანამდებობას და გადაწყვეტილება აჭარის მთავრობის თავმჯდომარე, თორნიკე რიჟვაძემ უკვე მიიღო.

დღეს, 26 მაისს, ფესტივალის „ოქროს დელფინის“ ფარგლებში 8 ქვეყნის წარმომადგენლებმა საზეიმო მსვლელობა მოაწყვეს. მსვლელობის დროს რუსული დროშებიც გამოჩნდა. ფესტივალის ორგანიზატორების თქმით, რუსული დროშები ფესტივალის იმ მონაწილეებს ჰქონდათ, რომლებიც ეთნიკურად რუსები არიან. ფესტივალში რუსეთი ოფიციალურად არ მონაწილეობდა.

ფესტივალის „ოქროს დელფინის“ ორგანიზატორი აჭარის განათლების, კულტურის და სპორტის სამინსიტროა.

ამ თემაზე: