Batumelebi

ბათუმში, ფრიდონ ხალვაშის გამზირზე, 10 ევკალიპტს ჭრიან. ბათუმის გამწვანებისა და ლანდშაფტური დაგეგმარების სამსახურის ინფორმაციით, ამჟამად მიმდინარეობს ხეების გადაბელვა და ამ პროცესში გაიჩეხება დაზიანებული და გამხმარი ხეები.

„ზამთრის სეზონთან დაკავშირებით ხდება გონიო-კვარიათისა და ხელვაჩაურის მიმართულებით არსებული ევკალიპტის ხეების მონიტორინგი. საუბარია დაზიანებულ და ხმელ ხეებზე, რომლებიც ზამთრის სეზონთან დაკავშირებით შეიძლება ქარში, გრიგალში მოიგლიჯოს და ამას მსხვერპლი მოჰყვეს. ჯერ ხდება ხე-მცენარეების გადაბელვა, საუბარია ხმელ, ავარიულ ხეებზე და თუ საჭიროებაა, ხე მოიჭრება.

ხშირად მოქალაქეებიც მოგვმართავენ იმ ხეებთან დაკავშირებით, რომლებიც საცხოვრებელ სახლს საფრთხეს უქმნიან და არის შემთხვევები, როცა ამოწმებს მონიტორინგის ჯგუფი. თუ ხე გზის სავალი ნაწილისკენაა დახრილი, ასეთ ხეებს ჩვენ აღვრიცხავთ და ვახდენს მის აღებას,“ – გვითხრეს გამწვანებისა და ლანდშაფტური დაგეგმარების სამსახურში.

ამავე სამსახურში ამბობენ, რომ წლების წინ ევკალიპტის ხეები ბათუმის შემოგარენში ერთდროულად გაშენდა, ახლა ხეები უკვე დაძველდა და ეს არის ევკალიპტის ხეების ხშირი ხმობის მიზეზი. იგეგმება თუ არა ამავე ადგილებში, მოჭრილი ხე-მცენარეების დარგვა? – გამწვანების სამსახურში ამბობენ, რომ სამომავლოდ ეს იგეგმება, თუმცა როდის – არ აკონკრეტებენ.

____________

ფოტო: „ბათუმელები“/როინ გუნდაძე

მერაბ პ. ქედაში ცხოვრობს. მას პარკინსონის დაავადება აქვს და როგორც სოციალურად დაუცველი, 1-ლარიანი წამლების პროგრამაშია ჩართული. ექიმმა მას მედიკამენტები: „პარკინისა“ და „ნაკომის“ მარაგი ამოეწურა და რადგან ამ დასახელების მედიკამენტები პროგრამის ფარგლებში არ ჰქონდათ, ამბობს, რომ აფთიაქში მას შემცვლელი მედიკამენტი მისცეს.

„მედიპარკინი“ მომცეს, მაგრამ ეს სუსტი წამალი გამოდგა – არ იმოქმედა. ვისესხე 150 ლარი და იმით 100 ცალი „პარკინი“ ვიყიდე. 3-4 დღის წამალი დამრჩა“, – გვიყვება მერაბი.

მერაბის თქმით, ქედაში „ფარმადეპოს“ აფთიაქს არემონტებენ, ამიტომ არ იცის, სად უნდა მივიდეს მედიკამენტის ასაღებად. არც ის იცის, რომ 1-ლარიანი პროგრამის ფარგლებში მედიკამენტი „ნაკომი“ აფთიაქებში არ არის. „3 თვის მაქვს მისაღები, მივალ და ავიღებო“, – გვითხრა მან.

თითქმის მეორე თვეა, რაც აჭარაში პარკინსონით დაავადებული ადამიანები ვერ იღებენ სახელმწიფო პროგრამის ფარგლებში საჭირო მედიკამენტ – „ნაკომს“. სოციალური მომსახურების სააგენტოში „ბათუმელებს“ უთხრეს, რომ მიმდინარეობს მედიკამენტის შესყიდვის პროცედურები. საქართველოს ჯანდაცვის სამინისტროს ინფორმაციით კი, „ნაკომი“ პროგრამის ფარგლებში კიდევ ერთი თვის განმავლობაში არ იქნება. „შეიქმნა დეფიციტი“, – გვითხრეს სამინისტროში.

პარკინსონით დაავადებულთათვის კი „ნაკომის“ ყოველდღიურად მიღება აუცილებელია.

„თუ პაციენტი იღებს „ნაკომს“, ამ პრეპარატის მიღება მისთვის სასიცოცხლოდ მნიშვნელოვანია. აუცილებლად უნდა მიიღოს. მაგალითად, როგორც დიაბეტიან ავადმყოფს ესაჭიროება „ინსულინი“, ესეც ასეა, დაახლოებით. „ნაკომის“ შემცვლელი პრეპარატები სხვადასხვა დასახელების არსებობს. ძირითადი აქტიური ნივთიერება არის ლევოდოპა და პრეპარატი, რომელიც ამ ნივთიერებას შეიცავს, ფაქტობრივად არის „ნაკონის“ შემცვლელი, თუმცა, გააჩნია დოზას“, – ამბობს ნევროლოგი მიხეილ მჟავანაძე.

„2019 წლის 12 აგვისტოს შემდგომ მიმდინარეობს ბაზრის მოკვლევა და შესყიდვის პროცედურები, რომელსაც ახორციელებს სახელმწიფო შესყიდვების სააგენტო. მედიკამენტის გაცემა განახლდება ტენდერით გამოვლენილ გამარჯვებულთან ხელშეკრულების გაფორმების შემდგომ“, – მოგვწერეს სოციალური მომსახურების სააგენტოდან.

სწორედ ეს სააგენტო აწვდიდა ზოგიერთი ქრონიკული დაავადების მქონე პირებს მედიკამენტებს სახელმწიფო პროგრამის ფარგლებში. პროგრამის ფარგლებში ბენეფიციარებს წამლების მიღება აჭარაში შემდეგ აფთიაქებში შეუძლიათ:

„ქრონიკული დაავადებების სამკურნალო მედიკამენტებით უზრუნველყოფის“ სახელმწიფო პროგრამის  ფარგლებში პარკინსონის დაავადების სამკურნალოდ გაიცემა მედიკამენტი კარბიდოპა/ლევოდოპა 220მგ/25მგ – „ნაკომი“, რომელიც დღეის მდგომარეობით [23 ოქტომბერი] ნაშთის სახით, 5 716 აბი, განთავსებულია 14 აფთიაქში ქვეყნის მასშტაბით. შესაბამისად, პრეპარატის გაცემა არ შეწყვეტილა“, – გვითხრეს სოციალური მომსახურების სააგენტოში.

ჯანდაცვის სამინისტროს ინფორმაციით კი, ამ 14 აფთიაქიდან არც ერთი არ მდებარეობს აჭარაში. შესაბამისად, რეგიონში მცხოვრები ბენეფიციარები მედიკამენტის გარეშე იქამდე დარჩებიან, ვიდრე შესყიდვის მინიმუმ ერთთვიანი პროცედურები არ დასრულდება.

სააგენტოს ინფორმაციით, 2018 წელს სოციალური მომსახურების სააგენტოს მიერ გამოცხადებული სახელმწიფო ტენდერის საშუალებით შესყიდული იქნა 525 600 აბი „ნაკომი“. მომწოდებელი იყო კომპანია შპს „პსპ ფარმა“ [კომპანიასთან ხელშეკრულება 304 848 ლარზე გაფორმდა].

