აჭარის უმაღლესი საბჭოს როიგგარეშე სესია დღეს, 8 იანვარს, ბათუმის საკრებულოს სხდომათა დარბაზში ჩატარდება.
აჭარის ავტონომიური რესპუბლიკის უმაღლესი საბჭოს სხდომები, ახალ შენობაში სასესიო დარბაზის მზადყოფნამდე, ქალაქ ბათუმის საკრებულოს ან უმაღლესი საბჭოს ყოფილი შენობის (მისამართი: დაბა ჩაქვი, ვ. მეგენეიშვილის ქ. N 25) სხდომათა დარბაზებში გაიმართება.
გადაწყვეტილება, სხდომის უმაღლესი საბჭოს ადგილსამყოფელის – იურიდიული მისამართის გარეთ გამართვის შესახებ, უმაღლესი საბჭოს ბიუროს სხდომაზე დღეს, 8 იანვარს, მიიღეს.
რიგგარეშე სესიის დღის წესრიგში სამი საკითხია შეტანილი. მათ შორისაა საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს წევრის – მრჩევლის არჩევა.
საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს მეხუთე კანდიდატად „ნაციონალურმა მოძრაობამ“ იურისტი გია ქარცივაძე დაასახელა, რომელიც ამჟამად აჭარის საზოგადოებრივი მაუწყებლის ადამიანური რესურსების მართვის სამსახურის უფროსია. თუ კი უმაღლესი საბჭოს 11 წევრი გია ქარცივაძის კანდიდატურას მხარს დაუჭერს, ქარცივაძე მაუწყებლის მრჩეველთა საბჭოს მეხუთე წევრი გახდება.
თუმცა, ყოფილმა ოთხმა კონკურსანტმა, 6 იანვარს, შუამდგომლობით მიმართა ბათუმის საქალაქო სასამართლოს და მრჩევლის არჩევის პროცესის შეჩერება მოითხოვა.
ბათუმის საქალაქო სასამართლოში „ბათუმელებს“ უთხრეს, რომ საკითხი მოსამართლე ჯუმბერ ბეჟანიძემ უნდა განიხილოს, რომელსაც განხილვის სამდღიანი ვადა აქვს. „ეს ვადა 9 იანვარს იწურება. ამ დროისთვის [12:00 საათი] საკითხზე რაიმე გადაწყვეტილება მიღებული არ არის“ – გვითხრეს სასამართლოში.
