ბათუმის მერიის თანამშრომელი ხულოს ინციდენტზე: სასტუმროში წყალი არ იყო


ბათუმის მერიის თანამშრომელი თემურ ხასია ამბობს, რომ ხულოში პარლამენტარ ანზორ ბოლქვაძის სასტუმროში  სტუმრის სიცოცხლეს  საფრთხე ემურებოდა, რადგან სასტუმროში წყალი არ იყო. მისივე განმარტებით, ანზორ ბოლქვაძე არა როგორც დეპუტატი, არამედ როგორც სასტუმროს მფლობელი, ვალდებული იყო პრევენციული ზომები გაეტარებინა, რომ დაეცვა სტუმარი საფრთხისგან.

დეპუტატმა ანზორ ბოლქვაძემ 7 მაისს ენმ-ის აქტივისტს, ხათუნა ბერიძეს სასტუმროს დატოვება მოსთხოვა. ამ პროცესში ჩაერთო ბათუმის მერიის თანამშრომელი თემურ ხასია, რომელიც ამ დროისთვის შვებულებაშია და „ქართული ოცნების“ ხულოს მერობის კანდიდატის, ვახტანგ ბერიძის საარჩევნო კამპანიაშია ჩართული. თემურ ხასია ბათუმის მერიის საქალაქო და ინფრასტრუქტურის სამმართველოს მარკეტინგისა და პიარის სამსახურის თანამშრომელია.

ვიდეოჩანაწერში ჩანს, რომ თემურ ხასია, რამდენიმე წუთის განმავლობაში მოუწოდებდა სტუმარს სასტუმრო  დაეტოვებინა, ვიდრე სტუმარმა მისი ნომრის დატოვება კატეგორიულად არ მოითხოვა და განაცხადა, რომ წინააღმდეგ შემთხვევაში პოლიციას გამოიძახებდა.

რატომ და როგორ ჩაერთო  თემურ ხასია ამ პროცესში, ჰქონდა თუ არა ამის უფლებამოსილება? მან „ბათუმელების“ რამდენიმე კითხვას უპასუხა.

  • როგორ მოხვდით ამ სასტუმროში, შემდეგ  სტუმრის ნომერში და რა უფლებამოსილება გქონდათ, როცა ითხოვდით, რომ მას დაეტოვებინა ნომერი?

ჩემგან მოთხოვნა არ ყოფილა, იყო თხოვნა.

  • თქვენ მას რამდენჯერმე გაუმეორეთ, რომ უნდა დატოვოს სასტუმრო და უსაფრთხოებაც ახსენეთ. რა ინფომაცია გქონდათ, რა საფრთხე შეიძლებოდა შექმნოდა სტუმარს?

რა თქმა უნდა, მქონდა და არ ვსაუბრობდი ფანტაზიის ნაწილის მეშვეობით. იქ პროვოკაციები ხდებოდა, მაგრამ, რა თქმა უნდა, ეს არ იყო ჩვენი ინტერესის სფერო.

  • რა პროვოკაციაზე საუბრობთ, კონკრეტულად?

იყო ასეთი პროვოკაციები, ბატონ ანზორს დაურეკეს მაგასთან დაკავშირებით. ის ინფორმირებულია. ვიდრე მე ავიდოდი იქ, რაღაც პროცესები უძღოდა ამ ყველაფერს. ჩანს კიდეც ვიდეოში, რომ ჩემს შესვლამდე იქ რაღაც პოლემიკაა და აბსოლუტურად სხვა თემაზეა საუბარი.

  • ვიდეოში ჩანს, რომ თქვენს შესვლამდე შედის ანზორ ბოლქვაძე ნომერში და სთხოვს ამ სტუმარს, რომ დატოვოს სასტუმრო.

ეს ვიდეოში ჩანს, თორემ  ამას რაღაც პროცესები ხომ უძღოდა წინ. 

  • რა პროცესები ბატონო თემურ? უნდა გვითხრათ, რომ მკითხველმა გაიგოს ამის შესახებ.