2019 წელს კი, ფარმაცევტული პროდუქტი კონსოლიდირებული ტენდერის გზით იყიდა სსიპ სახელმწიფო შესყიდვების სააგენტომ. სოცსააგენტოს ინფორმაციით, დამატებით შესყიდულია 200 000 აბი „ნაკომი“. მომწოდებელი სს „გეფა“ [კომპანიის მიერ შეთავაზებული ფასი 102 000 ლარი].

სოციალური მომსახურების სააგენტოს განცხადებით, „ორივე მომწოდებელს ვალდებულებები, საქონლის მოწოდებასთან დაკავშირებით, შესრულებული აქვს“.

2019 წლის 6 მარტს შესყიდვების სააგენტომ „ნაკომის“ მიწოდებაზე კომპანია „გეფა“ კიდევ ერთ კონსოლიდირებულ ტენდერში გამოავლინა გამარჯვებულად. ამ ტენდერით კომპანიას სახელმწიფო უწყებებისთვის 175 548 აბი „ნაკომი“ [comb. Drug (Levodopa, Carbidopa), 250მგ/25მგ] უნდა მიეწოდებინა.

კომპანია „გეფაში“ „ბათუმელებს“ უთხრეს, რომ ტენდერით ნაკისრი ეს ვალდებულებაც შესრულებული აქვთ.

საქართველოს ჯანდაცვის სამინისტროს ინფორმაციით, მათ მიერ მოთხოვნა ახალი კონსოლიდირებული ტენდერის ჩატარებაზე შესყიდვების სააგენტოში გადაგზავნილია.

შესყიდვების პორტალის მიხედვით, „ნაკომის“ შეძენაზე ახალი კონსოლიდირებული ტენდერი ამ დრომდე გამოცხადებული არ არის.

რა ეტაპზეა მედიკამენტ „ნაკომის“ [კარბიდოპა/ლევოდოპა 220მგ/25მგ] შესაძენად კონსოლიდირებული ტენდერის გამოცხადება? – ამ კითხვით სახელმწიფო შესყიდვების სააგენტოს მივმართეთ. სააგენტოსთვის ასევე გვინდოდა გვეკითხა, რატომ ვერ გაითვალისწინეს „ნაკომის“ მომხმარებლების სასიცოცხლო რისკები და აქამდე რატომ ვერ გამოაცხადეს ტენდერი. თუმცა სააგენტოში გვითხრეს, რომ ზეპირსიტყვიერად ინფორმაციას არ მოგვაწვდიან და წერილობით უნდა მივმართოთ.

კიდევ ერთი დეტალი, პარკინსონით დაავადებულთათვის „ნაკომის“ გაცემას ბათუმის მერია ქალაქში მცხოვრებ 55-მდე ბენეფიციარისთვის დამოუკიდებლად უზრუნველყოფდა. მერიამ თავად ჩაატარა ტენდერი, თუმცა, ზემოთ აღნიშნული სახელმწიფო პროგრამის [„წამლები 1 ლარად“] ამოქმედების გამო იძულებული გახდა ხელშეკრულება ტენდერში გამარჯვებულთან შეეწყვიტა.

„აგვისტოს თვეში გავეცით აღნიშნული მედიკამენტი. სექტემბრის თვიდან კი მომწოდებელთან ხელშეკრულება შევწყვიტეთ, ვინაიდან იმავე ბენეფიციარებმა სახელმწიფო პროგრამით უნდა ისარგებლონ“, – გვითხრეს მერიაში.

შესაბამისად, ვიდრე სახელმწიფო ტენდერს გამოაცხადებს და გამარჯვებულს გამოავლენს, სოციალურად დაუცველ პაციენტებს, მაგალითად, აჭარაში, თავად მოუწევთ ზრუნვა წამლისთვის საყიდელი ფინანსების მოძიებაზე.

„ბათუმელებისთვის“ ჯერჯერობით უცნობია, რა ვითარებაა „ნაკომის“ მიწოდების მხრივ ქვეყნის სხვა რეგიონებში.

ამ თემაზე:

https://netgazeti.ge/news/396131/

ყაზბეგის ეროვნულ პარკში, მყინვარწვერისკენ მიმავალ ბილიკზე, დასუფთავების აქცია გაიმართა. მოხალისეებმა ცელოფნის პარკები, პლასტმასის ბოთლები და სხვა, საყოფაცხოვრებო ნაგავი შეაგროვეს. აქცია გარემოს დაცვისა და სოფლის მეურნეობის სამინისტროს ორგანიზებით და მასში შემავალი სტრუქტურული ერთეულების ჩართულობით გაიმართა.

ყაზბეგის ეროვნული პარკი იშვიათი და უნიკალური სახეობის ცხოველისა და ფრინველის თავშესაფარს წარმოადგენს. ეროვნული პარკის ყველაზე დაბალი წერტილი ზღვის დონიდან 1 400 მ-ზე მდებარეობს.

მყინვარწვერზე ნაგვის ურნები განთავსებული არ არის.

აჭარის უმაღლესმა საბჭომ დღეს, 25 ოქტომბერს, საზოგადოებრივი მაუწყებლის აჭარის ტელევიზიისა და რადიოს მრჩევლებად დაამტკიცა თამილა დოლიძე, სოსო სტურუა და თამარ წილოსანი.

თამილა დოლიძე და სოსო სტურუა მმართველი პარტიის ფრაქციების მიერ იყვნენ დასახელებული, ხოლო თამარ წილოსანი [ევროპული საქართველოს] და დიანა ვაშაყმაძე ოპოზიციის მიერ დასახელებული კანდიდატები არიან.

უმაღლესი საბჭოს პრესსამსახურის ინფორმაციით, თამილა დოლიძემ უმაღლესი საბჭოს წევრებისგან 14 ხმა მიიღო, სოსო სტურუამ – 15, თამარ წილოსანმა – 14 ხმა, ხოლო დიანა ვაშაყმაძემ 6 ხმა და იგი მრჩეველთა საბჭოს წევრი ვერ გახდა.

უმაღლესი საბჭოს ოპოზიცია მრჩევლების დამტკიცებამდე კანდიდატებთან გასაუბრებას ითხოვდა, გასაუბრება 28 ოქტომბერს უნდა ჩანიშნულიყო, თუმცა როგორც გუშინ, 24 ოქტომბერს, ენმ-ს წევრმა ასმათ დიასამიძემ განაცხადა, უმაღლესი საბჭოს თავმჯდომარემ შეთანხმება დაარღვია და სხდომა დღეს, 25 ოქტომბერს, დანიშნა.

აჭარის ტელევიზიის მრჩეველთა საბჭოს კიდევ ერთი წევრის წარდგენის უფლება აქვს „ნაციონალური მოძრაობის“ ფრაქციას. ამ პარტიას თავისი კვოტით ჯერჯერობით კანდიდატი არ ჰყავს წარდგენილი.

შესაბამისად, აჭარის მაუწყებლის 5-წევრიან საბჭო უკვე ჰყავს 4 მრჩეველი. ეს რაოდენობა საკმარისია მაუწყებლის ახალი დირექტორის ასარჩევად. დირექტორის პოზიცია 19 აპრილის, ანუ ყოფილი დირექტორის, ნათია კაპანაძის იმპიჩმენტის შემდეგ ვაკანტურია. დირექტორის მოვალეობას ნათია ზოიძე ასრულებს.

ამავე თემაზე:

„ბათუმელების“ ინფორმაციით, ბათუმის ვიცე-მერად დღეს, 25 ოქტომბერს, ჯაბა ტუღუშს წარადგენენ. ის ბათუმის მერის მრჩეველია მუნიციპალური ინფრასტრუქტურის რეაბილიტაციის პროექტის საკითხებში.

