Batumelebi

„ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამაში“ ჩართულია არაერთი ქალი, რომლებიც ხშირად თანხმდებიან ღიად ისაუბრონ საკუთარ გამოცდილებაზე, ციხის წლებსა და გათავისუფლებისშემდგომ სირთულეებზე. ყველა მათგანი „დემოკრატიის ინსტიტუტის“ ყოფილი პატიმრების გაძლიერების პროექტის ბენეფიციარია. პროექტს „დემოკრატიის ინსტიტუტი“ ოთხ პარტნიორ ორგანიზაციასთან ერთად ახორციელებს აჭარაში, გურიაში, იმერეთსა და სამეგრელო – ზემო სვანეთში.

ჯულიეტა ფხაკაძემ საპატიმროში 6 წელი გაატარა. რთული პერიოდი გაიარა: ციხის კედლებში ავადმყოფობა, ოპერაცია, გათავისუფლების შემდეგ გარშემომყოფების არაერთგვაროვანი დამოკიდებულება ნასამართლეობის მიმართ და ა.შ.

„ციხეში მყოფს ძმა არ მელაპარაკებოდა, გაბრაზებული იყო ჩემზე, მაგრამ რომ გავთავისუფლდი, დავურეკე და მაშინვე ჩამოვიდა თბილისში, ქუთაისში ჩამომიყვანა“, – ამბობს ჯულიეტა და დასძენს, რომ მთავარი ახლობლების თანადგომაა საპატიმროდან ახალგათავისუფლებულისთვის. მისი თქმით, ეს აუცილებელი მოტივაციაა ცხოვრების გასაგრძელებლად ციხის შემდეგ.

თუმცა გარდა მორალური თანადგომისა, ჯულიეტასთვის გადამწყვეტი აღმოჩნდა ახალი საქმიანობაც, რასაც გათავისუფლების შემდეგ შეუდგა: მძივებით სამკაულების კეთება და ქაღალდით დეკორატიული ნივთების დამზადება ისწავლა. ეს საქმე ახლა მისთვის შემოსავლის მთავარი წყაროა. დახმარებისთვის იმერეთში მოქმედ ,,ფონდ აფხაზინტერკონტს“ მიმართა, რომელიც ,,დემოკრატიის ინსტიტუტის“ პარტნიორი ორგანიზაციაა და ჩართულია ყოფილი პატიმრების გაძლიერების პროექტში. პროექტის ფარაგლებში ქვილინგის სპეციალისტ ყოფილ პატიმარს ქაღალდის საჭრელი აპარატი გადასცეს. ხელსაწყომ ქალს საქმე მნიშვნელოვნად გაუმარტივა.

„თუმცა ამაზე შეჩერებას არ ვაპირებ. მინდა ბუღალტერიის კურსებიც გავიარო, რომ ჩემი შემოსავლის წყარო გაიზარდოს და მეტი გავაკეთო საკუთარი ოჯახისთვის“, – ამბობს ჯულიეტა ფხაკაზე.

62 წლის ფოთოლა ლაგვილავა ხისგან ჩარჩოებს, საქანელებს, სკამებს ამზადებს, თექაზე მუშაობს, ქსოვს, ქარგავს და ნამუშევრებს შეძლებისდაგვარად ყიდის. 7 წელი გაატარა საპატიმროში და ხელსაქმით დააღწია თავი უიმედობას და რთულად გასაყვან დროს. ციხეში მან 7 წელი დაჰყო.

ამბობს, რომ ყველგან, სადაც გათავისუფლების შემდეგ ქუთაისში გადაწყვიტა ემუშავა, ხელფასი 200 – 300 ლარს არ აღემატებოდა.

„როგორ ვიცხოვრებდი ამ ხელფასით? ბაზარში ორჯერ წასასვლელად არ მეყოფოდა. თან თუ მცირეწლოვანები გყავს შინ. ამიტომ თვითდასაქმება ვარჩიე“, – ამბობს ყოფილი პატიმარი.
ის ქუთაისში რძალთან და ორ მცირეწლოვან შვილიშვილთან ერთად ცხოვრობს.

„ყოფილი პატიმრების გაძლიერების პროექტის“ ფარგლებში  მას ხის დასამუშავებელი დაზგა გადაეცა. იმედოვნებს, რომ მომავალში ელექტროშალაშინისა და სახელოსნოსთვის აუცილებელი სხვა ხელსაწყოების შეძენასაც შეძლებს და მატერიალურად უფრო გაძლიერდება, როგორც თვითდასაქმებული.

64 წლის გულნარა პილპიამ დანაშაული ოჯახის დასახმარებლად ჩაიდინა გაუცნობიერებლად. გალიდან წალენჯიხაში რამდენიმე ბლოკი სიგარეტი გადაჰქონდა გასაყიდად. პოლიციამ ქალი დააკავა და მან წელიწად-ნახევარი გაატარა ციხეში.

„ჩემთვის ძალიან მოულოდნელად დამაპატიმრეს. მეუბნებოდნენ, რომ აკრძალული და საშიში იყო სიგარეტის აქეთ-იქით ტარება, მაგრამ გვიჭირდა და რა მექნა, რას ვიფიქრებდი, რომ რამდენიმე შეკვრა სიგარეტი ასეთ ხათაბალაში გამხვევდა, თან ამ ასაკში“, – იხსენებს გულნარა პილპია.

ციხიდან გათავისუფლების შემდეგ გადაწყვიტა შეკვეთები მიეღო და კერვა დაეწყო, მაგრამ საამისოდ საკერავი მანქანა არ ჰქონდა, რაშიც ყოფილი პატიმრების გაძლიერების პროექტი დაეხმარა. ახალი საკერავი მანქანა შეიძინა და საქმეს შეუდგა. ამბობს, რომ ამ საქმით ყოველთვიურად მას 200 – 300 ლარი აქვს შემოსავალი, რასაც პენსიაც ემატება და მინიმალური საარსებო წყარო თვიდან თვემდე 64 წლის პენსიონერს გამოსდის.

ია ბერიძე პრობაციონერის მეუღლეა. შესაბამისად, ისიც „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამის“ ბენეფიციარია.

ოჯახს სილამაზის სალონი აქვს, რაც მათთვის მნიშვნელოვანი მატერიალური სიკეთეა. „სილამაზის სალონმა გაგვატანინა პატიმრობის წლები, არჩინა ოჯახი, სილამაზის სალონი აფინანსებს ჩემი შვილების სწავლა-განათლებასაც. სალონს ძირითადად მე ვუძღვები, ჩემი მეუღლე, მართალია, თავად სტილისტი არ არის, მაგრამ საორგანიზაციო და მნიშვნელოვან საქმეებს აგვარებს“, – ამბობს ია ბერიძე.

ია არასამთავრობო ორგანიზაცია „დემოკრატიის ინსტიტუტში“ სემინარებს დაესწრო, სადაც ბიზნესის პოპულარიზაციისა და გაფართოების, მომხმარებლამდე ინფორმაციის ეფექტურად მიტანის ნიუანსებზე შეიტყო.

ბოლოს პროექტის ფარგლებში მას სალონისთვის აუცილებელი ინსტრუმენტების – სტერილიზაციის აპარატი გადასცეს.

ოჯახი, რომელმაც პატიმრობის წლები მცირე ბიზნესის საშუალებით გაიმარტივა, მზადაა, სტილისტის საქმე ნებისმიერ პრობაციონერს, ყოფილ პატიმარს უფასოდ შეასწავლოს და პრაქტიკის საშუალებაც მისცეს.

