Batumelebi

საქართველოში თურქეთის ელჩის, ფატმა სერენ იაზგანის განცხადებით, ბიზნესმენ გალიფ ოზთურქის თურქეთში ექსტრადაციის მოთხოვნა ისევ ძალაშია.

„გალიპ ოზთურქი თურქეთის მოქალაქეა, რომელსაც თურქეთის სასამართლომ მიუსაჯა პატიმრობა. იგი საქართველოში 2014 წელს ჩამოვიდა, როდესაც ჯერ კიდევ მიმდინარეობდა სასამართლო პროცესი და მიიღო საქართველოს მოქალაქეობა.

შემდეგ თურქეთის უზენაესმა სასამართლომ მის მიმართ გამოიტანა განაჩენი, რის საფუძველზეც თურქეთმა მოითხოვა საქართველოდან მისი ექსტრადიცია.

ეს მოთხოვნა ახლაც ძალაშია,“ – ამბობს საქართველოში თურქეთის ელჩი ფატმა სერენ იაზგანი.

მისი კომენტარი თურქეთის საელჩომ „ბათუმელებს“ წერილობით მოაწოდა.

მილიონერი ბიზნესმენი გალიფ ოზთურქი ბათუმში 31 მაისს დააკავეს.

ბიზნესმენის დასაკავებლად საქართველოს ფინანსთა სამინისტროს საგამოძიებო სამსახურს 9-საათიანი სპეცოპერაცია დასჭირდა.

საგამოძიებო სამსახურის მიერ თავდაპირველად გავრცელებული ინფორმაციის თანახმად, გალიფ ოზთურქის კუთვნილ კომპანიაში საგამოძიებო მოქმედებები „განსაკუთრებით დიდი ოდენობით გადასახადისთვის განზრახ თავის არიდების, ყალბი საანგარიშსწორებო დოკუმენტების დამზადება-გამოყენებისა და უკანონო შემოსავლის ლეგალიზაციის შესაძლო ფაქტზე მიმდინარე გამოძიების პროცესში, საქმის ვითარების გასარკვევად საჭირო მტკიცებულებების მოპოვების მიზნით“ განხორციელდა. საგამოძიებო სამსახურის მტკიცებით, სპეცოპერაციის დროს გალიფ ოზთურქის საცხოვრებელ მისამართზე აღმოჩენილი იქნა სავარაუდოდ ნარკოტიკული და ფსიქოტროპული ნივთიერებები.

თუმცა 2 ივნისს ოზთურქს ბრალი მხოლოდ სისხლის სამართლის კოდექსის 260-ე მუხლის შესაბამისად წარუდგინეს, რაც გულისხმობს „ნარკოტიკული საშუალების, მისი ანალოგის ან პრეკურსორის უკანონო დამზადებას, წარმოებას, შეძენას, შენახვას, გადაზიდვას ან გადაგზავნას“.

გალიფ ოზთურქს ორმაგი მოქალაქეობა აქვს – საქართველოს და თურქეთის. ის ბიზნესს საქართველოში 2011 წლიდან ეწევა. 2011 წელს,  ბათუმის მერიამ გაავრცელა ოფიციალური ინფორმაცია, რომლის თანახმადაც გალიფ ოზთურქის კომპანია ბათუმში ავტოსადგურს აშენებდა.

„ახალი ავტოსადგურის ტერიტორია 109 000 კვ.მ ფართობს მოიცავს, სადაც 60000 კვ.მ-ს 3-სართულიანი მრავალპროფილიანი სავაჭრო ცენტრი დაიკავებს. ავტოსადგურის მფლობელი ქართულ-თურქული კომპანია „ავრასია-ჯორჯია“ აღნიშნული პროექტის განსახორციელებლად დაახლოებით 20 მლნ. დოლარის ინვესტიციას განახორციელებს. მასშტაბური სამშენებლო სამუშაოები მიმდინარე წლის ივნისში დაიწყო“, – ეწერა გავრცელებულ რელიზში.

საქართველოს პარლამენტის წევრი ტარიელ ნაკაიძე, მისი კოლეგის, „ქართული ოცნების“ წევრის, დიმიტრი ხუნდაძის განცხადებას გამოეხმაურა ფეისბუქში. ბიძინა ივანიშვილთან დაახლოებულმა დეპუტატმა განაცხადა, რომ იმ შემთხვევაში, თუ საქართველო ევროკავშირის კანდიდატობის სტატუსს ვალდებულებებით მიიღებს, როგორც რეზოლუციაშია, საქართველომ სტატუსზე უარი უნდა თქვას.

„დღეს დიმიტრი ხუნდაძის აბსურდულმა განცხადებამ ცხადყო, რომ „ქართულ ოცნებას“ ევროკავშირის წევრობა არ სურს. ადრეც იყო კულუარული საუბრები, რომ [ირაკლი] კობახიძის ფრთას განსაკუთრებით არ სურდა ევროკავშირის წევრობაზე განაცხადის შეტანა, რასაც კობახიძის მაშინდელი განცხადებებიც ადასტურებდა.

თუმცა ქართველი ხალხის შემართებამ და ბრძოლამ „გადაღუნა“ ქართული ოცნება და შეიტანა განაცხადი. და თუ მართლა იმ სისულელეს, რასაც ხუნდაძე გაიძახის, ჩაიდენს ეს ხელისუფლება, აი, მაშინ დაგატყდებათ ქართველი ხალხის რისხვა.

„ქართული ოცნება“, რა ხდება, ომი გინდათ? თუ ასეა, გექნებათ, ქართველი ხალხი უმოკლეს დროში დაგასამარებთ“, – წერს ტარიელ ნაკაიძე.

—–

„ქართული ოცნების“ დეპუტატის, დიმიტრი ხუნდაძის განცხადებას იმის შესახებ, რომ  თუ საქართველო ევროკავშირის კანდიდატობის სტატუსს „უსამართლო ვალდებულებებით” მიიღებს, როგორც რეზოლუციაშია, საქართველომ სტატუსზე უარი უნდა თქვას, საქართველოს პარლამენტის წევრი, დამოუკიდებელი დეპუტატი თამარ კორძაია ეხმიანება ფეისბუქზე.

„გუშინ ეთერში ვთქვი, რომ ბიძინა ივანიშვილს მძევლად ჰყავს საქართველოს მოქალაქეები და მათი და სახელმწიფოს მომავლით ვაჭრობს საკუთარი კეთილდღეობის უზრუნველსაყოფად.

დღეს, მისი მსტოვრები, უკვე ტოლობას სვამენ, ევროპის მიერ რუს ოლიგარქად აღიარებულ ბიძინა ივანიშვილსა და სახელმწიფოს, საქართველოს შორის!

იანუკოვიჩს სხვა არაფერი გაუკეთებია უკრაინისთვის და მოქალაქეებმაც გასცეს პასუხი!

არ დავუთმოთ საკუთარი მომავალი რუს ოლიგარქს!

პ.ს. შეგახსენებთ პროპორციული საარჩევნო სისტემის დაპირების არ შესრულება, დიმიტრი ხუნდაძის მიერ გახმოვანდა, ახლაც ის ახმოვანებს ბ. ივანიშვილის გეგმას“ – წერს თამარ კორძაია.

ხუნდაძის განცხადებას დღეს გამოეხმაურა საქართველოს სახალხო დამცველი ნინო ლომჯარია.