ეს ვაკანსია მას შემდეგ გაჩნდა, რაც ბათუმის ვიცე-მერი თენგიზ პეტრიძე პროკურატურამ 2019 წლის მაისში სხვა მაღალჩინოსნებთან ერთად, „იაფი სახლის“ საქმეზე დააკავა.

ამ საქმეზე სულ 7 ბრალდებულია, თუმცა 24 სექტემბრის სხდომაზე სასამართლომ გირაოს საფუძველზე ოთხი მათგანი გაათავისუფლა, მათ შორის თენგიზ პეტრიძე.

ბათუმის საკათედრო ტაძრის სრული სარესტავრაციო დოკუმენტაციის მომზადება-შეძენაზე აჭარის კულტურული მემკვიდრეობის დაცვის სააგენტო ტენდერს 2020 წლის თებერვლიდან გამოაცხადებს.

ბათუმის საკათედრო ტაძარი კულტურული მემკვიდრეობის ძეგლია.

15 დღის წინ კი, როგორც ძეგლთა დაცვის სააგენტოს ბათუმის საკათედრო ტაძარში დაგვიდასტურეს, დასრულდა ტაძრის დროებითი გადახურვა. ამ დრომდე დაზიანებული სახურავიდან ტაძარში წყალი ჩადიოდა, რამაც მნიშვნელოვნად დააზიანა ფრესკების ნაწილი. მას შემდეგ, რაც წყლით გაჟღენთილი კედლები გაშრება, დაიწყება წყლის მიერ დაზიანებული ფრესკების აღდგენის პროცესი. ფონდ „ქართუს“ ფრესკების აღსადგენად 300 ათასი ლარი აქვს გამოყოფილი.

„ამ პროცესს [ფრესკების აღდგენას] 2020 წლის თებერვლამდე დავიწყებთ. ფონდი „ქართუ“ სარესტავრაციო სამუშაოებისთვის ელოდება ნებართვას ეროვნული სააგენტოსგან”, – ამბობს აჭარის კულტურული მემკვიდრეობის დაცვის სააგენტოს დირექტორი ზაურ ახვლედიანი.

როგორც იგი ამბობს, სააგენტო ტენდერს ეკლესიის სრული რესტავრაციის დოკუმენტაციის შეძენაზეც გამოაცხადებს, რაც მოიცავს დაზიანებული ბათქაშის, სახურავის, ვიტრაჟების, ფრესკების, ყველა დაზიანების აღწერასა და სარესტავრაციო სამუშაოებისთვის საჭირო თანხის განსაზღვრას.

2020 წლისთვის კმდს-ს, ზოგადად, ძეგლების პროექტებისთვის 170 000 ათასი ლარი აქვს გამოყოფილი, აქედან 50 ათასი ლარი მოხმარდება ბათუმის საკათედრო ტაძრის სრული აღდგენის დოკუმენტაციის შეძენას.

ტაძრის აღდგენითი სამუშაოები მას შემდეგ დაიწყება, რაც სარესტავრაციო დოკუმენტაცია მომზადდება და განისაზღვრება სამუშაოებისთვის საჭირო ზუსტი ფინანსური რესურსი.

„დოკუმენტაციის მომზადებას სულ მცირე 3-4 თვე დასჭირდება, მერე ვნახოთ როგორ მოხერხდება, აჭარის მთავრობა გამოყოფს თანხას სარესტავრაციო სამუშაოებისთვის თუ რომელიმე ფონდისთვის მოგვიწევს თხოვნა”, – ამბობს ზაურ ახვლედიანი.

ამავე თემაზე:

https://batumelebi.netgazeti.ge/news/202737/

აჭარის ტელევიზიისა და რადიოს მრჩეველთა საბჭოს წევრად უმაღლეს საბჭოში წარმოდგენილი „ქართული ოცნება“ დღეს, 25 ოქტომბერს, თამილა დოლიძის არჩევას აპირებს. კანონი მრჩეველთა საბჭოს წევრობის კანდიდატს მაგისტრის ხარისხს სთხოვს ან მასთან გათანაბრებულს. თამილა დოლიძემ ინსტიტუტში 4 წელი ისწავლა, რაც მისი დიპლომიდან ჩანს. განათლების ხარისხის განვითარების ეროვნულმა ცენტრმა 8 ოქტომბერს გაცემულ დოკუმენტში მრჩეველთა საბჭოს წევრობის კანდიდატს ჩაუწერა, რომ მან 5 წელი ისწავლა.

თამილა დოლიძის დიპლომის მიხედვით, იგი 1982-1986 წლებში სწავლობდა ბელორუსიაში, გორკის სახელობის პედაგოგიურ ინსტიტუტში და მიენიჭა რუსული ენისა და ლიტერატურის  მასწავლებლის კვალიფიკაცია.

„თქვენთვის ბელორუსიის რესპუბლიკაში მინიჭებული კვალიფიკაცია შეესაბამება საქართველოს კანონმდებლობის უმაღლესი განათლების მეორე საფეხურისთვის გათვალისწინებულ კვალიფიკაციას…“ – აღნიშნულია დოკუმენტში, რომელიც განათლების ხარისხის განვითარების ეროვნულმა ცენტრმა გასცა. ეს უწყება ადგენს, რამდენად შეესაბამება უცხოეთში მიღებული უმაღლესი განათლება საქართველოს კანონმდებლობით დადგენილ აკადემიურ ხარისხს. ამ უწყების მიერ გაცემულ დოკუმენტში ასევე ვკითხულობთ: „…თქვენს სახელზე ნამდვილად გაიცა დიპლომი და თქვენ მიერ გავლილი პროგრამის ხანგრძლივობა შეადგენდა 5 წელს“. წერილში არ არის განმარტებული, როგორ გამოდის 4 წელი 5.

„არსებობდა კანონიერი საფუძველი. 2000 წლამდე 4-წლიანი განათლება უთანაბრდებოდა მაგისტრის ხარისხს. ალბათ, აქაც ეს შემთხვევაა,“ – უთხრეს „ბათუმელებს“ განათლების ხარისხის განვითარების ეროვნულ ცენტრის პრესცენტრში. აქ დაგვპირდნენ იმის გარკვევას, როგორ გამოითვალა ცენტრმა 4 წელი 5 წლად.

„ექსტერნად ვისწავლე, ინტერნაციონალური პროგრამა იყო,“ – გვიპასუხა მრჩეველთა საბჭოს კანდიდატმა, თამილა დოლიძემ, რომელსაც ასევე ვკითხეთ, როგორ გამოვიდა 4 წელი 5.

„არ მცალია, სამი საათის შემდეგ დამირეკეთ“, – გვითხრა თამილა დოლიძემ. დღეს, 25 ოქტომბერს, დღის 12 საათზე, უმაღლესი საბჭო თამილა დოლიძის და სხვა კანდიდატების ასარჩევად სხდომას ატარებს.

თამილა დოლიძის დიპლომში აღნიშნული არ არის, რომ მან ექსტერნად ისწავლა. დიპლომში არც სხვა ჩანაწერია, რითაც აიხსნებოდა, როგორ გამოდის 4 წელი – 5.

რა გაარკვია კომისიამ, რომელმაც კანდიდატად თამილა დოლიძე შეარჩია? – „ბათუმელები“ კომისიის ერთ-ერთ წევრს, ლევან გობაძეს დაუკავშირდა. მან გვიპასუხა, რომ დეტალურად ეს დოკუმენტი არ ახსოვს და შეგვეხმიანება, როცა დააზუსტებს.

კანდიდატად შერჩევამდე თამილა დოლიძის დოკუმენტაციას უმაღლეს საბჭოში შექმნილმა კომისიამ ხარვეზი დაუდგინა. თამილა დოლიძეს ჰქონდა წარმოდგენილი ცნობა, რომ მისი უმაღლესი განათლება მაგისტრის ხარისხთან იყო გათანაბრებული, თუმცა კომისიამ თამილა დოლიძეს დამატებითი დოკუმენტი მოსთხოვა.

„წარმოდგენილ ცნობაში ეწერა, რომ მას შეეძლო უმაღლესი განათლების მესამე საფეხურზე სწავლა, ანუ დოქტორანტურაზე. ეს კი ირიბად გულისხმობს იმას, რომ მაგისტრატურა გავლილი გაქვს, მაგრამ პირდაპირ არ ეწერა ის, რომ მისი უმაღლესი განათლება შეესაბამება მაგისტრის აკადემიურ ხარისხს. მან რამდენიმე დღეში ახალი დოკუმენტი წარმოგვიდგინა,“ – ამბობს აჭარის ტელევიზიისა და რადიოს მრჩეველთა საბჭოს მრჩევლობის კანდიდატების შესარჩევი კომისიის წევრი ლევან გობაძე.

კომისიამ თამილა დოლიძეს დოკუმენტი 6 ოქტომბერს მოსთხოვა. თამილა დოლიძემ ახალი ცნობა განათლების ხარისხის ეროვნული ცენტრიდან 8 ოქტომბერს მიიღო, სადაც წერია, რომ თამილა დოლიძე 5 წელი სწავლობდა.

დღეს, 25 ოქტომბერს, ბათუმში, რუსთაველისა და გოგებაშვილის ქუჩების კუთხეში ავტოსაგზაო შემთხვევა მოხდა, რის შედეგადაც ერთი ადამიანი დაშავდა.

სასწრაფო დახმარების სამსახურის ინფორმაციით, დაშავებული პირი, რომელიც ელექტრომოპედს მართავდა, ხეს შეეჯახა, რის შედეგადაც ფეხი მოიტეხა.

დაშავებული გადაყვანილია საავადმყოფოში.

25 ოქტომბერს აჭარის უმაღლესი საბჭო გეგმავს აირჩიოს საზოგადოებრივი მაუწყებლის აჭარის ტელევიზიისა და რადიოს სამეურვეო საბჭოს წევრები. ტელევიზიაში მომუშავე ჟურნალისტთა ერთი ჯგუფი კითხვის ნიშნის ქვეშ აყენებს ამ პროცესს. ჟურნალისტები აცხადებენ, რომ მათი სარედაქციო დამოუკიდებლობა საფრთხის წინაშე დგას.

„ვფიქრობდით, რომ უმაღლეს საბჭოში, რომელსაც ეს მაღალი პასუხისმგებლობა დაეკისრა, ჯერ კომისიის წევრების და შემდეგ მრჩევლების შერჩევის, ჩვენი განცხადება იქნებოდა ნიშანი და სიგნალი იმისა, რომ მეტი პასუხისმგებლობით მოკიდებოდნენ შერჩევის პროცესს. პირველი ნაბიჯი გადადგა უმაღლესმა საბჭომ და ამით გვანიშნა, რომ ეს პროცესი დემოკრატიული აღარ იქნება,“ – თქვა გადაცემა „სათქმელში“ საზოგადოებრივი მაუწყებლის აჭარის ტელევიზიის საინფორმაციო სამსახურის უფროსმა მაია მერკვილაძემ.

საზოგადოებრივი მაუწყებლის აჭარის ტელევიზიის საინფორმაციო გადაცემის წამყვანი თეონა ბაკურიძე ამბობს, რომ მაუწყებლის სარედაქციო დამოუკიდებლობა რეალურად დადგა საფრთხის წინაშე.

„უმაღლესი საბჭოს თავმჯდომარემ დავით გაბაიძემ დღეს ეთერში მითხრა, რომ კანონი [რომლის მიხედვითაც სამეურვეო საბჭო უნდა დაკომპლექტეს] არის ხარვეზიანი. ეს მან იცის, მაგრამ ხარვეზიანი კანონის მიუხედავად, უმაღლესი საბჭო ხვალ [25 ოქტომბერს] აპირებს აირჩიოს  „ქართული ოცნების“ მიერ დასახელებული კანდიდატები.

ყველაფერი დაიწყო ექვსი თვის წინ, ნათია კაპანაძის იმპიჩმენტით. ჩვენ მაშინ ვთქვით, რომ ეს იყო რისკი სარედაქციო დამოუკიდებლობისათვის. ამის შემდეგ მეოთხე კონკურსზე ვიგებთ, რომ გოგა კოხრეიძე ასაჩივრებს გადაწყვეტილებას, აჩერებს მეოთხე კონკურსს. ახლა მაუწყებლის სარედაქციო დამოუკიდებლობა რეალურად დგას საფრთხის წინაშე. მივედით იქამდე, რომ უმაღლესმა საბჭომ ვერც კომისიის დაკომპლექტებამდე მოახერხა ისე, რომ კითხვები არ გაჩენილიყო და ვერც ამ შემთხვევაში, სამეურვეო საბჭოს წევრების არჩევისას მოახერხა ის, რომ კითხვები არ გაჩენილიყო,“ –  თქვა გადაცემა „სათქმელში“ თეონა ბაკურიძემ.

ამავე თემაზე: საია: აჭარის ტელევიზიის მრჩეველთა საბჭოს წევრების არჩევა კანონდარღვევით მიმდინარეობს

საზოგადოებრივი მაუწყებლის აჭარის ტელევიზიის ჟურნალისტი და საინფორმაციო გადაცემის წამყვანი თეონა თურმანიძე კი ამბობს, რომ ხელისუფლება ვერ მოიგებს იმ ბრძოლას, რომელიც მან ჟურნალისტების წინააღმდეგ დაიწყო.

„ხელისუფლება ცდილობს გავლენა იქონიოს საზოგადოებრივი მაუწყებლის აჭარის ტელევიზიასა და რადიოზე. არ ვფიქრობ და გამორიცხულია, რომ ეს ბრძოლა ხელისუფლებამ მოიგოს. იმიტომ, რომ ჩვენ ვართ ბევრი, ვართ ბევრი მტკიცე პოზიციაზე და იმ მონაპოვარს [სარედაქციო დამოუკიდებლობა], რაც მივიღეთ ბოლო წლების განმავლობაში, არ დავთმობთ. ჩვენ ამის დათმობას არ  ვაპირებთ,“ – თქვა თეონა თურმანიძემ.

„ვერც მრჩეველთა საბჭო და ვერც ახალი დირექტორი ვერ შეცვლის იმ მონაპოვარს, რაც არის სარედაქციო დამოუკიდებლობა. მე ამაში ღრმად ვარ დარწმუნებული. მაშინ უნდა აიღონ ეს გუნდი და გადაყარონ. ასე ჩალითაც არ არის დახურული ეს ქვეყანა,“  – თქვა გადაცემაში ჟურნალისტმა ირინა ყურუამ.

