ნეტგაზეთი • RU

„ორბის“ უკანონო ცემენტის ქარხანა გარემოს ისევ აბინძურებს, სასამართლო კი საქმეს არ განიხილავს

დღეს 28 მაისს, ბათუმში, ფიროსმანის ქუჩაზე სამშენებლო კომპანია „ორბის“ ცემენტის ქარხანამ ისევ დააბინძურა ჰაერი. მიუხედავად იმისა, რომ ქარხანა 2020 წელს დააჯარიმეს, ქარხანა დღემდე უკანონოდ ფუნქციონირებს, რადგან როგორც მერიაში გვეუბნებიან, ის უნებართვოდ ფუქნციონირებს და არც არც გარემოს დაცვის სტანდარტებს იცავს.

„ბათუმელები“ დაუკავშირდა მუნიციპალური ინსპექციის სამსახურის უფროს ირაკლი მოქიას და ჰკითხა, რა ზომები მიიღო აღნიშნულ ფაქტზე დღეს ინსპექციამ?

„ვიყავით გასული, შემავალი მილი აქვს ქარხანას და ეს მილი არის გახეთქილი. ჩვენ შევატყობინეთ გარემოს დაცვის ინსპექციას და უკვე გავაჩერეთ ქარხანაც“- გვეუბნება ირაკლი მოქია.

„ორბის“ ცემენტის ქარხანა, რამდენიმე წელია რაც ფუნქციონირებს ფიროსმანის ქუჩაზე და პერმანენტულად აბინძურებს გარემოს. მსგავსი ფაქტი 2020 წელსაც დაფიქსირდა. მაშინ მუნიციპალური ინსპექციის სამსახურში გვითხრეს, რომ კომპანიას სასამართლო უჩივლეს და ქარხნის დემოტაჟი მოითხოვეს.

თუმცა, სასამართლოს სხდომა დღემდე არ ჩანიშნულა, მიუხედავად იმისა, რომ სასამართლო დავა 2018 წელს დაიწყო.

„უნებართვო საქმიანობის განხორციელების გამო, ჩვენ მივმართეთ სასამართლოს, თუმცა დღემდე არ არის სხდომა ჩანიშნული. ჩვენ ვერ დავავალდებულებთ სასამართლოს, რომ დროზე ჩაატაროს პროცესი. ყოველ შემთხვევაში, მე არ მახსოვს, რომ სხდომა ჩანიშნულიყო“-გვეუბნება ირაკლი მოქია.

თუ როგორ გამოიყურებოდა დღეს ფიროსმანის ქუჩა, იხილეთ თანდართულ ვიდეოში.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com