2019 წლის ზაფხულის გამოცდაზე, სადაც პედაგოგობის მსურველ პირებს საგნობრივი კომპეტენცია უნდა დაედასტურებინათ, 73-მა პროცენტმა, ანუ 6 568 პირმა ვერ დაადასტურა.
შეფასებისა და გამოცდების ეროვნული ცენტრის ინფორმაციით, პროფესიული კომპეტენციის დამადასტურებელ საგნობრივ გამოცდაში 8 896 პირი მონაწილეობდა. აქედან უმრავლესობამ ვერ გადალახა 40- 60-პროცენტიანი ბარიერი. ცენტრის ინფორმაციით, ესენი არიან როგორც პედაგოგობის მსურველი, ასევე ის პირები, ვინც სხვა საგანში აპირებდა კომპეტენციის დადასტურებას.
გამოცდაზე გასულთაგან საგნობრივი კომპეტენცია მხოლოდ 2 328 პირმა დაადასტურა. საგნობრივი კომპეტენციის გამოცდაზე ზოგმა პედაგოგობის მსურველმა 1 ქულა, ზოგიერთმა კი 7-ზე ნაკლები ქულა მიიღო.
ზაფხულის გამოცდას საგნობრივი და პროფესიული კომპეტენციის დასადასტურებლად უკვე მოქმედი პედაგოგებიც აბარებდნენ, მათ შორის პენსიონერი პრაქტიკოსი პედაგოგები.
მათგან რამდენმა შეძლო უფროსი მასწავლებლის სტატუსის მისაღებად საჭირო კრედიტქულების დაგროვება, ჯერ ამის შესახებ დაზუსტებული ინფორმაცია მასწავლებლის პროფესიული განვითარების ეროვნულ ცენტრს არ აქვს.
პენსიონერი პრაქტიკოსი მასწავლებლებისთვის პროფესიული ჯილდოს შეთავაზების შემდეგ, პროფესიიდან გასვლის სურვილი 11 ათასამდე პრაქტიკოსმა პენსიონერმა პედაგოგმა გამოთქვა, რის შემდეგაც საჯარო სკოლებში ვაკანსიები გაჩნდა.
პრაქტიკოსი პედაგოგების ნაწილმა კი გადაწყვიტა საგნობრიბრივი კომპეტენცია ზაფხულის გამოცდებზე დაედასტურებინა, თუმცა ჯერ არ არის ცნობილი, საბოლოოდ რამდენმა პენსიონერმა პედაგოგმა შეძლო საჭირო რაოდენობის კრედიქტულების დაგროვება სტატუსის შესაცვლელად.
ამ დროისთვის საჯარო სკოლებში არსებულ ვაკანსიებზე კონკურსი მიმდინარეობს.
![ბათუმში მეზღვაურთა საერთაშორისო დღე აღინიშნება, რისთვისაც ნახევარი მილიონი ლარი დაიხარჯება [ფოტო]](https://batumelebi.netgazeti.ge/wp-content/uploads/2026/06/11.png "ბათუმში მეზღვაურთა საერთაშორისო დღე აღინიშნება, რისთვისაც ნახევარი მილიონი ლარი დაიხარჯება [ფოტო]")