საზოგადოებრივი მაუწყებლის აჭარის ტელევიზიისა და რადიოს გადაცემა „სათქმელის“ წამყვანმა ირინა ყურუამ ერთი დღით გადაცემის წაყვანაზე უარი თქვა. მიზეზი ტელევიზიის მრჩეველთა საბჭოს არჩევნებში მონაწილე და „ქართული ოცნების“ მიერ მხარდაჭერილი ერთ-ერთი კანდიდატი სოსო სტურუაა. ირინა ყურუამ 2014 წელს ტელევიზია სწორედ სოსო სტურუასთან კონფლიქტის გამო დატოვა. ჟურნალისტმა თქვა, რომ ის არ წაიყვანდა გადაცემას და არ დაუსვამდა კითხვებს სტუმარს, რომელთანაც მას ინტერესთა კონფლიქტი აქვს.

„ის, რომ კანონს სხვადასხვაგვარად ხედავენ და შესაძლოა ამან გამოუსწორებელი შედეგი მოუტანოს მაუწყებელს, ჩემთვის ცხადი გახდა, მაშინ როდესაც მე ვნახე სამეურვეო  საბჭოს კანდიდატების ჩამონათვალში და ამოვიკითხე სახელი და გვარი ადამიანის, რომელთანაც თანამშრომლობის ერთი წელი მაკავშირებს –  ეს არის ბატონი სოსო სტურუა, რომელიც იყო ტელევიზიის დირექტორი.

მე მაშინაც ბევრი კითხვა მქონდა მასთან და ბევრი კითხვა მაქვს ახლაც. მეტი ობიექტურობისთვის, იმისთვის რომ გავითვალისწინოთ ინტერესთა კონფლიქტი, მე დღეს გადავწყვიტე გადავინაცვლო აუდიტორიაში,“ – თქვა ჟურნალისტმა შესავალ ტექსტში.

ირინა ყურუას ნაცვლად გადაცემა „სათქმელი“ მაუწყებლის სხვა ჟურნალისტს ლაშა ზარგინავას მიჰყავს. ყურუა გადაცემაში სტუმრის სტატუსით მონაწილეობს. ჟურნალისტმა გადაცემაში 2014 წლის მოვლენები გაიხსენა და თქვა, რომ მას ტელევიზიის დატოვება ზეწოლის გამო მოუწია.

„ტელევიზიაში სოსოს  სტურუასთან გატარებული ერთი წელი, იყო ურთულესი პერიოდი. მე არ მინდა, რომ განმეორდეს ის პერიოდი. მე მინახავს ბატონი სოსო ძალიან ცუდ მდგომარეობაში, როდესაც მას სთხოვდნენ ხელისუფლებისათვის მოსაწონი რიგითობა ყოფილიყო საინფორმაციო გამოშვებებში. მე მინახავს ადამიანურად ძალიან ცუდ დღეში მყოფი ადამიანი, რომელსაც არ ვიცი…. მე  დღესაც მგონია, რომ სწორად ვიქცეოდი. მე და იმ გუნდს, რომელმაც სარედაქციო დამოუკიდებლობის გემო იგრძნო, აღარ გვინდოდა და ვერ დავთმობდით ვერაფერს.

სოსო სტურუა მოდის დღეს სამეურვეო საბჭოში, როდესაც მე ნანახი მაქვს სახელისუფლებო ვერტიკალი როგორ ცდილობდა ამ ადამიანზე გავლენის მოპოვებას, ჩემთვის ძალიან რთულია დავიჯერო, რომ ის იქნება გამყოფი.

მე ვერ დამარწმუნებს სოსო სტურუას მხოლოდ კეთილი განწყობა იმაში, რომ ის აისხლეტს ზეწოლის მცდელობებს,“ – თქვა ირინა ყურუამ.

25 ოქტომბერს შავ ზღვაში ამერიკული საზღვაო ხომალდის USS Porter-ის ეკიპაჟი და საქართველოს სანაპირო დაცვის სამსახური ერთობლივ წვრთნებს ჩაატარებენ.

„პირველ რიგში, მინდა მადლობა გადავუხადო საქართველოს მთავრობას და სანაპირო დაცვას არაჩვეულებრივი სტუმართმოყვარეობისათვის. ხვალ ვგეგმავთ ერთობლივი წვრთნების ჩატარებას სანაპირო დაცვასთან  ერთად, რაც კიდევ უფრო განამტკიცებს ჩვენს ურთიერთობებს,“ – განაცხადა USS Porter-ის მეთაურმა ქრეიგ ტრენტმა ბათუმის პორტში ჟურნალისტებთან.

25 ოქტომბერს დაგეგმილ წვრთნაში მონაწილეობას მიიღებენ შინაგან საქმეთა სამინისტროს სანაპირო დაცვის ხომალდები.

„შავი ზღვის უსაფრთხოება არის ძალიან მნიშვნელოვანი ნატოსა და მისი თითოეული წევრი ქვეყნისათვის. საქართველოს, როგორც ნატოს მომავალ წევრს და ამერიკის სტრატეგიულ პარტნიორს, შეაქვს თავისი წვლილი შავი ზღვის უსაფრთხოების გაძლიერებაში. ზოგადად, ალბათ ხაზგასასმელია, რომ საზღვაო თანამშრომლობა ალიანსთან, ისევე როგორც მოკავშირეებთან, არის უაღრესად აქტიური ბოლო წლებია და ამ თანამშრომლობას ახორციელებს სანაპირო დაცვა,“ –  თქვა სასაზღვრო პოლიციის უფროსმა თემურ კეკელიძემ.

ამერიკული სამხედრო ხომალდის ვიზიტი შეაფასა საქართველოში აშშ-ის ელჩის მოვალეობის შემსრულებელმა ელიზაბეთ რუდმა.

„მოუთმენლად ველით ამერიკის და საქართველოს თანამშრომლობის გაძლიერებას შავი ზღვის უსაფრთხოების მიმართულებით.

USS PORTER-ის ვიზიტი, მიმდინარე  წელს, ამერიკული სამხედო ხომალდების მესამე ვიზიტია საქართველოში. ეს ვიზიტები ადასტურებს ამერიკის ერთგულებას უსაფრთხოების და სტაბილურობის მიმართ შავი ზღვის რეგიონში.

მინდა მადლობა გადავუხადო, ბათუმის, აჭარის მოქალაქეებს სტუმართმოყვარეობისთვის, ასევე საქართველოს თავდაცვის ძალებს და საზღვრის დაცვას უსაფრთხოების და საერთაშორისო მშვიდობის დაცვაში შეტანილი წვლილისთვის,“ – განაცხადა დღეს ბათუმის პორტში საქართველოში ამერიკის ელჩის მოვალეობის შემსრულებელმა ელისაბეთ რუდმა.

ამავე თემაზე: რატომ არ დახვდნენ მაღალჩინოსნები ამერიკულ სამხედრო ხომალდს

მას შემდეგ, რაც 25 ოქტომბერს ბათუმის პორტს ამერიკული სამხედრო ხომალდი დატოვებს, ნავსადგურში ნატოს მუდმივმოქმედი მეორე ნაღმსაწინააღმდეგო შენაერთი (SNMCMG2) შემოვა.

შენაერთის შემადგენლობაში შედის საფლაგმანო ხომალდი  ITS VESUVIO (იტალია) და ხომალდები ITS NUMANA (იტალია) და TCG AMASRA (თურქეთი). ნატოს მუდმივმოქმედ მეორე ნაღმსაწინააღმდეგო შენაერთს კაპიტანი ალესანდრო ფალკონე ხელმძღვანელობს.

უმაღლესი საბჭოს წევრი „ქართული ოცნებიდან“ ილია ვერძაძე „ბათუმელებთან“ ადასტურებს, რომ აჭარის მაუწყებლის მრჩეველთა საბჭოს წევრობის კანდიდატი თამილა დოლიძე, მისი ცოლის ნათესავი, კერძოდ დეიდაშვილია, კანდიდატის და – გურანდა დოლიძე კი, ხელვაჩაურის საკრებულოს წევრია „ქართული ოცნებიდან“.

თამილა დოლიძე მრჩეველთა საბჭოს წევრობის კანდიდატად დაასახელა ფრაქციამ – „ქართული ოცნება – მაჟორიტარები“,   ფრაქცია  „ქართული ოცნება – აჭარას“ რჩეული კი, სოსო სტურუა გახდა. თამილა დოლიძე ამავე დროს აჭარის საზოგადოებრივი მაუწყებლის რადიოში საინფორმაციო სამსახურის ხელმძღვანელად მუშაობს.

„თამილა დოლიძე არის უმრავლესობის მიერ წარდგენილი კანდიდატი და სანამ ნათესავი გახდებოდა, იმ ტელევიზიაში მუშაობდა. აქცენტი უნდა გაკეთდეს მის კვალიფიკაციაზე“, – ამბობს ილია ვერძაძე.

„ბათუმელები“ კომენტარისთვის თამილა დოლიძესაც დაუკავშირდა, რომელმაც ილია ვერძაძის მეუღლესთან ნათესაურ კავშირზე გვითხრა: „დეიდაშვილია, მაგრამ მესამე თაობის“.

„მე ვარ ბათუმელი, მახინჯაურელი, მამაჩემის დედას ათი დედმამიშვილი ჰყავდა, მამაჩემს – 6 დედმამიშვილი. მამის მხრიდან 28 შვილიშვილი ვართ, აქედან გამომდინარე, წარმოიდგინეთ რამდენი ნათესავი მყავს აჭარაში და გაქანება აღარ შემიძლია? უხერხულია და შეურაცხყოფილად ვგრძნობ თავს, როდესაც ამ კითხვას მისვამთ, რადგან ჩემი ოჯახის წევრი არის მხოლოდ ჩემი შვილი“, – ამბობს თამილა დოლიძე.

მიუხედავად ამისა, ის ამბობს, რომ როცა მისი და, გურანდა დოლიძე, საკრებულოს წევრი გახდა, ამის გამო სამსახურში დისკომფორტი შეექმნა. „ეს უხურხულობა გამიჩინა ნათია კაპანაძემ, რადგან ის მეუბნებოდა, რომ მე მყავს და დეპუტატი და უხერხულია, რომ აქ მუშაობთო, რასაც მე ვაპროტესტებდი.“

იყო თუ არა ეს მიზეზი იმისთვის, რომ ახლა უკვე კანდიდატი მაუწყებლის ყოფილი დირექტორის, ნათია კაპანაძის იმპიჩმენტს ითხოვდა? – ამ კითხვის პასუხად თამილა დოლიძემ აღნიშნა: „მე იმპიჩმენტის მომხრე არ ვიყავი, ჩვენ ვითხოვდით ხელფასების გაზრდას და პროცესების გაჯანსაღებას. მაგრამ ჩვენი გამოსვლით ისარგებლა მრჩეველთა საბჭომ, მათ შორის საბჭოს თავმჯდომარემ, ნატა იმედაიშვილმა გამოიყენა პირადად“.

თუკი გახდება მაუწყებლის მრჩეველთა საბჭოს წევრი, იარსებებს თუ არა იმის რისკი, რომ დეპუტატთან ახლობლობა ან ის, რომ მმართველი პარტიის კანდიდატია, ტელევიზიის მიუკერძოებლობას დააყენებს დარტყმის ქვეშ?  – თამილა დოლიძე ამბობს: „მე ვიცი, როგორ უნდა მოვიქცე და რა უნდა გავაკეთო. ამდენი ხანი ვხელმძღვანელობ საინფორმაციო სამსახურს და მოუსმინეთ, თუ არის ისეთი, რის გამოც შეიძლება ეს კითხვა დამისვათ“.

„ბათუმელების“ კიდევ ერთ კითხვაზე, როგორ შეაფასებს იმ ფაქტს, რომ უმაღლესმა საბჭომ არ მისცა ოპოზიციის წარმომადგენლებს მათთან ანუ კანდიდატებთან გასაუბრების საშუალება, თამილა დოლიძე ამბობს, რომ ის მზადაა ოპოზიციას ნებისმიერ დროს გაესაუბროს.

„მე თუ დამიძახებენ, მივალ და შევხვდები“, – ამბობს ის.

_________________

ფოტო ფეისბუქის პირადი გვერდიდან.

ამავე თემაზე:

ახალგაზრდა იურისტთა ასოციაციის განცხადებით,  სსიპ აჭარის ტელევიზიისა და რადიოს მრჩეველთა საბჭოს წევრობის კანდიდატების წარდგენა განხორციელდა „მაუწყებლობის შესახებ“ საქართველოს კანონით დადგენილი წესის დარღვევით.

„ამჟამად 2 კანდიდატი წარდგენილია ფრაქციების, 2 კი დამოუკიდებელი დეპუტატების მიერ. სავარაუდოდ კანდიდატს წარადგენს ფრაქცია ,,ერთიანი ნაციონალური მოძრაობაც.”

„მაუწყებლობის შესახებ“ საქართველოს კანონის თანახმად, საკონკურსო კომისიის მიერ შერჩეულ კანდიდატთაგან სამს წარადგენს აჭარის უმაღლესი საბჭოს ფრაქციები ხოლო ორს დანარჩენი დეპუტატების არანაკლებ ერთი მეოთხედი.

ამჟამად უმაღლეს საბჭოში არის 4 ფრაქცია, საიდანაც ფრაქცია „ქართულ ოცნებას“ ჰყავს 6 დეპუტატი, ფრაქცია – „ქართული ოცნება-მაჟორიტარების“ – 5, ფრაქცია – „ერთიან ნაციონალურ მოძრაობას“ – 4, ფრაქცია – ,,ქართული ოცნება – აჭარა“ -3.

ფრაქცია ,,ქართულ ოცნების“ მიერ წარდგენილი კანდიდატი, დღეს უკვე მრჩეველთა საბჭოს წევრია და მისი უფლებამოსილების ვადა არ გასულა. შესაბამისად, პროცესის მიმდინარეობისას ფრაქციების კვოტით შესაძლებელია მხოლოდ 2 კანდიდატის წარდგენა.

დეპუტატთა რაოდენობის პროპორციულობის გათვალისწინებით კანდიდატების წარდგენა უწევდათ ფრაქციებს ,,ქართული ოცნება-მაჟორიტარები“ და ,,ერთიანი ნაციონალური მოძრაობა.
2 კანდიდატი კი წარდგენილი უნდა ყოფილიყო დანარჩენი დეპუტატების, მათ შორის ფრაქცია – ,,ქართული ოცნება – აჭარა“-ში შემავალი დეპუტატების არანაკლებ ერთი მეოთხედის მიერ“ -აღნიშნულია ორგანიზაციის მიერ გავრცელებულ განცხადებაში.

ახალგაზრდა იურისტთა ასოციაცია მოუწოდებს აჭარის უმაღლეს საბჭოს დაიცვას საქართველოს კანონმდებლობით დადგენილი მოთხოვნები.

________________

ფოტოზე: აჭარის ტელევიზიის თანამშრომლები. ფოტო არქივიდან.

„ენერგო-პრო ჯორჯიას“ განცხადებით, გეგმიური სარეაბილიტაციო სამუშაოების გამო, 25 ოქტომბერს ელექტროენერგიის მიწოდება შეიზღუდება ბათუმის რამდენიმე ქუჩაზე.

