ფსიქიკური აშლილობის მქონე შშმ პირები სტაციონარის ნაცვლად კვარიათში, საცხოვრისში იმკურნალებენ

ფსიქიკური სერვისების მიმღები პირები სტაციონარის ნაცვლად ოჯახურ გარემოში, საცხოვრისში გააგრძელებენ მკურნალობას. აჭარის ჯანდაცვის სამინისტროს ინფორმაციით, საუბარია ბენეფიციარებზე, რომლებსაც სოციალური და დამოუკიდებელი ცხოვრებისთვის საჭირო უნარ-ჩვევები გააჩნიათ.

რამდენიმე დღეა 24 ბენეფიციარი კვარიათში, ბათუმის სამედიცინო ცენტრის მიერ დაქირავებულ შენობაში დროებით გადაიყვანეს. ცენტრს, ფინანსურ მხარდაჭერას სამინისტრო უწევს. 2020 წლის მაისიდან კი, ბათუმის სამედიცინო ცენტრი, საკუთარი ფინანსებით, საცხოვრისის მშენებლობას ფრიდონ ხალვაშის გამზირზე გეგმავს.

ბათუმის სამედიცინო ცენტრის ინფორმაციით საცხოვრისში მოხვედრის კრიტერიუმები სამინისტროს პროგრამაშია გაწერილი და იქ, ვერ მოხდება ისეთი პაციენტები, რომლებსაც დაავადების სირთულის გამო აუცილებლად ესაჭიროებათ მკურნალობა სტაციონარში.

„ბენრფიციართა საცხოვრისით უზრუნველყოფისათვის წელს პირველად აჭარის ჯანდაცვის სამინისტრომ სპეციალური პროგრამა აამოქმედა. „ფსიქიკური აშლილობის მქონე შშმ პირთა საცხოვრისით უზრუნველყოფის“ პროგრამა სახალხო დამცველის აპარატისა და უმაღლესი საბჭოს რეკომენდაციით შეიმუშავა. პროგრამის ბიუჯეტი 307 440 ლარს შეადგენს. პროგრამა ბათუმის სამედიცინო ცენტრის ბაზაზე ხორციელდება“ – აცხადებს სამინისტრო.

სამინისტროს ინფორმაციით, „24 ბენეფიციარზე გათვლილ და შესაბამისი კვალიფიკაციის მქონე ადამიანური რესურსით დაკომპლექტებულ ოჯახურ გარემოში ფსიქიკური სერვისების მიმღებ პირებს სოციუმთან აქტიური კომუნიკაციის, საოჯახო საქმეებში ჩართვის, თავის მოვლის, სხვადასხვა შრომითი აქტივობისა და სეირნობის შესაძლებლობა ექნებათ, რაც ხელს შეუწყობს დამოუკიდებელი უნარების შენარჩუნება-განვითარებას და მათ საზოგადოებაში ინტეგრაციას“.

საცხოვრისი, მომსახურებას განახორციელებს 24 საათის განმავლობაში: სამჯერადი კვება, ბენეფიციარების უზრუნველყოფა პირადი ჰიგიენის ნივთებით, ბენეფიციარის საჭიროებებისა და ინტერესების შესაბამისად აღჭურვილი ფიზიკური გარემო, სხვადასხვა აქტივობების და გასართობი თუ სხვა ღონისძიებების მიწოდება. პაციენტებს ფსიქო-სოციალური რეაბილიტაცია ჩაუტარდებათ მულტიდისციპლინარული გუნდის მიერ შედგენილი ინდივიდუალური ზრუნვის გეგმის შესაბამისად.

„პრაქტიკამ აჩვენა, რომ ფსიქიკური პრობლემების მქონე ადამიანების საოჯახო ტიპის საცხოვრისში გადაყვანა და მათ მიმართ მხარდაჭერა დამოუკიდებელი გადაწყვეტილებების მიღებას და მათი ცხოვრების ცხოვრების ხარისხის გაუმჯობესებას უწყობს ხელს“ – აცხადებს სამინისტრო.

ფსიქიკური აშლილობის მქონე შშმ პირთა საცხოვრისი კვარიათში / ფოტო: ჯანდაცვის სამინისტრო

ფსიქიკური აშლილობის მქონე შშმ პირთა საცხოვრისი კვარიათში / ფოტო: ჯანდაცვის სამინისტრო

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com