სახელმწიფომ ახალი ა[ა]იპ საქართველოს სამედიცინო ჰოლდინგი დააფუძნა, რომელშიც ჯანდაცვის სამინისტროს ინფორმაციით, პირველ ეტაპზე თბილისის რესპუბლიკური საავადმყოფო, უნივერსალური სამედიცინო ცენტრი [ონკოლოგიური] და ბავშვთა ინფექციური საავადმყოფო შევა.
ახალ ჰოლდინგში ბათუმის რესპუბლიკური საავადმყოფოც უნდა შესულიყო, თუმცა ეს ამ ეტაპზე არ მოხდა.
„შეიქმნება საქართველოს სამედიცინო ჰოლდინგი, რომელშიც თბილისის რესპუბლიკური საავადმყოფო, ონკოლოგიური ცენტრი, ბავშვთა ინფექციური და ბათუმის რესპუბლიკური საავადმყოფო გაერთიანდება, მოექცევა ერთიან კონცეფციაში და იქნება სახელმწიფოს მართვასა და საკუთრებაში“, – განაცხადა საქართველოს ჯანდაცვის მინისტრმა ეკატერინე ტიკარაძემ 2019 წლის 6 ნოემბერს ბათუმში ყოფნისას.
დღეს, 3 თებერვალს, საქართველოს ჯანდაცვის სამინისტროს მიერ გავრცელებულ ინფორმაციაში აღნიშნულია, რომ „სახელმწიფო სამედიცინო ჰოლდინგში რეგიონალური სამედიცინო დაწესებულებებიც ეტაპობრივად ჩაერთვებიან“.
რატომ არ შევიდა ჰოლდინგში ბათუმის რესპუბლიკური საავადმყოფო ამ ეტაპზე და როდისთვის იგეგმება „ბათუმის რესპუბლიკური საავადმყოფოს“ გაერთიანება ახალ ჰოლდინგში? – ამ კითხვით „ბათუმელები“ საქართველოს ჯანდაცვის სამინისტროს დაუკავშირდა.
„ამჯერად დასახელდა ეს სამი კლინიკა და იყო წარდგენა ახალი დირექტორის, რომელიც შეიმუშავებს დეტალურ გეგმას – თუ რომელი კლინიკები, როგორ შევლენ ჰოლდინგში, მათი აღჭურვის საკითხი და სხვა. ეს გეგმა 2020 წლის მარტში უნდა იყოს მზად. ამასთან, გიდასტურებთ, რომ ბათუმის რესპუბლიკური საავადმყოფო ამ ჰოლდინგში აუცილებლად შევა“, – გვითხრეს სამინისტროს პრესსამსახურში.
ეკატერინე ტიკარაძემ დღეს სახელმწიფო სამედიცინო ჰოლდინგის დირექტორი, გიორგი ჩოგოვაძე წარადგინა. გიორგი ჩოგოვაძე ამ დრომდე ეკონომიკის სამინისტროს შპს „საქართველოს აეროპორტების გაერთიანებას“ ხელმძღვანელობდა. მანამდე ტურიზმის ეროვნულ ადმინიტრაციას ედგა სათავეში.
საქართველოს სამედიცინო ჰოლდინგი სახელმწიფო ქონების ეროვნული სააგენტოს თავმჯდომარის გიორგი დუგლაძის 2020 წლის 24 იანვრის ბრძანებით დაფუძნდა. საჯარო რეესტრში კი, ახალი ა[ა]იპ-ი 27 იანვარს დაარეგისტრირეს. ამავე ბრძანებით დაინიშნა ჰოლდინგის დირექტორად გიორგი ჩოგოვაძე.
„.ა[ა]იპ – საქართველოს სამედიცინო ჰოლდინგის დირექტორის ყოველთვიური შრომითი ანაზღაურება განისაზღვროს 7 500 ლარის ოდენობით [დარიცხული]… ჰოლდინგის დაფუძნების შემდგომ, დამფუძნებლის ყველა უფლებამოსილება განახორციელოს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრომ“, – აღნიშნულია გიორგი დუგლაძის 2020 წლის 24 იანვრის ბრძანებაში.
რაც შეეხება ბათუმის რესპუბლიკური საავადმყოფოს ახალ შენობას, ის ჯერ კიდევ არ არის ჩაბარებული. შენობა აჭარის ფინანსთა და ეკონომიკის სამინისტროს შპს „სტადიონმა“ უნდა ჩაიბაროს.
„სამშენებლო სამუშაოები დასრულებულია და ამ ეტაპზე მიმდინარეობს შენობის ჩაბარების პროცედურები“, – გვითხრეს დღეს შპს „სტადიონში“. როდის ჩაიბარებს „სტადიონი“ ახალ შენობას, ზუსტი თარიღი უცნობია.
ახალი საავადმყოფოს გახსნა, დაგეგმილთან შედარებით, დროში საკმაოდ გაიწელა, რის გამოც ბათუმის რესპუბლიკური საავადმყოფოს მედპერსონალი პერმანენტულად აქციებს მართავდა. ექიმი ბენო ჭელიძე აცხადებს, რომ სახელმწიფო, რესპუბლიკურ საავადმყოფოს კომპანია „ევექსისთვის“ გადასაცემად ამზადებს.