„ბათუმში – 12:00-დან 16:00 საათამდე მონაკვეთში, მონაცვლეობით, ელექტროენერგიის მიწოდება შეეზღუდება: ტბელ აბუსერიძის, ჯავახიშვილის, ჭავჭავაძის, ზ. გორგილაძის, თბილისის, ზ. ბერიძისა და მიმდებარე ქუჩებს.

ასევე, მწვანე კონცხისა და დაბა მახინჯაურის დასახლების ნაწილს,“ – აცხადებენ ენერგოკომპანიაში.

აბონენტებს ელექტროენერგია სამუშაოების დასრულებისთანავე მიეწოდება, ჩვეულ რეჟიმში.

დღეს, 24 ოქტომბერს, პარტიის ოფისში, უმაღლესი საბჭოს წევრმა ენმ-დან ასმათ დიასამიძემ, ბრიფინგი გამართა. მისი განცხადებით, უმაღლესი საბჭოს თავმჯდომარემ დავით გაბაიძემ დაარღვია შეთანხმება ოპოზიციასთან იმასთან დაკავშირებით, რომ აჭარის ტელევიზიის ბორდის წევრობის კანდიდატების დამტკიცებამდე მათ უნდა გასაუბრებოდნენ. ენმ ხვალ, 25 ოქტომბერს, ჩანიშნული სხდომის გადადებას მოითხოვს.

„გასაუბრება უნდა დანიშნულიყო ორშაბათს 11:00 საათზე, თუმცა, დღეს, 24 ოქტომბერს, ისე ჩაინიშნა ბიუროს სხდომა, რომ ჩვენს ფრაქციას ამის შესახებ ინფორმაცია არ ჰქონდა. შესაბამისად, ჩვენ არ მოგვეცა საშუალება ბიუროს დავსწრებოდით და გაგვეჟღერებინა ჩვენი მოსაზრებები ამ საკითხთან დაკავშირებით.

როგორც ჩანს, დავით გაბაიძემ ვერ მიიღო გადაწყვეტილება და დაარღვია ჩვენი ურთიერთშეთანხმება. ახლა გავიგეთ, რომ ხვალ ჩაინიშნა სესია, სადაც კენჭი უნდა უყარონ „ქართული ოცნების“ ფრაქციების მიერ წარდგენილი ორი კანდიდატის დამტკიცებას“, – ამბობს ასმათ დიასამიძე.

მისი თქმით, „ქართული ოცნება“ ძალიან ჩქარობს დაამტკიცოს მათი ფრაქციების მიერ დასახელებული ბორდის წევრობის კანდიდატები, „მიუხედავად იმისა, რომ მათი მისამართით საზოგადოებაში კითხვები გაჩნდა.“

„ჩვენ ვითხოვდით ყველა კანდიდატთან გასაუბრებას, მათ შორის „ქართული ოცნების“ მიერ წარდგენილ ორ კანდიდატთან შეხვედრასაც, რადგან საზოგადოებაში გაჩნდა ძალიან ბევრი კითხვა მათთან მიმართებაში.

ბორდის წევრობის ერთ-ერთი კანდიდატი თამილა დოლიძე, გარდა იმისა, რომ „ქართულმა ოცნებამ“ წარადგინა, არის „ქართული ოცნებიდან“ უმაღლეს საბჭოს წევრის, ილია ვერძაძის ნათესავი და როგორც ვიცით, ერთ-ერთი იყო, ვინც ყველაზე მეტად აქტიურობდა და მოითხოვდა ტელევიზიის ყოფილი დირექტორის, ნათია კაპანაძის იმპიჩმენტის საკითხის დაყენებას.

რაც შეეხება სოსო სტურუას, მისი გადაწყვეტილებებიც ვიცით, როცა ის მუშაობდა ტელევიზიის დირექტორის პოსტზე. ტელევიზიიდან წავიდნენ ჟურნალისტები, რომლებიც აცხადებდნენ, რომ ტელევიზიაში იყო ცენზურა და ხელისუფლების მაამებლური პოლიტიკა. სწორედ ამასთან დაკავშირებით გვინდოდა მათ გავსაუბრებოდით“, – ამბობს ასმათ დიასამიძე.

მიიღებს თუ არა კენჭისყრაში მონაწილეობას ენმ, ამის შესახებ გადაწყვეტილებას ხვალ, 25 ოქტომბერს, გაასაჯაროვებენ. „ამ ეტაპზე ჩვენ ვითხოვთ ხვალინდელი სესიის გადადებას“, – ამბობს დიასამიძე.

უმაღლესი საბჭოს ფრაქცია „ქართული ოცნება – მაჟორიტარები“ ბორდის წევრობის კანდიდატად თამილა დოლიძე დაასახელა. იგი აჭარის ტელევიზიის საინფორმაციო სამსახურის უფროსის მოადგილეა რადიოს მიმართულებით.

საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს შერჩეულ კანდიდატებს უმაღლესი საბჭო ხვალ, 25 ოქტომბერს, უყრის კენჭს. ჯერჯერობით ოთხი კანდიდატის ვინაობაა ცნობილი – სოსო სტურუა და თამილა დოლიძე, რომლებიც მმართველი პარტიის ფრაქციებმა დაასახელეს და ოპოზიციის მიერ დასახელებული ორი კანდიდატი – თამარ წილოსანი და დიანა ვაშაყმაძე.

უმაღლესი საბჭო ხვალ რიგგარეშე სხდომას გამართავს.

ყოველი წლის ოქტომბერში მსოფლიოს მრავალ ქვეყანაში, ჯანმრთელობის მსოფლიო ორგანიზაციისა და ტყვიის შემცველი საღებავების ელიმინაციის გლობალური ალიანსის ინიციატივით, ტყვიით მოშხამვის პრევენციის საერთაშორისო კვირეული აღინიშნება.

წელს საქართველოშიც აღინიშნება კვირეული, რომელიც მიმდინარეობს სლოგანით – „აკრძალე ტყვია საღებავებში“. საქართველოს დაავადებათა კონტროლისა და საზოგადოებრივი ჯანმრთელობის ეროვნულმა ცენტრმა ფლაერები და ბუკლეტებიც მოამზადა, სადაც აღნიშნულია, რატომ არის საშიში ტყვიის ზემოქმედება ორგანიზმზე, განსაკუთრებით ბავშვებზე და მოცემულია რეკომენდაციები – როგორ შეიძლება მოხდეს პრევენცია.

აღნიშნული კვირეულის ფარგლებში „შერატონ გრანდ თბილისი პალასში“ დღეს, 24 ოქტომბერს, გაეროს ბავშვთა ფონდის მხარდაჭერით, ტყვიის მსოფლიო კვირეულისადმი მიძღვნილი სამეცნიერო კონფერენცია მიმდინარეობს. დაავადებათა კონტროლისა და საზოგადოებრივი ჯანმრთელობის ეროვნულ ცენტრში ასევე გვითხრეს, რომ კვირეულის ფარგლებში ჩატარდა მედიასემინარი ამ თემაზე და იყო საუბრები საგანმანათლებლო დაწესებულებებშიც. რაც შეეხება კვირეულის ფარგლებში გამოყოფილ ბიუჯეტს, ცენტრში გვითხრეს, რომ ამ საკითხზე ინფორმაციას მოგვიანებით მოგვაწვდიან.

ტყვიით დაბინძურების შესაძლო წყაროებს შორისაა საღებავები, რომელთაც იყენებენ საყოფაცხოვრებო მიზნებისთვის – სახლების ფასადის, შიდა კედლების, ავეჯის თუ სათამაშოების შესაღებად.