„რას ბედავთ თქვენ?! საქართველოს მოსახლეობის უმრავლესობამ და კონსტიტუციამ უკვე გადაწყვიტა ევროპული არჩევანი. ამ ქვეყნის სახელით ამის თქმის უფლება ვინ მოგცათ?“ – წერს ნინო ლომჯარი სოციალურ ქსელში.

პირი, რომელიც დღეს „საქართველოს ბანკის“ ერთ-ერთი ფილიალში შეიჭრა, „ბათუმელების“ ინფორმაციით, დაკავებულია.

ოფიციალური ინფორმაციით, ფაქტზე გამოძიება დაიწყო 179-ე ყაჩაღობის მუხლით, რომლის პირველი ნაწილის თანახმად, დაკავებულ პირს ბრალის დადასტურების შემთხვევაში ხუთიდან შვიდ წლამდე თავისუფლების აღკვეთა ემუქრება.

შს. სამინისტროს მიერ დადასტურებული ინფორმაციით დაკავებული 1989 წელს დაბადებული მამაკაცია.

მას კიდევ ერთი – 236-ე მუხლით აქვს ბრალი წარდგენილი, რომლის პირველი ნაწილი გულისხმობს „სანადირო ცეცხლსასროლი იარაღის ან სპორტული ცეცხლსასროლი იარაღის ანდა ასეთი იარაღისთვის განკუთვნილი საბრძოლო მასალის მართლსაწინააღმდეგო შეძენა ან შენახვას. ისჯება ჯარიმით ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით ორ წლამდე“.

შემთხვევა დღეს, 10 ივნისს, დაახლოებით 12 საათზე მოხდა, „საქართველოს ბანკის“ ბათუმის ერთ-ერთ ფილიალში.

თვითმხილველის მონათხრობის თანახმად, თავდამსხმელი სალაროს გახსნას ითხოვდა.

„წინააღმდეგობის შემდეგ თავდამსხმელმა ერთხელ გაისროლა ჰაერში. სროლის ხმაზე ბანკის თანამშრომლები გარეთ გაცვივდნენ. შენობაში დარჩა მხოლოდ თავდამსხმელი, როცა მიხვდა სალაროს ვერ გახსნიდა, თავადაც გაიქცა“, – გვიყვება თვითმხილველი.

მისი თქმით, თავდამსხმელი დაახლოებით 20-25 წლის კაცია. მან თანხის წაღება ვერ მოახერხა.

ბათუმში ტურისტული სეზონი ოფიციალურად 15 ივნისს გაიხსნება და ღონისძიება 20 ივნისამდე გაგრძელდება. ღონისძიებებისთვის მთლიანობაში 328 535 ლარი დაიხარჯება ბიუჯეტიდან, 90 ათასი ლარი ბათუმის, ხოლო 238 535 ლარი აჭარის ბიუჯეტიდან გამოიყოფა.

თანხა ტენდერის გარეშე, გამარტივებული წესით, დაიხარჯება. დოკუმენტების მიხედვით, ღონისძიებები ბათუმის ბულვარში, ანბანის კოშკის მიმდებარე ტერიტორიაზე, გაიმართება. აღნიშნული თანხებით გათვალისწინებულია საზაფხულო დეკორაციების – კერძოდ, ფერადი ტილოების, ყვავილების, ტოფოკუთხეების და ტოფოლოკაციების მოწყობა.

• კვების ბლოკები და კვების კონსტრუქციები
• მოწვეული ბენდები და DJ
• საგამოფენო სივრცეები
• ღამის დეკორაციები
• საბავშვო გასართობი ლოკაციები და აქტივობები
• ანიმატორები
• ფეიერვერკი

ბათუმის კულტურის ცენტრის ინფორმაციით, 90 ათასი ლარი გათვალისწინებულია შემდეგი ღონისძიებებისთვის:

• ფრანების შოუ, დრამერების შოუ, მუსიკალური ბენედების და დიჯეის საკონცერტო პროგრამა
• ბანერების ბეჭდვა
• ვიდეოგადაღება
• ფეირვერკის გაშვების უზრუნველყოფა

„აჭარის ტურიზმისა და კურორტების დეპარტამენტის მიმდინარე წლის მთავარი სტრატეგია 2019 წლის ტურისტული ნაკადების აღდგენაა. დაგეგმილია 500 ჟურნალისტისა და ტუროპერატორის ვიზიტი რეგიონში, აქტიურად მიმდინარეობს მოლაპარაკებები ბათუმის საერთაშორისო აეროპორტში ფრენების აღდგენასა და დამატებაზე.

ბათუმის აეროპორტში მაისის თვისთვის უკვე დაგეგმილია 250-ზე მეტი საერთაშორისო ფრენა 10 ქვეყნიდან, განახლდა ფრენები გალფის ქვეყნებიდან, ყაზახეთიდან, აზერბაიჯანიდან, ასევე, წელს პირველად შესრულდება რეისები რიგიდან და ტაშკენტიდან, განახლდება რეისები ტალინიდან და ვილნიუსიდან და ა.შ“, – ნათქვამია შესყიდვების პორტალზე გამოქვეყნებულ დოკუმენტში.

ამავე დოკუმენტში ნათქვამია, რომ ტურისტული სეზონის გახსნის მთავარი მიზანი საზოგადოებაში საზაფხულო განწყობის შექმნაა, „მეორე მხრივ, ტურიზმის სექტორის მხარდაჭერა და მოწოდება, რომ აჭარა მზად არის ვიზიტორების მისაღებად“.

ბათუმში, „საქართველოს ბანკის“ ფილიალში, შეიარაღებულმა თავდამსხმელმა მძევლების აყვანა სცადა. შემთხვევა დღეს, 10 ივნისს, დაახლოებით 12 საათზე მოხდა, „საქართველოს ბანკის“ ბათუმის ერთ-ერთ ფილიალში.

თვითმხილველის მონათხრობის თანახმად, თავდამსხმელი სალაროს გახსნას ითხოვდა. მან სცადა მძევლის აყვანაც იარაღის მუქარით, მაგრამ ვერ მოახერხა, რადგან ბანკის სხვა თანამშრომლებმა წინააღმდეგობა გაუწიეს.

„წინააღმდეგობის შემდეგ თავდამსხმელმა პისტოლეტის მსგავსი იარაღიდან ერთხელ გაისროლა ჰაერში. სროლის ხმაზე ბანკის თანამშრომლები გარეთ გამოიქცნენ. შენობაში დარჩა მხოლოდ მძარცველი და როცა მიხვდა, რომ სალაროს ვერ გახსნიდა, თავადაც გაიქცა“, – გვიყვება ბანკის თანამშრომელი.

მისი თქმით, თავდამსხმელმა თანხის წაღება ვერ მოახერხა.

რაც შეეხება მის მონაცემებს, ის იყო 20-25 წლის კაცი, რომელსაც ყვითელი ჰუდი ეცვა და სათვალე ეკეთა.

ბანკის თანამშრომლის თქმით, თავდამსხმელს პოლიცია დაედევნა.

ბანკში ამ ეტაპზე კრიმინალისტებიც მუშაობენ.

„ბათუმელები“ დაუკავშირდა შს სამინისტროს. ოფიციალურ ინფორმაციას მიღებისთანავე აქვე შემოგთავაზებთ.

