სეპარატისტული დონეცკის სახალხო რესპუბლიკის უზენაესმა სასამართლომ დღეს, 9 ივნისს, სიკვდილით დასჯა მიუსაჯა უკრაინის მხარეს მებრძოლ 3 პირს – ინფორმაციას რუსული მედია ავრცელებს.
ბრიტანეთის მოქალაქეებს, შონ პინერსა და ეიდენ ასლინს, ასევე, მაროკოელ საადუნ ბრაჰიმს, ბრალად ედებათ მონაწილეობა საომარ მოქმედებებში, როგორც დაქირავებულ მებრძოლებს უკრაინის შეიარაღებული ძალების შემადგენლობაში.
მედიის ცნობით, ბრალდებულები განაჩენის გასაჩივრებას გეგმავენ.
სამივე მათგანი აზოვსტალის ქარხნის ტერიტორიიდან იქნა გაყვანილი ტყვედ ჩაბარების შემდეგ.
„ბიბისი“ წერს, რომ ბრიტანელი ეიდენ ასლინი 2018 წელს გადავიდან დიდი ბრიტანეთიდან უკრაინაში თავის შეყვარებულთან საცხოვრებლად, მალევე მიიღო მოქალაქეობა და უკრაინის საზღვაო ქვეითი გახდა.
მაროკოელი საადუნ ბრაჰიმი 21 წლისაა. მან 2021 წელს მოაწერა ხელი სამწლიან კონტრაქტს საზღვაო ქვეითებში.
რაც შეეხება კიდევ ერთ ბრიტანელს, შონ პინერს, „ბიბისის“ ცნობით, იგი მეუღლესთან ერთად ცხოვრობდა უკრაინაში და ჯარში მსახურობდა.
_________________
