აჭარის უმაღლესი საბჭოს რიგგარეშე სესია ხვალ, 8 იანვრისთვისაა ჩანიშნული, თუმცა სესიის ჩატარების ადგილი გადაწყვეტილი არ არის. უმაღლესი საბჭოს ახალ შენობაში ხვალ დილით ბიუროს სხდომა გაიმართება, რომელიც სესიის ჩატარების ადგილს განსაზღვრავს.
„ბათუმელების“ ინფორმაციით, რიგგარეშე სესია შესაძლოა ბათუმის საკრებულოს სხდომათა დარბაზში ჩატარდეს.
ბიურო ერთ საკითხს განიხილავს – „აჭარის უმაღლესი საბჭოს 2020 წლის 8 იანვრის რიგგარეშე სესიის უმაღლესი საბჭოს ადგილსამყოფლის – იურიდიული მისამართის გარეთ გამართვის შესახებ“. როგორც ცნობილია უმაღლესმა საბჭომ მისამართი შეიცვალა და ჩაქვიდან ბათუმში [ყოფილი ხელოვნების სასწავლებლის შენობაში] გადმოვიდა, თუმცა სხდომათა დარბაზი სესიის ჩასატარებლად მზად არ არის.
ბიუროს სხდომა დილის 11 საათისთვისაა ჩანიშნული, ხოლო სესია 12:00 საათიდან
რიგგარეშე სესიის დღის წესრიგში სამი საკითხია შეტანილი:
[checklist]
- კანონპროექტი აჭარის სიმბოლოების გამოყენების წესის შესახებ – მესამე მოსმენა
- საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს წევრის – მრჩევლის არჩევა
- უმაღლესი საბჭოს აგრარულ და გარემოს დაცვის საკითხთა კომიტეტის ანგარიში – 2018 წლის პირველი სექტემბრიდან 2019 წლის პირველ სექტემბრამდე გაწეული მუშაობის შესახებ.
[/checklist]
საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს მეხუთე კანდიდატად „ნაციონალურმა მოძრაობამ“ იურისტი გია ქარცივაძე დაასახელა, რომელიც ამჟამად აჭარის საზოგადოებრივი მაუწყებლის ადამიანური რესურსების მართვის სამსახურის უფროსია. თუ კი უმაღლესი საბჭოს 11 წევრი გია ქარცივაძის კანდიდატურას მხარს დაუჭერს, ქარცივაძე მაუწყებლის მრჩეველთა საბჭოს მეხუთე წევრი გახდება.
ამ თემაზე:
აჭარის მაუწყებლის მრჩეველთა საბჭოს წევრობის მეხუთე კანდიდატად გია ქარცივაძე დაასახელეს