ყოფილი პატიმრების გაძლიერების პროექტი მიზნად ისახავს:

• ყოფილ პატიმართა ჯანმრთელობის მდგომარეობის გაუმჯობესების ხელშეწყობას; 
   იურიდიულ დახმარებას
• ბენეფიციართა გადამისამართებას შესაბამისი პროფილის სამედიცინო დაწესებულებაში
•  ბენეფიციართა დახმარებას (ადვოკატირებას), რომ ისარგებლონ კუთვნილი სამედიცინო შეღავათებით და შესაბამისი სახელმწიფო პროგრამებით
• ყოფილი პატიმრების, პრობაციონერებისა და მათი ოჯახის წევრების მცირე სამეწარმეო ინიციატივების წახალისებას.
• სამიზნე ჯგუფების დასაქმების ხელშეწყობას

ზემოთ ჩამოთვლილი სერვისებით სარგებლობა შეუძლიათ ყოფილ პატიმრებს, პატიმართა ოჯახის წევრებსა და პრობაციონერებს. ამისთვის მათ უნდა მიმართონ:

აჭარაში – დემოკრატიის ინსტიტუტს – ქ.ბათუმი, ჭავჭავაძის ქ. №107, ტელ: (0422) 27 57 44

იმერეთში – აფხაზინტერკონტს / ქ.ქუთაისი, ნინოშვილის ქ. №27, ტელ: (0431) 26 48 61

გურიაში – გურიის ახალგაზრდულ რესურსცენტრს /ოზურგეთი, რუსთაველის ქ. №4, ტელ: (0496) 27 41 26

სამეგრელოში– ფონდ თანაზიარს / ზუგდიდი, რუსთაველის ქ. №88 /ტელ: (0415) 22 10 78

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

საქართველოს ეროვნული ბანკის ინფორმაციით, 2019 წლის აპრილში წლიურმა ინფლაციამ 4.1 პროცენტი შეადგინა, გასულ თვეებთან შედარებით ინფლაციის მაჩვენებლის მატების მთავარი მიზეზი კი სიგარეტისა და კარტოფილის გაძვირებაა.

„გასულ თვეებთან შედარებით ინფლაციის მაჩვენებლის მატების მთავარი მიზეზი სიგარეტის გაძვირებაა, რაც ამ პროდუქტებზე წლის დასაწყისიდან აქციზის გადასახადის მატებით არის გამოწვეული. კერძოდ, მარტის ინფლაციის 4.1 პროცენტიდან 1.3 პროცენტული პუნქტი (პ.პ) სიგარეტის გაძვირებას უკავშირდება. აპრილში, მარტთან შედარებით ინფლაციის მატებაზე მნიშვნელოვნად კარტოფილის გაძვირებამ იმოქმედა. კარტოფილი 25 პროცენტით გაძვირდა, ხოლო წვლილმა ინფლაციაში 0.3 პ.პ. შეადგინა“ – აღნიშნულია ეროვნული ბანკის „თვის მიმოხილვაში“, რომელიც დღეს, 31 მაისს გამოქვეყნდა.

ამ მიმოხილვის მიხედვით იმპორტირებული და ადგილობრივად წარმოებული ფილტრიანი სიგარეტი შესაბამისად 30 და 31 პროცენტით, ხოლო ადგილობრივად წარმოებული უფილტრო სიგარეტი 103 პროცენტით გაძვირდა. „მაღალი იყო ტურისტული მოგზაურობის გაძვირების გავლენაც, რომელმაც დაახლოებით 0.4 პ.პ შეადგინა“ – აღნიშნულია მიმოხილვაში.

„აპრილში სურსათის ინფლაციამ 6.2 პროცენტი შეადგინა. სამომხმარებლო კალათაში სურსათის მაღალი წონიდან (27.3 პროცენტი) გამომდინარე, მისი გავლენა ინფლაციაზე 1.7 პ.პ იყო. აქედან ყველაზე დიდი წვლილი პურის გაძვირებაზე მოდის, რომელიც გასული წლის დეკემბერში გაძვირდა და, შესაბამისად, 2019 წლის აპრილში წლიურად 15 პროცენტიანი ზრდა დაფიქსირდა. მნიშვნელოვანი იყო კარტოფილის, ძროხის ხორცის და კომბოსტოს გაძვირება. საპირისპიროდ, წლიურად მნიშვნელოვნად გაიაფებული იყო ვაშლი (37 პროცენტით… გრძელდება ტანსაცმლისა და ფეხსაცმლის ბოლო წლებში ჩამოყალიბებული გაიაფების ტენდენცია.“ – აღნიშნულია საქართველოს ეროვნული ბანკის მიმოხილვაში.

მაშინ როცა სების განცხადებით ინფლაციის მაჩვენებლის მატების მთავარი მიზეზი სიგარეტის გაძვირებაა, საქართველოს პარლამენტში თამბაქოს ფასის გაზრდაზე საუბრობენ.

ამ თემაზე:

https://netgazeti.ge/news/368485/

დღეს აჭარის მთავრობის სხდომის დასრულების შემდეგ, აჭარის ფინანსთა და ეკონომიკის მინისტრ ჯაბა ფუტკარაძეს იმ საინვესტიციო ხელშეკრულებებზე ვკითხეთ, რომლებითაც 2019 წლის დასაწყისში საქართველოს ფინანსთა სამინისტროს საგამოძიებო სამსახური დაინტერესდა.

ჯაბა ფუტკარაძის თქმით: „პროცესი მიმდინარეობს და უნდა დაველოდოთ შესაბამისი ორგანოების გადაწყვეტილებებს.“

მინისტრმა დღეს ჩვენთან საუბარში არც ის უარყო, რომ მოშლის პირასაა რამდენიმე საინვესტიციო ხელშეკრულება იმის გამო, რომ ინვესტორები ნაკისრ ვალდებულებებს ვერ ასრულებენ. მან კომპანიები არ დააკონკრეტა.

„რა თქმა უნდა, მნიშვნელოვანია, რომ ჩვენ გავყვეთ პროცედურებს. მათ შორის ახალი განკარგულება, რომელიც მთავრობამ მიიღო, ითვალისწინებს ხელშეკრულების მოშლას გარკვეული პირობების დადგომის შემთხვევაში. ვიდრე პროცედურა მიმდინარეობს, არ  დავაკონკრეტებ, რომელ კომპანიებს შეეხება ეს ამჯერად“.

საქართველოს ფინანსთა სამინისტროს საგამოძიებო სამსახურმა 2019 წლის დასაწყისში აჭარის ფინანსთა და ეკონომიკის სამინისტროდან ბოლო სამი წლის  განმავლობაში პირდაპირი წესით გასხვისებულ ქონებასთან დაკავშირებული დოკუმენტები გაითხოვა. გარდა ამისა, საგამოძიებო სამსახური დაინტერესდა აუქციონის წესით გასხვისებული კიდევ ერთი ქონებით.

გაათავისუფლოს ინვესტორი ჯარიმის გადახდისგან გარკვეული პირობით და შეიტანოს ცვლილებები ვალდებულებებში – ეს აჭარის მთავრობის ექსკლუზიური უფლებაა. თუმცა მთავრობამ ის რეგულაციებში მოაქცია და შესაბამისი წესიც შეიმუშავა.

ამ წესით, აუცილებელია ინვესტორმა საბანკო გარანტია სამინისტროში ვალდებულების შესრულების ვადის დადგომამდე, ან ამ ვადის გასვლიდან ორი თვის განმავლობაში წარადგინოს. მიუხედავად საბანკო გარანტიისა, მთავრობა იტოვებს უფლებას, დააკმაყოფილოს ან არ დააკმაყოფილოს ინვესტორის თხოვნა.

თუ ინვესტორი დამატებით დროშიც ვერ შეასრულებს ვალდებულებებს და კვლავ მოითხოვს გადავადებას, მთავრობა გამოითხოვს საბანკო გარანტიას და ამასთან ერთად მოითხოვს გარანტიის გაორმაგებას. თუ განმეორებით გადავადებას საინვესტიციო საბჭო არ დათანხმდება, ინვესტორი  დაკარგავს გარანტიას და დაიწყება საქმის წარმოება ხელშეკრულების გაუქმებაზე.

რაც შეეხება პირგასამტეხლოს, რომლისგანაც ის ერთხელ უკვე  გათავისუფლდა ინვესტორი, საქმე გაიგზავნება სასამართლოში და სასამართლოს ძალით დაეკისრება მისი გადახდა. ამ შემთხვევაში, დაკისრებულ პირგასამტეხლოს გამოაკლდება საბანკო გარანტიით გამოთხოვილი თანხა.

ამავე თემაზე:

ფინანსთა სამინისტროს შემოსავლების სამსახურის ცნობით, 27 მაისს განხორციელებული კონტროლის შედეგად, ბათუმში მდებარე ღამის კლუბებში სამართალდარღვევის ფაქტები გამოვლინდა.

ბათუმში, აბდულლაჰ აქგიულის ღამის კლუბში შემოსავლების სამსახურის თანამშრომლებმა, საკონტროლო შესყიდვის ფარგლებში, ალკოჰოლური სასმელი და  საკვები შეიძინეს და ჯამურად 100 აშშ დოლარი და 150 ლარი გადაიხადეს.

„საქართველოს ტერიტორიაზე მიმოქცევაში არსებული ეროვნული ვალუტის გამოყენების წესების დარღვევის ფაქტზე, საქართველოს საგადასახადო კოდექსის 153 ¹-ე მუხლის 1-ლი ნაწილის შესაბამისად, შედგენილ იქნა ადმინისტრაციული სამართალდარღვევის ოქმი.

მეწარმეს სანქციის სახით  შეეფარდა ფულადი ჯარიმა 200 ლარის ოდენობით. ასევე, მომხმარებელთან ნაღდი ფულადი ანგარიშსწორების დროს არ იქნა გამოყენებული საკონტროლო-სალარო აპარატი, რის შედეგადაც საქართველოს საგადასახადო კოდექსის 281-ე მუხლის მე-3 ნაწილის შესაბამისად, შედგენილ იქნა საგადასახადო სამართალდარღვევის ოქმი და მეწარმეს სანქციის სახით შეეფარდა  ფულადი ჯარიმა 200 ლარის ოდენობით.

ი/მ აბდულლაჰ აქგიულის ობიექტში, ასევე, განხორციელდა სასაქონლო-მატერიალურ ფასეულობების ცალკეულ სახეობათა მიხედვით შერჩევითი ინვენტარიზაცია ალკოჰოლურ სასმელზე, რის შედეგადაც სააღრიცხვო დოკუმენტაციაში აღურიცხველი და პირველადი საგადასახადო დოკუმენტის გარეშე, დაახლოებით 5 390 ლარის ღირებულების საქონელი გამოვლინდა, რაზეც მეწარმეს შეეფარდა აღურიცხველი სასაქონლო-მატერიალურ ფასეულობების საბაზრო ღირებულების 50 პროცენტის – 2 695 ლარის ოდენობის ფულადი ჯარიმა“ – აღნიშნულია უწყების მიერ გავრცელებულ ინფორმაციაში.

მეორე შემთხვევაში, საკონტროლო შესყიდვა ჩატარდა შეზღუდული პასუხისმგებლობის საზოგადოება „ჰსკ“-ის კუთვნილ ობიექტში.   სამართალდარღვევათა გამოვლენის სამმართველოს თანამშრომლებმა შეიძინეს  სასმელები და საკვები. ჯამურად გადახდილ იქნა 100 აშშ დოლარი და 300 ლარი.

ეროვნული ვალუტის გამოყენების წესების დარღვევის ფაქტზე შედგენილ იქნა ადმინისტრაციული სამართალდარღვევის ოქმი და მეწარმეს სანქციის სახით შეეფარდა  ფულადი ჯარიმა 200 ლარის ოდენობით.

უწყების ინფორმაციით, მომხმარებელთან ნაღდი ფულადი ანგარიშსწორების მონაცემები აღრიცხულ იქნა საკონტროლო-სალარო აპარატის მეშვეობით, თუმცა ჩეკში ნაჩვენები იქნა ფაქტობრივად გადახდილზე ნაკლები თანხა, რაზეც შედგენილ იქნა საგადასახადო სამართალდარღვევის ოქმი და მეწარმეს სანქციის სახით შეეფარდა  ფულადი ჯარიმა 200 ლარის ოდენობით.

უწყების ცნობით, ობიექტში საცალო ვაჭრობისას ფასის მაჩვენებლები მომხმარებელთათვის თვალსაჩინო ადგილას არ იყო განთავსებული, რაზეც შედგენილ იქნა სამართალდარღვევის ოქმი და მეწარმეს სანქციის სახით შეეფარდა ფულადი ჯარიმა 100 ლარის ოდენობით.

შპს „ჰსკ“-ის ობიექტში ასევე გამოვლენილ იქნა სააღრიცხვო დოკუმენტაციაში აღურიცხველი და პირველადი საგადასახადო დოკუმენტის გარეშე 1180 ლარის ღირებულების საქონელი, რაზეც მეწარმეს 590 ლარის ოდენობის ფულადი ჯარიმა შეეფარდა.

მესამე შემთხვევაში, ინდივიდუალური მეწარმე ტურაჩ დარგალის კუთვნილ ობიექტზე განხორციელებული საკონტროლო შესყიდვისას შეძენილ იქნა ალკოჰოლური სასმელი და  საკვები. ჯამურად გადახდილ იქნა 75 აშშ დოლარი. მეწარმეს სანქციის სახით   შეეფარდა ფულადი ჯარიმა 200 ლარის ოდენობით.

სალარო აპარატი არც აქ იქნა გამოყენებული, რის გამოც მეწარმე 200 ლარით დააჯარიმეს. დამატებით 100 ლარით დაჯარიმდა იგივე მეწარმე, რადგან სალარო აპარატის ფაქტობრივად განთავსების მისამართი არ ემთხვეოდა აპარატის რეგისტრაციის მისამართს.

ფინანსთა სამინისტროს შემოსავლების სამსახურის ცნობით, სამივე შემთხვევაში, საკონტროლო შესყიდვით შეძენილი საქონლისა და მომსახურების ღირებულება ფაქტობრივად გადახდილ ფასზე გაცილებით ნაკლები აღმოჩნდა და ასევე, სამივე შემთხვევაში, არც ერთ ობიექტში მენიუ არ იყო წარმოდგენილი ქართულ ენაზე, მენიუ შემოთავაზებულ იქნა მხოლოდ ინგლისურად გაურკვეველი სახის პროდუქტისა და ფასის ჩამონათვალით. შეკვეთილი პროდუქტის ნაწილი საერთოდ არ იყო შეტანილი მენიუში, შუალედური ანგარიშის ქვითარი კი წარმოდგენილი იყო უცხოურ ენაზე.

აჭარის მთავრობა ახალგაზრდობის რეგიონულ  ცენტრს ქმნის. ამის შესახებ დღეს, 31 მაისს, გამართულ მთავრობის სხდომაზე თორნიკე რიჟვაძემ განაცხადა.

აჭარის განათლების სამინისტრომ კი ახალგაზრდობის რეგიონული  ცენტრის დირექტორის შესარჩევად  კონკურსი უკვე გამოაცხადა. განცხადებების მიღების ვადა 2 ივნისს იწურება.

საკონკურსო პირობების მიხედვით, კონკურსანტს უნდა ჰქონდეს ბაკალავრის კვალიფიკაცია, მუშაობის ოთხწლიანი გამოცდილებით, უნდა ფლობდეს კომპიუტერულ პროგრამებსა და ინგლისურ ენას – B2  დონეს.

სასურველია კონკურსანტს ჰქონდეს მუშაობის გამოცდილება ფინანსების, ეკონომიკის, სამართლის, ადამიანური რესურსების, მარკეტინგის, პროექტების მართვის, განათლების, კულტურის, სპორტის, ახალგაზრდობის სფეროს ან შესყიდვების მიმართულებით, მათ შორის, ხელმძღვანელ თანამდებობაზე მუშაობის არანაკლებ 2-წლიანი გამოცდილება.

კონკურსი ორეტაპიანია, პირველი ეტაპი განაცხადების გადარჩევას, მეორე კი კონკურსანტებთან გასაუბრებას გულისხმობს.

კონკურსის პირობების მიხედვით, გასაუბრების  შედეგების შესაბამისად, საუკეთესოს შეარჩევს სამინისტროს ხელმძღვანელი  ან საამისოდ უფლებამოსილი პირი.

კონკურსის პირობების მიხედვით, ახალგაზრდობის ცენტრის ხელმძღვანელის ხელფასი 2900 ლარი იქნება.

კანდიდატებმა კონკურსში მონაწილეობისათვის განაცხადი უნდა წარადგინონ მხოლოდ ელექტრონული ფორმით, საჯარო სამსახურის ბიუროს მიერ ადმინისტრირებული ვებგვერდის www.hr.gov.ge მეშვეობით.

ბათუმის მერმა, ლაშა კომახიძემ, პირველი კომენტარი გააკეთა ჟურნალისტებთან გუშინ, 30 მაისს, ბათუმში დაკავებულ მაღალჩინოსნებთან დაკავშირებით.

„მძიმე იყო ეს ჩემთვის, როგორც მერისთვის, ვინაიდან თითოეული დაკავებული ადამიანი იკავებს საკმაოდ მნიშვნელოვან პოზიციას მუნიციპალიტეტში, ისინი არიან მაღალი კვალიფიკაციის კადრები, შესაბამის სფეროებში მრავალწლიანი გამოცდილებით.

აბსოლუტურად მესმის ბრალდებების სიმძიმე, რომელიც ჩვენს კოლეგებს აქვთ წაყენებული, ამიტომ, ვიმედოვნებ, სწრაფ და ობიექტურ გამოძიებას, რომელიც თავის ადგილზე დააყენებს ყველაფერს,“ – განაცხადა ლაშა კომახიძემ.

მან ასევე აღნიშნა, რომ მიუხედავად შექმნილი სიტუაციისა, მერიის სამსახურები და ორგანიზაციები შეუფერხებლად იმუშავებენ.

30 მაისს პროკურატურამ ბათუმის მერიის მოქმედი და ყოფილი 7 მაღალჩინოსანი ერთდროულად დააკავა. აჭარის მთავარმა პროკურორმა, ნათია სონღულაშვილმა, ბრიფინგი გამართა და თქვა, რომ მაღალჩინოსნების დაკავება 2015 წელს ჩატარებულ იმ ტენდერს უკავშირდება, რომლითაც ბათუმში „იაფი სახლი“ უნდა აშენებულიყო.

ბათუმში მშენებარე საფეხბურთო სტადიონზე ჯამში 3 940 კვ/მ კომერციული ფართობი იქნება. შპს „სტადიონი“ ამ ფართობების ზონირების კონცეფციისა და ბიზნესგეგმის მომზადებისთვის საჭირო სავარაუდო თანხის დასადგენად ფასთა კვლევას ატარებს. შეთავაზებებს კომპანია 2019 წლის 4 ივნისის ჩათვლით მიიღებს.

„კომპანიას განზრახული აქვს დაიქირაოს კონსულტანტი, რომელიც განსაზღვრავს მშენებარე საფეხბურთო სტადიონზე არსებული კომერციული ფართობების ზონირების საუკეთესო ვარიანტს, შეიმუშავებს კონცეფციას, მოამზადებს პროექტის განხორციელებადობის სრულ კვლევას, ბიზნესგეგმას და ფინანსურ მოდელს. ბიზნესგეგმასა და განხორციელებადობის კვლევას შპს „სტადიონი“ გამოიყენებს პროექტის პოტენციურ ინვესტორთა დასაინტერესებლად და კომერციული ფართობების ეფექტური ზონირებისათვის საჭირო სამშენებლო სამუშაოების [ფართობების ფუნქციური დაყოფა და შესაბამისი კომუნიკაციებით უზრუნველყოფა] განსახორციელებლად“, – აღნიშნულია „სტადიონის“ განაცხადში.

სავარაუდო ფასის დადგენის შემდეგ, „სტადიონი“ შესაბამისი მომსახურების შესყიდვაზე ელექტრონულ ტენდერს გამოაცხადებს, იმ შემთხვევაში თუ შესყიდვის სავარაუდო ღირებულება 5 ათას ლარზე მეტი იქნება.

კონსულტანტი, რომელსაც „სტადიონი“ დაიქირავებს – შეამოწმებს უძრავი ქონების მდგომარეობას და განსაზღვრავს მის კომერციულ პოტენციალს, სხვადასხვა სექტორული მიმართულებების ჭრილში; ანალიზის საფუძველზე შეარჩევს სულ მცირე ზონირების ორ საუკეთესო ვარიანტს (დასაშვებია შერეული ვარიანტიც). შპს „სტადიონი“ კი შეთავაზებული ვარიანტებიდან ერთ-ერთს შეარჩევს. ამის შემდეგ კონსულტანტი შეიმუშავებს შერჩეული ვარიანტის კონცეფციას, მოამზადებს განხორციელებადობის სრულ კვლევასა და ბიზნესგეგმას.

„სექტორული ანალიზი შესაძლოა მოიცავდეს შემდეგ მიმართულებებს: დასვენება/გართობა, ტურიზმი, საცალო ვაჭრობა, საკონფერენციო/საგამოფენო დარბაზები, კვების ობიექტები, საკლუბო ან სხვა სპორტული აქსესუარების რეალიზაცია, კლუბის ან/და ქართული ფეხბურთის მუზეუმი და სხვა პოტენციური მიმართულება“.

მომსახურებაში ასევე შედის კონცეფციის კომპონენტების და პოტენციური დამქირავებლების ბიზნესმიმართულების განსაზღვრა; თითოეულ ფართობზე ბიზნესკატეგორიის/ფუნქციის განსაზღვრა და მახასიათებლების გაწერა – ფართობი, იჯარის ღირებულება, რეკომენდებული ბრენდის/კომპანიის ტიპები, ვინც შეიძლება იყვნენ წარმოდგენილნი ამ სივრცეში და სხვა.

„ვინაიდან სტადიონის მშენებლობა სრულდება 2020 წელს, განხორციელებადობის კვლევა უნდა ეფუძნებოდეს ბაზრის ამჟამინდელ და მშენებლობის დასრულების დროისათვის [2020 წელი] პროგნოზირებულ ტენდენციებს. ასევე, მომწოდებელმა უნდა მოამზადოს ლიკვიდური ბიზნესგეგმა, რომელიც იქნება მზად ბანკისთვის ან რომელიმე სხვა გარე ინვესტორისთვის წარსადგენად. ასევე უნდა შეადგინოს პოტენციური მოიჯარეების/დაინტერესებული კომპანიების სია“.

ვინ გაუწევს ოპერირებას [მართვას] იმ ობიექტებს [სტადიონი, საავადმყოფო, სპორტსკოლა და სხვა], რომლებიც შპს „სტადიონის“ ზედამხედველობის ქვეშ შენდება? – ამ კითხვაზე შპს „სტადიონის“ დირექტორმა ლევან ლომთაძემ დაახლოებით ერთი თვის წინ „ბათუმელებთან“ განაცხადა, რომ ამაზე საუბარი ჯერ ნაადრევია: „ამ ტიპის გადაწყვეტილებებს მე არ ვიღებ. ჩვენ ვართ ამ პროექტების მენეჯერი კომპანია, რომელიც მართავს ამ პროექტების სამშენებლო სამუშაოებს [რომლებსაც თავის მხრივ ჰყავს მშენებელი, ტექნიკური ზედამხედველი კომპანია და ა.შ.] ეს არის ძალიან მნიშვნელოვანი და მასშტაბური პროექტები. ის, თუ ვინ იქნება ამ დასრულებული პროექტების ოპერატორი, ამაზე საბოლოო გადაწყვეტილებას მიიღებს აჭარის მთავრობა. რა თქმა უნდა, ჩვენთან კონსულტაციის საფუძველზე“.

შპს „სტადიონი“ არის სახელმწიფო კომპანია, რომლის 100% წილის მესაკუთრე აჭარის ავტონომიური რესპუბლიკაა. „სტადიონი“ არაერთ მრავალმილიონიან პროექტს ახორციელებს, რომლებიც აჭარის ბიუჯეტიდან ფინანსდება. მათ შორისაა ბათუმის საფეხბურთო სტადიონი.

ბათუმში, ყოფილი მანქანათმშენებელი ქარხნის ტერიტორიაზე, 20 ათას მაყურებელზე გათვლილ UEFA-ას IV კატეგორიის საფეხბურთო სტადიონს კი ტენდერში გამარჯვებული კომპანია „ანაგი“ აშენებს.

„ანაგთან“ „სტადიონს“ ორი ხელშეკრულება აქვს გაფორმებული, რომელთა საერთო სახელშეკრულებო ღირებულება 141 869 522 ლარია [დღგ-ს ჩათვლით].

საფეხბურთო სტადიონის მშენებლობაზე პირველად ხელშეკრულება [117 349 122  ლარით] „ანაგთან“ 2017 წლის 24 დეკემბერს გაფორმდა. ამ თანხიდან კომპანიისთვის აჭარის ბიუჯეტიდან, 2019 წლის 30 მაისის მდგომარეობით, უკვე გადახდილია 76 193 955 ლარი.

მეორე ხელშეკრულება [24 520 400 ლარით] „ანაგთან“, სტადიონის მშენებლობის დასრულების სამუშაოებზე 2019 წლის 10 აპრილს გაფორმდა. ამ ხელშეკრულების ფარგლებში კომპანიისთვის ჯერ თანხა გადახდილი არ არის.

 ამ თემაზე:

გაუარესებული ჯანმრთელობა ერთ-ერთი ძირითადი პრობლემაა სხვა მრავალ პრობლემასთან ერთად, რაც ყოფილ პატიმრებს აწუხებთ.

დემოკრატიის ინსტიტუტი პარტნიორ ორგანიზაციებთან ერთად  2017 წლის თებერვლიდან ახორციელებს „ყოფილი პატიმრების გაძლიერების პროექტს“, რომლის ერთ-ერთი ძირითადი მიმართულებაც ყოფილი პატიმრების ჯანმრთელობის მდგომარეობის გაუმჯობესებაა. „ყოფილი პატიმრების გაძლიერების პროექტში“ ჩართვა შეუძლიათ როგორც ყოფილ პატიმრებს, ასევე მათ ოჯახის წევრებსა და პრობაციონერებს.

პროექტის ბენეფიციართა საჭიროებები თავიდან მათი გამოკითხვისა და ჯანმრთელობის პრობლემების შემთხვევაში მაღალსტანდარტული გამოკვლევებით დგინდება. შემდეგ კი ინდივიდუალური შესაძლებლობებისა და მათივე სურვილის გათვალისწინებით ისინი სხვადასხვა სარეაბილიტაციო  სერვისით სარგებლობენ.

პროექტის მიმდინარეობისას რამდენიმე სამედიცინო აქცია ჩატარდა.

ბენეფიციარ ყოფილ პატიმრებს, პრობაციონერებსა და მათი ოჯახის წევრებს ჩაუტარდათ უფასო ოფთალმოლოგიური გამოკვლევა, ოფთალმოლოგიურ გამოკვლევას 16 ბენეფიციარი საჭიროებდა. გარდა მაღალტექნოლოგიური გამოკვლევისა და ექიმის კონსულტაციისა, ბენეფიციარებმა უფასოდ მიიღეს დანიშნული მედიკამენტები და სათვალეები.

აჭარაში რესოციალიზაციის პროგრამის აქტიური მხარდამჭერია აჭარის ჯანმრთელობისა და სოციალური დაცვის სამინისტრო. უწყების მხარდაჭერით უფასო სამედიცინო აქცია ყოფილი პატიმრებისთვის სხვა დროსაც ჩატარდა პროგრამის ფარგლებში – პროექტის დასაწყისში ყოფილი პატიმრებისა და მათი ოჯახის წევრებისთვის აჭარასა და გურიაში უფასო კარდიოლოგიური გამოკვლევები ჩატარდა, რითაც აჭარაში 15-მა ბენეფიციარმა ისარგებლა. „დემოკრატიის ინსტიტუტმა“ ამ გამოკვლევების შემდეგაც უფასოდ გადასცა საჭირო მედიკამენტები პროგრამაში ჩართულებს.

ყოფილი პატიმრების გაძლიერების პროექტის ფარგლებში აპრილის თვეშიც მოეწყო ორდღიანი სამედიცინო აქცია, რაც ითვალისწინებდა გინეკოლოგიურ და ამბულატორიულ კვლევებს, კონსულტაციებს, ექოსკოპიას, საჭიროების შემთხვევაში კოპოსკოპიასა და ანალიზებს. აქციაში 20-მა ქალმა მიიღო მონაწილეობა.

სამედიცინო აქციის მონაწილეები ხშირად აღნიშნავენ, რომ ექიმთან ვიზიტს, გამოკვლევებს და მედიკამენტების შეძენას დამოუკიდებლად ვერ ახერხებენ რთული მატერიალური პირობების გამო. „დემოკრატიის ინსტიტუტის” ყოფილი პატიმრების გაძლიერების პროექტის ფარგლებში, უფასო სამედიცინო დახმარებით 60-მდე ბენეფიციარმა ისარგებლა.

სოციალური მუშაკების ინფორმაციით, საპატიმროს დატოვების შემდეგ ყოფილ პატიმართა უმრავლესობას გაუარესებული აქვს ჯანმრთელობის მდგომარეობა, შესაბამისად  „პატიმართა გაძლიერების პროექტის“ სამედიცინო მხარდაჭერის მიმართულება განსაკუთრებით აქტუალურია და ამ მხრივ მაღალია ყოფილ პატიმართა ინტერესი პროექტის მიმართ.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

აჭარის პროკურორმა, ნათია სონღულაშვილმა, ბათუმის ვიცე-მერის, ფინანსთა და განათლების მინისტრის მოადგილეების და სხვა პირების დაკავებასთან დაკავშირებით გამართულ ბრიფინგზე ჩამოთვალა ის გარემოებები, რის გამოც დააკავეს 7 პირი. პროკურატურის ვერსიას, რომელიც ნათია სონღულაშვილმა გააცნო საზოგადოებას, უცვლელად გთავაზობთ:

საქართველოს პროკურატურამ, ფინანსთა სამინისტროსთან აქტიური თანამშრომლობით, განახორციელა სამსახურეობრივი მდგომარეობის გამოყენებით დიდი ოდენობით სახელმწიფოს კუთვნილი მართლსაწინააღმდეგო გაფლანგვისა და სამსახურეობრივი უფლებამოსილების ბოროტად გამოყენების ფაქტებზე გათვალისწინებული, სსკ-ის 182 მუხლის მეორე და მესამე ნაწილების, 332-ე მუხლის პირველი ნაწილით, სასამართლოს განჩინების საფუძველზე ბრალდებულის სახით დაკავებულნი არიან: ბათუმის ყოფილი მერი გიორგი ერმაკოვი [პროკურორმა მხოლოდ დაკავებულების ინიციალების დაასახელა], აჭარის განათლებისა და კულტურის მინისტრის მოადგილე ბაგრატ მანველიძე, აჭარის ფინანსთა და ეკონომიკის მინისტრის მოადგილე არჩილ ვანაძე, ბათუმის ვიცე-მერი თენგიზ პეტრიძე, მერიის მუნიციპალური სერვისების, ქონების მართვის სამსახურის უფროსი ეგარსლან ლომაძე, საქალაქო ინფრასტრუქტურისა და კეთილმოწყობის სამსახურის უფროსის მოადგილე ვლადიმერ ხინთიბიძე, მერიის შესყიდვის სამსახურის უფროსი ბექა ხალვაში.  

ჩატარებული გამოძიებით დადგენილი იქნა შემდეგი: ზემოხსენებული პირების გადაწყვეტილებით, რომლებიც იმჟამად იყვნენ ბათუმის მერიის მუდმივმოქმედი სატენდერო კომისიის წევრები და მერიაში ეკავათ სხვადასხვა თანამდებობა, 2015 წლის 9 ოქტომბერს, მერიამ გამოაცხადა ელექტრონული ტენდერი ე.წ. იაფი სახლის მშენებლობზე.

სატენდერო პირობების თანახმად, სახლის ასაშენებლად უნდა გამოყენებულიყო მსუბუქი კონსტრუქციის თხელკედლიანი კონსტრუქციები, ტენდერის გამოცხადებამდე, ბათუმის მერიის ხელმძღვანელობისა და სატენდერო კომისიის წევრებისთვის ცნობილი იყო, რომ მსუბუქი ფოლადის თხელკედლიანი კონსტრუქციებით საქართველოში მშენებლობის გამოცდილება მხოლოდ ერთ კომპანიას ჰქონდა, რომელსაც ტენდერის გამოცხადებამდე შესთავაზეს აღნიშნული კონსტრუქციებით მშენებლობის განხორციელება.

საბოლოოდ, მერიამ, უსასყიდლოდ შედგენილი საპროექტო სახარჯთააღრიცხვო დოკუმენტაციის საფუძველზე, ისე რომ დოკუმენტაციაში დაფიქსირებულ ფასებზე ბაზრის კვლევა არ ჩაუტარებია, ელექტრონულ ტენდერში მონაწილეობა მიიღო მხოლოდ ერთმა პრეტენდენტმა, უცხოური საწარმოს ფილიალმა „კონვერტ ჯორჯიამ“.

ელექტრონული ვაჭრტობის მიმდინარეობისას, უცხოური საწარმოს წარმომადგენლობამ და ფილიალმა „კონვერტ ჯორჯიამ“, სახელმწიფო შსყიდვების ერთიან სისტემაში წარადგინა ყალბი დოკუმენტაცია. სატენდერო კომისიის წევრებს წარმოდგენილ საეჭვო დოკუმენტაციაზე საერთოდ არ უმსჯელიათ. ეს მაშინ, როცა ბათუმის მერიის მიერ 2015 წლის პირველ მაისს გამოცხადებუილ სხვა ელექტრონულ ტენდერში, უცხოური საწარმოს ფილიალ „კონვერტ ჯორჯიას“ სახელმწიფო შესყიდვების ერთიან სისტემაში წარდგენილი იგივე დოკუმენტაცია, კომისიის ამავე შემადგენლობის მიერ გახდა კონვერტ ჯორჯიას დისკვალიფიკაციის ერთ-ერთი საფუძველი.

მერიის მუდმივმოქმედი სატენდერო კომისიის წევრებმა იმ პერიოდის ბათუმის ვიცე-მერმა ბაგრატ მანველიძემ, კეთილმოწყობის სამსახურის უფროსმა თენგიზ პეტრიძემ, ამავე სამსახურის უფროსის მოადგილემ ვლადიმერ ხინთიბიძემ, მერიის საფინანსო-ეკონომიკური სამსახურის უფროსმა ეგარსლან ლომაძემ და შესყიდვების განყოფილების უფროსმა ბექა ხალვაშმა, მიუხედავად იმისა, რომ ტენდერში მონაწილეობისას კონვერტ ჯორჯია დოკუმენტაცია არ კამყოფილებდა სატენდერო პირობებს და კომპანიის უპირობო დისკვალიფიკაციის საფუძვლები,. უკანონოდ მიანიჭეს უპირატესობა პრეტენდენტს და გამოაცხადეს ტენდერში გამარჯვებულად.

ამის შემდეგ, კონვერტ ჯორჯიამ, სატენდერო კომისიას წარუდგინა საქართველოს ერთ-ერთ საბანკო დაწესებულებაში ავიზირებული, ლონდონში რეგისტრირებული პონტ ბანკ ლტდ-ს მიერ გაცემული ხელშეკრულების უზრუნველყოფის საბანკო გარანტია ისე, რომ ხსენებული კომპანია საერთოდ არ იყო საბანკო დაწესებულება და წარმოადგენდა არაქტიურ კომპანიას.

ბათუმის მერის გიორგი ერმაკოვის დავალებით პოინტ ბანკ ლტდ-ს სანდოობის და გადახდისუნარიანობისა და რეიტინგის შესწავლა დაევალა მერიის საფინანსო ეკონომიკური სამსახურის უფროსის მოადგილეს იმჟამად არჩილ ვანაძეს, რომლის მიერაც მოპოვებული ინფორმაციით დადგინდა, რომ დასახელებულ კომპანიას საერთოდ არ ჰქონდა რეიტინგი, რაც პირდაპირ მიუთითებდა მის არასაიმედოობაზე. ამავე პერიოდში უკვე ბათუმის მერიაში გადაგზავნილი იყო საქართველოს ეროვნული ბანკის სარეკომენდაციო წერილი, რომელიც პირდაპირ ავალდებულებდა საბანკო დაწესებულებებს რომ საბანკო გარანტიები ყოფილიყო მხოლოდ და მხოლოდ მაღალი სანდოობის საერთაშორისო ან ქართული კომერციული ბანკებიდან.

ზემოაღნიშნულის საწინააღმდეგოდ, ნაცვლად იმისა, რომ ბათუმის მერს და სატენდერო კომისიის მუდმივმოქმედ წევრებს დაეცვათ სახელმწიფოს კანონიერი ინტერესი, შეეწყვიტათ ტენდერი და არ გაეფორმებინათ სახელმწიფო შესყიდვის ხელშეკრულება, კონვერტ ჯორჯიასთან, საჯარო ინტერესის საწინააღმდეგოდ გაფორმდა ხელშეკრულება 4 მილიონ 280 ათასი ლარამდე ღირებულებით.

ხელშეკრულების გაფორმებიდან კონვერტ ჯორჯიამ  ბათუმის მერიაში წარადგინა იგივე არასაბანაკო, არააქტიური კომპანია, პოინტ ბანკ ლტდ-ს მიერ საავანსო საბანკო გარანტია იმის მიუხედავად, რომ ბათუმის მერიის საფინანსო სამსახურის უფროსის და მისი მოადგილისთვის ცნობილი იყო რომ გარანტიის გამცემი კომპანია არ წარმოადგენდა საბანკო დაწესებულებას და წარმოდგენილი საბანკო გარანტიაც არ იყო უპირობო და გამოუთხოვადი. კონვენტ ჯორჯიას უსაფუძვლოდ ჩაურიცხეს საავანსო თანხა ჯამში მილიონ 626, 396 ლარის ოდენობით, საიდანაც კონვერტ ჯორჯიამ  შეასრულა მხოლოდ 251 109 ლარის ოდენობის სამუშაოები. დანარჩენი თანხის სამუშაოები დღემდე შეუსრულებელია.

ზემოაღნიშნულიდან გამომდინარე, ბათუმი მერის და სხვადასხვა რგოლის თანამშრომლების მიერ სამსახურეობრივი მდგომარეობის და უფლებამოსილების ბოროტად გამოყენებამ, რაც გამოიხატა კონვერტ ჯორჯიასთვის უკანონოდ უპირატესობის მინიჭებაში და საავანსო თანხის უსაფუძვლოდ ჩარიცხვაში, არსებითად დაირღვა სახელმწიფოს კანონიერი ინტერესები და სახელმწიფო აუდიტის სამსახურის მიერ მოწოდებული დასკვნის თანახმად გაიფლანგა განსაკუთრეებით დიდი ოდენობით, მილიონ 370 ათასი ლარის ოდენობით საბიუჯეტო სახსრები, რითაც მუნიციპალიტეტს და, შესაბამისად, სახელმწიფო ბიუჯეტს მიადგა დიდი ოდენობით მატერიალური ზიანი.

საქმესთან დაკავშირებული საჯარო ინტერესის გათვალისწინებით, საქართველოს პროკურატურა პერიოდულად მიაწვდის გამოძიების მიმდინარეობის შესახებ ინფორმაციას.

აჭარის მთავრობის თავმჯდომარემ, თორნიკე რიჟვაძემ, ბათუმის მერიის ყოფილი და მოქმედი მაღალჩინოსნების დაკავებასთან დაკავშირებით პირველი კომენტარი გააკეთა.

„რამდენიმე წლის წინ მომხდარ ფაქტთან დაკავშირებით სისხლის სამართლის საქმეზე დაკავებულია რამდენიმე მოქმედი მაღალჩინოსანი. კიდევ ერთხელ მინდა გავიმეორო, რომ თანამდებობა ჩვენი ხელისუფლების პირობებში არ არის გარანტია ან პრივილეგია, რომ ვინმემ ისარგებლოს პრივილეგიებით, თუმცა ამავე დროს ჩვენ უნდა დავიცვათ უდანაშაულობის პრეზუმფცია და დაველოდოთ გამოძიების შედეგებს ისე, რომ საფრთხე არ შეექმნას მართლმსაჯულების აღსრულებას.

ასევე მინდა განვმარტო, რომ ჩვენი ხელისუფლების შეურიგებელი ბრძოლა კორუფციასთან გრძელდება და ჩვენ ვიქნებით ყველასთან თანაბრად მომთხოვნი და კანონის წინაშე ყველა არის თანაბარი,“ – განაცხადა თორნიკე რიჟვაძემ.

კითხვაზე, ჰქონდა თუ არა რაიმე ტიპის თანამშრომლობა სამართალდამცავებთან, თორკინე რიჟვაძემ გაიმეორა, რომ ანტიკორუფციული პოლიტიკის ფარგლებში მთავრობა თანამშრომლობს  საგამოძიებო ორგანოებთან  და აუცილებელია უდანაშაულობის პრეზუმფციის დაცვა.

პროკურატურამ აჭარაში თანამდებობის 7 პირი დააკავა. დაკავებულებს შორის არიან: აჭარის განათლების მინისტრის მოვალეობის შემსრულებელი ბაგრატ მანველიძე და ბათუმის ვიცე-მერი თენგიზ პეტრიძე, ასევე ბათუმის ყოფილი მერი გიორგი ერმაკოვი.

„ბათუმელების“ ინფორმაციით, თანამდებობის პირები „იაფი სახლის“ პროექტთან დაკავშირებით დააკავეს.

ხელმისაწვდომი საცხოვრის პროექტს ბათუმის მერია ბოლო რამდენიმე წელია ახორციელებს. იაფი სახლის პროექტთან დაკავშირებით ბათუმის მერია კიდევ ერთ სკანდალში 2016 წელს გაეხვა.

“ეს პროვოკაცია ეტყობა დიდი ხანია მზადდება,” – უთხრა პოლიციის მე-6 განყოფილებიდან გამოსულმა ომარ მახარაძემ ჟურნალისტებს. სექსუალურ შევიწროებაში დადანაშაულებული ლექტორი დღეს, 30 მაისს გამოკითხეს.

“ცუდი ფაქტია ძალიან, ეს არის ჩემს წინააღმდეგ საშინელი, ბინძური კამპანია. ეს პროვოკაცია ეტყობა  გარკვეული პერიოდია მზადდება… მე გამოძიებას მივეცი ჩვენება და არ იკვეთება არანაირი დანაშაულის შემადგენლობა,” – აღნიშნა ომარ მახარაძემ.

ბსუ-ს ყოფილი ლექტორი პოლიტიკურ საქმიანობას უკავშირებს ამ კუთხით გამოძიების დაწყებას. იგი პოლიტიკური პარტია “ქართული ოცნების” წევრია.

ომარ მახარაძე ირწმუნება, რომ ის სტუდენტებს მხოლოდ სასწავლო საქმიანობასთან დაკავშირებით წერდა.

“არასოდეს არ მიმიწერია მსგავსი ისეთი, არაფერი არ ფიქსირდება. ეს არის წმინდა მეგობრული, რაც სასწავლო პროცესს უკავშირდება,” – აღნიშნა მან.

ჟურნალისტების კითხვაზე, ვისგან მომდინარეობს ეს პროვოკაცია, ომარ მახარაძემ განაცხადა: „არის ადამიანთა გარკვეული კონკრეტული ჯგუფი, რომლებიც მიზანმიმართულად… ალბათ იმიტომ, რომ მოეხდინათ ჩემი, ჩემი ოჯახის, ჩემი ახლობლების, ნათესავების, მეგობრების და ჩემი ნაცნობი ადამიანების წრის დისკრედიტაცია. მე იურისტი, პროფესორი კაცი გახლავართ, არ დავარღვევ არც ერთი ადამიანის უდანაშაულობის პრეზუმფციას ჩემი ოპონენტებისგან განსხვავებით, რომლებმაც ძალიან ბინძური, შეურაცხმყოფელი და ცილისმწამებლური სკანდალი ამიგორეს“.

ომარ მახარაძეს ჟურნალისტებმა ასევე ჰკითხეს, თუ ჰქონდა მიმოწერა სტუდენტთან, რომელმაც ის სექსუალურ შევიწროებაში დაადანაშაულა, რაზედაც უპასუხა, რომ „არასოდეს“. „ისეთი არაფერი არ მახსენდება, მაგრამ ის, რაც საგამოძიებო ორგანოებს აქვთ ეს არის მეგობრული, წმინდა საუნივერსიტეტო საქმიანობას უკავშირდება“, – თქვა ყოფილმა ლექტორმა.

მე წარმოვადგენ ქართულ ოცნებას“, პოლიტიკური საქმიანობიდან ჩამოშორებას უკავშირდება ეს ყველაფერი, ასე დაასრულა ომარ მახარაძემ ჟურნალისტებთან ურთიერთობა.

ყოფილი ლექტორის თქმით, ის თანამშრომლობს გამოძიებასთან. დღეს თავის ადვოკატებთან ერთად მივიდა პოლიციაში.

_______

სტატია იმის შესახებ, რომ ბათუმის უნივერსიტეტის მეორე კურსის სტუდენტი ლექტორს სექსუალურ შევიწროებაში ადანაშაულებს, „ბათუმელებმა“ 21 მაისს გამოაქვეყნა. 19 წლის სტუდენტი ამბობს, რომ ლექტორი მას ფეისბუქზე წერდა, სთხოვდა თამამ სელფებს და უკომპლექსოდ მოქცევას. ასევე ჰპირდებოდა, რომ ამის შესახებ ვერავინ გაიგებდა.

სტუდენტისგან სექსუალურ შევიწროებაში დადანაშაულებულმა ლექტორმა თქვა, რომ ფეისბუქი გაუტეხეს, თუმცა IT სპეციალისტთან მისვლა ვერ შეძლო.

სტუდენტმა განცხადებით მიმართა უნივერსიტეტს და შინაგან საქმეთა სამინისტროსაც. შსს-მ გამოძიება საქართველოს სისხლის სამართლის კოდექსის 150-ე მუხლით დაიწყო, რაც იძულებას გულისხმობს და ისჯება ჯარიმით ან გამასწორებელი სამუშაოთი ვადით ერთ წლამდე ან იმავე ვადით თავისუფლების აღკვეთით.

22 მაისს, კი ცნობილი გახდა, რომ ბათუმის შოთა რუსთაველის სახელობის სახელმწიფო უნივერსიტეტის ლექტორს, რომელსაც სტუდენტი სექსუალურ შევიწროებაში ადანაშაულებს, უნივერსიტეტმა ლექტორის სტატუსი დროებით შეუჩერა.

ამავე თემაზე:

კახა ახალაძე ბათუმის დელფინარიუმის პირველი კატეგორიის მწვრთნელია. სპორტსმენია. 12 წლის მანძილზე ფეხბურთს თამაშობდა, დელფინარიუმში გახსნის დღიდან მუშაობს.

„პირველი ეტაპი ადვილი არ იყო. საკმაოდ რთული, დატვირთული გრაფიკი მქონდა. თავიდან თითქმის 24-საათიან რეჟიმში გვიწევდა მუშაობა. ერთის  მხრივ ჩვენ ვსწავლობდით როგორ უნდა გაგვეწვრთნა დელფინები, როგორ დავმეგობრებულიყავით და მეორეს მხრივ დელფინებსაც ვასწავლიდით. სწავლის პროცესი დღესაც ანალოგიურად გრძელდება. მიუხედავად იმისა რაც გამოვიარეთ, მაინც რთულ რამეებთან გვიწევს გამკლავება.

სამი რამ არის დელფინთან მუშაობისას მთავარი – მეგობრობა, ურთიერთობა და ნდობა. როგორც შვილებს ვერ განასხვავებ ადამიანი, ისეა დელფინებიც. ყველა მიყვარს. ყველა ჩემი ფავორიტია,“ – ამბობს კახა.

დელფინარიუმში მეგზურობას გვიწევს. აუზთან, რომლის კიდესთანაც ვდგევართ და რომელიც დელფინებითაა სავსე, ერთი დელფინი მოცურდა.

„ეს ციცია, ორი შვილის დედა. ძალიან ცნობისმოყვარეა, შეამოწმა ვინ მოვიდა,“ – ამბობს კახა და დელფინს ხელს უქნევს. დელფინი აუზის სიღრმეში ბრუნდება, კიდესთან მეორე მოდის.

„ეს ნინია, პირველი დელფინი, რომელიც ბათუმის დელფინარიუმში დაიბადა ათი წლის წინ,“ – მიხსნის კახა.

დელფინარიუმში სამუშაო დღე ათ საათზე იწყება. მწვრთნელი ყველა დელფინს ამოწმებს და საკვებს უმზადებს. დელფინების ტრენინგები დღის მანძილზე 4-5 საათს გრძელდება.

„ვიზუალურად ვათვალიერებთ, ვინმე მოწყენილი ხომ არაა, რამე კონფლიქტი ხომ არ იყო და ა.შ. შემდეგ უკვე გადავდივართ ტრენინგებზე. ოთხი ტრენინგი გვაქვს დღის განმავლობაში. თუ შოუ გვაქვს, მაშინ ხუთი-ექვსი ტრეინინგი შოუსთან ერთად. ჩემთვის ეს სამსახური პირველ რიგში დიდ პასუხისმგებლობას ნიშნავს. როგორც პატარა ბავშვები ისე არიან ზღვის ძუძუმწოვრები. დელფინები ძალიან საინტერესო და უნიკალური ზღვის ბინადრები არიან. აქვთ თავიანთი ხასიათი. როგორც ჩვენ ადამიანები, ისე დელფინებიც ერთმანეთისგან განსხვავდებიან ვიზუალურადაც და  ხასიათითაც,“ – ამბობს კახა.

კახა ამბობს, რომ სამუშაო, რომელსაც ასრულებს სასიამოვნოა, მაგრამ ამავდროულად საკმაოდ მძიმეცაა.

„დილიდან ღამემდე გვიწევს შრომა და ურთიერთობა დელფინებთან. იყო რამდენიმე შემთხვევა ვაკანსია გვქონდა და მოვიდნენ. სპორტულებიც იყვნენ, უნდოდათ ძალიან მუშაობა, მაგრამ რომ შეხედეს რა შრომის გაღება გვიწევს, ხელები აწიეს- ჩვენ აქ ვერ ვიმუშავებთო.

„თავგანწირვა, მოტივაცია და მიძღვნა საკუთარი თავის, საქმისადმი, რომელსაც აკეთებ – აი, რა სჭირდება დელფინების მწვრთნელს. აქ რომ მოდიხარ თავს უძღვნი ამ საქმეს,“ – ამბობს კახა.

ბათუმის დელფინარიუმში 20 დელფინი ბინადრობს. დელფინის სიცოცხლის ხანგრძლივობა საშუალოდ 35-40 წელია. დღის განმავლობაში ერთი მოზრდილი დელფინი საშუალოდ 8-დან 15 კილოგრამ თევზს ჭამს.