ნეტგაზეთი • RU

კუნთოვანი ატროფიით დაავადებული პაციენტები პრეპარატებს უფასოდ მიიღებენ

საქართველოს ჯანდაცვის სამინისტროს ინფორმაციით, საქართველოში სპინალურ – კუნთოვანი ატროფიით დაავადებული ყველა პაციენტი ძვირადღირებულ პრეპარატს უფასოდ მიღებს.

„ბენეფიციარების უმეტესობისთვის დაავადების მედიკამენტური მკურნალობა, მაღალი ფასის გამო, მიუწვდომელი იყო. სპინალურ – კუნთოვანი ატროფიის სამკურნალო პრეპარატის ერთი ფლაკონის ღირებულება 7485 დოლარია, რაც 12 დღის დოზას შეადგენს.

მედიკამენტის გამოყენება ხელს უწყობს სპინალური კუნთოვანი ატროფიის მქონე პაციენტების ცხოვრების ხარისხის გაუმჯობესებასა და სიცოცხლის ხანგრძლივობის გაზრდას” – წერია ჯანდაცვის სამინისტროს განცხადებაში.

მედიკამენტის უფასოდ მიღება „იშვიათი დაავადებების მქონე და მუდმივ ჩანაცვლებით მკურნალობას დაქვემდებარებულ პაციენტთა მკურნალობის“ სახელმწიფო პროგრამაში ცვლილებების შედეგად გახდა შესაძლებელი.

მედიკამენტის მისაღებად, ჯანმრთელობის ეროვნულ სააგენტოში რეგისტრაციის გავლის შემდეგ, ბენეფიციარის წარმომადგენელი, პირადობის მოწმობის წარდგენის საფუძველზე, აფთიაქში წამალს უფასოდ იღებს.

სპინალური კუნთოვანი ატროფია (სკა) მძიმე გენეტიკური, პროგრესირებადი ნეიროკუნთოვანი დაავადებაა, რომელიც იწვევს კუნთების ატროფიას და მასთან დაკავშირებულ გართულებებს. ანადგურებს მოტორიკის ნეირონებს, ისინი აკონტროლებენ ისეთ აქტივობებს, როგორიცაა საუბარი, სიარული, სუნთქვა და ყლაპვა.

იგი იშვიათი დაავადებების ჯგუფს მიეკუთვნება. უმეტესად დიაგნოსტირდება ბავშვთა ასაკში.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან