ბათუმის მერიაში საკადრო ცვლილებებია. დღეს, 13 დეკემბერს, ბათუმის მერმა, არჩილ ჩიქოვანმა, ისაუბრა ბრიფინგზე ამ ცვლილებების შესახებ.
ბათუმის ვიცე-მერი ლევან დავითაძე გახდა, რომელიც აქამდე შპს „ბათუმის წყალს“ ხელმძღვანელობდა.
ლევან დავითაძე „ბათუმის წყლის“ დირექტორად 2021 წლის თებერვალში არჩილ ჩიქოვანმა დანიშნა, რომელიც მაშინ მერის მოვალეობის შემსრულებელი იყო.
2021 წლის ადგილობრივი თვითმმართველობის არჩევნებზე „ბათუმელებმა“ „ბათუმის წყლის“ მიერ ადმინისტრაციული რესურსის გამოყენების ფაქტი დააფიქსირა – კერძოდ, „ბათუმის წყალმა“ მმართველი პარტიის ოფისში კუთვნილი ავტომობილით სკამები მიიტანა მაშინ, როცა საარჩევნო კოდექსით წინასაარჩევნო პერიოდში პარტიების მიერ ადმინისტრაციული რესურსის გამოყენება აკრძალულია და დასჯადი.
ლევან დავითაძე, ახლა უკვე ბათუმის ვიცე-მერი, საბიუჯეტო ორგანიზაციაში დაწინაურებიდან დღემდე სწრაფი ტემპით მდიდრდება. 2016 წელს, ბათუმის მერიის ა(ა)იპის – ბოტანიკური ბაღის ხელმძღვანელად დანიშვნის დროს, მას საკუთარი ბინა არ ჰქონდა. 2020 წლისთვის კი, რამდენიმე თანამდებობის ცვლილების პარალელურად, ორი ბინის და მიწის ნაკვეთის შეძენა მოახერხა, ასევე აიშენა 700 კვადრატული მეტრი სახლი ევრორემონტით ქალაქის გარეუბანში.
სახმელეთო ტრანსპორტის სააგენტოს ცნობით, სააგენტოში, 15 დეკემბრიდან დაიწყება განაცხადების მიღება თურქეთის რესპუბლიკაში დაუტვირთავი ავტოსატრანსპორტო საშუალებების შესვლის (სპეციალური) ნებართვების გასაცემად.
ნებართვები გაიცემა 15 დეკემბრიდან, დილის 9.00 საათიდან – სააგენტოს თბილისის, ბათუმისა და ფოთის ოფისებიდან.
სახმელეთო ტრანსპორტის სააგენტოს ცნობით, ერთ კომპანიაზე გაიცემა მხოლოდ ორი ნებართვა (ერთ ავტომობილზე ერთი ცალი), მიუხედავად განმცხადებლის მფლობელობაში არსებული ავტომობილების რაოდენობისა, ხოლო, ინდივიდუალურ მეწარმეზე გაიცემა მხოლოდ ერთი ნებართვა.
სამივე ფილიალში ნებართვა გაიცემა, როგორც დაჩქარებული, ასევე, დაუჩქარებელი წესით.
„ECMT, ტრასეკას ნებართვების ქონა არ წარმოადგენს თურქეთის სპეციალური ნებართვის მიღებისთვის დამაბრკოლებელ გარემოებას. აუცილებელია წარმოდგენილ იქნას გახარჯული თურქეთის სპეციალური ნებართვა ორიგინალის სახით.
ნებართვის მისაღებად არ არის საჭირო CMR-ის ან ხელშეკრულების წარმოდგენა“ – იუწყება სააგენტო.
აღმოსავლეთის ძლიერი ქარი, რომელიც გარემოს ეროვნული სააგენტოს ცნობით, 13 – 15 დეკემბერს შავი ზღვის სანაპირო რაიონებში იქროლებს, აჭარაში მოსალოდნელი არ არის.
„აჭარაში ძლიერ ქარს არ ველოდებით“ – გვითხრა გარემოს ეროვნული სააგენტოს აჭარის რეგიონული ჰიდრომეტეოროლოგიური ობსერვატორიის უფროსმა, რუსუდან დიასამიძემ.
მისივე თქმით, თბილი, უმეტესად უნალექო ამინდი აჭარაში 17 დეკემბრამდე შენარჩუნდება, შემდეგ კი აცივდება.
„17 დეკემბრიდან ტემპერატურის კლებაა მოსალოდნელი. გახშირდება წვიმიანი ამინდი, მთებში მოთოვს,“ – ამბობს რუსუდან დიასამიძე.
„სოკარის“ ცნობით, ხვალ, 14 დეკემბრის 10:00 საათიდან 14 დეკემბრის 16:00 საათამდე ბათუმში გაზის მიწოდება შეუწყდებათ გენერალ ასლან აბაშიძის ქუჩის აბონენტებს.
ბუნებრივი აირის შეწყვეტის მიზეზი გაზსადენზე დაგეგმილი სარემონტო-საექსპლუატაციო სამუშაოებია.
„სოკარის“ ცნობით, აბონენტებს ბუნებრივი გაზი სამუშაოების დასრულებისთანავე ეტაპობრივად მიეწოდება.
„სოკარ ჯორჯია გაზი” აბონენტებს მოუწოდებს, დაკეტილ მდგომარეობაში იქონიონ ბინებში არსებული გაზის ონკანები და უყურადღებოდ არ დატოვონ გაზის დანადგარები.
დღეს, 13 დეკემბერს, სილქნეტის მობილურ ქსელში ჩართულ მომხმარებლებს საშუალება ექნებათ მრავალფეროვანი შეთავაზებიდან აირჩიონ ერთი ან რამდენიმე პაკეტი.
კომბინაციით *202# მსურველი მთელი თვით გაიაქტიურებს სასურველ პირობას:
400 ლოკალური წუთი – 6 ₾
5 GB + 100 ლოკალური წუთი – 7 ₾
700 ლოკალური წუთი – 9 ₾
15 GB უსწრაფესი ინტერნეტი – 10 ₾
30 GB უსწრაფესი ინტერნეტი – 15 ₾
აქციაში ჩართვა შესაძლებელია, როგორც ფიზიკური, ისე იურიდიულ პირებისთვის. ერთზე მეტი პაკეტის შეძენის შემთხვევაში თითოეულს შეუნარჩუნდება ინდივიდუალური ვადა.
მეგაბაიტების ამოწურვის შემთხვევაში, აქციის ვადის ფარგლებში, ისარგებლებთ ტარიფით 1MB=0.15₾ . წუთები არ ვრცელდება გლობალსელის, ასანეტის და სპეც. დანიშნულების ნომრებზე სასაუბროდ.
ბათუმის საკრებულოს წევრები ოპოზიციიდან მერის კაბინეტიდან პოლიციამ ძალის გამოყენებით, მიწოლით, გაიყვანა.
რეზო ხარაზი იმყოფება მერის კაბინეტის კართან და პოლიციას მიმართავს. ის აცხადებს, რომ „კაბინეტში კორუმპირებული ჩინოვნიკები ზიან“ და პოლიციისგან ითხოვს რეაგირებას:
„იქ შეიარაღებული ჩინოვნიკები ზიან, მერს ველაპარაკებოდი და პოლიცია მომიყვანა, რა უნდა ელაპარაკო.“
რეზო ხარაზმა მიმართა ასევე პოლიციის კონკრეტულ მაღალჩინოსანს, რომელიც ძალადობაში დაადანაშაულა:
„ის სულ ძალადობს აქციებზეც, ხან პანჩურს ურტყამს მოქალაქეებს“.
რეზო ხარაზი ამ წუთებში მერის კაბინეტთან სახელმწიფო აუდიტის სამსახურის კრიტიკულ დასკვნას ხმამაღლა კითხულობს.
მერიის შენობაში აჭარის უმაღლესი საბჭოს წევრები ოპოზიციიდან ლევან ანთაძე და ელგუჯა ბაგრატიონიც მივიდნენ.
ბათუმის საკრებულოს ოპოზიცია დღეს, 13 დეკემბერს, დილიდან მერიაში აქციას მართავს. საკრებულოს წევრები მუნიციპალური ინსპექციის უფროსის მოადგილისა და ბიზნესმენს შორის დაპირისპირების შემდეგ, მერისგან რეაგირებას ითხოვენ.
13 დეკემბრის მონაცემებით, საქართველოში დადასტურდა კოვიდის 1 527 ახალი შემთხვევა. ჩატარდა 21 264 ტესტი კორონავირუსზე.
გასულ 24 საათში 46 პაციენტი გარდაიცვალა კოვიდით.
დღეს ქვეყანაში გამოვლენილი ინფიცირების 1 527 ახალი შემთხვევიდან თბილისში გამოვლენილია 775 შემთხვევა, აჭარაში – 97, იმერეთში – 216, ქვემო ქართლში – 71, შიდა ქართლში – 98, გურიაში – 23, სამეგრელო – ზემო სვანეთში – 119, კახეთში – 65, მცხეთა-მთიანეთში – 32, სამცხე-ჯავახეთში – 27, რაჭა-ლეჩხუმსა და ქვემო სვანეთში -4.
12 დეკემბრის ნოემბრის მდგომარეობით, დადებითობის დღიური მაჩვენებელი არის 7.18%, ბოლო 14 დღის მანძილზე – 7.80% ხოლო 7 დღის მანძილზე – 7.45%.
ბათუმის საკრებულოს ოპოზიცია მერიაში აქციას მართავს. საკრებულოს წევრები მუნიციპალური ინსპექციის უფროსის მოადგილისა და ბიზნესმენს შორის დაპირისპირების შემდეგ მერისგან რეაგირებას ითხოვენ.
„იარაღით უნდა ირბინონ მერიის თანამშრომლებმა – მიიღე გადაწყვეტილება?“ – მიმართეს საკრებულოს წევრებმა მერს.
ამ წუთებში საკრებულოს წევრები მერის კაბინეტში იმყოფებიან. ოპოზიციის წევრებმა მერიაში მიიტანეს გოგოლის ქუჩაზე მიმდინარე უკანონო მშენებლობის ფოტოები.
გარდა ამისა, საკრებულოს წევრებმა მერს აუდიტის კრიტიკული დასკვნა შეახსენეს.
ბიზნესმენი მერაბ ფარტენაძე ამბობს, რომ მერიის მაღალჩინოსანი, ბესო ცეცხლაძე მას იარაღით დაემუქრა, გავრცელდა დაპირისპირების კადრებიც.
„119 მშენებლობიდან 50-მდე არის უკანონო. ეს წერია აუდიტის დასკვნაში. ჩინური კვარტალი, რომელსაც აშენებენ ბათუმში, ეს არის კორუფცია. ამბასადორი რომ უკანონოდ აშენებს ბათუმის ბულვარში, ესეც არის უკანონობა. მერიის თანამშრომელი ბესო ცეცხლაძე რომ იარაღით დარბის ქუჩებში, ეს არის ბანდფორმირება მერიაში“, – აცხადებს რეზო ხარაზი, ენმ-ს წევრი ბათუმის საკრებულოში“.
შსს-ს ინფორმაციით, ფაქტთან დაკავშირებით დაიწყო გამოძიება, ბიზნესმენი გამოკითხვაზეც იმყოფებოდა, გამოკითხეს ბესო ცეცხლაძეც.
ამ საკითხთან დაკავშირებით არჩილ ჩიქოვანმა განმარტა „ბათუმელებთან“ ჩართვის დროს. მერი ამბობს, რომ დარღვევასთან დაკავშირებით მიმდინარეობს საქმის წარმოება, ადგილზე შემოწმებისას მუნიციპალურ ინსპექციას გაუწიეს წინააღმდეგობა, თუ რა მოხდა კონკრეტულად, ამას დაადგენს გამოძიება.
ბათუმელი მარიტა ცეცხლაძე 16 წლისაა, მას სხვადასხვა სატელევიზიო მუსიკალური შოუებიდან უკვე იცნობენ.
ბოლო შოუ, რომელშიც მარიტა მონაწილეობდა, „ვოისი“ იყო. მანამდე კი იყო „X ფაქტორი“, სადაც მარიტამ 12 წლის ასაკში მიიღო მონაწილეობა.
ახლა მარიტა აბიტურიენტია, ბათუმის #2 საჯარო სკოლაში, XII კლასში სწავლობს და სტუდენტობისთვის ემზადება. პარალელურად ზაქარია ფალიაშვილის პირველ სამუსიკო სკოლაში იღებს მუსიკალურ განათლებას.
„საბავშვო ბაღში, 3 წლის ასაკში შევასრულე პირველი სოლონომერი და იქიდან მოყოლებული არასდროს შემიწყვეტია სიმღერა.
„სიმღერა ჩემშია. გამუდმებით. ყველა მომენტში, ყველა ადგილას ვმღერი, მაშინაც კი, როცა ჩუმად ვარ,“ – ამბობს მარიტა.
მისი მთავარი სიყვარული ჯაზია.
„ყველა ჟანრი მიყვარს, თუმცა ჯაზი ჩემთვის სხვა განზომილებაა. ჯაზი თავისუფლებაა, თავის თავში ყველა ჟანრს მოიცავს, საზღვრებს არ გიწესებს და იმპროვიზაციის საშუალებას გაძლევს.
ჯაზი ცხოვრებაა, რომელსაც შენ ქმნი და თავად ხარ პასუხისმგებელი სიღრმეებზე, რაც მაყურებლამდე უნდა მიიტანო.
სიმღერის დროს მიჭირს საზღვრების დაწესება. ორჯერ ერთი და იმავე სიმღერის ერთნაირად შესრულება ჩემთვის შეუძლებელია. ჩემი ყველა ნამღერი ემოციურადაც განსხვავებულია,“ – ამბობს მარიტა.
2021 წლის ნოემბერში მარიტას მიერ შესრულებული დუკ ელინგტონის სიმღერა – I Don’t Mean a Thing – „ვოისის“ გლობალური პროექტის 2021 წლის ჯაზის 10 საუკეთესო შესრულებას შორის მოხვდა. მარიტა ამბობს, რომ ეს მისთვის ძალიან დიდი სიხარული იყო.
„ეს ჩემთვის კიდევ ერთი მოულოდნელი სიურპრიზი იყო, რადგან მასშტაბებიდან გამომდინარე ამ შესრულების ნახვა შეუძლიათ მსოფლიოს ნებისმიერ ქვეყანაში. სხვა პროექტებზე ვერაფერს გეტყვით, მაგრამ „ვოისში“ გატარებულმა სამმა თვემ იმაზე მეტი მომცა, ვიდრე აქამდე ჩემს ცხოვრებაში განვლილმა კონკურსებმა,“ – ამბობს მარიტა.
მარიტა ცეცხლაძე
მან გვითხრა, რომ სცენა მისთვის არასდროს ყოფილა უცხო, თუმცა დიდ სატელევიზიო პროექტებში მონაწილეობამ მეტი გამოცილება და თავდაჯერებულობა შესძინა.
„პროექტში გამოჩენამდე ჩემთვის სცენა არც საქართველოში და არც ქვეყნის ფარგლებს გარეთ უცხო არ იყო, მაგრამ სატელევიზიო პროექტი დიდ აუდიტორიას გულისხმობს და ეს ჩემთვის ნამდვილად იყო გამოწვევა. პირველ რიგში საკუთარი თავისთვის უნდა დამემტკიცებინა, რომ მე ეს შემიძლია.
„X ფაქტორის“ დროს 12 წლის ვიყავი. მაშინაც, როგორც „ვოისის“ მიმდინარეობისას, ყველაზე პატარა მონაწილე ვიყავი, მაგრამ ამას ხელი არ შეუშლია თანაბარი კონკურენციისთვის.
ბავშვობიდან ვმონაწილეობდი სხვადასხვა ქვეყნის საერთაშორისო კონკურსებში, მაქვს აღებული 7 გრანპრი. ეს ის შემთხვევაა, როდესაც შენ ხარ შენი ქვეყნის სახე და გეამაყება, როდესაც შენთან ერთად შენი ქვეყანაც იმარჯვებს.
სატელევიზიო პროექტებმა ჩემი ცნობადობა გაზარდა და ამასთანავე დამარწმუნა, რომ ყველაფერი, რაც მოხდა, გუშინდელი დღეა და დღეიდან ახალი ცხოვრება იწყება, სუფთა ფურცლიდან,“ – ამბობს მარიტა.
მარიტას საყვარელი მუსიკოსები არიან ჯაზის შემსრულებლები: დუკ ელინგტონი, ლუი არმსტრონგი, ელა ფიცჯერალდი, ჩეტ ბეიკერი და სხვები. ძალიან უყვარს ევა კესიდი – „ქალი ანგელოზის ხმით“, უიტნი ჰიუსტონი და ჯეიკობ კოლერი – ახალგაზრდა ბრიტანელი მუსიკოსი, რომელიც ბევრ ინსტრუმენტს ფლობს.
„რაც შეეხება ქართველ ჯაზ შემსრულებლებს, ძალიან მიყვარს ბექა გოჩიაშვილი და პაპუნა შარიქაძე. პროექტ „ვოისში“ მონაწილეობით ერთი ოცნება უკვე ავისრულე და ნიკოლოზ რაჭველთან ვითანამშრომლე, დღემდე იგი ჩემი უსაყვარლესი მეგობარია,“ – ამბობს მარიტა.
მარიტა ცეცხლაძე
ახლა მარიტა აბიტურიენტია და მისი სამომავლო გეგმები მუსიკას და ხელოვნებას უკავშირდება. აპირებს უცხოეთში მუსიკალური განათლების მიღებას და უახლოესი გეგმებიც ამის მიხედვით აქვს დალაგებული. ის ახლა სამუსიკო სკოლის მე-9 საფეხურზეა.
„ფორტეპიანოში გენიალური პედაგოგი მყავს, ნანა შალაძე. მისმა პედაგოგიურმა მიდგომებმა განაპირობა ამ ეტაპზე ჩემი სამომავლო გეგმებიც. მან კლასიკური მუსიკის ისეთ სიღრმეებში ჩამახედა, რომ ფორტეპიანომ ჩემს ცხოვრებაში ისეთივე მნიშვნელობა შეიძინა, როგორც სიმღერამ,“ – გვითხრა მარიტამ.
ჯერ არ გადაუწყვეტია სასურველი ფაკულტეტებიდან რომელს შეარჩევს, მაგრამ ერთი რამ ზუსტად იცის – სასწავლებლად ამ ეტაპზე რჩება ბათუმში, თუმცა გვეუბნება, რომ განიხილავს მთელ რიგ შემოთავაზებებს, რომელზეც ჯერ არ სურს საუბარი.
მარიტა ამბობს, რომ ახლა, აბიტურიენტობის პერიოდში, თავისუფალი დრო ფაქტობრივად არ რჩება, „აბიტურიენტობის მიღმა მთელ დროს მხოლოდ მუსიკას ვუთმობ,“ – გვითხრა მან.
გარემოს ეროვნული სააგენტო გაფრთხილებას ავრცელებს მოსალოდნელი ქარიანი ამინდის შესახებ.
„13-15 დეკემბერს შავი ზღვის სანაპირო რაიონებში, ზემო იმერეთში, კოლხეთის დაბლობსა და გორი-სურამის მონაკვეთზე იქროლებს აღმოსავლეთის მიმართულების ძლიერი, დროგამოშვებით ძალიან ძლიერი ქარი,“ – იუწყება სააგენტო.
ბათუმის ახალ რესპუბლიკურ საავადმყოფოს აჭარის ჯანდაცვის სამინისტრო აღარ მართავს. აჭარის მთავრობამ საავადმყოფო მართვაში ა[ა]იპ „საქართველოს სამედიცინო ჰოლდინგს“ გადასცა.
ბათუმის ახალ კლინიკას აჭარის ჯანდაცვის სამინისტრო 2020 წლის 14 აპრილიდან მართავდა, თუმცა აჭარის ფინანსთა და ეკონომიკის სამინისტროსა და აჭარის ჯანდაცვის სამინისტროს შორის გაფორმებული ხელშეკრულება მართვის უფლების გადაცემაზე 2021 წლის 20 ოქტომბრის შეთანხმებით გაუქმდა.
ახალ შეთანხმებაში აღნიშნულია: „მხარეებმა [აჭარის სამინისტროებმა] განაცხადეს, რომ შეთანხმება ზუსტად გამოხატავს მათ ნებას“ და „ერთმანეთის მიმართ პრეტენზიები არ გააჩნიათ“.
აჭარის მთავრობის გადაწყვეტილებით, შპს „ბათუმის რესპუბლიკური კლინიკური საავადმყოფოს“ 100 პროცენტი წილი მართვის უფლებით საქართველოს სამედიცინო ჰოლდინგს 2021 წლის 21 ოქტომბრიდან გადაეცა. თავის მხრივ, სამედიცინო ჰოლდინგს საქართველოს ჯანდაცვის სამინისტრო მართავს.
შპს „ბათუმის რესპუბლიკური კლინიკური საავადმყოფოს“ 100 პროცენტი წილი, დოკუმენტების მიხედვით, ამ დროისთვის აჭარის ავტონომიური რესპუბლიკის საკუთრებაში რჩება.
ბათუმის ახალი კლინიკის საქართველოს სამედიცინო ჰოლდინგისთვის გადაცემაზე საუბარი 2019 წლის ბოლოს დაიწყო:
მოგვიანებით, 2020 წლის მარტში, ცნობილი გახდა, რომ ბათუმის კლინიკა ჰოლდინგს იმ დროისთვის არ გადაეცემოდა, თუმცა მაშინ აჭარის ჯანდაცვის სამინისტროში დაუდასტურეს, რომ „ბათუმის რესპუბლიკური საავადმყოფო ამ ჰოლდინგში აუცილებლად შევიდოდა“.
აჭარის 2022 წლის ბიუჯეტის პროექტთან დაკავშირებით, უმაღლესი საბჭოს საფინანსო-საბიუჯეტო და ეკონომიკურ საკითხთა კომიტეტმა აჭარის მთავრობას მოუწოდა პანდემიის პრევენციის მიზნით დაფინანსება გაეზარდა.
„COVID19 გავრცელების პრევენციის მიზნით განსახორციელებელი საჭირო ღონისძიებისათვის მიზნობრივი დაფინანსების შემცირება, ყოველდღიურად COVID19-ით ინფიცირებულთა მკვეთრი ზრდის გათვალისწინებით, ვფიქრობთ, არამართებულია და საჭიროებს წარმოდგენილ ბიუჯეტის პროექტში აღნიშნული მუხლის ზრდას,“ – აღნიშნულია კომიტეტის შენიშვნაში.
„2021 წლის 21 ოქტომბერს საავადმყოფო მართვის ფუნქციით გადაეცა ა(ა)იპ საქართველოს სამედიცინო ჰოლდინგს, ხოლო არსებული კოვიდსიტუაციის გათვალისწინებით რეგიონში ფუნქციონირებს 2 კოვიდსასტუმრო და 1 საკარანტინე სივრცე, რის გამოც 2022-2025 წწ პროგრამის ბიუჯეტი შემცირებულია“ – აღნიშნულია აჭარის მთავრობის პასუხში.
უმაღლესი საბჭოს შენიშვნების საპასუხოდ მომზადებულ დოკუმენტში აჭარის მთავრობა ასევე აღნიშნავს, რომ „რეგიონში ვაქცინაციის დონე ყველაზე მაღალია. სამიზნე მოსახლეობის 60% უკვე აცრილია. შესაბამისად აჭარაში შემცირებულია ინფიცირების შემთხვევები და ასევე, ინფიცირებულ პირთაგან კოვიდსასტუმროში განთავსებაზე მომართვიანობაც“.
„თუ ახალი შტამებით სიტუაცია რადიკალურად არ დამძიმდება, ამ ეტაპზე არსებულ ინფორმაციაზე დაყრდნობით, ტურიზმისა და კურორტების დეპარტამენტის პროგრამის – „ახალი კორონავირუსის შესაძლო გავრცელების პრევენციის ღონისძიებები“ 2022 წლის ბიუჯეტი განისაზღვრა 3 მილიონი ლარით.
რა თქმა უნდა, გასათვალისწინებელია ვირუსის გავრცელების არასტაბილური ფაქტორი. მომავალ წელს კოვიდის მასშტაბის და გავრცელების პროგნოზირება ამ ეტაპზე შეუძლებელია და არც ჯანდაცვის მსოფლიო ორგანიზაციას აქვს რაიმე ტიპის პროგნოზი გამოქვეყნებული, ამიტომაც აჭარის ტურიზმისა და კურორტების დეპარტამენტი აღნიშნული საკითხის მიმართებაში იმოქმედებს აჭარის ჯანდაცვის სამინისტროსთან, აჭარის ფინანსთა და ეკონომიკის სამინისტროსთან და აჭარის მთავრობასთან შეთანხმებით, სიტუაციის შესაბამისად,“ – აცხადებს აჭარის მთავრობა.
____________________________
ბათუმში ახალი რესპუბლიკური საავადმყოფოს მშენებლობისას ოფიციალურად ითქვა, რომ ის საუნივერსიტეტო კლინიკა იქნებოდა. თუმცა ეს მიმართულება ახალ კლინიკას აღარ აქვს.
ახალმა კლინიკამ ფუნქციონირება 2020 წლის აპრილში დაიწყო და ის ამ პერიოდიდან ძირითადად COVID 19-ის მართვაში იყო ჩართული.
რამდენიმე დღის წინ კი, ბათუმის შოთა რუსთაველის სახელმწიფო უნივერსიტეტმა გამოაცხადა ტენდერი, რომლითაც უნივერსიტეტი არაუმეტეს 120 საწოლზე გათვლილი საუნივერსიტეტო კლინიკის მშენებლობის საპროექტო-სახარჯთაღრიცხვო დოკუმენტაციას შეისყიდის.
ბსუ-ს განცხადებაში აღნიშნულია, რომ საწოლების რაოდენობა „შესაძლოა დაზუსტდეს/შემცირდეს პროექტირების დროს“.
თურქეთის რესპუბლიკაში კორონავირუსის ახალი, ომიკრონის შტამის პირველი შემთხვევები დადასტურდა.
თურქეთის ჯანდაცვის მინისტრის განცხადებით, ომიკრონით ინფიცირების 6 შემთხვევა სტამბოლსა და იზმირის პროვინციაში გამოვლინდა.
ჯანდაცვის მინისტრმა ფაჰრეთინ კოჩამ განაცხადა, რომ ომიკრონით ინფიცირებულ პაციენტებს მსუბუქი სიმპტომები აღენიშნებათ და მათი ჰოსპიტალში გადაყვანა საჭირო არ გამხდარა.
SARS-CoV-2 ვირუსის ახალი შტამი B.1.1.529 პირველად გამოვლინდა სამხრეთ აფრიკაში 8 ნოემბერს აღებულ ნიმუშში, საერთაშორისო ანგარიშგება ჯანმოში მოხდა 24 ნოემბერს, ხოლო 26 ნოემბერს მიენიჭა ვარიანტს შეშფოთების სტატუსი (VOC) და დაერქვა „ომიკრონი“.
აშშ-ში, კენტუკის შტატში, ასამდე ადამიანი მიიჩნევა დაღუპულად გამანადგურებელი ტორნადოს შედეგად.
კენტუკის გუბერნატორი, ენდი ბეშიარი აცხადებს, რომ ეს იყო ყველაზე გამანადგურებელი ტორნადო შტატის ისტორიაში.
ტორნადომ გაანადგურა სანთლების ქარხანა, სადაც დაახლოებით 110 ადამიანი იმყოფებოდა. ქარხანა ნანგრევებად იქცა, ამ დრომდე მოხერხდა 40-მდე ადამიანის გადარჩენა.
შტატში საგანგებო მდგომარეობა გამოცხადდა, დაკარგულების ძებნა გრძელდება.
12 დეკემბრის მონაცემებით, საქართველოში დადასტურდა კოვიდის 2922 ახალი შემთხვევა. ჩატარდა 35 841 ტესტი კორონავირუსზე.
გასულ 24 საათში 36 პაციენტი გარდაიცვალა კოვიდით.
დღეს ქვეყანაში გამოვლენილი ინფიცირების 2 922 ახალი შემთხვევიდან: თბილისში გამოვლენილია 1 380 შემთხვევა, აჭარაში – 162, იმერეთში – 481, ქვემო ქართლში – 178, შიდა ქართლში – 171, გურიაში – 81, სამეგრელო – ზემო სვანეთში – 185, კახეთში – 149, მცხეთა-მთიანეთში – 60, სამცხე-ჯავახეთში – 51, რაჭა-ლეჩხუმსა და ქვემო სვანეთში – 24.
11 დეკემბრის მდგომარეობით, დადებითობის დღიური მაჩვენებელი არის 8.15%, ბოლო 14 დღის მანძილზე – 7.88% ხოლო 7 დღის მანძილზე – 7.42%.
ანგელა მერკელის 16-წლიანი ეპოქის დასრულების შემდეგ, სოციალ-დემოკრატების, მწვანეებისა და თავისუფალ დემოკრატთა პარტიების კოალიციამ ოლაფ შოლცი აირჩია კანცლერად. პოლიტიკური კომენტატორების ნაწილის აზრით, ოლაფ შოლცმა გერმანელი ამომრჩეველი დაარწმუნა, რომ ანგელა მერკელს დაემსგავსებოდა და მის წარმატებაც სწორედ ამან განაპირობა.
როგორც მერკელისა და შოლცის გრძელვადიანი პოლიტიკური დამკვირვებელი, რობინ ალექსანდრე ხსნის, “შოლცი ჰგავს ფეხბურთელს, რომელიც სწავლობდა სხვა მოთამაშის ვიდეოებს და ამის მიხედვით ცვლიდა თავის თამაშს.”
63 წლის სოციალ-დემოკრატი შოლცი ნაცნობი სახეა გერმანიის პოლიტიკაში. იგი 20 წელზე მეტ ხანს მსახურობდა ჯერ შროდერისა და შემდეგ მერკელის მთავრობებში. ბოლოს ის მერკელის ქრისტიანულ-დემოკრატიული პარტიის ფინანსთა მინისტრი იყო.
გზა კანცლერობამდე
შოლცი დაიბადა ოსნაბრიუკში, ჩრდილოეთ გერმანიაში. გაიზარდა ჰამბურგში, ქალაქში, რომელშიც მოგვიანებით მერის პოსტზე მუშაობდა. ბაბუა რკინიგზელი იყო, მშობლები ტექსტილში მუშაობდნენ. ის და მისი ძმები იყვნენ პირველები ოჯახში, ვინც უნივერსიტეტში წავიდა.
ჯერ კიდევ საშუალო სკოლაში სწავლობდა, როცა სოციალ-დემოკრატებს შეუერთდა. ახალგაზრდა სოციალისტმა ათი წელი იმუშავა შრომითი უფლებების იურისტად და იცავდა მუშებს, რომლებსაც ქარხნების დახურვის გამო სამსახურის დაკარგვა ემუქრებოდათ.
სოციალ-დემოკრატების პარტიის გენერალური მდივნის, გერჰარდ შროდერის ადმინისტრაციაში მუშაობის დროს, შოლცი ისეთი ეფექტიანობით იცავდა შრომის ბაზრის მტკივნეულ რეფორმებს, რომ მას მეტსახელი “Scholzomat” (შოლცის ავტომატი) შეარქვეს.
2005 წელს შროდერის მთავრობა დამარცხდა და სოციალ-დემოკრატიული პარტია ანგელა მერკელის უმცროსი მმართველი პარტნიორი გახდა. 2007 წელს შოლცი დაინიშნა შრომისა და სოციალური საკითხების მინისტრად. 2008 წლის გლობალური ფინანსური კრიზისის დროს, მან ხელი შეუწყო „მოკლევადიანი დასაქმების“ პროგრამის განხორციელებას. ამ პროგრამამ გერმანიას უმუშევრობის კატასტროფა ააცილა. 2011 წელს ის ჰამბურგის არჩევნებში სოციალ-დემოკრატებს წარუძღვა და 2011 წლიდან 2018 წლამდე ჰამბურგის მერად მსახურობდა. 2018 წელს ფინანსთა მინისტრი და ვიცე-კანცლერი გახდა.
2019 წელს შოლცმა სოციალ-დემოკრატიული პარტიის თავმჯდომარეობა სცადა. ის პარტიის კონსერვატიულ ნაწილს წარმოადგენდა. აღიქმებდა პოლიტიკურ ქამელეონად და პრაგმატულ პოლიტიკოსად, რომელიც ადვილად იცვლის პოზიციას მარცხნიდან მარჯვნივ.
პოლიტიკური კომენტატორების აზრით, სწორედ ამან განაპირობა მისი დამარცხება პარტიის თავმჯდომარეობისთვის ბრძოლაში სასკია ესკენთან და ნორბერტ ვალტერ-ბორიანსთან, რომლებიც პარტიის უფრო მემარცხენე პოლიტიკას აძლიერებდნენ.
მაგრამ 2020 წლის აგვისტოში სწორედ ესკენმა და ვოლტერ-ბორიანსმა წარადგინეს ის კანცლერობის კანდიდატად.
ზოგიერთი პოლიტიკური კომენტატორი, პარტიის მხრიდან შოლცის მიმართ პოზიციის ცვლილებას, პანდემიის დროს ასეულობით მილიარდი ევროს დახმარების მიზნით გამოყოფას შოლცს მიაწერს.
როგორ პოლიტიკას უნდა ველოდოთ შოლცისგან?
ზოგი იმედოვნებს, რომ პანდემიის დროს ფინანსური მხარდაჭერის პოლიტიკაში მისი როლი და წინასაარჩევნო კამპანიაში რიგითიმოქალაქეების წინ წამოწევა იმის ნიშანია, რომ შოლცი, რომელიც აქამდე პოსტიდეოლოგიურ ცენტრისტად მიიჩნევდა თავს, შესაძლოა, უფრო რადიკალურ მემარცხენეობას დაუბრუნდეს.
შოლცი სკეპტიკურად უყურებს ბაიდენის პოლიტიკას. როგორც ერთ-ერთ ინტერვიუში განაცხადა, ბაიდენის პოლიტიკა არის „უპირველესად ამერიკა“-ს უფრო თავაზიანი ვერსია. ამიტომ ენერგიას ევროკავშირის გაძლიერებაზე გაამახვილებს, ამბობენ მისი მრჩევლები.
რას უნდა ველოდოთ რუსეთთან მიმართებაში? Financial Times თანახმად, რუსეთი პირველ საგარეო პოლიტიკურ გამოცდას უწყობს გერმანიის მომავალ კანცლერს, ოლაფ შოლცს და მის „შუქნიშან კოალიციას“ – სოციალ-დემოკრატების, მწვანეებისა და ლიბერალების მთავრობას. ეს იქნება ადრეული მინიშნება იმაზე, თუ როგორ გადაუხვევს ახალი მთავრობა მოთმინების დიპლომატიას და ანგელა მერკელის წლების განმავლობაში მხარდაჭერილი მდგრადი ჩართულობის პოლიტიკას.
„ევროკავშირში ანგელა მერკელის მსგავსად სხვას არავის შეეძლო ვლადიმერ პუტინთან გამკლავება უკანა არხებით“, – ამბობს კატრინ კლუვერ ეშბრუკი, გერმანიის საგარეო ურთიერთობათა საბჭოს დირექტორი.
მისივე აზრით, ეს ასევე გამოცდის იმ არგუმენტებს, რომლებიც ბერლინის საგარეო პოლიტიკის კრიტიკოსებმა შემოგვთავაზეს. კერძოდ, არგუმენტები ეხება თავისი გიგანტი მეზობლის მიმართ გერმანიის საუკუნოვან შიშებს, სენტიმენტებსა და დანაშაულის გრძნობას. ამ ყველაფრის გამო გერმანია ვერ ხედავს მოსკოვის რეალურ განზრახვებს.
„გერმანიის ისტორიით განპირობებულმა რეფლექსებმა დაამახინჯა მისი შეხედულება რუსეთის შესახებ და გავლენას ახდენს მისი ქცევაზე“, – ამტკიცებს ჯონ ლაფი თავის ახალ წიგნში, „გერმანიის რუსული პრობლემა“.
გასულ თვეში გამოქვეყნებული კოალიციური კონტრაქტი ასახავს მწვანეთა უფრო მკვეთრ შეხედულებებს პუტინის პოლიტიკის საფრთხეებზე საერთაშორისო მშვიდობისა და სამოქალაქო თავისუფლებების შეზღუდვის შესახებ. რუსეთთან ურთიერთობა, დიქტატორის წინააღმდეგ ბრძოლაში ბელორუსი ხალხის მხარდაჭერისა და უკრაინის ტერიტორიული მთლიანობის საკითხის შემდეგ მოდის. ეს ნიშნავს, რომ გერმანია აღიარებას ევროკავშირის პარტნიორების უსაფრთხოების უფრო ღრმა შეშფოთების.
„ჩვენ გავითვალისწინებთ საფრთხის განსხვავებულ აღქმას და ყურადღებას გავამახვილებთ რუსეთის მიმართ ევროკავშირის საერთო და თანმიმდევრულ პოლიტიკაზე“, – ნათქვამია განცხადებაში. მასში ასევე აღნიშნულია კონსტრუქციული დიალოგისა და ჩართულობის შესახებ. ის ბერლინს ავალდებულებს, „მიხედოს ორივე მხარის ინტერესებს“, როდესაც საქმე ეხება საერთაშორისო უსაფრთხოებას – ფორმულირება, რომელიც ატარებს ეგრეთ წოდებულ Putinversteher-ს, ანუ პუტინის ჩურჩულის ანაბეჭდებს შოლცის პარტიაში.
კონტრაქტში არაფერია ნახსენები „ჩრდილოეთის ნაკადი 2-ის“ შეჩერებაზე, როგორც ეს მწვანეებს სურდათ. ამის ნაცვლად, მილსადენის საკითხი გადაეცა გერმანიის ქსელის მარეგულირებელს, რომელსაც შეუძლია პროექტი დაამტკიცოს მხოლოდ იმ შემთხვევაში, თუ იგი სრულად შეესაბამება ევროკავშირის ენერგეტიკულ კანონმდებლობას, რომელიც მოითხოვს მილსადენის საკუთრების განცალკევებას და ფასების გამჭვირვალობას.
ამან გააძლიერა პროექტის კრიტიკოსების, განსაკუთრებით უკრაინის გაზის ოპერატორის იმედები, რომელიც ბალტიის ზღვის მილსადენის გაგრძელების შემთხვევაში სატრანზიტო შემოსავლიდან მილიარდებს დაკარგავს.
შოლცმა, როგორც ყოფილმა ფინანსთა მინისტრმა, შესაძლოა უკეთ გაუძლოს ბიზნესის ზეწოლას რუსეთის წინააღმდეგ უფრო ღრმა ეკონომიკური სანქციების დაწესებაზე. მაგრამ ნაკლებად სავარაუდოა, რომ გერმანია იქცეს რუსული აგრესიის წინააღმდეგ ფოლადის შემაკავებელ ძალად.
საერთაშორისო საზოგადოება ყურადღებით ადევნებს თვალს, რა პოზიციას დაიჭერს გერმანიის ახალი კანცლერი რუსეთ-უკრაინის საზღვარზე მიმდინარე კრიზისში. შოლცი გამოეხმაურა უკრაინის საზღვარზე რუსული ჯარების მოძრაობას. მისი პოზიციაა რუსეთს „ძალიან ნათლად“ განუცხადოს, რომ უკრაინის მიმართ შემდგომი მუქარა მიუღებელია.
ახალმა კანცლერმა რუსეთ-უკრაინის საზღვარზე არსებული დაძაბული სიტუაციაზე საუბრისას თქვა, რომ საჭიროა დეესკალაციის პრინციპების დაცვა. “ამაში შედის საზღვრების ხელშეუხებლობა. ძალიან, ძალიან მნიშვნელოვანია, რომ არავინ იჭრება ისტორიის წიგნებში საზღვრების გადახაზვის მცდელობით”, – თქვა მან. – „ამიტომ, ძალიან, ძალიან ცხადი უნდა იყოს, რომ მიუღებელი იქნება, თუკი უკრაინას საფრთხე დაემუქრება“.
____
სტატია უცხოურ მედიაზე დაყრდნობით მოამზადა ნია კალანდაძემ
60 წლის პენსიონერი, ლიანა ცინცაძე წლებია გარე მოვაჭრეა. ბავშვობაში დედას ეხმარებოდა ვაჭრობაში, დღეს კი სრულიად მარტოა დახლთან და ყვავილებს, სანთლებსა და სხვა წვრილმანებს ყიდის ყოველდღე.
საკუთარი თავისთვის ფულს ვერასდროს იმეტებს, არ ახსოვს, ბოლოს რა ნივთი შეიძინა. დიდი ხანია უნდა ინახულოს შვილები, რომლებიც არ ცხოვრობენ ბათუმში, მაგრამ ვერ ახერხებს. ლიანა ამბობს, რომ მოგზაურობა მისთვის სახიფათოა, რადგან გული აწუხებს.
ლიანა ცინცაძის დღე ადრე დილით იწყება, სახლიდან ვაჭრობის ადგილას ეზიდება გასაყიდ ნივთებსა და მცენარეებს. ლიანას კუთხის თაროები ერთმანეთზე დაწყობილი მუყაოსა და ხის პატარ-პატარა ყუთებია. დახლის მოწყობის შემდეგ ლიანა პატარა სკამში მოკალათდება და გამვლელ-გამომვლელის თვალიერებას იწყებს, გვიან ღამემდე ელოდება მყიდველს.
ლიანას განსაკუთრებით ახარებს, როცა მცენარეებს ყიდულობენ მისგან. უამრავ რჩევას აძლევს ყვავილების მყიდველებს, თუ როგორ უნდა მოუარონ, გაზარდონ და გაახარონ მცენარეები.
ბათუმში ხშირად წვიმს. ლიანა თავის დახლს ცელოფნით ფარავს, თუმცა ეს არ არის საკმარისი წვიმისა და ქარის შესაკავებლად. ხშირად სველდება და სცივა. ამბობს, რომ ბევრი ტანსაცმლის ჩაცმა არ შველის სიცივეს, განსაკუთრებით ბათუმურ თავსხმა წვიმაში.
ლიანა „ბათუმელებს“ თვის მთავარ საზრუნავზეც ესაუბრა, ბავშვებს ჯანმრთელობის პრობლემები აქვთ და მუდმივი მასაჟი სჭირდებათ, სახელმწიფო პროგრამით სარგებლობენ, მაგრამ არ არის საკმარისიო.
როგორც ქალი ამბობს, კერძო მასაჟი აქამდე 40 ლარი ღირდა. წუხს, რომ შეიძლება ახლა კიდევ უფრო გაძვირდა. „არადა, ბავშვების ფიზიკური განვითარებისთვის გამოსავალი მხოლოდ ეს არის – მასაჟი“.
ლიანას სხვა არაერთი სადარდებელიც აქვს – წამლების ფასებზე სწუხს. ამბობს, რომ წამალი მასაც სჭირდება და ბავშვებსაც. „სოციალური კი აქვთ ბავშვებს, მაგრამ ჭამა ხომ უნდათ? წამალი რითი ვიყიდოთო?“
ბოლოს რა იყიდეთ თქვენთვის და როდის? – ეს იყო კითხვა, რაზე პასუხის გაცემა ყველაზე მეტად გაუჭირდა ლიანას. ამბობს, რომ 1-2-ლარიანი „ნასკის“ ყიდვის უფლებას თუ მისცემს საკუთარ თავს, სხვა რამ კი წლებია არ შეუძენია.
კიდევ ერთი კითხვა, რომელმაც პენსიონერ ქალს საფიქრალი გაუჩინა, იყო მოგზაურობაზე თუ უოცნებია – სხვადასხვა ქვეყანაში წასვლასა და დათვალიერებაზე. თქვა, რომ არა – ჯანმრთელობა ხელს არ უწყობს, ახლო-მახლოში თუ გადავალ, ეგ არის ჩემი მოგზაურობაო.
კორონავირუსის პანდემიამდე საზღვრებს მიღმა, სეზონურ სამუშაოზე ასობით ბავშვი მუშაობდა. ბავშვები თხილისა და ჩაის საკრეფად მშობლებთან ერთად გადადიოდნენ და იქ სეზონის დასრულებამდე რჩებოდნენ.
სანდრა ხალვაში 17 წლის აბიტურიენტია ბათუმიდან. 13 წლის იყო, როცა მშობლებთან ერთად სამუშაოდ წავიდა თურქეთში, სამსუნთან ახლოს, თხილის საკრეფად. იმ ზაფხულის ცხელი აგვისტო სანდრამ თხილის კრეფაში გაატარა, საქართველოში დაბრუნებულმა კი გამომუშავებული ფულით ტელეფონი იყიდა.
„ჩემი მშობლები საქართველოში დასაქმებულები არიან, მაგრამ აგვისტოს თვეში ყოველთვის მამაჩემი იღებდა შვებულებას იმის გამო, რომ იქ უფრო მეტს აკეთებდა, ვიდრე აქ, იმ ერთ თვეში. თავიდან ჩემი უფროსი და იყო წასული. ჩამოვიდა და დავინახე, რომ საკუთარი ფულით, რაც უნდოდა იმას ყიდულობდა. მეც მომინდა. ჩემს მშობლებს ვერ მოვთხოვდი მომეცი ტელეფონის ფული, როცა ვთქვათ იქ ტანსაცმლის ყიდვა იყო საჭირო.
თან მაინტერესებდა რას მუშაობდნენ, რას აკეთებდნენ წლების მანძილზე ჩემი მშობლები. თეორიულად კი ვიცოდი, მაგრამ პრაქტიკულად მინდოდა გამომეცადა,“ – ასე იხსენებს სანდრა იმ ზაფხულს, მშობლებს თურქეთში სამუშაოდ წაყვანა რომ სთხოვა.
სამუშაო შავიზღვისპირა ქალაქ სამსუნთან ახლოს სოფელში იყო, იქ 35 დღის განმავლობაში სანდრა მშობლებთან ერთად თხილს კრეფდა. ეს იყო მისი პირველი სამუშაო გამოცდილება.
„მახსოვს, რომ დილით ადგომა, როცა ძილი ყველაზე მეტად მიყვარს, არ გამჭირვებია. მახსოვს, უფროსები, რომლებიც იქ იყვნენ, თვითონ თურქები, არასოდეს გვიშვებდნენ ისეთ ადგილებში, სადაც მუშაობა შეიძლება სახიფათო ყოფილიყო ბავშვისთვის ან მოხუცებისთვის. ვგულისხმობ ხრიოკ, ციცაბო, სახიფათო ადგილებს. დილის ექვსზე ვდგებოდით, შვიდზე უნდა ვყოფილიყავით სამუშაოზე. საღამოს ექვსზე ვამთავრებდით. შუალედში დასვენებაც გამოდიოდა.
ვერ ვიტყვი, რომ ის 35 დღე გამიჭირდა. პირიქით, ყოველი დღე მოტივაციას მაძლევდა, როდესაც ჩემს მიერ შედგენილ კალენდარში მორიგ დღეს გადავხაზავდი ხოლმე და ვამბობდი, აი, დღეს ამდენი ფული მაქვს. ხვალ ამდენი მექნება…“ – იხსენებს სანდრა.
სანდრას თქმით, მიუხედავად დღის განმავლობაში თავაუღებელი შრომისა, ის ზაფხული მაინც კარგად ახსოვს.
„მარტო შრომა არ იყო. გართობაც იყო. საღამოობით როდესაც ვბრუნდებოდით, ტანსაცმელს გამოვიცვლიდით, ვთამაშობდით, ვსაუბრობდით, ვერთობოდით. როცა ჩამოვედი უკვე სკოლის დაწყების დრო იყო. ჩემი კლასელები მეკითხებოდნენ – როგორი იყო? როგორ დგებოდი დილით? არ გიჭირდა? კარგად მახსოვს ჩემი დირექტორის რეაქცია, მასწავლებელს უთხრა სანდრა ახალი ჩამოსულია თურქეთიდან და მოდი ბევრი დავალებებით არ დატვირთოო. მეორე წელსაც ვიყავი წასული. მეორე წელს ისე არ გაამართლა, როგორც პირველ წელს. პირველად თუ 35 დღე ვიყავი, მეორე წელს 15 დღე დავრჩით მხოლოდ,“ – იხსენებს სანდრა.
კითხვაზე რა შეცვალა იმ ზაფხულმა მის ცხოვრებაში, როცა მუშაობა დაიწყო, სანდრა ამბობს, რომ შრომის ფასი ისწავლა.
„ჩემი აზრით, ცხოვრება მარტო გართობა არ არის. ვფიქრობ, ბავშვობიდანვე უნდა მიეჩვიოს ადამიანი ფულის გამომუშავებას, რომ გაიგო ფულის ყადრი. როცა მშობლების ხარჯზე ცხოვრობ, ზრდასრულ ასაკში გიჭირს შენი იშოვო, რადგან სხვანაირად ხარ მიჩვეული. მიჩვეული ხარ, რომ ყოველთვის მშობელმა მოგცეს, ყოველთვის მისი უნდა გამოიყენო. როცა ბავშვობიდან ეჩვევი, ნელ-ნელა იზრდები და იცი როგორ უნდა იშოვო ფული.
ვერ ვიტყვი, რომ როგორც ბავშვმა ფუჭად დავკარგე ის ზაფხული. პირიქით, დიდი გამოცდილება მივიღე. წიგნები მქონდა წაღებული. როცა წვიმდა, წიგნებს ვკითხულობდი. წერა მიყვარს, მაგრამ წერით ვეღარ ვწერდი. მაინც ფიზიკური შრომა მიწევდა, ხელები დაკავებული მქონდა მთელი დღე და აღარ შემეძლო წერა,“ – ამბობს სანდრა.
მიუხედავად იმისა, რომ აბიტურიენტია, სანდრა მუშაობას ბათუმშიც აგრძელებს. ზაფხულობით მუშაობს მიმტანად, არიგებს ფლაერებს, მუშაობს სტადიონზე ბილეთების შემმოწმებლად.
სანდრას ვკითხეთ, რა განასხვავებს შრომას საქართველოსა და საზღვარგარეთ მისთვის.
„საქართველოში მაინც შენს მშობლიურ მიწაზე ხარ, სხვანაირი შეგრძნებაა. იქ რომ მიდიხარ, უფრო მეტი შიშის გრძნობა გაქვს. უფროსები როგორ მოიქცევიან. როგორი უფროსი გეყოლება. შეიძლება ისეთი ხელმძღვანელი შეგხვდეს, რომ მთელი თვე შიშის ქვეშ იყო. თუმცა საქართველოში ზოგჯერ უფრო კაპასი უფროსები გვყავს, ვიდრე იქ,“ – ამბობს სანდრა და აგრძელებს:
„როგორც არ უნდა მჭირდებოდეს, ჩემს მშობლებს ფულს ვერ ვთხოვ. სულ მერიდება ხოლმე.
დედაჩემს დღემდე ფიზიკურად მუშაობს, სახსრები აწუხებს. რთულია ადგე და უთხრა – მე მჭირდება ფული მეგობრის დაბადების დღისთვის ან რაღაცისთვის. არ არის მარტივი საქმე ფულის შოვნა და მუშაობა. ხანდახან მაინც მიწევს ხოლმე, მაგრამ ძირითადად ვცდილობ პატარ-პატარა სამუშაოები ვიპოვო – ფლაიერების დარიგება იქნება ეს თუ სტადიონზე, ბილეთების გატარება.
ვცდილობ, ისეთ ადამიანებთან მქონდეს კონტაქტი, ვინც დამასაქმებს სეზონურად. რთულია სხვას მოსთხოვო, როცა იცი, რომ არც მას ულხინს ცხოვრებაში“.
აპირებს ფილოლოგი გახდეს, თუმცა ჯერ საბოლოო არჩევანი არ გაუკეთებია ქართულ ფილოლოგიას აირჩევს თუ ინგლისურს. უფრო ინგლისური უნდა, რადგან ფიქრობს საზღვარგარეთ წასვლის ასე უფრო დიდი შანსი ექნება.
„ჩემი ოცნება არის საზღვარგარეთ მოგზაურობა, თუნდაც იქ დასაქმება. იქ უფრო მეტი პერსპექტივაა, ვიდრე საქართველოში. ყველა გარბის საქართველოდან თუ დააკვირდებით, ურჩევნიათ ემიგრაციაში იცხოვრონ, იმუშაონ. ფული გჭირდება იმისათვის, რომ იცხოვრო. საქართველოში ცოტა რთულადაა საქმე. რითი უნდა ირჩინო თავი, როცა ყველაფრის ფასი მირბის ზემოთ და ხელფასები ქვემოთ?
თუ ქართულის მასწავლებელი გავხდები, ალბათ ბავშვებთან ისეთი ვიქნები, რომ ბავშვობიდანვე ვასწავლი არამარტო სამუშაოს მიმართ, არამედ სკოლის მიმართაც სიყვარულს. ძალიან ბევრი ბავშვია, რომელიც სკოლას ვერ იტანს. სინამდვილეში არც ისე საძულველია სკოლა და მინდა ეს სხვანაირადაც ვაჩვენო ბავშვებს. მთავარი ოცნება მაინც ისაა, რომ ჯერ სტუდენტი გავხდე.
ვიცი, ოცნებების ასახდენად მე თვითონ უნდა ვიშრომო და ვიბრძოლო, იმიტომ, რომ ეს ცხოვრება არის ნამდვილი ბრძოლა“.
ბათუმის მერია მიუსაფარი ცხოველების მოვლის მომსახურებას შეისყიდის, შესყიდვის ღირებულება 351 700 ლარია, წინადადებების მიღება 2021 წლის 20 დეკემბერს უნდა დასრულდეს, თუმცა მომსახურებას მერია 2022 წლის ბიუჯეტიდან დააფინანსებს.
სატენდერო დოკუმენტების მიხედვით გამარჯვებულმა კომპანიამ საჭიროების შემთხვევაში მიუსაფარი ცხოველების, ძირითადად კატებისა და ძაღლების მოვლის მომსახურებების ვალდებულება უნდა აიღოს.
ბათუმის ტერიტორიიდან [სულ-2600] უმეთვალყურეო, უპატრონო შინაური ბინადარი ცხოველების (ზრდასრული ძაღლი, კატა) დაჭერა და ტრანსპორტირება, სტერილიზაცია, კასტრაცია, კვება, ვაქცინაციასთან დაკავშირებული პროცედურები (ვაქცინაცია, დაბირკვა ან/და ტატუირება), საჭიროების შემთხვევაში კლინიკაში შეყვანილი ცხოველების ევთანაზია (ჰუმანური დაძინება ნარკოზით), ტრავმირებული ცხოველის მკურნალობა მ/შ ოპერაციული მკურნალობა. – ნათქვამია სატენდერო დოკუმენტებში.
სატენდერო დოკუმენტებში გაწერილია ასევე სხვადასხვა ტიპის მომსaხურებების პირობები. გარდა ამისა მერიის მოთხოვნით ვეტერინალურ კლინიკაში, რომელიც გამარჯვებულ კომპანიას მოემსახურება უნდა ფუნქციონირებდეს ცხელი ხაზი დილის 9:00 საათიდან საღამოს 18:00 საათამდე, გარდა კვირისა და დასვენების დღეებისა.
მიუსაფარი ცხოველების მიმართ არასათანადო მოპყრობას ბათუმში აქციებით აპროტესტებდნენ, ამ საკითხზე ცხოველების დამცველები 2021 წლის ზაფხულში ბათუმის მერისა მოვალეობის შემსრულებელს არჩილ ჩიქოვანსაც შეხვდნენ. ეს შეხვედრა მას შემდეგ შედგა, როცა ბათუმის ცენტრიდან მიუსაფარი ძაღლები ბათუმის ნაგავსაყარზე წაიყვანეს, ტურისტების თვალს მოარიდეს.
ბათუმის შოთა რუსთაველის სახელმწიფო უნივერსიტეტი არაუმეტეს 120 საწოლზე გათვლილი საუნივერსიტეტო კლინიკის მშენებლობის საპროექტო–სახარჯთაღრიცხვო დოკუმენტაციას შეისყიდის. უნივერსიტეტმა პროექტის შესყიდვაზე ტენდერი 100 ათასი ლარით გამოაცხადა. განცხადებაში აღნიშნულია, რომ საწოლების რაოდენობა „შესაძლოა დაზუსტდეს/შემცირდეს პროექტირების დროს“.
განმარტებითი ბარათის მიხედვით, საუნივერსიტეტო სტაციონარი, ეს არის „სამედიცინო პროფილის უმაღლესი საგანმანათლებლო დაწესებულების კუთვნილი, მრავალპროფილიანი, შესაბამისი მატერიალურ-ტექნიკური ბაზის მქონე, კვალიფიციური ექიმებითა და აკადემიური პერსონალით დაკომპლექტებული სტაციონარული სამედიცინო დაწესებულება, რომელშიც მიმდინარეობს დიპლომამდელი და დიპლომისშემდგომი სამედიცინო განათლება და სამეცნიერო კვლევა; საუნივერსიტეტო კლინიკა, იმავდროულად, წარმოადგენს რეფერალურ მრავალპროფილიან (მ.შ. პედიატრიულ) სტაციონარს.“
უნივერსიტეტის ინფორმაციით, სასწავლებელში ხორციელდება „ფიზიკური მედიცინის და სამედიცინო რეაბილიტაციის“ საბაკალავრო საგანმანათლებლო პროგრამა და უნივერსიტეტი ამ მიმართულებით ამზადებს კადრებს, შესაბამისად კლინიკაში გათვალისწინებული უნდა იყოს რეაბილიტაციის ცენტრი. ასევე, ვინაიდან საუნივერსიტეტო სივრცეში ყურადღება ექცევა სამეცნიერო კველვების წარმართვას, საუნივერსიტეტო კლინიკაში უნდა გამოიყოს გარკვული სივრცე კლინიკური კველევებისთვის“.
[toggle title=”საუნივერსიტეტო სტაციონარის შესახებ ვრცლად ნახეთ აქ“]რეფერალური მრავალპროფილიანი სტაციონარი (ქვეტიპი „AD“) – რომელშიც 24 საათის განმავლობაში უზრუნველყოფილია სრული ამბულატორიულ სადიაგნოსტიკო, IV დონის გადაუდებელი სამედიცინო დახმარების (მათ შორის, ტრავმის/დაზიანების მართვის IV დონის) სერვისის, სამივე (I, II და III) დონის ინტენსიური მოვლის, III დონის ქირურგიული, III დონის პერინატალური (სამეანო და ნეონატოლოგიური (ასეთი სერვისის განხორციელების
შემთხვევაში), III დონის კარდიოლოგიური და III დონის ნევროლოგიური სერვისების მიწოდება.
იგი წარმოადგენს რეფერალის ბოლო საფეხურს როგორც გადაუდებელი დახმარების, ასევე, ბაზისური და მთელი რიგი სპეციალიზებული სერვისების მიწოდების თვალსაზრისით. ასევე, ის შეიძლება აწვდიდეს ხანგრძლივი მოვლის სერვისებს. შესაბამისი მოთხოვნების დაკმაყოფილების შემთხვევაში მას, ასევე, შეუძლია აწარმოოს სხვა დამატებითი სერვის(ებ)ი.
ბავშვთა სერვისების წარმოება შესაძლებელია მხოლოდ შესაბამისი სპეციალისტების არსებობის შემთხვევაში; ქვეტიპი „AD“ – სერვისები: EmergIV + TrIV +SurgIII+ PerIII7 +ICUI,II,III + CorIII + NeurIII;
IV დონე – პაციენტისათვის 24 საათის მანძილზე ხორციელდება ყოველმხრივი გადაუდებელი დახმარების აღმოჩენა. გადაუდებელი სამედიცინო დახმარების ერთეულში მორიგეობს კანონმდებლობით განსაზღვრული შესაბამისი კვალიფიკაციის ექიმი-სპეციალისტ(ებ)ი. ამ დონეზე ხორციელდება: თერაპიული, ქირურგიული (მ.შ. ნეიროქირურგია), ტრავმატოლოგიაორთოპედიული, სამეანო-გინეკოლოგიური, პედიატრიული, რეანიმატოლოგიაანესთეზიოლოგიური სერვისების მიწოდება ადგილზე. გასათვალისწინებელია, რომ გადაუდებელი სამედიცინო დახმარების ცენტრმა/დეპარტამენტმა, საჭიროების შემთხვევაში,
უნდა უზრუნველყოს – სხვა ექიმსპეციალისტთა (მ.შ. ხელშეკრულებით განხორციელებული სპეციალისტების არსებობის პირობებში) მომსახურების მიწოდება, სამედიცინო საჭიროების დადგომიდან 30 წუთის განმავლობაში.
ტრავმის/დაზიანების მართვის IV დონე – მრავალპროფილური მაღალტექნოლოგიური ან რეგიონის წამყვანი მრავალპროფილური სტაციონარული დაწესებულება, რომელიც ფლობს სამედიცინო პერსონალის და მატერიალურ-ტექნიკური ბაზის სრულ რესურსს ტრავმის/დაზიანების ნებისმიერი ასპექტის ყოველმხრივი მოვლის უზრუნველსაყოფად.
ტრავმის/დაზიანების მართვის ამ დონეზე 24 საათის განმავლობაში ხელმისაწვდომი უნდა იყოს შემდეგი სერვისები: ზოგადი ქირურგია, ტრავმატოლოგია-ორთოპედია, ანესთეზიოლოგია და რეანიმატოლოგია, ნეიროქირურგია, ნევროლოგია, კარდიოლოგია, ენდოსკოპია, რადიოლოგია (კომპიუტერული ტომოგრაფია ან/და მაგნიტურ-ბირთვული რეზონანსი)და ლაბორატორიული სამსახური, ხოლო სისხლძარღვთა, თორაკალური და პლასტიკური და რეკონსტრუქციულქირურგიული სერვისები შესაძლებელია განხორციელდეს ექიმკონსულტანტების მეშვეობით.
III დონის ინტენსიური მოვლა – ინტენსიური მკურნალობა/მოვლა პაციენტებისთვის, რომლებსაც აღენიშნებათ:
1. ორი ან მეტი სასიცოცხლო ფუნქციის მწვავე უკმარისობა, საჭიროებენ ორი ან მეტი სასიცოცხლო ფუნქციის აპარატურულ მხარდაჭერას (მაგ., მართვითი სუნთქვა, ჰემოდინამიკის რეგულაცია, თირკმლის ჩანაცვლებითი თერაპია) და/ან
2. ერთი სასიცოცხლო ფუნქციის მწვავე უკმარისობა, საჭიროებენ ერთი სასიცოცხლო ფუნქციის აპარატურულ მხარდაჭერას (მაგ., მართვითი სუნთქვა, ჰემოდინამიკის რეგულაცია, თირკმლის ჩანაცვლებითი თერაპია) და პარენტერალურ კვებას და/ან 3. ერთი სასიცოცხლო ფუნქციის მწვავე უკმარისობა და ნოზოკომიური ინფექცია, საჭიროებენ ერთი სასიცოცხლო ფუნქციის აპარატურულ მხარდაჭერას (მაგ., მართვითი სუნთქვა, ჰემოდინამიკის რეგულაცია, თირკმლის ჩანაცვლებითი თერაპია).
III დონე – დაწესებულება, სადაც ხორციელდება კარდიოქირურგიული სერვისი. სადაც კარდიოლოგიურ სერვისთან ერთად ხორციელდება ინტერვენციული კარდიოლოგიის (ანგიოკარდიოგრაფიული (კათეტერიზაციის) ლაბორატორიით) სერვისი და/ან ენდოკარდიული პეისმეიკერის იმპლანტაცია და კათეტერული აბლაცია. ამ დონეზე გაურთულებელი კარდიოლოგიური შემთხვევების გარდა ხორციელდება შემდეგი მდგომარეობების მართვა: მწვავე კორონარული სინდრომი ST-სეგმენტის ელევაციით, არასტაბილური სტენოკარდია/მწვავე კორონარული სინდრომი ST-სეგმენტის ელევაციის გარეშე, თრომბოზული გართულებების მაღალი და საშუალო რისკის ერთი ან რამდენიმე ნიშნის არსებობისას, რითმისა და გამტარებლობის დარღვევები;
III დონე – დაწესებულება, რომელიც სრულ ნევროლოგიურ სერვისთან ერთად აწარმოებს ნეიროქირურგიულ და რადიოლოგიურ (მ.შ. კომპიუტერული ტომოგრაფია ან/და მაგნიტურბირთვული რეზონანსი) სერვისს. ბავშვთა სერვისების განხორციელების შემთხვევაში, ასევე, ემატება ნეიროფიზიოლოგიური (ეეგ, ემგ) სერვისი.
III დონე – აწარმოებს I, II, III, IV და V კატეგორიის ქირურგიულ ჩარევებს.
ტენდერის ტექნიკური დავალებიდან[/toggle]
ტენდერში წინადადებების მიღება 2021 წლის 18 დეკემბერს დაიწყება და 20 დეკემბერს დასრულდება. „ხელშეკრულების გაფორმებიდან 20 კალენდარული დღეში უნდა მოხდეს არქიტექტურული ესკიზის წარმოდგენა. იმ შემთხვევაში თუ ესკიზი არ იქნა დამაკმაკოფილებელი დამკვეთისათვის ავტორს მიეცემა დამატებით 5 დღე კონკრეტული ხარვეზების აღმოსაფხვრელად.“ – აღნიშნულია ტენდერის პირობაში.
ტენდერში გამარჯვებულმა ესკიზური პროექტის შეთანხმების შემდეგ 50 კალენდარული დღის ვადაში, უნივერსიტეტს სრული პროექტი უნდა წარუდგინოს.
პირობის მიხედვით, „არქიტექტურული, კონსტრუქციული, საინჟინრო-გეოლოგიურ და სახარჯთაღრიცხვო ნაწილებზე ექსპერტიზა და შესაბამისი დადებითი დასკვნა შეიძლება წარმოდგენილი იყოს სერთიფიცირებული და შესაბამისი გამოცდილების იურიდიული, ან ფიზიკური პირის შესრულებით“.
ამ დოკუმენტაციის მომზადების შემდეგ განისაზღვრება საუნივერსიტეტო კლინიკის მშენებლობისთვის საჭირო თანხა და ვადები.
„იმ შემთხვევაში, თუ სამუშაოების შესრულების პროცესში აღმოჩნდება საპროექტო-სახარჯთაღრიცხვო დოკუმენტაციით გაუთვალისწინებელი დამატებითი სამუშაოების შესრულების აუცილებლობა, ამ დამატებითი საპროექტო-სახარჯთაღრიცხვო დოკუმენტაციის შედგენა განხორციელდება ანაზღაურების გარეშე. პროექტირების პერიოდში საპროექტო დავალებით გაუთვალისწინებელი სამუშაოების დაპროექტების საკითხი წერილობით თანხმდება შემსყიდველთან.“ – აღნიშნულია ტენდერში.
ბათუმში ახალი რესპუბლიკური საავადმყოფოს მშენებლობისას ოფიციალურად ითქვა, რომ ის საუნივერსიტეტო კლინიკა იქნებოდა. თუმცა, ეს ასე ვთქვათ პროფილი, ახალ კლინიკას აღარ აქვს.
ბათუმის რესპუბლიკურში ეს საკითხი სამი წლის წინ ასე განმარტეს: „ცოტა არასწორადაა აღქმული ეს საუნივერსიტეტო კლინიკის არსი. საუბარია კლინიკის ისეთი მუშა სტრუქტურის შექმნაზე, რომელშიც გარკვეული როლი აქვს აკადემიურ კომპონენტს. საუნივერსიტეტო კლინიკა არავითარ შემთხვევაში არ ნიშნავს იმას, რომ ის უნივერსიტეტს ეკუთვნის… ჩვენ და უნივერსიტეტი ვთანამშრომლობთ რამდენიმე წელია და ეს თანამშრომლობა გაგრძელდება, უბრალოდ, ახალ კორპუსში ჩვენ დაგეგმილი გვაქვს, რომ ყველა დეპარტამენტში იყოს სასწავლო ოთახები. ამასთან, შევეცდებით შევიძინოთ ისეთი აპარატურა, რომელიც მოგვცემს საშუალებას, გარდა სამედიცინო ფუნქციისა, შეასრულოს სწავლების ფუნქციაც“.
ახალ კლინიკას შპს „ბათუმის რესპუბლიკური კლინიკური საავადმყოფო“ მართავს. კლინიკამ ფუნქციონირება 2020 წლის აპრილში დაიწყო და ის ამ პერიოდიდან ძირითადად COVID 19-ის მართვაშია ჩართული.
ბათუმის საკრებულოს წევრები „ერთიანი ნაციონალური მოძრაობიდან“ ბათუმის მერიის მუნიციპალური ინსპექციის უფროსის მოადგილისა და ბიზნესმენის დაპირისპირებას გამოეხმაურნენ. ისინი შესაბამის რეაგირებას ბათუმის მერს, არჩილ ჩიქოვანს სთხოვენ.
„სამწუხარო და ამავდროულად უბედურებაა ის, რომ მერიის თანამშრომლები უკვე, ლამის დეშეკათი დარბიან, იმისთვის, რომ ქალაქში ზედამხედველობის სამსახურმა თავისი ფუნქცია შეასრულოს.
მერის ასე ჩუმად ყოფნა და დუმილი ნიშნავს იმას, რომ მას უფლება აქვს მიცემული, შეიარაღებულმა დაჯგუფებებმა, თუნდაც იმ მოსახლეობას ელაპარაკოს, რომელიც კანონდარღვევით აშენებს. ყველაფერი ეს იმ ფონზე ხდება, როცა ჩვენ ვხედავთ, რომ უკანონობის პიკია, თუნდაც ბულვარში მშენებლობაზე. თუნდაც ჩინური კვარტლის მშენებლობაზე, სადაც ზედამხედველობის სამსახური ხმას არ იღებს“ – განაცხადა ენმ-ის წევრმა, რეზო ხარაზმა ბრიფინგზე.
„ჩინურ კვარტალს“ რეზო ხარაზი უწოდებს გოგოლის ქუჩაზე მიმდინარე უნებართვო მშენებლობას, რომლის შეჩერებაც მერიამ ვერ შეძლო.
ბიზნესმენი მერაბ ფარტენაძე ამბობს, რომ მერიის მაღალჩინოსანი, ბესო ცეცხლაძე მას იარაღით დაემუქრა, გავრცელდა დაპირისპირების კადრებიც.
შსს-ს ინფორმაციით ფაქტთან დაკავშირებით დაიწყო გამოძიება, ბიზნესმენი გუშინ გამოკითხვაზეც იმყოფებოდა, გამოჰკითხეს ბესო ცეცხლაძეც.
ბათუმის მუნიციპალური ინსპექციის პრესცენტრის განმარტებით, კი „აეროპორტის გზატკეცილზე 259ბ-ში პროექტის დარღვევით მიმდინარე მშენებლობაზე მონიტორინგის მიზნით გასულ მუნიციპალური ინსპექციის ჯგუფს მოქალაქეთა ნაწილმა საქმიანობაში ხელის შეშლის მიზნით წინააღმდეგობა გაუწია:
„აღნიშნული ობიექტი მუნიციპალური ინსპექციის მიერ ეტაპობრივად 10-ჯერ იქნა დაჯარიმებული მშენებლობის გაგრძელების ფაქტზე. დღეს, მორიგი აქტის შედგენის პროცედურას კი, მოჰყვა აღნიშნული ინციდენტი,“ – აღნიშნულია მუნიციპალური ინსპექციის წერილობით განმარტებაში.
ბიზნესმენი ამბობს, რომ მუნიციპალური ინსპექციის მაღალჩინოსანი მას კომერციულ ფართობს დაბალ ფასად სთხოვდა:
„დავა იყო ქონებაზე, კომერციული ფართობის დათმობას ითხოვდა, რაც ღირდა კვადრატული მეტრი 2 ათასი დოლარი, ის დამითმე 500 დოლარადო…“
ენმ- ის წევრები ასევე ითხოვენ, რომ ბესო ცეცხლაძემ მუნიციპალურ ინსპექციაში თანამდებობა დატოვოს:
„მისი სამსახური არის უსაფრთხოების სამსახური, წავიდეს და იარაღით ირბინოს უშიშროებაში. ბათუმის მერია არ არის შეიარაღებული ბანდების დაწესებულება, მოვითხოვთ დროულ რეაგირებას.“
11 დეკემბრის მონაცემებით, საქართველოში დადასტურდა კოვიდის 3542 ახალი შემთხვევა. ჩატარდა 57 978 ტესტი კორონავირუსზე.
გასულ 24 საათში 64 პაციენტი გარდაიცვალა კოვიდით.
10 დეკემბრის მდგომარეობით, დადებითობის დღიური მაჩვენებელი არის 6.11%, ბოლო 14 დღის მანძილზე – 7.93% ხოლო 7 დღის მანძილზე – 7.53%.
დღეს ქვეყანაში გამოვლენილი ინფიცირების 3 542 ახალი შემთხვევიდან თბილისში გამოვლენილია 1 648 შემთხვევა, აჭარაში – 187, იმერეთში – 558, ქვემო ქართლში – 182, შიდა ქართლში – 251, გურიაში – 85, სამეგრელო – ზემო სვანეთში – 276, კახეთში – 154, მცხეთა-მთიანეთში – 117, სამცხე-ჯავახეთში – 64, რაჭა-ლეჩხუმსა და ქვემო სვანეთში – 20.
„დავა იყო ქონებაზე, კომერციული ფართობის დათმობას ითხოვდა, რაც ღირდა კვადრატული მეტრი 2 ათასი დოლარი, ის დამითმე 500 დოლარადო…“, – ამბობს „ბათუმელებთან“ ბიზნესმენი მერაბ ფარტენაძე, რომელმაც გამოძიებას ჩვენება უკვე მისცა მუქარის შემთხვევაზე.
ბიზნესმენის თქმით, ბათუმის მერიის მუნიციპალური ინსპექციის მოადგილე მას იარაღით დაემუქრა. გამოძიება მუქარის მუხლით მიმდინარეობს.
მუქარის სავარაუდო შემთხვევა დღეს, 10 დეკემბერს, აეროპორტის გზატკეცილზე მოხდა.
„დამინახა იქ ვიდექი და მოვიდა საქმის გასარჩევად, შემდეგ ამოიღო იარაღი და დამემუქრა, ვიდეოებიც არის გადაღებული… აპროტესტებდა იმას, რომ მუნიციპალური ინსპექციის ჯარიმებს ვასაჩივრებ და რამდენიმე სასამართლო დავა მოვუგე კიდეც. მას შემდეგ გადამეკიდნენ, როცა კომერციული ფართობი ბესარიონ ცეცხლაძეს არ დავუთმე,“ – ამბობს მერაბ ფარტენაძე.
ეს არაა პირველი შემთხვევა, როცა მერაბ ფარტენაძე მუქარაზე საუბრობს.
ბიზნესმენი მერაბ ფარტენაძე მაღაზიათა ქსელის, „ფარფურის“ მფლობელია. ის მუქარის შემთხვევაზე მიმდინარე წლის ივნისშიც საუბრობდა. მაშინ „ფარფურის“ 2 მაღაზიაში ხანძარი გაჩნდა, ხოლო მერაბ ფარტენაძე ამბობდა, რომ ქურდული სამყაროს ავტორიტეტის, „ენცოს“ სახელით ემუქრებოდნენ. მაღაზიებში ხანძრის გაჩენის ფაქტზე გამოძიებამ ერთი არასრულწლოვანი დააკავა.
მერაბ ფარტენაძის თქმით, მას ქონების შეღავათიან ფასად დათმობა მუნიციპალური ინსპექციის მოადგილემ, ბესარიონ ცეცხლაძემ დაახლოებით 2 წლის წინ მოსთხოვა.
„თვითონ არ უნდოდა, კლიენტები მომიყვანა და მაიძულებდა, რომ გამეყიდა ამ ფასად. ის კომერციული ფართობი ფარნავაზ მეფის ქუჩაზეა – დაახლოებით 450 კვადრატული მეტრი… დღეს რა შემთხვევაც იყო, ის ობიექტი საერთოდ არაა ჩემი, ჩემი მეგობრისაა, იაშა გოჩიტიძის, რომელიც ავტოსალონს აწყობს… იქ ვიდექი, როცა ბესარიონ ცეცხლაძემ მანქანიდან დამინახა და მოვიდა,“ – გვიყვება მერაბ ფარტენაძე.
ბათუმის მერიის მუნიციპალური ინსპექციის პრესცენტრის განმარტებით, „აეროპორტის გზატკეცილზე 259 ბ-ში პროექტის დარღვევით მიმდინარე მშენებლობაზე მონიტორინგის მიზნით გასულ მუნიციპალური ინსპექციის ჯგუფს მოქალაქეთა ნაწილმა საქმიანობაში ხელის შეშლის მიზნით წინააღმდეგობა გაუწია, რასთან დაკავშირებითაც ფაქტზე უკვე დაწყებულია გამოძიება.
აღნიშნული ობიექტი მუნიციპალური ინსპექციის მიერ ეტაპობრივად 10-ჯერ იქნა დაჯარიმებული მშენებლობის გაგრძელების ფაქტზე. დღეს, მორიგი აქტის შედგენის პროცედურას კი, მოჰყვა აღნიშნული ინციდენტი,“ – აღნიშნულია მუნიციპალური ინსპექციის წერილობით განმარტებაში.
გამოძიება დაიწყო მუქარის მუხლით – გვითხრეს შინაგან საქმეთა სამინისტროს პრესცენტრში შემთხვევაზე, რაზეც ბათუმელი ბიზნესმენი, მერაბ ფარტენაძე საუბრობს. ბიზნესმენის თქმით, მას ბათუმის მერიის მუნიციპალური ინსპექციის უფროსის მოადგილე ბესო ცეცხლაძე იარაღით დაემუქრა.
ბიზნესმენი ამ დროისთვის საგამოძიებო ორგანოში გამოკითხვაზეა.
ბათუმის მუნიციპალური ინსპექციის პრესცენტრის განმარტებით, „აეროპორტის გზატკეცილზე 259ბ-ში პროექტის დარღვევით მიმდინარე მშენებლობაზე მონიტორინგის მიზნით გასულ მუნიციპალური ინსპექციის ჯგუფს მოქალაქეთა ნაწილმა საქმიანობაში ხელის შეშლის მიზნით წინააღმდეგობა გაუწია, რასთან დაკავშირებითაც ფაქტზე უკვე დაწყებულია გამოძიება.
აღნიშნული ობიექტი მუნიციპალური ინსპექციის მიერ ეტაპობრივად 10-ჯერ იქნა დაჯარიმებული მშენებლობის გაგრძელების ფაქტზე. დღეს, მორიგი აქტის შედგენის პროცედურას კი, მოჰყვა აღნიშნული ინციდენტი,“ – აღნიშნულია მუნიციპალური ინსპექციის წერილობით განმარტებაში.
სხვა კითხვებს დღეს ამ უწყებაში არ უპასუხეს.
ბიზნესმენი მერაბ ფარტენაძე მაღაზიათა ქსელის, „ფარფურის“ მფლობელია. ის მუქარის შემთხვევაზე მიმდინარე წლის ივნისშიც საუბრობდა. მაშინ „ფარფურის“ 2 მაღაზიაში ხანძარი გაჩნდა, ხოლო მერაბ ფარტენაძე ამბობდა, რომ ქურდული სამყაროს ავტორიტეტის, „ენცოს“ სახელით ემუქრებოდნენ. მაღაზიებში ხანძრის გაჩენის ფაქტზე გამოძიებამ ერთი არასრულწლოვანი დააკავა.
რუსეთის საოკუპაციო ძალებმა ოკუპირებულ სოფელ წინაგარას მიმდებარედ საქართველოს ორი მოქალაქე უკანონოდ დააკავეს.
ინფორმაციას ამის შესახებ უსაფრთხოების სამსახური ავრცელებს.
სამსახურის ცნობით, გააქტიურებულია „ცხელი ხაზი“, ინფორმირებულია ევროკავშირის სადამკვირვებლო მისია და ჟენევის დისკუსიების თანათავმჯდომარეები.
„საქართველოს ხელისუფლება იყენებს მის ხელთ არსებულ ყველა მექანიზმს უკანონოდ დაკავებული პირების უმოკლეს ვადაში გასათავისუფლებლად.
ოკუპირებულ რეგიონებსა და საოკუპაციო ხაზის გასწვრივ ადამიანის ფუნდამენტური უფლებების დარღვევაზე სრული პასუხისმგებლობა რუსეთის საოკუპაციო ძალებს ეკისრებათ. მათ მიერ განხორციელებული სხვადასხვა სახის უკანონო ქმედება აზიანებს ადგილზე არსებულ უსაფრთხოების გარემოს და ართულებს მოსახლეობის ყოველდღიურობას“ – წერს უსაფრთხოების სამსახური.
მოსამართლე სალიხ შაინიძემ შენიშვნა მისცა ბათუმის საკრებულოს პირველი სხდომის დროს დაკავებულ ოთხივე პირს. 26 ნოემბრის საპროტესტო აქციაზე 4 პირი პოლიციელის კანონიერი მოთხოვნის დაუმორჩილებლობის და წვრილმანი ხულიგნობის გამო დააკავეს.
აქციაზე შეკრებილები აპროტესტებდნენ იმას, რომ ბათუმის ახალი ბიუჯეტი ძველმა საკრებულომ დაამტკიცამაშინ, როცა ახალი საკრებულო უკვე არჩეული იყო.
„მოსამართლის გადაწყვეტილება ლმობიერი იყო,“ – ამბობს გია ხალვაში, რომელიც აქციაზე დააკავეს. იგი ყოფილი პოლიციელია და ბათუმის მერობის ყოფილი კანდიდატი. მას ჯერ არ აქვს გადაწყვეტილი, გაასაჩივრებს თუ არა ბათუმის საქალაქო სასამართლოს გადაწყვეტილებას.
გია ხალვაშის თქმით, სასამართლოში წარმოდგენილი მტკიცებულებებით არ დასტურდებოდა ის, რომ დაკავებულებიდან რომელიმე კანონს არღვევდა.
მოსამართლე სალიხ შაინიძემ მიიჩნია, რომ ადმინისტრაციულ სამართალდარღვევას ჰქონდა ადგილი, თუმცა მას აქციაზე დაკავებულები არ დაუჯარიმებია.
„ჩვენი ოჯახის 3 წევრი იყო კოვიდკლინიკაში. კლინიკიდან გამოწერის შემდეგ ორმა მათგანმა მედიკამენტოზური მკურნალობა სახლშიც გააგრძელა. ექიმის დანიშნულებით როცა მივედი აფთიაქში, ფარმაცევტმა დაიანგარიშა და მითხრა, რომ ორივეს წამლებში 427 ლარი უნდა გადამეხადა.
შევეცოდე ფარმაცევტს და შემომთავაზა ზუსტად იმავე შემადგენლობის გერმანული წამლები. თითქმის 100 ლარით იაფი გამოვიდა. ეს ჩემთვის იყო შოკი,“ – უთხრა „ბათუმელებს“ კოვიდინფიცირებულების ოჯახის ერთ-ერთმა წევრმა.
ერთი ოჯახის წევრები – ბათუმში მცხოვრები 60 და 86 წლის ქალები კორონავირუსით ოქტომბერში დაინფიცირდნენ. „გაგვიმართლა. მედპერსონალიც ძალიან ზრუნავდა ჩვენზე“, – გვითხრეს ქალებმა.
მადლიერების ნიშნად, რომ მათზე იზრუნეს, ისინი ითხოვენ არ დავასახელოთ კონკრეტული კლინიკა, სადაც მათ გამოუწერეს რეცეპტები, რომლებშიც ძირითადად ქართული წარმოების წამლების სავაჭრო სახელი ეწერა. მათ, უბრალოდ, ის აინტერესებთ, რატომ ღირს გერმანიიდან საქართველოში ჩამოტანილი წამლები უფრო იაფი, ვიდრე აქ წარმოებული, რომ არაფერი ვთქვათ თურქეთზე, სადაც საქართველოსთან შედარებით წამლები ბევრად უფრო იაფია.
წამლების ჩამონათვალი, რომლებიც კოვიდსაავადმყოფოს დატოვების შემდეგ ერთი ოჯახის 2 წევრს დაუნიშნა ექიმმა სამკურნალოდ
ბათუმის სხვადასხვა აფთიაქში ინფორმაციის გადამოწმებით აღმოჩნდა, რომ სინამდვილეა კოვიდგადატანილი მოქალაქეების მიერ მოთხრობილი ისტორია ერთი და იმავე შემცველობის გერმანული და ქართული წარმოების წამლების ფასებზე – რაც არ უნდა პარადოქსული იყოს, საქართველოში ქართული მედიკამენტი ბევრად ძვირი ღირს, ვიდრე გერმანული.
კიდევ ერთი კონკრეტული პაციენტის მაგალითზე თუ განვიხილავთ კოვიდის გადატანის შემდგომი მკურნალობისთვის გამოწერილი მედიკამენტების ფასებს, შემდეგ სურათს მივიღებთ – ამ პაციენტმა ქართული წარმოების წამლები იყიდა, რაშიც 155 ლარი გადაიხადა. თუ ექიმი მას იმავე შემადგენლობის, მაგალითად, გერმანული წარმოების მედიკამენტებს გამოუწერდა, მაშინ მას წამლებში 104 ლარი დაეხარჯებოდა.
რით მკურნალობენ კოვიდკლინიკებიდან წამოსვლის შემდეგ პაციენტები? – მედიკამენტების ჩამონათვალი მრავალფეროვანია. „ბათუმელებს“ ხელთ აქვს რამდენიმე პაციენტის ექიმის მიერ გამოწერილი დანიშნულების ფურცელი, სადაც თითქმის ყველა მედიკამენტი ქართული წარმოებისაა.
ერთ-ერთი პაციენტის რეცეპტი – მას ექიმმა მხოლოდ ქართული წარმოების მედიკამენტები გამოუწერა, რაც ბევრად ძვირია, ვიდრე იმავე შემცველობის გერმანული მედიკამენტები. ფასები აღებულია 10 დეკემბრის მონაცემებით
რატომ ღირს ერთი და იმავე დანიშნულების გერმანული წარმოების 500 მგ „აზინფექსინის“ სამი კაფსულა 18.71 ლარი, ხოლო ქართული წარმოების 500 მგ „აზიმაკის“ სამი კაფსულა 23.50 ლარი? ორივე მედიკამენტის შემადგენლობა ზუსტად ერთი და იგივეა.
[toggle title=”გერმანული და ქართული წარმოების წამლების შემადგენლობა”]
1. ლევო–დენკი 500მგ. ქვეყანა: გერმანია ერთი შემოგარსული ტაბლეტი შეიცავს 500 მგ ლევოფლოქსაცინს, რაც 512.46 მგ ლევოფლოქსაცინ ნახევრად ჰიდრატის ეკვივალენტურია. დამხმარე ნივთიერებები: ტაბლეტის შიგთავსი: მიკროკრისტალური ცელულოზა, ცელულოზა ფხვნილის სახით, პრეჟელატინირებული სახამებელი (სიმინდის), სიმინდის სახამებელი, კროსპოვიდონი, პოვიდონი K25, ნატრიუმ სტეარილ ფუმარატი
1. ვალმოქსი 500მგ. ქვეყანა: საქართველო 1 შემოგარსული ტაბლეტი შეიცავს: ლევოფლოქსაცინის ჰემიჰიდრატს, 500 მგ ლევოფლოქსაცინის ეკვივალენტურს. დამხმარე ნივთიერებები: მიკროკრისტალური ცელულოზა, სიმინდის სახამებელი, გასუფთავებული ტალკი, მაგნიუმის სტეარატი, ნატრიუმის სახამებლის გლიკოლატი, ნატრიუმის კროსკარმელოზა, უწყლო კოლოიდური სილიციუმის დიოქსიდი, შემომგარსავი ნივთიერებების ნარევი Coating premix white: ჰიპრომელოზა, პოლიეთილენგლიკოლი, გასუფთავებული ტალკი, საღებავი ტიტანის დიოქსიდი (E 171).
2. ეფცენ-150 #1კაფსულა. ქვეყანა: საქართველო შემადგენლობა: ფლუკონაზოლი – 50 მგ ან 150 მგ; დამხმარე ნივთიერებები: ლაქტოზას მონოჰიდრატი, სიმინდის სახამებელი, უწყლო კოლოიდური სილიციუმის დიოქსიდი, მაგნიუმის სტეარატი, ნატრიუმის ლაურილსულფატი.
2. ფლუკონა-დენკი 150მგ#1კაფსულა ქვეყანა: გერმანია შემადგენლობა: აქტიური ნივთიერება: ფლუკონაზოლი 150 მგ. დამხმარე ნივთიერებები: მიკროკრისტალური ცელულოზა, მაგნიუმის სტეარატი, ტალკი.
3. ჰიმოლიტ დუო #20ტ, ქვეყანა: ინდოეთი შემადგენლობა: თითოეული შემოგარსული ტაბლეტი შეიცავს ფერმენტული აქტივობის 100000 Armour ერთეულს. გასუფთავებული კონცენტრატი, რომლის აქტივობა განისაზღვრება ტრიფსინის და ქიმოტრიფსინის სპეციფიკური აქტივობის შეფარდებით ექვსი ერთთან.
3. ბიფლაზიმი #20ტ. ქვეყანა: საქართველო შემადგენლობა: თითოეული შემოგარსული ტაბლეტი შეიცავს: 300 ერთ. BP (14 მიკროკატალი) ქიმოტრიფსინი 300 ერთ. BP (5 მიკროკატალი) ტრიფსინი. დამხმარე ნივთიერებები: აეროსილი, დექსტრატი, მაგნიუმის სტეარატი, პრეჟელატინიზირებული სახამებელი, სტეარინის მჟავა, აცეტონი, ცელაცეფატი, დიეთილფტალატი, სეპისპერსი ცისფერი K1009.[/toggle]
სპეციალისტები, რომლებიც ამ პროცესს აკვირდებიან, ამბობენ, რომ ზოგადად, წამლების მაღალ ფასს, კონკრეტულად კი უცხოური და ქართული წარმოების მედიკამენტებში ფასთა სხვაობას, რამდენიმე ფაქტორი განაპირობებს, მათ შორის, მწარმოებლების, ექიმებისა თუ კლინიკების კეთილსინდისიერება და, ასევე, ბაზრის მოცულობაც.
საქართველოში დღეს დადგენილი თამაშის წესებით, ზოგიერთი ექიმი არის „წამლის ამომყიდველი სუბიექტი“. ზოგ შემთხვევაში ეს ექიმის დამსაქმებლის პოლიტიკაა, რომელსაც განსაზღვრული აქვს, რომელი მწარმოებლის წამალი უნდა გამოწეროს მასთან დასაქმებულმა ექიმმა. ზოგ შემთხვევაში კი ექიმები ამ გადაწყვეტილებას ინდივიდუალურად იღებენ.
ამის შესახებ ექიმები მათთვის სანდო გარემოში ღიად საუბრობენ, მაგრამ საჯაროდ თითქმის არასდროს.
ჯანდაცვის ყოფილი მინისტრი, ახლა უკვე პარტია „ევროპული საქართველოს“ წევრი, ზურაბ ჭიაბერაშვილი უფრო შორსაც მიდის და ამბობს, რომ ავადმყოფისთვის ერთდროულად გაუმართლებლად მრავალი წამლისა და სამკურნალო პროცედურის დანიშვნა საქართველოში გადაუჭრელი პრობლემაა.
რას ამბობს ექიმი ლევან ანთაძე
ბათუმში კლინიკა „მედალფას“ ყოფილი მენეჯერის, ექიმ ლევან ანთაძის თქმით, წამლის ფასწარმოქმნაში გადამწყვეტ როლს თამაშობს სამი ფაქტორი: ნულოვანი განაკვეთი იმპორტირებულ მედიკამენტებზე – ერთსა და იმავე რეჟიმშია ქართული და უცხოური წარმოება. საქართველოში ვერ აწარმოებ რომელიმე მედიკამენტს 10-20 მილიონი დოზით. მსხვილი მოთამაშეები კონკურენციის გარეშე არიან, რომელთაც შეუძლიათ ფასი აკონტროლონ და ასევე სამედიცინო წარმომადგენლები.
ვინ არიან სამედიცინო წარმომადგენლები, რომლებიც ფასებზე დიდ გავლენას ახდენენ? – ეს არიან ფარმაცევტული კომპანიების მიერ დაქირავებული ადამიანები, რომლებიც წამლების გასაღებაზე მუშაობენ.
სამედიცინო წარმომადგენლები ხვდებიან კლინიკების მენეჯერებს, ექიმებს ინდივიდუალურად და მათთან გარიგებას აფორმებენ პრინციპით – „რამდენსაც გაყიდი, იმდენს მიიღებ“. როგორც „ბათუმელებს“ ერთ-ერთი ფარმაცევტული კომპანიის სამედიცინო წარმომადგენელმა უთხრა, მედიკამენტზე ფასნამატის დაახლოებით 30% სამედიცინო წარმომადგენლისა და ექიმის შემოსავალია.
საქართველოში მედიკამენტების უმსხვილესი მწარმოებელი კომპანიები არიან: „პსპ ფარმა“, „გეფა“ (რომელიც ფლობს „ჯი პი სი-ს“ და „ფარმადეპოს“ ქსელებს) და „ავერსი“. ყველა მათგანი ასევე ფლობს როგორც კლინიკებს, ისე სააფთიაქო ქსელს მთელი ქვეყნის მასშტაბით. მათთვის მუშაობენ სამედიცინო წარმომადგენლებიც.
ლევან ანთაძე ბათუმში ერთ-ერთ იმ კლინიკის მენეჯერი იყო, რომლის მესაკუთრე მედიკამენტებსაც აწარმოებს და ყიდის კიდეც. სწორედ ამიტომ ვკითხეთ მას, რამდენად ახდენს გავლენას წამლის ფასზე ეს გარემოება.
„მე ვმუშაობდი „ავერსის“ შვილობილ კომპანიაში, მაგრამ ნამდვილად არ ყოფილა სამედიცინო ქსელს და მწარმოებელ კომპანიას შორის დამოკიდებულება, რომ აუცილებლად მისი მედიკამენტი უნდა გაგვეყიდა. 8 წელი ვიყავი რეგიონული დირექტორი, ქსელში 4 საავადმყოფო და ერთი პოლიკლინიკა შემოდიოდა“.
ლევან ანთაძის შეფასებით, სამედიცინო წარმომადგენლები მუშაობენ პოლიკლინიკურ ქსელებზე, ოჯახის ექიმებზე, ანუ ამბულატორიულ პაციენტებზე ხდება ძირითადად ამ წამლების რეალიზაცია და არა კლინიკის პირობებში.
„კლინიკის პირობებში მე მქონდა იმის საშუალება, რომ კონკურენტული მედიკამენტი, თუნდაც სხვა წარმოების, მეყიდა და არ ვიყავი შეზღუდული“, – აცხადებს ბათუმის „მედალფას“ ყოფილი მენეჯერი.
ლევან ანთაძე
ლევან ანთაძის თქმით, ეს პრობლემა ბევრმა ქვეყანამ გამოიარა და მისი დაძლევა შესაძლებელია:
„ჩვენ სამედიცინო სისტემის განვითარების იმ ეტაპზე ვართ, რომ მაინც გვიწევს სამედიცინო წარმომადგენლების გამოყენება – ეს პირდაპირ მიბმულია ექიმის ფინანსურ დაინტერესებასთან. ეს ფაქტია და ამის დამალვას აზრი არ აქვს.
ეს არ არის 1-2 წლის პრობლემა, ეს 15-20 წლის პრობლემაა, ანუ ექიმს პირდაპირ მისი დანიშნული რეცეპტიდან უწევს ანაზღაურება: რამდენსაც გაყიდის, ანაზღაურებასაც შესაბამისად იღებს. ექიმი დაინტერესებულია არა ჯენერიკის, მოქმედი ნივთიერების, არამედ კონკრეტული წარმოების წამლის რეალიზებით, რამაც თავისთავად შეიძლება გამოიწვიოს ზედმეტი წამლის დანიშვნა, რადგან ეს პირდაპირ მიბმულია მის ფინანსურ ინტერესთან“.
ლევან ანთაძის თქმით, სამედიცინო პერსონალსა და ექიმებთან სამედიცინო წარმომადგენლების ამ ურთიერთობის შეცვლას, ანუ წამლების რეალიზებიდან „ატკატების“ მიღების მახინჯი ფორმის აღმოფხვრას, დრო დასჭირდება.
რას ამბობს ექიმი ვახტანგ კალოიანი
კიდევ ერთ ცნობილ პრაქტიკოს ექიმს და „ნიუ ჰოსპიტალის“ კრიტიკული მედიცინის დეპარტამენტის ხელმძღვანელს, ვახტანგ კალოიანს ვკითხეთ, რა არის იმის მიზეზი, რომ ქართული წამლები ბევრად ძვირია, ვიდრე უცხოური მედიკამენტები?
ექიმის თქმით, ამას რამდენიმე ფაქტორი განაპირობებს, მათ შორის, ბაზრის მცირე მასშტაბი და ექიმებისა თუ კლინიკების კეთილსინდისიერება.
„გერმანია თუ თურქეთი ბევრად იაფია, მაგრამ იქ 60 მილიონისთვის აწარმოებენ წამალს და არა 2-3 მილიონისთვის. თუ შეადარებთ ქართულ მედიკამენტებს, რომლებიც ექსპორტზე გადის შუა აზიის ქვეყნებში, ისინი შედარებით იაფია. მაგალითად, „ავერსის“ მედიკამენტები, „ჯი ემ პი“-ს მედიკამენტები. ჩვენ რომ ვაწარმოებდეთ 20-მილიონიანი ბაზრისთვის, უფრო იაფი იქნებოდა.
ვახტანგ კალოიანი ასევე ერთ ფაქტორზე ამახვილებს ყურადღებას – რეცეპტი.
„ეთიკურია, რომ ექიმი ყოველთვის წერდეს მედიკამენტის მოქმედ სუბსტანციას. ვთქვათ, პაციენტს დაენიშნა „ამპიცილინი“, რომელიც შეიძლება იყოს 30 მწარმოებლის. ექიმი ვალდებულია დაუწეროს არა სავაჭრო ნიშნით… რეცეპტი ყოველთვის უნდა დაიწეროს მოქმედი სუბსტანციით და არა სავაჭრო სახელით. მერე პაციენტი გადაწყვეტს, რომელი შეიძინოს.
ავიღოთ ძალიან გავრცელებული „აზიმაკი“. ექიმმა რეცეპტში უნდა დაწეროს „აზიტრომიცინი“ – ეს არის მისი მოქმედი სუბსტანცია და პაციენტი „აზიმაკს“ იყიდის, „აზიმაკ ფორტეს“, „აზემაკ დენკს“ თუ „აზიმაკ როშეს“ – ეს მისი გადასაწყვეტია. როცა გიწერს პირდაპირ „აზიმაკ დენკს“, მიდიხარ და ყიდულობ „აზიმაკ დენკს“. როცა გიწერს „აზიტრომიცინს“, აფთიაქში მიდიხარ და ყველა შესაძლო ვარიანტს გეუბნებიან. ფარმაცია ვალდებულია, მომხმარებელს ყველა ვარიანტი შესთავაზოს და უთხრას მწარმოებლების შესახებ“.
რაც შეეხება ვერსიას, რომ შეიძლება ექიმმა წამლები არა საჭიროების, არამედ პირადი სარგებლის მიზნით დანიშნოს, ვახტანგ კალოიანი ამბობს, რომ მას ეს არ სმენია და წარმოუდგენლადაც მიაჩნია: „ეგ რეალურად მკვლელობაა. მე არ გამიგია. რაც არ უნდა ცუდი ექიმი იყოს, მაგას არ იკადრებს.
პოლიპრაგმაზია ანუ ბევრი წამლის დანიშვნა, ზოგადად, არის პრობლემა, მაგრამ კვალიფიკაციის პრობლემაზე გადის, მტკიცებით მედიცინისა და განათლების პრობლემაზე. ბევრი არასაჭირო მედიკამენტის დანიშვნა, ეს მსოფლიო გამოწვევა, რასაც ებრძვიან რეგულაციებით, განათლებით. ძალიან დიდი ბრძოლაა ახლა, ანტიბიოტიკების გამოყენება რომ შემცირდეს“.
ვახტანგ კალოიანი
ვახტანგ კალოიანის თქმით, „უხეში ჩარევები, რომ რაღაც მედიკამენტი ლარი ღირდეს, ჩვენ სახელმწიფოს ამის შესაძლებლობა არ აქვს და როგორც საყოველთაო ჯანდაცვაში განიავდა ძალიან დიდი ფული, იგივე მოხდება ფარმაციაში. ხელმისაწვდომობა მოქალაქეებს უნდა გაეზარდოთ ქრონიკული მედიკამენტების მიმართ და ეს თავისუფლად შეიძლება, მაგრამ ეს უნდა მოხდეს ეკონომიკური და ფინანსური ბერკეტების გამოყენებით და არა, ვთქვათ, ადმინისტრაციული ჩარევით. აქ კორუფციის რისკები, არაპატიოსანი რისკებიც მეტია“.
ექიმები – ლევან ანთაძე და ვახტანგ კალოიანი ამავე დროს ოპოზიციურ პარტიებს წარმოადგენენ. „ბათუმელებმა“ არაერთგზის სცადა მოესმინა სხვა ექიმების პოზიციებიც იმის თაობაზე, რატომ არის უცხოური წამლები საქართველოში უფრო იაფი, ვიდრე ქართული. საჯაროდ არც ერთმა მათგანმა არ ისურვა საუბარი, კერძო საუბრებში კი მათი პოზიცია ძირითადად ემთხვევა ლევან ანთაძისა თუ ვახტანგ კალოიანის მოსაზრებებს.
რა არის მიზეზები?
სფეროში დასაქმებული ადამიანების გარდა „ბათუმელებმა“ სამედიცინო და ფარმაცევტული საქმიანობის რეგულირების სააგენტოში სცადა გარკვევა, რა იწვევს მედიკამენტებზე ფასების ზრდას. უწყება მიუთითებს ხოლმე, რომ ჯანდაცვის სამინისტრო/ეს სააგენტო ფასებს არ აკონტროლებს/არ არეგულირებს. შესაბამისად, წლებია ამ კითხვაზე პასუხს აღნიშნული უწყებისგან ვერ ვიღებთ.
ამ კითხვაზე სხვადასხვა აქტორს სხვადასხვა პასუხი აქვს. მაგალითად, ფარმაცევტული ბიზნესის წარმომადგენლები წლების განმავლობაში ლარში ფასების ზრდის ძირითად მიზეზად ვალუტის დევალვაციას ასახელებენ, პანდემიის პირობებში კი, დამატებით, ტრანსპორტირების ხარჯების ზრდას.
თუმცა, შესაძლოა, სხვა მიზეზებიც არსებობდეს. მაგალითად, მემარცხენე აქტივისტური გაერთიანება „ხმისთვის“ მომზადებულ პუბლიკაციაში მკვლევარი ვახტანგ ნაცვლიშვილი წამლების სიძვირის სამ მიზეზს თვლის:
წამლის ფასის დაურეგულირებლობა
ფარმაცევტული ბიზნესის კორუფციული გარიგებები ექიმებთან (იგივე არაეთიკური მარკეტინგი/სამედიცინო წარმომადგენლები)
ფარმაცევტულ ბაზარზე არსებული ოლიგოპოლია (ანუ ბაზარზე რამდენიმე კომპანიის ურთიერთშეთანხმებული თამაში და მცირე ზომის კონკურენტების გარიყვა)
მანამ, სანამ სახელმწიფო უწყებები პრობლემის მოგვარებას შეუდგებოდნენ, საჭირო იყო სახელმწიფოს მხრიდან პრობლემის მიზეზების კვლევა – კონკრეტულად რა იწვევს ფარმაცევტულ ბაზარზე არსებული ფასების დადგომას – რომელიც ყველა მხრიდან შეაფასებდა არსებულ ვითარებას.
მსგავსი კვლევა – ფარმაცევტული ბაზრის გრძელვადიანი მონიტორინგი, 2018 წელს პარლამენტის დავალებით დაიწყო კონკურენციის სააგენტომ. მონიტორინგის პირველადი შედეგები 9 ნოემბერს გამოქვეყნდა. ანგარიშმა აირეკლა ფასის ზრდის სხვადასხვა აქტორის მიერ დასახელებული სხვადასხვა მიზეზი.
რას ამბობს კონკურენციის სააგენტო?
ამ სტატიაში კონკურენციის სააგენტოს ფარმაცევტული ბაზრის მონიტორინგის შუალედურ ანგარიშში მითითებულ რამდენიმე მნიშვნელოვან საკითხზე შევჩერდებით.
სააგენტოს მიერ მომზადებული შუალედური ანგარიშის თანახმად, იმპორტირებული მედიკამენტების [ბაზარზე ძირითადად სწორედ იმპორტირებული მედიკამენტები იყიდება], საერთო ღირებულება ლარში მზარდია, დოლარში კი – ნაკლებად მზარდი.
წყარო: კონკურენციის სააგენტო
კერძოდ, 2015 წელთან შედარებით, 2020 წელს მედიკამენტების იმპორტის მოცულობა ლარში გაზრდილია 41%-ით, ხოლო ამერიკულ დოლარში – 7%-ით. შესაბამისად, სააგენტო ასკვნის, რომ იმპორტირებული მედიკამენტების ღირებულების ამგვარი ზრდა მეტწილად განპირობებულია ეროვნული ვალუტის გაუფასურებით.
გაძვირებული წამლები და მძიმე ხარჯები
წლებია სხვადასხვა დასახელების მედიკამენტის ფასი საქართველოს სააფთიაქო ქსელებში სტაბილურად იმატებს.
NDI-ის 2019 წლის ერთ-ერთი კვლევა აჩვენებდა, რომ გამოკითხულთა უმრავლესობისთვის ჯანდაცვის სისტემის ყველაზე მნიშვნელოვანი გამოწვევა მედიკამენტების ფასი იყო.
ჯანმრთელობის მსოფლიო ორგანიზაციის (WHO) ევროპის რეგიონული ოფისის 2021 წლის ივლისის ანგარიშის თანახმად, საქართველოში სახელმწიფოს მიერ დაფინანსებული ჯანდაცვის სერვისებით სარგებლობის მიუხედავად, ჯიბიდან გაწეული სამედიცინო ხარჯები მოსახლეობას კვლავ ტვირთად აწვება.
ამავე ანგარიშის თანახმად, ჯიბიდან გადახდების საშუალო წილი საქართველოში 48%-ია, ეს მაჩვენებელი 18%-ით აღემატება ჯანმოს ევროპული რეგიონის ქვეყნების საშუალო მაჩვენებელს – 30%-ს.
ჯიბიდან გადახდების ყველაზე მაღალი წილი – 69% საშუალოდ – სწორედ მედიკამენტებზე მოდის (2018 წლის მონაცემები). შეძლებული ოჯახებისთვის ეს მაჩვენებელი ნაკლებია, თუმცა უღატაკეს ოჯახებში ჯიბიდან გადახდების წილმა იმავე წელს 90% შეადგინა.
ამასთან, ევროპის სხვა ქვეყნებთან შედარებით, ნახსენები კვლევის თანახმად, საქართველოში მაღალია ჯანდაცვაზე გაწეული დანახარჯები და ამის შედეგად გაღარიბების შემთხვევები.
„ოლიგოპოლია“?
კვლევაში ასევე ნათქვამია, რომ 3 ყველაზე მსხვილი კომპანიის საერთო წილი ბაზრის იმპორტის დონეზე სტაბილურად მაღალია. კერძოდ:
2016 წელი – 56.6%
2017 წელი – 69,3%
2018 წელი – 70%
2019 წელი – 68.8%
2020 წელი – 67.5%
კვლევა არ ასახელებს ყველა კომპანიას, თუმცა ესენი არიან: „პსპ ფარმა“, „გეფა“ (რომელიც ფლობს „ჯი პი სი-ს“ და „ფარმადეპოს“ ქსელებს) და „ავერსი“.
ეს გარემოება, ავტორების შეფასებით, „ქმნის შესაბამის ბაზრებზე/ურთიერთჩამანაცვლებელი პროდუქტების დონეზე შესაძლო დომინანტური მდგომარეობის მოცემულობას“.
ღარიბაშვილმა წამლების სიძვირეზე წელს უკვე მეოთხედ ისაუბრა
საქართველოს პრემიერ-მინისტრმა ირაკლი ღარიბაშვილმა, მზარდი სამოქალაქო უკმაყოფილების ფონზე, უკვე არაერთხელ ისაუბრა მედიკამენტების გაზრდილ ფასებზე და განაცხადა, რომ მთავრობა ვალდებულია, „დროული რეაგირება“ ჰქონდეს ამ პრობლემაზე.
2021 წლის ადგილობრივი თვითმმართველობის არჩევნების შემდეგ მთავრობაში მედიკამენტების ფასების რეგულირებაზე საუბარი გააქტიურდა. გამოქვეყნდა კონკურენციის სააგენტოს ხანგრძლივი კვლევის შედეგებიც.
უცნობია, რას გეგმავს მთავრობა კონკრეტულად
ჯერჯერობით უცნობია საქართველოს მთავრობის კონკრეტული გეგმა. „ქართული ოცნება“, რომელიც 2012 წლის შემდეგ მმართველი ძალაა, ხელისუფლებაში ყოფნის მე-9 წელს, მხოლოდ ახლა აცხადებს, რომ კონკრეტული ნაბიჯების გადადგმას გეგმავს, რათა მოსახლეობას წამლების ფასი მძიმე ტვირთად აღარ დააწვეს.
ირაკლი ღარიბაშვილი
თუმცა ეს კონკრეტული ნაბიჯებიც უცნობია – ჯანდაცვის სამინისტროში სულ ახლახან დაკომპლექტდა სამუშაო ჯგუფი, რომელიც წამლის ფასის რეგულირებასთან დაკავშირებით შეიმუშავებს ინიციატივებს, რასაც, სამინისტროს პრესცენტრის ცნობით, საბოლოოდ საკანონმდებლო სახე მიეცემა.
„მედიკამენტების ფასის რეგულირება პირველ ეტაპზე, რა თქმა უნდა, საკანონმდებლო ცვლილებებს მოითხოვს, აქედან გამომდინარე, ჯანდაცვის სამინისტროსა და პარლამენტის ჯანდაცვის კომიტეტთან ერთად, მოსამზადებელი სამუშაოები დავიწყეთ, რაც ფასისა და ხარისხის დარეგულირებას ისახავს მიზნად და თანხვედრაშია ევროპის კანონმდებლობასთან“, – აღნიშნა 16 ნოემბერს „ჯანმოს“ რეგიონულმა დირექტორმა, სილვიუ დომენტემ.
სამუშაო ჯგუფის წევრები და ჯანმოს ექსპერტები უშუალო ინიციატივებზე ჯერჯერობით მედიასთან კომენტარებს არ აკეთებენ.
საინტერესოა ისიც, რომ „ქართული ოცნების“ პარლამენტართა რიგებში ირიცხება ერთ-ერთი იმპორტიორი კომპანია „გლობალფარმის“ მფლობელი, ანტონ ობოლაშვილი. მის მიერ შევსებული ოფიციალური დეკლარაციით, „გლობალფარმის“ ფლობის დამსახურებით პირადად ობოლაშვილმა 2020 წელს 1 218 917 ლარი გამოიმუშავა.
ფარმაცევტულ ბიზნესის წარმომადგენლები არიან ოპოზიციაშიც. მაგალითად, პარლამენტის წევრია სააფთიაქო ქსელ PSP-ს (ასევე, PSP დაზღვევის) დამფუძნებელი კახა ოქრიაშვილი, რომელიც უკვე 5 მოწვევის პარლამენტის წევრია. 2008 და 2012 წლების საპარლამენტო არჩევნებში ის „ნაციონალური მოძრაობის“ კანდიდატი იყო, თუმცა ხელისუფლების შეცვლის შემდეგ „ქართული ოცნების“ უმრავლესობის წევრი გახდა. 2020 წელს კი ის ოპოზიციური პარტიების ბლოკით შევიდა პარლამენტში.
საქართველოს სახალხო დამცველი ნინო ლომჯარია ადამიანის უფლებათა დაცვის დღეს, რომელიც 10 დეკემბერს აღინიშნება, საგანგებო განცხადებით გამოეხმაურა. სახალხო დამცველი განცხადებაში შეეხო საქართველოში ფსიქიატრიულ დაწესებულებებში არსებულ პრობლემებსაც.
განცხადებაში აღნიშნულია, რომ 2021 წლის განმავლობაში სახალხო დამცველის აპარატმა 12 სტაციონარის/თავშესაფრის და 15 ამბულატორიის მონიტორინგი განახორციელა.
„წინა წლების მსგავსად, ფსიქიატრიულ დაწესებულებებში პაციენტები ხდებიან ძალადობის მსხვერპლი, უგულებელყოფილია პაციენტთა სამართლებრივი დაცვის გარანტიები.
დაწესებულებები ვერ აკმაყოფილებენ ქვეყანაში მოქმედ ფსიქო-სოციალური რეაბილიტაციის მინიმალურ სტანდარტებსაც კი, არსებული ინფრასტრუქტურული მდგომარეობა არ შეესაბამება საერთაშორისო და ეროვნულ სტანდარტებს.
ფსიქიატრიულ დაწესებულებებში არ არის გატარებული საკმარისი ეპიდემიოლოგიური ღონისძიებები. ფსიქიკური პრობლემების მქონე პირთათვის ქვეყანაში არ არის საკმარისად განვითარებული თემზე დაფუძნებული საცხოვრისები.
პაციენტებს წასასვლელი არსად აქვთ და შესაბამისად ფსიქიატრიულ დაწესებულებებში ხანგრძლივად უწევთ ყოფნა,“ – აცხადებს სახალხო დამცველი.
შეიძლება აცრას უარყოფითი შედეგი ჰქონდეს? – ამ და სხვა საკითხებზე ექიმმა-თერაპევტმა მირინდა ბასილაძემ მოქალაქეების კითხვებს უპასუხა. დისკუსია ექიმთან 23 ნოემბერს გაიმართა სოფელ დიდაჭარაში. ექიმი სოფელს მოგზაურ ბიბლიოთეკასთან ერთად ესტუმრა. დისკუსიის ორგანიზატორი კი „გაზეთი ბათუმელები“ იყო.
მირანდა ბასილაძე:
„დღეს კოვიდ 19-ის გამო უდიდესი გამოწვევის წინაშე დგას არა მხოლოდ ჩვენი რეგიონი და ქვეყანა, არამედ მთელი მსოფლიო. დაავადების სიმძიმე ჯერ კიდევ შესწავლის პროცესშია და მეცნიერებმა ბოლომდე ვერ ახსნეს მისი არსი. შესაბამისად, ჯერ ბოლომდე ცნობილი არ არის, როგორ შეიძლება დავამარცხოთ ეს ვირუსი. ყოველდღიურად გვყავს ყველა ასაკის ძალიან ბევრი ინფიცირებული და გარდაცვლილი.
დღემდე არ არის კონკრეტული პრეპარატი, რომელიც დაამარცხებს ამ დაავადებას. არის რაღაც მონახაზები, შესწავლის პროცესშია რამდენიმე ვერსია, თუმცა მეცნიერება ვერ გვაიმედებს, რომ პანდემია მალე დასრულდება და დაავადებას დავამარცხებთ. ამ ეტაპზე დაავადებასთან ბრძოლაში ერთადერთი მეთოდი არის კოვიდ19-ის საწინააღმდეგო ვაქცინა.
ვაქცინაცია ინფექციური დაავადების დამარცხების დიდი ისტორიის მქონე მეთოდია. წინა საუკუნეში არსებული მსგავსი ტიპის ინფექციური დაავადებების დამარცხებაც ვაქცინაციის გზით მოხერხდა.
ვაქცინასთან დაკავშირებით სხვადასხვაგვარი მოსაზრება აქვთ მოქალაქეებს. ამას ხელი შეუწყო ვაქცინაციის აუცილებლობაზე ინფორმაციის დეფიციტმა საზოგადოებაში. ასევე მწირი ინფორმაცია იყო ვაქცინის ხარისხთან, ვადებთან დაკავშირებით, რამაც გარკვეული მერყეობა გამოიწვია მოსახლეობაში.
ბოლო რამდენი თვის განმავლობაში ჩემი კლინიკა ჩართულია კოვიდ19-თან ბრძოლაში. ყოველდღიური დაკვირვების შედეგად აღმოჩნდა, რომ ინფიცირებულთა 98-99 პროცენტი, ვისი მდგომარეობაც მძიმდება, ვისაც სჭირდება რეანიმაციული ღონისძიებები, განსაკუთრებული სერვისები, არის არავაქცინირებული. შესაბამისად, ძნელია მათი გადარჩენა, საზოგადოებაში დაბრუნება.
რაც შეეხება ვაქცინირებულებს, შესაძლოა ისინიც დაავადდნენ კოვიდ 19-ით, თუმცა მათ მარტივი სიმპტომებით, ოჯახურ გარემოში ან იზოლაციაში გადააქვთ ეს დაავადება. გარდა ამისა, ამ შემთხვევაში ნაკლებია გავრცელების საშიშროებაც.
რაც შეეხება ვაქცინებს, დღეის მდგომარეობით ოთხი ტიპის ვაქცინა გამოიყენება საქართველოში. ორი ვაქცინის – ფაიზერისა და ასტრაზენეკას მომზადების ტექნოლოგია იყო ახალი და თანამედროვე. ამ მეთოდზე მსოფლიო მეცნიერები დიდი ხანია მუშაობენ, რადგან კოვიდ 19-მა დაასწრო მათ დასკვნებს, დაჩქარებული მეთოდით მიღებული ვაქცინები გავიდა მოხმარებაში.
მირანდა ბასილაძე სოფელ დიდაჭარაში დისკუსიის დროს
შესაბამისად, გაჩნდა კითხვები, რამდენად მართებულია ასეთი ვაქცინების გამოყენება. თუმცა კვლევებისა და კონკრეტული დასკვნების გარეშე არ მომხდარა ვაქცინების გამოყენება. ყველა ის კვლევა, რომლებიც უნდა გაიაროს ვაქცინამ, ჩატარებულია. უბრალოდ, ყველა ეს პროცედურა გავლილია მოკლე დროში.
მაგალითად, როდესაც საზოგადოება დადგა შავი ჭირის ან ესპანური გრიპის გავრცელების წინაშე, იმავე მეთოდით, იმავე ტექნოლოგით, დაჩქარებული წესით მიღებული ვაქცინები გამოიყენა მედიცინამ. ამ შემთხვევაშიც ასეა. ორი წელი არ ნიშნავს იმას, რომ ნაკლები რაოდენობის მოხალისეზე გამოიყენეს ან გამოტოვეს კვლევის რაიმე პერიოდი. არსებულმა ვაქცინებმა გაიარა ყველა ის ფაზა, რომლებიც უნდა გაევლო.
ორივე ვაქცინა არის ევროპული და საკმაოდ მდგრადია ინფექციის მიმართ, ამ ორი ვაქცინით აცრის შემთხვევაში ინფიცირების ალბათობა ძალიან დაბალია.
ამ ეტაპზე საქართველოში ასტრაზენეკა არ გვაქვს. ფაიზერით აცრა კი 12 წლის და მეტი ასაკის ყველა ადამიანს შეუძლია.
ადამიანებს, რომლებიც უარს ამბობენ აცრაზე, არ აქვთ კონკრეტული პასუხი, თუ რატომ არ იცრებიან. ეს მოსაზრება მათ გაუჩნდათ ანტივაქსერების მიერ გავრცელებული მცდარი ინფორმაციის გამო.
ფაიზერი არის ევროპული ხარისხის ვაქცინა, რომლითაც აიცრა თითქმის მთელი ევროპის, ამერიკის, დიდი ბრიტანეთის მოსახლეობა.
თუკი მიგვაჩნია, რომ ფაიზერი და ასტრაზენეკა არის ახალი, თანამედროვე მეთოდებით შექმნილი და ამის გამო გვაქვს უნდობლობა, არსებობს ასევე სინოფარმი და სინოვაკი, ზუსტად იმავე ტექნოლოგიით დამზადებული და იმავე მეთოდოლოგიით გამოიმუშავებს ეს ვაქცინები ორგანიზმში იმუნიტეტს, როგორც იმ ვაქცინების შემთხვევაში, რომლებიც დაახლოებით ერთი საუკუნეა გამოიყენება. ყველა ვაქცინა, რომლებსაც წლებია ვიყენებთ ბავშვების ასაცრელად წითელაზე, დიფთერიაზე, ტეტანუსზე, არის ინაქტივირებული ვირუსი. ასეთივე ტიპის ვაქცინაა სინოფარმი და სინოვაკი.
წითელა არის ჩვეულებრივი კორონავირუსული ინფექცია, ოღონდ სხვა სახეობის და არა ახალი კორონავირუსული. ამ შემთხვევაშიც მკვდარი, ინაქტივირებული ვირუსები არის გამოყენებული, რომელთაც ორგანიზმში შეყვანითაც ვიღებთ იმუნიტეტს.
ბევრ ადამიანს აინტერესებს, როგორია ვაქცინების დამზადების ტექნოლოგია, რამდენად მდგრადია, აცრის შემდეგ თუ დავინფიცირდები და ასე შემდეგ, რაც არის არასწორი – ეს არ არის სამკურნალო მედიკამენტი, ვაქცინა არის პროფილაქტიკური საშუალება და შეგვიძლია რამდენიმე ვარიანტიდან ავირჩიოთ ერთი რომელიმე, რომელსაც უფრო ვენდობით.
თუ დავაკვირდებით არსებულ რეალობას, იმ ადამიანების გარდაცვალების მაჩვენებელი, რომლებიც აიცრნენ, მაგრამ მაინც დაინფიცირდნენ, პროცენტულად არის მინიმალური. ამ მინიმალურ შემთხვევებშიც დადგენილია, რომ გარდაცვალების მიზეზი იყო არა მხოლოდ კოვიდ 19, არამედ ის ქრონიკული დაავადებები, რომლებიც პაციენტებს მიჰყვათ კლინიკაში. ჩვენი კლინიკის დაკვირვებით ორი დოზით აცრილი პაციენტების შემთხვევაში არ ველოდებით გართულებას, მით უმეტეს იმას, რომ პაციენტი გახდება სარეანიმაციო. ვაქცინირებული ადამიანების ინფიცირების პარამეტრები ძალიან დაბალია.
ანტისხეულები, რომლებსაც გამოიმუშავებს ორგანიზმი, ხელს უშლიან გავრცელებას და ყველაზე მთავარი არის ის, რომ ორგანიზმი დაინფიცირების შემთხვევაში მზად ხვდება ინფექციას. თუკი აუცრელი პაციენტების შემთხვევაში 12-14 დღეა საჭირო პაციენტის კლინიკაში დაყოვნება და მეთვალყურეობა, ამასთან ველოდებით, რომ შესაძლოა ყოველ წუთს დამძიმდეს პაციენტის მდგომარეობა, აცრილ ადამიანებთან კი, ვისაც მძიმე თანმხლები დაავადებები ჰქონდა, და ხშირ შემთხვევაში ეს დაავადებები იწვევენ პაციენტის მდგომარეობის გაუარესებას, ჩვენ გავიმარჯვეთ და გავწერეთ სახლში.
კოვიდგადატანილი ადამიანების აცრა რეკომენდებულია გადატანიდან 120 დღის შემდეგ. აცრიდან დაახლოებით 6 თვე აქტიურია ანტისხეულები, რომლებიც იცავენ ორგანიზმს.
ადამიანები, რომლებიც არიან 60 წელს გადაცილებულები და აქვთ ქრონიკული დაავადებები, სასურველია აიცრან ბუსტერ დოზით, რომელიც კეთდება მეორე დოზით აცრიდან 6 თვის შემდეგ. ვინც აცრილია ასტრაზენეკათი, მასაც შეუძლია ბუსტერ დოზად გამოიყენოს ფაიზერი. სინოფარმითა და სინოვაკით აცრილებსაც შეუძლიათ ფაიზერის ბუსტერ დოზის გაკეთება.
ვინც აცრილია სინოფარმითა და სინოვაკით, თუმცა ხელი ეშლებათ რომელიმე ქვეყანაში გამგზავრებაში, შესაბამისი საბუთების წარმოდგენის შემთხვევაში შესაძლებელია მათი აცრა ფაიზერის ორი დოზით.
რაც შეეხება სიკვდილობის მაჩვენებელს, კოვიდ19-ით სიკვდილობის მაჩვენებელი ითვლება ყველა ქვეყანაში ცალკე სტატისტიკით. დღეს გარდაცვალების მაჩვენებელი საქართველოსთვის არის ძალიან დიდი. ასევე დიდი ფიზიკური ძალისხმევის გაღება გვიწევს ჩვენ, მედპერსონალს კოვიდით დაავადებულებთან მუშაობისას. დადგება ალბათ მომენტი, როცა ამოიწურება ამ ადამიანების რესურსი, ვინც კოვიდკლინიკებში მუშაობს. სანამ აქამდე მივალთ, უნდა დავასწროთ ამ ყველაფერს და თუ მეცნიერება ვერ შექმნის პრეპარატს, რომელიც მუშაობს ამ დაავადებაზე, მანამდე ერთადერთი არჩევანი რჩება ვაქცინაცია.
თუკი დღემდე ვიცრებოდით ჩვეულებრივი, ინაქტივირებული ვაქცინებით, შეგვიძლია ვენდოთ იმავე მეთოდით დამზადებულ სინოფარმის და სინოვაკის ვაქცინას. თუმცა ახალ ვაქცინაზე – ფაიზერზეც წლებია მუშაობენ ამავე ტექნოლოგიით. მსოფლიოში არის პოზიტიური პარამეტრები – ქვეყნებში, სადაც ვაქცინაციის პროცესი აქტიურად მიმდინარეობს, არ არის ლოქდაუნი, არ აქვთ დიდი გავრცელება, არ არის სიკვდილიანობის მაღალი მაჩვენებელი. სხვა რესურსი ჯერ მსოფლიოში არ არის. თუ არ ავიცრებით, ვერ შევამცირებთ ინფიცირებას და სიკვდილიანობას“.
შენიშვნა: ჯანდაცვის სამინისტროს 7 დეკემბრის გადაწყვეტილებით, ფაიზერითა და ასტრაზენეკათი აცრილებისთვის ბუსტერდოზის ინტერვალი 5 თვემდე შემცირდა, ხოლო სინოვაკითა და სინოფარმით აცრილებისთვის – 3/6 – თვემდე. ინტერვალი ითვლება მეორე დოზით აცრის დღიდან.
ზამთრის თვეებისთვის, სილქნეტმა, ახალ კამპანია დაიწყო #გაიაქტიურეზამთარი. წლის ყველაზე ცივი სეზონის განმავლობაში, მომხმარებელს შესაძლებლობა ექნება, აქციის ფარგლებში, სასურველ დროს გაიაქტიუროს 90 დღიანი პაკეტები:
30 GB ინტერნეტი – 39 ლარი – კოდით *022*2#
ულიმიტო ინტერნეტი – 59 ლარი – კოდით *022*3#
ულიმიტო სასაუბრო დრო და ულიმიტო SMS – 59 ლარი – კოდით*022*4#
ბათუმში, ბონის დასახლებაში, „მეტრო ჰოლდინგში“ შემავალი ერთ-ერთი კომპანიის მიერ უკანონოდ აშენებულ 9 კორპუსში უძრავი ქონების გაყიდვა დაიწყო. ამის შესახებ სულ სხვა კომპანია – „ჰექსინ ჯგუფი“ იუწყება. ახალ დასახლებას, რომელიც რამდენიმე თვეში უკანონოდ აშენდა, ქონების მესაკუთრეები ასე მოიხსენიებენ – „ბონი სითი“ ან „ჰექსინ მომავლის ქალაქი“.
„მეტრო“ გავლენიანი და ცნობილი ჰოლდინგია საქართველოში. „ბათუმელები“ ბოლო 2 თვეა სწორედ ამ ჰოლდინგთან დაკავშირებული კომპანიების საქმიანობას იკვლევდა.
ჩვენ მიერ მოპოვებული დოკუმენტების მიხედვით, ბონის დასახლებაში, კონკრეტულად კი გოგოლის ქუჩის 11ბ-ში, რეგისტრირებულია რამდენიმე კომპანია, რომელთა მესაკუთრე/დირექტორი ასევე ფლობს ერთ-ერთ კომპანიას სახელწოდებით „ჭენჭი“. ჩვენს ხელთ არსებული დოკუმენტების თანახმად, სწორედ „ჭენჭის“ ერთ-ერთ სასტუმროს სეიფში აღმოაჩინა პოლიციამ ჩხრეკის შედეგად ჩინეთის 38 მოქალაქის პასპორტები.
გამოძიება ტრეფიკინგის მუხლით დაიწყო.
ვის ეკუთვნის კომპანია „ჭენჭი“ და რას წარმოადგენს კიდევ ერთი კომპანია – „ჰექსინ ჯგუფი“, რომელიც „მეტრო ჰოლდინგის“ უკანონოდ აშენებულ კორპუსებს ყიდის ბათუმში, გოგოლის ქუჩაზე, როგორც თავად უწოდებენ Hexin Future City/„ჰექსინ მომავლის ქალაქში“?
[toggle title=”ვინ არიან „მეტრო ჰოლდინგთან“ დაკავშირებული კომპანიები“]გოგოლის ქუჩის 11ბ-ში მდებარე მიწის ნაკვეთი „მეტრო ჰოლდინგში“ შემავალი კომპანიის „მეტრო მოლ ოფ აჭარას“ საკუთრებაშია.
„ჰექსინ ჯგუფი“ პოტენციურ კლიენტებს საინვესტიციოდ „მეტროს“ საკუთრებაში არსებულ სხვა ქონებებსაც სთავაზობს [მაგალითად, სასტუმრო „ინტურისტი“, „სქაი თაუერი“] და პარალელურად ამ ქონებით სარგებლობს კიდეც.
„ბათუმელების“ მოკვლევით აღმოჩნდა, რომ გოგოლის ქუჩის 11ბ თავის იურიდიულ მისამართად მითითებული აქვს 25 კომპანიას, რომლებიც ბოლო 6 თვეშია დაფუძნებული და რომელთა დამფუძნებლები ნიდერლანდების, კამბოჯას, ჩინეთისა და ფილიპინების მოქალაქეები არიან. აქედან 18 კომპანიაში წილებს ფლობს ან დირექტორია ფილიპინების მოქალაქე მაიკლ ოზაეტა.
მაიკლ ოზაეტა ასევე ფლობს შპს „ჭენჭის ნავსადგურის უძრავი ქონების საინვესტიციო კომპანიას“, რომელსაც ბათუმში იჯარით აღებული აქვს არაერთი ობიექტი, მათ შორის სასტუმროები.
ამ კომპანიის მიერ იჯარით აღებულ ერთ-ერთ სასტუმრო „პრაიმ ჰოტელში“ კი, პოლიციამ სეიფიდან ჩინეთის 38 მოქალაქის პასპორტი ამოიღო. ფაქტზე გამოძიება ტრეფიკინგის მუხლით მიმდინარეობს.[/toggle]
ვინ არიან „მეტრო ჰოლდინგთან“ დაკავშირებული კომპანიები
გამოძიება ტრეფიკინგის მუხლით ბათუმში – ჩინეთის საელჩო თავის მოქალაქეებს აფრთხილებს
ბოლო 4 თვის განმავლობაში „ბათუმელები“ შეხვდა ჩინეთის არაერთ მოქალაქეს, რომლებიც ბათუმში დაასაქმეს. დამსაქმებლებიც ჩინეთის მოქალაქეები არიან, თუმცა კონკრეტულად რას საქმიანობენ, მკაცრად გასაიდუმლოებულია.
უკვე ერთი თვეა, რაც აჭარის პოლიციის დეპარტამენტში მიმდინარეობს გამოძიება ტრეფიკინგის მუხლით. ეს საქმე ჩინეთის მოქალაქეებს უკავშირდება – პოლიციამ ნოემბრის თვეში შპს „ჭენჭის ნავსადგურის უძრავი ქონების საინვესტიციო კომპანიის“ მფლობელობაში არსებული სასტუმროს – „პრაიმ ჰოტელის“ სეიფში ჩაკეტილი 38 პასპორტი იპოვა.
ტაბიძის 26-ში მდებარე „პრაიმ ჰოტელი“ კომპანიას იჯარით აქვს აღებული.
პასპორტები ჩინეთის იმ მოქალაქეების ეკუთვნით, რომლებიც ამავე სასტუმროში მუშაობდნენ.
კომპანია „ჭენჭს“ ერთი მესაკუთრე ჰყავს და ის ფილიპინების მოქალაქე მაიკლ ოზაეტაა. კომპანია ბათუმში 2021 წლის ივლისში დააფუძნეს.
ნოემბრის თვეში ბათუმში ძალადობის ბრალდებით ჩინეთის 5 მოქალაქე დააკავეს. მათ საქალაქო სასამართლომ წინასწარი პატიმრობა შეუფარდა: დაზარალებულია ყაზახეთის 2 მოქალაქე – საქმის მასალების მიხედვით, მათ დაკავებულებმა სცემეს. ცემის ფაქტი სასტუმრო „პრაიმ ჰოტელში“ დაფიქსირდა. აქვე მუშაობდნენ ბრალდებულებიც.
„ბათუმელების“ მიერ მოპოვებული საქმის მასალების მიხედვით, გამოიკვეთა შესაძლო ტრეფიკინგის ნიშნები – გამოძიება ტრეფიკინგის მუხლით დაიწყო კიდეც. თუმცა, ჯერჯერობით, დევნა არავის მიმართ არ მიმდინარეობს.
პოლიცია ამ ეტაპზე იმ მოქალაქეების გამოკითხვას აწარმოებს, რომლებსაც პასპორტები ეკუთვნით.
დეტალების გასარკვევად „ბათუმელები“ დაუკავშირდა ჩინეთის საელჩოს საქართველოში. შეთანხმების მიუხედავად, პასუხების გაცემაზე საელჩომ საბოლოოდ უარი გვითხრა.
თუმცა ჩინეთის სახალხო რესპუბლიკის საელჩომ საქართველოში [ასევე არაბთა გაერთიანებულ საამიროებში, უკრაინაში] გაავრცელა ოფიციალური განცხადება ჩინეთის მოქალაქეების სხვადასხვა არალეგალურ საქმიანობაში მოტყუებით ჩართვის ტენდენციებზე.
დუბაი-კიევი-ბათუმი – რა უთხრა დაზარალებულმა პოლიციას
ცემის საქმეში დაზარალებული დამუ ჟ. ჰყვება, როგორ აღმოჩნდა საქართველოში: თავის მეგობარს აკზოლ ა.-ს ყაზახეთში გააცნეს პიროვნება, რომელმაც მას შესთავაზა დუბაიში სამსახური, რაც დაკავშირებული იყო კომპიუტერულ საქმიანობასთან.
საქმის მასალების მიხედვით, დამუ ჟ. და აკზოლ ა. 2021 წლის აგვისტოში ჩაფრინდნენ დუბაიში.
„მგზავრობის ხარჯები უზრუნველყო კომპანიამ, რომლის ოფიციალური დასახელება არ ვიცი. აეროპორტში ჩასვლისას დაგვხვდა 3 ან 4 კაცი, რომლებმაც პანდემიის გამო ავტომანქანით წაგვიყვანეს კარანტინში, სადაც გავჩერდით 10 დღე, რა დროის განმავლობაშიც აღნიშნულმა უცნობმა პირებმა ჩამოგვართვეს პასპორტები“, – ამბობს დამუ ჟ.
მისივე მონათხრობით, ისინი დუბაიდან წაიყვანეს კიევში, სადაც 10-15 დღეს ასწავლიდნენ, როგორ შეექმნათ ყალბი გვერდები ფეისბუქზე. საქმის მასალების მიხედვით:
„თავს ვასაღებდით როგორც გოგონები, პროფილის სურათებად ვდებდით ლამაზი გოგონების ფოტოებს, რომლის საშუალებითაც ვიმატებდით უცხო კაცებს, ვწერდით, ვაბამდით მათთან რომანს, რის შემდეგაც ვეუბნებოდით, როგორ შეიძლებოდა ადვილად ფულის შოვნა და გაგვყავდა ყალბ საინვესტიციო პლატფორმა TRADING MT 5 -ზე. მოტყუების შემდეგ კლიენტი გადადიოდა მთავარ აგენტთან, რომელიც იყო ჩინელი, რომლის სახელი და გვარი არ ვიცი. პლატფორმაზე შემოტყუების შემდეგ კლიენტთან მუშაობდა ერთი და იგივე აგენტი. ჩვენ გვევალებოდა კლიენტების მოზიდვა, რაც შეეხება პლატფორმაზე ფულის ჩადებას, ამის თაობაზე მუშაობდა აგენტი“.
დამუ ჟ.-მ გამოძიებას უთხრა, რომ უკრაინაში ყოფნისას, სექტემბრის თვეში, მასთან მივიდა „ერთ-ერთი ჩინელი, რომელიც იყო მთავარი აგენტ-მენეჯერი, ყალბ საინვესტიციო პლატფორმაზე“ და უთხრა, რომ უნდა წასულიყო ბათუმში.
„მე მისთვის უარი არ მითქვამს, რამეთუ მეშინოდა. მათ ჰქონდათ ჩემი პასპორტი, აკრძალული მქონდა თავისუფლად გადაადგილება და ვიყავი შანტაჟის ქვეშ“.
დამუ ჟ. ასევე ჰყვება, რომ მას უკრაინიდან ჩამოჰყვა ჩინეთის რამდენიმე მოქალაქე და ბათუმში ჩამოფრენის შემდეგ აეროპორტთან ახლოს მდებარე სასტუმროში გაიარა 10-დღიანი კარანტინი. შემდეგ გადავიდა „ორანჯ ჰოტელში“, „სადაც გადმოვიდნენ და დარჩნენ ის ჩინელები, რომლებმაც ჩამომიყვანეს უკრაინიდან“.
მისივე თქმით, მან ბათუმში გააგრძელა იგივე საქმიანობა, რასაც უკრაინაში აკეთებდა:
„ჩემ მიერ შესრულებული სამუშაო იყო ყალბ საინვესტიციო პლატფორმა – TRADING M გვერდზე, ჩემ მიერ ყალბი ფეისბუქგვერდით გაცნობილი და გადმობირებული კაცების გადამისამართება, რათა მათ შემდგომში განეხორციელებინათ ინვესტიციები და კომპანიას მიეღო უკანონო ყალბი სარგებელი. „ორანჯ ჰოტელში“ ყალბი საინვესტიციო პლატფორმის TRADING MT 5-ის ფუნქციონირებისთვის ვიყენებდით დაახლოებით 30 კომპიუტერს“.
დამუ ჟ. ამბობს, რომ დღე-ღამის განმავლობაში მუშაობდნენ დაახლოებით 15 საათს: „მუშაობას ვიწყებდით ღამის 3 ან 4 საათიდან და ვმუშაობდით საღამოს 7 ან 8 საათამდე. თუ ვერ მოვიზიდავდით ბევრ კლიენტს, გვიწევდა მუშაობა თითქმის 24 საათი. თუ არ შევასრულებდით მოთხოვნას, დაგვაკლებდნენ ხელფასს, ათასი ლარის ფარგლებში. ხელფასი თვეში 3 000 ლარი იყო“.
დაზარალებული არც ერთ კომპანიას არ ასახელებს და აცხადებს, რომ კომპანიების ოფიციალური დასახელებები არ ახსოვს. მისივე მონაყოლით, მთელი ამ პერიოდის განმავლობაში გადაუხადეს ერთი თვის ხელფასი, ასევე ბონუსი – 2000 ლარი.
საქმის მასალების მიხედვით, დამუ ჟ.-ს 8 ნოემბერს, ხოლო მის მეგობარ აკზოლ ა.-ს 7 ნოემბერს სცემეს. მაშინ აკზოლ ა. არასრულწლოვანი იყო.
მისივე თქმით, 8 ნოემბერს კონფლიქტი მოუვიდა „ჩინელ მამაკაცთან, რომელიც არის ყალბი საინვესტიციო პლატფორმის ერთ-ერთი ხელმძღვანელი“ [რომელიც ჩამოჰყვა უკრაინიდან] იმის გამო, რომ მას მისცა საჭმლის ფული, თუმცა საკვები არ მიუტანეს.
„როგორც აკზოლ ა.-სგან გავიგე, პასპორტის დაბრუნებაში ითხოვდნენ 25 ათას ლარს, რაც დახარჯული ჰქონდათ ჩვენს ტრანსპორტირებაში, კვებაში და საყოფაცხოვრებო პირობების შექმნაში. მე, პირადად, არც ერთი მათგანისთვის არ მიმიმართავს პასპორტის დაბრუნებისა და სამუშაოს შეწყვეტის მოთხოვნით. მეშინოდა, რომ მცემდნენ და მომაყენებდნენ შეურაცხყოფას“, – ამბობს დამუ ჟ.
ამონარიდი დამუ ჟ.-ის გამოკითხვის ოქმიდან
[toggle title=”დააწკაპუნეთ აქ და გაეცანით ჩანაწერებს გამოკითხვის ოქმიდან, ასევე სხვა დეტალებს“]
ამონარიდი გამოძიების მასალებიდან
კითხვა: გამომდინარე იქედან, რომ უწყვეტად გქონდათ წვდომა ინტერნეტთან, რატომ არ შეატყობინეთ თქვენი მდგომარეობის შესახებ ოჯახის წევრებს, საკონსულოს ან პოლიციას?
დამუ ჟ: იყო შემთხვევები, როდესაც ჩინელი კაცები, რომლებიც ზემოთ აღვწერეთ, გვიკონტროლებდნენ ტელეფონს და ამოწმებდნენ, თუ ვისთან დავრეკეთ და გვქონდა კომუნიკაცია. ასევე აღნიშნული პირები გვარწმუნებდნენ, რომ გარიგებული იყვნენ პოლიციასთან და პოლიცია მაინც არ მოახდენდა რეაგირებას. უფრო გავიფუჭებდით საქმეს, რის გამოც არ მივმართე პოლიციას. აღნიშნულის შესახებ გვესაუბრებოდნენ და ერთმანეთში საუბრობდნენ ჩინელები.
დამუ ჟ-ს ცემაზე ბრალი ორ პირს ჯგუფურად ცემის მუხლით წარედგინა, ხოლო აკზოლ ა-ს ცემის ფაქტზე სამ პირს – წინასწარი შეცნობით არასრულწლოვნის ჯგუფურად ცემაში [აკზოლ ა., როცა ის სცემეს, არ იყო 18 წლის].
5 დაკავებულის გარდა არის კიდევ 1 პირი, რომლის ვინაობაც, საქმის მასალების მიხედვით, დადგენილი არ არის. ბრალდებულებს ბრალი 2021 წლის 18 ნოემბერს წარედგინათ.
„ბათუმელებმა“ მოიპოვა ასევე განცხადებები, რომლებითაც დაზარალებულები [დაკავებულებისთვის ბრალის წარდგენიდან 18 დღის შემდეგ] მიმართავენ ბათუმის საქალაქო სასამართლოს თავმჯდომარეს და აჭარის პროკურორს.
„გაცნობებთ, რომ ბრალდებულების მიმართ არავითარი პრეტენზია არ გაგვაჩნია, მათ სრულად ამინაზღაურეს მოყენებული ზიანი, არ ვითხოვ მათ დასჯას. ასევე გთხოვთ და ვშუამდგომლობ თქვენ წინაშე, რომ მათ მიმართ გამოყენებულ იქნას კანონით გათვალისწინებული ყველა სახის საპროცესო შეღავათი, კერძოდ თანახმა ვარ, რომ მათ აღკვეთის ღონისძიების სახე დაპატიმრება შეეცვალოთ გირაოთი, გაუფორმდეთ საპროცესო შეთანხმება, ასევე თანახმა ვარ მათ მიმართ დანიშნული იქნას არასაპატიმრო სასჯელი“, – აღნიშნულია დაზარალებულების განცხადებაში.
[/toggle]
„ბათუმელებმა“ მოიპოვა ასევე განცხადებები, რომლებითაც დაზარალებულები [დაკავებულებისთვის ბრალის წარდგენიდან 18 დღის შემდეგ] მიმართავენ ბათუმის საქალაქო სასამართლოს თავმჯდომარეს და აჭარის პროკურორს.
„გაცნობებთ, რომ ბრალდებულების მიმართ არავითარი პრეტენზია არ გაგვაჩნია, მათ სრულად ამინაზღაურეს მოყენებული ზიანი, არ ვითხოვ მათ დასჯას. ასევე გთხოვთ და ვშუამდგომლობ თქვენ წინაშე, რომ მათ მიმართ გამოყენებულ იქნას კანონით გათვალისწინებული ყველა სახის საპროცესო შეღავათი, კერძოდ თანახმა ვარ, რომ მათ აღკვეთის ღონისძიების სახე დაპატიმრება შეეცვალოთ გირაოთი, გაუფორმდეთ საპროცესო შეთანხმება, ასევე თანახმა ვარ მათ მიმართ დანიშნული იქნას არასაპატიმრო სასჯელი“, – აღნიშნულია დაზარალებულების განცხადებაში.
სეიფიდან ამოღებული 38 პასპორტი – „გვითხრეს, რომ მიმდინარეობდა გამოძიება ადამიანით ვაჭრობის ფაქტზე“
ამავე საქმეზე პოლიციამ გამოჰკითხა „პრაიმ ჰოტელში“ დასაქმებული ერთ-ერთი პირი, გუანგცი ჯ. რომელიც ამბობს, რომ ცხოვრობს ჩინეთში, არის ჩინეთის მოქალაქე, სადაც დასაქმებული იყო ბრინჯის შესანახი ტომრების ყიდვა-გაყიდვით.
„2021 წლის სექტემბრის თვეში გადავწყვიტე დასვენება საქართველოში ტურისტული მიზნით. მანამდე ასევე ტურისტული მიზნით დაახლოებით 28-29 დღე ვიმყოფებოდი უკრაინაში, ქალაქ კიევში, საიდანაც თვითმფრინავით ჩამოვფრინდი ბათუმში 2021 წლის 15 სექტემბერს. გავატარე კარანტინში 7-8 დღე, სასტუმრო მდებარეობდა ბათუმში, აეროპორტთან ახლოს, თუმცა სასტუმროს დასახელება არ მახსოვს. ბათუმში ცხოვრობდა ჩემი ჩინელი ნაცნობი მამაკაცი სახელად ლოგენი, რომლის გვარი არ ვიცი, ასევე არ ვიცი, თუ რას საქმიანობდა. მე მასთან მივედი სახლში, თუმცა სახლის მისამართი არ ვიცი, ასევე არ ვიცი, თუ რა უბანი იყო, მე არ მიკითხავს და არ დავინტერესებულვარ, თუ რას საქმიანობდა ლოგენი. მასთან მქონდა კონტაქტი სოციალური ქსელით, თუმცა მისი ტელეფონის ნომერი არ მიწერია. მე ლოგენთან გავჩერდი დაახლოებით 8-9 დღე… ის სად მუშაობდა, ამის შესახებ არაფერი უთქვამს და არც სადმე კონკრეტულად სამუშაოდ წასული არ მინახავს“.
გამოკითხვის ოქმის მიხედვით, გუანგცი ჯ. ამის შემდეგ საცხოვრებლად გადადის სხვადასხვა მისამართზე, „მათ შორის ერთ-ერთ ჩინურ ჰოსტელში“, რომლის მისამართი ასევე არ ახსოვს.
„ბათუმში გავიცანი რამდენიმე ჩინელი ეროვნების პიროვნება. ერთ-ერთმა მათგანმა, რომლის სახელი იყო ჯეკი, რომელიც ასევე ცხოვრობდა ბათუმში, საკონტაქტო ქსელ ტელეგრამის საშუალებით მომწერა, რომ იყო სამსახური ერთ-ერთ სასტუმროში, რომელიც მდებარეობდა აეროპორტთან ახლოს, რომლის სახელი არ მახსოვს, სადაც მივედი და გავესაუბრე სასტუმროს თანამშრომელს, რომლის სახელი იყო ლოცენგი, გვარი არ მახსოვს…“ – ამბობს გუანგცი ჯ, რომელიც ამ სასტუმროში დაასაქმეს.
„ოქტომბრის თვეში 20 დღე ვიმუშავე… აქვე დავაზუსტებ, რომ მე, მართალია, არ მახსოვს სასტუმროს ზუსტი მისამართი და დასახელება, თუმცა სასტუმრო ეკუთვნოდა ქართველს, პერსონალი იყო ძირითადად ჩინელები. ამასთან, ეს სასტუმრო არ იყო განკუთვნილი ვიზიტორების მისაღებად, იქ ცხოვრობდნენ ჩინელები, რომლებიც იყვნენ დაკავებულნი ჩინური საკვები პროდუქტების გაყიდვით, რომლის დეტალები მე არ ვიცი. ჩემს მოვალეობაში შედიოდა ამ სასტუმროში დასაქმებული პირების საკვები პროდუქტებით უზრუნველყოფა“, – ჰყვება გუანგცი ჯ.
მისივე მონათხრობით, ის ემორჩილებოდა ვინმე ალანს, მოგვიანებით კი [ოქტომბრის ბოლოს], გადავიდნენ ტაბიძის 26-ში მდებარე სასტუმროში.
„რაც შეეხება აღნიშნულ სასტუმროს ნომერში მომუშავე პირებს, მე ზუსტად არ ვიცი, თუ რას საქმიანობდნენ ისინი, თუმცა დაახლოებით 30-40 პირი, რომლებსაც ხელმძღვანელობდა საუფანი, აღნიშნული პირები მუშაობდნენ იქვე სასტუმროში არსებულ კომპიუტერებთან, მათი საქმიანობით არ დავინტერესებულვარ, ვიცი მხოლოდ ის, რომ ისინი ახორციელებდნენ ჩინური საკვები პროდუქტების ყიდვა-გაყიდვას. როგორც ვიცი, კომპანიას გააჩნდა ასევე ფილიალი ჩინეთში, რომელთანაც ჰქონდა კონტაქტი ჩვენი ადგილობრივი სასტუმროს მენეჯერს და თანამშრომლებს. ზემოთ აღნიშნული ფული კი, რომელიც იყო სეიფში შენახული, იყო თანამშრომლების მიერ გამომუშავებული, თუმცა კონკრეტულად რა გზით, არ ვიცი“, – ამბობს გუანგცი ჯ.
ტაბიძის 26-ში სასტუმრო უკვე ცარიელი და დაკეტილია. ერთ-ერთ შესასვლელ კარზე გამოკრულია წარწერა, რომ დაუკავშირდნენ გამომძიებელს, კიდევ ერთი შესასვლელი კარი კი დალუქულია შსს-ს მიერ.
გუანგცისავე თქმით: „2021 წლის 11 ნოემბერს ვიმყოფებოდი სასტუმროში, ღამის საათებში, რა დროსაც მოვიდნენ პოლიციის თანამშრომლები, რომელთაც ახლდათ თარჯიმანი და გვითხრეს, რომ მიმდინარეობდა გამოძიება ადამიანით ვაჭრობის ფაქტზე და უნდა მომხდარიყო სასტუმროში ჩხრეკა, რასაც მე დავეთანხმე და ჩემს საცხოვრებელ ნომერში ჩატარდა ჩხრეკა, რა დროსაც იქვე არსებული სეიფიდან ამოღებული იქნა ჩინელი ეროვნების პირების პასპორტები, რომლებიც ჰქონდა ალანს შენახული. როგორც მახსოვს, იყო 38 პასპორტი. ასევე ამოღებული იქნა ფულადი თანხა და იჯარის ხელშეკრულება. გარდა ამისა, აღნიშნულ ოთახში არსებული მოთეთრო-მოყავისფრო ჩემოდნიდან ამოღებული იქნა პასპორტი გაცემული იანგ ჩ-ს სახელზე და იყო ფულადი თანხაც.“
გამოკითხვის ოქმის მიხედვით, ამ სეიფში ალანი ინახავდა ფულს და ანაწილებდა ხელფასებს.
[toggle title=”დააწკაპუნეთ და გაეცანით ჩანაწერებს გამოკითხვის ოქმიდან”] ამონარიდი გამოძიების მასალებიდან
კითხვა: შეეძლოთ თუ არა საჭიროების შემთხვევაში სასტუმროში მყოფ პირებს აეღოთ პასპორტი?
გუანგცი ჯ: მათ შეეძლოთ ნებისმიერ დროს ეთხოვათ ალანისთვის, რომელიც გადასცემდა მათ პასპორტს. პასპორტები შენახული იყო იმ მიზნით, რომ არ დაკარგვოდათ მათ, რაც იყო ალანის გადაწყვეტილება.
კითხვა: შეეძლოთ თუ არა აღნიშნულ პირებს თავისუფლად გადაადგილება?
გუანგცი ჯ: სასტუმროში მომუშავე პირებს შეეძლოთ სასტუმროდან თავისუფლად გამოსვლა და გადაადგილება, ასევე მათ თან ჰქონდათ თავიანთი კუთვნილი მობილური ტელეფონები, უბრალოდ სასტუმროდან გამოსვლის წინ მათ ეს უნდა ეცნობებინათ სასტუმროს მენეჯერისთვის – საუფანისთვის.
კითხვა: იცნობთ თუ არა დაზარალებულებს?
გუანგცი ჯ: ვიცნობ, მაგრამ ახლოს არა. ისინი მუშაობდნენ როგორც ვიცი კომპიუტერთან… გადმოცემით ვიცი, რომ მოუვიდათ კონფლიქტი ასსისთან…
კითხვა: გაქვთ თუ არა ინფორმაცია სასტუმროში მყოფი პირების მიმართ ადამიანით ვაჭრობის შესახებ?
გუანგცი ჯ: მე რაიმე საეჭვო არ შემინიშნავს სასტუმროში მყოფი პირების მიმართ განხორციელებული იძულების შესახებ. ისინი საქმიანობდნენ ნებაყოფლობით. ასევე მეც ვინმეს მიმართ არ გამომიყენებია ფიზიკური იძულება და არავინ საქართველოში არც ჩინეთიდან და არც უკრაინიდან არ ჩამომიყვანია… სასტუმრო არ იყო ვიზიტორებისთვის განკუთვნილი, იქ მომუშავე ჩინელი ეროვნების პირები დაკავებული იყვნენ ჩინური საკვები პროდუქტების ყიდვა-გაყიდვით, რისთვისაც იღებდნენ შესაბამის ანაზღაურებას ხელზე. თუმცა მათი საქმიანობის კონკრეტული დეტალები არ ვიცი, რადგან არ დავინტერესებულვარ.[/toggle]
გამოკითხვის დროს, როგორც ჩანს, გამოძიება ელექტრონული ვალუტის ყიდვა-გაყიდვის საკითხითაც დაინტერესებულა.
„აღნიშნული პირები დაკავებული იყვნენ თუ არა ელექტრონულ პლატფორმაზე ვალუტების ყიდვა-გაყიდვით და კლიენტების მოზიდვით, ჩემთვის უცნობია.“ – პასუხობს გამოძიებას გუანგცი ჯ.
„ჭენჭის ნავსადგურის უძრავი ქონების საინვესტიციო კომპანია“ და კავშირი „მეტროსთან“
„პრაიმ ჰოტელში“ დასაქმებული გუანგცი ჯ, რომელიც პოლიციამ ზემოთ აღნიშნულ საქმესთან დაკავშირებით გამოჰკითხა, ამბობს, რომ სასტუმროს იჯარით აღების ხელშეკრულებაზე ხელი ალანის თხოვნით [2021 წლის ოქტომბრის თვეში] თავად მოაწერა.
საჯარო რეესტრის დოკუმენტების მიხედვით კი, ტაბიძის 26-ში მდებარე ამ სასტუმროს შენობის [ჯამში 2450 კვ.მ – პირველი სართულის ნაწილი და მეორე-მესამე სართულები მთლიანად] იჯარით აღებული აქვს შპს „ჭენჭის ნავსადგურის უძრავი ქონების საინვესტიციო კომპანიას“. იჯარის ხელშეკრულება რეესტრში დამოწმებულია 2021 წლის 25 აგვისტოს, ანუ გუანგცი ჯ.-ის ბათუმში ჩამოსვლამდე.
დოკუმენტების მიხედვით, აღნიშნული შპს ჩინეთის მოქალაქე ფენგ ხუანგმა ბათუმში 2021 წლის ივლისში დააფუძნა. დაახლოებით ერთ თვეში კი, კომპანიის 100 პროცენტი წილი უსასყიდლოდ ფილიპინების მოქალაქე მაიკლ ოზაეტას გადასცა.
„ბათუმელების“ მიერ მოძიებული დოკუმენტების მიხედვით, მაიკლ ოზაეტა წილებს ფლობს ან/და დირექტორია დაახლოებით 18 კომპანიის, რომელთა უმეტესობაში პარტნიორები არიან ჩინეთის მოქალაქეები. ეს კომპანიები მიმდინარე წლის ივლისშია რეგისტრირებული და იურიდიულ მისამართად ყველას მითითებული აქვს ბათუმი, გოგოლის ქუჩა 11ბ.
ამ მისამართზე არსებული მიწის ნაკვეთი „მეტრო ჰოლდინგის“ საკუთრებაა და იქ მრავალსართულიანი შენობები უკანონოდ შენდება.
2021 წლის მაისიდან ოქტომბრამდე პერიოდში, ბათუმში, ჩინეთის, კამბოჯას, ფილიპინებისა და ნიდერლანდების მოქალაქეების მიერ დაფუძნებული კომპანიები, ძირითადი საქმიანობისა და იურიდიული მისამართის მიხედვით, რომლებიც „მეტრო ჰოლდინგთან“ არიან დაკავშირებული / „ბათუმელების“ მიერ მოძიებული მონაცემებით, მარტო გოგოლის ქუჩის 11ბ-ში, სადაც უკანონო მშენებლობა მიმდინარეობს, ბოლო 6 თვეში 25 კომპანიაა რეგისტრირებული.
„ჭენჭის ნავსადგურის უძრავი ქონების საინვესტიციო კომპანიას“, თავის მხრივ, ბათუმში არაერთი კომერციული თუ საცხოვრებელი ფართობი აქვს აღებული იჯარით [ძირითადად, 2026 წლამდე]. მათ შორის, რამდენიმე სასტუმროც. იმ ობიექტებში, სადაც „ბათუმელები“ იმყოფებოდა, დაცვის თანამშრომლები ერთსა და იმავე პასუხს გვცემდნენ: „სასტუმრო არ მუშაობს… არაფერი ვიცით“.
რა მიზნით იქირავა შენობები კომპანიამ არც იმ მეიჯარეებმა იციან, რომლებსაც „ბათუმელები“ ესაუბრა.
„ჩვენ, ბუნებრივია, ვკითხეთ საქმიანობის შესახებ, თუმცა მხოლოდ ის გვითხრეს, რომ მათ მიერ დასაქმებული პირები შენობაში იმუშავებდნენ და თან იქვე იცხოვრებდნენ… ჩვენ იჯარის ხელშეკრულებაში ჩავუწერეთ, რომ თავად არიან პასუხისმგებლები ყველა ისეთ შესაძლო ქმედებაზე, რაც საქართველოს კანონმდებლობით აკრძალულია – მაგალითად, ეს იქნება პროსტიტუციის მიზნით ფართობის დათმობა თუ, ვთქვათ, სახანძრო უსაფრთხოების დაცვა“ – გვითხრა ერთ-ერთმა მეიჯარემ.
„ჰექსინ მომავლის ქალაქი“ – უკანონოდ აშენებული კორპუსები ბათუმში და საინვესტიციო შეთავაზება
ჰექსინ მომავლის ქალაქი/Hexin Future City – ამ სახელწოდებით წარმოადგენს კომპანია „ჰექსინ ჯგუფი“ ბათუმში, გოგოლის 11ბ-ში უკანონო მშენებლობის პროექტს. სარეკლამო ვიდეორგოლი, რომელიც ბათუმის ერთ-ერთ ცენტრალურ ქუჩაზე დამონტაჟებულ მონიტორზე გადის, ჩინურ და ქართულ ენებზეა და მომხმარებელს „მსხვილი ინვესტიციების“ შესახებ აწვდის ინფორმაციას.
„ჰექსინ ჯგუფის“ შეთავაზება – მშენებლობა გოგოლის 11ბ-ში
„საცხოვრებელ-კომერციული ფართობი, კონფიდენციალური მენეჯმენტი, მულტიფუნქციური ზონა, მწვანე გარემო“, – ასე სთავაზობს „ჰექსინ ჯგუფი“ მომხმარებელს უკანონოდ აშენებულ კორპუსებს [ეს მშენებლობა ყოველგვარი ნებართვის გარეშე ახლაც გრძელდება].
„ჰექსინ მომავლის ქალაქად“ წოდებული პროექტი „მეტრო ჰოლდინგის“ ერთ-ერთ კომპანიას – სააქციო საზოგადოება „მეტრო მოლ ოფ აჭარას“ ეკუთვნის. „მეტრო ჰოლდინგის“ ერთ-ერთ საინფორმაციო ბიულეტენში ამ უკანონო მშენებლობას „ბონი სითის“ სახელითაც მოიხსენიებენ.
„ბათუმელები“ დაინტერესდა კომპანია „ჰექსინ ჯგუფით“.
სამეწარმეო რეესტრში სიტყვა „ჰექსინ“-ზე მხოლოდ სამი კომპანია იძებნება:
შპს ჰექსინ კაზინო სისტემ მაინთენანს
შპს ჰექსინ ონლაინ გეიმ დეველოფმენთ
შპს ჰექსინ ოფშორ ელეკტრონიკ სფორტს
სამივე მათგანი 2021 წლის 27 აგვისტოს, ბათუმში, „მეტროსთან“ დაკავშირებული კიდევ ერთი კომპანიის, სააქციო საზოგადოება „მეტრო ატლას ჯორჯიას“ საკუთრებაში არსებულ მისამართზეა რეგისტრირებული.
ამ კომპანიების ძირითადი საქმიანობა, წესდებების მიხედვით, არის: კაზინო, ონლაინკაზინო, კაზინოს მომსახურება, ტექნიკური მომსახურებები, ონლაინთამაშები და ონლაინსპორტი.
სამივე კომპანიის მფლობელი საქართველოს მოქალაქე, 21 წლის მარადი ღორჯომელაძეა. მას ფეისბუქის მეშვეობით დავუკავშირდით და დაადასტურა, რომ „ჰექსინ ჯგუფში“ მუშაობს. თუმცა არ გვიპასუხა კითხვაზე – რა კავშირია ამ კომპანიასა და მის სახელზე რეგისტრირებულ სამ შპს-ს შორის. ასევე ვკითხეთ, არის თუ არა „ჰექსინ ჯგუფი“ სხვა რომელიმე სამართლებრივი სამეწარმეო ფორმით რეგისტრირებული საქართველოში. „ბევრ კითხვას სვამთ“, – გვიპასუხა მან.
ჯეიმსი, რომელსაც „ბონი სითის“ პროექტი აბარია
„ჰექსინ ჯგუფის“ ვიდეორგოლში მითითებულ ნომერზე „ბათუმელების“ სატელეფონო კომუნიკაცია ინგლისურ ენაზე შედგა. ჩვენ ვიკითხეთ ყიდდა თუ არა ეს კომპანია ბინებსა და ოფისებს „ბონი სითის“ პროექტში. მოსაუბრემ, თავდაპირველად ვერ გაიგო კითხვის შინაარსი, თუმცა მას შემდეგ, რაც დავაზუსტეთ, რომ „ჰექსინ მომავლის ქალაქს“ ვგულისხმობდით, გვიპასუხა – „დიახ, მაგრამ ჯერ კიდევ მშენებლობა მიმდინარეობს“.
დავინტერესდით, იყო თუ არა გაყიდვა დაწყებული და შესაძლებელი იყო თუ არა ამ ეტაპზე შეძენა. „ჰექსინ ჯგუფის“ წარმომადგენელმა „პასუხისმგებელ პირთან“, ვინმე ჯეიმსთან გადაგვამისამართა და თურქეთში რეგისტრირებული ტელეფონის ნომერი მოგვაწოდა.
ჯეიმსმა გვკითხა, რატომ გვაინტერესებდა ეს პროექტი. მას შემდეგ კი, რაც გაიგო, რომ ჟურნალისტები ვართ, თქვა, რომ გაყიდვა ჯერ არ დაწყებულა. კითხვაზე, როდის იწყებენ გაყიდვას, გვიპასუხა, რომ მან ამ პროექტის შესახებ არაფერი იცის და მასთან შეხება არ აქვს.
ჯეიმსთან საუბრის შეწყვეტიდან მალევე დაგვიკავშირდა პირი, რომელიც გაგვეცნო, როგორც „ბატონი ჯეიმსის ადვოკატი“ და დაინტერესდა, როგორ გავიგეთ მისი კლიენტის ნომერი.
ადვოკატმა სხვა არც ერთ კითხვაზე პასუხის გაცემა არ ისურვა.
„ჰექსინ ჯგუფს“ განცხადება ჩინური დასაქმების საიტზეც აქვს გამოქვეყნებული, სადაც მითითებულია, რომ კომპანია 2020 წელს ბათუმშია დაფუძნებული.
„ჰექსინ ჯგუფთან“ გასაუბრების მიზნით „ბათუმელები“ იმყოფებოდა ბათუმის აეროპორტში, სადაც ამ კომპანიის საინფორმაციო შოურუმი მდებარეობს.
შოურუმში ვნახეთ ორი ტიპის საინფორმაციო ბროშურა „სქაი თაუერისა“ და „ჰექსინ ჯგუფის“ სერვისების შესახებ. ქალმა, რომელიც შოურუმში დაგვხვდა, ჩინურ ენაზე აგვიხსნა, თუ რას წარმოადგენდა ეს კომპანია: „გვაქვს სასტუმროები, კვებით მომსახურება, რესტორნები, მანქანების გაქირავება… ახლახან გავაქირავეთ სახლი კაზინოს მოსაწყობად“.
მისივე თქმით, კომპანიას ოფისები აქვს „სქაი თაუერსა“ და სასტუმრო „ინტურისტში“. ორივე მათგანი „მეტრო ჰოლდინგის“ საკუთრებაშია.
„ჰექსინ ჯგუფის“ ბეიჯებით მუშაობენ პუშკინის ქუჩაზე მდებარე ჩინური პროდუქტების სუპერმარკეტშიც.
მაღაზიაში დასაქმებული ჩინეთის მოქალაქისგან, 29 წლის ლიოსგან გავიგეთ, რომ მაღაზია „ჰექსინ ჯგუფს“ ეკუთვნის. ლიოს თქმით, კომპანიას დუბაიშიც აქვს წარმომადგენლობა.
„ჰექსინ ჯგუფის“ წარმომადგენლებისთვის კითხვების დასასმელად ბათუმში ჯამში 9 მისამართზე მდბარე ოფისებში მივედით. „ბათუმელებთან“ გასაუბრება არც ერთ მისამართზე არ ისურვეს.
„ჰექსინ ჯგუფის“ ოფისი ბათუმში / ინტურისტის შენობა რუსთაველის ქუჩის მხრიდან
გოგოლის 11ბ-ში, უკანონო მშენებლობის ადგილზე მისულებს დაცვამ გვითხრა, რომ ტერიტორიაზე არ იმყოფებოდნენ პასუხისმგებელი პირები. კითხვაზე, მუშაობდნენ თუ არა მშენებლობაზე უცხო ქვეყნის მოქალაქეები, დაცვის ერთ-ერთმა თანამშრომელმა გვითხრა, რომ ინფორმაციის გაცემა აკრძალული აქვთ.
„ჰექსინ ჯგუფთან“ დასაკავშირებლად სარეკლამო ბანერზე მითითებულ კიდევ ერთ ნომერზე დავრეკეთ, როგრც ჟურნალისტებმა. მოსაუბრემ ამჯერად გვითხრა, რომ ის თავადაა „ჰექსინ ჯგუფის“ მენეჯერი, თუმცა კომპანია „ახლახან ჩამოვიდა ბათუმში და ჯერ საქმიანობა არ დაუწყია.“ მისივე თქმით, ამ ეტაპზე არ შეუძლია და არც სურს კითხვებზე პასუხის გაცემა.
„ჰექსინ ჯგუფს“ ასევე მივმართეთ, როგორც კლიენტებმა ჩინეთიდან. ამ შემთხვევაში კომპანიის წარმომადგენლებმა შემოგვთავაზეს ქონების შეძენა თუ ქირაობა, ასევე სხვა სერვისებიც – მათ შორის სავიზო საკითხებთან დაკავშირებული მომსახურება, კრიპტოვალუტა, იურიდიული და ფინანსური სერვისები, საოფისე სივრცეები, მრავალფეროვანი სამზარეულო და ა.შ. მომსახურების პირობებზე საუბრისას „ჰექსინ ჯგუფის“ წარმომადგენელი დაინტერესდა დუბაიში ვიმყოფებოდით თუ არა. უარყოფითი პასუხის მიღების შემდეგ კომუნიკაცია შეწყვიტა.
ფოტო, რომელიც „ჰექსინ ჯგუფში“ დასაქმების აგენტმა მოგვაწოდა კომპანიის გადასამოწმებლად
უკანონო მშენებლობა გოგოლის ქუჩაზე და ბათუმის მერიის „რეაგირება“
ბათუმში, ბონის დასახლებაში, უკანონო ქალაქის მშენებლობასთან დაკავშირებით კითხვა „ბათუმელებმა“ ქალაქის მერს, არჩილ ჩიქოვანს დაუსვა.
„რაც შეეხება უკანონო მშენებლობებს. გოგოლის ქუჩაზე მიმდინარე მშენებლობასთან დაკავშირებით ჩვენ დაწყებული გვაქვს წარმოება. თვეების განმავლობაში არაერთხელ მოხდა რეაგირება ქალაქ ბათუმის მუნიციპალიტეტის მიერ და კონკრეტული საჯარიმო სანქციებია გატარებული, რაც ჩვენი უფლებამოსილების ფარგლებში შეგვეძლო გაგვეკეთებინა. ამავდროულად მიმდინარეობს სასამართლო დავები სამუშაოების მწარმოებელ კომპანიასა და მერიას შორის, გასაჩივრებულია ჩვენი გადაწყვეტილებები და ჩვენ მაქსიმალურად ეფექტურად შევეცდებით, რომ იმ საკანონმდებლო სინამდვილეში და ჩვენი უფლებამოსილების ფარგლებში ეს ხაზი გავატაროთ“, – გვითხრა მერმა.
[toggle title=”დააწკაპუნეთ და ნახეთ ჯარიმების შესახებ უფრო ვრცლად”]უკანონო მშენებლობა მიმდინარეობს გოგოლის ქუჩა N11ბ-ში მდებარე მიწის ნაკვეთზე, რომლის მესაკუთრეა სს „მეტრო მოლ ოფ აჭარა”, ბათუმის მერიამ კი, ამ ტერიტორიაზე უკანონო მშენებლობისთვის სულ სხვა კომპანია – სს „მეტრო ტერმინალი“ დააჯარიმა.
დაჯარიმებულმა კომპანიამ მერიის ეს გადაწყვეტილება გაასაჩივრა და განაცხადა, რომ არც ეს ნაკვეთი ეკუთვნის და არც მშენებლობასთან აქვს კავშირი. მიუხედავად ამისა, მერია მაინც ამ კომპანიას აჯარიმებს.
რატომ არ დააჯარიმეს კონკრეტული ნაკვეთის მესაკუთრე? – ამ კითხვას ბათუმის მერმა არ უპასუხა და მუნიციპალურ ინსპექციაში გადაგვამისამართა.
მუნიციპალურ ინსპექციაში კომენტარი არ გააკეთეს.
რატომ არ გააფრთხილეს/დააჯარიმეს ამ დრომდე ბათუმში, ნიკოლოზ გოგოლის ქუჩა N 11ბ-ში არსებული უძრავი ქონების მესაკუთრე – „მეტრო მოლ ოფ აჭარა” და აქვს თუ არა ქალაქ ბათუმის მერიას ინფორმაცია, რა დანიშნულებით შენდება ამ მისამართზე მრავალსართულიანი შენობები? – ეს შეკითხვა მერიას ოფიციალურადაც გავუგზავნეთ. პასუხი წერილობითაც არ გაგვცა.[/toggle]
თუმცა „საჯარიმო სანქციები“, რასაც მერი აცხადებს, „გატარდა“ არა იმ კომპანიის მიმართ, რომელსაც ეკუთვნის კონკრეტული ტერიტორია, არამედ სულ სხვა კომპანიის მიმართ.
[red_box]გალიფ ოზთურქი[/red_box]
უკანონო მშენებლობა გოგოლის ქუჩაზე „მეტრო ჰოლდინგის“ შვილობილ კომპანიებს უკავშირდება. ტერიტორიაც მათი საკუთრებაა. სწორედ „მეტროსთან“ არის დაკავშირებული ჩინური ინვესტიციები.
„მეტრო ჰოლდინგის“ მფლობელია ბიზნესმენი გალიფ ოზთურქი. მას წინასწარგანზრახული მკვლელობის საქმის გამო სამუდამო პატიმრობა აქვს მისჯილი თურქეთში. ეს ინფორმაცია „ბათუმელებს“ თურქეთის საელჩოში დაუდასტურეს.
„გაცნობებთ, რომ თურქეთის მოქალაქე გალიფ ოზთურქი სტამბოლის მე-19 სისხლის სამართლის სასამართლოს მიერ მსჯავრდებულია წინასწარგანზრახული მკვლელობის საქმის გამო, რაზედაც მას მისჯილი აქვს სამუდამო პატიმრობა. ამ საქმესთან დაკავშირებით, თურქეთის უწყებებმა მოითხოვეს მისი საქართველოდან ექსტრადირება.
აღნიშნული პირის სამართლებრივ მდგომარეობასთან დაკავშირებით უფრო დეტალური ინფორმაციის მოწოდების კომპეტენცია გააჩნიათ თურქეთის სამართლებრივ უწყებებს. ამ საკითხზე შეგიძლიათ მიმართოთ სტამბოლის რესპუბლიკურ პროკურატურას.“ – მოგვწერეს საქართველოში თურქეთის რესპუბლიკის საელჩოდან.
გალიფ ოზთურქი თურქეთის პრეზიდენტთან, საქართველოს ვიცე-პრემიერთან და საქართველოს პრემიერ-მინისტრებთან ერთად. ფოტოები გადაღებულია სხვადასხვა წელს.
გალიფ ოზთურქმა 2 თებერვალს “ტვიტერის” ოფიციალურ ანგარიშზე პოსტი გამოაქვეყნა, სადაც წერს, რომ თავს არ მიიჩნევს დამნაშავედ და მოითხოვს საქმის გადასინჯვას.
“მე არ ვარ გაქცეული. მე ვარ ამ ეპოქის მსხვერპლი. თურქეთის სასამართლოს მიმართ ჩემი ნდობა უსაზღვროა! მიუხედავად იმისა, რომ საქართველოში განმეორებით პროცესის განხილვა გარანტირებულად მომიხდებოდა, ვინაიდან ძალიან ბევრი შემთხვევა გვაქვს ამისი, მაინც გადავწყვიტე მე მოვითხოვო განმეორებით პროცესის განხილვა სასამართლოში! სამაგალითო წესდება”, – წერს გალიფ ოზთურქი და პოსტზე თაგავს თურქეთის პრეზიდენტს რეჯეფ თაიფ ერდოღანს.
„ბათუმელებმა“ „მეტრო ჰოლდინგში“ გალიფ ოზთურქთან წერილობითი ინტერვიუც შეათანხმა და კითხვები 7 დეკემბერს მიაწოდა. პასუხებს ამ დრომდე ველოდებით.
გალიფ ოზთურქი, რომელსაც თურქეთის და საქართველოს [2015 წლიდან] მოქალაქეობა აქვს, ბათუმში ცხოვრობს. ის საქართველოს პრემიერ-მინისტრებთან ხშირად ჩნდებოდა და ერთ-ერთ სახელმწიფო ფონდში [სოლიდარობის ფონდი] რამდენიმე მილიონი ლარი აქვს გადარიცხული.
[toggle title=”დააწკაპუნეთ და ნახეთ,რა სფეროებში საქმიანობენ„მეტრო ჰოლდინგის“ შვილობილი კომპანიები საქართველოში:“]
გალიფ ოზთურქი, რომელსაც თურქეთისა და საქართველოს [2015 წლიდან] მოქალაქეობა აქვს, ბათუმში ცხოვრობს. ის საქართველოს პრემიერ-მინისტრებთან ხშირად ჩნდებოდა და ერთ-ერთ სახელმწიფო ფონდში [სოლიდარობის ფონდი] რამდენიმე მილიონი ლარი აქვს გადარიცხული.
სატრანსპორტო გადაზიდვები
სასტუმროებისა და აპარტოტელების ქსელი
ტურიზმი
სათამაშო ბიზნესი
სამშენებლო ბიზნესი
ბენზინგასამართი სადგური
სადაზღვევო სფერო
საბროკერო სფერო
ჯანდაცვა და სხვა
საქართველოს ყოფილი ეკონომიკის მინისტრი დიმიტრი ქუმსიშვილი კი გალიფ ოზთურქის პარტნიორია. ქუმსიშვილი იმ სადაზღვევო კომპანიის [„გრინ დაზღვევა საქართველო“] სამეთვალყურეო საბჭოს თავმჯდომარეა, რომელი კომპანიის წილების ნახევარს „მეტრო ჰოლდინგი“ ფლობს.
ჩინურენოვანი ბანერები ბათუმში სწორედ მას შემდეგ გამოჩნდა, რაც „მეტრომ“ მიმდინარე წლის ზაფხულში 150 მილიონი დოლარის მოცულობის ქართულ-ჩინური ინვესტიცია დააანონსა. ამას კიდევ ერთი – 220-მილიონიანი პროექტის ანონსი მოჰყვა, რომლითაც ბათუმში ოთხი ცათამბჯენი უნდა აშენდეს. ეს პროექტები ჩინურ ინვესტიციებთანაა დაკავშირებული.
გოგოლის ქუჩაზე მიმდინარე მშენებლობასთან და ბათუმში ჩინური წარმოშობის ინვესტიციებთან დაკავშირებით „ბათუმელები“ კომენტარის მიღებას აჭარის მთავრობისგანაც ცდილობდა, თუმცა საბოლოოდ მთავრობის პრესსამსახურიდან მხოლოდ ეს მოგვწერეს: „აჭარის მთავრობასთან აღნიშნულ კომპანიებს არ გააჩნიათ სახელშეკრულებო ვალდებულება. ყველა ინვესტორს აქვს უფლება, განახორციელოს საინვესტიციო საქმიანობა კანონის ფარგლებში“.[/toggle]
„მეტრო ჰოლდინგს“ ათეულობით შვილობილი კომპანია და სააქციო საზოგადოება უკავშირდება საქართველოში, ძირითადად ბათუმში. ჰოლდინგის შვილობილი კომპანია, სს„მეტროავრასიაინვესთმენთჯორჯია“, რომლის იურიდიული მისამართი დღეს ბათუმშია, ერთ-ერთი პირველია, რომელიც საქართველოში დარეგისტრირდა [2010 წლის დეკემბერში].
ზოგიერთი სტატისტიკური მონაცემი
„ბათუმელებმა“ სამოქალაქო სერვისების განვითარების სააგენტოსგან გამოითხოვა ინფორმაცია: ჩინეთის რამდენმა მოქალაქემ მიმართა სააგენტოს საქართველოში ბინადრობის მისაღებად 2021 წელს, ასევე, ჩინეთის რამდენ მოქალაქეზე გაიცა შრომითი ბინადრობის ნებართვა და რამდენს ეთქვა უარი. პასუხი სააგენტოსგან ორი თვის დაგვიანებით მივიღეთ:
წყარო: სამოქალაქო სერვისების განვითარების სააგენტო
სააგენტოსგან ვითხოვდით ასევე დეტალურ ინფორმაციას ჩინეთის მოქალაქეებისთვის საქართველოში საემიგრაციო ვიზის [სამუშაო ვიზა] გაცემის ან უარის თქმის შესახებ. სააგენტოდან მოგვწერეს, რომ აღნიშნულ კითხვაზე საპასუხოდ ჩვენი წერილი გაუგზავნეს საქართველოს საგარეო საქმეთა სამინისტროს. საგარეო უწყებიდან პასუხი ამ დრომდე არ მიგვიღია.
საქართველოს ეკონომიკისა და მდგრადი განვითარების სამინისტროდან „ბათუმელებმა“ იმ პროექტების ჩამონათვალი გამოითხოვა, რომლებიც საქართველოში ჩინური ინვესტიციებით – ა) ხორციელდება ან ბ) შეთანხმებულია და იგეგმება განხორციელება. ვითხოვდით ასევე ამ ეტაპზე რამდენია ჩინური ინვესტიციის მოცულობა, რაც 2021 წლის აპრილის შემდეგ შემოვიდა საქართველოში და რა მოცულობის ინვესტიციის განხორციელება იგეგმება 2022 წლიდან ჩინეთთან დაკავშირებული ბიზნესჯგუფების მიერ.
პასუხი სახელმწიფო ქონების ეროვნული სააგენტოსგან მივიღეთ:
ჩინური ინვესტიციები საქართველოში [აპრილი-ნოემბერი, 2021 წ.] წყარო: სახელმწიფო ქონების ეროვნული სააგენტო
„გაცნობებთ, რომ შპს „სი ი ეფ სი-ს [ევრო-აზიური]“ ხელშეკრულება ითვალისწინებს დათქმას კონფიდენციალურობის თაობაზე, შესაბამისად სააგენტომ უზრუნველყო შესაბამის კონტრაჰენტთან შესათანხმებელი წერილის გაგზავნა და მათგან მიღებული დადებითი პასუხის შემთხვევაში გეცნობებათ დამატებით წერილობითი სახით.“ – მოგვწერეს ქონების სააგენტოდან.
კომპანია „ვესთ თაუერსმა“ [ყოფილი „დე ჯგუფი“] მიწის ნაკვეთი ბათუმში, იუსტიციის სახლის მიმდებარედ, აუქციონზე შეიძინა. „აღნიშნული აუქციონი მაღალი კონკურენციის პირობებში მიმდინარეობდა… მყიდველის მიერ მიწის ნაკვეთის პრივატიზების მიზნით გადახდილია სრული საპრივატიზებო საფასური – 30 063 000 ლარი. ასევე გაცნობებთ, რომ სააგენტოში ინფორმაცია იმ ინვესტიცი[ებ]ის წარმომავლობის შესახებ, რომლითაც უძრავ ქონებაზე მესაკუთრემ ხელშეკრულებით ნაკისრი ვალდებულებები უნდა შეასრულოს, დაცული არ არის“, – მოგვწერეს ქონების სააგენტოდან.
____
მთავარი ფოტო: გალიფ ოზთურქი, ირაკლი ღარიბაშვილი და ბათუმში უკანონოდ აშენებული კორპუსები. ბათუმში მცხოვრები ბიზნესმენი გალიფ ოზთურქი 2015 წელს შეხვდა პრემიერ-მინისტრ ირაკლი ღარიბაშვილს და სოლიდარობის ფონდს 500 000 ლარი შესწირა. გალიფ ოზთურქს მსხვილი დონაციები საქართველოს სოლიდარობის ფონდში თითქმის ყველა პრემიერ-მინისტრის მმართველობის დროს აქვს შეტანილი.
გალიფ ოზთურქი ბათუმში, ბონის დასახლებაში „ბონი სითის“, ანუ უბანს აშენებს. მეტრო ჰონდინგთა დაკაშირებულმა კომპანიამ 9 კორპუსი აქ ყოველგავრი ნებართვის გარეშე უკვე ააშენა. მშენებლობა დღესაც გრძელდება.