ბავშვებში ტყვიით მოწამვლას იწვევს ტყვიის შემცველი საღებავებით შეღებილი სათამაშოების ღეჭვა, შეღებილი საწოლების მოაჯირების პირით შეხება, საღებავის მტვრის შესუნთქვა და ა.შ.

არის თუ არა საღებავში ტყვია, ეს საქართველოში მოქალაქემ თავად უნდა გაარკვიოს. ზოგადი რეკომენდაციები ტყვიისგან მოწამვლის შესახებ ერთადერთია, რასაც მთავრობა საქართველოს მოქალაქეებს სთავაზობს ტყვიისგან დასაცავად. სლოგანი – „აკრძალე ტყვია საღებავებში“, საქართველოში მხოლოდ სიტყვებია, რადგან საღებავებში ტყვიის შემცველობას არც ერთი სახელმწიფო უწყება არ ამოწმებს.

საქართველოს ტექნიკური და სამშენებლო ზედამხედველობის სააგენტოში ამბობენ, რომ ამ ეტაპზე, სამშენებლო მასალების ბაზარზე ზედამხედველობა ხდება მხოლოდ ოთხ პროდუქტზე: არმატურაზე, ცემენტზე, პლასტმასის მილებსა და ელექტროკაბელებზე. „ძალიან ბევრი გეგმა გვაქვს, საღებავთან დაკავშირებით მომავალში შესაძლოა იყოს რაიმე, მაგრამ ამ ეტაპზე მხოლოდ ეს პროდუქტებია“, – გვითხრეს ბაზარზე ზედამხედველობის სამმართველოში.

„მომხმარებელს საკუთარი ძალით რომ შეეძლოს ტყვიისგან ან სხვა საფრთხეებისგან თავის დაცვა, მაშინ არც ერთ განვითარებულ ქვეყანაში სახელმწიფო კონტროლი ასეთი ტიპის სამომხმარებლო პროდუქციაზე არ იარსებებდა.

ჩვენთან არის აბსოლუტურად არანორმალური მდგომარეობა, უკვე წლებია, რაც სახელწიფო კონტროლი გაუქმებულია და აქამდე არ განუცხადებია მთავრობას, რომ აპირებს ამის ოდესღაც დანერგვას“, – ამბობს ვახტანგ კობალაძე, „საქართველოს სტრატეგიული კვლევებისა და განვითარების ცენტრის” მომხმარებლის უფლებების დაცვის პროგრამის ხელმძღვანელი.

მისი თქმით, მხოლოდ ინფორმაციის გავრცელებით, რომ ტყვია სახიფათოა ჯანმრთელობისთვის, პრობლემის მოგვარება შეუძლებელია.

„აუცილებელია არა მარტო საღებავებზე, არამედ ნებისმიერი სახის სამომხმარებლო პროდუქციაზე კონტროლის დაწესება და ეფექტიანი განხორციელება. კომპლექსურად რომ შევხედოთ, მთავრობამ შეიმუშავა გეგმა, სხვადასხვა უწყებებს კონკრეტული ნაბიჯები უნდა გადაედგათ ამ პრობლემის მოსაგვარებლად. ჩვენ ვაპირებთ, რომ მოვიკითხოთ ანგარიში, ვინ რა გააკეთა ამ საკითხთან მიმართებაში და შემდეგ გვექნება ჩვენი პოზიცია“, – ამბობს ვახტანგ კობალაძე.

2019 წლის 23 აპრილს გამოქვეყნებული კვლევის თანახმად, საქართველოში სისხლში ტყვიის შემცველობის მომატება გამოკვლეული ბავშვების 41%-ში დაფიქსირდა. ყველაზე მძიმე მდგომარეობა აჭარაშია – აქ გამოკვლეული ბავშვების 85%-ს სისხლში მომატებული აქვს ტყვიის შემცველობა.

დაავადებათა კონტროლის ეროვნული ცენტრის ცნობით, 2019 წლის 31 ივნისის მდგომარეობით, მხოლოდ 72 ქვეყნის მთავრობამ დაადასტურა, რომ აქვთ ტყვიის შემცველ საღებავებზე კანონმდებლობით განსაზღვრული კონტროლის მექანიზმი.

„ტყვიის შემცველი საღებავების სრული აღმოფხვრით, 2030 წლისათვის მნიშვნელოვნად შემცირდება საშიში ქიმიური ნივთიერებებითა და დაბინძურებული ჰაერით, წყლით და ნიადაგით გამოწვეული სიკვდილისა და დაავადების შემთხვევები;

2020 წლისთვის მოხდება ქიმიური ნივთიერებებისა და ნარჩენების ეკოლოგიურად მდგრადი მართვა, საერთაშორისო ჩარჩო-დოკუმენტების შესაბამისად და საგრძნობლად შემცირდება მათი გავრცელება ჰაერში, წყალში და ნიადაგში, რაც  მინიმუმამდე დაიყვანს ადამიანის ჯანმრთელობასა და გარემოზე  უარყოფით ზეგავლენას“, – აღნიშნულია საქართველოს დაავადებათა კონტროლის და საზოგადოებრივი ჯანმრთელობის ეროვნული ცენტრის მიერ გავრცელებულ ინფორმაციაში, თუმცა არაფერია ნათქვამი, რა ნაბიჯებს გადადგამს ამისთვის საქართველოს მთავრობა.

__________________

ფოტო: pexels

სოხუმში მცხოვრები 32 წლის ბესლან ხვარწკია მასზე ფიზიკური ძალადობის შემდეგ რეანიმაციაში იმყოფება. ხვარწკიას ცემის მიზეზი სოციალურ ქსელში იმ ქორწილის ქილიკი გახდა, რომელშიც სტუმრებს საქორწილო სუფრაზე შემწვარი ცხოველები დახვდათ. ხვარწკია აუდიომიმართვაში აღნიშნულ ქორწილს შეურაცხმყოფელი ფორმით [козлосвадьба] მოიხსენიებდა.

ინციდენტი 21 ოქტომბერს მოხდა. სოხუმის პოლიციის განყოფილებაში რესპუბლიკური საავადმყოფოდან შეტყობინება შევიდა, რომ მათთან მიიყვანეს ახალგაზრდა კაცი მრავალრიცხოვანი დაზიანებებით სხეულზე. პაციენტს ჰქონდა თავის ტვინის შერყევა, ცხვირის ძვლის მოტეხილობა, იარები გულმკერდის არეში, მრავლობითი სისხლჩაქცევები და ა.შ.

პროკურატურა აცხადებს, რომ განცხადების გარეშე საქმეს ვერ აღძრავენ, ფეისბუქზე გავრცელებული ვიზუალური მასალა კი, არც სისხლის სამართლის საქმის დაწყებისა და არც დანაშაულის მტკიცების საფუძველია.

პირი [გვარად აფხაზავა], რომელმაც 21 ოქტომბერს ქორწილი გადაიხადა, სკანდალში პირველად არ გახვეულა. მან რამდენიმე წლის წინ სოხუმის ცენტრში კულტურული მემკვიდრეობის ძეგლი დაანგრია და მის ადგილას სხვა, მოოქროვილი ჭიშკრითა და ირმებიანი ორნამენტებით შენობა ააშენა. აღნიშნულ ფაქტზე მაშინ პროკურატურამ საქმეც აღძრა, თუმცა, მალევე დახურა.

დაზარალებული ბესლან ხვარწკიას ახლობლები აცხადებენ, რომ მომხდარზე  გამოძიებას  თავად ჩაატარებენ.

______________________________

წაიკითხეთ ამ თემაზე მეტი ნეტგაზეთზე: