ბათუმის საფეხბურთო სტადიონის მშენებლობა შესაძლოა ვადაზე 7 თვით ადრე დასრულდეს


ბათუმში 20 000 მაყურებელზე გათვლილი UEFA-ას IV კატეგორიის საფეხბურთო სტადიონის მშენებლობა შესაძლოა ვადამდე გაცილებით ადრე დასრულდეს. „იმ გეგმისა და მუშაობის ტემპის მიხედვით, რაც სახეზე გვაქვს, ვვარაუდობთ, რომ სტადიონის მშენებლობა 2020 წლის იანვარ-თებერვალში დასრულდება“, – გვითხრეს შპს „სტადიონში“, რომელიც ბათუმის საფეხბურთო სტადიონის მშენებლობას კურირებს. მშენებელ კომპანიასთან დადებული ხელშეკრულებით კი, საფეხბურთო სტადიონის მშენებლობის დასრულების ვადა, 2020 წლის 15 ოქტომბერია.

მშენებარე სტადიონის გადახურვა სპეციალური მემბრანით აგვისტოს თვის დასაწყისში დასრულდა. როგორც შპს „სტადიონში“ გვითხრეს, ამ ეტაპზე მიმდინარეობს შიდა სარემონტო სამუშაოები და სექტემბრის თვიდან მოედნის საფარის დაგებაც იგეგმება.

„შესრულებული სამუშაოები სრულად შეესაბამება უეფას სტანდარტებსა და მოთხოვნებს“, – აცხადებს შპს „სტადიონი“.

საფეხბურთო სტადიონს კომპანია „ანაგი“ აშენებს [პირველი ეტაპი]. ამავე კომპანიამ გაიმარჯვა მეორე ეტაპის [სტადიონის მშენებლობის დასრულების] სამუშაოების შესყიდვაზე გამოცხადებულ ტენდერშიც. შესაბამისად, „ანაგთან“ ხელშეკრულება დღგ-ს ჩათვლით, ჯამში 141 869 522 ლარზეა გაფორმებული.

მშენებარე საფეხბურთო სტადიონი ბათუმში / ფოტო: შპს „სტადიონი“

„ტრიბუნების პირველი იარუსი რკინაბეტონით დამზადებული ქარხნული ანაკრებია, ხოლო მეორე იარუსი – მონოლითური რკინაბეტონი“ – ბათუმში მშენებარე სტადიონი / ფოტო: შპს „სტადიონი“

ამ თემაზე:

ბათუმის საფეხბურთო სტადიონის გადახურვა დასრულდა [ფოტო]

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com