____

მთავარი ფოტო: ბანკის ფილიალში ექსპერტ-კრიმინალისტები მუშაობენ

„…სულაც არ გამოვრიცხავ, იქ, სადაც ადამიანებს უსმენენ, იგივე „სუს-ის ფაილების“ სკანდალის შემდეგ, ყოფილიყო პროტესტი, რომ უკანონოდ აღარ მოუსმენდნენ, ამ ცვლილებით კი, მასშტაბი ფართოვდება – უფრო მეტ ადამიანს მოუსმენენ და თან კანონის სახელით“, – ამბობს ლონდა თოლორაია. ის ყოფილი სახელმწიფო ინსპექტორია, რომელიც იმის გამო, რომ უკანონოდ ფარულ მოსმენებსაც ხშირად აპროტესტებდა, დღეს აქვს სტატუსი  – „ყოფილი“.

ლონდა თოლორაიას ვესაუბრეთ, რატომ დასჭირდა „ოცნების“ ხელისუფლებას ახალი საკანონმდებლო ცვლილება ფარულ მოსმენებზე, რომლის მიხედვითაც 27 მუხლით მეტ სისხლის სამართლის საქმეზე შეიძლება მოუსმინონ ფარულად ადამიანებს, მოსმენის ვადა 6-დან 9 თვემდე გაიზარდა და მოგვისმინონ ისე, რომ ჩვენ 30 წელი ვერც ვერაფერი გავიგოთ.

• ქალბატონო ლონდა, თქვენი აზრით, რა არის მთავარი საფრთხე, რასაც ითვალისწინებს ახალი საკანონმდებლო ცვლილება ფარულ მოსმენებზე, რაზეც სამოქალაქო სექტორი ვეტოს დადებას პრეზიდენტს სთხოვს? 

ამ კანონის მიღებამდეც კი, პრობლემა იყო, მაგალითად, ადამიანებისთვის შეტყობინების გაგზავნა, რომ მას ფარულად უსმენდნენ. კანონმდებლობით პროკურორი იყო ვალდებული, მოსმენის დასრულებიდან 12 თვის გასვლის შემდეგ მოსმენის ობიექტისთვის გაეგზავნა შეტყობინება. სახელმწიფო ინსპექტორის სამსახურს და მანამდე პერსონალურ მონაცემთა დაცვის ინსპექტორს, მოგეხსნებათ, ჰქონდა ამ მიმართულებით მონიტორინგის ფუნქცია – ვაკონტროლებდით, რამდენად ასრულებდა პროკურატურა კანონიერად თავის უფლებამოსილებას. მუდმივად ფიქსირდებოდა პრობლემა: დაგვიანებით უგზავნიდნენ ადამიანებს შეტყობინებას, ან მას შემდეგ, როცა იგებდნენ, რომ შემოწმება დავიწყეთ. პროკურატურას გარკვეულ დისკომფორტს უქმნიდა შეტყობინების გაგზავნა, რადგან ზოგჯერ ამას თან სდევდა პროტესტი: რატომ მისმენდნენ? პროტესტის საგანი იყო ისიც, რომ ზოგჯერ მოსმენის საგანი იყო არა ის საუბარი, რომელიც სისხლის სამართლის საქმესთან იყო შემხებლობაში, არამედ პირადი და პერსონალური ინფორმაცია.

• მიყურადების რა მოდელი გვექნება, თუ ეს საკანონმდებლო ცვლილება შევა ძალაში? 

ზოგადად, უფრო კომფორტული მოცემულობა იქმნება იმისთვის, ვინც მოსმენას ახორციელებს, რადგან კანონისმიერი საფუძველი ექნება მოსმენას. როგორც იცით, გაიზარდა მუხლების რაოდენობა და პროკურატურას არც იმ კუთხით დასჭირდება მანევრი, რომ კვალიფიკაცია ცვალოს – ზოგჯერ სპეციალურად იმ მუხლით იწყებოდა გამოძიება, რაც ითვალისწინებდა ფარულ მოსმენას.

ამ ჩამონათვალს დაუმატეს ისეთი მუხლები, რაც არარელევანტურია, ჩემი აზრით, მაგალითად, 405-ე მუხლი, რაც გულისხმობს „საქვეყნოდ მოწოდებას აგრესიის აქტის დაგეგმვისაკენ, მომზადებისაკენ, დაწყებისაკენ ან წარმოებისაკენ“, ან 239-ე პრიმა მუხლი – „ძალადობრივი ქმედებებისკენ საჯაროდ მოწოდება“, გაუგებარია, საქვეყნოდ და საჯაროდ როცა ხდება ამ დანაშაულის ჩადენა, ფარული მოსმენა რატომ არის საჭირო?

შეიძლება, ზოგიერთი მუხლის დამატება ამ ჩამონათვალში ლოგიკურია, რომ პროკურატურას სჭირდება მტკიცებულების მოპოვება, მაგრამ ისეთი ფონია, სახელმწიფო უწყებებისთვის უფლებამოსილების გაფართოება ფარულ მოსმენებთან დაკავშირებით კიდევ უფრო მეტი დაუცველობის განცდას აჩენს ქვეყანაში.

ევროსასამართლოს არაერთ გადაწყვეტილებაში აქვს განმარტებული, რომ ფარული მოსმენა არის ყველაზე უხეში ფორმით ჩარევა ადამიანის პირად ცხოვრებაში და მისი გამოყენება მხოლოდ განსაკუთრებულ შემთხვევებში უნდა ხდებოდეს, მაღალი საშიშროების მქონე თუა, ანუ საუბარია მძიმე და განსაკუთრებით მძიმე მუხლებზე. პარლამენტმა კი, ჩამონათვალი გაზარდა ზოგიერთი იმ მუხლით, სადაც გათვალისწინებულია თავისუფლების აღკვეთა 2 წლამდე, ან ნაკლებად მძიმე დანაშაულია. სისხლის სამართლის კოდექსი ამბობს, რომ მუხლი ნაკლებად მძიმე დანაშაულია და შენ, სახელმწიფოს, ყველაზე უხეში ფორმით გინდა ჩაერიო ადამიანის პირად ცხოვრებაში.

• საკანონმდებლო ცვლილების მიხედვით, მოსმენის პერიოდი გრძელდება 9 თვემდე, ხოლო შეტყობინება შესაძლოა 30 წელი არ გაუგზავნონ ადამიანს, ვისაც უსმენდნენ. ეს რა შემთხვევაშია შესაძლებელი? 

დიახ, კანონმდებლობა ითვალისწინებს შეტყობინების ვალდებულებას ისევ, თუმცა უკვე გათვალისწინებულია მისი განუსაზღვრელი ვადით გადაწევის შესაძლებლობა, თუკი პროკურატურა შესაბამისი დასაბუთებით მიმართავს სასამართლოს და ახსნის, რატომ არ უნდა გაუგზავნოს შეტყობინება მოქალაქეს… ზოგიერთ დანაშაულზე ხანდაზმულობის ვადა 30 წელია. შეტყობინების ვადაც შესაძლოა ამ ვადით გადაიწიოს.

6-დან 9 თვემდე მოსმენის ვადის გახანგრძლივებაც გაუგებარია, რა ლეგიტიმურ მიზანს ემსახურება: თუ 6 თვეში ღირებული ინფორმაცია ვერ მოვიპოვე, შეუძლებელია 3 თვით გახანგრძლივებამ შეცვალოს მდგომარეობა. მიმუშავია ბევრი წელი საგამოძიებო უწყებაში და ვიცი, რომ ამის შანსი ნაკლებია.

