Batumelebi

ლინგვისტი ნოამ ჩომსკი, მუსიკოსი ბრაიან ენო და ანთროპოლოგი დევიდ გერბერი შეუერთდნენ ასობით აკადემიკოსსა და არტისტს მსოფლიოს სხვადასხვა წერტილიდან, რომლებიც კულტურულ და ინტელექტუალურ ბოიკოტს უცხადებენ თურქეთს, მის მიერ დაფინანსებულ ღონისძიებებსა და ფესტივალებს თურქეთში და თურქეთს გარეთ.

მიზეზი თურქეთის მიერ განხორციელებული სამხედრო ოპერაციაა ჩრდილოეთ სირიაში, იგივე როჟავაში, სადაც ქურთი მოსახლეობა ცხოვრობს.

აკადემიკოსები და არტისტები გაერთიანდნენ მოთხოვნით, შეწყდეს ქურთების ეთნიკური ხოცვა როჟავაში.

დევიდ გერბერი:

“როჟავა მსოფლიო მოსახლეობისთვის იმედის სხივია, რომელიც ახლა გენოციდის წინაშე დგას. ყველა ნორმალურ ადამიანს უნდა ესმოდეს, რომ ამ სიტუაციაში ნეიტრალიტეტის დრო არ გვაქვს”

ბოიკოტის მოწოდებისკენ ხელმოწერები საიტზე www.boycott-turkey.net გროვდება და ვრცელდება.

ამის ფონზე, აკადემიკოსები და არტისტები არ არიან მხოლოდ ის ადამიანები, რომლებიც ბოიკოტს უცხადებენ თურქეთს. მსოფლიოს მასშტაბით წამოიწყეს მოძრაობები: “არ დაისვენო თურქეთში” , “არ იფრინო თურქული ავიახაზებით”, “ბოიკოტი ბეკოს პროდუქციას” და სხვა.

შეგახსენებთ, რომ 9 ოქტომბერს, თურქეთის შეიარაღებულმა ძალებმა ჩრდილოეთ სირიაში დაიწყო სამხედრო ოპერაცია კოდური სახელწოდებით „მშვიდობის წყარო“.

წყარო : www.thecanary.co , www.boycott-turkey.net

წაიკითხეთ ასევე:

https://netgazeti.ge/news/397465/

ამერიკის შეერთებული შტატების 154-მეტრიანი საზღვაო ხომალდი USS Porter (DDG 78) ხვალ, 22 ოქტომბერს, შემოვა ბათუმის ნავსადგურში. ეს გემის მეორე ვიზიტი იქნება საქართველოში, რაც კიდევ ერთხელ უსვამს ხაზს აშშ-ისა და საქართველოს შორის საზღვაო სფეროში თანამშრომლობას.

ვიზიტი ემსახურება აშშ-ისა და საქართველოს შორის თანამშრომლობის განმტკიცებას რეგიონული მშვიდობისა და სტაბილურობის ხელშეწყობით.

USS Porter (DDG 78)  Arleigh Burke-ს კლასის მართვადი სარაკეტო გამანადგურებელია. ხომალდს შეუძლია მოიგერიოს წყალქვეშა ნავები და ბალისტიკური რაკეტები.

USS Porter-ის ვიზიტის ფარგლებში ამერიკელი მეზღვაურები მოინახულებენ ისტორიულ ადგილებს და გააღრმავებენ პარტნიორობას ქართველ კოლეგებთან.

აშშ-ის საზღვაო ძალების ხომალდები ხშირად ოპერირებენ შავ ზღვაში მონტროს კონვენციისა და საერთაშორისო კანონების შესაბამისად.

ხომალდი USS Porter-ი წარმოადგენს ესპანეთის როტის ნაწილს და აშშ-ის მეექვსე ფლოტის ოპერაციების სამოქმედო არეალში მონაწილეობას იღებს მრავალმხრივ მისიებში, ხელს უწყობს რა რეგიონის საზღვაო უსაფრთხოების დაცვასა და ნატოს ოპერაციებისა და მისიების მხარდაჭერას ევროპაში.

______________

ფოტოზე: USS Porter (DDG 78)

დღეიდან, 21 ოქტომბრიდან, ანიმაციური ფილმების საერთაშორისო ფესტივალი თოფუზი იწყება. ფესტივალი სტარტს ხულოში იღებს. ვორქშოფის შემდეგ, 15:00 საათზე, საუკეთესო საბავშვო ფილმს ხულოს კულტურის ცენტრში აჩვენებენ.

ჩვენებები გაიმართება ასევე 22 ოქტომბერს ქედაში, ქედის კულტურის ცენტრში, 23 ოქტომბერს ხელვაჩაურში –  ხელვაჩაურის კულტურის ცენტრში, 24-26 ოქტომბერს კი ბათუმში, რამდენიმე ადგილას.

24 ოქტომბერს, 17:00 საათზე, ბათუმის დრამატულ  თეატრში ფესტივალის ოფიციალური გახსნაა დაგეგმილი, თუმცა ფილმების ჩვენებები დილის ათი საათიდან ბათუმის  თოჯინების თეატრში დაიწყება.

ფილმების ნახვის პარალელურად, ფესტივალის სტუმრებს ექნებათ საშუალება მონაწილეობა მიიღონ საგანმანათლებლო პროგრამებში. დაგეგმილია ვორქშოპები  თემაზე – „ანიმაცია – ურთიერთობის მხატვრული ფორმა“,  მასტერკლასები თემაზე –  „შეხვედრა ავტორებთან“.  ასევე, 25 ოქტომბერს, ბათუმის ამერიკული კუთხე უმასპინძლებს თოქშოუს,  რომლის  მთავარი თემა იქნება ანიმაციური კინოს წარმოებაში არსებული  გამოწვევები.  ასევე დაგეგმილია სემინარი თემაზე “ქართული ანიმაციის პერსპექტივები”.

ფესტივალის გამარჯვებულები  26 ოქტომბერს გახდება ცნობილი, რომლებსაც მთავარი, ახალგაზრდული და საბავშვო ჟიური გამოავლენს.

კონკურსი რამდენიმე  კატეგორიაში მიმდინარეობს:

[checklist]

• ფილმი უფროსებისათვის
• ფილმი ბავშვებისთვის
• ტვ-სერიალი
• ექპერიმენტული ფილმი
• დებიუტი
• სტუდენტური ფილმი
• ბავშვების მიერ შექმნილი ფილმი

[/checklist]

ფესტივალის პროგრამა:

ფესტივალის მხარდამჭერები არიან: აჭარის ავტონომიური რესპუბლიკის განათლების, კულტურისა და სპორტის სამინისტრო, საქართველოს განათლების, მეცნიერების, კულტურისა და სპორტის სამინისტრო, საქართველოს კინემატოგრაფიის ეროვნული ცენტრი და ბათუმის მერია.

დღეს, 19 ოქტომბერს, ქუთაისის ლადო მესხიშვილის სახელობის დრამატულ თეატრი მოსკოვის თეატრს „ნიკიტკის კარიბჭეს“  მასპინძლობს. აფიშის მიხედვით თეატრმა ქუთაისში ორი სპექტაკლი უნდა ითამაშოს –  „არ დამივიწყო“  19 ოქტომბერს, ხოლო „ჩვენი ეზოს  სიმღერები“ 20 ოქტომბერს.

დაგეგმილი გასტროლის შესახებ გავრცელებულ  ინფორმაციას, პროტესტი მოჰყვა ქუთაისში მცხოვრებ სამოქალაქო აქტივისტებში.  მოქალაქეები, ამბობენ რომ დაუშვებელია ოკუპანტი ქვეყნის თეატრის მსახიობებმა ქუთაისში სპექტაკლი ითამაშონ.

თავად მესხიშვილის თეატრის მენეჯმენტი, მოსკოვის თეატრის გასტროლში პრობლემას ვერ ხედავს.

სულხან გოგოლაშვილი, ლადო მესხიშვილის თეატრის დირექტორი, ამბობს რომ მოსკოვის თატრი ქუთაისში მემორანდუმის ფარგლებში მოიწვიეს. ამ მემორანდუმში სხვა დამეგობრებული თეატრებიც შედიან.

„ხდება კულტურული გაცვლა თეატრებს შორის. არანაირი სახელმწიფო სტრუქტურები ჩარეული არაა.  გასაგებია მათი პროტესტი [მოქალაქეების]. მეც ვთვლი რომ რუსეთი ოკუპანტია, მაგრამ მე არ ვიღებ ოკუპანტ რუსეთს თეატრში. მე ვიღებ კულტურულ რუსეთს. რომელსაც მემგონია ჩვენ არ ვებრძვით, ისევე როგორც არ ვებრძვით სპორტულ რუსეთს, ისევე როგორც არ ვებრძვით ტურისტულ რუსეთს. რატომ დადის მაშინ რეზო გაბრიაძე მოსკოვში და რატომ ატარებს სპექტაკლებს, რატომ მღერის ნინო ქათამაძე, რატომ ვყიდით ღვინოს რუსეთში, მაშინ თუკი ესეთი პროტესტია?“ – სვამს კითხვებს სულხან გოგოლაშვილი „ბათუმელების“ კითხვების პასუხად.

გოგოლაშვილის თქმით, მოსკოვის თეატრის ქუთაისში გასტროლი სახალხო დიპლომატიაა.

„ეს სახალხო დიპლომატიაა და პირიქით ხელს შეუწყობს ძალიან  ბევრი პრობლემის მოგვარებას.  მაშინ გავიდეთ მოედანზე, დავანთოთ ცეცხლი, დავწვათ ჩეხოვი, დოსტოევსკი, გოგოლი, გრიბოედოვი და ა.შ. მაშინ ვინ ვიქნებით მსოფლიოს თვალში, ჩვენ თუ კულტურულ რუსეთს დავუწყეთ ბრძოლა? მე ნამდვილად  ვიცი რომ ეს თეატრი არ არის რუსული პოლიტიკის გამტარებელი, ამიტომაც ვმეგობრობ. ამ თეატრმა 2008 წლის შემდეგ დადგა ქართული სპექტაკლი „მე ბებია, ილიკო და ილარიონი“, რომელიც ჩამოტანილი ჰქონდა ქუთაისის თეატრში 2017 წელს. მე არ ვთვლი რომ ეს თეატრი რუსული პოლიტიკის გამტარებელია,“ – ამბობს სულხან გოგოლაშვილი.

გოგოლაშვილის თქმით, მოსკოვის თეატრის გასტროლს არცერთი საბიუჯეტო ორგანიზაცია არ აფინანსებს და ისინი თავიანთი ხარჯით ჩამოდიან.

აქცია მოსკოვის თეატრ „ნიკიტკის კარიბჭეს“  ქუთაისში დაგეგმილი გასტროლის გასაპროტესტებლად მესხიშვილის თეატრის წინ დღეს, 19 ოქტომბერს, 19 საათზეა დაგეგმილი.

მდინარე ბარცხანაში, შავი ზღვის შესართავთან ახლოს ნავთობის კერა ისევ გაჩნდა. მდინარის სანაპირო ნავთობპროდუქტებითაა დაბინძურებული. მდინარის გვერდით მდებარე არხის მთელ სიგრძეზე ნიადაგსა და მცენარეულ საფარზეც ასევე ნავთობპროდუქტებიაა. სპეციალისტები ამბობენ რომ ეს იტორიული დაბინძურების ზონაა.

იმისათვის რომ ნავთობი ზღვაში არ ჩავიდეს, მდინარის კალაპოტში ნავთობის დაღვრის საწინააღმდეგო  საშუალებაა, ე.წ. ბონური ზღუდეებია მოწყობილი.

„ეს მოწყობილობები არის იმისათვის რომ ნავთობი არ გავრცელდეს მდინარეში და მდინარიდან არ ჩავიდეს ზღვაში. ის რომ მდინარიდან ზღვაში ჩადის და ზღვა ბინძურდება, ეს ფაქტი არ დაფიქსირებულა,” – უთხრა „ბათუმელებს“ გარემოსდაცვითი ზედამხედველობის დეპარტამენტის აჭარის და გურიის რეგიონული სამმართველოს ინსპექტირების განყოფილების უფროსმა ნატო დავითაძემ.

მისივე თქმით, ბონური ზღუდეები მდინარეში ბათუმის „ნავთობტერმინალმა“ ჩააწყო. ადგილი, სადაც მდინარის სანაპირო ნავთობპროდუქტებითაა დაბინძურებული, სოწრედ „ნავთობტერმინალს“ ესაზღვრება. თუმცა ტერმინალიც და გარემოსდაცვითი მაკონტროლებელი უწყებაც ამბობს რომ დაბინძურების გამომწვევი ბათუმის „ნავთობტერმინალი“ არაა.

„ეს შესაძლოა იყოს ისტორიული დაბინძურება. საბჭოთა კავშირის დროს, აქ იყო ნავთობგადამამუშავებელი ქარხანა და მილებით უკავშირდებოდა პორტს. სამწუხაროდ არ არსებობს და არცერთ უწყებას არ აქვს რუკა, თუ რა მიწისქვეშა კომუნიკაციები გადის ამ ტერიტორიაზე. ფაქტია, რომ გრუნტიდან ხდება პერიოდულად ნავთობპროდუქტების გამოსვლა. ეს არამარტო წელს, არამედ შარშანაც დაფიქსირდა. იმის წინაც, სულ ფიქსირდება. ეს ადასტურებს იმას, რომ არის კონკრეტულად ისტორიულად დაბინძურებული ტერიტორია და ჩვენ კონკრეტულ სამართალდამრღვევ სუბიექტს ვერ ვადგენთ. შესაბამისად, მასთან დაკავშირებით, ადმინისტრაციულ ღონისძიებასახ ვერ ვატარებთ,“ –  უთხრა „ბათუმელებს“ ნატო დავითაძემ.

ბათუმის „ნავთობტერმინალის“  ეკოლოგიის სამსახურის უფროსი თენგიზ გორდელაძე კატეგორიულად გამორიცხავს რომ მდინარის დაბინძურების მიზეზი შეიძლება ტერმინალი იყოს.

„გარემოს ზედამხედველობის სამსახურსაც არაერთხელ ვესაუბრეთ. არაერთი მოკვლევა ჩავატარეთ. დაბინძურება არ არის ჩვენი ტერიტორიიდან. ტექნიკურ დახმარებას ვუწევთ გარემოსდაცვას. თვეში 200-300 დოლარის მასალას ვხარჯავთ, გარდა იმისა რომ ჩვენი პერსონალი ამაზე მუშაობს. ჩვენ ამას არ ვითვლით, მთავარია ზღვაში არ გავიდეს. მთელი ზაფხული კარგად ვიყავით, მაგრამ ახლა უცებ ისევ გამოჩნდა. ვეძებეთ წყარო და ვერ ვნახეთ. ნავთობტერმინალის ტერიტორიიდან გარეთაა,“ – უთხრა „ბათუმელებს“ თენგიზ გორდელაძემ.

“ბათუმის საზღვაო პორტის ინფრასტრუქტურა არ არის მიმზიდველი ფართომასშტაბიანი საკრუიზო ლაინერებისთვის… 2016 წლიდან არც ერთი საკრუიზო ლაინერი არ შემოსულა ბათუმში,” – აღნიშნულია კვლევაში, რომლის მიზანიც საზღვაო შრომის ბაზრის შესწავლა იყო. კვლევა “სოციალური კვლევისა და ანალიზის ინსტიტუტმა” ჩაატარა აჭარის დასაქმების სააგენტოს დაკვეთით.

კვლევის ფარგლებში სხვადასხვა სამიზნე ჯგუფი გამოკითხეს, მათ შორის, საერთაშორისო საკრუინგო კომპანიები, უმაღლესი სასწავლებლები, მეზღვაურები და კაპიტნები.

კვლევაში ცალკე თავი ეთმობა საკრუინგო საქმიანობას.

“გამოჩნდა, რომ საკრუინგო დასაქმების სფერო არ არის რეგულირებული სახელმწიფოს მიერ, რაც საერთაშორისო საზღვაო შრომის კონვენციის ერთ–ერთი მთავარი სტანდარტია. საქართველო არ არის საზღვაო სფეროში საერთაშორისო ორგანიზაციების ქსელის სრულფასოვანი წევრი. მაგალითად, არ არის მიერთებული ისეთ მნიშვნელოვან საერთაშორისო კონვენციას, როგორიცაა საერთაშორისო საზღვაო შრომის კონვენცია (MLC),” – აღნიშნა სოციოლოგმა იაგო კაჭკაჭიშვილმა კვლევის შედეგების პრეზენტაციის დროს, რომელიც დღეს, 18 ოქტომბერს, სასტუმრო “ადმირალში” გაიმართა.

