დიდი ბრიტანეთის დაზვერვის ინფორმაციით, ბრძოლები გრძელდება სევეროდონეცკში. ამავე დროს, რუსეთის აღმოსავლეთ ჯგუფები, უკანასკნელი 48 საათის განმავლობაში, ასევე აქტიურად ცდილობენ წინსვლას იზიუმის სამხრეთით.
„რუსეთის პროგრესი იზიუმის მიმართულებაზე აპრილიდან შენელდა, მას შემდეგ, რაც უკრაინულმა ძალებმა მოხერხებულად გამოიყენეს ადგილობრივი რელიეფი რუსეთის შეტევის შესაფერხებლად,“ – წერს ბრიტანეთის დაზვერვა 9 ივნისს, ტვიტერზე გამოქვეყნებულ რელიზში.
უწყების ცნობით, კიევზე წარუმატებელი თავდასხმისა და სერიოზული დანაკარგების შემდეგ, რუსეთმა ძალების აღდგენა სცადა, თუმცა მისი დანაყოფები კვლავაც დაუკომპლექტებელია.
„რუსეთი, სავარაუდოდ, რეგიონში უპირატესობის დაბრუნებას ცდილობს, რათა განაგრძოს შეტევები სევეროდენცკში და მოახერხოს წინსვლა დონეცკის ოლქის სიღრმეში“, – მიუთითებს დაზვერვა.
გაერთიანებული სამეფოს თავდაცვა უკრაინაში მიმდინარე მოვლენებზე სადაზვერვო ცნობარს ყოველდღიურად აქვეყნებს. 8 ივნისის პოსტში, დიდი ბრიტანეთის დაზვერვა აღნიშნავდა, რომ დაპყრობილ ხერსონში უკრაინამ გარკვეულ წარმატებას მიაღწია.
