Batumelebi | ნათია ზოიძის წინააღმდეგ აჭარის ტელევიზიის დირექტორმა დისციპლინური საქმისწარმოება შეწყვიტა ნათია ზოიძის წინააღმდეგ აჭარის ტელევიზიის დირექტორმა დისციპლინური საქმისწარმოება შეწყვიტა – Batumelebi
RU | GE  

ნათია ზოიძის წინააღმდეგ აჭარის ტელევიზიის დირექტორმა დისციპლინური საქმისწარმოება შეწყვიტა

აჭარის ტელევიზიის დირექტორის მოადგილის, ნათია ზოიძის წინააღმდეგ ტელევიზიის ახალმა დირექტორმა დისციპლინური საქმისწარმოება შეწყვიტა. საქმე ეხება არქივის მასალების გაცემას. გიორგი კოხრეიძე, აჭარის ტელევიზიის დირექტორი მიიჩნევდა, რომ მაშინ, როცა ნათია ზოიძე ტელევიზიის დირექტორის მოვალეობას ასრულებდა, არქივის მასალები კანონდარღვევით გაიცა.

„მაუწყებლის არქივიდან მასალების გაცემასთან დაკავშირებული პროცესის მართვის არათანმიმდევრულობა ცხადყოფს, რომ მაუწყებლის მიერ შესამუშავებელია საარქივო მასალის გაცემის წესი, რითაც დარეგულირდება პასუხისმგებელი პირების უფლებამოსულება, ვალდებულებები და საარქივო მასალის გაცემის პროცედურა,“ – აღნიშნულია ბრძანებაში, რომელსაც გიორგი კოხრეიძე აწერს ხელს.

ბრძანებაში არაა განმარტებული, რატომ იყო არათანმიმდევრული ნათია ზოიძის გადაწყვეტილება არქივის მასალის გაცემის დროს, თუკი არქივის მასალების გაცემის წესი არ არსებობდა.

დავის საგანი არქივის ის მასალებია, რომელიც ტელევიზიის მრჩეველთა საბჭოს ყოფილი წევრი – ბეჟან გობაძე ითხოვდა. ბრძანების მიხედვით, გობაძეს მასალების ნაწილი საფასურის გარეშე მისცეს.

ამავე ბრძანების მიხედვით, გიორგი კოხრეიძემ იურიდიული მხარდაჭერის სამსახურს დაავალა „მაუწყებელში უზრუნველყოს დაცული საარქივო მასალის გაცემის წესის შესახებ დოკუმენტის შემუშავება“.

დისციპლინური საქმისწარმოება 6 დეკემბერს დაიწყო გიორგი კოხრეიძემ, რომელიც აჭარის ტელევიზიის დირექტორად 22 ნოემბერს აირჩიეს. ეს ერთ-ერთი საკითხია მათ შორის, რის გამოც ნათია ზოიძე მიიჩნევს, რომ მას ტელევიზიის ახალი დირექტორი დევნის და მან პროკურატურას 14 დეკემბერს მიმართა.

ნათია ზოიძე გიორგი კოხრეიძემ სარედაქციო პოლიტიკას უკვე ჩამოაშორა. მას მხოლოდ ანგარიშების შედგენის ფუნქცია დაუტოვეს.

ნეტგაზეთის მასალების სხვა გამოცემებში გადაბეჭდვის წესი
ავტორი