კვლევის მიხედვით, ზოგადად მსოფლიოში საკრუიზო ტურიზმის ხარჯთეფექტურობა შემცირდა. სფერო სულ უფრო მეტად ხდება ფინანსურად დატვირთული, რის გამოც დღის წესრიგში დგას იაფი რესურსის მოზიდვის აუცილებლობა. გარდა ამისა, ევროკავშირის ქვეყნებში ახალგაზრდებს მეზღვაურის პროფესიის მიმართ დაბალი მოტივაცია აქვთ.

იაგო კაჭკაჭიშვილის შეფასებით, საკრუიზო მიმართულებით საქართველოს გააქტიურება უმუშევრობის დონეს შეამცირებს და ამ რეალობას დროულად უნდა “გავუსწოროთ თვალი”.

“ჩვენ არ ვიყენებთ ამ პოტენციალს. საკრუიზო გემებზე დასაქმებულთა საშუალო ხელფასი 1000-1500 ამერიკული დოლარია… ლეგალური დასაქმება შეამცირებს არალეგალურ შრომით მიგრაციას.

ქართველი მეზღვაურების შემთხვევაში, პრობლემად რჩება პრაქტიკის გავლა, ინგლისური ენის სწავლება უმაღლეს საზღვაო და პროფესიულ სასწავლებლებში,” – ამბობს იაგო კაჭკაჭიშვილი.

კვლევის თანახმად, დღემდე არ განხორციელებულა ბათუმის პორტის სარეკონსტრუქციო პროექტი (ნავმისადგომის 340 მეტრამდე გაფართოება და მრავალფუნქციური კომპლექსის მოწყობა), რისი ვალდებულებაც საქართველომ ამერიკულ საკრუიზო კომპანია “Royal Caribbean”-თან 2012 წელს გაფორმებული ურთიერთთანამშრომლობის მემორანდუმით იკისრა.

“ამის გამო ბათუმის პორტში 2016 წლიდან არცერთი საკრუიზო ლაინერი არ შემოსულა, რამაც მნიშვნელოვნად დააზარალა რეგიონის/ქვეყნის ეკონომიკა,” – ვკითხულობთ კვლევაში.

საკრუიზო ლაინერებისთვის არის თუ არა დაგეგმილი შესაბამისი ინფრასტრუქტურის მოწყობა? – ვკითხეთ საზღვაო სააგენტოს წარმომადგენელს, ნინო ორაგველიძეს, რომელიც ამ შეხვედრას ესწრებოდა. მან გვიპასუხა, რომ პორტი კერძო კომპანიისთვის აქვს გადაცემული სახელმწიფოს და სააგენტო ამ კუთხით ინფორმაციას არ ფლობს.

რაც შეეხება საერთაშორისო კანონმდებლობასთან თანხვედრას, ნინო ორაგველიძემ გვითხრა, რომ “მეზღვაურთა შრომის კონვენციის” პროცესი უკვე დაწყებულია და საქართველო 2020 წელს გახდება ამ კონვენციის წევრი.

აჭარის უმაღლესი საბჭოს დეპუტატი „პატრიოტთა ალიანსიდან“ მიჩნევს, რომ საზოგადოებრივი მაუწყების აჭარის ტელევიზიასა და რადიოში „ჩამოსული“ ადამიანი მაღალ თანამდებობებს არ უნდა იკავებდეს. ეს მან საზოგადოებრივი მაუწყებლის აჭარის ტელევიზიისა და რადიოს გადაცემა „სათქმელში“ განაცხადა.

„მე კიდე მაინტერესებს, რატომ უნდა იყოს აჭარის ტელევიზიის იდეოლოგი თემურ ქორიძე, რატომ უნდა ღებულობდეს 3 ათას ლარს ხელფასს, ადგილობრივი არ გვყავს? დავიჯერო ასეთი უვიცები არიან ადგილობრივები?“ – იკითხა მერაბ ბლადაძემ. ის გადაცემაში მაუწყებლის მრჩეველთა საბჭოს არჩევნებზე სასაუბროდ იყო მიწვეული.

დეპუტატი გულისხმობდა ჟურნალისტ ზვიად ქორიძეს, რომელიც აჭარის ტელევიზიაში კონსულტანტად მუშაობს და მისი ხელფასი 3 ათასი ლარი არ არის.

„ცოტა სეპარატისტული მიდგომა ხომ არ არის?“ – ჰკითხა გადაცემის წამყვანმა ირინა ყურუამ უმაღლესი საბჭოს დეპუტატს.

სეპარატისტული რა შუაშია? – ისევ იკითხა ბლადაძემ.

თუ ადამიანი პროფესიონალია…. თქვენ  თბილისში არ უნდა გქონდეთ მუშაობის უფლება?  – ჰკითხა მას წამყვანმა.

„როგორ არ უნდა მქონდეს, მაგრამ სულ შეიძლება ყველაზე კარგი ადგილი… აჭარაში არ არის ადამიანები?“ –  იკითხა ისევ მერაბ ბლადაძემ.

„თუ კარგი სპეციალისტი ვარ, ვიყო მოწვეული სპეციალისტი, ეს დანაშაულია? – ჰკითხა წამყვანმა დეპუტატს.

ჯერ ეს ერთი თემურ ქორიძე არის მხარე… – განაგრძო  მერაბ ბლადაძემ.

„თემურ ქორიძე არა, ზვიად ქორიძეს გულისხმობთ. ბატონო მერაბ, მგონი არ არის სწორი განცხადება, მით უმეტეს საზოგადოებრივი მაუწყებლის ეთერით, ამის უფლებას ვერ მოგცემთ, რომ კუთხურობის მიხედვით დაყოთ ადამიანები,“ –  უთხრა ირინა ყურუამ უმაღლესი საბჭოს დეპუტატს.