• ფარულ მოსმენებზე ამ დრომდე აჭიანურებს საკონსტიტუციო სასამართლო გადაწყვეტილების მიღებას იმის მიუხედავად, რომ 4 წლის წინ დაასრულა კამპანიის „ეს შენ გეხება“ ფარგლებში მომზადებული სარჩელის განხილვა. რატომ დასჭირდა ეს საკანონმდებლო ცვლილება ხელისუფლებას? 

ამ ცვლილებით იზრდება ადამიანთა წრე, ვისაც შეიძლება მოუსმინონ… აქამდეც შეიძლებოდა მოესმინათ ამ ადამიანებისთვის იმ მუხლებით, რაც ახლა დაამატეს, მაგრამ ახლა ეს კანონის სახელით და სასამართლოს ჩართულობით გაფართოვდა. ამჯერად, მსგავსი ჩანაწერების გამოყენება შესაძლებელი იქნება უფრო მარტივად ადამიანების წინააღმდეგ იგივე სისხლის სამართლის საქმეებში მტკიცებულებების სახით, ასევე პროკურატურას შეუძლია განსაიდუმლოება მოახდინოს უკვე სასამართლოს განჩინების გზით მოპოვებული მტკიცებულების და დისკრედიტაციის მიზნებისთვისაც გამოიყენოს.

ჩვენ ვნახეთ „სუს-ის ფაილების საქმე“ და ვიცით, რომ გამოძიება ამ დრომდე არ დასრულებულა… სულაც არ გამოვრიცხავ, იქ, სადაც ადამიანებს უსმენენ, იგივე „სუს-ის ფაილების“ სკანდალის შემდეგ, ყოფილიყო პროტესტი, რომ უკანონოდ აღარ მოუსმენდნენ, ამ ცვლილებით მასშტაბი ფართოვდება.

• ამ გზით უფრო იოლად აპირებს ხელისუფლება ავტორიტარული მიდგომების გაძლიერებას, ასე ჩანს? 

ბოლო პერიოდში ისე განიხილავს საქართველოს პარლამენტი კანონპროექტებს, რომ ამას დემოკრატიის პროცესს ნამდვილად ვერ დავუძახებთ, არავის აზრი არ აინტერესებთ, მხოლოდ რამდენიმე თვინიერ უწყებას ჰკითხავენ აზრს და იღებენ ცვლილებებს. ამ შემთხვევაში კი, საკონსტიტუციო სასამართლოს არ აქვს მიღებული გადაწყვეტილება ფარული მოსმენის მარეგულირებელი ნორმების შესახებ.

კითხვებს აჩენს საკონსტიტუციო სასამართლოს მიდგომა, რატომ ვერ მიიღეს გადაწყვეტილება 4 წელი, როცა ცნობილია, რომ საქმის განხილვა დასრულებულია. უფრო გვიან დაწყებულ საქმეებზე მიღებული გადაწყვეტილებები გვინახავს. ეს აჩენს კითხვებს და არის საკონსტიტუციო სასამართლოს პასუხისმგებლობის საკითხი.

• სამართლებრივი ბერკეტი არის საკონსტიტუციო სასამართლო, რომელიც გადაწყვეტილებას არ იღებს ფარულ მოსმენებზე. თქვენს საქმეზეც, როცა სახელმწიფო ინსპექტორის სამსახური გააუქმა პარლამენტმა, საკონსტიტუციო არ წავიდა პარლამენტის წინააღმდეგ. რა შანსი რჩება დემოკრატიის სასარგებლოდ? 

ახლა მნიშვნელოვანი როლი აქვს პრეზიდენტს, თუმცა შესაძლოა პარლამენტმა დაძლიოს ვეტო. შესაბამისად, ამ სიტუაციაში გამოსავლის პოვნა რთულია, როცა სახელმწიფო უწყებები ერთ ხმაში მოქმედებენ.

გააჩნია, რა პრაქტიკას გამოიყენებს სასამართლო, თუ ეს საკანონმდებლო ცვლილებები ამოქმედდება, სასამართლოს როლი იქნება, რა თქმა უნდა, მნიშვნელოვანი. რა თქმა უნდა, საკონსტიტუციო სასამართლოს შეუძლია გავლენის მოხდენა, თუკი დროულად მიიღებს გადაწყვეტილებას. ამ საკანონმდებლო ცვლილებაზეც სავარაუდოდ მიმართავენ საკონსტიტუციო სასამართლოს, თუმცა 4 წელი წინა საქმეზე ვერ მიიღეს გადაწყვეტილება. ამ მოცემულობაში დამაიმედებელი პროგნოზის გაკეთება შეუძლებელია.

ბათუმის შოთა რუსთაველის სახელმწიფო უნივერსიტეტის სტუდენტების, 20 წლის ნანა გვარიშვილისა და 22 წლის მარიკა ბროლაძის პროექტი – Gather2gather „ბსუს სტუდენტური იდეები 2022“-ის კონკურსის ერთ-ერთი გამარჯვებული გახდა.

პროექტის მიზანია უნივერსიტეტის ქართველი და ინდოელი სტუდენტების უფრო მეტად დაახლოება.

ავტორების თქმით, პროექტი ინგლისურენოვანი იქნება და თვე-ნახევრის განმავლობაში გაგრძელდება. ბიუჯეტი დაახლოებით 3500 ლარია.

Gather2gather-ი ჯამში 40 მონაწილეს გააერთიანებს, რომელთაგან 20 ქართველი, 20 კი – ინდოელი სტუდენტი იქნება.

როგორც ნანა გვარიშვილმა გვითხრა, შესარჩევ სარეგისტრაციო ფორმას 15 ივნისს გამოაქვეყნებენ და მოტივაციის მიხედვით შეარჩევენ პროექტის მონაწილეებს.

მონაწილეობისთვის აუცილებელი იქნება ინგლისური ენის B1 დონეზე ცოდნა, რადგან, როგორც პროექტის ავტორები მიიჩნევენ, თუ მონაწილეები ერთმანეთთან კომუნიკაციას თავისუფლად ვერ შეძლებენ, პროექტი ისეთი შედეგიანი ვერ იქნება, როგორც ჩაიფიქრეს.

რატომ გადაწყვიტეს ამ პროექტის მომზადება? – პროექტის ავტორები ამბობენ, რომ მართალია, ინდოელი სტუდენტები ქართულს ერთი წლის განმავლობაში სწავლობენ, მაგრამ ეს არ არის საკმარისი იმისთვის, რომ მათ შეძლონ სხვადასხვა აქტივობაში თავისუფლად ჩართვა.

„სამწუხაროდ, ინდოელ სტუდენტებს, ამ ეტაპზე, ერთადერთი, რაშიც ინტელექტუალური კუთხით მონაწილეობის მიღება შეუძლიათ, ბსუ-ს სამეცნიერო კონფერენციაა, რომელიც ინგლისურად ტარდება. ისინი სხვა ღონისძიებებში ვერ ერთვებიან, რადგან ყველაფერი ძირითადად ქართულ ენაზე მიმდინარეობს.

გვინდოდა ისეთი პროექტი გაგვეკეთებინა, რომ ინდოელ და ქართველ სტუდენტებს ერთმანეთთან კიდევ უფრო მეტად დაახლოების საშუალება ჰქონოდათ.

უნივერსიტეტში არ ყოფილა აქამდე მსგავსი ინგლისურენოვანი პროექტი.

პროექტის განმავლობაში გვექნება გასვლითი ღონისძიებებიც. მოვაწყობთ სახალისო თამაშებს; იქნება ესეების კონკურსი, ფოტოკონკურსი და კიდევ ბევრი რამ. მაქსიმალურად შევეცადეთ ისეთი აქტივობები დაგვეგეგმა, რაც მათ ახლო კონტაქტს ხელს შეუწყობს. გვინდა, რომ საბოლოოდ ქართველმა და ინდოელმა სტუდენტებმა ერთად შექმნან მსგავსი პროექტები,“ – გვითხრა ნანამ.

მარიკა ბროლაძე ამბობს, იმედი აქვთ, პროექტით ინდოელი სტუდენტები დაინტერესდებიან, თუნდაც იმიტომ, რომ ინდოელი სტუდენტები სამეცნიერო კონფერენციაში ყოველთვის აქტიურად ერთვებიან.

„ინდოელი სტუდენტები არიან კონტაქტში ქართველ სტუდენტებთან, მაგრამ ერთეულებთან. ვფიქრობ, იმიტომ, რომ სასწავლო პროცესის გარეთ აქტივობები, სადაც ინდოელი და ქართველი სტუდენტები ერთად შეძლებენ ჩართვას, იშვიათად იმართება.

ჩვენ გვაქვს აქტიური კომუნიკაცია ინდოელ სტუდენტებთან, გვყავს მეგობრებიც და დარწმუნებულები ვართ, რომ ჩვენი პროექტით დაინტერესდებიან,“ – გვითხრა მარიკამ.

მარიკასა და ნანას თქმით, პროექტის შემდეგ მონაწილეები კლუბს შექმნიან, რომელიც მინიმუმ რამდენიმე წელი იმუშავებს და სხვა ინდოელ და უცხოელ სტუდენტებს დაეხმარება უნივერსიტეტში მარტივად ინტეგრაციაში.

დღეს, 9 ივნისს, გაეროს ასოციაციისა და „თავისუფალ ჟურნალისტთა სახლის“ ორგანიზებით, აჭარაში სხვადასხვა სფეროს წარმომადგენელთა სამუშაო შეხვედრა გაიმართა ევროკავშირის მიერ მხარდაჭერილი LINKS პროექტის ფარგლებში.

LINKS -ი ცოდნისა და უნარების განვითარების ქსელებისა და პლატფორმების პროექტია. შეხვედრის მიზანი აჭარის რეგიონში შრომის ბაზრის ვითარების მიმოხილვა იყო.

შეხვედრაზე მისასალმებელი სიტყვა წარმოთქვეს გაეროს ასოციაციის წარმომადგენლებმა: თეონა ლებანიძემ და ზურა სამარღანიშვილმა, ორგანიზაცია „თავისუფალ ჟურნალისტთა სახლის“ დირექტორმა, ასლან ჭანიძემ, აჭარის ავტონომიური რესპუბლიკის ფინანსთა და ეკონომიკის მინისტრის მოადგილემ, გიორგი სურმანიძემ.

აჭარის ავტონომიური რესპუბლიკის დასაქმების სააგენტოს დირექტორმა, თემურ კახიძემ რეგიონულ შრომის ბაზარზე დასაქმების სერვისებისა და მხარდამჭერი პროგრამების შესახებ ისაუბრა.

შეხვედრაზე გამოყენებითი კვლევის კომპანიის (ARC) წარმომადგენელმა, ხათუნა ნაჭყებიამ, საზოგადოებას აჭარის რეგიონის შრომის ბაზრის მონიტორინგის შედეგები გააცნო.

მკვლევარმა აღნიშნა, რომ 2021 წლის მონაცემებით, საქართველოში უმუშევრობის ოფიციალური მაჩვენებელი მომატებულია და სავარაუდოა, რომ ეს მაჩვენებელი გაცილებით მაღალია, ვიდრე რიცხვებით ჩანს – დასაქმებულების მაჩვენებელიც თვითდასაქმებულების ხარჯზეა გაზრდილი:

„აჭარის რეგიონში ბიზნესსექტორში 74 800 ადამიანია დასაქმებული. გენდერული ბალანსის თვალსაზრისით კი, სხვა რეგიონებთან შედარებით აჭარაში დასაქმებულები გაცილებით უფრო თანაბრად არიან გადანაწილებულები.

თუმცა მონიტორინგმა აჭარაში საინტერესო რამ აჩვენა: კაცების შემთხვევაში, რაც უფრო დაბალია კაცების განათლების საფეხური, მით უფრო მაღალია მათი დასაქმების მაჩვენებელი და პირიქით: განათლების რაც უფრო მაღალ საფეხურს აღწევენ ქალები, მით უფრო დაბალია მათი დასაქმების მაჩვენებელი. ეს ბევრი, სხვადასხვა რამით შეიძლება იყოს განპირობებული, მაგალითად, შესაძლებელია იმით, რომ საქართველოში ქალს გაცილებით მეტი რამ მოეთხოვება, ვიდრე კაცს. თუმცა ეს ვარაუდია და კვლევით დასადასტურებელი მოსაზრებაა,“ – ამბობს კვლევის კომპანიის (ARC) წარმომადგენელი, ხათუნა ნაჭყებია.

საქართველოს გაეროს ასოციაციის წარმომადგენელმა, ცოდნისა და უნარების განვითარების ქსელებისა და პლატფორმების გაძლიერების (LINKS) პროექტის ოფიცერმა ზურაბ სამარღანიშვილმა დღევანდელი სამუშაო შეხვედრის მნიშვნელობას გაუსვა ხაზი და აღნიშნა, რომ დღეს სამოქალაქო საზოგადოებისა და სამთავრობო სექტორის წარმომადგენლებს ევროკავშირის მხარდაჭერით განხორციელებული შრომის ბაზრის მონიტორინგის შედეგები წარედგინათ:

„მიუხედავად იმისა, რომ აღნიშნული საზოგადოებისთვის ადგილობრივი კონტექსტი კარგად არის ნაცნობი, მონიტორინგის შედეგად გამოჩნდა ტენდენციები, რომლებიც სხვადასხვა სექტორის წარმომადგენლის ყურადღებასა და მათ შორის თანამშრომლობას მოითხოვს.

დასაქმების შესაძლებლობების გასაუმჯობესებლად სხვადასხვა სექტორს შორის თანამშრომლობაა საჭირო, თუ აქტორებს შორის, ეფექტური კომუნიკაცია არ არსებობს, როგორი აქტორებიც არიან, მაგალითად, ადგილობრივი სამთავრობო უწყებები, არასამთავრობო სექტორი და  საგანმანათლებლო სერვისების პროვაიდერები, ცალკეული ორგანიზაციები ეკონომიკური ბაზრის განვითარებაში მნიშვნელოვანი წვლილის შეტანას ვერ შეძლებენ. სწორედ ამ კომუნიკაციას უწყობს ხელს დღევანდელი შეხვედრა.

