უკრაინის პრეზიდენტის მრჩეველი, მიხაილო პოდოლიაკი, ტვიტერზე წერს, რომ რუსეთმა ევროპის სისხლი ერთხელ უკვე გასინჯა და ეცდება ბოლომდე დალიოს ის. პოდოლიაკი აცხადებს, რომ რუსეთს მხოლოდ ძალის ენა ესმის და ამიტომ გამარჯვებისთვის აუცილებელია იარაღის ქონა:
„რუსეთი, რომელსაც ერთხელ უკვე გასინჯული აქვს ევროპის სისხლი, ეცდება მის ბოლომდე დალევას. დაშინებით, დამცირებითა და ძარცვით.
ერთადერთი ენა, რომლისაც რუსეთს ესმის, არის ძალის ენა. მათი უდიდესი შიში ჩვენი ერთიანობაა. გამარჯვების ერთადერთი გზა შეიარაღების ქონაა. კარგს უნდა შეეძლოს საკუთარი თავის დაცვა,“ – წერს მიხაილო პოდოლიაკი.
უკრაინის პრეზიდენტის მრჩეველი გუშინ, 8 ივნისს, რუსეთის დუმის მიერ ლიეტუვის დამოუკიდებლობის აღიარების გაუქმებაზე მსჯელობის დაანონსებასაც გამოეხმაურა.
პოდოლიაკის თქმით, რუსეთის დუმის განზრახვა „გააუქმოს“ ლიეტუვის დამოუკიდებლობა, იმის კიდევ ერთი დასტურია, რომ იმპერიის მადა უსაზღვროა. შესაბამისად, იგი აღნიშნავს, რომ მშვიდობის დამყარების მცდელობა რუსეთისთვის „სახის შენარჩუნების“ გზით თავის მოტყუებაა და ევროკავშირს მხოლოდ ომს მოუტანს.
„რუსეთის დუმის განზრახვა „გააუქმოს“ ლიეტუვის დამოუკიდებლობა, იმის კიდევ ერთი დასტურია, რომ იმპერიის მადა უსაზღვროა. ნებისმიერი საუბარი რუსეთის ბარბაროსული სახის შენარჩუნებით მშვიდობის დამყარებაზე თავის მოტყუებაა, რომელიც ევროკავშირს ომს მოუტანს. მშვიდობისკენ მიმავალი გზა მძიმე შეიარაღებაზე გადის,“ – წერდა უკრაინის პრეზიდენტის მრჩეველი.
8 ივნისს რუსულმა საინფორმაციო სააგენტო „რია ნოვოსტიმ“ გაავრცელა ინფორმაცია, რომ რუსეთის დუმაში დარეგისტრირდა კანონპროექტი, რომლითაც მმართველი პარტია „ედინაია რასიას“ დეპუტატი ლიეტუვის დამოუკიდებლობის აღიარების გაუქმებას ითხოვს.