ვიდეოში ნახეთ როდის ჩავერთე მე პროცესში, მანამდე სასტუმროს ადმინისტრაციის უფროსს რომ ვკითხე, რა ხმაური და რა სიტუაცია იყო, მითხრეს, რომ სასტუმროში იყო რაღაც გაუმართავი და უნდოდათ, რომ ქალბატონი ნომრიდან გამოეყვანათ და ის არ ემორჩილებოდა არც ბატონი ანზორის თხოვნას, არც სასტუმროს მენეჯერის თხოვნა გაითვალისწინა. შესაბამისად ავედი და კონსტრუქციულად, ლამაზად, მშვიდად მოვუწოდე ამ ქალბატონს, რომ მისივე უსაფრთხოების მიზნით გამოსულიყო. მეთქი მე ვარ პასუხისმგებელი, რომ მიმდებარე ტერიტორიაზე გადაგიყვანთ და არც ფულს გამოგართმევთ, ანუ დაგიბრუნდება ის გადახდილი თანხა და არანაირ დისკომფორტს არ შეგიქმნით-მეთქი. ვუთხარი, ბოდიშს გიხდი-თქო, შეურაცხყოფა არ მიმიყენებია და არანაირი პრეტენზია არ ჰქონდა იმ ქალბატონს ჩემთან. არასდროს არ მეშლება მე ქალთან როგორ უნდა ვისაუბრო. ის აფექტურ მდგომარეობაში იყო და აგრესია ჰქონდა.

  • თქვენ ბატონ ანზორთან ერთად მიხვედით სასტუმროში?

არა, ბატონი ანზორი ასული იყო იქ, მე ავედი გამომდინარე იქედან, რომ მსურდა სიტუაციის განმუხტვა. მე ქვევით ვიდექი მეგობრებთან ერთად და გავიგონე ხმა.  მომიჯნავედ სასტუმროში ვჩერდები.

  • თქვენ ხომ არ ხართ არც ამ სასტუმროს მენეჯერი და არც მისი თანამშრომელი, რატომ გადაწყვიტეთ, რომ უნდა ჩართულიყავით ამ პროცესის მოგვარებაში, ეს ხომ თქვენ არ გევალებოდათ? 

თქვენს მეზობელს რომ პრობლემა ჰქონდეს  და საფრთხე ექმნებოდეს, არ ჩაერეოდით თუ რა?! ბატონი ანზორი არის ჩემი უახლოესი მეგობარი და აქ ვართ ყველანი, ჩართულები ვართ პროცესში და ვინაიდან სასტუმროში პრობლემა შეიქმნა, არ შეიძლებოდა იქ სტუმრის ყოფნა, მისივე უსაფრთხოებისთვის. მე კი არა, სხვა ადამიანებიც იყვნენ და მოვუწოდებდით, აბა რა, იმიტომ, რომ ჩემი სასტუმრო არ არის და იმიტომ, რომ მე არ ვრჩები აქ, სხვისი უსაფრთხოება უმნიშვნელო გავხადოთ, თუ როგორ მესაუბრებით?!

  • მნიშვნელობა აქვს ალბათ იმას, რა პრობლემასთან გვაქვს საქმე და რამდენად შეგეძლოთ თქვენ ამის მოგვარება. თქვენ ხომ მაშველი ან საგანგებო სიტუაციების სამსახურის თანამშრომელი არ ხართ. გარდა ამისა, რა მნიშვნელობის საფრთხეა წყლის არ ქონა, რომ სასტუმრო დაიცალოს, ხანძარი  ხომ არ გაჩნდა?

ხანძარი რატომ უნდა გაჩნდეს, წყლის მიწოდების  პრობლემააო, მითხრა სასტუმროს თანამშრომელმა და მისივე უსაფრთხოებისთვის მიიღეს გადაწყვეტილება, რომ გადაეყვანათ სხვაგან, რა პრობლემაა? ხომ შეიძლება შეიქმნას პრობლემა, მართლა იწვება რაღაცები. წყლის პრობლემა თუ შეიქმნა, რა ამით? ნორმალური პროცესია აბსოლუტურად. შესთავაზეს, რომ გვერდით, პარალელურ სასტუმროში გადაგიყვანთო. ამ დისკომფორტისთვის არაერთმა ადამიანმა მოუხადა ბოდიში.

  • წყლის მიწოდების შეფერხების გამო სასტუმროს ევაკუაციას არ ახდენენ ბატონო თემურ, ასეთი რამ პრაქტიკაში არ გვახსოვს. 

იქ გაძევება და  გამოგდება არ ყოფილა, გაიგო მფლობელმა, რომ მის სტუმარს ემუქრებოდა საფრთხე და მადლობასაც იმსახურებდა ამისთვის.

  • მხოლოდ ეს იყო მიზეზი, წყლის არქონა, რომ სტუმარი იყო საფრთხეში?

მე არ ვიცი, ექსპერტი არა ვარ, რომ შევაფასო, რა შედეგი დადგებოდა და  რა – არა. მე მოვისმინე ის, რომ შესაძლოა საფრთხე შექმნოდათ. ამისთვის გარკვეული პრევენციები უნდა გავატაროთ. ძალიან სწორად მიმაჩნია გუშინდელი ფაქტი. თვითონ ქალბატონი იყო პოლიტიკურად მოტივირებული. თვითონ საუბრობს ამაზე ვიდეოში, მე რადგან „ნაციონალური მოძრაობის“ წევრი ვარ, ამიტომ ჩემზე პოლიტიკურ ანგარიშსწორებას გეგმავენო. პოლიტიკურ კუთვნილებას არა აქვს მნიშვნელობა, როცა ადამიანის სიცოცხლეზე და საფრთხეზეა საუბარი.

  • წყლის არ ქონის გამო სხვა პირებისგან რატომ არ დაიწყეთ ნომრების დაცლა, მაშინ როდესაც სხვებიც იყვნენ სასტუმროში?

სხვა არავინ იყო სასტუმროში, ეს იმ წუთასვე გადავამოწმე და მასაც ვუთხარი, ერთად გადავამოწმოთ-მეთქი. იქ იყო თავაზიანობა და არავისთვის შეურაცხყოფა არ მიგვიყენებია. სასტუმროში ამ ქალბატონისა და მისი თანხმლების გარდა არავინ არ იმყოფებოდა იმ დროს. ამ შემთხვევაში ბატონი ანზორი არა როგორც პარლამენტარი, არამედ როგორც მფლობელი, სასტუმროს უფროსი, ვალდებულია მივიდეს და სტუმარს განუმარტოს, მინიმუმ მიიღოს რამე პრევენციული ზომა. იმ ქალბატონმა თვითონ რამდენჯერმე სცადა პოლიტიკურ ჭრილში გადაეტანა საუბარი, თუნდაც ჩემთან. ადამიანის სიცოცხლეს როცა ექმნება საფრთხე, იქ არა მგონია პოლიტიკურ ჭრილში დავიწყო საუბარი.

  • რატომ არ ანდეთ ამის მოგვარება სასტუმროს მენეჯერს, დაცვას ან ვინმე სხვა უფლებამოსილ პირს?

კიდევ ერთხელ გეუბნებით, რომ ბატონი ანზორი არის ჩემი მეგობარი და აქ ჩვენ ყველა ვართ ერთი გუნდი.

  • ანუ ბატონ ანზორს დაეხმარეთ?

დახმარება ეს რაა, ორი წლის ბავშვი ხომ არა ვარ, ქუჩაში ან სტადიონზე ხომ არა ვარ. „დაეხმარეთ“ – ეს კონტექსტი უხერხულად ჟღერს, კონფლიქტური სიტუაცია იყო და განმუხტვის მიზნით ჩავერთე. მე ვუთხარი, რომ იყო ტექნიკური პრობლემები. ჯერ ინიციატივა ჰქონდა, რომ ენახა რა ხდებოდა სასტუმროში, შემდეგ კი როცა შევთავაზე, წამობრძანდით და გაჩვენებთ-მეთქი, უარი მითხრა. ის ქალბატონი ისევ ცხოვრობს იმ სასტუმროში და არავინ არ აგდებს მას.

„ბათუმელებმა“ ჰკითხა ხათუნა ბერიძეს, სტუმარს, რომელსაც დეპუტატი სასტუმროს დატოვებას სთხოვდა, იყო თუ არა წყალი სასტუმროში. ხათუნა ბერიძე ამბობს, რომ სასტუმროში წყალი იყო. 

იძულების მუხლით ხულოს სასტუმროს ინციდენტზე გამოძიება დაიწყო. შინაგან საქმეთა სამინისტროს ინფორმაციით, ამ დროისთვის დაკავებული არავინაა და მიმდინარეობს საგამოძიებო მოქმედებები.

________

მთავარ ფოტოზე: თემურ ხასია. ფოტო ფეისბუქის პირადი გვერდიდან.

ნეტგაზეთის მასალების სხვა გამოცემებში გადაბეჭდვის წესი
ავტორი