აჭარის განათლების სამინისტროს კონკურსები სადაც განაცხადების მიღება 8 იანვარს დაიწყება


აჭარის განათლების, კულტურისა და სპორტის სამინისტროს მიერ გამოცხადებულ რამდენიმე კონკურსში განაცხადების მიღება 2020 წლის 8 იანვარს დაიწყება.

კონკურსები გამოცხადებულია სეზონური სკოლის ორგანიზებაზე, კონფერენციის მოწყობაზე, სამეცნიერო ღონისძიებებში მონაწილეობასა და კვალიფიკაციის ამაღლება/სტაჟირებაზე, სადაც განაცხადების მიღება იწარმოებს 2020 წლის 8 იანვრიდან 6 მარტის ჩათვლით.

საჯარო ლექციების მოწყობაზე გამოცხადებულ კონკურსში კი, აპლიკაციებს, სხვადასხვა დროს, სამინისტრო ორ ეტაპად მიიღებს.

სამინისტროს ინფორმაციით, ამ დღეებში გამოცხადდება კონკურსი უცხოენოვანი სამეცნიერო/სახელმძღვანელო ლიტერატურის თარგმნა/ბეჭდვაზე.

კონკურსები „უმაღლესი განათლების ხელშეწყობის“ ქვეპროგრამის ფარგლებშია გამოცხადებული.

სეზონური სკოლა

სეზონური სკოლის ორგანიზების ფარგლებში აჭარის განათლების სამინისტრო დააფინანსებს აჭარის ავტონომიურ რესპუბლიკაში სეზონური სკოლ(ებ)ის ორგანიზებას. პროგრამაში მონაწილეობა შეუძლიათ საქართველოში რეგისტრირებულ საჯარო სამართლის იურიდიულ პირებს და არასამეწარმეო (არაკომერციულ) იურიდიულ პირებს.

დაფინანსება გაიცემა გრანტის სახით, ერთ განაცხადზე არაუმეტეს 25 000 ლარისა.

კონფერენციის მოწყობა

კონფერენციის მოწყობის ფარგლებში სამინისტრო დააფინანსებს აჭარის ავტონომიურ რესპუბლიკაში კონფერენცი(ებ)ის მოწყობას. პროგრამაში მონაწილეობა შეუძლიათ საქართველოში რეგისტრირებულ საჯარო სამართლის იურიდიულ პირებს და არასამეწარმეო (არაკომერციულ) იურიდიულ პირებს.

დაფინანსება გაიცემა გრანტის სახით, ერთ განაცხადზე არაუმეტეს 40 000 ლარისა.

სამეცნიერო ღონისძიებებში მონაწილეობა

კონკურსში მონაწილეობის მიღება შეუძლიათ აჭარის ტერიტორიაზე მოქმედ აკრედიტირებულ უმაღლეს საგანმანათლებლო და სამეცნიერო-კვლევით დაწესებულებებში მუდმივად ან ხელშეკრულებით მომუშავე მეცნიერებს – აკადემიური ხარისხის (მაგისტრი, დოქტორი) ან სამეცნიერო წოდების (მეცნიერებათა კანდიდატი, მეცნიერებათა დოქტორი) მქონე საქართველოს მოქალაქეებს; აგრეთვე მაგისტრანტებსა და დოქტორანტებს, რომლებიც განაცხადის წარდგენის პერიოდში სწავლობენ ზემოთაღნიშნული იურიდიული სტატუსის მქონე ორგანიზაციებში.

პროგრამის მონაწილე მიიღებს ფინანსურ დახმარებას არაუმეტეს 3 000 ლარის ოდენობით გრანტის სახით, რომელშიც შეიძლება შევიდეს მგზავრობის, ვიზის, ცხოვრებისა და სხვა ხარჯები.

კვალიფიკაციის ამაღლება

კონკურსში მონაწილეობის მიღება შეუძლიათ აჭარის ტერიტორიაზე მოქმედ აკრედიტირებულ უმაღლეს საგანმანათლებლო და სამეცნიერო-კვლევით დაწესებულებებში მუდმივად ან ხელშეკრულებით მომუშავე მეცნიერებს – აკადემიური ხარისხის (მაგისტრი, დოქტორი) ან სამეცნიერო წოდების (მეცნიერებათა კანდიდატი, მეცნიერებათა დოქტორი) მქონე საქართველოს მოქალაქეებს; აგრეთვე მაგისტრანტებსა და დოქტორანტებს, რომლებიც განაცხადის წარდგენის პერიოდში სწავლობენ ზემოთაღნიშნული იურიდიული სტატუსის მქონე ორგანიზაციებში.

კვალიფიკაციის ამაღლების/სტაჟირების მიზნით აპლიკანტი სამინისტროსგან მიიღებს ფინანსურ დახმარებას გრანტის სახით არაუმეტეს 8 000 ლარისა წარმოდგენილი სავარაუდო ხარჯთაღრიცხვის მიხედვით.

საჯარო ლექციები

ამ კონკურსში მონაწილეობის მიღების უფლება აქვთ: საქართველოში რეგისტრირებულ საჯარო სამართლის იურიდიულ პირს; საქართველოში რეგისტრირებულ არასამეწარმეო (არაკომერციულ) იურიდიულ პირს.

სამინისტროდან მოთხოვნილი გრანტის ოდენობა არ უნდა აღემატებოდეს 3 000 ლარს.

აპლიკაცია მიიღება ორ ეტაპად:

  • პირველი ეტაპი – აპლიკაციის მიღების ვადა: 2020 წლის 15 იანვარი – 28 თებერვალი. საჯარო ლექციის ჩატარების ვადა: 2020 წლის 01 აპრილი – 31 აგვისტო;
  • მეორე ეტაპი -აპლიკაციის მიღების ვადა: 2020 წლის 01 აპრილი – 20 მაისი. საჯარო ლექციის ჩატარების ვადა: 2020 წლის 01 სექტემბრი – 5 დეკემბერი.

აღნიშნულ კონკურსებთან დაკავშირებული დეტალური ინფორმაციებისთვის გადადით ამ ბმულზე.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com