„ჩემი აზრით, ეს არის სამარცხვინო განცხადება, რომელიც არ შეეფერება უმაღლესი საბჭოს წევრის სტატუსს. ამ ტიპის განცხადებები გვქონდა 90-იანებში, როდესაც ძალიან არეული და რთული სიტუაცია იყო ქვეყანაში. დღეს, როდესაც 2019 წლის ბოლოს იმავეს ვისმენთ, შემაშფოთებელიც არის და ძალიან სამწუხაროც,“ – ასე აფასებს აჭარის უმაღლესი საბჭოს დეპუტატის გამონათქვამს ახალგაზრდა იურისტთა ასოციაციის თავმჯდომარე სულხან სალაძე.

სულხან სალაძის თქმით, არც რაიმე კანონი, არც საქართველოს კონსტიტუცია არ მიჯნავს და ჰყოფს ადამიანებს მათი წარმომავლობის მიხედვით.

„კანონში არსად არ წერია და დიდი იმედი  მაქვს, არც დაიწერება არასდროს, რომ ადამიანები გეოგრაფიული ან სხვა რაიმე ნიშნით შეიძლება შეიზღუდონ. რომ თუ ერთ ადგილას დაიბადებიან, ვერ იმუშავებენ სხვა ადგილას.

არ ვიცი, რაზე ფიქრობდა ის ადამიანი, ვინც ეს განცხადება გააკეთა, მაგრამ ალბათ მის პარტიაშიც, რომელ პარტიასაც ის წარმოადგენს, ცოტა მეტი ყურადღება უნდა ჰქონდეთ და მეტი მგრძნობელობა ასეთი განცხადებების მიმართ. არ ვიცი, პარტია რა განცხადებას გააკეთებს – გაემიჯნება თუ არ გაემიჯნება, ასეთი განცხადებები არის კუთხურ-შოვინისტური, რომლებსაც ადგილი არ უნდა ჰქონდეს პოლიტიკაში,“ – ამბობს სულხან სალაძე.

მთავარი ფოტო: მერაბ ბლადაძე

ავტორი: ესმა გუმბერიძე, საქართველოს ახალგაზრდობის წარმომადგენელი გაერთიანებული ერების ორგანიზაციაში, იურისტი

_______________________________

რამდენიმე დღის წინ დავბრუნდი გაეროდან, სადაც ვესწრებოდი გენერალური ასამბლეის მე-3 კომიტეტის სხდომებს. გენერალური ასამბლეა გაეროს ერთ-ერთი წამყვანი მმართველი ორგანოა. პარლამენტს ჰგავს. სწორედ გენასამბლეაზე იკრიბებიან სახელმწიფოების წარმომადგენლები სხვადასხვა საკითხის განსახილველად. გაერო ხომ მსოფლიო პოლიციელი კი არაა, არამედ შეკრების ადგილი, სადაც ერთმანეთს ხვდებიან ისეთი სახელმწიფოები, რომლებიც სხვაგან არ საუბრობენ და რომელთაც ხშირად დიპლომატიური ურთიერთობებიც კი არ აქვთ მსოფლიოში მიმდინარე მოვლენათა განსახილველად.

სახელმწიფო მეთაურების კვირეულის გარდა, სადაც პრეზიდენტები და   პრემიერ-მინისტრები გამოდიან და რომელიც ყველაზე ცნობადი მოვლენაა გენასამბლეის კუთხით, ასამბლეის ფარგლებში იმართება რამდენიმე თემატური კომიტეტის სხდომაც. მაგალითად მე-3  კომიტეტი პასუხისმგებელია ინკლუზიაზე და ადამიანის უფლებებზე. ის ორი თვის განმავლობაში იმუშავებს და მის ფარგლებში, გაეროსთან მუდმივი წარმომადგენლების/ელჩებისა თუ მისიებში მომუშავე დიპლომატების მონაწილეობით, შემუშავდება რეზოლუციები, მათ შორის ახალგაზრდების შესახებ რეზოლუციაც.

ახალგაზრდობის წარმომადგენლებს სხვადასხვა ქვეყნიდან, რომლებსაც აქვთ საკმარისი დაფინანსება, ასევე შეუძლიათ დარჩენა რამდენიმე კვირით და რეზოლუციების შემუშავებაში მონაწილეობა სახელმწიფოების მისიებთან შეთანხმებით. მე-3 კომიტეტს აქვს ამ ორი თვისთვის დღის წესრიგი, სადაც რამდენიმე საკითხია გათვალისწინებული.

ახალგაზრდობის წარმომადგენლები, როგორც წესი, სიტყვით გამოდიან სოციალური განვითარების საკითხზე. სხვათა შორის, ახალგაზრდობის წარმომადგენლებს შეუძლიათ ისაუბრონ არამხოლოდ ახალგაზრდობასთან უშუალოდ დაკავშირებულ საკითხებზე, არამედ ყველაფერ იმაზე, რაც მათ აწუხებთ. თუნდაც ქალთა ან ასაკოვან ადამიანთა უფლებებზე. ახალგაზრდებისთვის ხომ ეს საკითხებიც მნიშვნელოვანია.

ამ კომიტეტის სხდომაზე არამხოლოდ ახალგაზრდობის წარმომადგენლები, არამედ კარიერული დიპლომატებიც გამოდიან სიტყვით. განსაკუთრებით მაშინ, თუკი ქვეყანას არ ჰყავს ახალგაზრდობის წარმომადგენელი. მაგალითად, რუსეთს არ ჰყავს ახალგაზრდობის წარმომადგენელი, ამიტომ, როდესაც საქართველოს და უკრაინის ახალგაზრდობის წარმომადგენელთა გამოსვლებს გამოეხმაურნენ, კომენტარი ჩვენს ნათქვამზე რუსმა დიპლომატებმა გააკეთეს.

გაეროს გენერალურ ასამბლეაზე საინტერესო იყო იმ სახელმწიფოთა წარმომადგენლების მოსმენა, სადაც ადამიანის უფლებების ძალიან მძიმე დარღვევები ხდება. ადამიანების მასობრივი ხოცვა-ჟლეტა, წამება… რომ ვუსმენდი, ისე აქებდნენ თავიანთ ხელისუფლებას, რომ ყველაფერს აკეთებენ, რომ კეთილდღეობის სახელმწიფოებს აშენებენ, მართლა სამოთხე დედამიწაზე მოგეჩვენებოდა. არადა, უფლებადამცველებისგან მაქვს მოსმენილი იქ არსებული საშინელი სიტუაციის შესახებ.

ახალგაზრდობის წარმომადგენელთა უმრავლესობა ევროპიდანაა. კარიერული დიპლომატებისთვის ეს საკომიტეტო მოსმენები/სხდომები ყოველდღიურობაა. ისინი წერენ კომენტარებს და სხდომაზე კითხულობენ, დროში რომ ჩაეტიონ. თუმცა ზოგს მაინც არ ჰყოფნის გამოყოფილი 5 წუთი და მიკროფონს უთიშავენ.

სახელმწიფოთა ჯგუფების სახელით თუ კეთდება განცხადება (მაგალითად: ევროკავშირის, აფრიკის კონტინენტის) ამგვარი განცხადებებისთვის 12 წუთია გამოყოფილი. ეს ავტომატურად ხდება. მიკროფონის არგათიშვა იქნებოდა სახელმწიფოთა შორის თანასწორობის პრინციპის დარღვევა. წარმოიდგინეთ, 1 ქვეყნის წარმომადგენელი ჩაეტია 5 წუთში, მეორე 20 წუთს თუ ილაპარაკებს და დაიკავებს ტრიბუნას, უკვე უსამართლობა იქნება. ელექტრონულ ტაბლოზე ჩანს, დრო რამდენი დაგრჩა, თუმცა რადგანაც უსინათლო ვარ, ვერ დავინახავდი.

საინტერესოა, რომ ძალიან ბევრი ქვეყნის წარმომადგენელმა, როგორც ახალგაზრდობის წარმომადგენლებმა, ასევე დიპლომატებმა, ისაუბრეს შშმ პირთა უფლებრივ მდგომარეობაზე, მათ ინკლუზიაზე.

როდესაც საჯარო გამოსვლაში სხვა ქვეყანას უარყოფითად ახსენებ, იმ ქვეყანას აქვს პასუხის გაცემის უფლება. ამიტომ რუსეთმა ჩემი და უკრაინის წარმომადგენლების გამოსვლას რომ უპასუხა, გასაკვირი არაა და მზადაც ვიყავით ამისთვის. არც მინერვიულია დიდად, რუსეთის პასუხი რომ მოვისმინე. პირადად არ მიმიღია, ვგრძნობდი, რომ ჩემ უკან მთელი ქვეყანა იდგა და ზურგს მიმაგრებდა იმაში, რასაც ვამბობდი.

სხვა დღეს, მე კი აღარ შევსწრებივარ, მაგრამ ახალგაზრდობის სხვა  წარმომადგენელთა თქმით, მსგავსი შეპასუხება  მოხდა კორეასა და იაპონიას შორის, თუმცა ზოგჯერ არც პასუხობენ. მაგალითად, კუბის წარმომადგენელმა აშშ-ს რომ დააბრალა მის სუვერენიტეტში ჩარევა USAID-ის მეშვეობით, აფინანსებინებს რა ისეთ პროექტებს, რომლებიც კუბის ხელისუფლებას აკრიტიკებენ, შეერთებულმა შტატებმა არ უპასუხა. მეორე დღეს კანონის უზენაესობისა და საერთაშორისო დამნაშავეობასთან ბრძოლის საკითხზე რომ ისაუბრა უკრაინის წარმომადგენელმა და რუსეთის აგრესიას დაუკავშირა კრიმინალის ზრდა, მას რუსეთმა აღარ უპასუხა.

ჩემმა გამოსვლამ სხვა ქვეყნების ახალგაზრდობის წარმომადგენლებიც დააინტერესა. განსაკუთრებით გამიხარდა, ინდონეზიელი რომ მოვიდა ჩემთან და მითხრა, რომ ჩემ მიერ მოყოლილმა გალელი გოგოს ისტორიამ შეძრა. ეს იმის გათვალისწინებით, რომ ინდონეზია საქართველოსგან გეოგრაფიულადაც ძალიან შორსაა და არც იმდენი ინფორმაცია აქვთ საქართველოში მიმდინარე მოვლენებზე, მაგრამ ჩემი ისტორია გასაგები აღმოჩნდა.

საკომიტეტო მოსმენების გარდა, რომლებიც ვიდეოზე იწერება, ახალგაზრდობის წარმომადგენლები ზოგჯერ  მართავენ ღონისძიებებს. მაგალითად, ირლანდიის მისიაში ირლანდიის ახალგაზრდობის წარმომადგენლებმა გააკეთეს მრგვალი მაგიდა ახალგაზრდების ღირსეული დასაქმების თემაზე. მეც, რა თქმა უნდა, დავესწარი რამდენიმე ასეთ ღონისძიებას. ჩემი აზრიც დავაფიქსირე, დისკუსიებში ჩავერთე.

საინტერესოა სხვა ქვეყნების მისიებში მისვლა. ეს ცოტათი იმას გავს, ვინმესთან სახლში რომ მიდიხარ და აკვირდები: ამას დიდი სახლი აქვს, ამას ბევრი თანამშრომელი ჰყავს, ამას -ნაკლები.

დიპლომატობა რომ „ფულში ხრჩობას“ ნიშნავს, მითია. ჩვენი დიპლომატები ერთოთახიან ბინებშიც ცხოვრობენ და მანქანებით საცობებშიც ხვდებიან. ძალიან ძნელია, ქართული ბიუჯეტით ამერიკისთვის შესაფერისი ანაზღაურების გადახდა და იქაური ცხოვრების უზრუნველყოფა. ყველა განხილვაზე დასასწრებადაც კი არ გვყავს დიპლომატების საკმარისი რაოდენობა.

ხშირად ისიც ჰგონიათ, რომ ახალგაზრდობის წარმომადგენლობა ფუფუნებას ნიშნავს. ჩემი პროგრამის ბიუჯეტი ამერიკაში ორივე ვიზიტისთვის და საქართველოში რეგიონული ტურის ჩასატარებლად ჯამში არის 17 ათასი ლარი. ამ პირობებში სასტუმრო მხოლოდ 3 ღამით ავიღე. კიდევ 2 დღით გაეროსთან საქართველოს მუდმივი წარმომადგენლობის თანამშრომელმა მიმასპინძლა გულუხვად, დანარჩენი 3 ღამე კი ჩემს ნაცნობებთან გავატარე. ღონისძიებებზე ძირითადად მისიის თანამშრომლებს ანდაც სტაჟიორებს დავყავდი. ორიოდე ღონისძიებაზე სხვა ახალგაზრდობის წარმომადგენლებსაც გავყევი.

სასტუმროს გარეშე მინდოდა, ვფიქრობდი ნაცნობებთან გავჩერებულიყავი, თუმცა ჩემი ნაცნობები შორს ცხოვრობენ გაეროდან. ნიუ-იორკული საცობების პირობებში კი მოხალისეს საზოგადოებრივი ტრანსპორტით რომ ვეტარებინე იმ სიშორიდან, ვერ გამოვიდოდა.

ბათუმში, ანგისის ქუჩაზე, ორსართულიანი, კერძოს სახლის გვერდით მშენებარე 16-სართულიანი კორპუსი რომან დუმბაძის ოჯახისათვის შემოსავლის დაკარგვის მიზეზი გახდა.

რომან დუმბაძე ყოფილი პატიმარია. იგი 2018 წელს, შელაპარაკების საფუძველზე, პოლიციის მიმართ დაუმორჩილებლობის მუხლით დააკავეს. მან საპატიმროში ერთი წელი გაატარა. აქამდე რომანის ოჯახი თავს ოთახების სეზონური გაქირავებით ირჩენდა და პარკინგისთვის აქირავებდა დიდ ეზოსაც.

საპატიმროდან გამოსვლის შემდეგ რომანი ვერც სახლს აქირავებს და ვეღარც ეზოს – პარკინგისთვის. მიზეზი, როგორც თავად ამბობს, თექვსმეტსართულიანი სახლია, რომელსაც მისი სახლის გვერდით კომპანია „ნევბათუმი“ აშენებს.

მაღალსართულიანმა კორპუსმა რომანის სახლი და ეზო დაჩრდილა. რომანი გვიყვება, რომ მზის სხივები ეზოსა და სახლს ახლა მხოლოდ დილის 12 საათამდე ადგება, სახლის ოთახები დანესტილია, მშენებლობიდან კი პერიოდულად ეზოში ცვივა სამშენებლო ნარჩენები, რის გამოც ავტომანქანას ეზოში აღარავინ აჩერებს და რომანმა პარკინგიდან მიღებული შემოსავალიც დაკარგა. რომანი ამბობს, რომ მის ეზოში გავლაც კი სახიფათოა.

სახლს სიძველის კვალი ეტყობა, თუმცა მეპატრონე ამბობს, რომ ერთმანეთისგან უკვე აცდენილი, დაბზარული კედლები მასიური თექვსმეტსართულიანის მშენებლობის შედეგია, რომლის საძირკვლის გათხრის დროსაც მის სახლსაც გამოეთხარა საფუძველი და საგანგაშოდ დაზიანდა. დაზიანებულია სახურავი, ნაყარი სამშენებლო მასალით ამოვსებულია ჟოლობები, შედეგად სახლში ჩადის წყალი და აობებს კედლებს.

ტურისტები მოდიან, თუმცა როცა ხედავენ სახლის ნესტიან ოთახებს, უარს ამბობენ დარჩენაზე და უკან მიდიან. ოჯახმა შემოსავლის წყარო სრულად დაკარგა.

„მპირდებოდნენ, თუ რაიმე ზიანს მოგაყენებთ, აგინაზღაურებთო, მაგრამ ეს მხოლოდ სიტყვიერი შეთანხმება იყო. სრულიად უკანონოდ გააკეთეს ჩემი ეზოს მხარეს ღიობი ფანჯრები და ტერასები, სამშენებლო მასალების საზიდად იყენებდნენ ჩემს ეზოს. სახურავი რომ მშენებლობიდან გადმოცვენილმა სამშენებლო ნარჩენებმა დააზიანა და ზარალის ანაზღაურებაზე მიდგა საქმე, მომიტანეს მხოლოდ 80 ცალი თუნუქის ფურცელი სახურავის გადასახურად და თანხა – 300 ლარი ხელოსნისთვის. არც კი მკითხეს, ზუსტად რა მჭირდებოდა სახურავისთვის, არც ზომა აუღიათ. ჩემი სახლის სახურავი 200 კვადრატული მეტრია.

სახურავი რომ გამომეცვალა, ქვეშ მოქცეულ ხესაც გამოცვლა სჭირდებოდა. 5 კუბური მეტრი ხეა საჭირო ამისათვის, რაც 5000-მდე ლარი ღირს. ხის მასალა ჩემთვის არავის გადმოუცია. რომც გადმოეცათ, 200-კვადრატულმეტრიანი სახურავის შეკეთებას, ხის მასალის გამოცვლას, ხელოსნისთვის 2000 ლარი მაინც სჭირდება,“ – ამბობს რომან დუმბაძე.

სამშენებლო კომპანია „ნევბათუმის“ იურისტი, ინდირა სალაძე ,,ბათუმელებთან“ საუბრისას რომან დუმბაძისთვის თუნუქის ფურცლების გადაცემის ფაქტს იხსენებს:

„რომან დუმბაძის სახლს ჩვენი მშენებლობიდან ძალიან მცირე დაზიანება მიადგა, ისიც მხოლოდ სახურავს. ჩვენ უმნიშვნელო ზარალი მას მნიშვნელოვნად ავუნაზღაურეთ. შევუძინეთ მთელი სახლისთვის თუნუქის ფურცელი, მან კი ის გაასხვისა. მას მერე უმიზეზო მიზეზებით გვიჩივის,“ – ამბობს სამშენებლო კომპანიის იურისტი. მისივე თქმით, რომან დუმბაძეს გადაეცა ხის მასალაც სახურავის გამოსაცვლელად, რასაც თავად რომან დუმბაძე სიცრუეს უწოდებს. სამშენებლო კომპანია ზარალის ანაზღაურების დამადასტურებელ დოკუმენტს არ ასაჯაროებს,  ინდირა სალაძე საუბრისას გვეუბნება, რომ „2000 ლარის ღირებულების თუნუქის ფურცელი და ხელოსნის თანხა, რომელიც რომან დუმბაძეს კომპანიისგან გადაეცა, ჯამში, 3 500 ლარის ოდენობის იქნებოდა“.

ბათუმის მერიაში „ბათუმელებს“ უთხრეს, რომ სამშენებლო კომპანია „ნევბათუმი“ პრობლემური სამშენებლო კომპანიების სიაშია და 16-სართულიანი კორპუსი შესაძლოა მერიამ არც ჩაიბაროს, როგორც დასრულებული მშენებლობა.

„შპს ნევბათუმს მშენებლობის ეტაპების დადასტურებაც კი პრობლემატური აქვს,“ – ამბობს ირაკლი მოქია, ბათუმის მერიის სამშენებლო საქმიანობაზე სახელმწიფო ზედამხედველობის განყოფილების უფროსი.

მისივე თქმით, კომპანიას 2018-2019 წლებში ზედამხედველობის სამსახურიდან 4 მითითება აქვს მიცემული და კომპანია თორმეტჯერაა დაჯარიმებული ჯამში 13 ათასი ლარით – სამშენებლო ნებართვის პირობების დარღვევის, მშენებლობის არასწორად წარმოების და შეჩერებული მშენებლობის თვითნებურად გაგრძელების გამო.

ამჯერადაც ,,ნევბათუმის“ მშენებარე კორპუსს ანგისის ქუჩა #13 ში არ აქვს სამშენებლო ნებართვის დაფა გამოკრული. მერიის ზედამხედველობის სამსახურის მიერ შეჩერებულია სამუშაოები, თუმცა როგორც რომან დუმბაძე გვეუბნება, ფასადის მოსაპირკეთებელი სამუშაოები მაინც არ ჩერდება.

რომან დუმბაძე ამბობს, რომ კომპანიის წინააღმდეგ ის სასამართლოს გზით ბრძოლას აპირებს. რომანი „დემოკრატიის ინსტიტუტის“ „ყოფილი პატიმრების გაძლიერების პროექტის“ ბენეფიციარია. სარჩელისა და საჭირო დოკუმენტების მომზადებაში მას სწორედ ამ პროგრამის ფარგლებში ეხმარება იურისტი რამინ გვარიშვილი.

„ჩვენს ბენეფიციარს სამშენებლო ნორმების დარღვევაზე აქვს პრეტენზია. აშკარაა, რომ ირღვევა მისი, როგორც მესაკუთრის უფლება, მშენებლობის ნებართვის დროს მერიამ არ გაითვალისწინა მეზობელი მესაკუთრის ინტერესი. კარისა და ფანჯრის ღიობები დუმბაძის საკუთრების მხარესაა განთავსებული, რასაც არ ითვალისწინებდა სამშენებლო ნებართვა. გარდა ამისა, შენობა არ არის დასმული იმ წერტილებში, სადაც ნებართვაა გაცემული. ჩვენი მხრიდან ადმინისტრაციული საჩივარია მომზადებული მერიაში. საჩივრის განხილვა მერიაში ახლა მიმდინარეობს.

დუმბაძეს შეეზღუდა საკუთრების გამოყენების უფლება, მისმა სახლმა დაკარგა ფასი და მას რეალური მოთხოვნები აქვს,“ – ამბობს იურისტი რამინ გვარიშვილი.

მისივე თქმით, შესაძლოა სამშენებლო კომპანიამ გადასცა რომან დუმბაძეს სახურავის ნაწილი ზიანის ასანაზღაურებლად, მაგრამ ეს საქმის მეორე ნაწილია – ზიანის ანაზღაურება, იქამდე კი საინჟინრო ექსპერტიზის მიერ ზიანის ზუსტი რაოდენობა უნდა განისაზღვროს, და მხოლოდ შემდეგ გახდება ცნობილი, რა ზარალი უნდა აუნაზღაუროს კომპანიამ დაზარალებულს. მთავარი კი ამ საქმეში საკუთრების უფლების შელახვის, საკუთრების გამოყენების შეზღუდვის ნაწილია.

______________________________

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.