ერთმანეთს იდეები გავუზიარეთ, სამომავლო თანამშრომლობა დაიგეგმა. აღსანიშნავია, რომ შეხვედრა დიდი პროექტის ნაწილია, რომლის ფარგლებშიც ჩვენ სხვადასხვა ბიზნეს-კომპანიასთან ვთანამშრომლობთ, კერძოდ დასაქმების პროექტის ფარგლებში. LINKS პროექტი ხორციელდება საქართველოს გაეროს ასოციაციისა და საქართველოს ღია საზოგადოების ფონდის თანამშრომლობით, ევროკავშირის დაფინანსებით. აჭარაში პროექტის პარტნიორი თავისუფალ ჟურნალისტთა სახლი გახლავთ.“, – ამბობს ზურაბ სამარღანიშვილი.

დღევანდელ სამუშაო შეხვედრაში მონაწილეობა მიიღეს ადგილობრივი არასამთავრობო ორგანიზაციების, საჯარო და კერძო სექტორის,  პროფესიული საგანმანათლებლო დაწესებულებებისა და სხვა საგანმანათლებლო სერვისების მიმწოდებლების წარმომადგენლებმა.

რეგიონული სამუშაო ჯგუფების შეხვედრები ოთხ რეგიონში (აჭარა, გურია, ქვემო ქართლი და შიდა ქართლი) იმართება პროექტის ფარგლებში – „ცოდნისა და უნარების განვითარების ქსელებისა და პლატფორმების“ (LINKS). მათი მიზანია, კერძო და საჯარო სექტორების წარმომადგენლებს შორის კომუნიკაციისა და კოორდინაციის გაუმჯობესება ინფორმაციის მუდმივი გაზიარების გზით. ეს, თავის მხრივ, სამუშაოს მაძიებელთა უნარ-ჩვევების განვითარებასა და დასაქმების მომსახურების მტკიცებულებებზე დაფუძნებულ გაუმჯობესებას შეუწყობს ხელს.

„ცოდნისა და უნარების განვითარების ქსელებისა და პლატფორმების“ (LINKS) პროექტი ხორციელდება ევროკავშირის დაფინანსებით, „საქართველოს გაეროს ასოციაციისა“ (UNAG) და „საქართველოს ღია საზოგადოების ფონდის“ (OSGF) მიერ, ხოლო აჭარის რეგიონში პროექტის პარტნიორი ორგანიზაცია „თავისუფალ ჟურნალისტთა სახლია“ (IJH) 

ნატოს ყოფილი გენერალური მდივნის, ანდრეს ფოგ რასმუსენის აზრით, ალიანსი შეცდა, როცა 2008 წლის ბუქარესტის სამიტზე საქართველოსა და უკრაინას „წევრობის სამოქმედო გეგმა“ (MAP) არ მიანიჭა.

ამ და სხვა საკითხებზე რასმუსენი გამოცემა „ფორინ პოლისის“ ესაუბრა.

„შეცდომა“

რასმუსენის აზრით, 2008 წელს მიღებული გადაწყვეტილება საქართველოსა და უკრაინისთვის „წევრობის სამოქმედო გეგმის“ (MAP) არმინიჭების შესახებ შეცდომა და „არასწორი გზავნილი“ იყო.

„რეტროსპექტივაში, პირველი შეცდომა მრავალი წლის წინ დავუშვით. ეს 2008 წელს მოხდა, ბუქარესტის სამიტზე, როცა გადავწყვიტეთ, რომ უკრაინა და საქართველო ნატოს წევრები გახდებოდნენ, მაგრამ ვერ მივაღწიეთ შეთანხმებას მათთვის „წევრობის სამოქმედო გეგმის“ მინიჭებაზე.

ამ დაყოფამ ნატოს რიგებში არასწორი გზავნილი გაუგზავნა პუტინს, რომელიც იმავე წლის აგვისტოში საქართველოში შეიჭრა. ვფიქრობ, პირველი შეცდომა 2008 წელს დავუშვით, როცა არ განვსაზღვრეთ მკაფიო გზა საქართველოსა და უკრაინისთვის“, – ამბობს რასმუსენი.

მან ხაზი გაუსვა, რომ თავად ემხრობოდა MAP-ის მინიჭებას საქართველოსა და უკრაინისთვის.

შვედეთი და ფინეთი ნატოში

რასმუსენმა ასევე ისაუბრა ფინეთისა და შვედეთის გაწევრებაზე ნატოში. მან აღნიშნა, რომ დანიის პრემიერ-მინისტრობისას „იმედი ჰქონდა“, თუმცა „არ ელოდა“, რომ ორი მეზობელი ქვეყანა ჩრდილოატლანტიკურ ალიანსში წევრობას მოისურვებდა.

რასმუსენის თქმითვე, თურქეთი სკანდინავიური ქვეყნების წევრობას აშშ-სთან მოლაპარაკებებში ბერკეტად იყენებს.

„ვფიქრობ, საბოლოო ჯამში შვედეთი და ფინეთი ნატოში გაწევრიანდებიან. ერდოღანი [თურქეთის პოზიციას] აშშ-სთან ორმხრივ ურთიერთობებში ბერკეტად იყენებს. ვფიქრობ, საქმე გვაქვს თურქეთი-აშშ-ის ურთიერთობასთან და არა თურქეთისა და შვედეთ-ფინეთის“, – ხსნის რასმუსენი.

„ჩვენ ზედმეტად შევაფასეთ რუსეთის სამხედრო სიძლიერე“

რასმუსენმა აგრეთვე აღნიშნა, რომ რუსეთის სამხედრო ძალები აქამდე ნატოს ბევრად ძლიერად მიაჩნდა.

„ჩვენ ზედმეტად შევაფასეთ რუსეთის სამხედრო სიძლიერე. მიუხედავად უზარმაზარი ინვესტიციებისა და საბჭოთა ბაზების ხელახლა გახსნის, ვუყურებთ ძალიან სუსტ სამხედრო ძალებს.

ჯერ კიდევ უცნობია ამის მიზეზი. ვფიქრობ, ერთ-ერთი მიზეზი შეიძლება კორუფცია იყოს.

კიდევ ერთი არასწორი რამ ის იყო, რომ ვერ შევაფასეთ ვლადიმერ პუტინის სისასტიკე და ამბიციები“.

„პუტინი არ შეჩერდება, თუკი წარმატებას მიაღწევს“

რასმუსენს ასევე ჰკითხეს აზრი საფრანგეთის პრეზიდენტის, ემანუელ მაკრონის განცხადებაზე, რომ „არცერთი მხარე არ იქნება დამცირებული“:

„აბსოლუტურად არ ვეთანხმები. პუტინს დამცირებისგან ვერ ვიხსნით. პუტინისთვის სახის შენარჩუნების ფასი ბევრად უფრო მაღალი იქნება, ვიდრე უკრაინაში რუსული ჯარის პირდაპირი მარცხი.

ჩემი აზრით, უკრაინამ ამ ომში უნდა იმარჯვოს, რადგანაც პუტინი არ შეჩერდება, თუკი წარმატებას მიაღწევს. შემდეგი იქნება მოლდოვა, საქართველო და საბოლოო ჯამში, ბალტიის სამი სახელმწიფო“.

ევროპარლამენტი ევროპულ საბჭოს და დემოკრატიულ პარტნიორებს მოუწოდებს, ბიძინა ივანიშვილისთვის პერსონალური სანქციების დაწესება განიხილონ.

