საზოგადოებრივი მაუწყებლის აჭარის ტელევიზიის და რადიოს ახალი დირექტორი აპირებს, რომ 5 მოადგილე ჰყავდეს. ამის შესახებ გიორგი კოხრეიძემ მრჩეველთა საბჭოს სხდომაზე განაცხადა, რომელიც დღეს, 26 დეკემბერს, ჩატარდა. მრჩეველთა საბჭოს აჭარის ტელევიზიისა და რადიოს დირექტორი სტრუქტურულ რეორგანიზაციას სთავაზობს. ამ დრომდე აჭარის ტელევიზიისა და რადიოს დირექტორს 2 მოადგილე ჰყავდა.
„დებულებაში საკმაოდ ნათლად გაწერილია თითოეული სტრუქტურის და რგოლის ფუნქცია, რით უნდა იყოს დაკავებული, რა პასუხისმგებლობაა, შემოტანილია 5 დირექტორის მოადგილის თანამდებობა, ეს იმისთვის, რომ ჩემთვის, დირექტორისთვის, ჩემი დაკვირვებიდან გამომდინარე რაც ჩანს, უფრო იოლი რომ გახდეს მართვისთვის ეს ორგანიზაცია…“ – აღნიშნა გიორგი კოხრეიძემ.
აჭარის ტელევიზიის დირექტორის განმარტებით, ხუთი მოადგილე ხუთ მიმართულებას გაუწევს კურირებას, რომელიც აქამდე სამსახურების სახით არსებობდა ტელევიზიაში: პროგრამული განვითარება, საინფორმაციო, ტექნიკური, შემოქმედებითი და მიმდინარე მაუწყებლობა.
დებულების პროექტი ამ დრომდე გასაჯაროვებული არ არის. მისი დამტკიცების შემთხვევაში, რეორგანიზაცია ტელევიზიის 69 თანამშრომელს შეეხება. გიორგი კოხრეიძემ მრჩეველთა საბჭოს წევრებს ასევე უთხრა, რომ გარე ჩარევები და განხილვები პროცესს დააზიანებს, თუმცა წინააღმდეგი არ არის, დებულების პროექტის მრჩეველთა საბჭოს ოფიციალურ ინტერნეტგვერდზე გამოქვეყნდეს.
„ამას აღიარებდა წინა მენეჯმენტი, რომ სტრუქტურა არის შესაცვლელი,“ – დასძინა გიორგი კოხრეიძემ.
აჭარის ტელევიზიის დირექტორმა ასევე თქვა, რომ ერთ-ერთი მოადგილე საინფორმაციო მიმართულებით იმუშავებს, თუმცა მისივე თქმით, მუშაობაში ჩარევის უფლება არავის ექნება: „მათ შორის დირექტორსაც ეკრძალება მონაწილეობა მიიღოს სარედაქციო ჯგუფის მუშაობაში“.
აჭარის ტელევიზიის დირექტორმა ნათია ზოიძეს, რომელიც ამჟამად დირექტორის მოადგილეა, მხოლოდ „ანგარიშების შედგენის“ ფუნქცია დაუტოვა – ეს ამბავი 23 დეკემბერს მოხდა. მანამდეც გიორგი კოხრეიძე მიიჩნევდა, რომ დირექტორის მოადგლეს სარედაქციო პოლიტიკის მართვის უფლება არ ჰქონდა, თუმცა არ უთქვამს, რომელი სამართლებრივი ნორმის საფუძველზე ამბობდა ამას.