რეზოლუციას დღეს, 9 ივნისს, „ქართული ოცნების“ ხელმძღვანელი ირაკლი კობახიძე ბრიფინგით გამოეხმაურა და განაცხადა, რომ ბიძინა ივანიშვილის ხელისუფლებაში ყოფნის დროს მედიის თავისუფლებამ ფუნდამენტური პროგრესი განიცადა.

„როდესაც პოლიტიკიდან გასულ ადამიანს ევროპარლამენტის რეზოლუცია პოლიტიკაში ჩართულობას ყოველგვარი არგუმენტაციისა და მტკიცებულებების გარეშე ედავება, ეს ცალკე პრობლემაა. თუმცა, რომც დავუშვათ, რომ ბიძინა ივანიშვილი ჩართულია პოლიტიკაში, გაუგებარია, რას ედავებიან ადამიანები, რომლებიც საკუთარ თავს საქართველოს კეთილმოსურნეებს უწოდებენ.

ფაქტია და სინამდვილეში მათაც ძალიან კარგად იციან, რომ ბიძინა ივანიშვილის დამსახურებით, საქართველომ 2012 წლის შემდეგ დემოკრატიის, ადამიანის უფლებებისა და მედიის თავისუფლების მიმართულებით, მხოლოდ პროგრესი, თანაც ფუნდამენტური პროგრესი განიცადა,“ – განაცხადა ირაკლი კობახიძემ.

მისი თქმით, ერთადერთი, რასაც ივანიშვილს შესაძლოა „საქართველოს კეთილმოსურნე“ ედავებოდეს,  შეიძლება იყოს ის, რომ საქართველომ რუსეთს სანქციები არ დაუწესა და „ამით საკუთარი ქვეყანა და ხალხი არ დასაჯა,“- ამბობს კობახიძე.

„საქართველოს „კეთილმოსურნეებს“ ალბათ აღიზიანებს ის ფაქტი, რომ მთელ მსოფლიოში არსებული უმძიმესი ეკონომიკური პრობლემების ფონზე, საქართველოში 10 პროცენტზე მეტი მაღალი ეკონომიკური ზრდა დაფიქსირდა,“ – განაცხადა კობახიძემ.

ევროპარლამენტის რეზოლუციის თანახმად, ევროპარლამენტი გამოხატავს შეშფოთებას იმ დესტრუქციული როლის გამო, რომელსაც საქართველოს პოლიტიკურ და ეკონომიკურ ცხოვრებაში ქვეყნის ერთადერთი ოლიგარქი, ბიძინა ივანიშვილი ასრულებს და მიუთითებს მის კონტროლზე მთავრობაზე, მათ შორის, ჟურნალისტებისა და პოლიტიკური ოპონენტების პოლიტიკურად მოტივირებული დევნის გადაწყვეტილებებში.

„ევროპარლამენტი ღრმად შეშფოთებულია ივანიშვილის პერსონალური და ბიზნესკავშირებით კრემლთან, რაც განსაზღვრავს საქართველოს ამჟამინდელი მთავრობის პოზიციას რუსეთის წინააღმდეგ სანქციების მიმართ,“ – ნათქვამია ევროპარლამენტის რეზოლუციაში.

5 წლის ბიჭის დედა, მარი გ. „ბათუმელებს“ მოუყვა, რომ მის შვილს, რომელიც ბათუმში, ერთ-ერთ კერძო საბავშვო ბაღში სწავლობს, თანატოლებმა სცემეს. მან ამ ფაქტის ამსახველი ვიდეოც გამოგვიგზავნა, სადაც ჩანს, თუ როგორ ურტყამს რამდენიმე ბავშვი ერთს.

დედა ამბობს, რომ ვიდეო გუშინ დღის მეორე ნახევარშია გადაღებული.

„მე იტალიაში ვარ, თუმცა საბავშვო ბაღის ვიდეოთვალთან მაქვს წვდომა და ასე ვაკვირდები ხოლმე ბავშვს. ეს არ არის პირველი შემთხვევა, რამდენჯერმე კიდევ სცემეს ჩემს შვილს ბავშვებმა. ძიძები აუდიტორიას ტოვებენ ხოლმე უყურადღებოდ და ასეთ დროს ხდება ეს ფაქტები“, – გვეუბნება დედა.

ის ამბობს, რომ ძალადობის შემთხვევებთან დაკავშირებით არაერთხელ ესაუბრა საბავშვო ბაღის ხელმძღვანელობას, თუმცა მათ ბავშვზე ძალადობის ფაქტები ვერ აღკვეთეს.

„მე ამ შემთხვევას აღარ ვაპატიებ ბაღს, ძალიან მინდა ყველა კომპეტენტური პირი გვერდით დამიდგეს, რომ შევძლო ჩემი შვილის უსაფრთხოების დაცვა“, – ამბობს დედა.

მას ვკითხეთ, მის შვილზე ერთი და იგივე ბავშვები ძალადობენ თუ სხვებიც, რაზეც დედა ამბობს, რომ ვიდეოში ასეთ დეტალებს ნათლად ვერ არჩევს. „კამერაში ძნელია ყველა ბავშვის სახე დააფიქსირო. წინა კადრებშიც ჩანდა ბიჭი, თუმცა არ ვიცი, სხვა დღეებშიც მონაწილეობდა თუ არა ჩხუბში. მანამდე, თებერვალში, გოგო ჩანდა კადრებში.

ჩემი შვილი თავს ვერ იცავს, ყოველდღე ორი საათით გადის ფსიქოლოგთან და ლოგოპედთან, სჭირდება დახმარება, უფრო მეტად რომ შევიდეს კონტაქტში ბავშვებთან. აქედან გამომდინარე, უფრო იჩაგრება.

ეს ყველაფერი არის ძიძების და დირექტორის ბრალი: ისინი უყურადღებოდ ტოვებენ ბავშვებს და ჩემს შვილს აჩაგვრინებენ. მეუბნებიან, რომ ბავშვებმა იხუმრეს. რაიმე დაზიანება რომ მიეღო ჩემს შვილს, ვინ არის ამაზე პასუხისმგებელი?“ – გვეუბნება ბავშვის დედა.

მისი თქმით, ის საბავშვო ბაღში 300 ლარს იხდის, თუმცა ბავშვის უსაფრთხოებას ბაღი ვერ უზრუნველყოფს.

„აქამდეც ვაპირებდი ბავშვის გადაყვანას, მაგრამ შემაჩერეს, მითხრეს, რომ მოაგვარებდნენ პრობლემას. ვერ მოაგვარეს. ძალიან მეშინია, რადგან მე არ ვარ საქართველოში. პირველი ორი შემთხვევის შესახებ არავის გავაგებინე. ვფიქრობ, ახლა უნდა ჩაერთონ შესაბამისი უწყებები ამ საქმეში, რადგან შესაძლოა იმ ბავშვებსაც სჭირდებათ ფსიქოლოგიური დახმარება. ჩემმა შვილმა დიდი სტრესი მიიღო“, – ამბობს მარი გ..

„ბათუმელები“ საბავშვო ბაღის ხელმძღვანელს, ნინო ბ.-საც დაუკავშირდა. ის უარყოფს ბავშვის ცემის სხვა შემთხვევებს და ამბობს, რომ „ესეც შემთხვევით მოხდა“.

„პირველი შემთხვევაა ეს, როგორც მე ვიცი. სხვა შემთხვევა არ გვქონია. გუშინ საღამოს მოხდა ძალიან ცუდი ინციდენტი, რა თქმა უნდა, მივიღეთ შესაბამისი ზომები. უბრალოდ, ჯგუფის პედაგოგი გახდა შეუძლოდ, გამოვიყვანეთ ჯგუფიდან და შვიდის ოცი წუთი იყო უკვე, ბავშვების გაყვანის დრო და პედაგოგის თანაშემწემ გამოუყვანა ბავშვი ერთ-ერთ მშობელს და ამ ერთი წუთის შუალედში მოხდა ეს“, – გვეუბნება დირექტორი.

მას ვკითხეთ, როცა მასწავლებელი ხდება შეუძლოდ, ჰყავთ თუ არა სხვა პერსონალი, ვინც პედაგოგს ჩაენაცვლება და ბავშვები არ დარჩებიან მარტო? ბაღის დირექტორის თქმით, მეორე პედაგოგი ჩაანაცვლეს, თუმცა ინციდენტი ამ შუალედში მოხდა.

დირექტორს ასევე ვკითხეთ, ჰყავთ თუ არა ფსიქოლოგი ბაღში და იმ ბავშვებს, რომლებიც თანატოლს სცემენ, სჭირდებათ თუ არა ფსიქოლოგის მომსახურება? ნინო ბ.-ის თქმით, ბაღს ფსიქოლოგი არ ჰყავს, „მასწავლებლებს აქვთ აქ ადგილზე გავლილი კურსი და სერტიფიცირებულიც არიან“, – გვითხრა მან.

მისი თქმით, ინციდენტში მონაწილე ყველა ბავშვის მშობელი დაბარებული ჰყავთ და დაელაპარაკებიან.

„დიახ, მე ვფიქრობ, რომ ნაციონალურმა მოძრაობამ საქართველოდან უნდა დაახვიოს“, – ასე დაასრულა აჭარის უმაღლესი საბჭოს ვიცე-სპიკერმა, ტიტე აროშიძემ ბრიფინგი და დატოვა ტრიბუნა იმის ნიშნად, რომ კითხვებს აღარ უპასუხებდა. მას არ უთქვამს, რა უნდა ქნას 29 065 ამომრჩეველმა ბათუმში, რომელმაც ბოლო თვითმმართველობის არჩევნებზე ხმა ნაციონალურ მოძრაობას მისცა – უნდა „დაახვიონ“, თუ დარჩენა შეუძლიათ.

ტიტე აროშიძემ დღეს, 8 ივნისს, „ოცნების“ ოფისში ბრიფინგი მოაწყო, სადაც განმარტა, რომ აჭარის მთავრობის თავმჯდომარის, თორნიკე რიჟვაძის რიტორიკა ოპოზიციის მიმართ გუშინ, ანგარიშის წარდგენისას, ადეკვატური რეაქცია იყო იმ შეურაცხყოფაზე, რასაც მას „უგონებენ“ და „დიდი ხანია ითმენს.“

ვიცე-სპიკერის თქმით, „ნაციონალური მოძრაობა“ აწყობდა პროვოკაციებს, რომ მწყობრიდან გამოეყვანათ მთავრობის თავმჯდომარე და მათივე კოლეგებიც, „მაგრამ ეს არ გამოუვიდათ.“

ტიტე აროშიძემ არ უპასუხა კითხვას, რა ტიპის გამონათქვამია თორნიკე რიჟვაძის წამოძახება – „არავის გადაუღუნოთ“. მან თქვა, რომ არ იცის და არც გაუგონია.

მანამდე მან გაიმეორა, გუშინ, 7 ივნისს, თორნიკე რიჟვაძის მიერ გაჟღერებული რეპლიკები, რომ ელგუჯა ბაგრატიონი [უმაღლესი საბჭოს წევრი „ერთიანი ნაციონალური მოძრაობიდან“] ნასამართლევია და რომ აჭარის განათლების ყოფილი მინისტრი, გია აბულაძე ეთანხმებოდა მოზარდის დაკავებას, რომელმაც „ბურთი მოიპარა.“

ამის დასადასტურებლად მან სპეციალურად გამზადებულ ეკრანზე გვაჩვენა სიუჟეტი გია აბულაძის კომენტარით, სადაც ის ფაქტს უარყოფითად აფასებდა და ამბობდა, რომ „ასეთი გადაცდომებით უნდა დაისაჯოს ნებისმიერი ადამიანი“. კომენტარში ის არ ამბობს, ეთანხმება თუ არა მოაზრდის დაკავებას.

„ვასაჯაროებთ ფაქტებს, ნაციონალური მოძრაობისგან განსხვავებით ჩვენ არ ვჭორაობთ… მე როგორც მახსოვს, ბატონმა გია აბულაძემ გუშინ განაცხადა, რომ ეს არის მონტაჟი… ასევე გუშინ საუბარი იყო გალიფ ოზთურქთან თორნიკე რიჟვაძის ნაცნობობაზე, მეგობრობაზე და ახლობლობაზე. დააბრალეს „ოცნებას“ თითქოს გალიფ ოზთურქი შემოიყვანა თავისი კომპანიით.“

ტიტე აროშიძემ ბრიფინგზე წარმოადგინა ლევან ვარშალომიძის ბრძანება ბათუმში, გოგოლის ქუჩაზე ნაკვეთის პირდაპირი წესით გადაცემასთან დაკავშირებით მიყიდვასთან დაკავშირებით.

თუმცა, გუშინ უმაღლეს საბჭოს დეპუტატებს ნამდვილად არ უთქვამთ, რომ ბიზნესმენი გალიფ ოზთურქი, „ოცნებამ“ შემოიყვანა. ოპოზიციის კითხვა უკავშირდებოდა გოგოლის ქუჩაზე უკანონოდ აშენებულ 9 კორპუსს, რომელიც ბოლო რამდენიმე თვეში აშენდა.

ვიცე-სპიკერმა დღევანდელ ბრიფინგზე განაცხადა ასევე, რომ „ნაციონალური მოძრაობა“ ნარკომანიისკენაა მიდრეკილი. მისი მტკიცებით ამას ადასტურებს ის, რომ მთავრობის სახლის წინ აქციაზე დაკავებულ დეპუტატებს მარიხუანა აღმოაჩნდათ.

თუმცა, სასამართლო პროცესებზე [„ბათუმელები“ ამ პროცესებს აშუქებდა] მსგავსი ბრალდება პოლიციას არც ერთი დეპუტატის მიმართ არ ჰქონდა წარდგენილი.

ტიტე აროშიძემ ბრიფინგზე ასევე განაცხადა, რომ მთავრობის თავმჯდომარე ოპოზიციამ გუშინ 25 -ჯერ გააჩერა:

„ამასთან, შეურაცხყოფას აყენებდნენ მას, მისი ოჯახის წევრებს და, რა თქმა უნდა, რეაქცია იყო ადეკვატური.“

ტიტე აროშიძის აზრით, „ყველა შეურაცხყოფას უნდა ჰქონდეს ადეკვატური პასუხი და თორნიკე რიჟვაძე გუშინ იყო ადეკვატური“.

____

გუშინდელი სხდომის დეტალებზე სტატია წაიკითხეთ აქ: